MIBUR SAL

 

Mibur pehtlai aw mi umkhawmnak poh ah power a um. Cui power cu duhlomi hrial in tulmi le duhmi tuansuak theinak mibur thazang asi. A cuih mibur power cu mai kut sungah hum ngah thei dingin zokhalin an zuam asi. Cutin a cui mibur power kut sungah hum ngah thei dingin bulpak thazang in a ngah lo ruangah mibur lakah lamtang an tuah awaw. Lamtang tuah awknak hrangah hmanrua pawl tla cu biaknak pawlkom, duhdan bang aw, rualpi that awknak, sungkhat awknak, ramthen tlang kulh, khua le ram hmunkhat sinak, hrin le hnam, miphun sinak, tvp pehtlaih awknak thuhram pawl cu hman asi theu. Mibur power mai kut sungah hum ngah thei dingin lamtang lamtang in mibur lakah an um, an cangvai, burkhat le khat an tantlang lole an do aw, burkhat le burkhat an do awk nakah voi tampi an that awaw, lamzin an phihsak awaw, thusia an tuah, an nam thla aw, a mual pho thei bikin an tuah awaw. Cutin midang an mual pho asile anmai lamtang cu that cuh ah mipi duhmi si an tum. Mipi duhmi si an duhnak khal mibur thazang mipi hnen ihsin an ngahduh ruangah asi. Anmai lamtang cu an sinak hnakih sang ah an ret dingih anmai lamtang lo tiah an ruahmi poh cu a se thei bikin an tuah. Cucu leitlun mipawlin mibur thuneihnak power hmangin anmai duhnak in thil ziangkim umter an tum theu dan asi.

 

Acuih mibur pawl cu pawlkom din in an um theu. Cozah kumpi pawlkom ihsin biaknak pawlkom, milai bawmbawi awknak pawlkom, hrinhnam, miphun, pursumleilawn, politics le social, tvp in pawlkom an din ih an tuah ringring mi cu an duh mi le tulmi tuansuah ding le an duh lo mi hrial, canter lo ding asi.

 

Milai zohman mibur le pawlkom thawn a pehtlaihlo kan um lo vekin kan pehtlaihmi mibur le pawlkom cio ah kan hruaitu pawlin ziangtin mibur power an kut sungah umter an tum, zozo an tangtlang ih zozo an do, ziangvek hmanrua an hmang, kanmah teh ziangtin an lamtang ah ziang hmanrua hmangin in tuah, keimah teh leitlun mi pawl lakah ka si ve maw ka tel ve maw, tvp mai dinhmun fiang ten theih awk a thupi ngaingai. Kanmai sinak dinhmun cekci siseh kan hruaitu kan thlunmi pawl ih dinhmun sinak cekci kan thei ngah lo asile mahlemah thei aw loin Jews mibur pi cu Zisu thattu ah an tel vekin miphun siatsuahtu mibur lakah kan thazang cu hman a rak si rero thei asi.

 

Zisu leitlun a rat tikah Jews pawlin biaknak lam pawlkom tumpi an rak nei. Jews miphun lakah Farasi, Sadducee, Levi, Zealot, tvp mibur phunphun an rak um. Mibur tin in tumtah, an duh lo mi hrial in an duhmi le tulmi tiah an ruahmi an nei cio. Cuvek thotho in leitlun milai mibur umkhawm poh in tumtah nei in an um cio. Cutin mibur pakhat cio in pawnlam ah tumtah an neih lawng si loin mibur pawlkom sungah mibur thazang, power cu anmai kut sungah hum ngah dingin lamtang tuahnak, politics a um ringring. Do mi an nei ringring. Lamtang bik an nei ringring. Fimnak a thansoh zatin mibur thangzang hi mipi duhnak le tulmi ngah dingin siseh duhlomi hrial thiam dingin siseh hruaitu pawlin an hmang thiam sinsin.

 

Zisu leitlun a rat tikah mibur pawlkom a ra din lo ih Jews mibur pawlkom sungah dinhmun zianghman a nei lo. Mibur hrekkhat in an siangpahrang dingah an duh. Jews mibur pawlkom power neitu pawlin an power neih mi cu an humnakah Zisu cu an huphurh ih an thah ngah riangri. Zisu in “Nan lakah upabik si a duhtu cu nan zaten sal siseh” tiah a dungthluntu pawl a sim. Leitlun mi pawl in mibur thazang power an kutsungah hum an tum rero laiah Zisu in a linglet in a sim tariai. A dungthluntu pawl an mangbang theh.

 

Kan ram, Kawlram uktu pawl cu sim lo, Chin mi lakah mibur power cuh awknak ruangah ziangtluk buainak a suak ih kan thansohnak daltu ah a cang timi cu thuanthu in mithmuh theih in in sim asi. Nupi pasal karlakah, insangah, mibur umkhawmnak kipah mibur  thucuh awknak ruangah rem awk lonak, lamtang tuah awknak, midang nam thlaknak, mualphoh awknak, mai lamtang lo pohpoh relsait thangsiat awknak nam thlak awknak, tvp satan hmanrua nasa tuk in kan milesa pawl lakah a um ruangah kawhhran in a tuar, zumtu pawlin kan tuar, kan khawpi a thim deuhdeuh, mipi in kan tuar, Thiang Thlarau kan lakah a lal lo ih tisa a lal ringring theu asi.

 

Leitlun tisa mibur thazang cahnak ringring kan hruaitu pawl cangvaihnak in kan Pathian lamzin a kham asi. Zisu leitlun a rat tikah Jews pawl bangin mibur thazang cuh awknak ruangah kan thuanthu a siat theh asi. Santhar Khrihfa zumtu pawlin lei tisa mibur thazang si loin kan mibur pawlkom sihcih awknak cu Thiang Thlarau hmanrua tha si dingin mibur sal si cio zuam uhsi. Milai lalter loin Pathian Thlarau kan mibur tinkim ah lal thlang seh. Lamtang tuah awknak, mibur power cuh awknak, midang namthlaknak si loin mibur sal, Pathian ih hmanrua tha, siahhlawh tha kan miphun in a tul tuk asi.

 

Leilung tlun milai thuanthu thleng dingin Zisu in mibur thazang a hmang lo, mibur thuneihnak a lak lo, mibur thucuh awknak ah lamtang a tuah lo. Mi zapi sal a tuanih mi zapi sualnak cu kross parah a phur ih a thi. Cutin mi zapi hrangah hna a tuan, amai leitlun nunnak cu mi tampi in nunnak an neih theinak ding hrangah a pek asi.

 

Chin mi, Laimi, Falam milesa, khrihfa zumtu ti aw pawl, mibur thazang hmang in thu cuh aw rero ding kan sinawn lo, kan miphun in a tuar tuk, kan peng kan ram in a tuar tuk, kan thansoh ding zat le hma kan sawn ding zat kan sawn thei lo. Miphun dang, Kawl le Vai lakah rampi thuneihnak kan cuh awk tikah Chin mi, Laimi, Falam mi ulenau vekin tangtlang in, mahlemah keu aw rero loin, mibur thazang kan hman thiam a thupi tuk asi. Cutin kan tantlang tik khalah kan lakah Pathian Thlarau lal hram seh. Cutin kan tantlang thiam lawngah kan duhlo mi hrial in kan duhmi mipi thatnak kan canter thei ding asi. Mahlemah sungah mibur thazang cuh aw in lamtang tuah awaw in do aw rero ding kan sinawn lo. Leitlun pumhuap (globalized) cangvaihsan ah Laimi cu kutzung siar zat fang kan si. Kan mibur thazang a mal tuk. Mahlemah rinsan awtlak kan si lo. Ziangruangah miphun dang in kan miphun suahkeh pupa ihsin kan canpual cu an kut sungah an ret ih kanmai ta asimi cu in pek dingmi vekin an hnenah lukun in kan dil rero? Bawipa Pathian in kan mibur thanzang in hmang sawn seh.

 

Mibur lakah zo in lalnak, thuneihnak, thazang a nei timi in kan miphun sunglam natnak, cancer vekin kan miphun siatsuahtu social evil pawl a rehter thei lo ih miphun sal, mibur sal, siahhlawh tuan ngamtu paraltha, nuraltha pawl hmangin Thiang Thlarau in kan miphun a tuaithar sal in amai duhzawngin a tuahtha sawn ding asi.

 

Mibur sal, zapi te sal tuanngamtu si dingin kan umnak mibur cio ah Pathian hmanrua tha si cio dingin thlaza cam in zuam cio uhsi. Kan bulpak duhdan in mibur umter tum hlah uhsi, mibur thatnak hrangah hman theihmi saltha, pathian hmanrua si tum sawn uhsi. Khuahlan ahcun raallu tanngam tu cu paraltha an rak si. Mai duhdan in mibur umter thei tu cu paraltha le upat hlah an rak si. Tuisan ah mibur saltha tuanngamtu cu paraltha, nuraltha, kan miphun siatnak  lak ihsin hum tahratin thatnak damnak lamzinpi ah hruaisuaktu ding Pathian hmanrua an si sawn ding.

 

KAN MIPHUN KAN PATHIAN IN DAMTER HRAM SEH!