HUATNAK THLAICI PA 3: Huatnak, Rinhlelhnak, Tihnak

HUATNAK

Leilung tlunah duhdawtnak in a cangvaihtermi le huatnak in a cangvaihtermi hruaitu le mipi an um.
Huatnak in a cangvaihtermi hruaitu pawl cun "raal neih hi a tha" an ti. "mipi pawlin huatmi an neih tikah an huatmi Siatsuah dingin siseh an huatmi hnakin caksawn ding zuam duhnak thinlung anneihmi hmangin mipi an mawng, an kaihruai.

Tahthimnakah, Hitler, Sadam Husein, Bin la Den pawl hi huatnak in an mipi kaihruaitu an rak si. An huatmi Zianghman lak ding um lo, satan hnakin do sawn ding, lole satan hmanrua, satan lamtang, sualnak ih hrampi vekin an simsiat thangsiat tikah an mipi pawl thinlung sungah huatnak thlaici tuh tahratin lamtang an tuah ih mipi an ukbet.

An dam sungah thiltha tampi an tuah nan an tawpnakriahsiatza asi. An tuahthatmi hnakin an tuahsiatmi le mipi hrang  canpualtha thiltha le  hlawknak an khamsakmi a tam sawn ringring. Anmah hotu pawl tawpnak hnakin a sesawnmi le tamsawn an siatsuahmi cu mipi thinlung sungah huatnak thlaici an tuhmi asi.
"Mi a huattu cu a mit a caw" ti asi ruangah huatnak thlaici a tuhtu pawlin an mipi mit an sawhcawt asi. An thinlung mit a cawt tikah ziangvekthu, zovekhruaitu, ziang tikcu ah zo kan thlun ding, ziang kan hril ding, ziang kan thupiter ding, tvp fimmak an thinlung khawruahnak in a tlasam ringring.

Ziangthu ruang hmanah Khrihfa zumtu ngaingai pawlin huatnak thlaici tuh ding kan si lo. Huatnak thlaici tuh cu satan hnatuan asi. Khat le khat karlakah siseh mi pakhatkhat hua dingin siseh huatnak thlaici va tuh dah hlah aw. Na tuh asile nangmah in na tuhmi thlaici ih rah cu nangmah lala in na at leh ding asi. Cui hlei ah nantuhmi cisia in milai thinlung a siatsuah dingmi cu rapthlak zet asi.
Cu hnakin duhdawtnak thlaici tuh sawn uhsi. Mi in in huat tikah in neh dahlo, kanmah in kan huat tikah kan sung cia asi. Huatnak kan nunpi ahcun Pathian kan sungah a cangvai theilo; asinan duhdawtnak kan nunpi ih Pathian kan sungah a nung, a cangvai asi ahcun ziangvek huatnak khalin in neh thei dahlo asi.

Khrih zumtu ngaingai pawlin kan huat thei mi cu satan le sual lawng asi.

"Pathian cu duhdawtnak" asi vekin huatnak le duhdawtnak an um tlang theilo. "Mi a hua tu ih thinlung sungah Pathian a um lo", Pathin thawn a raal aw mi a umsawn asi.

RINHLELHNAK

Khat le khat kar lakah rinsan awknak (trust) cu khat le khat pehtlaihnak ti hngettu khuaiseng vek asi. Chet pakhat cu electric lole oil/gas pakhatkhat hmangin nunter asi vekin mibur hnatuan tlang theinak ding hrangah alotheihlo in tulmi asi.

Rinhlelhnak thlaici cu Simsiat, zuarthlai, thangsiat awknak, thuphan puh awknak tvp asi. Cupawlin khat le khat karlak rinhlelh awknak a suahter.

Milai kum 20 a kimzo mi zo poh khal in thuanthu tawi million telin an nei theh asi. Mi pakhatkhat ih thuanthu million tel lakah anmah in an duh lo zetmi, naa fualfo in an tuahsual pangmi sualnak, palhnak pawl sim sawng rero hi zumtu Khrihfa pawl hnatuan asilo, satan le a ho pawl tuahmi asi sawn.

Mi pakhat hnu pakhat hnenah thusia a phur sawng rero tu  hi Pathian palai an silo, satan ih postman pawl an sisawn. Pathian palai pawl cu an lei damsungah an sim cawk lo "a ṭhami, porhtlak a si mi, a taktak a si mi, upat tlak a si mi, a dikmi, a thianghlimmi, duhnungza a si mi le hminṭhatnak a petu thil" (Phil 4:8) pawl thawn an thinlungah a khat theh sawn asi. Milai zokhal an tong tikah an thinlung sungah a ummi thu kha an kaa ihsin a irhsuak mi asi.

Mi a simsiat, thangsiattu, mi dang thatnak hnakin siatnak sim le rel nuam a ti sawntu pawl in midang an relsiat tikah an relsiat thangsiat mi an sual tuk ruangah asilo, anmai sunglam ihsin thilthabik an neihmi siatnak an simsuak rero asi sawn. Cuvek milai pawl cu "an ṭha lozet ih an thinlung ah ruahnak siava lawnglawng a khat" (Seemtirnak 6:5) ruangah an sunglam ah a khat ringring mi thusia pawl kha an kaa sung ihsin a irhsuak mi asi.

"Pathian cu duhdawtnak asi ih mi a duhdaw lo tu cun Pathian a thei lo" asi ( I John 4:8). An hnatuan mi cu politics, pursumleilawn, community hrang hnatuan asi khal le mi zokhalin an duhdawtmi an simsia in an thangsiat dah lo, an duhdawtmi ih tlak siatnak mualphonak ah an lungawi dahlo, nuam ti zetin midang an simsawng dah lo. Duhdawtnak a neilo tu,huatnak le rinhlelh awknak tipungtu pawl cu Pathian an sungah a um lo asi."Duhdawtnak  cu a bei a dong dah lo; ziangkim a zum, ziangkim a beisei ih ziangkim a tuar thei" I Kor. 13:7.

“Zumnak tel loin zohman in Pathian an tawng thei lo ding” ti asivekin rinhlelhnak thaici tuhtu si loin zumnak thlaici sawn tuh uhsi.

TIHPHANNAK

Milai in buai le thih hi an tih ringring.
Cui tihnak cu hmanrua ah hmang tahratin mi tampi cu bum in an um theu. Cuvek khavekin thu a um, a feh asile, tvp cutin khatin siatnak na tawng ding, tvp in tih mi an tarh ih mipi an bum ih lamtang an tuah theu. Politicians, biaknaklam hruaitu, leitlun mi mihur hruaitu pawlin an hman theu mi asi. Tihtarh in an lamtangah an tuah.

Zumtu Pathian fate pawl hrangah leitlun ah tihding zianghman a um lo. Kan tih dingmi cu Pathian lawng asi.
"Pathian tih cu fimnakih hram asi". Pathian kan tih timi cu thla-tih in kan tih siloin upatnak in tihzahnak sawn asi."Ziangah  tile Pathian ih in pekmi Thlarau in ṭihhrutmi ah in tuah lo; cahnak huham, duhdawtnak le mah le mah uk-awk theinak in in khatter sawn a si" I Tim 1:7. Tihphannak hmanrua thawn zohman in lo bum hlah seh.

Satan cu na nitin nunah na sangka kiangah buri dip khat in thlaicia sia tuh ding a lo retsak ringring. Mi zokhalin duhhril ding kan nei: siatnak thlaici maw, thatnak thlaici-Pathian duhdawt zangfah lainatnak thuthangtha sawn thlaci kan tuh ding? Duh hril aw. Na tuhmi thlaici ih rah cekci kha na at ding asi.


Huatnak, rinhlelhnak, le tihnak satan thlaici vorhtu pawl lak ihsin fimkhur uhsi. Kan san hi sansia asi. Zumnak, duhdawtnak, ruahsannak, Pathian thatnak sawn in khat le khat kan pehtlaihnakah Pa Pathian Thlarau leng in lal kumkhua hram seh. Kan biakmi Pathian cu biak inn sungah siloin kan leitlun nitin nun, politics, pursumleilawn ei hawlnak, mibur le pawlkom, insang tinah lal camcin hram seh.