|
Nitin Fimkhur Dingmi Thalrau Nathrik Pakua
1) Tisa caknak, 2) Thei si duhnak, 3) Iksinak, 4) Thei neih (lal) duhnak, 5) Huatnak, 6) Pathian um lo vekin nun, 7) Duh-am nak, 8) Porh awknak, 9) Phunzai nak
Milai tampi, zumtu zum lo tu khalin, thilsual tumpi tuah dingin thlen pi theu tu tisa mizia rah pawl hi malte zoh hnik uhsi: tisa caaknak, theihnak thlemnak, thuneih (lal) duhnak, iksiknak, huatnak, duh-am nak, Pathian tel lo khuaruat, , phunzainak, hivek pawlin milai thinlung a ciahneh tikah milai sia-tha-theihnak in thudik le thianghlim mi, a tha sawn mi le a tha lo mi thleidan theinak nei nawn loin thimlakah thuthluknak sual (k)an tuah theu. Milai thuanthu ihsin zir ding tampi a um. 1) Tisa caknak in sia-tha-theihnak a ciahneh tikah: Tisa caak, hiarhalnak in milai thinlung a luahkhat tikah milai thinlung siatha theihnak cu mitcaw ko a tuah thei. Cutikah thiltha le tha lo, a thianghlim mile a thianghlim lomi, Pathian duhzawng le huatzawng, thleidang thiam nawn loin thuthluknak milai in an tuah sual theu. Cutin tisa caaknak in thinlung a uk vekin nungin thuthluknak tuah tikah lehhnu ah sir awk man tha hnem lo vanduai nakin dung a thlun theu. Tahtthimnakah, mipa thinlung cu nunau parah tisa caaknak in a luahkhat tikah thilsual tumpi an tuah theu. Cu pawl lakah thuanthu langsar zet pawl cu Samson, David, Bill Clinton pawl hi an kiangkap nai ah a ummi nunau parah an tisa caaknak in an thinlung a ciahnen tikah sup aw thei loin thilsual an tuah ih sir awkman um lo, mualpho za in thuanthu an tanta. Cun Isau cun a ril a rawng tuk laiah a fatir sinak kha rawl voikhat ei ah a zuar. Cutin, “milai thinlung cu ziangdang hnakin mi bum hmang bik asi” vekin caaktuk, duhtuk, phur tuk, lungawi tuk, thinheng tuk, lai ah milaiin thinsual tampi kan tuah sual theu.
A biktakin fala tlangval tampi cu nupi pasal neih awk hlanah tisa caaknak sup aw thei loin an cangsual tikah nupi pasal an neih awknak cu tisa caaknak in lam a hruai tikah an damsung “tiamkam awknak” cu lungfim ten Pathian hnenah hlan hmaisa loin tisa caaknak in lai a relsak tikah a rei hlanah thinlung kuai in buainak in mi tampi an tawp theu. America ramah nupi pasal nei aw hmuahhmuah lakah za ah sawm nga hnak ih tam an then aw. Living together in a um hmai sa pawl lakah thenthek awknak a tam sinsin.
Tisa caaknak in na thinlung a lo coktho tu lak ihsin na fimkhur a tul; umnak hmun, na mit in na hmuh thei mi, na hna in na theih mi, na taksa in na dai thei mi lak ihsin tisa caknak ah a lo hruai tu kha na ral asi. Tisa caaknakin na thinlung a ciahneh hnu ahcun na talsuak thei lo ding. David siangpahrang le Samson hnakin na cak sawn ding tiah ruat aw hrimhrim hlah.
Curuangah mi zokhalin thuthluknak fate pakhat tuah zik tikah mai tisa caaknak, phurnak, duhnak, duh lo nak, in thinlung ciahneh mi lak ihsin fimkhur thiam a thupi zet. Na tongkam, sumpai hmandan, taksa, tikcu can, le neih mi pehtlaih mi ziangkim kha tisa caaknak ih ciahneh mi thinlung ih thunun, ukmi si hlah she!
2) Thei si duhnak Milai in thuthei sawn si hi uar dingah kan ruat ruangah si hmang, voi tampi cu thei tam zuam aw aw in mibur umkhawm nak ah mihrekkhat in mai theihmi hnakih tam an sim theu tikah theihmi lenglam thu an simmi cu voi tampi thuphan asilole thuphan le thungai cawhpolh celcel asi theu. Voikhat cu FCCI Sunday school zir pawl hnenah “Leitlunah ziang rawl a thaw bik?” tiah ka sut hai tikah mi hrek in “Arsa” an ti, a hrek in “Chocolate” an ti, a phunphun in anmah in thaw an ti bikmi an rel celcel. Ka sutsal hai tikah “Leitlun pumpi ah ziangrawl a thawbik timi thusutnak sang thei dingin ziang nan theih hmaisak a tul?” ka ti tikah an ruat aw khuao khi. Na ei dah milak ihsin thaw na ti bikmi thu na simmi asi tiah ka sim tikah an ruat aw sal. Leitlunah ziangrawl a thawbik tikmi thusutnak sang thei dingin thil pahnih a tul hmaisa mi cu; 1) Leitlun rawl hmuahhmuah an ei hmaisak ta a tul, 2) leitlun mi pawlin ziang a thaw an timi an theih a tul.
Evi khal kha Pathian in a theihter mi hnakih tam theih bet a duh tikah thlemnak sungah a tluksiat vekin tuisan theihnak a pungcak zetmi san milai pawl hrangah theihnak zuam awknak ih thlemnak ah tluse lo dingin fimkhur a tha. “Theihnak cun milai thinlung a puamter” vekin Pathian Thlarau tello theihnak cun tisa thinlung a puamter ih mah le mah porh awknak a suahter, midang zohniam nak a suahter, theisawn si a duh ringring.Cutin ka palh thei ti khal pom thei nawn loin theihmi hnakih tamsawn (thuphan) sim duhnak le palh nak huhphen duhnak in milai thinlung cu sual ah a hruai theu. Pathian in Amai hmuihmel kengih a sersiammi le A duhdawt mi A Fapa nunnak in a rundam mi milai pawl hrangah ziangkim a tuahsak cia mi hi milai theihnak in a thei ban lo, milai pawlin Patian thu hnakin mai thu, Pathian thu in a simmi hnakin mai ruahnak hi a thupi sawnah an ret ruangah a tul lo pi voi tampi leitlunah harsatnak buainak kan tawnnak sawn asi. Tahthimnakh, Israel pawlin anmah hruaitu tu Pathian pekmi an dodal, Pathian thu vekin an nun lo tikah sal an tang theu. Cuvek in laimi pawl khal hi hruaitu tha an um lo siloin hruaitu tha, Pathian pekmi cu zo asi ti laimi pawlin theihtheinak thleidan thiamnak kan nei lo sawn asi ti in ka hmu. Cuvekin mi pakhat, insang, kawhhran, khua, veng, ram le miphun pawlhi Pathian thu le khawkhan duh loin milai theihnak le ruahdan pomdan in feh tikah buainak le harsatnak in dung a thlun theu sawn asi.
Tuisan leitlun milai khawruatthiam (“Post”modern philosopher) pawl cun thutak (absolute truth) a um lo, tikcu le can dinhmun zir in thutak cu a thleng aw vivo mi asi an ti. Milai in thutak theihtheinak kan nei lo, tvp in an zirh. A sual, sual lo timi cu mah le ram, miphun, nunphung ih zir asi tiah an ti.
Nazareth khua mi pawl cun Zesu kha an rak thei nan a Pathian sinak an thei lo. Cutikah, anmai theihnak lawngah an hngat awih an zum lo ruangah Bible in “Nazareth khua ah thilmak tampi a tuah thei lo” a ti. Nazareth khua mi pawl cu anmai theihnak in an sia-tha theihnak thinlung sangka a khar sak. Anmai theihmi lenglam ah Zesu in sinak thiltitheinak Pathian huham cahnak a neih ding an ruat ban lo.
Laimi harsatnak pakhat cu hahdam zetin “ka thei lo” ti ah sim ding hi asi. “Thei lo” tihi mi tampi in ningzah ah kan ruat tikah thei lo pi thei vekin kan sim theu. Kan theih lo mi ziang ka thei lo ti theih thei nak kan nei fawn lo, tiah an sim vek khi kan si theu. Cutin voi tampi cu kan neih lo mi hnakin kan theih lomi in in siatsuah mi a tam sawn ding a zum um. Pathian in laimi pawl hrangah hruaitha in pe lo siloin zo hi hruaitu tha, Pathian pek mi hruaitu tha cu zo asi, mipi hrang thiltha tuahsuak tu ding timi mipi in kan theih lo sawn asi ti in ka hmu.
Milai theihnak ah a hgnat aw tu le milai tisa thinlung in a ukmi pawl cun mah le mah thei aw loin Pathian duhnak kan el sual theu sawn asi.
Mi zocio khalin tong kamkhat tong tikah siseh thuthluknak tuah tikah siseh kanmai tuanvo le mawhphurnak cio ah Pathian Thlarau theihternak hnuai ah tangdornak in thuthluknak tuah le fimkhur cio a thupitzia sim duhmi asi.
3) Iksiknak in milai thinlung a luahkhat tikah : Iksiknak cu tihnung ngaingai asi. Canser nathrik in milai taksa a eisiat vekin iksiknak cun milai thlarau a eisiat ih satan ukmi le hmanrua tha ah a canter. Midang na iksik tikah siseh midang in an lo iksik tikah siseh thil tha, Pathian Thalrau hnatuan nak cu dodal asi ih thil tha lo zet a thleng thei ringring ti theihcia a tha. Iksik nak cu tur vek asi. Iksiknak cu milai thlarau cu a eisiat ih milai thinlung cu a thim ter. Cutikah milai sia-tha theihnak in a sual le a dik tleidan theinak a neinawn lo. Tahthimnakah, Joseph unau pawlin Joseph an iksik tikah siseh Kain in Abel a iksik tikah siseh iksiktu pawl thinlung sungah mawhnak nei lo thisen suah kha sual ah an ruat nawn lo, an tiksiknak ih a ciahneh mi thinlugn diriam ter tu asi. Iksiknak thinlung cu sual lawngin a di a riam ter thei. Cui sual cu khawruah sual, tongkam sual, le tuahnak, thisen suahnak sual asi thei. Iksiknak ih a luahkhat mi thinlung cun a iksikmi tuahsiatnak ding khua a ruat ih tongkam tha lo a hring suak, voi tampi cu thuphan puhnak, relsiat thangsiatnak, mawhsiatnak asi theu. Cutin “Satan” “mawhsiattu” ih hna ropi tuan suak asi theu. Curuangah mi zokhalin mai thinlung sungah iksiknak a um maw ti cek awk fel ringring a tha, ziangah tile iksiknak cu milai siatha theihnak mit a cawt ter tikah sualnak ziangvek khal thleidang thiam nawn loin iksiknak ih ciahneh mi milai thinlung cun mi a bum theu asi. .
4) Thuneih (lal) duhnak in milai thinlung a luahkhat tikah: “Thuneih duh tuk pawl hi hruaitu tha an si thei lo” ti ah an sim theu. Ziangah tile an hruaimi mipi thatnak hnakin anmai hmin thatnak, lalnak, thuneihnak, le thinlung dunnak tuah suak dingah mipi cu hmanrua ah an hmang sawn mi asi. Bible thuanthu sungah kan hmuh thei mi cu thuneih (lal) duh nak in a luahkhat mi thinlung in sualnak a hring suak; Saul in a lalnak cu David in a luahlan ding ti a hmuh tikah David cu thah tum in a dawi. Israel mipi thatnak le ral lak ihsin humhimnak hnakin amai lalnak cu thupi sawn ah a ret mi asi. Absolom in apa David ih lalnak a cuh tikah mipi hnenah thuphan thu thawn apa zuar thlai nak a ausuahpi ciamco. An pahnih in an tawpnak cu sim tul loin siatnak, sir awk man thahnem nawn lo asi. HInah Saul hnen ihsin kan zir thei mi cu lal duhtuk pawl in anmah hnakin felsawn le thasawn an hua, an dodal ih lamzin an kham sawn theu. Cuvek thotho in Absolom hnen ihsin kan zir thei mi cu lal duhtuk mi pawlin anmai hrang thatnak tuah tu, anmah hringtu cawmtu rori hman dodal le simsiat an hreh nawn lo. Cuvek in insang nupi pasal, unau rual, kawhhran, vengsung, ram le miphun karlak ah thuneih duhnak in a luahkhat mi milai an cangvai tikah mipi, midang thatnak hnakin thuneihnak lal nak cu an duhsawn mi asi vekin sualnak a hring suak theu. Cutin Pathian thu, nunphung mawi le a thianghlim mi milai pehtlaih awknak cu pahbal in lalnak, thuneih an mai kut sungah kaih bet tum asi tikah sualnak a hring suak theu. Cutin dik lo le mawi loin, Pathian hriak thih mi dodal in lalnak le thuneih cu an kaihbet tikah thuanthu in in zirhmi cu mipi vangtlang, mipi, ram, insang sung tiangah siatnak rapthlak in dung a thlun theu. THuneih le lal a duhtu pawl cun anmah hnakih a fimsawn, thiamsawn, tha sawn, Pathian hriakthih mi an dodal ringring ding. Curuangah, milai zokhalin midang a simsiat ih nangmah a lo fak, porh, na duhzawng a hawl rero tikah fimkhur aw. Kanmah lala khal mipi, midang hrang thatnak kan hawl, kan duh, kan tuan, kan ruat, kan sim kan ti lai ah midang parah thuneih, uk duh, le an par ihsin hlawknak kan ngah duh ruangah si hlah she!
Sim duh mi cu kanmah le umnak cio ah kan insang, rualpi, mibur, pawlkom, khua le ram, kawhhran khalah midang thawn pehtlaih nak hmun poh ah thupi sawn ih ret mi cu mai lalnak le thuneitu si hnakin “Pathian in kanmah hmangin midang hrang ziang a tuah duh, Pathian duhdawt zangfah lainat kan mah sung ihsin a phuang suak aw dingmi” sawn si ringring hram sheh! Cutin, lal duh thuneih duh, mi uk bet duh nak thinlung hin milai sia-tha theih nak mit a cawtter thei ih midang hrang thiltha kan tuah si hmang tiah kan ruat awk lai ah midang mipi hrangah thiltha dal tu, siatnak thlenpi tu kan rak si sawn lo nak ding hrangah fimkhur cio uhsi.
5) Huatnak in milai thinlung a luahkhat tikah: Mi pakhatkhat na hua asile a thu hla sim lo lawlaw mei aw, huatnak thinlung in a lo bum dingih na tong lo dingpi na tong pang ding. Na huat mi thawn pehparin thuthluknak na tuah tul mi a um asile Pathian hnenah thlacam hmaisa in a cang thei asile midang upa lungfim na rawn hmaisa, lole midang ruahnak parah hngat aw sawn in tuah a tha. Esther cabu, Bible sungah kan hmuh thei mi cu Haman in Modekai cu a hua, Jews pawl a hua tikah a tuah mi cu ziangtluk a sual ti a hmu thei nawn lo, a thinlung cu huatnak in a luahkhat, a ciahneh vekin khua a khang ih a tuah mi cu amai siatnak ah a cang. Mi pakhatkhat, insang, hrin, miphun, mibur pakhatkhat na hua khal asile na huatmi hnakin nangmai sunglam ih “huatnak” kha na hrangah tihnung sawn, a lo siatsuahtu ding asi. Huatnak cu milai sia-tha theihnak mit a cawtter tikah thilsual tuahnak ah mi a hruai ringring. Na kiangkap ah midang siatnak, huatnak thlaici na hna sung ah alo tuh rero tu kha Satan palai asi ti thei ringring aw. Nangmah a lo porh, fak, na duhzawng ngai poimawh zet vekin lang si in midang relsia, thangsiat rero tu, na thinlung sungah huatnak thlaici a tuh rero tu kha na hrang tihnung bik pakhat, na thlarau nun lo siatsua tu, na thlarau ral asi. Cucu ikkhun par ih na hna-ri te ah thu-te-hla alo sim tu asi thei, na rualpi tha, na unau, thiltha a lo tuahsak tu, na lungawi zawng lo tuahsak tu, pulpit par ihsin Pathian thu a lo sim rero tu tla asi thei. Cuvek thiamthiam in nangmah lala khal huatnak thlaici tuh in satan rian rero tu na si pang lo nak ding hrangah na thinlung sung um ruahnak, na tongkam, na tuahnak pawl kha huatnak tipungtu, satan hmanrua, Satan palai, satan sal, satan siahhlawh, asi pang lo nak ding ah fimkhur aw.
Midang in na parah ziangvek tluk in an lo tuahsiat khal asile ngaidam thei lonak, huatnak na sungah a khat asi ahcun cui huatnak le ngaidam thei lo nak kha Pathian Thalrau thawn um tlang thei lo mi asi ih na sung ihsin Pathian thlawsuah a luang suak thei lo ding. A lo huattu, na parah thilsual tuah tu, na ngaidam thei lo mi pawlin an lo tuahsiatnak hnak in na sungah a um mi huatnak le ngaidam thei lo nak in tamsawn a lo siatsuah ding. Na sung ih um huatnak na neh thei lai hlan lo, na kiangah satan in na huat ding a rak hruai ringring ding. Cuvek thotho in na parah thilsual tuah tu pawl na ngaidam thei lo asile na ngaidam thei lo dingmi na lungawi nak lo siatsuah tu an um ringring ding. Cutin Satan in sal ah alo tuah dingih Pathian kutcak na sunglam ihsin a lang thei lo ding, na sung tuk! Cu hnakin na raal, na parah thilsual tuah tu pawl hrangah thlacam aw la thlawsuah pe sawn aw. Cutin satan cu timualpho in a um dingih na hmui a ngil in na sung ihsin Pathian Thlarau malsawm a luang suak ding. Pathian in thil pakhatkhat tuah ding in fial tikah laksawng um loin a lak in in fial dah lo. Fimkhru aw: Huatnak in na thinlung a ciahneh laifang ah na huat mi thawn pehpar in ziang thu hman thuthluknak va tuah hlah. Na ruah ban lo thilsual na tuah pang ding.
6) Pathian um lo vekin khuaruat khua khan tikah: Leitlun milai pawl hin Pathian cu tisa mitin hmu thei hai sehla zohman in sualnak hi an tuah ngam lo ding. Midang an relse ngam lo ding, midang parah thilsual an tuah ngam lo ding. Asinan leitlun mi pawl cu thlarau mitcaw, an si tikah Pathian um lo vekin khua an ruat ih ziangkim an tuah. Cutikah Pathian duhlo zawng, sual khal an tuah nak asi. America ram hi Patian umlo ram (Godless society) ah a cang vivo. Cozah kumpi cu simlo, khawsung vengsung le insang thuthluknak nitin nun kaihruaitu ah Pathian a tel nawn lo. Zohman in a inn hnen nule pa um lai ah an fate an simsia, thangsia, relsia ngam dah lo, thuphan an puh dah lo. Cuvekin Pathian hmai ah ka um, ka tong ti thei hai sehla mi zohman in Pathian in amai hmuihmel kengin a sersiam mi le a duhdawt ih A Fapa nunnak in a tlen mi, a lei mi, a rundam mi, milai thuphan an puh in an thangsiat relsiat zuar thlai ngam lo ding. Pathian hmai, Pathian mithmuh ah ka um ti theihhngilh ve ten thinlung cun sualnak tuah dingin a lo bum thei asi ti ralrin a tha. Zumtu Patian fate pawl cun ziang kan tuah, kan tong tik khalah Pathian hmai ah um vekin kan tong, kan tuah dingmi asi.
Zesu in milian pa, Pathian um lo vekin khua a khangtu thu asim mi kan thei.
Mdiang siatnak relding thei tamtuk, rel tam tuk pawl hi Pathian theih taktak lo pawl an si theu. Pathian thawn thei taktak tu pawl, Isaiah, David, Paul, Peter, pawlin Pathian thianhlimnak eng an hmuh fiang tikah minung lamah an hmuh suak mi cu anmai sunglam ih sual mizia le sualnak pawl kha asi sawn. Cutin an kiangkap milai pawl sualnak an hmuh tikah Patian zangfah lainat duhdawtnak cu an sung ihsin a luangsuak sawn theu. Na khawruah, na tongkam, na tuahnak ah Pathian mithmuh, na kiangah Pathian um ringring vekin na nung maw? Cuvek thotho in na kiangah Pathian um ringring vekin na nung asile tihding phanding khal leiltun zianghman a um lo asi.
7) Duh-am nak in milai thinlung a luahkhat tikah: Diklo in ngah mi in milai a siatsuah. Gehazi in dik lo in Naaman hnen inhin a ngah tikah pharnat a neih phah. Ananias te nupa in an ngah mi lak ihsin an sup, thuphan an per tikah an nupa in an thih phah. Absolom in apa zuar thlai tahratin Israel siangpahrang a tuan nan a nunnak in a tuar phah. Lal nak, thuneihnak, sumpai lennak, dinhmun tha, ziangpohpoh kan ngah mi hi a dik loin kan ngah mi, midang mithli tla ter tahratin kan ngah mi pawl cu milai siatnak thlen tu asi ih a thianghlim mi Pathian thlawsuah dal tu sawn an si.
8) Porh awknak: C.S. Lewis in “Mi porh aw pawlin mi porh aw pawl an hua” ati. A dik zet nak lai a um. Ziangtin asi tile, mi porh aw hua tu pawlih porh awk nak cu “kei cu ka porh aw lo” an ti, mah le mah cu porh aw lo, mitha in an ruat awk nak te kha “mitha sinak” an porh awknak asi. Curuangah a porh aw tu khal, a huat tu khal an pahnih in mi porh aw aw an si. Bible in a simmi cu “Siatnak hmaiah porh awknak a ra” ti asi. Porh awknak cu tisa mizia sual ihsin a suak mi asi vekin Pathian Thlarau thawn um tlang thei lo an si. Pathian in a fih tuk mi asi. Curuangah, na kiangkap um, asilole a hlatpi ih um khal, mi thalo in na hmu, na thinlung sungah nangmah le nangmah cu thasawn in na ruat aw rero lai asile na porh aw zet asi thei. Cun mi relsiat thangsiat rerotu pawl khal khi mi porh aw an si ringring. Ziangtin tile, an relsiat thangsiatmi hnakin “kei cu ka tha cuang” an tinak asi. Na kiangkap cu cuvek na theih asile fimkhur aw. Porh awknak in a hrinsuak mi cu sual asi theu. Na sunglam tawdap kha cek fel aw la, Pathian Thalrau thawn a um tlang thei lo mi tisa mizia sual “porh awknak” a um asile Pathian hnenah kun in a thu sungah kholhfai na sinak ding hrangah thlacam aw.
9) Phunzai nak: Satan in Evi a bumnak cu Evi kha amai sinak tawk lungkim tawk loin Pathian in a retmi dinhmun sinak hnakih sangsawn tha sawn duhnak neithernak in asi. American social scientist pawlin an hliakhlai nak vekin an hmuhsuak mi cu mi zocio khalin a tu ih an sinak dinhmun hnakin sangsawn le thasawn si ding tlak an si tiah an ruat aw cio ti asi. Evi ih lungput cu mi zapi te lungsungah a cam lai tinak asi. Cui milai tisa lungput ihsin a suak theu mi cu phunzainak asi. Mai dinhmun, nupi pasal, hruaitu, pehtlaih mi, neihmi, theih mi parah lungkim tawk lo nak, a tu ih dinhmun hnakin thasawn beisei ringring in hawm thawh awknak, ihsin phunzai nak a suak theu.
Pathian fate pawl hi tuisun ih kan dinhmun hnak ih tha, mawi, le cak sinsin, si thei dingin zuamding, tumtah ding asi. Sihman sehla tuisun ah kan dinhmun, sinak, neihmi, pehtlaihnak ruangah Pathian ah kan lungawinak a hlo, kan vuivai, kan phunzai asile cucun sual ah mi a hruai thei. Cuhnak hmanin “mawhsiattu” ah kan cang asile Satan palai kan tuan rero tinak asi. Punzainak ruangah ni hleikhat sung khualtlawnnak cu Israel pawl in kum 40 sung nelrawn ramcarah an cam phah, harsatnak an tawn phah. Phunzainak ruangah na insang, na rualpi, kawhhran, khawsung, pawlkom, lakah Pathian thlawsuah lungawi sopar ten cen thei lo ding in hnaihnawknak a suapi thei. Mi tampi in a umcia dik lo nak le tlaksamnak sim thiam hi fim le uar dingah an ruat sual theu. A tu ih na dinhmun, sinak, neihmi, theihmi, ti thei mi, pehtlaih mi thawn thawk in Pathian in na damsung hrang tuanvo a lo pek mi tuan famkim theih asi ti pom in zum in nunpi ding na si. Phunzai nak in khualtlawnnak lam a titawi in lo ih lam ati sau sawn, phur a ti zang lo ih a tul lopi phurrit a suahpi sawn. Tuisun ah tu ih na lung a awi lo asile midang mawh asilo, nangmai mawh. Na lungawi ter dingin tuanvo nei tu cu nangmah na si. Leitlun ah na lungawi ter dingin tuanvo nei tu cu nangmah lawng na si. Nangmai lung hman na ti awi ter thei lo asile midang thatnak le lungawi ter ding na tumtah, na sim rero mi kha midang hrang phurrit na sisawn, midiang lungawinak siatsuah tu na si sawn ti na theih awk a tha. Nangmah in na neih lomi midang na pe thei lo; na neih lo mi midang pek dingin na kam rero mi kha mah le mah bum awknak men asi. Nangmai thinlung hman na uk thei lo ih midang uk na tum asile midang hnaihnok tu man na si.
Tisa caknak, thei si duhnak, iksinak, thei nei (lal) duhnak, huatnak, Pathian um lo vekin nun, duh-am nak, porh awknak, phunzai nak pawl hi nitin mi lai tampi nun siatsuah tu, thihnak thlenter tu, tap ter tu, lungawinak hloh ter tu, milai thianthu tuahsiattu satan hmanrua tha an si. Fimkhur aw!
|