KAN BIAK MI PATHIAN Cu ZO ASI? KAN BIAK MI PATHIAN THU ( THEOLOGY PROPER)
I) Pathian a um a si tiah a zum tu pawl ruahnak: I. II) Baibal vekin Pathian kan hawldan ding: II. III) Baibal sungah kan hmuh thei mi Pathiann hmin pawl III. IV) THUMKAWM PATHIAN (Trinitarianism) IV. V) Pathian khawkhan dan: V. VI) Pathian in a sersiammi pawl a kilhimnak Milai in Pathian cu ziangvek a si ding tiah ruahnak a phunphun an nei nan zohman Pathian sinak taktak a sim fiang thei tu an um lo ih mi hrekkhat santhar fimnak lamah a hngat aw tu pawl cun Pathian a um hman an zum nawn lo. Asinan Pathian in a mah le amah Baibal Thuthianghlim sungah a lar awknak vekin fimkhur zetin Thlarau Thianghlim bawmnak thawn kan hawl lawngah Thlarau Thianghlim theihternak thawn Pathian cu zovek asi ti famkim lo zetin kan thei thei. Kan zummi Pathian cu zovek le ziangvek asi ding ti kan theih fiang lo ruangah voi tampi cu mi tampi in kan sakhua biaknak nunah a tak ram thleng thei loin zumnakah kan vavai ttheu. Curuangah kan zummi Pathian cu zo a siih ziangvekin milai parah le sersiammi parah hna a ttuan ti Thuthianghlim in a sim vekin zoh hnik uhsi.
Pathian a um maw um lo ti ziangtin kan thei thei? I. Pathian a um a si tiah a zum tu pawl ruahnak: Milai sakhua biaknak par ah hngat aw aw in ruahdan:- Zovek milai khalin milai hnakin thilti thei huham nei tu Pathian a um asi tiah an zum thluh ruangah Pathian cu a um hrimhrim ding, ti ah an zum. Milai thinungah diknak ngansannak – moral/anthropological view:- Zovek milai khalin diknak kan hawlih milai thinlungin diknak timi ruahnak kan neih cio ruangah cui ruahnak a suah ter tu diknak ih hram Pathian a um hrimhrim ding. Ontological View:- Milai pawlin a famkim mi Pathian a um asi tiah ruahnak an neih cio ruangah Pathian cu a um hrimhrim ding asi. Leitlun sersiammi hmuihmel le mawinak zoh tikah Pathian a um hrimhrim ding tiah ruahnak a um. Cosmological view:- Leitlunah ziangkim a cangmi ih a hram thawknak “cangtertu” “cause” a um hrimhrim ding ti ruahnak a um. Pathian a um lo tiah a ruat tu pawl ttansan: a. Polytheism- Milai in Pathian tampi biakmi a um ruangah Pathian ngaingai a um lo dingih milai phuahcawp men asi tiah an ti ( Dungthluntu 17: 22-31) b. Pantheism- Pathian cu ziangkim a siih ziangkim cu Pathian asi. c. Materialism- 02 July 2001 Page -32 Mithmuh theih thil le ri pawl hi a kumkhua in a hmun ding d.Deism – Pathian cu a um ko nan anih cu a thianghlimih leitlun cu a thianghlim lo ruangah leitlun thawn zianghman hnaihnawk nak a nei lo. e. Evolution- Ziangkim cu tikcu a rei vekin a thleng aw vivo mi asi. A tlunlam vekin leitlun milai pawlin Pathian a um maw um lo tiah ruahnak a phunphun an nei ih zohman fiangfai ten simfiang thei tu an um lo ruangah mah le sakhua nak cio ah an hngat aw ih mihrek khat cun zumnak mumal nei loin an um ih mi hrekkhat cu an biakmi an Pathian zovek le ziangvek asi ti ruahnak hnget khoh nei loin thinlung buainak ah an hmang. II. Baibal vekin Pathian kan hawldan ding: Thuthlunghlun sungih Baibal thutlang hrekkhat pawl: Sam.119:2; Jer.29:13; Daan 4:29; I Sansiarnak 22: 19; II San 22:9; Sam. 17: 3,4; Sam 34: 10. Thuthlungthar thuthlang tthenkhat: Eph. 1:17; 3:7; 4:13; Kol. 1:10; II Pet. 1:8; 1: 2,3; 3:18. -Khristian zumtu pawl ni tin nunah a tumtah sangbik cu Pathian theih asi. Thusutnak tthenkhat pawl: -Ziangruangah vanram ah um sawn loin leitlun ah na um? Pathian in ziangtuah dingah leitlun ah tikcu le caan ttha a lo pek? Ziang hrangah sersiam na si? -Na dam sungah ziangvek thilttha bik na nei/tuah thei ding tiah na ruat? -Na nunnak cu ziang parah a hngat aw? Filed on 12th August 2000Na ruahsannak cu ziangvek parah na tthum aw? Leitlun na damsan cu ziang a si? Pathian theih cu leitlun thildang theihnak hnakin a harsa sawn mi asi. Pathian theihnak cu Pathian thawn mimal pehtlaih awknak asi, Jn.10:27. Pathian theihnak cu mah mimalin tel a ttul, Sam 34:8. Pathian theihnak cu Pathian zangfahnakin amah le amah a lang awknak thil a si, Jn. 15:16; Kal. 4:9; Jer. 1:5. Pathian theih ih hlawknak: Pathian thei tu cun Pathian hrangah thil tampi tuah theinak an nei ding. Daan. 11:32… an cak ding. Pathian thei tu cun Pathian ruahnak le ngaihtuahnak vek an thinlung sungah a um. Dan. 9:4,7,9,14. Raltthatnak an nei, Dan. 3:13; Dungtluntu 5:28,29; Sam. 63: 3-4. Leitlun nun diriamnak sangbik an nei, Sam 73:25; Dan.3:16-18; Phi. 1:21; Rom. 8:1,16,28. Cuticun Pathian a theifiang tu pawl cun an leitlun nun rori ah Pathan thawn mimal pawlkawm awknak an nei ih leitlun nun hi Pathian in a sersiam san vekin le an nitin nun ah Pathian duhnak vekin an nun tikah an lung a awi ih an hna a ngam. Leitlun milian bik le mi ropi bik hnak khalin Pathian thei tu pawl cu mi lungawi bik an si. III. Baibal sungah kan hmuh thei mi Pathiann hmin pawl Thuthlunghlun: a. Hmantlangpi mi pawl El, Elah, Alohim-‘God’- Pathian Jehovah-‘Lord’ ‘God’-Lal Pathian Adonai-‘Lord’- Lalpa Hmin hram pawl b.‘El’ thawn a kawm aw mi pawl El-Shadai-‘Almighty God’- Huham cahnak Pathian (Sem. 17:1) 2) El-Elyon-‘Most High God’- Cungnung bik Pathian (Sem.14:18) El-Olam-‘Ever Lasting God’-Sankhuk Pathian c.El, Elah, Elohim Himi Hebrew ttongfang pawl hi anmah cafang pakhat cio in a falten hman tikah cun a tam (pakhat hnakin a tam-plural form) ah hman mi an sinan catlang sungah hman tikah a mal (singular) vekin hman mi an si. Cucu kan Pathian cu thumkawm Pathian a sinak langter tu pakhat ah kan la thei. Elohim: Ex. 18:11; 10:3; Dan. 13:2 ; Thutthentu 10:13- Elohim timi tongfang cu amah tongfang vekin kan let asi le “Gods”, “Pathian pawl” tinak asi. “El”- timi tonghram ih san cu “a cakmi’-‘the Strong One’ tinak asi. Sem.1:19 sersiamnak thu ah kan hmu thei. “Elah”- timi san cu Thukam Pathian sinak a kawk ih mirang cun “Bind with the Oath” tiah leh theih asi. 3) ‘im’ timi tongfang hi Hebrew tongfang pakhat hnakin a tammi sim tikah hmanmi (plural) asi. Curuangah ‘Elohim’ timi cu kan let tikah ‘Ziangkim ti thei Thukam Pathian’ tiah kan let thei ih Pathian pakhat sinak neiin thumkawm Pathian a sinak langter tu pakhat asi. Jehovah-‘Self Existent One’-‘Mahte ummi Pa’-himi ttongfang hi ‘Cungnung bik Pathian’ tinak ah an hmang, ‘The Most High God’ – ‘A sangbik Pathian’ ‘A cungung bik Pathian’, zianghmuahhmuah tlunah a ummi Pathian ti simnak ah an hman mi asi. Daanpeksalnak 6:4 Jevovah hmin pasarih pawl Jehovah Jereh-‘the Lord will provide’-Lalpa in in cawm ding Sem 22:14 Jehovah Rapha-‘the Lord that Health’-Lalpa tidamtu Exodus 15:26 Jehovah Nissi-the Lord our Peace- ‘Lalpa kan Daihnak’, ‘Daihnak Lalpa’ Jehovah Shalom- “Lalpa kan rin-umnak”. Jehovah Raah-the Lord is my Shepherd-“Lalpa cu ka Tuu khal” Sam 23:1 Jehovah Tsidkemu-the Lord our Righteousness-Lalpa kan Diknak, Jer 23:6 Jehovah Shammah-the Lord is present-Lalpa cu a um, Umkim Pathian, Ezekiel 18:35. Adonai-“Lord-He is Authority”- Lalpa-amah cu thuneitu a si. IV. THUMKAWM PATHIAN (Trinitarianism) Thumkawm Pathian (Trinity) ti mi hi Baibal sungah kan hmu lo nan Thuthlungthar le Thuthlughlun la khawm in kan khaikhin tikah kan Pathian cu thumkawm Pathian a sinak kan hmu thei. Pathian mizia cu pakhat a um vekin, Pathian cu dinhmun pathum asi lole mi pathum vekin a lang aw ih pakhat le pakhat karlak ah an tthen awknak cu milai pakhat le pakhat lakih tthen awk nak vek a silo. Aisinan Pathian pakhat sungah pathum sinak nei in a takih a ummi asi. Baibal in Thumkawm Pathian thu a simmi Dan 6:4 Our God is One Jehovah Hebrew ttong ahcun “Echad” (Ekh-awa) –to unite as one, pakhat vekih kawm khawmmi tinak asi. Samuel 1:1 Elohim in lei le van a sersiam a. 1) Pa Pathian I Kor 8:6 2) Fapa Pathian Jn 1:1 ; Kol 1:16 3 ) Thlarau Thianghlim Pathian Job 33:4 b Baibal sungah plural (pakhat hnakih tam) vekin a hmannak, Sameul 1:26-27,3:22; 11:7,8 etc. Messiah cu Pathian lakih Pathian pakhat vekin a sim, Semuel 2:1-12; Iswai 53:16. Thlarau Thianghlim cu Pathian lakih Pathian pakhat vekin a sim, Semual 1:2; Isai 48:16; 63:9-10. B.Thuthlungthar ah kan hmuh thei mi Jesu Khrih in amah le amah kha Pathian lakih Pathian pakhat vekin a sim aw. Cun a ra lai dingmi thlakamtu kha Pathian a sinak thu a rak sim cia. Jn 6:17-27; 6:32-48, 62-69;8:42, 44-59;10:28-30; 14:11-16:27,28;17:1-4, 21-22. Jn 14:15-17, 26; 16:7-15 Tihnimnakah Mth. 3:16-17; 28:19; Thlawsuah peknak II Kor.13-14. Curuangah Pathian cu Pathian pakhat mizia pakhat sungah pathum sinak nei in a ummi a siih milai ruahnak thluak in a thei famkim thei dah lo ding. Pathian pathum a um ti cu kan zum lo, Baibal khalin a zirh fawn loih Pathian pakhat sungah Pa Pathian, Fapa Pathian le Thlarau Thianghlim Pathian tiah thumkawm Pathian cu kan zum asi. Pathian pakhat sinak sungah sinak Pathum a. Pa Pathian: Khrih ih Pa ( II Kor.11:31). Fapa cu Pai sungsuak asi, ( Sam.2:7; Jn.1:14,18; 3:16). Pa in Fapa a thei, Mth. 3:17. Fapa in Pa a thei, Math. 11:27; Jn.8:16-29. Fapa leitlunah a um laiah pa’I duhnak ah a hngat aw, Jn.8:28,29. Milai cun rualran ten upatnak le cawimawinak pek ding asi, Jn 5:22,23. Milai le khawsia khalin an thei, Mth. 16:16; Mk.15:39; Jn. 1:49. Khawsia pawlin an theihnak Mth. 8:29. Zumtu hmuahhmuah ih Pa a si Jn.1:12,13. b. Fapa Pathian-Jesu Khrih c. Thlarau Thianghlim Pathian Cuticun Pathian cu mal-sinak pathum neiin milai ttong cun Thumkawm Pathian tiah kan bia. Pathian ih sinak Pathian cu Thlarau asi: Pathian cu thlarau asiih milai mitih hmuh theih lo, sinak ciangfel zetin a um mi asi. Jn. 1:18; 4:24; I Tim. 1:17; 6:15-16. Asinan milai hmuh thei dingin a lar aw thei asi. Nunnak: Pathian cu nunnak a siih ziangkim nunnak ih hrampi asi. Exo. 3:14; Jer. 10:10; Jn 5:26; I The 1:9. Nunnak pe tu Semual 2:7; Jn 3:16, 36. Ziangkim thei: Pathian in thilcang mi le a cang lai dingmi pawl khal a thei thluh Sam. 139:1-14; 147: 4-5; Math. 11:21; Jn. 3:20. Ziangkim a hmu ih a thei thluh. Fimnak-a fimnak le a mizia ah a famkimih zianghman hnawmkai lo asi. Sam. 92:5; 104:24; 136:5; Thuf. 3:19; Rom 11:33 Thianhlimnak: Pathian cu a thianghlimih ziang hnawm hman kai lole sualnak thawn a hnawihnih aw lo mi asi. I Pet.1:16; I Semuel 2:2; Sam 99:5-9; Isai. 6:3; 57: 15; I Pet. 1:15; Thup. 4. Diknak (Righteousness): Pathian dan le a tuahnak pawl cu a dik thluh. Sam. 19:7-9; Jer. 9:24. Dingnak (Justice): Pathian mizia le thinlungput cu a ding asi: thleidannak a nei lo Dung. 10:34; Rom. 2:11. Duhdawtnak (Love): Pathian in a sersiammi milai pawl tthatnak dingah amai sungsuak ziangkim a tuahsak. Sam 103:17; Eph.2:4-5; I Jn. 4:8,10. Tthatnak : Mai bul hrang ruat loin a duhdawtmi pawl hrang a ruat, Daan. 7:8; Jn 3:16. Zangfahnak: Milai phu lo in milai parah thilttha a tuahsak, Exo.34:6; Eph.1:5-8; Tit. 2:11. Duhdawt lainatnak: Harsatnak a tuartu pawl a lainat. Daan. 4:13, 31; Sam. 103:1-17; 108:4; I Pet. 3. Rin umnak: Pathian cu a rin umih a thukam a pelh dah lo. Mipum 23:19; Sam 89:1; I The.5:24; Daan. 7:9; 42:4; I Kor.1:9. Thutak: Pathian cu amah le amah ah, a thu le a tuahnak ziangkimah thutak asi. Sankhuk Thutak a si. Jn 14:6; 17:3; Mipum 23:19; Sam.12:6; Thuf. 30: 5; Rom. 3:4; Jn.18:38. Zalennak: Pathian cu kai awktu zianghman a nei lo. Sersiammi zianghman Pathian a kai awk thei tu a um lo. Pathian cu amai dingnak, diknak le thianhlimnak ih a duhthlan vekin ziangkhal tuah dingah a zalenmi asi. A sersiammi tlunah ziangkim a tuah thei ih ziangvek cangvaihnak khal a duh mi pohpoh tuah thei nak dingah zalennak a nei. Sam.51:12: Hos. 14:4; Rom. 8:32; Sam. 115:3. Huham cahnak: Pathian cun ziangkim huham cahnak a nei. Amai sinak sunhih a tuah duh mi hmuahhmuah tuah thei dingah huham cahnak a nei. Math. 19:26; Thup.19:6; Semuel.18:14; Job. 42:2; Isai. 44:2; Math.19:26; 12:18. Pumkhat sinak ( Unity): Pathian pakhat a sinak (Pumkhat sinak). Pathian cu pakhat asi. Daan.6:4; I Kor.8:6. Pa le Fapa le Thlarau Thianglim thumkawm Pathian hnattuanakah zianghman a kalh aw mi le a rem aw lo mi a um lo, Daan. 4:35; Isai. 44: 6-8; 45:65; I Kor. 8:4-6; I Tim. 2:5; 3:16; Isai. 40:8; Mth. 26:39. Umkim Pathian: Thumkawm Pathian Pa, Fapa le Thlarau Thianghlim cu khui tawk hmun khalah a um ringring as,. Sam. 139:7-12; Jer. 23:23-24; Zumtu sunglam nunah Pathian a um, I Kor. 3:16-17. Tikcu caan a her rero mi hin Pathian a hnaihnawk lo, Sem. 21:33; Sam. 90:2; Isai 40:28; I Tim. 1:17; Thup. 1:8,18; 15:7. Sankhuk Pathian asi. Tawpnak nei lo: Sersiammi pawl cu amah ah an hngat aw. Jn 1. Cemnak nei lo: I Siang. 8:27; Sam. 145:3; Dung. 17:24; Job. 11:7-9 Thleng aw dah lo: A tumtah, a mizia, a thutthennak, a umtuzia ah a thleng aw dah lo, Sam.107:27; Mal. 3:6; James 1:17; Mipum. 23:19; Isa. 46:9. V. Pathian khawkhan dan: Sankhuk rei ihsin (Eph. 1:4; II Tim 1:9; I Pet.1:20) Pathian khawkhannak cu a hram a thawk ih a fim ( Rom. 11:33) nak thawn zalen (Zohman thurawn mi a nei lo, Isai. 40:13,14) zetin amai lunghmui zawngin khua a khang. A khawkhannak cu thleng theih lo ( Heb 13:8) asi. Thildang pakhatkhat dinhmun parah hngat aw in khawkhang mi asi lo, (Isa 46:10; Eph.1:11). Theihding: Pathian khawkhannak cu thilthleng ding a theih cia ruangah a tuah mi asi loih amai duhthlannak lio lio in ziangkim cang dingah a remruatih a tuah mi asi. Sualnak siar lo cu amai duhnak ih cangmi an si thluh. Cun sualnak hman cu amai siannak (permisive) um loin leitlunah um theinak a nei lo. A khawkhanmi a tuahsuak daan: a. Sersiamnak- Hebrew ttongin “Asah” lole “Aw-saw” timi cu thil zianghman um cia loin thilthar tuah tinak asi. ersiamnak cu ttumkhatah a ttheh zo ih a cawl. Cui hnu ah amah in a kilkhawi ih a cawmdawl (Heb. 1:3; Job. 7:20; Heb. 9:6; Sam. 104:29,30; Dung. 17:28; Kol.1:17). Pathian in a sersiammi pawl a kil him (Semual 20:6; Sam. 19:13), hmanrua pakhat khat hmangin a kil thei. Sersiamnak A. A tirah Pa Pathian, Fapa Pathian le Thlarau Thianghlim Pathian cun leitlun le a sungih thil um hmuahhmuah le ziangkim cu fimnak, huham cahnak, tthatnak le thilti theinak langternak dingah niruk sungah sersiam dingah a lunghmui mi a rak si vekin thil ziangkim cu sersiam asi. Sersiammi ziangkim cu Pathian mithmuh ah a ttha ngaingai mi a si. Pathian tumtah, duhdan le lunghmui zawngin Pathian in ziangkim cu a sersiam asi, Semuel 1-2; Jn.1,2,3; Heb. 1,2; Job. 26:13; Rom.1 :20; Kol.1:16. Pathian in ziangkim cu a THU sungin a sersiammi asi. THU cu Khrih asi. Jn. 1:2,3; Heb 1:2; Kol.1:16. Pathian in sersiamnak hna a ttuan tikah a Thu sung in, a um hrih lo mi thil a sersiam asi. Sem.1:1. A sersiamnakah niruk sung a rei. Sem.1:30-31. Ziangkim sersiammi cu Pathian mithmuh ah a ttha tuk. Sem.1:31. Sersiam mi hin Pathian a um asi ti milai thinlung sungah a theihter. Rom.1:18… B. Ziangkim ramnung pawl a sersiam thluh hnu ah Pathian in amai hmuihmel kengin milai, nunau le mipa a sersiam ih thinlung, ruahnak le a siat thei lo mi thlarau nei in theihnak, diknak le thianhlimnak ah Pathian bangnak nei in a sersiam. Cui an sinak pawl cu nitin nunpi thei nak dingah huham cahnak thawn zalennak nei in duhthlannak zalennak Pathian in a pek hai. Milai cu leivut ihsin sersiammi asi, Sem. 2:7; Milai cu Pathian sersaimmi asi, Sem.1:27; Milai nunnak cu Pathian in a nungmi thaw a pek mi asi, Sem.2:7; Pathian in milai cu dingnak nei in a sersiammi asi, Thuf.7:29; Milai thinlung sungah Pathian ih daan in a phut mi pawl cu ngan thluh asi, Rom.2:12-15; Milai cu Pathian in amai hmin sunlawinak hrangah a sersiammi asi, Isai. 43:7; Eph. 1:11. Milai thinlung sungah Pathian daan in a phutmi pawl cu ngan thluh in a um tlunah sia ttha theihnak sung theihnak pek asi.. Cumi thupek an lunnak in Pathian thawn an peh zawm awknak cu tuah ttha in Pathian thu hnuaiah nung in milai cu leitlun sersiam mi tlunah thu nei tu ding asi. Milai cu cithlah zai dingin pathian in a sersiammi asi, Sem. 1:27-28; milai cu sersiammi, ramnung pawl tlunah uktu a si, Sem.1:28; milai cu Pathian thu hnuai ah thu thlulunak in nung ding asi, Sem2:17; milai cun Pathian thupek thlun dingah mawhphurhnak a nei, Thus. 12:13. Pathian in a sersiammi pawl a kilhimnak Sersiamtu Pathian cun tawpcin nei loin a fimnak, huham cahnak, thuneihnak le lainatnakin ziangkim sersiammi pawl cu a kil vengih a kai hruai in a cawmdawl asi, Heb. 1:3; Job.38:11; Isa. 46:10,11; Sam.135:6. Sersiammi a te bik ihsin a tumbik tiang Pathian kilvennak hnuai ah an um thluh, Math.10:29-31. Sersiammi parah theikim Pathian a sinak in ziangkim a be-khiah cia mi pawl cu pakhta te hman pelh lo ten a cang ttheh. A Fapa thihnak ding khal a remruat vekin a cang asi. Amai tumtahnak vekin zaingkim a cang theh mi asi, Dung 2:23. Pathian hmaiah zianghman rin lo pi in a cang mi a um loih Pathian khawkhannak vekin a cang mi lawnglawng an si, Thuf.16:33. Tikcu le caan thleng aw mi khal Pathian rua-hman cia vekin ziangkim a cang mi an si. Sem.8:22. Pathian thu in leitlun hman rua pawl cu a hmangih ziangkim cu a cang thluh mi an si, Isa. 55:10-11. Pathian cu leitlunih thilcang pa-ngai lenglamah thuneihnak a nei ih ziangkim a cang mi parah a duhvekin tuah thei nak a nei. Hos. 1:7; Rom.4:19-21; Dan.3:27. Amah ah ziangkim cu a um ih a ruahnak le suangtuahnak cu milai theihban asilo Rom.11:32-36. Milai cu Pathian in a duhdan vekin a mawng thei, II Siang 19:27-28. Asinan sualnak cu Pathian hnen ihsin a ra suak mi asi lo, Sam.76:10; Sem. 50:20:Isai. 10:6,7; Sam.50:21; I Jn 2:16. Pathian in Fapa sung in ziang a tuah dingih zo pawl hnenah ziang a tuah ding ti mi cu a theih cia le a ruah cia vekin asi, Rom.8:28-30. Pathian in milai thinlung sungah a daan in a phut mi pawl cu a ngan ih cu mi zawm duh lole thlun duh lo tu pawl cu an thinlung sual suangtuahnak pawl tuah suak dingah a thlah dah ih zalennak a pek hai, Rom.1:24-26,28; 11:7; Daa.29:4;2:30; II Siang.8:12-13; Sam.81:11-12; II The.2:10-12; Suah 8:15,32; Isa. 6:9, 10; I Pet.2:7,8. -- Posted by FALAM CHRISTIAN CHURCH OF INDIANAPOLIS, IN , USA at 11:53 AM 0 comments Thursday, October 18, 2007 |