CHINMI LE SOCIAL MEDIA

March 2013

American president lakah President Obama hi presidential campaign ah social media hmang hmaisa biktu asi. Hmanlarbik mi social media pawl tla cu Facebook, twitter, YouTube, le email, tvp tla an si. Chinmi pawlin social media kan hmannak cu tuihlan kum 10 sung ihsin asi ti theih asi. Chinmi pawl lawng si loin leitlun pumah social media senpi vangtlang in an hmannak hi a rei hrih lo. Santhar ah social media hi a thaamah pawlkomnak, pehtlaihnak, thuthan awknak le sihcih awknak hrangah biaknak, mibur pawlkom, politics, pursum leilawnnak le miphun thuanthu, tvp ah thathnempi dingin ruatthat hmanthiam tul zet asi. Santhar bungrua, hmanrua thatha a suak vivo vekin santhar minung pawlin leitlun khawmual tinah a thleng aw rero mi milai pehtlaih awknak hmanrua pawl hi Chin mi pawlin kan hman thiam le thathnempi ding hi tuisan minung pawl le a ra lai dingmi tesinfa pawl hrangah thil thupi zet asi.

 

Pupa san minung pawlin an rak ruahban loin tuisan minung umnak hmun a tekdarh theh. Leitlun fimthiamnak khal a thangso cak tuk. Santhar milai pehtlaihnak hmanrua pawl thazetin hmanthiam asile tuisan minung leitlun killi ah a then aw mi khal mitthep karlo ah pehtlaih awk theih asi zo. Ramthen le tipidan in pehtlaih awknak a dal nawn lo. Miphun hlohlo nak ding hrangah siseh sunglekhat hrin le hnam, miphun pawl pehtlaih awknak hrangah siseh mibur, miphun, nunphung khaikhawmtu, senpi lungrual tlangmi milai nun thuthlung remkhawm theinak ding le biaknak zumtnak thu rual tlang theinak hrang khalah ciahneh awknak hrangah siseh man nei zetin hman thiam ding thil thupi zet asi.

 

Kum upa deuh pawlin email, tlang cabawm, pawl cu an hmang tam zet. Asinan social media, Facebook, YouTube, Twitter pawl cu mino deuh pawl lawngin an hmang tam ti theih asi. America le ramthangso pawl ahcun political campaign, biaknak lam thuthangtha simnak le pehtlaihnak, pursum leilawn, faklarnak, pawlkomnak, le milai pehtlaihnak, zirnak citintian in social media pawl cu hmanrua that zet le thupi bik pakhat vekin hman asi zo. Leitlun ram thangso pawl hnak hmanin miphun minung malte asimi le leitlun killi ah a tekdarh mi Chin miphun pawl hrangah social media pawl hi hman thiam ding a thupi sinsin. Zuk, video, le cangan mi pawl thawn pehtlaih awknak hmanrua pawl hi man tampi cem loin catbang loin neih theih hmantheih ringring asi. Internet hmangin santhar san minung pawl in TV, thuthang ca, zuk, video, movie, hla le zuknung tintian pehtlaih awk theih, hlawm awk theih asi tikah hi pawl man nei zetin a tulnak vekin hman thiamnakin santhar santiluang in a nawr rero mi Chin miphun thuanthu cu thatzetin humhim, le tuahthat, nunter theih asi ti khal a fiang zet asi.

 

America ram um, tleirawl tlawngta pawl lakah social media account nei lo an um hmanah mi malte lawng an si ding. Santhar minung pawl in internet, mobile phone, ipod, ipad le tablet pawl thawn internet an hman tikah hmaitawn in hmuhtawn awk lo mi hlaral minung, rualpi, sungkhat, duhdawtmi le duhdawttu, phurnak bang aw pawl catbanglo in pehtlaih ringring asi. Khrih Thuthangtha karhzai ternak ah siseh zumtu pawl nun pitling an neih theinak ding hrangah thuthatha sim zirh awknak, pehtlaih awknak hrangah siseh zum lo tu pawl hnenah Thuthangtha simsuahnak hrangah siseh biaknak lam khalin hman tangkai thiam a thupi zet asi.

Tahthimnakah, Falam Christian Church of Indianapolis in 2008 ihsin YouTube account a neihmi ah video 1,766 a umih voi 146,523 zohzo asi. Vimeo ah sermon, Pathian thu simmi video 362 a nei ih Thuthangtha simtu mi 50 lenglo thu simmi a um. Santhar minung pawlin mai umnak ciar ihsin online ah internet in video, zuk, thuthatha an zoh, an siar, an zir in an ngai thei vekin milai nun thawn a pehtlaih mi, Chin mipun thawn a pehtlaih mi, bianak, milai nunphung, fimnak le thuatha pawl internet ah a tam theibik le a rang thei bik in mi zokhalin lei killi ihsin an zoh, an ngai, an siar thei dingin ret thei ringring hi thil thupi, hmanrua thatzet Pathian in santhar fimthiamnak hmangin in pek mi asi. Roman Catholic Pope in twitter account a nei ve ih followers million tampi a nei. Cutin thutha cah duhmi a cah ve theu. Bawipa hmin sunlawinak hrangah social media pawl hman thiam cio a thupi.

 

“Justice for Jessica” timi India movie pakhat cun Jessica ih thihnak thu ah India thuthentu (court) in a thattu pa, milian fapa cu an luatter tikah social media hmang in nasa zetin campaign an tuah tikah India central government in Jessica case cu an on saksal. Cuvek in santhar minung pawl nuntu khawsaknak ah cozah kumpi in siseh khawsung le pursum leilawnnak, biaknak lam thu ah siseh mibur, senpi vangtlang le bulpak nun ah siseh dik lo nak, nekcep awknak, palzuut awknak pawl doneh thei ding khalin social media pawl hi hman thiam a thupi zet asi. Voikhat cu USA ih congressman pakhat a taksa lawngpi (bawngpite cu a hruh) kha online ah a zuk a tar ruangah mipi pawlin nasa ten an sawisel ruangah a hnatuan ihsin a suah phah. Cuvekin thatnak that lonak, zoh mawilo, nekcepnak tuar, nuncan ziaza mawi lo pawl a theihtu in mipi theih dingin online social media ah hmakhat te ah thlenter asi tikah senpi vangtlang le miphun, rampi hrangah thatnak, bulpak canpual humhimnak le thansohnak hrang khalah hman tangkai theih asi fawn. Voikhat cu America mi pakkhat kha Middle East ramah an kaih. An kaih ve ten palik motor sung a thlen ve ten a twitter account ah “arrested” (kaingah) timi cafang, tongkamkhat te a kuat (twisted) tikah leitlun pumhuap ah a ummi amai twitter account ih rualpi ah a ret mi pawlin second rei lo te ah an rak theih tikah USA cozah official pawl hmakhatte ah an sim lohli. Cutin thawng inn sungah rei um man loin suah asi. Cuvek in thatnak hrangah social media hi Chin mi pawl hrangah nasa ten hman thei ding a thupi.

 

Nunphunglam zoh asile khua hlan pupa pawl nunphung cu a hlo sinsin. A bik takin leitlun killi ah a tekdarh mi Chin miphun pawl hrang ah laitlang, lairam ih nunphung mawi le nuntu khawsak dan mawi le tha pawl hloh lo dingin siseh lei killi ah a tekdarh mi kan miphun pawl cu ruantlang ten santhar nunphung pakhat, cawncawp le sarcawp nunphung le pupa nunphun lak ihsin athami la kawmin, santhar nunphung ruantlang ten kan kenkawh vivo theinak ding hrangah siseh social media kan hman thiam a thupi sinsin. 2013 Chin National Day, Hakha ah an tuahmi thu ah zubel cu kawl bawi upa le Chin mi rinsan zetmi pawlin an in lai zuk cu social media sungah an tar tikah nasa ten leitlun hmun dangdang ihsin Chin mi pawlin simmi an neih phah. Cun President Obama kawlram a tlawn tumah President Obama in Daw Aung San Suu Kyi ih biang a hnam lai zuk kha online social media ah an rak thlah tikah leitlun killi ihsin mi tampi in a selam a thalam, kawlram nunphung thawn a kaih aw maw, tiah an sim cio. Chin Affairs Minister Pu No Tha Kap in President Thein Sein thawn an zuk facebook ah a rak post tikah mi tampi in tongkam an rak bet ih thazang an ngah thu an sim. Cun Chin National Day, Chin New Year Fetival, Chin nunphung lam, thuam, nuntu khawsak, nawm awknak, tongkam hmanmi le hla, cangvaiih dan pawl online social media ah thlah asi tikah mi tampi in nundan awlsam ten zir awk, cawn awk, theihawk ter theih asi tikah a thami ciahneh awknak hrangah hmanrua tha asi fawn. Nunphung hrangah social media nasa ten hman thiam a thupi.

 

Santhar thuanthunung ruangah eltheihlo in leitlun killi ah sunglekhat, khawkhat, khawhrhan khat milesa, hrinkhat milesa pawl thenthek awk theh asi.Sihmansehla, hmun tin kiltinah a thenthek aw mi Chin milesa pawlin mah le sungkhat, hrinpi, khawpi, kawhhranpi, thurualpi, phurnak bang aw pawl tla social media hmangin pehtlaih awk asi tikah nasa ten pehtlaih awknak a thatter, catbanglo in sihcih awknak a neihter tikah sungle khat, hrinpi le cipi, miphunpi, pawlkompi, phurnak bang aw pawl tla tuantlangnak, sihcih awknak tha a neihter asi. Tahthimnakah, Zawlte khua mi , Ngun Rih Lian bawhlungsit thiam cu a bawhlung sit lai, China ramah a fehnak zuk pawl, miphun dang pawl thawn an kuah aw ih laksawng an lawm lai, tvp zuk mawi zetzet Facebook, social media ah an rak tar tikah mino, fala tlangval tampi in an rak hmuh tikah an tha a tho in an pehtlaih awk phah. Cuvek in miphun, hrin le hram, pawlkom, phurzawng bang awpawl pehtlaih sihcih awknak hrangah social media pawl tha zetin hmanthiam a thupi fawn.  Cutin fala tlangval nupi pasal hawl awknak ah siseh santhar minung pawl ruahnak le lungput hlawmkhawmnak hrangah siseh social media cu hmanrua tha asi.

 

Hnihsuak hi leitlun miphun zapi ten an neih mi asi. Sa-taih (post) sungah cathlap thawn ca kuat awk tikah zohman in tipithuamthum danah a ummi sungle khat cakuatnak ah hnihsuak sai an um dah zik lo. Asinan social media hmangin lei killi ah a then darh aw mi santhar minung pawl cu hnihsuak citintian, nunphung langtertu pawl tla hlawm awk theih asi. Tahthimnakah, Facebook sungah “capoh hnihsuak” timi group cun lai nunphung, khawte hnihsuak le an vak sukso nak ramdang miphun dang pawl hnihsuak capoh tiang hlawm awk asi tikah pehtlaih awknak a thukter in a nungmi mibur pehtlaih awknak a neihter hai asi.

 

Cutin social media hmannak in tong, nunphung, thuam, thu hla, ram, minung, thuanthu, thiltha, thuanthunung le hlun, duh um le tihnung um pawl, tvp ziangkim milai nunthawn a pehtlaih mi pohpoh zuk, video, cangan in siseh catbang loin hlawm awk asi tikah a nungmi le a cak zetmi mibur, bulpak, miphun le pawlkom pehtlaih awknak thazet a suahter asi. Pawlkom, mibur, veng, le phurnak bang aw pawlin ziangtin santhar hmanrua tha, social media pawl hi kan san minung pawl thatnak hrangah kan hmang sinsin ding timi zir, hawl, le hman tangkai thiam ding hi thil thupi zet, santhar bungrua, Pathian in milai fimnak hmangin in pek mi asi. Bawipa Pathian hmin sunlawinak hrangah social media hmang cio uhsi. Miphun hlohlonak hrangah le thiltha tuahak hrangah social media hmang uhsi.

 

Cangantu: Rev. Hre Mang, Pastor @ Falam Christian Church of Indianapolis, USA. Zirnak, B.A. in political Science, (Hartwick College, New York, 2002); M.P.A. Master of Public Affairs (Indiana University, Indiana 2005), B.Th. & Th.M, Theological Studies (India campus, 1999). 1988 ah Mandalay University kai lai ihsin Burma rampum buai ruangah kawlram suahsan in “8888” tlawngta cangvaihnak teltu asi. 2000 ah US Congress ih tuahmi scholarship program thawn USA ah feh in tlawngkainak pehzawm in siseh Indiana State government hna kum 7 a tuan hnu ah Pathian kawhnak cohlang in pastor a tuan. Zirnaklamah Ph. D. in Leadership, Tennessee Temple University ah a zir rero lai.