CHIN MIPHUN PUMKHAT SINAK LANGTER CAAN ASI

 

Kan san thuanthu kan zoh asile pumkhat sinak langter nunpi caan asi.

Ziangruangah?

Kan miphun thuanthu kan zoh asile rulpi in zuknung nunglai a dolh ih a taksa hrangkhat lawng a lanmi vekin leitlun santilung in a dolh zik cuahco mi kan si.

i)                    Ramkhelhnak lamah kan miphun thuanthu kenkawh thei lo in kan miphun sinak a hlo cuahco;

ii)                  Zumnak lamah Khrihfa kan sinak kum 100 a luan zo, asinan kan pupa rirai bia pawl hman tluk loin santhar minung pawl nuntu ziaza, mibur, insang, bulpak, vantlang nun kan zoh asile ningzahthlak dinhmun kan thleng zo;

iii)                Pursum leilawn kan dinhmun kan zoh asile farah zawnzaihnak ruangah sumpai piahnih khat ruangah kan miphun Pathian phatsan in miphun sinak zuar duh ding dinhmun ah thlasam le rilrawng mi, kan tam tuk zo;

iv)                Miphun sinak lam nun kan zoh asile kan pupa san ah cun mipa kum 18 kim hmuahhmuah miphun ralkap an rak si, cutin ram le miphun thuanthu an rak humhalh in miphun sinak an rak kenkawh, thuanthu an kilhim. Santhar minung pawlin miphun thuanthu tuahtha dingin an liang parah suanmi tuanvo an neinawn lo;

v)                  Pumkhat sinak kan zoh asile kan pupa rirai bia pawl hman tluk nawn loin Pathian nung, duhdawtnak Pathian, ngaidamnak Pathian, tangdornak Pathian betu, biaknak lam hruaitu pawl lala in kan mipi pawl ek cuaktek vekin an thendarhter zo;

vi)                Kan milesa pawl zoh asile Lairam sung um kan mal tuk, miphun malte kan si lai ah lei killi ah kan milesa a cikpalak in an tekdarh theh zo, ziangti hman in a bur in finkhawm theih an sin awn lo;

vii)              Leitlun pursum leilawnnak lam zoh asile leilun pumhuap pehtlaih awksan (globalize village) ah kan um zo ih leitlun pumpi cu khawte pakhat vek in pehtlaih awk theh asi, leitlun hmunkip ihsin kut thilthiam fimnak le tuansuah mi zuar ding lei ding pawl lei killi a thleng theh zo;

viii)            Fimthiamnak lam kan zoh asile leitlun minung pawl cu vanrang deng tian an thleng, culai ah mi tamsawn kan Chin mi pawl cu farah zawnzai casiar thiam lo, ca ngan thiam lo le siar ding nei lo, ngannak nei lo, an si ih leitlun miphun dang pawl thawn tahthim asile mibur zoh ahcun tuihlan kum 1000 tluk lai in dungah kan tang lai;

ix)                Kan san mino thatha, fala tlangval, hmailam hruaitu ding pawl cu lei killi ah kuli hlawh in, mi lian pawl hnen-um, sal vekin hnatuan in sumpai hawl in theih lo nak ram, miphun dang pawl sal vekin an vak an tawi; (Ka mitthlam in ka ruat tikah ka mit rialti bang a luang)

x)                  Hmakhat te ah miphun hlohnak, zumnak dungtun tahratin purpuar duh ruangah nawm duh ruangah hlo theh thei dinhmun ah kan ding asi.

 

Ulenau pawl,

Khrih ah le miphun ah pumkhat kan si; danglamnak ngaingai kan nei lo.

 

 

Pumkhat kan si ngaingai maw?

Kan thazaang ziangah a hngat aw aw?