II. Pathian sinak
II. Thlarau Thianghlim Pathian sinak
Thlarau Thianghlim cu Pathian sinak nei in Pa Pathian le Fapa Pathian thawn sinak bang aw/ tluk aw asi ( Mth 28:19; Jn 14:16-18; Dung 5:3-4; 16:6-7; II Kor 13:14). Thlarau Thianghlim cu Thumkawm Pathian lakah Pathian pakhat asi ih kan cawimawi ding, duhdawtnak le zumnak thawn kan hngat awknak ding khal asi. Fimnak le cahnak ih khat mi le a thianghlim mi a siih zovek zumtu mi piangthar hnen khalah a cencilhnak in a umpi ih zumtu sunglam nunah Pathian in a fale pawl parah hminsinnak a tuahmi siin zumtu pawl leitlun nitin nunah lam hruaitu, zirhtu le tha pe tu asi. Zumtu pawl nitin nunah bawmtu ttha le rualpi ttha asi. Thumkom Pathian sinak, Pa, Fapa, le Thlarau Thianghlim pumkhat sinak hi milai tongin simfiang theih asilo ding ruangah zohmang mangbang hlah uhsi! Hrih a ratsal tikah Amah vekin theihnak famkim in inthuam leh dingih cutik lawngah simfiang ttul nawn loin fiangzetin kan thei ding.
1) Thuthiangin ziang a sim:
i) Thlarau Thianghlim cu Pa Pathian vekin ( Dan 33: 27; Sam 90:1-2), le Fapa Pathian Jesu Khrih vekin (Heb 1:8-12; 7:24-25) a kumkhua in a hmunmi asi (Heb 9:14).
ii) Thlarau Thianghlim cu Jehovah asi, Isai 6:8-10; tahtthimding-Dung 28:25-27; Jer 31:13-34; leh Heb 10:15.
Curuangah thumkawm Pathian sinak Pathum lakah pakhat cio cu Jehovah tiah kawh theih asi kan ti thei.
iii) Thlarau Thianghlim cu Pathian asi, Dung 5:1-4.
iv) ThlarauThianghlim cu thutak asi, ( Jn 14:16-17; 15:26; 16:13), Pa Pathian kha thutak asi, ( Sam 31:5; Isai 65:16), cun Fapa Pathian Jesu Khrih khal Thutak asi, (Jn 14:6).
v) Thlarau Thianghlim cu “umkim” asi, (Sam 139:7-10), Pa Pathian (Sam 139:7-10; Jer 23:23-24) le Fapa Pathian (Mth 18:20,28:20; Rom 8:34; Heb 13:5b) khal kha umkim an si. ( Umkim-timi cu khuitawk hmun khalah ziangtik lai can khalah um ringring tinak asi).
vi) Thlarau Thianghlim cu Pa le Fapa thawn an naihniam aw zet
a) Fapa tihnimnak ah, Mth 28:19
b) Dungthluntu thlawsuah peknak, II Kor 13:14
2) Pathian sinak bul a neihmi pawlin a Pathian sinak a langter
i) Umkim, (Sam 139:7-11) (Khui tawk hmun khalah a um ringring)
ii) Theikim, (I Kor 2:10-11) (Ziangkim theih lo mi a nei lo)
iii) Cakkim, (Lk 1:35; I Pet 3:18). Ziangkim ti thei lo mi a nei lo
iv) A Thianghlim, Jn 14:26
v) Thutak asi, I Jn 5:6
3) Pathian hnattuan a ttuannak in a Pathian sinak a langter. Thumkom Pathian in hna a ttuannakah Pathian sinak nei in Thlarau Thianghlim cu a tel ve ringring.
i) Leilung sersiamnak (Sem 1:1-2; Sam 104:30b; Job 33:4; Sam 104:1-30), Pa Pathian ( Sem 1:1; Isai 44:24,45:12;18; 51:13a; Eph 3:9), Fapa Pathian ( Kol 1:16; Heb 1:2,10). Cutin thumkawm Pathian sinak cu sersiamnak ah a lang.
ii) Jesu Khrih kha milai taksa in thuam aw in leitlunah a rat tikah Pa Pathian le Thlarau Thianghlim Pathian khal kha an umih hna an ttuan veve Lk 1:35. Jesu tihnimnakah Mth 3:16-17; Lk 3:21-22. Jesu Khrih leitlun nun le rawngbawlnakah Lk 4:1,14; 9:28-36; Dung 10:38. Cun Khrih thawhsalnak khalah Dung 5:30; Rom 8:11 Thlarau Thianghlim cu a um ringring.
iii) Pa Pathian, Fapa Pathian le Thlarau Thiahnghlim Pathian cu milai rundamnak hrangah sankhuk rei ihsin khua an rak khannak ah an tel thluh Heb 9:11-15; I Pet 1:1-2.
iv) Kumkhua nunnak cu zumtu pawl hnenah Pa Pathian hnattuannakin (Eph 2:4-7; I Jn 5:11), Jesui’ hnattuannakin (Jn 6:40; I Jn 4:9) le Thlarau Thianghlim hnattuannakin (Rom 8:9-11) pek a si.
v) Pa Pathian fimnak cu Thlarau Thianghlim rawngbawlnakin ( I Kor 2:10-11) le Fapa Jesu Khrih rawngbawlnakin ( I Kor 1:24,30) leitlunah tarlang asi.
vi) Zumtu pawl cu Pa Pathian hnattuannak vekin (Rom 8:33), Fapa Pathian hnattuannak vekin ( Kal 2:16) le Thlarau Thianghlim hnattuannak vekin ( I kor 6:11) thiamcoter an si.
vii) Pa Pathian in zumtu pawl cu Khrih insang sungah Thlarau Thianghlim in hminsin (seal khen) tuah an si II Kor 1:22; Eph 1:13-14.
viii) Thlarau Thianghlim cu Pa Pathian ( Jn 14:26) le Fapa Pathian Jesu Khrih ( Jn 15:26; 16:7) in zumtu pawl hnenah kuat asi.
ix) Zumtu pwl cu Pa Pathian ( II Kor 6:16); Jesu Khrih ( Jn 14:18-20; Rom 8:10; Kol 1:27) le Thlarau Thianghlim ( Rom 8:9; II Tim 1:14) in mangbnagza in an cencilh.
x) Pathian fa le pawl cu Pa Pathian ( Isai 51:12; II Kor 1:3; II The 2:16-17), Jesu Khrih ( II Kor 1:5; II The 2:16-17) le Thlarau Thianghlim ( Dung 9;31) ih kilvennak hnuaiah an um.
xi) Duhdawtnak cu zumtu pawl hnenah Pa Pathian hnen ihsin ( Jnn3:16; Rom 5:8; I Jn 4:7-8,19), Jesu Khrih hnen ihsin ( Jn 14:21; 15:9; Eph 5:25; II Tim 1:13), le Thlarau Thianghlim hnen ihsin ( Rom 15:30; Kal 5:22-23; Kol 1:8) pek an si.
xi) Misual tluse zo hnu thlahtharnak ( Jn 3:5-7; Tit 3:5)
xii) Leitlunah Pathian rawngbawlnak pawl thawkkhumnak (II Pet 1:21)
xiii) Minung le Pathian sunglam thu a theihnak le theihternak (I Kor 2:9-13)
xiv) Zumtu pawl lungawinak cu Pa Pathian (Sam 16:11; 43:4), Jesu Khrih ( Jn 15:11; 16:24; 17:13) le Thlarau Thianghlim (Rom 14;17; Kal 5:22-23; I The 1:6) ah a um.