KAWHHRAN MEMBER KA SI

 

Ngantu: Dr. Thom S. Rainer, An American writer, researcher, speaker, and current president and CEO of LifeWay Christian Resources,an entity of the Southern Baptist Convention in Nashville, Tennessee.

            Thom S. Rainer ih nganmi “Keimah cu kawhhran member ka si” (I am a church member) timi hi miring tong ih nganmi laitong in lehmi asi ih rak siar cio uhla, group study, mibur Bible zirnak ah tla rakhmang cio hram uh. Santhar kawhhran member sinak hi mi tampi leitlun pawlkom dang sungtelnak thawn kan cawhpolh tikah voi tampi cu Bible in in zirhmi, Bawipa in kawhhran ah in retnak san pawh lo in leitliun pawlkom vekin fehpi, sungtel sinak kan rak ruat sual tikah Pathian in in hman duhzat le kawhhran ah thathnemnak kan suahpi dingzat kan suahpi lo theu asi. Bible in in zirh vekin kan umnak hawhhran tinah sungtel kan sinak poh ah kan umnak kawhhran in ziang in tuahsak ding, ziang ka hlawk pi ding timi siseh ziangvek thuneihnak le upatnak ka co ding timi siseh ruat lo in Bawipa in a lak in in rundam ih kawhhran sungtel sinak in pek, in neither mi par ah lungawi ringring in thiltha suahpi tu, lungawinak duhdawtnak tipungtu, remdaihnak tipungtu, Pathian Thlarau hmanrua tha kan si cio nak ding hrangah a hnualam pawl kawhhran sungtel cio ih lungput le tuanvo pawl hi zir, nunpi cio ding hi a lotheihlo asi.

Kawhhran 557 dinhmun (2004-2010) an hliakhlai tikah 9/10 kawhhran pawl cu member an tumsuk sinsin. America ramah 1946 hlanaha suaktupawl lakah 2/3 cu khrihfa an si theh. Asinan kum 1980-2000 karlakah a suakmi American minung lakah 15% lawng Khrihfa an si. Riahsiatza asi. Zo kan mawhthluk ding? Santhar milai fimnak, satan maw, zo kan mawhsiat ding? Culai lakah kawhhransungtel pawl mahlemah cek aw fel sal uhsi. Kawhhran member pakhat in kan umnak kawhhran parah lungput kan neihmi kan thleng tik lawngah kan kiangkap tla kan thleng thei dingin kawhhran thuanthu khal a thleng aw ding asi.

Bible in a zirhmi kawhhran member pakhat sinak lungput zoh hnik uhsi.

1.     Keimah cu a cangvaimi, hnatuantu kawhhran member ka si.

Country club member lut tikah membership fee a umih member pawl hlawknak a um. Member pawlin hlawknak an ngahmi an lungawi tawk lo tikah an suahsan ih an duhnak vekin hlawknak a pe theitu club ah member an lut theu. Kawhhran member sinak cu clubmember sinak thawn a bang aw lo.

Kawhhran member zapi ten a pehzawm aw mi taksa ruangpum pakhat ih peng kan si.

            Paul in I Korin 12-14 sungah kawhhran cu taksa ruangpum thawn tahthim in thu a sim. A umzia cu taksa ruangpum pakhat ah taksa peng pakhat a cangvai lo asile a ruangpumpi tiang a hnoksak in cangvai thei lo in a tuah thei tinak asi. A harhdammi ruangpum sithei dingin taksa peng zapi ten ruantlang zetin a cangvaih thei a tul tinak asi.

            I Kor. 12:27-28, “Nan zatein Khrih ih ruangpi nan si ih pumpak ciarin a taksa ṭhen nan si fingfing. Cuhrangah Pathian inKawhhran sungah minung cu an sinak ding hmun ciarah a ret: a hmaisa bikah a tirhthlah pawl a ret; a pahnihnak ah profet pawl, a pathumnak ah zirhtu pawl, cule mangbangza tuahtu pawl, a saangtu-ah damter theinak pek a si mi pawl, a si lole midang bom theinak pek a si mi pawl, a si lole mi hoha thiamnak pek a si mi pawl, a si lole theih lo ṭong in ṭong theinak pek a si mi pawl an si.”

            Kawhhran member sinak ih umzia cu ziangkim nun, tong, le tuahnak ah duhdawtnak thurampi parah hngat aw in tuah asi.

I Kor. 13 ah duhdawtnak cu ziang asi ti famkim zet in in sim. Ahih duhdawtnak hi milai in anmai hrang thatnak ah an ruahmi pawl parah an duhdawtnak vek asile Pathian ih duhdawtnak “agape” duhdawtnak asi.

I Kor. 13:4-5, “Duhdawtnak cu a thin a sau ih mi zaangfah a thiam; duhdawtnak cu mi a iksiik lo, tluang a khawng lo ih a puarthau fawn lo. Duhdawtnak cu nun hel-hlong in a nung lo, amah ih zawn lawng a ruat lo, a thin a tawi lo, cule tisual mi parah thinciin a nei lo.” Pathian duhdawtnak kan sungah a um tikah midang in kan parah thiltha an tuahnak ruangah siseh kamah in thiltha kan hlawkphah ding ruangah siloin Pathian hmin sunlawinak hrangah midang hrang thatnak ruat ih awmsung suak duhdawtnak asi.

            Kawhhran member sinak cu a nungmi, a cangvaimi member sinak asi.

Khrismass le kumthar lawng ah khawm aw khalin kawhhran member sitheih asi thei men. Asinan Bible in a simmi kawhhran membersinak cu a nungmi, catbanglo in a cangvaimi member sinak asi. Kawhhran su member pakhat hnakin a tam komkhawm in din asi vekin taksa ruangpum vek asi ih (I Kor. 12:12-26), peng tampi a um: ke, kut, hna, mit, hnar, tvp taksa ruangpi ah a um vekin kawhhran sungah tuanvo le dinhmun dangdang nei in Pathian in a ret khawmmi kan si. Ke in a hnatuan ding a tuan lo ahcun taksa ruangpi cu a feh thei lo ding. Taksa peng pakhat ih a tuanvo ciar an tuan ih an dinhmun ciar ihsin an cangvai tikahkawhhran cu a harhdam, a cak ih Pathian tumtah mi tuansuah asi.

Tiamkamnak 1. Kawhhran member ka si.

Kawhhran member ka sinak cu taksa ruangpum sungah taksa peng pakhat vekin dinhmun le tuanvo nei in Pathian in i retnak hmun ihsin Khrih ih taksa ruangpum hrangah ka tuan in ka cangvai ve ding. Mit ka sile mit hnatuan ka tuan dingih ke ka sile ke hnatuan katuan ding. Taksa ruangpum ah taksa peng pakhat a nat tikah taksa ruangpum in a tuar asi ti ka thei ringring dingih taksa peng pakhatkhat cawimawi asile lungawi sopar ten ka lungawpi ve ding. Bible ka zir ding, midang riantu ka si ding, Thuthangtha karhzai tertuka si ding. (I Kor. 12:26-27).

Sign and Date:

 

2.     Keimah cu Kawhhran lungrual tertu member ka si.

            “Pakhat le pakhat tlunah duhdawtnak nan neih ahcun zokhal in keimah ih dungthluntu nan si kha an lo thei ding a si,” tiah a ti. John 13:35. Pai duhdawtnak nei lotu kawhhran member pawl hi kawhhran rem awklonak satan hmanrua an si theu. Kawhhran thurel khawmnak ah zohmawi lo zet na hmu in na thei theu maw? Kawhhran sungah khat le khat relsiat simsiat awknak na thei theu maw? Nan pastor pai mailbox sungah ziangvek casia a lu theu ti ah sut aw la a lo sim ding. Kawhhran member na sinak poh ah Pathian in remnak tuahtu siter a lo duh asi.

            “Bawi Jesuh nan zumnak le Pathian minung parih duhdawtnak nan neih zia ka theih thok vete ihsin, 16nanmah ruangah Pathian hnenih lungawi thusim ka cawl dah lo. Ka thlacamnak in ka lo ciing ringring” Eph. 1:15-16. Paul in kawhhran sungtelpawl duhdawtnakan neih parah lungawithu a sim. Eph. 4:2-6) “Thinlung neemnak nei uh; tangdor le thinsau in um uh. Duhdawtnak nan neihmi kha pakhat le pakhat nan zawi-eet thei awknak in langter uh. Thlarau in a lo pekmi pumkhat sinak kha ṭunghmun dingah hmun khatih a lo ṭemkhawmtu ih remnak in hmunter uh. Pathian in a lo kawh tikah a lo kawh sanmi ruahsannak cu pakhat a si vekin ruangpum pakhat a um ih Thlarau khal pakhat a um. Bawi pakhat a um, rinnak pakhat a um, baptisma pakhat a um. Pathian pakhat a um ih mi hmuahhmuah ih Pa a si. Amah cu ziang hmuahhmuah ih tlunah Bawi a si; ziang hmuahhmuah sungin hna a ṭuan ih ziang hmuahhmuah sungah a um.”Kol. 3:14,” Cule hibangtuk ziaza ṭha nan neihmi tlunah duhdawtnak beetcih uh; ziangah tile duhdawtnak cu ziangtinkim famkim zetih a finkhawmtu le rem ṭhepṭhep ih a tuahtu a si.” 

Kawhhran member pakhat, Khrihfa diktak cun remdaihnak, rualremnak, duhdawtnak tipungtu asi.

Relsiat thangsiat, lungawi lonak

            Leitlunmi pawl nundan cu Paul in fiangtuk in a ngan, “Annih cu siatnak le ṭhat lonak a phunphun, hamṭamnak le sualralnak a phunphun in an khat; nahsiiknak, mithahnak, sualawknak, mi bumnak le depdet hrokhrawlnak tla in an khat. An kaa a tam ih, pakhat le pakhat an relsia aw. Pathian mitkem zawng in an nung, an hngal, an puarthau, anmah le anmah an porh aw, ṭhat lonak tuah dingah lamzin a phunphun an hawl, an nu le an pa thu an ngai lo; 31a ṭha le a sia thleidan thiamnak thinlung an nei lo, an thukam mi an thlun dah lo ih midang hrang zaangfahnak le zawnruahnak zianghman an nei lo.” ( Rome 1:29-31).  Kawhhran sung milesa lakah thangsiat relsiat awknak hi Pathian in a zawi thei lo mi sualnak asi.

            “Cuih meici bangtuk cu lei hi a si. Lei cu a ṭha lomi a si ih kan taksa sungah umnak hmun a rak nei ih cutawk ihsin ṭhat lonak cun kan ruangpum zate-ah a hrawh thluh. Kan nunnak hri le hram tiangin meisa in a ur ih cuih meisa cu hell hmun ihsin a thomi a si,” James 3:6.

            Cuti asile ziangtin kan tuah ding? Pakhatnakah nangmah kha mi relsiat thangsiattu va si dah hlah aw. A pahnihnakah, mi pakhatkhat in na hna theih ah midang a relsiat thangsiat tikah napin kawk aw. Voksa bazar um dingin voksa leitu le voksa zuartu antuldan a bang aw asi. Curuangah thangsiat relsiat awknak na ngaisak asile a reltu thawn nan danglam cuang lo.

I Peter. 3:10, “Thianghlim sungah,  “Nunnom a duhtu le caan ṭha a duhtu cun ṭongsia ih ṭong sup sehla thuphan per nawn hlah seh” tiah a ti.

Nungsau thlawsuahmi siin  ning sunglawi leitlun ah hman na duh asile duhdawtnak in nung aw, mi va relse hlah, na lei kha kilkhawi tha aw. Thusia tipungtu, huat awknak, rinhlelh awknak tipungtu va si dah hlah. Remdaihnak tuahtu si aw. Lungrualnak suahtertu va siringring aw.

Ngaidamnak le Lungrualnak

Kawhhran sungah khat le khat ngaidam awk tawnnak um lo sehla kawhhran hi a dingcang thei lo ding.

            “Nan parah sualnak a tuahtu pawl nan ngaidam a si ahcun vancungih a ummi nan Pa in a lo ngaidam ve ding. Sikhalsehla midang sualnak nan ngaidam lo a si ahcun nan sualnak cu nan Pa in a lo ngaidam ve lo ding, (Mathai. 6:14-15). Kawhhran zapi ten a famkim lomi member le pastor pawl hmangin Pathian in a dinmi asi. Khat le khat ngaidam awk tawnnak um loin ziang kawhhran hman rei a daih thei lo ding. Kol.  3:12-14, “Nannih cu Pathian ih minung nan si; a lo duhdawt hai ih amah ih hrangah a lo hriilmi nan si. Curuangah zawnruahnak, zaangfah thinpemnak, tangdornak, thinlung nemnak le thinsaunak pawl cu hnipuan bangtuk in hruk uh. Pakhat le pakhat karah thinlung hmuh-awk lonak le phunzainak a um ahcun pakhat le pakhat zawi-awk theinak le ngaidamnak nei uh. Bawipa in a lo ngaidam vekin nannih tla pakhat le pakhat ngaidam aw ve uh. Cule hibangtuk ziaza ṭha nan neihmi tlunah duhdawtnak beetcih uh; ziangah tile duhdawtnak cu ziangtinkim famkim zetih a finkhawmtu le rem ṭhepṭhep ih a tuahtu a si,”

Tiamkam 2.  Keimah cu kawhhran member ka si.

Keimah cu kawhhran rualrem tertu, lungrualnak tipungtu ka si ding. A famkim pastor, kawhhran upa, member zohman an um lo ih keimah khal ka famkim lo asi. Relsiat thangsiatnak ih hrampi, thusia phurtu, huat awknak, hmuhthiam awk lonak, rinhlelh awknak tipungtu ka si lo ding. Ka tuah thei mi thupibik cu ka ti thei tawk, Pathian in i thlawsuah zatin Thuthangtha ruangah ka thei tawk suah inka zuam dingih kawhhran tungdingtu, kawhhran lungrual tertu ka si ding.

Sing and Date:

3.     Ka Kawhhran cu Keimai bulpak duhnak, ruahdan, pomdan, ngaiihdan in umter ka tum dah lo ding.

            Nauhak te pawl khi an kiangkap ziangkim cu anmai duhdan in umter an tum ringring. Zumtu tampi cu cuvek an si theu.Kawhhran member na si ve ten nangmai duhnak, duhdan, ruahdan, pomdan pawl cu na tanta zo. Midang rian dingin kawhhran memberna sinak asi. Zisu in “Zokhal sisehla i thlun duh ahcun mah zawnruahnak kha tlansan sehla nitinte a thinglamtah phur in i thlun she” Luke 9:23. Zisu dungthluntu pawl lakah zo a tumbik ding timi thu ah an rak buai dah.  “Jesuh cu a to ih dungthluntu hleihnih a ko ih anhnenah, “A tum bik si a duhtu cu mi nauta bik a si hmaisa ding ih mi hmuahhmuah riantu a si pei,” tiah a ti, Mark 9:35.

Siahhlawh lungput

            Thuthlungthar sungah “siahhlawh” “Servant” timi tongfang voi 57 hman asi ih “rian” “serve” timi tongfang voi 58 hman asi. Bible in in zirhmi cu khrihfa zapi ten “siahhlah” “sal” kan si. Khrihfa lungput cu midang in ziang in tuahsak ding, upatnak in pek ding timi ruahnak a tel lo, midang hrangah ziang ka tuah thei mi a um, Pathian in keimah hmangin zo hrangah thatnak a tuah duh, midang hlawknak, thatnak, lungawinak cu mai lungawinak, duhdan, ruahdan, le pomdan hnakin thupi sawn ah ret in nitin nun asi.

Eph. 3:7 ah Paul in “Thuthangtha sal (siahhlawh) ah tuah ka si” ati. Khrihfa kawhhran member lungput diktak Bible in in zirhmi cu siahhlawh lungput, midang lungawiter tu lungput asi.

Hliakhlainak ah hmuhsuahmi kawhhran member  pawl lungput dik lo hi zoh hnik!

Kawhhran tampi hliakhlai hnu ah mai hrang lawng a ruattu kawhhran sungah lungput hmuhsuahmi pawl tla cu:

1.     Pathian biakdan ah raal do aw aw (Worship war)

            Pathian an biaknak ah an hmanmi hlabu, hla, music, hlarua dan, hlahruaitu, aw key, tvp, anmai duhdan le nuam tidan in Patian biakdan neih ding thupibik ah an ruahmi asi. Pathian Thlarau pawlkomnak in Pathian biaknak hnakin atlunlam thu pawlah an buai ringring.

2.     Meeting rei (Prolonged meetings)

            Pathian Thuthangtha karhzai ter dingin evangelism, thlacamnak, rawngbawlnak ah tel ve nak thu pawl an rel dah lo. Tuktak tete thu ah rei zetzet an el aw aw ih zo ih thu a lal sawn, atlang sawn timi ah an buai ringring.

3.     Biak inn bungrua le thilri buaipi (facility focus)

            Kawhhran sumpai tamsawn cu biak inn, biak inn sung bungrua, thilri le hmanrua pawl ah an hmang.

4.     Program thupitter tuk (Program driven)

            Program pawl hi hmanrua an si ti ah ruat loin program a hlawhtlinnak hi kawhrhan rawngbawlnak hlawhtlinnak tawp ah an ruat.

5.     Mai sunglawngah sumpai hmang (inward focus budget)

            Kawhhran lenglam ah sumpai an hmang mal tuk ih kawhhran sung kilkhawi awknak hrangah kawhhran sumpaian hmang.

6.     Pastor hnenah lungkim dah lo phutmi nei ringring

            Tul poimawh ah pastor cu hnemtu le thlacamsaktu ding asi. Asinan kawhhran sungtel hrekkhat cun thu tenau khalah pastor an phut ringring ih ziangtik hmanah pastor parah lungkim diriam ti an nei dah lo, phunzainak an nei ringring. Kawhhrain tul pawimawh ngaisak hlehle mi si ding an duh.

7.     Ka covo asi ti lungput

            Kawhhran member sinak cu mai covo vekin ruat tahratin kawhhran hnen ihsin nah ding, co ding, hlawknak le upatnak ngah lo tikah phunzai ringring.

8.     Khrih Thuthangtha karhzainak hnakin ngai pawimawh mi nei ringring

            Khrih Thuthangtha karhzainak, kawhhran milesa thutakah an thansohnak hnakin thudang thupi sawn ah retin ngai pawimawh ringring.

9.     Huat awknak le thinhengnnak

            Kawhhran member pawl ziangtik lai khalah phunzainak an nei ringring. Khat le khat rem awk lonak, huatnak annei ih an ngiar aw ringring.

10.  Thuthangtha simsuaklo.

            Mi malte lawngin an zumnak le rundamnak an comi thu midang hnenah an simsuak. Leitlun le community ah Thuthangtha karhzainak hnakin anmai tulhai, pawimawh cu thupi sawn ah an ret ringring.

            Bible in in zirhmi kawhhran member sinak cu siahhlawh, midang riantu asi. Pek awknak asi. Midang kha pakhat nak, thupisawn ah ret ringring lungput asi.

Khrih ih lungput:

Khrih member pawl lungput diktak cu Phi 2:5-11 ah in sim. “Nan lungputdan cu Khrih ih lungput vek siseh” tiah in zirh.

Khrih cun:

·      Pathian sinak nei nacingin amai hrang hlawknak hminthatnak ruatin amahle mah Pathian thawn bang aw ah a ret aw dah lo;

·      Amah le mah a lawng aw ter ih sal dinhmun in a rungpiang

·      Tang a dor

·      Thihtiang thu a lung.

Philipian bung 2 nak ah nganmi pawl hi zumtu, khrihfa, kawhhran member pawl lungput a ngan mi asi.

Tiamkam 3: Kawhhran member ka si.

Ka kawhhran cu keimah bulpak duhdan, ngaidan, ruahdan, hlawknak hrangah ka ruat dah lo ding. Cuvek lungput cu mai hrang ruat asi.Kawhhran member ka sinak cu Khrih rian in midang rian ding in ka si. Keimah run dingah Zisu cu Kross parah thihnak a tuar. Kaduhdan, ruahdan, ngaihdan asi lo mi kawhhran sungah thilcang mi pawl cu lungawi sopar ten Khrih ka duhdawtnak ruangah ka pomrem thei asi.

Sign/Date.

4.     Kawhhran Hruaitu Hrangah Thla Ka Cam ding.

            Voikhat cu Tlawngkai ni zinglam asi. Pastor Mike cu cawlhni hrang sermon timtuah dingin cabuai parah a to ih thla a cam. Cule veten phone  a on, kawhhran upa pakhat le a insang accident an tawng ti asi. Cabuai parah a Bible le Ballpen cu ten in accident nak hmun afeh. Accident ah pastor pa ih rualpi tha bik a thi. Sizungah a dasun a fehpi hai ih thla a camsak, nahzi 3 sung an rei hnu ah a fehsan ih office ah a fehsal. Lamzin parah fast-food lei phah in motor sungah a ei phah. Office ah mi pahnih in an rak hngak. Pakhat cu music leader asi ih ministry ah harsatnak ruangah a cawlhsan ding thu a sim. Nahzi pahnih sung a thu a ngaisak hnu ah thaten thazang a pekta. A dang pakhat cu kawhhran upa pakhat asi. A nupi thawn buainak an nei, an nupi in ngaizawng a nei. Thinna zetin a sim. Tikcu reizet a thu a ngaisak ih thla a camsak. Zanlan nahzi 5 asi zo. Inn ah tlungin cabuai parah cawlhni sermon ding cu zoh sal dingin a timtuah. Email a ong tikah mail thar a lut. Kawhhran member pakhat in email thawn ca a kuatih lungawilonak thu pahnih a ngan. Sizungah kan sungkhat damlo in veh lo ti asi. Pastor Mike cu a bang tuk. Inn ihsin asuaksal ih accident tawngte a va zohsal. 7:30PM ah a tlungsal tengteng a tul, hmundang ah feh in thlacamsak tul mi aum. Zan tlai hnu ah inn a thleng. Inn a thlen tikah a study room sungah a lut in sangka a khar. Thla a cam ih a tap.

            Churchleaders.com in asimdan vek asile thlatin pastor 1,700 in an rawngbawlnak an colhsan. The Francis Schaeffer Institute of Church Leadership Development in a simdan vek asile 35-40% rawngbawltu pawl hi rawngbawl an thawk pek ihisin kum 5 tiang an daih lo. 60-80 % pawl cu kum 10 hnu ah Pathian rawngbawl an sunzawm nawn lo, ti asi.

            Pastor le kawhhran hruaitu pawl hrangah thlacam

            Pastor hi kawhhran hruaitu asi vekin thlarau lam ralbawi asi. Satan in hnaihnok nak a phunphun, thanaunak, dungtawlh dingin a phunphun in a hnaihnok asi. Kawhhran member pawl thlacamsaknak a tulbiktu asi.

A tha bik in thuthluknak tuah thiam ding, rualran ten duhdawtnak a tlaitluan in Thlarau Thianghlim lamhruai nak hrangah Pathian hnenah thlaza camsak ding asi.

            Pastor insang hrangah thlacamsak

            Kawhhran tul pawimawh ruangah voi tampi pastor in a insang kilkhawi a thlahdah pang thei. Kawhhran hruaitu cu I Tim. 3:5 vekin amai insung kilkhawi thei tu, thutak ah hruai thei tu asi ding. Voi tampi cu kawhhran sung tulnak ruangah pastor pawlin anmai insang an ngaihthah theu asi.

            Humhimnak hrang thla camsak: I Tim 3:2-4, ah a sim vekin kawhhran hruaitu cu soisel ding umlo ding asi. Cuvek si thei dingin Thlarau Thianghlim in a luahkhat camcin as tul asi. Pastor cu amai insang, kawhhran mipi le kawhhran lenglam mi pawl tiangin an upat tlak mi asi ding ( I Tim. 3) ti asi tikah cuvek milai tlingtlak an um pei maw? Satan cu milai hnakin a caksawn. Asinan pathian cu satan hnakin a caksawn. Curuangah Pathian humhimnak hrangah thlacamsak ringring pastor in a tul asi.

            Pastor tampi an rawngbawlnak an bansan nak cu thanaunak, beidawnnak ruangah asi. Thanau lo ten, mawhsiatnak lak le satan thlemnak a phunphun lak ihsin Bawipa Pathian duhnak rian thei dingin

Tiamkam 4: Kawhhran member ka si.

Ka pastor hrangah nitin thla ka cam ding. Pastor hrangah hnatuan cem ti a um lo. Thanaunak le thabang tertu a phunphun a tawng ve ringring asi. Soiseltu lak ah nung in hruaitu tha, pa tha asi a tul. Pastor pa in amai huham caknak in ziangkim a tuah thei lo ruangah Pathian in huham cahnak le fimnak thawn a thuam ringring theinak ding hrangah thlaza ka camsak ding asi.

 

Tiamkam 5. “Ka Insang cu a hardammi Kawhhran Member si dingin ka kaihruai ding

            Na mit sungih thingtum hman poisa loin na unau mit sungih mithnawm fate kha ziangah so na poisat? Na mit sungah thingtum a um nacingin ziangtinso na unau cu ‘Na mithnawm ka lo coihsak ding,’ tiih na ti thei? Mititer aw pa! Na mit sungih thingtum kha suah hmaisata awla cuticun na unau mit sungih mithnawm cu fiangtein na hmu thei ding ih na coihsak thei ding” Mathai 7:3-5. Pastor famkiman um lo, kawhhran member famkim an um lo. Khrih vek cekci bangnak nei thei zohman hi lei taksa thawn kan nei thei dah lo ding. Insang hi kawhhran sung pehtlaih awknak tahthimnak vekin Bible sungah ngan asi.

Sing/Date

 

Kawhhran le insang: Eph. 5:22-26 ah nupipawl pasal thuhnuei ah tuhlut awk ding thu a sim. Cang 32-33 ah pasal pawlin nupi a duhdawt ding thu a simih nupi pawlin pasal an upat ding thu a sim. Eph. 6:1-4 ah fale pawlin nulepa thu an nai tulzia pawl a si. Nulepa in fale pawl lungtawp ter lo ding thu pawl a sim. Insang a harhdam tik lawngah a harhdammi kawhhran member si a theih asi. Insang ah thlacam in thlarau nun harhdam mi si thei dingin nitin nunpi theitu si a thupi.

Insang in kawhhrang hrang thlacam

Insang ciar in mai umnak kawhhran hrangah thlacam ding asi.. humhimnak hrangah, dingfelnak hrangah, Thutak simsuahnak hrangah, kawhhran insang ciar hrangah, thazang peknak hrangah, taksa harhdamnak, kaihruai awknak ah fimnak, thleidan thiamnak hrangah thlaza camsak ringring ding asi.

 

Insang in Pathian thangthat tlang

Nupi pasal, fate nei poh in mai insungsang zapi ten insang Pathian biaknak neih ringring ding asi. Insang ah Pathian thangthatnak nei in kawhhran ah bawmtu, taunt, tungdingtu le midang thapetu, siahhlawh tha si dingin zirh awknak, nunpi ding asi.

Khrih ih monu duh ding

Kawhhran cu Khrih ih monu asi, Khrih cu mopa asi.

Zianghman phutmi nei loin kawhhran, Khrih ih mo cu duhdawtnak asi. A dik le a fel mi cu duhdawtnak a awl ding nan a santlai lo le a fel lo mi cu duhdawt thiam a har theu. Kawhhran cu leitlun a um sungah famkim lonak tete a nei ringring ding. Sikhal sehla Khrih in a duhdawt zet ih a mai thisen in a leimi kawhhran cu zumtu pakhat cu duhdawt tuk ding asi. Cutin ka insang cu kawhhran duhdawtbiktu, tlaihsantu, tungdingtu, bawmtu tha si dingin ka kaihruai ding asi.

 

Tiamkam 5. Keimah cu kawhhran member ka si.

            Ka insang pawl cu kawhhran member tha si dingin ka kaihruai ding. Kan insang in kawhhran hrangah thla kan cam ding. Biak inn ah kan insungsang zapi ten Pathian kan be tlang ding. Kawhhran ah kan insungsang zapi ten Pathian kan rian tlang ding. Zisu Khrih in a duhdawt ih amai nunnak thing kross parah a pek hnawhsan mi kawhhran cu duhdawt zettu si thei dingin Pathian bawmnak kan dil ding.

Sign/Date.

 

6.     Kawhhran member sinak cu laksawng sunglawi vekin ka ret ding.

Tahthimnakah: johny cu amai ihnak room thianfai dingin ka fial ih hnawmbal pakhat hman hmuh ding um loin ret ringring ah ka fial. Midang pakhat in Johny hnenah laksawng sunglawi tha zet pakhat a rak pek. Johny in fialcawp in a tuahmi cu dan vekin a tuahmi asi. Laksawng sunglawi a cohlang tikah dan vekin si loin lungawinak phurnak thawn a lak ding asi.

A hmaisa tathimnak vekin kawhhran member situ cun kawhhran member sinak in a phutmi pawl cu dan vekin an tuah theu men asi. A phnihnak ah laksawng covo la tu cu lungawi sopar ten a lak in a phur zet ding asi. Club membership pe in member asi tu pa cun club cu amai duhnak vekin hman ding, amai duhnak ngah nak hrangah asi. Asinan club membership vekin kawhhran member sinak neitu pawl cun kawhhran hnen ihsin an ngahmi, an duhdan le lungawi zawng asi mi pawl parah an hngat aw. Anmah in an ngah ding hrimhrim ahan ruat aw ih kawhhran hrangah ziang ka tuansuak mi asi ve ding timi hnakin kawhhran in ka hrangah ziang  I pek thei ding, ziang kahlawkpi ding timi lawng an zoh asi.

Bible in kawhhran member sinak in zirhmi le simfiang mi cu club member sinak vek asilo, laksawng co tu sinak asi. Mi zokhal ansual theh (Rome 3:23) ih thi ding lawnglawng kan si theh (Rome 6:23). Cutin sualnak nei lo Pathian Fapa cu kan ai awh tuar in a thih. A thihnak ruangah rundam kan si (II Kor. 5:21). Cutin sualsir in Khrih ah kirsal ding kan si (Tirh 3:19). Cutin Pathian zangfahnak zumnak in khrih ah rundam mi kan si (Eph. 2:8). Cutin Pathian zangfah lainatnak laksawng kan co mi ruangah kawhhran sungtel kan si theinak asi ( I Kor. 12:27-28). Khrih ih ruangpum pehzawm, taksa peng pakhat ka si venak cu Pathian laksawng pekmi asi.

Kawhhran hi milai le milai cawimawi awknak, mai duhnak tuah famkimnak, milai diriamnak hawlnak hmun asilo. Pathian in amai zangfah lainatnak ruangah in rundamnak laksawng kan comi sungah kawhhran member sinak khal a tel cihmi asi sawn.

            Dungthluntu pawlin a tumbiksi an duh ih thu an el awk rero khal Zisu in a theih tikah an lungput tenumza cu a sim fiang hai (Mat. 20:25-28). Curuangah an zatein Jesuh in a ko khawm ih, “Nan theih vekin leilung tlunih uktu pawl cun an ukmi pawl kha an lal-hnawh hai ih hotu pawl khal in thu an nei ngaingai. Asinain nannih lakah cun cu bangtuk cu si hlah seh. Nanmah lakah pakhat khat in mi dang hnakih thupit a duh ahcun midang pawlih hnen-um a ṭuan a ṭul; nanmah lakah pakhat khat in hmaisa bik si a duh a sile nan sal a sihmaisa a ṭul. 28Milai Fapa cu rianmi si loin mi riantu si dingah le mi tampi tlen dingah a nunnak pe dingin a ra a si,” tiah a ti.

            Keimai covo asi ti ruahnak lungput neitu member pawl cun cumi khami tiah an mai duhnak a famkim mi siseh famkim lo mi thu ah siseh an au ring zet theu asi. Cule kanmai duhdan in thil a feh lo tikah kan phunzai, akn aihram theu. Asinan kan nunnak neitu, Khrih Zisu ah in rundamnak, a lak in in pekmi rundamnak laksawng kan comi ruangah kawhhran member kan si thei thuhram ihsin zoh thawk tikah lungput danglam pi a thleng aw asi. Keimah in ka phu ve hrimhrim timi lungput  ahlo theh. A nepbik cotu, netabik si duhnak lungput  in neither ih midang hmaisa sawn ah fehter, coter, thatter duhnak lungput thawn midang rian duhnak thinlung in kan khat sawn asi.

Kawhhran member sinak hi kan phu lo mi Pathian pekmi laksawng sunglawi asi. Asinak vekin urhsun zetin sunloih uhsi.

Tiamkam 6. Kawhhran member ka si.

            Kawhhran member ka sinak cu laksawng asi. Alak in Pathian pekmi laksawng sunglawi rundamnak laksawng ka co tikah Khrih ih ruangpum asimi kawhhran sungtel sinak khal ka co cihmi asi. Local kawhhran member ka sivekin tihnimmi ka si. A tu ahcunkawhhran member pawl lungawi sopar ten duhdawtnak in rian ding lawng ka ruat. Kawhhran member ka sinak cu ka phu hrimhrim ruangah si loin a sunglawi tuk mi Pathian laksawng asi ih midang rian ding ka si.

Sign/Date.

Thuhram: Thom S. Rainer, “I a church member”.

 

lettu: Hre Mang