VANGTLANG NUN‎ > ‎

CALGARY

Calgary

A hmin a danglam zet. Leitlun khawpi ka hmuhmi lakah a hmuntual zoh ahcun um cak umza asi. Rocky tlang pawl thawn a nai aw zet. Zinan suahnak ramkulh sung khawpi asi ih pursum leilawn ei hawlnak a tha. Whitethorn veng dawrpi (mall) sung feh cu Asia ram tlawng vek asi, mirang hmuh ding an mal zet, Asia mi an tam. Lupawng le Sari hruh Kala, hmuanthlangpa asi lo sawm ti dingmi Chinese le Korea lam an tam. Chinmi, Laicin sempi pawl cu an zate deuh thaw in Delhi, India ihsin ra mi pawl an si. Laicin sempi te pawl, kum rei lo te sungah inn an lei, nuntu khawsak an dingcang cakzia hmuh tikah lung a zur in Pathian thangthat lo theih asilo. Inn man a khung, Laicin sempi te pawl inn lei mi pawl cu 3 bedroom inn pakhatah Canada $ 300,000 lenglo man lawnglawng an si, a hrek cu $ 35,000 tlunman an si. Pathian biakkhawmnak hmunhnih ah an then aw. Laicin sempi te umkhawmnak kipah Pathian nung bia in an nung hmuh tikah lung a awi hlei cu. A khua tonak cu tlangmual tete pehzawm aw parah asi ih a nuam zet, vur tlak lo lai caanah ka thleng tikah nikhua a nuam hngin. Amah lawngte ni a sau tuk, zing 4 AM hrawngah khua a vang ih zanlam 10 PM hnu lawngah khua a thim, mikhual hrang ahcun cangsual a awlte. Calgary khua ah a ummi Laicin sempi te pawl cu mirang tong tla an thiam zet, mahte an tohdelh aw zet. Hnatuan an taima, pawlkom an nuam, Pathian an duhzet, khual an tha, sim ding tampi a um lai. 

Pathian thu thawn pawlkomnak, May 31 ihsin June 9 zan tiang, ni 10 sung kan nei. Zumtu pawl Pathian thu an duhzia, thlarau rawl an halzia hmuh tikah an sungah a nungmi a um ti a fiang. Pastor le kawhhran milesa pawl thlacamnak Pathian in a sang asi ti a fiang. Khat le khat an duhdawt awkzia, an tlaihsan awkzia hmuh tikah Zisu in “Pakhat le pakhat nan duhdawt awknak in ka dungthluntu nan si ti mi in an lo thei ding” (Johne 13:35) atimi a takin a kim asi tiah i ruatter. Delhi lam ihsin thuanthu tawm aw, hlawm aw, tuar tlang, har tlang, hni tlang, nuam tlang, an si ih khawkhat, unau sulkhat kual vek an si. Mikhual an duhdawt thiamzia le mithmai pan ten duhdawtnak an langterzia hmuh tikah Pathian Thlarau in a umpizia alang. Nu pawl thlacam taimak zetin Pathian hnenah an hlan awknak pawlin Pathian Thlarau cangvaihnak a langter sinsin. Nauhak tete pawl Cawlhni Bible zirnak an neihmi pawl hmuh tikah lung a tho zet.

Royal Terrell Museum, Rocky Mountain, tvp fehin mit tlai zet in khuaram kan zoh. A hmunhnih ten zuknung zuknak ding hmun tha veve an si. Pu Duh Luai kan mang nasa. Ramboo, India movie zuknung zuktu pawlin zuknung an zuk theunak asi an ti. Terrell Museum kiangkap tlangmual, lung khawkrawk pawl cu maksak danglam zet an si. Rocky Mountain, vur tlang pwl par ihsin khuaram cuan tikah laitlang khawte, Zalwte, Airibual, Thungthul ti pawl tla a lang ding vekah ka ruat. Leitlun ah zohmawi, nuam lakah telh tlak an si veve. Thli a thiang, boruak a nuam. Museum sungah Dinosaur ruhro pawl cu mak tak an si. Pathian kutneh leitlunah thil a rak cangdah mi pawl thu tampi mi a ruatter. 

Calgary cu kan ci le kuang, laicin sempi te pawl hrang ahcun ramthar, khawthar asi. Kan pupa pawlin an rak theihdah lo mi khua le ram asi. Leitlun miphun tintian umkhawmnak ram asi. Dawrpi sung rawldawr ah leitlun rawl citintian a um, Asean rawl, Arab rawl, Kala rawl, Mirang rawl, cikim in a um. Israel miphun pawl Kanaan ram an lut thu i ruat suak ter. Kanaan ram an lut tikah Egypt ihsin a suakmi Israelpawl lak ihsin mi pahnih lawng an tel; midang cu nelrawn ah a suakmi lawnglawng an si. Calgary ah hmunkhuar in a um hmaisatu, khawsattu Laicin sempi te pawl hi harsatnak citintian lak ihsin thliarhran mi vek an bang. Mitthli thawn, lunglen, harsatnak a phunphun, tong zir cawp, theih lonak, ruahdah lo mi, harsatnak citintian tuar hnu ah Pathian in hmunkhuar hmaisatu, Laicin Sempi te pawl hrangah sulsattu dingah a hrilmi pawl retkhawmmi vek an si. An tuarnak a tam zetnan dung an tawlh lo, an duhdawt aw aw. Hnatuan an taimakzia cu US, le Canada ah a ummi lakah Calgary Chin mi pawl tlukin a taima an um pei maw, ti tlak asi. Pearl mankhung zet cu rannung cikhat ih mitthli ihsin a cangmi asi an ti vekin Calgary ah a sunglawi zetmi Pathian tumtah vekin Chinmi pawlin thuanthu nei ve dingah Laicin sempi te pawlih harsatnak tuarnak mitthli in a rahsuahmi cu Pathian lunghmuizawng parmawi asi ding ti a fiang zet. Kawlram, Mizoram, New Delhi, ihsin Calgary, Canda ah hmun a khuar tu, Laicin Sempi te pawl parah Pathian umpinak langhngan zetin lang sinsin hram seh tiah thlaza ka cam. 

Ni 10 sung Pathian thu thawn kawm awknak ah Khristian nun pitling, leadership, thupawl ruat tlangin tikcu hman asi. Danglam zetin Pathian Thlarau in zumtu pawl lung a khawng zetin a lang. Zumtu pitling nun, bulpak Pathian thawn pehzawm pawlkomnak, Bible ah nunhram hngat awkdan, insang le pawnlamah zohthimtlak Khrih palai tha nun, kawhhran sungah Pathian Thlarau ukmi hruaimi nun, khat le khat karlakah rualrem remdaihnak, duhdawtnak, nitin nun lungawi diriam hnangam daihnak nun, mibur pawlkom sungah Thlarau zalen zetin a len theinak mibur mizia le cangvaihdan, tvp, Pathian thutak ah hram a bun aw mi mibur, kawhhran, khua dinsuak dingin Pathian thu thawn pawlkom awknak neih asi. Bible in a zirhmi Khrih ih nunphung thawn Calgary ah Chin mi thuanthu hrambun dingin ruat le rel, thlacam khawm asi. Nihra zan, zan netabik cu lung a leng, mitthli a tla, “Mi zonzai pawlin Zisu cu an zoh i, ziangtik khalah an ning a zak lo” timi hla kan sak ih cemter ding khal sian a um lo. Bawipai Thlarau umpi nak a takin kan tep cio. 

Zisu a rat sal hlan lo, Laicin sempi te pawl cu Calgary ah, hmundangah a thlengmi laicin sempi te pawl bangin, tesinfa nei in an um lanta ding. Chinram ah duhdawtmi le duhdawtu zapi te kim zetin zatial kutkaih ti a um nawn lo ding. Chinram ziangtluk in thangso khal sehla lei killi ah a tekdarh aw zo mi Laicin sempi pawl zapite hruaikir saltu thuanthu a hersal nawn lo ding ti theih tikah Calgary tlang ka liamsan cu ka lungsung mitthli a luang. Zisu kehram ah kan tawng aw ringring ding tiah cibai buuk aw tawn in lotheihlo in kan then awta. Indianapolis ah tlung loin Houston, Texas ah Southern Baptist Convention, Annual Conference ah ka feh cih. Milai 5000 lenglo lakah, Chin mi midang zohman ka hmu lo, banphar in Pathian ka thangthat tikah Laicin Sempi te pawl thawn Pathian thangthat tlang lai ka ngai zet. Lei killi ah a tekdarh mi kan miphun pawl, an thlennak kipah Bawipa hrang rinsantlak zumtu tha si cio hram hai seh tiah thlaza ka cam. Leitlun killi ah a tekdarh zomi, laicin sempi te pawl, ziangtik hmanah zapite kim in Chinram sumtual rawn dir in kut zatial kaih ti a um nawn lo ding nan Zisu kehram ah tawng aw cio uhsi. 

8888 tlawngta pawl hramlak kan um lai ah hla ka rak phuah mi “Lungduh lenrual zapi te thawn kutzatial kai in Chinramah zaduh lennak caan Cungkhua ZIngnu in khua ruat seh” timi hla cu a cangsuak thei nawn lo ti a fiang. AD 70 ah Israel pawl cu an ram le an biak inn pi siatsuahsak an si ih Rome ramah salah kaih an si tikah an miphun an tekdarh theh ih 1948 tiang ram nei loin an um lanta. Asinan Pathian zangfahnak in kannih Chin mi pawl cu “Chin ram” ti ding tla kan nei lai, miphun dang uknak hnuai ah um hrih hman sehla. Chinmi, Laicin sempi te pawl, kan thlennak hmun kipah Cung Pathian tihzah in rinsantlak Bawipai saltha si cio dingin, bulpak catbang lo Pathian thawn pawlkomnak, nitin Bible siarnak, insang nuam le mibur pawlkom tinah duhdawtnak, remdaihnak, khat le khat phurrit sawng aw tawn in tundin awknak, umnak rampi kumpi parah rin um le dingfelnak in a nungmi miphun, mibur, bulpak si cio dingin zuam cio uhsi. Bawipa thatnak cu Chin ram le Chin miphun lak lawng si loin leitlun miphun citintian, ram tinkipah langter in leitlun ramtinah Pathian thlawsuah co tu, nunpi tu le thiltha lei killi ah a karhzai tertu, Pathian in a duhdawtmi leitlun miphun tintian hrangah Bawipai hmin in lungawinak le thatnak tipungtu ah kan miphun hnenah Bawipa Pathian Thlarau phuang aw sinsin hram seh.

Duhdawtnak le lungawinak mitthli thawn.

Pastor Hre Mang 
Camp: Houston, Texas
@ 2013 Southern Baptist Convention

Comments