MEETINGS 101 (2016v) Thuhmaihruai: Meeting cu alotheihlo in mibur umkhawmnak kipah tulmi asi. Thansoh lam pan in mi pakhat thuthluknak thlunsan si loin mi tamsawn lungkimnak in mibur pawlkom cangvaihsan asi vekin zozo khal mibur pawlkom sungah hnatuan tu poh cun meeting cu hrial theih lo asivekin mah le umnak telnak mibur pawlkom ciar ah thuthluk felfai tuah thei dingin a lo bawmtu si hram seh tiah a hnuailam thu hi tawithei bik in ngan khum asi. Meeting thawn pehpar in a hnuailam pawl hi theih ttul mi asi: Meeting hlanah thusuh ding pawl: 1. Zo in ziangtikah meeting a ko ding? 2. Zo pawl sawm an si ding? 3. Zo in meeting hrangah a timtuah ding? 4. Ziangthu pawl meeting ah rel asi ding? 5. Ziangtin meeting kaihhruai asi ding? 6. Ziangtin meeting thurel catmi tuah pitlin asi ding? 7. Ziangtin meeting ttha deuh le tlamtling deuh in tuah a theih ding?
A SUNG THU PAWL: I. MEETING II. MEETING KO III. MEETING THAWK TIKAH IV. MEETING LAI AH V. MEETING TUAH TIKAH FIMKHUR TULMI PAWL, PALH THEU MI VI. MEETING THA LE THA LO, FIAHNAK THUSUHNAK VII. Harvard Business School Meeting thukam pahra:
A hnuailam ah kan zoh asile:
I. MEETING MEETING PHUNPHUN Pawlkom ih zirin meeting phunphun a um. Himi casungah simmi meeting cu meeting kaitu pawl anmai duhhrilnak in meeting (deliberate assembly) a teltu pawl thu laireldana si. Meeting tuahdan hi pawlkom, mibur ih zir in daan hrampi, pawlkom dindan ah ngankhum cia vekin meeting tuah asi theu. Mai duhhrilnak in meeting ahcun a um hrimhrim dingmi pawl tla cu meeting kaitu pawl an mai duhhrilnak in meeting an kaimi asi, meeting kaitu pawlin zalennak an nei ih an mai ruahnak zalen zetin sim theinak an nei, mibur pawlkom hmin in thuthluknak tuah theinak an nei asi. Meeting kaitu pawl cu hmun hlawm ah tawn awk khawmnak lole tulai san ahcun online ah siseh telephone in siseh thubur khawmnak an nei ih pehtlaihnak fiang zetin a ummi asi. Meeting kai lo an um asile meeting kaitu pawlin zapi aiawh in thuthluknak an tuah thei asi. Meeting tuahtheitu ding mipumzat (quorum) hi pawlkom danbu sungah ngancia, lungkim tlangmi vekin asi. Meeting kaitu pawlin ruahdan simsuak thei nak, thu cuh awknak, le vote thlaknak in a tamsawn lungkim nak vekin thuthluknak tuah asi theu. Thuthluknak tuah tikah tamsawn duhdan in thuthluknak tuah asi theu na’in thu khirhkhan thu harsa hrekkhat cu a hlankhan in thu hlan sungtel pawl hnenah theihter cia aw in thuthluknak tuah tulmi a um theu. Meeting a phunphun lakah, miburpi meeting (zapi meeting, lole mass meeting); assembly, convention, dan tuahtu meeting, committee meeting, sub-committee meeting, OB meeting, tvp hi a tlangpi thu in meeting hmanmi an si theu. Tlunlam ah sim zo bangin pawlkom dindan danbu sungah ngan khum mi vekin meeting tuah asi.
II. MEETING KO 1. Meeting kotu ding cu danbu sungah a um vekin tuanvo neitu in kawh asi ding. 2. A ttul taktak lawngah pawlkom danbu sungah ngan khum vekin meeting tuah ding. Pawimawh cakkhai meeting cu dancu sungah zozo in meeting an tuah thei, meeting a ko ding, ziangvek thu tiang zo pawlin thuthluknak an tuah thei timi parah tuah asi. 3. Meeting tuahnak san, ziang tumtahmi fiangzetin neih ringring ding. 4. Thubuai khirhkhan rel ding asile a lailak mi kaihruaitu sawm a ttha 5. Meeting tinten agenda neih cia ringring ding: Thu rel ding thu tlangpi, thu tlangpi khaikhawm, thu putluttu, thutlangpi pakhat ah tikcu pek ding zat, tvp thutlangkom ngan cia asile meeting kaitu pawl hrangah timtuah cia in meeting an kai thei. 6. Meeting kai ding asimi poh zohman hrelh loin theihter, meeting kawh ding. 7. Minung ziangzatin meeting tuah theih asi (quorum) neihcia mi danbu sungta vekin asi ding. 8. Meeting kai ding timtuah cia thei dingin tikcu mawitawktah rei ihsin theihawk ter cia ding. Ziang meeting asi ih ziangthu rel ding timi parah thum aw in ziangtluk rei ihsin a hlankhan in meeting kawh a tul timi danbu sungah ngan khum asi theu. 9. Meeting hlanah damkhan (a tikcu khiahcia vekin) te in meeting kaitu ding pawl hnenah meeting kawhnak, a hnuailam vek pawl hi sim cia, theihter cia ding: Meeting tumtah mi, thurel ding, Meeting thutlangpi (agenda), Hmun le tikcu (a rei ding zat), Ziangruangah meeting kawh asi, thuanthu tawi , Zo in ziang a tuah ding, tuanvo neih mi tvp than cia ding. 10. Meeting hrang timtuah cia tul mi: Cahnah, computer, cafung, tvp, tulmi; Meeting sung ei le in; Tuangtimtu,tvp.
III. MEETING THAWK TIKAH 1. A tikcu te ah meeting thawk ding: cutin tikcu hman te a thleng mi pawl kha cawhkuan kuan ter lo dingin: Caan bikhiah cia mi ah thok thei lo asile minute 5 sungah meeting thawk tengteng ding; Chairman kaihruaitu ding a thleng lo asile midang aiawh hril ding. Quarum a kim lo asile (minute 15?) tiang hngak ih a kim thotho lo asile meeting thawn ding. 2. Meeting thawknak ah Pathian hnenah thlacam ta a tha. 3. Meeting sungah thutawi simtu an um ding asile can khiahcia mi tikci can zat lawng can a hmang ding. 4. Meeting agenda lut hlanah meeting netabik record pawl siar tul mi siar ding. 5. Meeting neta bik record (minute) lungkimnak tuah tulmi a um asile lungkimnak tuah ta ding. 6. Meeting kaitu pawl record tuah ding. Meeting recorder neihcia mi a um lo asile recorder nemhnget ding. 7. Meeting kai thei lo tu pawlin an kai thei lo nak san thu an theihter mi record tuah ding 8. Meeting onnak cu chairperson in a nei ding 9. Meeting sungah chairperson in thutlangpi a pulut dingih relkhawm dingin le thuthluknak tuahdingin a kaihruai ding 10. Meeting agenda pawl zohfelnak, bettul, remtul, tuah hnu ah thurel ding agenda pawl nemhngetnak neih asi. 11. Meeting kaitu pawl: i. A tikcu hman ah thlen ding. ii. Thu hla rel ding hrang timtuah cia ding. iii. Pathian hnenah fimnak dilin thlacam cia in meeting feh ding. iv. Thu sim/rel tikah tawi famkim in rel ding. v. Thatnak hrang ruat in thu rel ding . vi. Thusim dingin din tikah chairperson zoh in “Pu Chairman” tiah upatnak in thu sim ding. vii. Thutlangpi pakhatah mi pakhat in voihnih bak thu sim lo ding. Voikhat din hnu ah midang (thu sim ding an nei lo siar lo ah) an din hlanah ding nawn sal lo ding. viii. Thutlangpi pakhat hrangah ding in thu sim tikah second 30 ihsin 60 (minute khat) hnak rei lo ding. ix. Midang tong lai ah tong lo ding, thawmvang tuah lo ding, aw thian, hrawk thian, khuh awn ai, le taksa cangvaih dan mawi lo tuah lo ding. x. Meeting kaihruaitu, charperson zah thiam ding xi. Thuthluknak tuah dingin tamsawn duhnak thlun dingin vote thlak tikah a nehlo tu pawl khalin tamsawn duhnak in thuthlukmi parah a duhtu vekin rualran mi tuanvo a nei ve thotho asi. xii. Meeting theh hnu ah thuthluk zomi, phorhsal in buaipi nawn lo ding. xiii. Meeting thusuak, ziangvekah zo hnenah zo in thu a than ding timi fimkhur ten thu tlangzarh dan thlun cio ding. xiv. Meeting lai ih thu nepnawi pawnlam mi pawl theih tikah buainak le hmuh thiam awk lo nak a suahter thei mi thu pawnlam ah suahpi lo ding.
IV. MEETING LAI AH 1. Chariman cu meeting kaihruaitu asi ding. Pawlkom danbu in a ngankhum cia vekin meeting kaihruaitu chairperson asi ding. 2. Chairperson in meeting agenda lungkimcia mi vekin meeting a kaihruai ding. 3. Meeting kaitu hmuahhmuah mi pakhat cio cu dinhmun bangrannak an nei, thu sim thei nak, ruahnak suahpi theinak an nei asi. 4. Chairperson in amai ruahdan in mipi fehter tum in ziangthu hman a rel lo ding. 5. Thutlangpi simfiang dingin chairperson lole thupuluttu in thu a bur in a simsuak hmaisa ding. 6. Chairperson in simfiang bet tulmi a um asile a simfiang hnu ah relkhawm theinak can a onsak ding. 7. Agenda pakhat hnu pakhat ruahdan bang aw lo a um asile chairperson in thucuh awknak can a ong ding. 8. Zapi lungkim, eltu umlo asile zapi lungkimnak vekin thuthluknak tuah dingin kut banphar in thuthluknak tuah asi ding. 9. Duhdan bang aw lo a um tikah mawitawktak relkhawm hnu ah tamsawn duhdan (kutphar, mipum ding, lole vote) in thuthluknak tuah asi ding. 10. Chairperson cu ruahdan bang aw lo a um tikah lamtang a nei lo ding. 11. Thureltu pawl lakah zo in thu a rel ding tiah chairperson in tikcu a pek ding. 12. A tul asile chairperson in thutlangpi cu a tawpter ding. 13. Thuthluknak tuahmi, zapi lungkim siseh tamsawn duhnak siseh thuthluknak nemhnget ding asi tikah lungkimnak dinpitu mi pakhatkhat chairperson in a ko ding. Lungkimpi tu pakhat a um hnu ah a kalh zawng a um maw, chairperson in a ko ding. Lungkim dingmi, thu nemhnget dingmi cu zapi in lungkimnak tuah asi ding (vote, tamsawn duhnak lole zapi lungkimnakin). 14. Tongmawilo, tong hrang, el awknak a um tikah a tuldan vekin chairperson in a cawlter hai ding 15. Meeting thutlangpi (agenda) pakhat hrangah cankhiahcia mi neih ding. 16. Meeting caan bikhiahcia neih ding (2 hours???) 17. Meeting kaitu pawl thu rel catmi kha casungah khum tengteng ding. 18. Secretary asilole, a bawmtu in meeting record tuah ding. Lole meeting record hrilmi in record a tuah ding. 19. Meeting ban zawngah meeting record siarsal ding. 20. Meeting record/note pawl ret hrimhrim ding 21. Meeting record sungah a hnuailam pawl a tel hrimhrim ding i. Meeting hmun, ni, can, ii. Chairperson, recorder, meeting kaitu, (pelhtu-committee meeting asile) le meeting sung hlece hmangtu (thlacam, thutawi sim, tvp). iii. Meeting thutlangpi, agenda iv. Meeting kaitu pawl le kailotu pawl pelhnak thu v. Meetingah mikhual ummi vi. Thurel catmi pawl vii. Neta meeting nak hmun, can, le nithla viii. Ttutlangpi relcat loin tanta mi pawl 22. Thuthluknak tuahmi ttuansuak dingin ttuanvo pekmi pawl, tikcu can le ziangtin tuah ding timi pawl kimcang zetin ca sungah ngan ding. 23. Meeting ziangtluk a ttha, tlamtling tlinglo timi meeting ttheh zawngah zohsal ding. 24. Neta meeting ding hrang ruat cia ttul mi (tikcu le can, hmun) khiah cia ding. 25. Chairperson in a tikcu ah meeting tawpter ding asi. 26. Chairperson in meeting tawpnak a puang ding. ==
V. MEETING TUAH TIKAH FIMKHUR TULMI PAWL, PALH THEU MI
1. Meeting thupi lungkimnak tuah hmaisa: Meeting thurel ding pawl cu meeting sawm tikah kuatcih asi theu ding. Cui hlei ah, meeting hram thawh zawngah meeting agenda zohtlang in bettulmi bet, hlon tulmi hlawn in, ziangthu rel ding timi lungkim tlangnak tuah hmaisak a tha. Mi zokhalin meeting thurel dingmi bulpak in kaihbet lo ding. 2. Thu rel dingmi pawl thu tlangpi khaikhawm ngancia in theih awk ter cia ding: Meeting hlanah thurel khawm dingmi agenda thuthawi, (thimnakah, project dinhmun, thuanthu tawi le hmailam hrang hril ding), theihzat, meeting kai hlan amalbik zarhkhat duh ah meeting kaitu pawl siar theih dingin ca in kuat awk theh ding. Cutin meeting kaitu pawlin ziangthu kan rel ding ti an thei dingih a tulmi thu hla timtuah cianak an nei ve ding. 3. Report pawl meeting hlanah theihter awk ding: Meeting hlanah pawlkom report, depart report siseh thuhla rel dingmi pawl kha thu famkim (lole tlangkom) meeting kai hlan amal bik zarhkhat duh ah meeting kaitu pawl siar theih dingin ca in kuat awk theh ding. Cutin meeting kaitu ding pawlin atulmi thuhla an rak timtuah cia ve ding. 4. Thupi pakhat hrangah tikcu rei tuk hmang lo ding: Thupi pakhat hrangah tikcu reituk hmang lo dingin hruaitu in tikcu kilkhawi thiam ding. 5. Report peknak can a sau tuk hman lo ding: A cang thei tawk in report peknak cu report peknak in can hman ding. Thusuh duhmi sannak le simfiangnak lawngin can hman ding. Ca ngan in zem cia mi pawl cipciar report ah telh nawn lo ding. 6. Chairman in amai duhnak in agenda fehter dingin thu a sim lo ding: Thu pakhat rel tikah a thutlangpi thutawi simfiang hnu ah chairperson in amai duhdan mipi thlunter dingin a sim hmaisa dah lo ding. Mipi ruahnak burkhawm hnu ah khaikhawm tu ding asi ding. 7. Thu pakhat hrangah mi pakhat in a dinzat tawkcin neih a tha: Agenda pakhat hrangah mi pakhat in a tuletu ding leuhleuh lo ding. Voikhat dinah second 30-60, agenda pakhat ah voihnih bak din lo a tha. 8. Meeting theh zawngah meeting tuahdan zohsal ding: Meeting theh zawngah meeting kaihhruai dan a fel tawk maw, bet duh, hlawn duh, rem duh, le a tu hnakin thangso deuh, tha deuh, fel deuh in meeting ziangtin kan tuah thei ding, timi zapi ten khaikhawm, zohsal a tha. 9. Meeting can rei tuk lo ding: Meeting can hithansoh lam pan in reituk tuah lo a tha. Thuhleifuan tampi sim loin thuthluknak tuah thei ding theihlo theihlo thu lawng sim a tha. Meeting reituk tuah lo a tha. Thuburtu pawl, ruahnak suahtu pawlin a hleifuan thuanthu tampi sim lo a tha. Duh/lo timi le ziangtin tuah ding timi lam hawi in thusim, thubur thiam a tha. 10. Colhcan a tul: Nahzi pa 2 meeting hnu ah minute 15 tal cawlhcan tuah theu a tha. 11. Meeting kaitu lakah tonglo, ruahnak bur dah lo tu pawlin ziangtin an ruahnak an bur ve ding timi lamzin sangka on ding a thupi. Meeting kaitu zapi ten ruahnak suahkhawm thei dingin hruaitu in sangka onsak, hruai thiam a thupi.
VI. MEETING THA LE THA LO, FIAHNAK THUSUHNAK 1. Yes/No: Meeting kai nin a um in ihhmuhsuak, nuam lo zet asi maw? 2. Yes/No: Meeting kaitu pawlin lungkim lo zetin thusuhnak an nei maw? 3. Yes/No: Thu pawimoh rel ngam loin palzut, lantami a um maw? 4. Yes/No: Mi hrekkhat pawl tong duh loin sup awk mi an nei ti ah na ruat maw? 5. Yes/No: Meeting kaitu pawlin meeting tamtuk, reituk tivek an phunzai maw? 6. Yes/No: Thupi hlapi relcat loin meeting tawpter asi maw? 7. Yes/No: Meeting sungah kaihhruai awkdan, tumtah ruangzingdan, tvp an rel maw? 8. Yes/No: Caan umlo ruangah thupi hlapi reltheh man loin tanta asi maw? 9. Yes/No: Mi hrekkhat tongtam hleice, can hmang tam hleice an um maw? 10. Yes/No: Meeting kaitu hrekkhat pawl tong loin an to men maw? Meeting theh tikah meeting kaitu pawlin a tlunih thusuhnak pawn an saangih “yes” a tam poh asile meeting remttul a tam, a tha tawk lo tinak asi.
VII. Harvard Business School Meeting thukam pahra: 1. Ziangcan asi ti thei ringring aw: Thou Shalt Always Know What Time It Is 2. Meeting thupi na theih hngilh lo ding: Thou Shalt Not Forget the Main Reason for Meetings 3. Meeting golden rule na theih hngilh lo ding: Mipi lakah cawimawi aw la, mimal in sawisel/faksel aw: Thou Shalt Remember the Golden Rule of Meetings: Praise in Public, Criticize in Private 4. A tikcu lo ah meeting tuah hlah aw: Thou Shalt Not Convene Meetings Outside of Normal Business Hours 5. Mibur/thahrum hmangin na duhdan lam hawi in thuthluk nak tuah dingin midang nawr dah hlah aw: Thou Shalt Not Use Group Pressure to Logroll Conclusions 6. Meeting nak hmun cu midang hnatuan siatsuahnak ah hmang hlah aw: Thou Shalt Not Use Meetings to Destroy Others' Careers 7. Mimal thu le hnatuannak (pawlkom) thu a hran ten thliarhrang thiam aw: Thou Shalt Keep the Personal and the Corporate Distinct 8. Meeting kaihhruainak ttha bik cu siangpahrang kaihhruainak si loin Democracy asi ti thei ringring aw: Thou Shalt Remember that the Best Model for Meetings Is Democracy, Not Monarchy 9. Meeting hlan ah meeting agenda pawl tuah cia diamdi in meeting kai tu ding pawl hnenah pe cia theu aw: Thou Shalt Always Prepare a Clear Agenda and Circulate It Beforehand 10. A tikcu hman te ah meeting tawpter dan thiam aw, thupi thu thluknak tumtah mi tuah ttheh ve ten: Thou Shalt Terminate a Regularly Scheduled Meeting When Its Purpose for Being No Longer Exists(www.hbsp.harvard.edu. )
VIII. MEETING DAWTDAWT Pawlkom thuthluknak tuah tikah a dawtdawt in a ummi theih a tha. A niam bikah team/group/department meeting ihsin a sangbik pawlkom thuneihnak senpi meeting tiang ah khuitawk hmun in ziangtiang thuneihnak a nei ih ziangvek thu ah khuitawk ah zo in a rel thei timi thiehfeng lo ruangah harsatnak buainak kalhki awknak, thiehthiam awk lo nak a suak theu theu. Curuangah a hnuai lam dawtdawt thuthluknak (decision making process) pawl theih a thupi zet.
1) TEAM/GROUP/DEPARTMENT MEETING Pawlkom sungah department phunphun, hnatuantu mibur phunphun, small group phunphun neih theih asi. Department le group, team, mibur fate in tuanvo pekmi le budget pekcia mi siseh thuneihnak pekmi sungah anmah te thu an rel thei ih an thu relmi pawl cu a pehparmi tlunlam thu nei tu hnenah theihter tulmi theihter ringring ding asi. Agenda danglam tlunlam theihtulmi a um a si achun meeting neih hlan ah tlunlam upa theihter hmaisak a tha. 2) Executive Meeting (EC) EC meeting hi pawlkom tintian ah thutluknak tuah tamtu bik asi theu. Nitin pawlkom cangvaihnak hrangah pawlkom policy tuahmi sungah cangvai in lairel tu pawlkom fehdan lamzin khawkhangtu asi rignring theu. Asina in EC cu pawlkom dan le dun tuahtu asilo ih dan le dun tuah cia mi parah tuansuak dingin laireltu asi ringring theu. Curuangah EC tlunah thuneihnak neitu cu board, asilole kawhhran in church council tivek in an hmang theu EC tlun lamah thuneihnak a um hrih ih EC ih thuthluknak tuahmi pawl khal tlun lam lairelnak in pomsak, thlengsak, nemhnget sak thei asi. EC meeting cun EC hnuai ah a ummi committee, team, group, deparment pawl hnatuannak pawl kilkhawitu khal asi. 3) Council Meeting Council meeting, lole board meeting ti khalin kawh theih. Council meeting cu EC tlunah ummi asi theu. Council meeting cun pawlkom cangvaihnak constitution le bylaws vekin a cang vai le cangvai lo a zoh in a fingkhawi tu asi ih pawlkom thansoh hmasawnnak hrang khalah EC le department tintian ih phorhsuahmi pawl nemhnget tu, remtu, thlengtu, a thar hawlsuaktu asi theu. Council in thurel cat cia mi siseh agenda thuthluknak tuah hrih lo mi pawl siseh general meeting, senpi meeting ah a suahpi theu. Council tlunlamah General meeting, senpi meeting in thuneihnak a nei theu. 4) General Meeting Kawhhran in general meeting hi pawlkom thutluknak tuahtu, thuneihnak sangbik neither asi theu. NGO pawl, nonprofit pawlkom ahcun general meeting si loin board of directors hi thuneihnak sangbik, policy nemhngettu asi theu ih profit organization ahcun general meeting ti si loin shareholders meeting hi thuneihnak sangbik, policy tuahtu nemhngettu asi theu. Laimi dinhmunah kan hman tam zetmi kawhhran general meeting cun council meeting, EC meeting, le department meeting thuputlut mi pawl thleng, rem, nemhnget, thei nak a nei. Cuihleiah constitution le bylaws pawl khal thleng theinak a nei fawn.
Rawnmi: i) Hardvard Business school; ii) Robert Rules of Order (11th Edition) |
