CHIN MINO LE SANTHUANTHU

 

 

            Milai thuanthu ah a um kello dinhmunah tuisan minung pawl kan thleng. Kan pupa pawlin an theih dah lonak ram, leitlun killi ah Chin miphun pawl kan tekdarh theh. Santhar fimthiamnak in leitlun killi pehzawmnak a awlsam ter. Khuahlan pupapawl khawruahnak in a ban lomi le an rak nuntu khawsakdan in a huapban lomi santhar nuntu khawsaksan ah tuisun minungpawl kan nung, kan tlangleng, kan khawsa. Cuvek lakah leitlun killi huap in minopawl hmuhtawnmi ruah khawmnak, mibur tumtah burkhawmnak, le hmanruapawl hlawm awknak hrang tawnkhawm a thupi.

Leitlun miphun pakhat ciar in hmun le ram, kaihhruai awknak an neih cio vekin Chin mipun pawl khalin san a thleng aw rero mi ih zirin ziangtin kan thuanthu nung kan hmaitawn ding, kan tesinfa hrangah ziangvek thuanthu kan tanta dingih leitlun hrangah ziangvek man kan nei timi mibur khawm, ruat khawm, kutkai in kekar tlangsan asi. Santhar Chin mino pawl, Pathian in fimnak theihnak le thazang in pekmi pawl burkhawm in ruahnak thatha thawn lungkhat ten kan miphun Pathian in tuanvo in pekmi tuansuak thei dingin tuan tlang asile ziangvek thuanthu santiluang lak khalah santhar Chin miphun thuanthu mawi sersuah thei asi hrimhrim ding.

Leitlunah a zalenmi rampawl lakah a tum siseh a te siseh ramdang thawn a pehtlai lomi ram le miphun an um nawn lo. Ramsung ramleng, mai miphun sung le miphun dang thawn pehtlaihnak thaten nei in tuantlang a thiamtu miphun le rampawl cu an thangso cakin hlawknak a tambik an tel ringring asi. Chin mino lakah pehtlaihnak tha neih tikah mino mibur thazang cakter in thiambik neipawl, duhmi bangawpawl, tuantlang theinak lamzin a suak vivo dingih senpi raal cu do tlang in senpi thatnak cu kutkai in tuantlang asi thei ding asi. Santhar fimsan asi vekin leitlun killi ah miphun dangpawl fimthiamnak a phunphun siseh Chin miphun lakah fimthiamnak neihmi pawl siseh senpi hrang thatnak tuansuah asi thei nak ding hrangah hmanthiamdan zir, lamzin hawlin pehtlaih awksan asi.

Chin society kaihhruai awknak cu a hram ihsin phawngmi thingkung vek asi. Uk awkdan, kaihhruai awkdan, mipi sihcih pehtlaih awkdan pawl tharthawhsal in kan ram dintharsal a tul. Leitlun pumhuap pehtlaih awksan ah ziangvek thilri, inn le lo, sum le pai, lennak ziangvek kan nei timi hnakin ziangvek nuntu khawsakdan, milai nun thuken nei in kan nungih ziangtin kan pehpar aw in kan sihcih aw, ziangvek milai mibur nunsan le tumtah, man neihter mi kan nei timi sawn hi ram le miphun, sersiamtu Pathian cawimawitu sawn asi. Lennak, thil le ri, sumpai thu ah leitlun miphun dangpawl thawn tlan kan zuam ban lo hmanah tangka in lei theih lomi le zohman ih siatsuahsak theih lomi milai nunnak ih a man khungbik sawn nuntu mawi, milai nunthuken thawn a nungmi kan si ahcun ziangvek tikcu can santhuanthu, ziangvek miphun le rammi pawl karlak khalah upat tlak, rinsantlak, cawimawi tlak Chin miphun kan si ringring ding asi.

Santhar mino pawlin thil pathum a thupi zetmi tuah tulmi a um: i) Ramsung  ramleng Chin mino zapi ten pehtlaih sihcih awknak tha, ii) Thuanthu tha lo tanta tulmi tanta in Chin miphun thleng awknak hmalak, iii) Leitlun killi santiluang in a fehpi mi santhar milai nuntu khawsakdan canpual tha Chin miphun hrang sawrbawkpi, tipawl hi a thupi zetmi le tuahtheihmi khal an si. Chin miphun cu mipum malte kan si vekin pehtlaihawknak, sihcih awknak thazet thawn Chin mino pawl thazang kan funkhawm a tul asi. Khuahlan san ihsin pupa ro vekin kan neihmi rikam, hrinhnam, peng le tlang, biaknak pawlkom rikham pawl hi thiatbal tahrantin Chin mino zapite miphun ah pumkhat sinak, Pathian pakhat bemi miphun sinak langter in santhar mino thazang burkhawm thiam a thupi. Santhar ah hriamhrei thawn do awksan asi nawn lo, khua hlan ah a rak do aw rero tu rampi le miphun tampipi pawl tla cabuai parah thurel khawmsan asi. Chin miphun santhar mino pawl ziang hrinhnam, ziang khua le tlang, ziang biaknak pawlkom,  farah nauta le milian ti um loin pawlkom, pehtlaih, sihcih awknak tha nei thei dingin zuam, tuah a tul asi. Cutin pehtlaih sihcih pawlkom awknak a um tikah fimthiamnak le thiambik neipawl siseh duhmi bang aw pawl tangtlang in miphun thuanthu tuahtha dingin tuantlang nak a suak vivo ding asi.

Thleng awknak nei lo miphun pawl cu dunglamah tanta vivo an si. Miphun fate tampi kumtin an hlo vivo, an kiangkap miphun tum pawlin an dolh vivo. An thuanthu a hlo ih leitlun khawmual ihsin an pupa thuanthu theihhngilh asi vivo. Chin miphunpawl khal thleng tulmi pupa ro tha lo pawl, nuntu khawsak, khawruahdan tha lo pawl cu tanta tahratin a thianghlimmi, a cakmi, thiltha le upattlak asimi santhar nuntudan mawi, kan biaknak thurin thawn a kaih awmi milai nuntu khawsak thuken tha le cawimawi tlak nunphungthar sersuahsal in kan ram dintharsal a tul asi. Thathnemnak a nei lo mi khua hlan pupa san ih hrin le hnam, khua le tlang, pawlkom karlah huat awknak, thenthek awknak, thleidan awknak, dungtun awknakpawl tlansan in santhar sihcih awknak tha lamzinthar ah kutkai in kekar tlangsan asi zo. Eltheihlo in kan thuanthu tampi cu a thleng awk rualrual in kanmah in tumhrim rori in kan thleng tulmi khal tampi a um asi. Kan hmuhmi, ei mi, thuam, nuntu khawsakdan, pehtlaihmi khal tampi a thleng aw zo. Chin miphun thuanthu tuahtha dingin thleng tulmi thuanthu tha lo pawl dunglamah tanta in miphun le miphun Pathian cawimawitu santhar thuanthu mawi le nunphung mawi, sertharsal uhsi.

            Chin ram sungah Chin miphun pawlin kan neih lomi, theih lomi thiam lomi tampi leitlun killi ah a um. Cupawl thawn santhar Chin miphun thuanthu tuahtha dingin canpualtha hmang thiamtu santhar Chin mino pawl cangvaihdan thar in kekar a tul. Ramsung ihsin ramlengah nawrsuak aw tahratin miphun dang hnen ihsin kan zir, kan laklut tulmi siseh ramlengah a umcia mi Chin mino pawlin ramsung thansohnak hrang tuansuah thei ve dingin siseh lamzinthar hawlsuah a tul asi. Leitlun killi ah a tekdarh mi Chin mino, santhar minung pawl kutkai in miphun thuanthu tuahtha dingin tuantlangsan asi. Chin miphun lawng si loin leitlun miphun tintian hnen ihsin Chin miphun le ram in a tulmi fimthiamnak neihnak pawl cu lalut thiam in hmailak can asi.

            Innsang pakhat tungding dingah intek minung pawlin tuanvo an neih vekin Chin miphun thuanthu tuahtha dingin Chin mi pawl lawngin tuanvo kan nei asi. Kan liangparah a thum aw mi miphun thuanthu tuahthat ding cu bulpak tulmi hnakin thupisawn ah retcio in kutkai in kekarsan asi. Sihte rual an komkhawm awk tikah sihte pakhat ciar hnakin a tumsawnmi cucik kharbawk ruangpi tla an zawn thei vekin Chin miphun pawl mimalte, thazang mal sihmansehla sihcih pehtlaih pawlkom awk thiam in mibur thazang kan hman thiam asile pakhat cio, pengtkhat, tlangkhat ciarin kan tuah thei mi hnakin alet tampi tuansuah theih asi ding. Santhar canpualtha sangka cu leitlun khawmual killi pawhtlang in Chin miphun Pathian in in onsak zo vekin kan khuaruah, tongkam, le tuahnak ah siseh pehtlaih, pawlkom, le sihcih nak khalah siseh tumtah le hmuisel khalah leitlun pumhuap in ruat, sim, tuah le tuansan asi zo. Santhar Chin mino, miphun le ram Khawzing Pathian in malza sawm sinsin hram seh.