FALAM JONATHAN

 

            Leitlun mipa tampi pawlin an harsat bikmi pakhat cu an rualpi, hnatuanpi, sumdawnpi, tlawngkaipi anmah hnakin an hlawhtlin tikah lole hruaitu ah an can tikah, upatnak pek, an kaihhruainak hnuai ih um, an thu lun hi asi. Nauhak deuh lai, farah harsat deuh lai ah a duhdaw aw zet rualpitha pawl tla an pitlin vivo tikah hnatuan tlang thei lo mi tampi an um, Kain le Abel te unau ihsi thawkin. Laimi (Falam) milesa thuanthu kan zoh asile Falam mipa pawlin an harsat bikmi pakhat asi ve. Cuvek lakah zohthimtlak zet tla sim ding an um. 1988 hnuah ramleng suak in ramkhelhnak hnatuantu lakah pu/pa le pawl karlakah cuvek harsatnak a rak um. Santhar mino pawl karlak khalah harsatnak a um mi hmuh ding a um. Zohthimtlak zet pakhat cu 8888 ih Falam phunsang tlawngta hruaitu pawl an si. An lakah sinak bang aw lo khalin khat le khat an co hlang aw thei ih upatnak an pe aw thei zet. Thangnawn pawl zoh asile pawlkomnakah harsatnak an neihzia a lang. Social le politics lam cu sim lo, biaknak lam khalah upa deuhdeuh, fimnak thangso deuhdeuh, Pathian mihman deuhdeuh, hnatuan tlang thei lo deuhdeuh hmuh ding an um hnuaihni. Laimi mibur thazang cahnak ding hrangah a tul zetmi pakhat cu thihruaipi pawl thansohnak le hlawhtlinnak vekin cohlan thiam, upat pek thiam, bawm thiam, dinpi thiam asi.

            Ramleng suak Laimi lakah Falam milesa pawl politics le social cangvaihnak ih cah lo nak bik pakhat cu thihhruai rual pawl lakah tanrual, thapek awk, dinpi awknak a mal ruangah asi. A biktakin pa le dinhmun ah a ding zo tu pawl dunglam thuanthu kum 25 kan sim asile thuanthu thei tu pawl cun a dikzia an thei theh ding. Asinan 8888 phunsang tlawngta lakah pawhtlang zetin pawlkom awknak, sihcih awknak, upat awk tawnnak a um hrih lai asi tiah sim theih asi. A bik takin ICA ah apehzawm awtu pawl hi tui ni tiang khat le khat tlaihsan awknak an nei zet asi. Khat le khat, an fimthiamnak, phurnak le tuah thei mi cio ah co hlang aw tawn in bawmbawi awk, dinpi awk an thiam zet asi.

            Ramleng mino deuh pawl zoh asile tuantlang, dinpi awk an harsat zet in a lang. Pawlkom dinmi ah Global Falam Mino, Chin Christian Youth International, USA Chin pawlpi mino, tvp mino pawlkom lakah mino mifim thiam deuhdeuh hawl in tuantlang nak a mal zet in a lang. Mah le lamzin ciar in pehtlaih mi vial hlawm awk tawnnak in a feh in a lang. Miphun pakhat thangso dingin bulpak thansohnak lawng a tawk lo; abur hnatuannakah thansoh a tul.

            Santharsan asi zo. Khuahlansan vekin mi pakhat ih ukbehsan asi nawn lo. Ka unau, ka pawl, ka khua, ka lamtang tiah lamtang tuah aw tahratin duhbul huatbul neihsan asi nawn lo. Laimi mi malte lakah Khrih ah le miphun ah unau vekin thlaihsan aw in a thangso mi in an fimnak thiamnak neihmi theihmi ti theimi pawl cu senpi vangtlang in kan hlawkpi nak ding  poh ah, a hlawkpitu ding hnenah, an hlawkpi nak ding hmun le can ah khat le khat co hlang aw tawn in kutkai in thansoh lamzin pansan asi zo. Tuihlan kum 50 ah salhnam tiah an rak hmuhsuam zetmi midum cu Amrica mirang pawlin an president ah an co hlang zo. Africa ramah minung cazin hmanah siar tel lo ding khawpin an rak nautat mi midum pawlin anmai ramah lalnak an co ih mirang pawl khalin upatnak an pek thiam zo. Santhar lungput thawn Laimi (Falam) milesa pawl nuntlang tuantlang tantlangsan asi zo.

 

            Leitlun pumhuap pehtlaih awksan ah Kawl ralakp uktu pawlin anmah a rak do rerotu, 8888 ih phunsang tlawngta lak ihsin ramdang ah fimthiamnak zir in Ph.D. digree sang nei pawl tla thurawn petu, mifim tiah upatnak an pek ih hnatuanpi dingin an sawm, ramsungah an hruai lut, dinhmun le upatnak an pek. Kawl ram mi ramleng ah fimthiamnak a neitu pawl an ko khawmsal, hnatuannak, dinhmun le upatnak pe in rampi in a hlawkpi nak ding hmun, can, tikcu, le pawlkom sungah covo canpual thatha an pek sawn asi. Culai lakah kan Chinmi hruaitu pawl ramsung um pawl in siseh ramleng ah ramthar ah lo hma thar sulthar a sat tu pawl khalin fimthiamnak thawn theihnak le hmuhnak a neitu pawl ruai in thansohnak lamzin kan hawltlang a thupi tuk.

 

            “Falam Jonathan” ti ah kawh tlak, Jonathan in David a rualpa a dinpi vekin rin um zet in thangtlang, khukhri rual pawl, thansohnak a bang aw lo, dinhmun a bang aw lo, lamzin a bang aw lo tla le miphun, pawlkom, le bulpak insang hrangah thathnemnak a suahpi thei tu ding Pathian in fimthiamnak a pekmi kan unau, ruallepi, khuk hri hruai pawl dinpi, sawmdawl, cohlang aw tawn in kan liang parah Pathian in a thummi kan miphun thuanthu tuahtha dingin ke kar tlang zir, thiam cio dingah duhsaknak in.

 

“Falam Jonathan”  ti ah kawh tlak ding khawpin tuisan mino, thangthar nonawn pawl, kan pupa pawlin an rak neihmi lungput tha lo, iksiknak, dokalhnak, dunglam ihsin ke phet awknak, simsiat thangsiat awknak, tvp tlansan in kutkai in kut le khat tungding aw tawn uhsi. Dr. Vum Son in a rak sim theu mi cu “Falam pawl cu hruaitu tha nan neih zik asile nanmah in a ke in nan phet cingcing asisi, ziangtik hmanah hruaitu tha nan nei dah lo ding” a rak ti. Dr. Vum Son in Falam pawl sinak a simmi linglerttu, mino, “Falam Jonathan” na rualpi an thansoh tikah, fimthiamnak lamah hma an sawn tikah eltaitu, an siatnak simtu, ke phet tu si loin dinpi aw, suang aw, bawm aw, cawisang aw, Pathian in nangmah lo hman a duh asi. Kan thuanthu thlengtu ding cu kanmah kan si. Santharmino pawl miphun dang in kan thuanthu in thleng sak lo ding. Nang le kei in “Bawipa, hinah keimah ka um” tiah dingngam tu si uhsi.

 

Kan khua kan ram thansohnak ding hrangah “Falam Jonathan” mino tampi Pathian in in pek sinsin hram seh.