Thosal NunHre Mang

April 8, 2007
Tuini thosal ni sunglawi canah thu tawite’n Pathian thu thawn thlarau rawl tawm aw hnik uhsi.

Thawhsalnak nun umzia:
i) Thih hmaisak: Thosal nun nei dingin thih hmaisa a tul. Rom 6: 5-9, Khrih thihnak ah thihnak
Umzia: Pathian mithmuh ah sual (Adam ihsin sual, le tuahsualnak ruangih) liamkuan pawl ihsin luatnak in pe zo
Sual ihsin zalennak:v.6, 7, Sual nei lo kan si lo nan sualnak ih tur, liamkuan le thilthitheihnak- sankhuk hrem hmun ah thlaknak le milai nun ti tawinak ihsin luatnak kan ngah zo
ii) THawhsalnak, Khrih ah: Eph. 2:6 “Pathian in Khrih ah in kai tho zo ih kan nunnak cu vancungram ah Khrih sungah ret in a um zo.” Kan nunnak cu leitlun in a siatsuah thei mi kan taksa sungah a um nawn lo, taksa cu a thizo, kan nunnak cu sankhuk tiang a siat thei lo mi vancung ramah Khrih ah thuhruk in a um zo.

Thosal nun dinhmun:
i) Khrih insang, vanram milesa sinak (heaven citizenship) ; Phi: 3:20 “Vanram mi kan si zo” (We are heavenly citizens”; Eph. 2:5-6, “kan nunnak cu vancung ramah Khrih ah ret in a um zo”
I Cor. 1:22; “Pathian ta kan sinak cu seal in khen kan si zo”; II Cor 5:5:-“Hmailam ah a ra thleng lai ding harsatnak le siatsuahtu lak ihsin siat theih lo dingin a-mah-khannak (guarantee) tuahmi kan si zo.”
ii) Khrih ih ralkap: Ph.2:25, “ milai thinlung sungah Satan lalram thiatbal in Khrih ih lalram dintu ding Khrih ih ralkap kan si; sual thuneihnak ih a khuh mi leitlun sual nuntu mizia le tisa sual cangvaihnak pawl thiat bal dingin nitin raldo rero tu kan si.
(war with the principles of the flesh and of the world that are all temporarily controlled by Satan, the prince of this world)
iii) Vanram uknak ih palai (ambassador) : 2 Cor. 5:20
iv) Remnak tuahtu palai: 2 Cor. 5: 18-19; Khrih sungah leitlun cu Amah Pathian thawn remnak tuah sal dingin remnak tuahtu Pathian palai kan si.
v) Pathian hnatuanpi: Eph. 2:10, Sanmurang ih sin a thiltum tuah suak dingin Pathian in hnatuan pi ah in tuah asi.

Thosal nun nitin nun:
i) Sinak (Identity and citizenship) : Rammi sinak a thleng aw zo, leitlun milesa kan sinawn lo, vanram misa kan si zo. Leitlun tisa ram mi sinak hnakin vanram misa (heavenly citizens) kan sinak hi a thupi sawn. USA kan thleng tikah mi pakhatkhat in “khui tawkin na ra?” tiah thu in sut tikah “zawlte, Lumbang, Rihkhawdar” tivek kan sim nawn lo, “Burma” asilole “Asia” tiah kan ti theu. Ziang miphun ha na si in ti tikah “Zahau, hualngo, zannigat” kan tin awn lo, “Burmese asilole “Chin” kan ti aw theu. Cuvekin kan nitin nunah kan identity, milai sinak cu Khrih ah vanram mi sinak kan nei zo.

ii) Tumtah thar: Life mission. Pathian lunghmuizawng amai tumtah mi tuahsuak dingin Khrih ih ralkap, Pathian palai kan si. Leitlun cu Khrih ah Pathian thawn rem aw dingin Pathian in palai in thlah mi kan si.Khrih ih ralkap, milai thinlung sungah satan lalram, leitluan sual thuneihnak cu thiatbal in Pathian lalram dinding kan si.

iii) Khrih ralkap kan si: Ralkap pakhat cu amai insang sumsaw seng in ral a do dah lo, rampi pakhatin palai a thlah tikah hlawhman pe loin a um dah lo, ralthuam le hmanrua, bungrua, le a tulmi dang hmuahhmuah khal a thlah tu rampi kumpi in a tum theh theu asi. Iraq ram USA in kap tikah ralkap, ralthuam le sim a kuatih US $ billion telin sumpai a seng. Cuvekin vancung palai, Khrih ih ralkap pawl khal hi vancung ram ihsin a tulmi ralthuam, hmanrua, le bungrua thawn thlah mi kan si. Leitlun ah ral kan do nakah kan “war command centre” cu vanramah asi ih kan commander cu Jesu Khrih asi. 1979 ah Iran pawlin USA embassy ih USA milai pawl an kaih tikah USA cohzah cu a phivetvet. Cu vek thotho in tunaite ah Iran pawlin England ralkap 15 an kaih sak tikah England kumpi cu a phi vetvet vekin leitlunah kan ral pawlin kan parah harsatnak an tuah tikah vancung ram ah kan mah runsuak dingin vancung mi an phivetvet ve asi.
Khrih ralkap pawl ral an sung ti a um dah lo. Raldo ding a tam asile Khrih ralkap pawl ziangtluk an cak ti langter tu men an si. Sodeng pa in a Sobul tumpi thawn thir cu a sut ciamco tikah a sobul a rih poh le ziangtlukin a thir a tha ti a theih vek asi. Ralpawl an cak sinsin, an hrawkhrawl sinsin, an depde sinsin, an fim sinsin ih ralthuam thatha an nei tam sinsin asile Khrih ralkap pawl ziangtluk an cak, an fel, an fim ti langter tu men an si. Khrih ralkap pawl cun an leitlun nun a tawp tikah “raldonak ah raltha zetin ka do ih pakhat hrelh loin ka neh asi, ka leitlun tuanvo a cem zo” ti lawng thusim ding an nei theu. Khrih Jesu kha Khross, leitlun misual bik pawl thahnak hmunah rak thi loin, Jews pawl in rak that loin, Voksa ei ruangah sungdawkin rak thi ta sehla a thawhsal hmanah a tu vekin hmual a nei lo tla asi thei. Ziangtlukin leitlun milai a duhdawt titla a lailang lo men thei. Asinan a miphun pawl hnenah a ra ih a miphun pawlin an hnawng, sualnak nei lo cu sual an puh ih misual bik pawl thahnak hmun ah misual bik pawl thihdan vekin a thi. Cutivekin a tuahtu, leitlun milai pawl a duhdwt ih a ngaidam, “Ka pa, an sual ngaidam aw, ziang kan tuah ti an thei lo asi” tiah a tongsuak mi hin milai thinlung cu fei ih sun vekin a sun tlang thluh sawn asi. Pathian duhdawntak maksakzia langter tu sawn a rak si. Satan cun “Jesu Khrih cu ka nehzo, khross parah ka that zo” ati lai fang kha Pathian ropitzia langternak cantha a rak si sawn ti kha Satan in a thei lo. Cuvek cu asi, khristian pawl, thosal nun in a nungtu pawl hrang ahcun kan ral pa (satan) in “ka neh zo, ka ti mualpho zo, ka ti tap rero, ka ti rethei, ka hrem neknek asi” ati lai fang hi Pathian ropitzia kan nunah a rak theinak ding cantha, leitlun milai pawl mithmuh ah kan sungah in cencilhtu Thlarau Thianghlim cu ziangtluk a cak ti kan langter nak cantha sawn asi.

iv) Thlarau Thianghlim cencilh kan si: Ziangtin leitlun vancung ram thiltitheinak kan sungah a lang thei? Pathian palai pawl nunnak hmangin Pathian in leitlunah a lalram a din ih a fale a enkawl thei nak ding hrangah kan sungah Thlarau Thianghlim in in cencilh. Cui Thlarau Thianghlim cun #1. Pathian le kan karlakah palai a tuan, #2. Pathian huham cahnak thawn kan sung ah hna a tuan. Cui Thlarau Thianghlim cu Khrih kha tisa in a thihtikah a kaitho tu Thlarau Thianghlim kha asi. Thihnak a nehtu Thlarau asi. Van Pathian huham cahnak thawn a thuam aw mi Thlarau Thianghlim cu kan sungah a nung, a ceng, a cangvai, hna a tuan asi; Pathian thiltum tuahsuak dingin kan sungah catbang loin a cengih kan theih lo lai khalah kan tul mi le kan tlaksam mi pawl Pathian hnenah in thlensak ringring asi. Cui Thlarau Thianghlim cun kan nitin nunah thusia thu tha in theih ter ih Pathian duhzawng khal in theih ter asi. Lamzin dik ah nitin in kaihruai fawn si. Cuticun kan nitin nunah Pathian tumtahnak cu kan sungah tuahsuak ringring asi. Tisa thil le thlarau thil, a thianghlim mi le a bawrhhlawh mi karlakah siathatheihnak le thleidan thiamnak khal in pek ringring asi.

Asinan Khrih ah a thi zo ih Khrih ah a thosal tu, thawhsal nun a co zo tu si nacingin leitlun tisa duhzawng a tlun ringring tu pawl hmaikhua cu a pit. Ziangah tile Satan in “ka milai asi nawn lo” ti a theih tikah satan uknak sungah an lut sal tikah a hrem hai ih voi tampi cu an nunnak tiang laksak in an um thei. An san khal a tawi phah theu, sir awk tini an nei lo le.


v) Thianghlim nun le lungawinak: Thosal nunin a nungtu pawl cu an nun a thianghlim. Khrih thihnak ah an taksa cu a thizo ih Khrih ih thawhsalnak ah an thawhsal zo ruangah “ a thimi taksa” thuneihnak hnuai ah an um nawn lo. Sualnak, iksiknak, siatnak, mi huatnak, hurkhuannak, le tisa mizia sual sung ihsin an luat zo. Cuticun an sunglam a thianghlim ih Thlarau Thianghlim cun Pathian huham cahnak le thiltitheihnak thawn a cencilh hai. Cutin an nitin nunah an tumtah mi, Pathian lunghmuizawng, cu tuahsuak asi tikah an nun cu lungawinak famkim thawn a khatih an sunglam nung cu Pathian hnenah lungawi thu sim ringring asi. An rian mi Pathian cu an parah a lung a awi, a di a riam asi ti an theih tikah an nitin nunah beisei le tlaksam mi nei loin thinlung daihnak thawn lungawi ten Pathian an thangthat ringring sawn asi. An ral donak ah an ral an cak sinsin, dodal tu an tam sinsin asile Pathian cahzia an thei sinsin, an ral pawl an hrawkhrawl sinsin, an sual sinsin asile Pathian ah nunthianhlimnak ih huham cahnak an thei tam sinsin, an sungah a cencilh tu Thlarau Thianghlim cahzia an tep tam sinsin. An leitlun nunah sualnak in a hnaihnawk thei nawn lo vekin tihnak khalin a hnaihnawk thei nawn lo, ziangah tile an sungah a cencilh tu Thlarau Thianghlim cu thihnak ihsin Khrih kha a kai tho tu Thlarau asi ih Pathian sinak nei in Pathian humham cahnak famkim thawn a thuam aw tu asi ti an thei.

A thosal mi Pathian be tu kan zi. Biakin ah an tar theu mi Khross lem parah a thi hlo ta mi milem pathian kan be lo. Voksa ei ruangah sungdawkin a thi mi pathian be tu kan si lo. Kan biak mi Pathian cu a nungih kan sungah Thlarau thawn a um mi Pathian asi. Tuisun niah Tihnak, Sualnak, thlaksamnak in a hnaihawk rero mi kan um maw? Dunglam thuanthu in riah a siat ter rero mi kan um maw? Midang in an tuah mi ruangah lungawi thei loin thinna rero kan um maw? Taksa natnak le leitlun harsatnak ruangah a naa tuar rero kan um maw? Riatsiatnak in nitin nun lungawinak a lakhlohsak mi kan um maw? Cu hmuahhmuah neh tu Pathian, a thosal mi Pathian kan nei asi. Khrih ah thawhsal nun in a nungtu pawl hrang ahcun leitlun hi rei lo te sung kan khualtlawnnak ram asi. Pathian in kan nunnak hmangin tuahduh mi a nei ih cui a tumtah mi tuahsuak dingin rei lo te leitlun ah can hmang ding lawng kan si. Cutin Pathian tumtah mi cu kan nunsung ah tuah famkim asi tikah Pathian thawn hmaiton in lungawi siamso ten tong aw ding kan si. Cui hmun le can cu hngak hlap zet cingin nitin leiltun nun hi lungawi siamso ten kekar khat hnu karkhat a feh rero tu kan si.