|
Piangthar thinlung:
Piangthar, Pathian fate sinak theihtheih nak hi kawhhran pawlkom, zumnak thurin (doctrine), biaknak (sakhua) cangvaihnak ah a um lo, nuntu ziazia-mizia ah a lang. “An rah in nan thei ding” ti asivekin mi pakhat cu a nitin nunah zo ih mizia a langter timi in Pathian fate maw, satan fate ti theihtheih asi. Satan mizia a lang ringring asile Satan palai, satan fate asi thei; cuvek thiamthim in a nitin nunah Khrih ih mizia a lang ringring asile Khrih ih Thlarau in a ukmi, Pathian fate asi thei. Santhar sanah, laimi lakah ruahdan pomdan phunphun, tha cuang le thianghlim cuang vekin sim awknak, midang zuarthlai mawhsiatnak tampi kan thei theu ding. Curualrual in Laimi pawl tla leitlun khawmual tinah kan thleng tikah kan kiangkap cio ah Pathian fate zumnak nung neitu pawl thawn nitin thlarau nun thanglian dingin fimkhur thiam dingin Khrihfa diktak, piangthar Pathian fate taktak ziangtin kan theithei ding ti zoh hnik uhsi.
Wathman Nee cun “Zesu Khrih thupek vekin a nung lo tu pawlin pulpit par ihsin ziangvek thu an sim tla le satan in zianghman ah a siar lo” a ti. Mi hrekkhat in Pathian zangfahnak laksawng rundamnak laksual ruangah milai tuahnak, nunpi mi mizia thu ah thlahdah awk a theih rualrualin khatlamah mi hrekkhat in khrihfa biaknak cu leitlun sakhua dang vekin lole leitlun nitin nuntu khawsak mizia rem awknak (moral discipline) vek fang in rak fehpi a theih lala fawn. Pathian zangfahnak laksawng rundamnak co tu pawl cu Khrih ah piangthar, hrinthar , sersiamthar an si vekin thinlungthar, miziathar khal pek an si cih ti fimkhur ten cinken a tha. Cutin mi zokhal, santhar zirhnak phunphun lakah bum in kan um lo nak dingah Pathian thutak cu kan nitin khualtlawnnak lamhmuhtu meifar vekin Pathian Thlarau kaihhruai nak hnuai ah nunpi cio uhsi. Nitin thlarau nun bawmtu ding ruahsan nak thawn a hnuailam vekin zoh hnik uhsi:
1) Pathian thianhlimnak le milai bawrhhlawhzia 2) Thinlung sung hmunluahtu le nuamtimi 3) Khrih ih mizia: tangdor nak 4) Khrih ih mizia: Duhdawtnak
1) Pathian thianhlimnak le milai bawrhhlawhzia: Piantharnak cu nun pumhlum thleng awknak asi. Taksa ruangpi le leitlun kan tisa in kan umnak hmun a thleng aw lo. Thlarau lam, thinlung, le nun tumtah thleng awknak asi. Satan fa ihsin Pathian fa, hellram feh ding ihsin vanram sankhuk nunnak sung lut ding, sualfa sualsal ihsin a thianghlim Pathian fa, milai tumtah hrang nunnak ihsin Pathian ih tumtah hrangah nun, milai cawimawinak ihsin Pathian cawimawi nak hrang nun, tisa nuam cennak ihsin Khrih ah Pathian thawn pehzawm awknak cen, tvp, sunglam thlarau nun pumhlawm tleng awknak asi. Sualnak sungah a thi mi, Pathian thawn pehzawm awknak nei nawn lo, hellram lamzin ah a feh rero laimi milai pakhat cu Pathian Thlarau in thutak theihternak le huham cahnak in a nunter, sersiamthar tikah, hmuhnak thar a nei ih cutin a fehnak lamzin cu thihnak lamzin a si ti a theih rualrualin a thlarau mit cun Pathian zangfannak in alak in pekmi nunnak lamzin laksawng sunglawi cu a hmu ih sual-hellram lamzin ihsin dunglet hawi tahratin vanram lamzin ah a feh thawk. Cuticun Pathian Thalrau in milai sunglam thlarau, thinlung sungmuril ah Pathian duhdawtnak in a tuahsak mi kumkhua nunnak lamzin a hmuh ter ih Pathian thianhlim zia le sunlawinak cu thlarau mit in a hmuh tikah lei tisa ih sualnak, thimnak pawl a hmuh tikah milai cun “Aw, ziangtluk mi thianghlim lo, misual saw ka si, ziangtluk zangfahza saw ka si, misual ka si, ka thinlung khawruah, tongkam, tuahnak pawl hi misual ka si. Pathian malsawm dawng tlak lo ka si” tiah a hmu suak aw aw. Cutin vanram lamzin thian hlim zia, le hellram lamzin bawrhhlawh zia le tihnunzia pawl a hmuh fiang tikah dungleh hawi in Khrih Thlarau ih lamhruai nak hnuai ah a nun pumhlum cu hlan aw aw in Pathian fate sinak cu a co ngah ve asi. Cuticun, Pathian in a Fapa thihnak tlak in a huatmi, Pathian thawn a um tlang thei lomi, sual bawrhhlawh nun cu a tlansan ih a thianghlim mi lamzin, Pathian Thalrau lamhruai nak ih nunthianhlimnak thutak lamzin a zawh.
Fimkhur tul mi: Pathian zangfah lainatnak in alak in pekmi rundamnak laksawng co tu pawl cu- i) Pathian Thlarau lamhruainak lamzin an zawh; “Mi zokhal Khrih ih Thlarau a nei lo tu pawl cu Khrih ih ta an si lo” ti an nun in a thei. ii) Tisa mizia sualsal sungah an nung nawn lo; “mi zokhal tisa duhnak in a ukmi pawl cu an thi ding”. ti an nun in a thei. iii) Pathian duhmi, tumtah, le thupek cu anmai duhnak tumtah hnakin thupi sawn ah an ret. “Nun cu Khrih asi” ti zirh an si ih an nunpi. iv) An leitlun nitin nun cu anmai lungawinak hawl siloin Pathian lungawinak rian in an nung. “Tisa thinlung cun Pathian Thalrau duh lo zawng a hiar, a duh, ih nuam ati ringring” ti an zir ngah ih Pathian Thlarau zirhnak hnuai ah nitin an nung sawn. v) Pathian in A Fapa thihnak tlukin a huat mi sual cu an hua, an tlansan ih nunthianhlimnak sungah an nung. “Mi zokhal, sualnak sungah a nuam aw rero, a nung rero tu cu Pathian fate a silo” ti an thei fiang ih milai thinlung duhnak ih bumnak sungah an nung nawn lo.
2) Thinlung sung hmunluahtu le nuamtimi: Tahtthimnak thuanthu tawi: Nikhat cu siangpahrang innsang hnatuantu pawlin siangpahrang fapa nupi ding an hawl lai ah lai khawte pakhat ah farahfa, fala note pakhat kha, an khawsung mi pawl theih loin, siangpahrang fapa nupi dingah sui zunghruk an pek ih an ham ta. Cui ni ihsin cui fala nute thinlung sung ahcun a pasal ding siangpahrang fapa lawnglawng a ruatih an khawsung tlangval pawlin a thinlung sungah hmun an nei nawn lo. A pasal ding, amah hamtu ih thu hla an sim mi cu ngai nuam a ti tuk ih a ngai khawp thei lo. A pasal ding Siangpahrang fapa ratnak ding ni thla cu a hngak ringring ih an khawhnar cuan in nitin a thinlung mit a meng ringring.
Leitlun thim lakah a um lai hrih mi Pathian fa, Khrih ih mo ham cia mi pawl cu Khrih a ratsal nak ding, lei le van sankhuk Siangpahrang Fapa ratsalnak ding, a ra lai ding mi mopuai sunglawi, amah thawn tawn awk nak ding tikcu can cu hngak in nitin lungawinak thuruk in an thinlung a luahkhat sawn asi. Khrih ih ham cia mi mo, Pathian fate pawl thinlung sungah hmunkau bik, sunglawi bik hmun luah tu cu Amah Zesu Khrih lawng asi. Leitlun thilri, dinhmun, sinak, hmuhtawn mi pawlin Khrih ih hamcia mi mo, Pathian fate pawl lungawinak a hnaihnok thei nawn lo. Cuticun Pathian fate pawl cun Pathian thutak ngai cu nuam an ti tuk, Pathian fate pawl thawn nitin nuntlang, lentlang, harsa tuar tlang cu nuam an ti tuk.
Mi pakhat cu zovek ziangvek milai asi ti na thei duh asile “ziang nuam ati” timi in a lo sim fiang thei. Asinan naute pakhat cu siatha theihnak a pitlin hrih lo ruangah “ek puah” tla nuam ati zet lai tla asi thei. Cuole meisa tla a tham hmuamhmo men thei. Cuvek in thalrau lam nauhak te pawlin anmai siatnak, ten umzet sualnak sungah tla an ceng rero lai tla asi thei. Sihman sehla, mi pakhat cun a sual ti thei na cingin amai duhhrilnak liolio in nuam tizet in sual a tuah sunzawm rero lai asi ahcun Bible in a simmi Pathian fate sinak a nei hrih lo tinak asi. Pathian fate a rak si taktak asile Bible in a sim bet mi cu “Pa in a fatak cu nun a sim asi” ti asi. A rei hlan ah nunsim a tawng ding.
Pathian biak, Pathian fate pawl thawn um tlang, Pathian thangthat, Pathian duh mi tuah, nuam na ti maw? Ziangha nuam na ti? Nuam na timi kha cek aw fel aw la na sunglam nun ziangin a lo uk ti na thei aw mei ding. Ziang na sim timi siloin na nun kha ziangin a lo uk, ziang nuam na ti timi sawn kha na sinak taktak, khuilam zin-hellram lamzin maw vanram lamzin na zawh ti, langtertu asi.
Pathian zangfahnak in milai sunglam nun, thlarau a luahkhat tikah, milai thlarau mitcaw cu tivang asi tikah, Pathian thianhlimnak cu hmuhter asi tikah, milai mizia sual ih bawrhhlawh zia cu theihter asi tikah, satan le a hnatuan mizia sual pawl bawrhhlawhzia hmuhter a si tikah, milai thlarau cun Pathian thawn an hlat awkzia a thei, a hmufiang ih Pathian zangfahnak a hal sinsin. Zuknung in sihti a hal vekin milai thlarau cun Pathian a hal sinsin, Pathian a khawp thei lo, Pathian thu ngai, A thusim, Pathian fale pawl thawn pawlkom awknak hi a khawp thei lo asi. Milai sunglam tisa mizia in a hal ringring laimi, leitlun tisa nuamcennak, porh awknak kha satan hmanrua Pathian dodalnak hrangah hmanrua ansi ti theifiang tu pawl cun an tisa hiarhal mi cu a di an riamter nawn lo.
Ziang nuam na ti? Na sunglam in Pathian a hal ringring maw? Na tisa mizia in a hiarhal ringring mi, tisa thinlung duhzawng huatzawng kha Pathian dodaltu, satan hmanrua asi ti na thei fiang zo maw?
Pathian fate na si ahcun na thinlung sungah hmun kaubik khua a luah tu cu sankhuk Pathian innpi sungah na umnak ding hmun, lei le van sersiamtu Siangpahrang Fapa ih mopuai ni sunglawi ah mopuan thawn na thuam awk ding ni sunglawi in na lungsung a lo luahkhat ringring dingih leitlun harsatnak, na tisa duhnak famkim lo tikah na lung a awi sawn ding. Aw, mangbangza Pathian duhdawtnak in himi casiar tu pawl thinlung sung luahkhat hram sehla ka va ti em!
3) Khrih ih mizia: thulun tangdor nak:
Mi pakhat cu a kaa in ziang a sim, ziangvek biaknak, kawhhran pawlkom, ziangvek hna a tuan ih ziangtin amah le amah a sim aw aw timi hnakin a nitin nuntu mizia le tuahnak in zo ih palai asi, khui lamzin ah a feh ti a simfiang. Satan palai pawl cu hellram lamzin an zawh. Khrih palai pawl cu vanram lamzin an zawh. Vanram lamzin zawh tu pawl cu Khrih ih palai an si; Khrih ih nuntu ziana an nunah a lang. hellram lamzin zawhtu pawl cu satan fate an si ih an nitin nunah satan mizia a lang. Cun “an rah in nan thei ding” ti asivekin mi pakhat cu a nunin a rahsuah mi in zo ih palai asi ti theihtheih asi fawn. A kung cu a tha zetnan a rah a sia, ti a um thei lo. Vanram lamzin cu tangdor nak asi ih hellram lamzin cu mah le mah porh awknak lamzin asi. Khrih ih tangdornak lamzun cu thihtiang tangdor asi, minung lam ruahnak ahcun atthlak tangdornak asi. Ziangruangah Zesu Khrih cu Bible in “thihtiang tangdor” ati. Pathian thu pahbal, tangdor loin leitlun ah nun hnakin vanram ah cawlh hahdam a tha sawn.
4. Khrih ih mizia: Duhdawtnak Pathian hmu tu, tawngtu, Pathian Thlarau in a luahkhat mi, cencilh mi pawl sunglam nunah Pathian mizia, duhdawtnak mizia in a ciahneh tikah Pa Pathian ih mangbangza attthlak duhdawtnak, Pa Pathian in Amai Fapa thihnak khawp hialin milai a duhdawtnak nak hi an hmuh fiang tikah an lei nun hi duhdawtnak in a luahkhat sawn. An sunglam nun hi Pai duhdawtnak in a luahkhat tikah an nitin nun ihsin pa’I duhdawtnak cu an sung ihsin a luangsuak sawn asi. Cui Pathian duhdawtnak mizia an sungah a luangsuak tikah milai tisa mizia ihsin a suak mi milai duhdawtnak thawn a lingletzia a tak in a lang.
Pathian in A Fapa sungin milai rundamnak A tumtah mi cu a tuah suak zo, cui rundamnak hnatuan cu theh asi hrih lo, Khrih zumtu pawl nunnak hmangin Pathian in a tuan sunzawm rero lai. Pathian in sankhuk lalram sungah Khrih thawn lal tlang dingin khrih zumtu pawl tuanvo in pek. Cutin Khrih zumtu pawl nunnak sung ihsin Pathian mizia langin, Pathian tumtah mi tuansuak sidingin Pathian in milai a hawl. Cutin Khrih zumtu pawl cu Khrih ih Thlarau in Khrih ih mizia in nung dingin a kaihhruai, a uk, a thunun, a cencilh ih Krih ih nunphung (Christ’s life principles) in leitlun ah leitlung eng, nunnak lamzin cu hmuhter asi.
“I duhdawt ahcun ka thupek mi nan tlun ding” ati vekin Pathian a duhdawt tu, Pathian Fapa a duhdaw tu pawlin anmah rundamtu an duhdawtnak cu mipi hmaiah ziang an tuah, biak inn ah ziang an tuah, thawhhlawm ziangzat an thawh timi ah a lang lo, an nitin nunah Khrih thupek an thlunnak, an nun kaihruai tu ah an hngat awknak in siseh Khrih in a duhdawtih A thisen in a lei mi Khrihfa pawl duhdawtnak in an riannak ah a lang sawn asi.
“Khat le khat duhdawt aw uh” tiah thupek cu Khrih Thlarau in a tleicia mi pawl thinlung sungah a nunter ih a tak in nunpi thei dingin an thinlung a kaihhruai theu. Mi zokhalin”Khrih ka duhdawt” ti nacing in Zesu khrih in a thisen in a leimi thangsiat, relsiat, zuar thlai rero tu cu an biak mi le “ka duhdawt” an timi cu zo asi ti an thei lo ih an sungah Khrih ih Thlarau a um lo ti fiang aw sawn ding an si.
Hellram tla ding, satan kutsung ihta Pathian in a rundam ih a sualnak a ngaidam zomi, Pa Pathian ih zangfah lainatnak ih ngaidam nak a co ngah zo tu pawl cu “Pa in a lo ngaidam zo vekin khat le khat ngaidam aw uh” timi thupek cu an lungsungah a nung ih an nitin nunah an nunpi sawn asi.
Leitlun biaknak le pawlkom hmuahhmuah in anmai pawlkom sungtel le anmah dinpi tu, tantu cu an duhdawt theh. Sikhal sehla, Khrih ih Thlarau in a cencilh mi, a ukmi, a thunun mi pawl nun ahcun Khrih ih duhdawtnak an sung ihsin a luangsuak ih anmah parah siatnak tuahtu pawl, khal an duhdawt, an hrangah thiltha tuah thei ding dinhmun ah an din tik can poh ah a remcannak poh ah thiltha an tuah sak. “Na raal duhdaw aw” timi thu pek cu an nunpi. Zesu in “Nan hnenah reipi thu ka sim thei nawn lo; ziangah tile hi leilung uktu pa a ra zo a si. Ka parah thuneihnak zianghman a nei lo, 31sikhalsehla ka Pa ka duhdawt kha leilung mi in an theih a ṭul; cutiih an theih theinak dingah Amah in thu i pekmi hmuahhmuah ka tuah ṭheh a si.” (John 14:30-31) ati vekin Khrih duhdawttu pawl cun anmai nunnak cem tiang khal, an lungawi nak siatsuah ding tiang khalin Khrih an duhdawtnak ruangah Khrih ih thupek mi cu an nunpi sawn asi.
5) Pathian cawimawinak: Khrih ah mangbangza lungawinak Pathian in A Fapa thisen in a lei mi, Khrih ah zumtu pawl nunah a duh mi, a tlencia mi milai pawl thawn pehtlaih nak ah a lungawi mi cu zumtu pawlin leitlun thlawsuah ah si loin Amah ah kan lungawinak asi. Mi pakhat cu Pathian ah lungawinak famkim a neih lai hlanlo, Pathian ka thangthat, Pathian ka rian, Pathian ka duhdawt, a timi pawl hi ziang asi ti a fiang aw lo tinak asi. Milai thinlung cu duhdawtmi thawn um tlang tikah, duhdawtmi thu theih tikah, duhdawtmi ih duhdawtnak co tikah, a lung a awi ih a di a riam. Cuvekin Pathian thinlung khal, a duhdawtih A Fapa thisen in a leimi, milai pawlin Amahah an lung a awi ih an di a riam tikah tikah a lung a awi ve asi. Curuangah, sual sungah a thlu se zo mi milai thlarau, le thinlung cun leitlun thil hiarhal in a duh ringring, nuam ti ringring hmansehla, Khrih neih hnu ahcun, Zesu Khrih ah Pathian thawn pehzawm awknak thar neih hnu ahcun Pathian hnakih hal mi kan nei nawn lo, diriamnak dang kan nei nawn lo, thildang ziangkim cu hmanrua men an si. Cutin zumtu Pathian fate thinlung cu leitlun um lai ihsin Pathian a ngai ih Pathian Thlarau ih pawlkom nak cu a cen ringring asi. Leitlun in a siatsuah thei lomi lungawi nun diriamnak cu Khrih ah Pathian thawn pehzawm awknak ah asi. Cui lungawinak tep zo tu hrang ahcun leitlun tisa in tuarnak, harsatnak tawn tikah Pathian thawn in nai aw ter sinsin tu, Pathian thawtzia thuk sinsin in thei ter tu, an si sawn. Leitlun mi in in hua, in thangsiat tikah Pa Pathian ih duhdawtnak thuk sinsin in theihter tu an si. Curuangah, Khrih ah Pathian thawn pehzawm awknak nei zo tu, Khrih Thlarau in a ciahneh mi, a ukmi, a thunun mi, a cencilh mi nunah leitlun ah lungawi lonak ding san, thu zianghman a um lo. Ziangkim cu Khrih hmuihmel kan bang sinsin thei nak dingah le sankhuk innpi thawn nai aw sinsin dingin timtuah nak hmanrua tha lawnglawng an si ti nitun nunah a tak in kan hmuh suak tikah Khrih ah Pathian thawn kan pehzawm nak cu a sun a zan in kan cen ih leitlun vanram, Pathian thangthatnak cu ziangvek dinhmun, ziangtikcu, zovek milai thawn um tik khalah Pathian ah lungawinak, kan cen thawk zo asi.
Na lungawinak ziangha asi? Ziang nuam na ti? Leitlun thille ri, milai, sinak, lennak, pawlkom, pehtlaihnak, harsatnak, thangsiat relsiat nak pawlin na lungawinak a lo siatsuah thei maw, na thinlung hmun a lo luahkhat maw, na lungawinak a lo siatsuah asi ahcun, leitlun thu pakhatkhat ruangah na lung a awi lo asi ahcun, Khrih ah Pathian thawn nan pehzawm awknak ah na lungawi nak a lo siatsuah thei lai asi ahcun, na thinlung sungah Khrih Thlarau a lal hrih lo tinak asi thei.
Phunzainak in a khat mi milai pakhatkhat na hmu asile, lole nangmah na si pang asile, Khrih ah Pathian thawn pehzawm awknak thar nei in na lungawi nak cu Khrih ah asi lai hlan lo, na lungawinak lo siatsuahtu ding, lungawi lonak ding le phunzai nak ding, puhmawh ding, dinhmun lole midang pakhatkhat puhmawh ding na lei damsung na hmu ringring ding. Pathian fa, Krih ah rundamnak ka co zo na ti ih na lung a awi lo asi ahcun nangmai mawh liolio asi. Leitlun pumpuluk ah nangmah lungawi ter dingin tuanvo nei tu cu NANGMAH LAWNG na si. Ziangah tile na leitlun damsung lawng hman si loin sankhuk in na lungawipi tlak laksawng sunglawi Pathian in Khrih ah a lo pek zo asi. Cuhnak ih sunglawi laksawng sersiam mi milai hrangah a um lo. Thildang dawi in na tlan rero, na thinlung a vaktawi rero lai hrih asile zangfakza in satan bumnak thang sungah na tal rero lai tinak asi.
Sankhuk in na Pathian cen aw, cucu leitlun damlai ihsin Khrihfa pawlin sankhuk tiang kan tuah dingin tu ihsin kan thawk rero zomi umsun asi. |