|
VANRAM LAMZIN ABC A. Misual ka si ih Pathian thawn kan tthen aw zo, keimah te Pathian tilungawi thei lo, keimah zuamnak in vanram thleng thei nawn lo ka si ti thei aw, Rom 3:20. B. Zesu Khrih cu keimah irundamtu le ka Lalpa asi, a thi ih a thosal zo ti zum aw, (John 3:16) la na kaa in phuangsuak aw, Rom 10:9. C. Cutin Khrih Zesu thihnak ah na thihnak le a thohsalnak ah na thohsal venak langternak ah tihnimnak la aw la a thu vekin a tanglaimi na leitlun damsung cu hmang aw, Dung 2:38. Thuthangtha simtu hrekkhat in vanramkai cu maimom inrang pahbal hnakin a awlsawn an rak ti theu. Vanram lamzin ABC tlukin a awlmi cu zoh hnik uhsi. Vanram kai dingin a ruat aw tu leitlun milai pawl lakah Bible in a sim vekin hmuisel thelhtu mibur pahnih an um: i) Milai felnak in vanram kai tumtu pawl, le ii) a pahnihnak cu, Pathian zangfaknak rundamnak cu sual tuahnak ah hmang tu pawl. Curuangah, vanram lamzin zawh in khual a tlawngtu pawl theihtersal ralrin pek tu le tha pe tu ah Bible cang malte a hnuailam vekin pek kan si. Thil pathum cinken ringring dingmi:
A tawizawngin Bible in a simfiangnak pawl zoh hnik uhsi. I. Milai zapi ten Pathian mithmuh ah an sual theh, zohman vanram kai dingin mitha an um lo. Dan in milai sualnak a mawhsiat ih milai zapi ten vanram thleng thei lo an sinak a sim fiang. Leitlun biaknak, sakhuanak in Pathian a ti lugnawi thei lo ih milai pakhat hman vanram a thlenpi lo ding. Sam 143:2: Na thuṭhennak hmun ah, Kei na siahhlawh hi i suahpi hram hlah aw; Na mithmuh ah zohman mi ding an um lo. Thusimtu 7:20: Leilung tlunah ṭhatnak lawnglawng a tuah ih siatnak a tuah dah lotu zohman an um lo. Isa 64:6: Kan zate in mi borhhlawh kan si ṭheh; kan hnaṭuan ṭhabik khal cu fihnungzet a si ko. Kan sual ruangah thli ih semhlo mi thinghnah ro bangtuk kan si. Rom 3:10: Ca Thianghlim in: “A dingmi zohman an um lo, ati. Rom 3:23: Kan zatein misual kan si ṭheh ih Pathian sunloihnak kan co baan lo Isa 59:2b: Amah biak nan tum tikah Pathian thawn a lo ṭhentu cu nanmah ih sualnak a si. Rom 3:20: Ziangah tile zohman in Daan thlun tahratin Pathian hmaiah thiamconak a ngah thei lo ding. Daan ih hnaṭuanmi cu minung an sual theihternak lawng a si. Gal 3:10: Daan thlunnak a rinsantu cu camsiatnak hnuai ih a ummi an si. Ziangah tile Ca Thianghlim in, “Zozo khal Daan cabu sungih nganmi vek rori ih a thlun ringring lotu cu Pathian ih camsiatnak hnuai ah an um a si,” tiah a ti. Gal 3:19,24: 19, Cuti asile Daan ih ṭhathnemnak ziangso a si? Daan cu sualnak timi hi ziangso asi ti langternak ah asi ih Pathian ih tiam ciami Abraham ih tefa a ra thlen tiang um ringring dingih pekmi asi. Daan cu vanmi pawlih pekmi a si ih vanmi le minung karlakah palai pakhat a rak um. 24, Curuangah rinnak thawngin Pathian hmaiih thiamcotermi kan si leh-nak dingah, Daan cu Khrih a rat hlan sung in khortu a si. II. Zesu Khrih cu vanram lamzin umsun asi. Jn 17:3: Cuih kumkhua nunnak timi cu nangmah lawng Pathian taktak na sizia theih le na thlahmi Jesuh Khrih theih hi a si. Jn 14:6: Jesuh in, “Keimah cu lamzin le thutak le nunnak ka si. Keimah hnenin siarlo zohman ka Pa hnenah an thleng thei lo. Rom 3:22-24: 22, Jesuh Khrih an zumnak thawngin Pathian in minung thawn remnak a tuah. Khrih a zumtu hmuahhmuah hrangah cuti cun Pathian in a tuah a si; curuangah dan awknak zianghman a um lo;23, kan zatein misual kan si ṭheh ih Pathian sunloihnak kan co baan lo. 24, Sikhalsehla atu-ah cun in luattertu Khrih Jesuh ih tlennak zaar ah Pathian in a zaangfahnak laksawng cu in pek ih Amah thawn rualremnak in tuahsak zo. Rom 6:23: Ziangah tile sualnak ih hlawhman cu thihnak a si; sikhalsehla Pathian ih laksawng cu kan Bawipa Khrih Jesuh thawn kan pehzom awknak thawngin kumkhua nunnak a si. 1 Pet 3:18: Ziangah tile Khrih cu minung sualnak ruangah kumkhua daih in a thi; nanmah Pathian hnenih hruaisuak dingah miṭha pa cu misual pawl ai ah a thi. A taksa in thihnak a tuar, sikhalsehla thlarau in nunter sal a si. 1 Tim 2:5 : Ziangah tile Pathian pakhat lawng a um ih minung le Pathian karlakah remnak tuahtu minung palai pakhat a um. Rom 8:1,2 : 1, Atu cu Khrih Jesuh thawn a pehzom awmi hrangah cun sual thuṭhennak in an luat zo. 2, Ziangah tile Khrih Jesuh thawn pehzomnak thawngin nunnak in petu Thlarau ih daan in sualnak le thihnak daan sung ihsin in luatter zo. Gal 2:16: Sikhalsehla minung cu Jesuh Khrih rinnak ruang lawngin Pathian hmaiah thiamcoter a si; Daan thlunnak in a si dah lo, ti kan thei. Curuangah kannih khal Khrih kan rinnak thawngin Pathian hmaiah thiamcotermi kan sinak dingah Khrih Jesuh cu kan zum. Ziangtin tile Daan thlunnak thawngin milai zohman Pathian hmaiah thiamcoternak an ngah lo. Eph 2:8,9 : 8, Ziangah tile nannih cu Pathian zaangfahnak zaarah zumnak in rundam nan si. Hi rundamnak cu nan ṭuannak ruangih nan ngahmi a si lo, Pathian ih laksawng a si. 9, Cuhrangah zo hman porh awk ding a si lo. Titus 3:5: Kannih cu in rundamsuak. Kanmah in thilṭha kan tuah ruangah si loin amah ih zaangfahnak ruangah in rundam suak ih hrintharnak le nun tharthawhnak in petu Thlarau Thianghlim ih kholhfainak ruangah a si. 1 John 4:9,10: 9, Pathian ih in duhdawtnak cu a Fapa neihsun hi leilungah hin run thlah in a langter ih amah thawngin nunnak kan conak dingah a si. 10, Duhdawtnak timi cu hiti in a si: Kanmah in Pathian kan rak duhdawt ti a si lo, amah sawn in in duhdawt ih a Fapa a run thlah; cumicu kan sualthlah raithawinak dingah a si.
III. Pathian fate taktak, vanram kai ding pawl theihtheihnak Leitlun ah Khrihfa ti aw tampi lakah ziangvek pawl hi vanram kai tu ding pawl ih khualtlawnnak lamzin asi malttakte’n Bible in a simmi zoh hrih uhsi. a. Pianthar/hrinthar/sersiamthar mi: Pathian thawn pehzawm awknak thar Jn 3:3; Jesuh in, “Thungaite in ka lo sim: zokhal hrin sal * 3:3 Hrin sal: timi hi Grik ṭong ahcun ‘tlun lamih hrinmi,’ ti khal a si thei. a si lo ahcun Pathian Uknak a hmu thei lo ding,” tiah a ti. II Kor. 5:17, Zozo khal Khrih thawn an pehzom awk tikah cun mithar a si; a nun hlun cu a cem ih nun thar a thok zo. b. Zesu Khrih thlarau an nei, an sungah a um: Rom 8:9, Sikhalsehla nannih cu nan minung sinakih duhmi vekin nan nung lo; Pathian ih Thlarau cu nan sungih a um taktak a si ahcun Thlarau ih fialmi vekin nan nung sawn a si. Zokhal Khrih ih Thlarau a nei lotu cu Khrih ta a si lo c. Khrih dungthlun, Khrih thu hnuai ah a nungtu : Khrih hrangah a nungtu Jn 8:31, Curuangah Jesuh in amah a zumtu pawl hnenah, “Ka thu zirhmi nan thlun ahcun keimah ih dungthluntu ngaingai nan si ding; #d. Khrih ah a thi/thosal: Leitlun hrangah a thih ih Khrih hrangah a nungtu Rom 6:8, Khrih thawn kan thih tlang ruangah a nun khal amah thawn kan nung tlang ding tiah kan zum. e. Duhdawtnakin a nungtu: Jn 38:35; Pakhat le pakhat tlunah duhdawt nak nan neih ahcun zokhalin keimah ih dungthluntu nan si kha an lo thei ding a si,” tiah a ti. I Jn 3:10: Pathian faate le Satan faate an dan awknak bik cu hihi a si: a dikmi a tuah lotu le a unau a duhdaw lotu cu Pathian faate an si lo. I Jn 3:15; A unau a huatu cu mithat a si ih mi thattu sungah cun kumkhua nunnak a um lo ti nan thei f.. Pa in nun a sim. Heb 12:6, Ziangah tile Bawipa in a duhdawtmi cu nun a sim ih, fa ih a cohlanmi cu a hrem ṭheu a si. ..8, A faate pawl a hrem ih nannih bul a lo hrem lo ahcun faate ngaingai nan si lo, fasawn nan si ti a sawh ding. 9, Leilung tlunih kan pale pawl ruathnik uh; in hrem nain kannih in kan upat. Nunnak kan ngah theinak dingah Thlarau lam kan Pa ih thu cu ziangtluk in so thlun sinsin ding kan si? 10Kan pale pawl cun a ṭha tiin an ruat ruangah caan tawite sung in hrem; sikhalsehla Pathian cun kanmah ih ṭhatnak hrangah le amah ih thianhlimnak kan ṭawm theinak dingah in hrem asi. Pathian in leilung sersiam hlan ihsin amai tumtah le lunghmui zawngin a rak remruat cia vekin a fapa Zesu Khrih ah a kawhmi pawl cu amai zangfahnak in rundamnak laksawng cu a pek hai ih amai banthacak in vanram an thlen tiang Thlarau Thianghlim in a kaihruai, lamzin a hmuhsak, ih kumkhua nunnak sankhuk innpi sungah a thlenpi hai asi. Juda 24, Tlu suak loin a lo kilkhawi ih sualmawhnak nei loin lungawinak thawn a sunglawimi a umnak ah a lo thlenter theitu, 25amah lawng kan Pathian le Runtu a si mi hnen ahcun, kan Bawipa Jesuh Khrih thawngin a cem ciami caan ah siseh, atu le hmailam caanah siseh, sunlawinak, thawmliannak, cahnak le thuneihnak cu kumkhua in kumkhua tiang um camcin hramseh. Amen.
Curuangah Vanram lamzin ABC cu: D. Misual ka si ih Pathian thawn kan tthen aw zo, keimah te Pathian tilungawi thei lo, keimah zuamnak in vanram thleng thei nawn lo ka si ti pom thlepthlep aw, Rom 3:20. E. Zesu Khrih cu keimah irundamtu le ka Lalpa asi, a thi ih a thosal zo ti zum aw, (John 3:16) la na kaa in phuangsuak aw, Rom 10:9. F. Cutin Khrih Zesu thihnak ah na thihnak le a thohsalnak ah na thohsal veknak langternak ah tihnimnak la aw la a thu vekin a tanglaimi na leitlun damsung cu hmang aw, Dung 2:38. Vanram, Khrih kehramah lungawi mitthli thawn kan tawn awk hlan tiang Khrih Thlarau in lam lo hruai camcin hram sheh! |