|
Rome 8:28 le Milai Thuanthu Rome 8:28 a dik asi. Rome 8:28, “Ziangtinkim ahhin Pathian cun amah a duhdawtu le amah ih tumtahmi vekih a kawhmi hrangah cun an ṭhatnak ah hna a ṭuan a si, ti kan thei.”
Himi Bible bungcang hi khrihfa zapi duhzet mi, theihzetmi le nunpi mi asi. Asinan, zumtu Pathian fa ti aw pawl lakah, “ziangkimah Pathian cu ka tthatnak hrangah hna a tuan asi” ti thei lo mi tampi kan um pang ding ti ruat in milai thuanthu ah a cang mi thawn khaikhawm hnik uhsi.
Pathian in Amai hmuihmel kengin milai A sersiam mi tluksiatnak, Jacob fapa pawlin an unau Joseph an zuar nak, Goliath in Isreal pawl a hmuhsuamnak, Job ih tuarnak, David Siangpahrang ih tluksiatnak, Jews pawlin Bawi Zesu an thahnak, Dungthluntu Paul ih taksa natnak tidam asi lonak, Rome in AD 70 ah Jerusalem a siatsuahnak, leitlun ralpi voi I, II buainak, Chin miphun kawl kuttang ah kan thlengnak, Kawl ralkap pawlin Chin miphun an ukbet nak, Falam milesa pawl lungrual thei lonak, kawhhran ttekdarhnak, tvp, pawl hi Pathian cu milai le leilungpi parah thuneihtu si in a cangvai asile ziangruangah hitin thil a cang tiah anhai can a um thei men. Cuvek thotho in pumpak pakhat cio dinhmunah taksa damlonak, duhkim lo, duhlo tawng rero, tuar harsa timi, sual sal tang, tvp, pawl nitin hmuhtawn mi parah Rome 8:28 hi a tak nunramah a dik asi ti-thei lo tampi kan um ding ti a phan um zet. A hnuailam vekin malte zoh hnik uhsi!
Bible thuanthu a hmaisa ah zoh hnik uhsi! Adam tluksiatnak: Adam a tluksiat hlanah milai cu Pathian kutsuak, sersiam mi, hmuan kiltu kan rak si. Sersiam mi in Amah sersiamtu cu “Ka Pa” tiah kawh theinak a nei dingin a lang lo, laitong in sim asile “Ka Pu” lole “Bawipa” ti ding awm deuh asi. Asinan, Adam tluksiat hnu ah Pathian in A Fapa thisen in milai cu intlen zo ih Khrih Zesu ahcun Pathian hmuihmel keng kan sinak cu tuahthat sal asi. Cuticun, milai in Pathian cu “Ka Pa” ti ah kawh thei nak kan nei. Kan unau upa bik cu Bawi Zesu asi. Hmunkiltu sersiam mi dinhmun si nawn loin “Fa Hniang, Puithiam, Siangpahrang, sersiam mi hmuahhmuah vancung mi telin uktu ding” kan asi. Adam tluksiatnak ruangah Satan in Pathian thiltum a siatsuah loih milai dinhmun a siatsuah fawn lo, Satan ruahban lo le thamban loin kan dinhmun a sang sinsin. A va mak em! Rome 8:28 a dik asi. Satan in dik lo zetin a lo siatsuah mi a um maw? A letza in Pathian in a lo rul ding.
Joseph cu a unau pawlin sal ah an zuar, Pontifar nupi in sual a puh, thawng in ah an tlak, thawng inn sungih mang a leh sak mi in a theihhngilh. Cu hmuahhmuah lakah Joseph thatnak hrangah Pathian a cangvai maw? Pathian cu thawng inn sungah Joseph hnenah a um. Joseph cu Egypt ram prime minister ah a canter. Jacob insang rawl lo ih a thi dingmi runsuak tu ah a cang. Ava mak em! Rome 8:28 a dik asi. Na duhdawtmi in dik lo zetin an lo zuar thlai maw? Mi bawmtu ah Pathian in a lo tuah leh ding!
Goliath cu mi tumpi asi tikah Israel ralkap pawlin an ttih tuk! Goliath ih cahnak cun Israel pawl lung a thirter. An mualpho! Pathian a cangvai maw? Milai taksa cahnak cu sunttam vate sai that nak hmanrua kuahli te thawn sai that men asi. Israel pawlin Pathian nung ih cahnak cu David nun ihsin an zir! Ava mak em! Rome 8:28 a dik asi. Na hmuhton mi harsatnak cu na cahnak, fimnak, le neihnak in a tlin lo mi asi maw? Pathian huham ziangtluk a cak ti na hmu ding! Na raal, a lo siatsuah duhtu a cak poh le, na hmuh dah lo mi Pathian huham cahnak na tep ngah ding.
Asile, David siangpahrang a tlu ksia ih a uiretnak ah teh Pathian a cangvai maw? Cangvai e! David ih tuarnak le hmuhsuak awknak kha Pathian hmanrua ah a cang. David siangpahrang cu Isreal mipi hmaiah a mual pho, a fapa in a siangpahrang tohkham a lawnsak, a nupi a ihpi, mualpho zain a tuah, A fapa a thi, lung kekkhuai in Sam 51 a ngan. Pathian a tawng tu hmuahhmuah in milai tisa mizia sualzia an hmuhsuak awk tikah David siangpahrang in amai tisa mizia sualzia a hmuhsuak awk vekin an hmu suak aw ve ih Pathian hmaiah lung kekkuai in thla an cam, sir awknak thawn tangdor nun a neihter. Paul khalin Rome 7:24 a tisa sual mizia ih sualzia ttap ruangro in a sim suak! Pathian duhdawtnak cu kan fellai lawng si loin kan sual bawrhhlawh lai khalah in ngaidam theizia David in asim suak! Milai cu sual kan tuah ruangah siloin sual fate kan si ruangah sualnak kan tuah a rak si zia David in a simsuak! Harsatnak le buainak karlak khalah a zir ngah dah lomi, leitlun fimnak in an zirh thei dah lo mi, amai tisa mizia sualzia cu David in a tluk siatnak ih hmuhton mi ihsin a zir ngah! Aw, a va mak ve! Rome 8:28 a dik asi.
Sualnak lakah tluk le bah in na thlarau ngalcar na khawng pang maw? Na sual sir awla, kir sal aw! Bawipa duhdawtnak maksak na theih dah lomi na tep ding!
Job in a neihmi fate, rannung, taksa damnak a hloh theh! Pathian khui ah saw asi? Pathian in a let in a pek sal! Diklo zetin na neih mi na hloh maw? Na dinhmun si ding si thei loin diklo zetin nekcepnak, zuar thlai le siatsuah na tawng pang maw? A let in Pathian in a lo pe sal ding. Aw, ava mak ve! Rome 8:28 a dik asi.
Bawi Zesu in leitlun ah minaa a tidam, mithi a kaitho, thilmak phun zakip a tuah hnu khalah an zum duh cuang lo. Sual an puh, Belzabudz cahnak hmangin mi a tidam an ti, kross parah an khai, an zawkzet, an hnihsan, a kawr an laksak! Satan in ka nehzo tiah leitlun milai mithmuh ah mualpho ko a tuah! Culai lakah Satan in ka kutsungah ka ret zo a timi milai pawl rundamnak hna cu tuansuak asi! Taklawngin kross parah a kut le a ke an khenbet cing khalin misual pa vanram ticket pek thei nak thuneihnak a neihzia a langter. Pathian in Amai hmuihmel kengin A sersiam mi milai parah Satan a tuahsiat thei bik mi, a sebik a tuah thei mi, thihnak cu kross parah neh in a um tariai! Aw, a va mak ve! Rome 8:28 a dik asi. Na thalrau khualtlawnnak ah Satan raal donak ah sung cuahco in na theih awk can a um maw, na ruasan ding a cem can a um maw? Satan in na parah a sebik a tuah thei mi cu siatsuah in a um zo!
II Kor 12:7-12; Paul in a natnak ruangah Pathian hnenah voithum tiang damnak a dil. Sihman sehla, Pathian in a damter lo, “Ka zaangfahnak cu na hrangah a tawk a si; ziangah tile na ṭonṭaih caan hi ka cah bik caan a si,” ti ah Pathian a let. Tisa ih kan cah lo laifangah Bawipa cu kan sungah cakzetin hna a tuan riangri! David kha lungpuk sungah thihttih in a relh lai hnakin siangpahrang innpi parah zianghman phanding um loin a len uallo lai ah a cak lo sawn, a thlarau tihnung dinhmunah a rak ding sawn asi kha! Tisa in kan cah lonak hi kan porh awknak umsun a rak si ziar! Aw, a va mak em! Rome 8:28 a dik asi. Na leitlun khualtlawnnak ah cah lonak, tisa in tuar harsa timi na nei maw? Na thinlung hliamhma tuar in na um pang maw? Mangbangza in Bawipai huham cahnak cu na sungah A cangvai sawn ding asi.
Bawi Zesu in a rak sim cia vekinJerusalem khawlipi cu AD 70 zam neknek in siatsuah asi. Jerusalem siatsuah asi tikah khrihfa pawl khal leitlun hmuntin kiltin ah an tekdarh! Rome ramkulh ah sal dinhmun in siseh an tekdarh! An thlennak hmunkip ah Thuthangtha a karhzai vivo! Milai tuarnak cu Thuthangtha karhzainak ah a cang sawn riangri! Cuticun AD 333 hnu lamah Rome ramkulh pumhuap in Khrihfa ah an rung cang theh riangri! An siatsuah rero mi miphun pawl Pathian an run be riangri! Aw, a va mak em! Rome 8:28 a dik asi. Na leitlun khualtlawnnak ah harsa timi na nei maw? Na theihthiam lomi thuanthu in na thin a ti bang dah maw? Mangbangza mankung tuk hnatuan tuansuaknak hmanrua ah Pathian in a hmang thei asi.
Jerusalem khawlipi siatsuahtu Rome ramkulh cu siatsuah in a um ve! Europe ramthen ihsin Viking pawlin an siatsuah! Rome ram sungih Khrifa pawl cu Viking pawlin an kaih, an hruai ih sal ah siseh siahhlawh ah an canter. Thuanthu a rung herliam vivo ih Europe ram pum cu Khrihfa ah an rung cang riangri! England ramkulh, nithla dah lo ramkulh, Spain, Portugal pawl cu Euraope ram ihsin leitlun khawmual tinah pursum leilawnnak le ram nawr in an vak an tawihnak ah khrihfa mi tampi an can phah. Ramnawr ralkap pawl le pursum leilawn vaktawi pawl lakah missionary pawl awlai ten Thuthangtha simsuak thei nak an neih phah! Englang ram tong cu leitlun tong ti dingkhawp in a karhcak tikah Bible cu leitlun pumpi miphun zakim siar theih dingin tuahsuak asi! Kawlram, laitlang le India ramkulh tiang mirang ramnawr pawl an ra thlengih missionary an rak thleng ve. Khrihfa kan can phah! Aw, a va mak ve! Rome 8:28 a dik asi. Na miphun, ram, insang le hrin thuanthu na theihthiam lomi, na duhdan le sunmang kalh in a herliam rero mi a um maw? Mangbangza hnatuan ropi tuansuaknak hmanrua ah Pathian in a hmang thei asi.
Europe ramah piangthar, zumtu tha pawl ti duhdah, hremnak an rak tuar. Hremnak ihsin zalennak hawlin mi tampi America ramkulh ah an vaih phah. America ram cu Khristian ramah a cang. Leitlun rampi I & II nak a suak tikah Russia, England, Germany, le Europe ram pawlin nasaten siatnak an tawn phah laiah America cun malte lawng siatnak tawngin sumpai namen lo hlawknak a neih phah. America ram cu leitlun lennak ah ramdang zohman ih tham ban lo dinhmun tiang a thleng. America ramih lennak sumsaw maksak cun leitlun khawmual tinah Bible le Khristian cabu phunphun, Thuthangtha karhzainak hrang sumsaw in siseh missionary thlah in siseh leitlun khawmual tinah Thuthangtha a karhzai phah. Europe khawmual ah zumnak ruangah harsatnak an rak tawnnak pawl ruangah America ram kulh pan in rak tlan rero tu pawl tesinfa pawl cu mangbangza milai san thuanthu ah a um dah lo mi thansohnak, Thuthangtha karhzai tertu ah an rung cang. Aw, ava mak em! Rome 8:28 a dik asi.
Mirang pawl thlen hlanah Chin miphun pawl cu miphun dang kuthnuaiah ukmi an rak si dah lo. Pupa riria bia in anmah te an rak khawsa. Ram nawrtu, Mirang pawl an ra thlen tikah ukbet mi kan si. Curualrualin missionary, Thuthangtha phurtu tla an ra thleng ve. Kan pupa rirai biaknak ihsin Pathian nung betu ah Chin mi pawl tla kan rungcang. Calai nei loin ngan mi ca kan neih phah. Politics lam ahcun ningzahnak asinan, thlarau lam meifar vangtu an ra thlennak a rak si riangri. Ava mak ve! Rome 8:28 a dik asi. Na leitlun khualtlawnnak ah na duh zetmi na hloh mi a um maw? Duhlo cingin na el thei lomi dinhmun ah na ding rero maw? Mangbangza hnatuan, milai thuanthu linglet tertu hnatuan tuansuak thei dingin Pathian in hmanrua ah a hmang thei asi.
Tuihlan kumzakht rei ah Chin/Mizo pawl cu biarham thawn zuupi in in rirai rak berero kan rak si. Mirang pawlin Chin miphun pawl mahte a uk aw mi cu India (Vai) le Burma (Kawl) pawl le Bangladesh (Vai) uknak hnuai ah in tanta. Kum zakhat sungah India ramkulh mi tampi lakah Mizoram misa pawl cu Khrihfa ah an cang theh! Mizo ram cu India ramkulh, milai 1 billion lenglo umnak ah bing le bo in a khatmi rawl thitha suak thei lo, ramse bik asi. Asinan cathiam tambik ramthen (state) an si tariai. Mizo pawlin an simdan vek asile leilung tlunah zatek (%) in tuak asile miphun pakhat ciocio ah missionary thlah tambik kan asi an ti. Mizoram sungah kutdawh rawlkhawng khawlak ah hmuhding an um lo. Aw, a va mak ve! Rome 8:28 a dik asi.
Politics lam in zoh asile Chin mi pawl thuanthu cu santiluang in thimlakah a fen rero mi asi. Chin thuanthu, Chin tong, Chin nunphung zirhsawng aw thei loin Kawl miphun nunphung in santhar mino pawl a dawlh theh zik cuahco. Pursum leilawn thansoh nak lamah lamzih phihsak theh mi kan si. Ramleng ah fimthiamnak zir dingin siseh, ramsung ah kumpi hnatuan sang kai dingin siseh Chin miphun pawl cu Kawl pawl kuthnuai ah lukun rero cing hman in rualran canpual kan nei lo. Sihmansehla, ramlengah Chin miphun phunsang tlawngkai hi a thawngtel an si. Kawlram milesa mi tampi an feh duhzetnak hmun, America le leitlun ram thangso pawl hmun ah milai thawnghra lengkai an thleng zo. Kawlram sung miphun lakah mirang tong thiam bik, zir cak bik miphun kan si zo. Kawlram ramsung khawtin hmuntin ah Chin mi umnak hmunkip ah Pathian nung biaknak, Thuthangtha a karhzai vivo. State ramtthen tin ah Chin mi um lonak a um nawn lo ding. Rangon khawsung lawngah Bible tlawng 50 lenglo cu Chin mi pawl dinmi asi. Leitlun killi ah Chin mi umlonak ramkulh tlangkulh (continent) a um nawn lo. Chin mi pawl umnak hmunkipah kawhhran a ding vivo, Pathian nung cu thangthat asi ih Thuthangtha cu ausuahpi asi. Indianapolis, Indiana, USA ih school district pakhat sungah Chin mi tlawngta 800 tluk an um ti asi. Aw, ava mak ve! Rome 8:28 a dik asi.
Asile ziangkim cu kan thatnak ah Pathian in a canter asi ahcun kan tisa nuam tizawng sual duhduh tuah sehla a nuam sawn lo maw, tiah a ruattu kan um pangah Bible thuanthu sugnah sualnak tuah mi ruangah tuarnak, hacang rialnak pawl tawite zoh hrih uhsi!
Cun khatlamah,mai sualnak ruangah siloin midang ruangah voi tampi harsatnak zumtu pawl parah a thleng theu. A lo huatu, zuar thlaitu, thangsiattu, relsetu, dodaltu, that duhtu, tvp, an um hmanah Pathianhmaiah tangdornak nei thei ringring dingin a lo bawmtu an si ding. A lo dodaltu le siatsuah duhtu dunglam ah Satan na raal pa ih kut kha hmu tiam ringring aw. Nehcia mi raal asi. Diklozet in mawhsiat na si khal le Pathian in diklo zetin lailrel tu pawl thu a rawn dah lo, na siknak vek cekci in a lo thei. Na ngah ding zat na ngah lo, na neih mi an lo ruk sak siatsuahsak, kum reipi inn na sak mi mi tha lo pawlin an lo siatsak khal asile Bawipa in a lo rul theh ding. Nangmah na ruahnak, lungput, na tongkam, le tuahnak in Bawipai hmaiah dingfelnakin na nung asi ahcun ziangvek thuanthu khal thleng sehla, ziangvek dinhmun khalah ding aw la, Bawipa thatzia na tep ngah ding. Bawipa in na hrangthatnak ah a canter thei asi. Na raal, a lo dodaltu a cak poh le Bawipai cahzia na thei sinsin ding. Na tisa thinlung duhtusam a famkim lo tikah na lung awi sinsin aw. Tisa thinlung in a duhmi a famkim lo tikah siseh duhlo mi hmuhtawn tikah siseh Pathian cu A cangvai ringring asi.
Asile, cutin Pathian cu milai thuanthu parah A cangvai rero cu ziang duhnak asi pei? Rome 8: 29-30, “Pathian in a hriil ciami pawl cu a Fapa hmuihmel keng dingah a thiadang cia hai; cuti cun unau tampi lakah a Fapa cu upa bik a sinak dingah a si. Curuangah Pathian in a thiatdan ciami pawl cu kawh khal a ko. Cule a kawhmi pawl cu thiam a coter ih a sunlawinak khal a hlawm hai a si.” Adam tluksiatnak ruangah a siatzo mi Pathian hmuihmel kan kennak ah Khrih ah sersiamthar sal, tuahthatsal kan sivek in thlarau cu Khrih thuhruk in a um zo na in kan milai lungput khal hi tuahthat rero mi kan si. Pathian hi a duh mi duh in A huatmi hua ding, nuam A timi nuam ti thei dingin kan nitlin leitlun khualtlawnnak ih hmuhton mi lak ihsin sersiamthar rero mi kan asi. Thinlung thar le nunnak thar in pe ih lungto bangih a hak mi kanthinlung cu la tahratin thinlung neemte in pe asi (Ezek 36:26. Cuticun kan thinlungthar cun Pathian ih duhmi A duh ih Pathian ih huatmi A hua, Pathian in nuam A timi nuam atiihi Pathian ih duhmi a hawl hmasa. Cuticun kan thinlungin a duhmi hmuahhmuah in pekbelhsah asi (Mathai 6:33). Cuticun Pathian mizia ttawmpitu (II Pet 1:4) ah in sersiamthar sal ih Khrih ih hmuihmel kan bang sinsin (Rome 8:29) asi. Cuticun ni neta cawimawi nak ni ah Khrih cu kan upa bik si in cawimawi kan si leh ding (Rome 8:30). Cucu Pathian in A duhsan le tumtah mi asi. Aw, ava mak ve! Rome 8:28 a dik asi. Pathian in, a tluse zo mi, a raal dinhmun ihta cu A duhdawt zangfahnak in Fapa Zesu Khrih ah in tlen ih A Fapa hmuihmel keng in in sersiamthar sal ih milai thuanthu cu hmanrua ah hmangin Amai hmuihmel kan kennak cu sersiamthar sal asi. Cuihleiah, kan phu lo cawimawinak ni hrangah in timtuah rero mi kan si hi. Aw, ava mak em! Rome 8:28 a dik asi. Aw, ava mak em! Rome 8:28 a dik asi. Aw, ava mak em!
(Miphun, leitlun ramkulh, ramthen pawl thuanthu siloin, pumpak thuan khalah Rome 8:28 a dikzia ngan cawk lo a um hrih) |