Unau, na nitin nunah nangmah le nangmah ziangvek thu na sut aw theu? Keimai nun thusuh awkmi te lo ruah ve sehla;

 

Pathian thawn pehtlaih nak

1)      Pathian fial mi tuanvo ka ti thei tawk a tha bik in ka tuan maw?: Nunsan

Ka tleirawl laiah keimah duhnak in ram le miphun hrang tuan dingin ka rak fehsuak tikah hlawhsamnak a thlengih nasa ten thinlung a khawng nasa. Ka pitlin vivo tikah leitlun nun cu Pathian ih fial mi lawng tuan dingin ka nitin nun cu ka hmang. Cutikah nitin ka sut awk mi  le ka thlacam mi cu “Bawipa in ifial mi, keimah hmangin tuah a duh mi cu famkim ten tuah si ringring hram sheh” ti asi. Curuangah zingtin te, “Bawipa, tuisun ah tuanvo ipek mi, keimah hmangin tuah na duh mi itheihter  aw la famkim ten tuansuak thei dingin in bawm aw” ti ah le zantin te, “Bawipa, ka thei tawk suah in tuisun ka nung ka zuam ka tuan ih keimah tisa famkim lo nak ruangah ka ti sual pang mi in ngaidam zo ruangah ka lungawi, a tha mi le na duhmi tuansuak mi parah na hmin sunglawi hram she” ti hi ka thlacam asi. Keimah duhnak tampi a famkim lo lai ah Bawipai duhnak cu tuah famkim asi ti ka theih tikah ka lung a awi nundi a riam ringring.

 

2)      Ka nun in Pathian a cawimawi maw?: Sersamsan

Zumnak ah ka tthanglian vivo tikah a harsa ka ti bikmi pakhat cu ka nun hin Pathian a cawimawi, sunlawih dingzat a sunlawih lomi hi asi. Ka nunah Khrih ih hmuihmel a lang thei lo ti ka thei awk tikah riahsia in ka kuun theu. Ka tisa mizia cu khross a thi zo cingin a rak cangvai ringring theu. Sihman sehlaw, keimah si loin Khrih thisen ruangah Khrih ih dingfelnak le thianhlim nak sungah Pa Pathian in thianghlim famkim ah ipom, icohlang ti ka theih tikah tang idor ter ih ka thlarau cu lungawinak sim cawk loin a khat theu. Nitin ka nun, ka tuahnak ka zoh tikah Bawipai sunlawinak sunlawih hnakin ka cah lonak le tlamtlin lonak hin Bawipai hmuihmel a phen theh ringring ti ka thei. Cutin ka nun ka hmuh suak awk tikah a ttawntai mi lei tisa cu suahsan, tanta in a siat thei lomi, a famkim mi pumsa thawn thuam awk ding cu ka cak tuk, ka cak duahdo, ka thlarau in cui ni cu a ngai in a hngakhlap duahdo asi. Ka nun, ka mitmeng, ka lungput, ka khawruah, ka tongkam, ka taksa, pehtlaih mi, ciahneh mi, neihmi pawl ka hman awknak hi Bawipai sunlawinak lawng si hram sheh tihi ka ruah le duhthusam bikmi asi.

 

3)      Ka Pathian tawng dingin ka tiar aw maw? Hmailam!

 

“Nikhat cu siangpahrang innsang hnatuantu pawlin siangpahrang fapa nupi ding an hawl lai ah lai khawte pakhat ah farahfa, fala note pakhat kha, an khawsung mi pawl theih loin, siangpahrang fapa nupi dingah sui zunghruk an pek ih an ham ta. Cui ni ihsin cui fala nute thinlung sung ahcun a pasal ding siangpahrang fapa lawnglawng a ruatih an khawsung tlangval pawlin a thinlung sungah hmun an nei nawn lo. A pasal ding, amah hamtu ih thu hla an sim mi cu ngai nuam a ti tuk ih a ngai khawp thei lo. A pasal ding Siangpahrang fapa ratnak ding ni thla cu a hngak ringring ih an khawhnar cuan in nitin a thinlung mit a meng ringring.” Hi tahthimnak hi “Mithmuh lo zun: Hamcia mi mi mo” tiin cahram ka ngannak ah ka hman mi asi (http://www.hremang.com/Home/thlarau-lam-pathian-thu-siar-ding/mithmuhlo-zun).

 

Ka thlarau cun ziangtik lai khalah a mitmei ringring mi cu Bawipai ratnak ding can asi. Aw, cui ni sunglawi thlen ding a hngak hlap lo kan um ding ka zum lo. Cutik ahcun kan duhdawtmi le induhdawttu pawl tlaksamnak, theihtiam awk lonak, famkim lonak pawl a um nawn lo ding. Leitlun nunsung harsatnak, thlemnak phunphun thawn inthlem tu, satan cu ti mualpho in a um kan hmu lai ding. Cuhmuahhmuah hnakin Amai sersiam mi milai hrangah le a raal dinhmun ah dingin Amah dodal tu lam kan ttan lai khalah in duhdawt ih A Fapa thisen in in lei tu, cutluk ka parah zangfah lainatnak a neitu Pa Pathian ih hmuihmel hmuh ding, a kehram ah khukbil in Amah thangthat ding cu ka thlarau in a cak tuk ih cuican cu thleng lohli sehla ka va ti em! Cui hlei ah Siangpahrang fapa ih a nupi dingah a ham mi a duhtuk mi fala note a ruatnak hnak hman in a thuk sawn duhdawtnak in in duhdawt ih hellram tla ding in siang lo ruangah kei mai aiah thihnak a tuar tu Khrih ih hmuihmel cu hmaiton rori in hmuh ding cu ziangtluk in ka thlarau in a ngai ti cu milai tongkam in sim theih asi lo. Aw, ra aw, cui can cu ra thleng lohli sheh!

 

Mah le mah:

4)      Keimah le keimah tehfung dik thawn tikcu la in ka tah aw ringring maw?

Keimah le keimah ka hmuh awkdan: leitlun mi, lai mi, pawlkom tuanvo, leitlun hlawhtlinnak tehfung thawn si loin isersiamtu ih tehfung Bible sung ngan mi vekin nitin cuai thlai aw ringring thei dingin ka zuam. Cutikah ziangtik hmanah leitisa thawn famkim ti a um lo, duhkim, thianghlim famkim ti a um dah lo, cuvek thotho in ka rianmi ka Pathian ih ngaidam thei lo mi tlaksamnak le tisualpang mi a um lo ti ka theih awk tikah nun diriam in a duhdawtnak tangsungah nitin amah thawn pehzawm awknak cen in ka nung.  Keimah le keimah ka hman awknak, midang pehtlaih nak le neihmi tikcu can le thilri pehtlaih mi pawl hmuah cu Bible nun thuthlung vekin ka nunpi maw ti hi ka tehfung asi.

 

5)      Ka zir dingmi, ka kiangkap milai le ziangkim ihsin ka zir maw? Hmasawnnak!

Phunhra lenglam ah kum 12 sung (fultime) tlawng ka kai bet hnu ah le nitin hmuhton mi ihsin ka zir suak mi cu “theih ding lakah ka theih mi hi reltlak a um lo; theih ding hi tipithuamthum zat sisehla ka theih mi cu tifawrkhat tluk hman asilo, “theihnak hi fimnak asilo” “ka thihtiang zir ding ka si’ tvp, ka zir ngah. Cu hmuahhmuah lakah a sunglawi bik ka zir suak mi cu Pathian Thlarau ih zirh, thunun, ukmi si lawngah lei tisa theihnak le Pathian hnen ihsin a ra mi theihnak thleidan thiamnak le nunpi theinak a um ti asi. Ka taksa, thinlung, thlarau, ka duhnak, hiarnak, caknak pawl hmuahhmuah hi Pathian Thlarau in a uk, a zirh lawngah ziangkim lakah Pathian ih duh mi duh, nuam ati mi nuam ti in, a huat mi huat dan ka zir ngah. Cutin nitin Bawipa kehram ah zir rero in ka nung. Ziangkim hmuh ton mi in nitin in zirh.  Sankhuk innpi sung thlen tik lawngah zirbet a tul nawn lo ding.

 

6)      Lungput, Nuam ka ti bik mi le ka khawruahnak sungah ziangin hmun kaubik khua a luah?

Zing ka tho ih thlalang ka zoh tikah voi tampi cu ka me beuobeuo theu! Ka kum upa vivo ih keimai sunglam ka zoh thiam vivo tikah ka thluak, ka thinlung, khawruah sungah, ka khawruahdan, thinlungput pawl hi a tampi cu bal zetzet an rak si ti ka hmu fiang. Ka tisa thinlung cu thlarau meisa thawn ur, kholhfai asi tikah tisa cun tuar har ati, anaa zet. Ka thinlung in a huat zawng, a cak zawng, nuam timi, hiar mi, huatmi, duh lomi pawl hi ka hmuh fiang tikah Bible in “thinlung cu mi bum hmang bik asi” ati mi a dikzia ka hmu. Curuangah ziangtik lai khalah fimkhur zetih kilkhawi, kaihhrem, kross parah khenbet ringring tul mi cu keimai thinlung hi asizia ka hmu fiang. Ka tisa thinlung in thlarau a dodal ringring mi ka hmuh tiam vivo. Lei tisa ihsin a suak mi ruahnak, pomdan, duhdan, duh lo dan, le Thlarau ih theihternak pawl thleidan thiamnak ka neih vivo mi hin lamzin dik le lamzin dik lo thleidan thiamnak tla ihmuh vivo. Thlarau Thianghlim le thlarau bawrhhlawh pawl cangvaihdan tla thleidan fiangsinsin in thleidan ka thiam vivo. Cuticun nitin, ziangtik lai khalah ka thinlung sungah ziangvek thinlungput, khawruah mi, suangtuahnak, duhnak, huatnak, hiarnak, caknak, zetnak, daithlannak a um ringring timi pawl fimkhur zetin kaihhrem, kilkhawi, ukneh a tul zia ka zir ngah vivo. Cuticun ka nitin nun cu ka thinlung ih ukmi si lo dingin ka thiarfihlim aw. Cuticing cun theihman hlanah ka tisa thinlung cu a cangvai ringring. Cucun catbang loin Thlarau Thianghlim ih ukmi nun ka tulzia in theihter ringring. Ka tisa thinlung hi kan hmailam, ka thlarau nun, Pathian thawn kan pehzawm awknak, ka milai pi thawn kan pehzawm awknak siatsuahtu hmanrua, satan in a hman thei mi hmanrua ka sungah a um ringring mi asi ti ka fiang sinsin. Curuangah catbang loin thlacam ringringin nun ka zir ngah.

 

 

Midang hrang:

7)      Ka kiangkap ummi pawl hrangah thiltha ka tuah thei mi tuah loin ka um maw? : tuanvo!

Ka thazang, neihmi sumsaw, theihnak, cangan in siseh, peknak in siseh, tongkam in siseh thlacamsak nak in siseh ka kiangkap um, ka pehtlaih mi pawl hrangah an hlawkpi dingmi thiltha tuah thei ding dinhmun ih ka din lai ah tuah lo mi ka nei maw? Ka kiangkap ah keimah hnakin canpual niam sawn mi, harsa sawn mi, tlasam sawn mi, harsatnak nei mi ka hmuh tikah keimah sung ihsin Pathian in a duhdawtnak langter a duh mi ziang a um ti ka ruat ringring maw? Pathian in ka pehtlai mi milai pawl hrangah ziang thiltha tuah a duh? Hi pawl hi ka ruat theu mi asi. Midang in thiltha an tuah ding siseh an thansoh nak daltu ka si pang maw?

 

8)      Midang tungding tu ka si maw?

Ka nunnak ihsin kan kiangkap um pawl hrangah ziang thathnemnak ka nei? Ka hnen ihsin ziang an zir? Keimah ruangah midang an hua aw sinsin maw, midang duhdawtnak in rualremnak suahter tu ka si maw? Keimah thawn pehtlaih nak ruangah ka kiangkap um pawlin Pathian an thangthat maw, tisa nuamnung cennak lam ah an feh sawn? Huat awknak thangsiat awknak tipungtu ka si maw, duhdawtnak le thiltha tuahnak tipungtu ka si? Ka neih mi, theihmi, tithei mi hman awknak pawl hi midang in an hlawkpi maw? Hi pawl hi ka sut awk theu mi asi. Lamzin tha khih hmuhtu, thapetu ka si maw, beidawng tertu, dungtawlh tertu ka si maw? Pathian in ka nunnak hmangin zo tundin duh mi a nei?

 

 

9)      Thlawsuah ka dawn mi ziangtin ka hmang?

 

Taksa thinlugn thlarau ah, siseh sumpai thilri le sumsaw, pehtlaih mi milai, pawlkom le hnatuan pawl hi keimah le keimah porh awknak ah ka hmang pang maw? Pathian hnakin hmun kau sawn ka thinlung sungah hmun luah tu a um maw? Pathian thawn kan pehzawm awknak hnakin thupi sawn ah ka ret mi a um pang maw? Pathian thawn pehzawm awknak hnakin nuam le lungawinak ah ka nawm pi mi a um pang ma? Ka neih lomi, tuah thei lomi, ti thei lomi, ka kutsungah a um lomi, Pathian in ipek lomi ruangah riahsia thinhar in ka um pang maw, Pathian in ipek mi parah lungawi hna thiam nawn loin ka um pang maw? Pathian sunlawih nak ding, tuanvo ipek mi tuansuak nak ding hmanrua bungrua pawl cu Amah Pathian hnak in thupi sawn ah ka ret sual pang maw? Hmanrua thlawsuah pek ka si ruangah midang thawn keimah le keimah ka tahthim pang maw, tha cuangin ka thei aw pang maw? Ka nunnak hi thlawsuah parah a hngat aw lo ih Pathian kutsungah a um ti ka theihhngilh pang maw? Thlawsuah ka dawn mi hmuahhmuah hi keimah nuamnung cen nak ding si loin midang hrang Pathian duhdawtnak langter tu ding an si ti ka theihhngilh pang maw?

 

 

10)  leitlun hrangah ziang ka si?

Leitlun mithmuh ah zo ih palai ka si? Sualnak, huatnak,  thiltha lo rem awk lonak tipungtu, ka si maw? Satan palai ka tuan pang maw? Khrih ih palai ka sinak mi in an hmuh ding a um maw? Ka nunah Khrih hmuihmel lang thei lo dingin ziangin a hliahkhuh ringring? Ka nunah, ziangtin ka tisa mizia, Khrih hmuihmel lang thei lo dingin hliahkhuh tu ka neh thei ding?  Leitlun ah remdainak palai, thiltha tuah nak in, thuthangtha karhzai ternak in, Pathian le sersiam mi karlak remdaihnak tuah tu palai ka sinak hnatuan nitin ka tuan maw? Thuanthu in ka liangparh a ttummi tuanvo ka ttuansuak maw?

 

Na nitin nunah nangmah sersiamtu Pathian in ttuanvo a lo pek mi ttuansuak thei hram ding duhsaknak thawn, casiartu nan zaten Pathian Thlarau in a lo umpi zia lo theihter sinsin hramseh!