DINTHAR SAL TUL MI

 

Santhar minung pawl hma kan sawn rero; hma kan sawn, kan thansohnak lakah a thupibik cu kan zumnak, lungput lam thansohnak asi. Sumpai, theihnak, leitlun thilah thansohnak cun zumnak, lungput thansohnak tel lo cun hlohnak lamzin asi. Tuihlan kum 100 ah laimi pawl cu nithlaknak lam milai pawl (westerners) pawl ih tuihlan kum 1000 reizo dinhmun ah kan ding. Kum 100 sungah miphun dang pawlin kum 1000 rei an rak fehpimi thuanthu cu laimi pawlin kan thleng zo. Culai lakah kilkip in khaikhawm le thandan dik in kan thansoh ding hi a thupi tuk. Culole, taksa kimlo thawn tahhtim asile lu lawng thangih taksa dang thanglo (theihnak lawng thangih nun tello), pum lawng tum ih taksa dang thanglo (lennak lawng ne ih nuncan ziaza sia), tvp zohmaawi lo zetin kan thuanthu hi neta tesinfa pawl hnenah tanta tla a si pang thei. Cuvruangah a hnuailam pawl hi ruahnak tipungtu ah ngan asi.

 

Midang mawhsiattu siloin lamhmutu

 

Voikhat cu sava in khawte insang pakhat te ih arpisur a lak, a thiarhloh ih an hmunawn lo. Intek pa cu a tho ih khaw inn hnenah a vak vivo, sava sualzia cu a aupi, ziangtluk sava thatlo zia cu intin asim vivo. A neta zanah sava in an arcang a lak sak lala. A tuah kel in a tuah thotho, inn tinah a vak ih sava siatvatnak a sim vivo. (ttnk)

 

Falam tonghmangtu pawl hi 100% khrihfa kan ti thei. Pathian nung zumtu kan si. Kanmah pulpak, insang, khua le ram, miphun, pengsungah a thlengmi, a cangmi parah midang mawhsiatnak kan ban a cu, kanmai thuanthu cu kanmai liangparah suangin ke kan kar a cu. Midang mawhsiatnak in siatnak dang a thleng dingmi a kham lo lawng si loin kan telefa pawl lungput a siatsuah theh.

 

Falam khawlipi a rawp duahdo mi hrangah Kawl le pengdangmi zohman mawhsiat ding kan nei lo, kanmah Falam milesa pawl tuanvo liolio asi.

Mi pakhat lungawiter dingin Pathian in midang pakhat hman a sersiam lo. Mi pakhatih lungawinak ding cu amah lawngin tuanvo a nei. Bulpak nun, insang, venghnen, khua le ram, miphun thuanthu liangparah suangin Pathian zumtu kan sinak langter a cu tuk zo. Midang mawhsiatnak bansan uhsi. Media, news lamah hnatuantu siar lo cun tefa vangnau thinlung siattertu tongkam, tokhawmnak, insang tappi kawm, mibur umkhawmnak le tlang cabawm ah siseh tawp thlang uhsi.

Cuhnakin kan theihnak fimnak cu midang lamzin hmuhtu ah hmang sawn uhsi.

 

 

Hnuk thlatu hnakin tungdingtu

 

America ramah social sceitntist pawl in an hliakhlai nak vek asile kawhhran sungtel pawl lakah zakhat ah pahra (10%) pawl hi cu kawhhran hnuk thlatu, thusia phurtu (satan postman) an si” an si ih zakhat ah pahra (10%) cu intek vek rori in a taunt, theitawk suah in kawhhran thansohnak hrang a taunt an si. Cun zakhat ah sawmriat (80%) mipi, thlihrannaknakah a fehtu, ziangruat mumal lo an si an ti.

Dr. Vum Son in a rak sim theu mi cu “Nannih Falam pawl cu hruaitu tha nan neih zik asile nanmah in a ke in nan hnuk thla cingcing si” arak ti dah.

 

 

Kan duhlomi, thuhrum hmangin Pathian in inpek dah lo. Hruaitu tha nei dingin mipi in duhnak kan neih a tul. Aman khung zetmi hruaitu tha neih kan duh asi ahcunaman khung zetmi kan pek zuam a tul. Mankhung zetmi thiltha ngah dingin alak in zianghman ngah a theih lo. Cuvek thotho in hruaitu tha cu kan camriam rero dingah Pathian in inpek dah lo ding.

Leitlun miphun hmuahhmuah kan zoh asile miphun pitling pawlin an hrauitu, siangpahrang, president, hruaitu pawl hrangah sum le pai, nunnak thap in siseh a phunphun in anmah hruaitu dung an thlun, an upat, sunlawihnak an pe, sumpai an pe! Kannih teh hruaitu tha hrangah sumpai, neihnak, nunnak ziangzat kan p eve?

 

Cun khatlamah, Kaiin cu that tahrat in Absolom cawimawi ciamco khal umze nei lo asi. Cuhnakin Pathian in in pekmi hruaitu cu David vekin a thluksiat can hmanah sawmdawltu, tungdingtu kan si ding sawn asi.

 

Zovek milai khal an sile kanmai miphun, kan peng milesa, kanmah lakah hruaitu kan neih mi cu tungding, sawmdawl dingin an tulmi sumpai, thazang, thlacamsak, hmanrua, bungrua, canpual tha pawl khal mipi pawlin kan pek hrimhrim tul mi asi.

 

 

Zumnak nun thuken tlamtling

 

Falam tonghmang pawl hi zumnak lamah piangthar aw ter zet kan si. Kan zumnak thuken, Bible in a zirhmi kan zohsal a cu. Bible in milai nun thurampi in zirhmi panga kan nunpi a cu tuk zo. Bible in milai nun thuken in zirhmi pawl tla cu 1) Pathian thawn bulpak pehzawmnak, 2) Mahlemah uk aw aw in Thlarau Thianghlim luahkhat, ukmi nun, 3) Insang le midang thawn pehzawm awknak, 4) Society le kumpi cozah thawn pehtlaih nak, le 5) sersiammi ziangkim parah pehtlaih le tuanvo, pawl tla an si. Himi lakah a pakhatnak lawng hi thupibik ah ret tahratin a dang pawl kan thlau thlak theh in a lang. Kan zumnak thurin, Bible in in zirhmi hi a kilkip in nunpi ding kan cu tuk zo. Khrihfa kan sinak kum 100 kan kim zo.

 

 

Bang awklonak upat le hman thangkai thiam

 

Mi tampi in Falam khawlipi a nuam hleice an rak tinak thu pakhat cu bang awk lonak lawm thiamnak hi asi. Falam khawsungah miphun dangdang umkhawm tikah zohman namthlak mi nautatmi le thleidannak um loten zalen zet le rualran zetin an rak nung tlang. Cucu zumtu pawl nuntu khawsak dan, Bible in in zirhmi, santhar minung pehtlaih nak, ramkhelhnak lam khalin an ngai pawimawh bikmi pakhat asi. Falam peng sungah hrin tete, Falam peng sungsuak hrin asilo mi, hrindang a ummi pawl siseh, biaknak le ramkhelh thu ah ruahdan bang aw lo , pawlkom dangdang siseh senpi vangtlang thinlung hmunkhat ten pawlkom, pehtlaih awk le tundin sawmdawl awkdan kan nunpi ding a cu tuk zo.

 

 

Ram dinsalnak (societal restoration)

 

Kan Laimi thuanthu kan zoh asile tuisan minung pawl cu zirnak, lennak, nuntu khawsak lamzin dangdang ah kan pupa pawl hnakin kan thangso nan lungput, miphun, khua le ram parah kan nuntu khawsak, milai pehtlaih awknak lamah kan tlakniamnak tampi a um. Kan pupa pawl cu miphun dang ih bawm lo in anmah te khua le ram an rak kilhim, senpi vangtlang an rak sawmdawl, an cawm, an kilhim, an thansohter, upa tihzahnak, nunmawi thawn, paraltha, pa taimai, mai ruahsuah lomi ei duh lo, miphun rinsantlak zet an rak si. Khrihfa kan sinak um 100 a kim hnu ah dingfelnak a tlaniam sinsin, khat le khat upat awknak, hruaitu upat tihzahnak, ram le miphun hrang tuanvo laknak, farah zawnzai harsa bawmbawinak, tvp, thatnak lam kan tlasam sinsin. Mibur umkhawm, miphun pakhat sinak hrangah a tulmi pawl kan tlasam sinsin. Kan society a hram in siatsuah, phawngsak mi vek kan si zo. Kan Laimi society tharthawh in ahram ihsin tuahthatsal a cu tuk zo.

 

Thansohnak hrang thupi zet thil pahnih:

i)                    Hruaitu tha ziangtluk kan dinpi,

           Miphun mibur pakhat ziangtluk a thangso cak timi cu an hruaitu ziangtluk a fim, a lian, a fel, a tha, a cak, tvp, bulpak thatnak hnakin mipi pawlin ziangtluk an dinpi, ziangvek tiang an hruaitu hrangah an pek awknak, an neihmi, sumsaw, bungrua, thazang, le nunnak tiang pek in ziangtluk an miphun hruaitu an dinpi timi parah a hngat aw sawn mi asi. Hruaitu hnen ihsin ziang ka ngah ding tiah kutdawh lungput si loin kan miphun hruaitu hrangah ziang ka tuahsak ding, timi lungput thawn thinlung hmunkhat in dintlang, dinpi, dunglehmai ketleforh ah dinpi asi tikah hruaitu in raltha zet le dingzetin thiltha lamzin dikah mipi, ram le kumpi pawlkom uk awknak khal hruai theih asi.

 

ii)                  ii) kan mifimthiam neih mi ziangtluk canpualtha sangka kan onsak ih an thu kan ngai.

A pahnih nakah a thupi zetmi cu santhar fimsan, leitlun killi pehtlaih awksan asi vekin santhar fimthiamnak a phunphun thawn leitlun killi ah miphun dang thawn tlan zuam awknak san ah kan miphun tungding cawisang in kan miphun Pathian ih tuanvo pekmi tuansuak thei dingin Pathian in in pekmi kan mifim mithiam pawlih fimthiamnak hmangsuak thei dingin senpi vangtlang thatnak hmasawnnak thiltha tuahnak hrangah ziangtluk sangka kan ong, an hnen ihsin zir duhnak lungput thawn ziangtluk kan zir, an thu kan thlun ih an fimnak in in kaihhruainak ah ziangtluk kan hgat aw timi parah an thansoh ding zat tampi a thum awaw asi.

 

 

 

Leitlun santiluang ih zirin ramsugn ramleng ah, ziangvek hnatuan in ziangvek dinhmun, nunnawm harsat kan tawn can khalah kan miphun Pathian cawimawitu, Khrih hmuihmel langtertu, kan miphun Pathian ih lalram karhzai tertu si thei dingin kan Laimi society cu a hrampi ihsin dintharsal a cu.