|
NA PATHIAN CEN AW
Hminsin: “Cen” ti cu ‘nawmpi” mirang in “enjoy” , “lungawi diriam zetin nunpi, nawmpi” tinak asi.
Milai pakhat cu Khrih ah lungawi diriamnak nun a neih lai hlan lo, a thlarau in a hal duahdo mi Pathian a cen thiam lai hlanlo, leitlunah a hmunmi hnangam daihnak le nun diriamnak lungawinak ngaingai a nei dah lo ding, a tawng dah lo ding. Satan hnatuan pakhat cu zumtu pawl lungawinak siatsuah asi. Pathian fate pawl leitlun nun cu Khrih ah thlarau malsawm tinkim thawn thlawsuah pek mi kan si zo na’in Khrih ah Pathian thawn kan pehzawm awknak ah nuamnung cen thiam loin kan um theu nak, saltang vekin leitlun damsung kan hman theu nak pawl hi Pathian ah nun diriam lungawi nak cen hna kan thiam lo ruangah asi theu. Pathian fate pawlin Pathian hnenah thlawsuah dil rero tul nawn lo tlukin Khrih ah ziangkim thlarau mawlsawm tinkim pek mi kan si zo. Kan milai thinlung duhnakin kan thlarau mit a cawtter theu ruangah Khrih ah mangbangza ruahban lo thlawsuahnak pawl cu kan cen thiam lo theu asi. Zesu Khrih ah kan dinhmun hi ruat tha sal hnik aw! Lei le van ih thuneih nak hmuahhmuah cu Khrih kut ah pek asi zo, ziang tinkim cu Khrih sung ihsin Khrih hrangah sersiam mi an si, cun Khrih ah Pathian fate sinak pekzo mi zumtu pawl cu Pathian Thlarau in Pathian sinak huham cahnak thawn kan sungah in cencilh, in umpi, in kilveng, lam in hruai, fim in zirh, aw, ziangtluk mangbangza dinhmun ah saw Pathian in Zesu Khrih ah in ret? Zesu Khrih ah, Adam tluksiatnak ruangah, milai in kan hloh mi Pathian hmuihmel keng kan si nak pawl cu peksal kan si zo, Adam tluk siat hlan hnak ih tha dinhmun, Pathian fate dinhmun ah Pathian in Zesu Khrih in sersiamthar sal zo asi. Cui dinhmun cu a kumkhua in cen ding kan si. Cutin Pathian fate pawl cu Khrih ah Pathian thawn kan pehzawm awknak kan cen ih mangbangza lungawinak in kan nun a luahkhat tikah Pa Pathian kan cawimawi asi. Bawipa ah kan lungawinak cu kan cahnak asi.
Ziangruangah Pathian fate pawlin Khrih ah mangbangza kan lennak cu kan cen thiam lo, kan zoh tlang pei. Pathian fate pawl ziangruangah sal mithmai pu in leitlunah kan nung ringring? Ziangruangah Pathian cu kan Pa si na cingin farahfa, sal mithmai le sal lungput thawn mithmaisia in leitlunah kan nung hrih? Aw, Pathian in ihmuh ter mi le in centermi Khrih ah a sunglawi tuk mangbangza thlarau thlawsuah hi hi casiar tu zaten cen thei ve hai sehla ka va duh em! Pathian fate pawlin Pathian kan cen thei lonak, Khrih ah mangbangza lennak kan co mi, sal fate bangin kan nunnak thu tlangpi hrekkhat pawl zoh hnik uhsi:
1) Leitlun thil in thinlung a luah khat: Pathian fate kan si hnu ah kan lei tisa thinlung cun tisa duhzawng a duh ih nuam a ti lai thotho, cucu Pathian mizia thawn a kalh aw mi asi. Cutin kan thinlung in leitlun thilri, lennak, nuamnung cennak, porh awknak, hngal nak pawl a ngai in a duh ringring tikah Pathian Thlarau thawn a kalh aw ringring. Cutin Pathian fate zumtu pawl cu thlarau ah thanglian in lei tisa thinlung duhnak cu kan neh thei lai hlanlo, lei tisa thinlung duhnak le mizia cu nitin kross ah khengbet in Pathian Thlarau kan sungah a lal lai hlanah Pathian fate sinak dinhmun ih a sunlawizia, a thawtzia, thlumzia, nawmzia, kan tep in kan nawmpi in kan cen ngaingai thei lo asi. Leitlun thil in kan thinlung sung cu hmun a luahkhat tikah thlarau lam thu in hmun a nei nawn lo. Bawipai Thalrau Thianghlim cu kan sungah a nung, a ceng tikah Amah thawn um tlang thei lomi tisa mizia suangtuahnak sual, duh hiarnak, le caknak, tisa porh awknak le hngalnak pawl thawn kan sunglamah kan um tlang ter tikah Bawipai Thlarau cu a riah a sia ih kan nunah a phuang aw thei lo asi. Cutikah kan milai sinak cu thabang in, hal mi, ngai mi nei ringring, nun diriam thei loin nelrawm ramcar um vekin kan thlarau in Pathian a ngai theu, zukneng in sihti a ngai bangin kan nun in Bawipa a ngai theu asi. Curuangah voi tampi zumtu Pathian fate pawl nunah harsatnak hi hmanrua ah cangin leitlun thil dungtun ter tu dingah hman asi ih Pathian lamah thinlung her aw dingin Pathian in a fale nun a sim theu asi. Bawipa in “Ka fa, na thinlung ipe aw” a ti vekin kan thinlung sungah a sunglawi bik, hmun kaubik, tha bik hi Bawipa in a luah duh asi. Cui hmun cu kan luahter lai hlanlo, Pathian fate pawlin Bawipa thatnak, thawtnak, sunlawi zia kan tep in nitin nunah kan nawmpi ngaingai thei lo nak asi. Cutikah mi tampi Pathian fate pawlin leitlun lennak, fimthiamnak, le hminthatnak an ngah, motor thatha an nei, inn thatha an nei nan an innpi cu hellram vek, an motor cu siatsuahtu, an neih sumpai cu thin bang ter tu ah an cang theu. Na thinlung sungah hmunkau bik, thabik, sunglawi bik luahtu Bawipa si aw sehla, na nun in Bawipai thatzia na tep ngah ding. Leitlun lennak, mawinak, thatnak, cawimawi awknak, sunlawih awknak hnakin Bawipa cu a thaw sawn ih a thlum sawn, leitlun nuamnung cennak in a pek thei mi nawmnak hnakin Bawipa cu a thianghlim in nun diriamter tu sawn asi. Bawipai Thalrau Thianghlim cu lenglam biak inn ah siseh khawsung ah siseh kawhhran pawlkom ah siseh zumnak thuzirhnak ah siseh a um lo, kan thinlung sungah a um asi. Cen aw la, nawmpi aw.
2) Lungput dik lo: Pathian fa kan si ve ten Pathian lam ahcun kan dinhmun a thleng aw zo. Satan fa ihsin Pathian fa kan si zo. Asinan lei tisa in kan thuam aw lai ih kan thinlungput, khaw ruahdan, pomdan, hmuhdan, duhdan, ngaihdan pawl hi nitin thleng rero lai mi, tuaithar ringring mi an si ih Khrih hmuihmel keng sinsin dingin nitin kumkhua nunnak sung lut dingin timtuah mi kan si. Vanram kan thlen tikah, Khrih thawn hmaitawn in kan tawn awk tik lawngah famkim nun kan nei lai ding. Cutikah amai duhmi cu kan duh dingih nuam a timi cu nuam kan ti ding, a huat mi cu hua in a lungawi zawngah kan lung a awi ve ding. Kan leitlun nun sungah Pathian hnen ihsin ziang ka ngah ding ti si sawn loin Khrih le a Thuthangtha hrangah ziangha ka sung ve ding, ti zoh sawn ding kan si lai ah kan leitlun thinlung cun milai tisa khawruah nak in nuam a timi tisa duhzawng ruat in Pathian hnen ihsin malsawm dawn ding lawng a ruat theu, minung lam tumtah nak in Pathian hrangah thiltha tuah ding a ruat theu. Pathian in a fale pawl lungawinak cu leitlun thil le ri, milai porh tlakhantuan, le neihnunnak, lei thlawsuah ah si loin amah ah lungawi ding in duh mi asi. Pathian in kan neih sumsaw le pawnlang mawinak thawinak a duh mi asi lo, kan thinlung sungah nuam zet in pawlkom awknak neih a duh mi asi. Tui ni ah nitin nun tlaskam ruangah siseh thil le ri, sumpai tlaksam ruangah siseh leitlun duhthusam hlawhsam ruangah lungawi loin a umtu Pathian fate pawl cu an thinlungput khawruahdan thleng tul mi an si ti thei aw aw in Pathian ah lungawi hmaisa ding an si. Mit in hmuh theih mi le leitlun sinak leitlun in a sunlawih mi pawl sinak mawinak le thatnak parah hngat aw nawn lo in vancungah kan hmin ngan in a umnak, lei le van sersiamtu Pathian in Amai insang sungtel, a fahniang ah in pom zo nak, Thlarau Thianghlim ih in cencilhnak, pawlkomnak sawnah lungawi sopar in nitin Pathian hmaika cu cen in nung ding kan si sawn. Cutin kan sungah in cencilh tu Pathian Thlarau Thianghlim uknak hnuai ah nitin thlang leng ih nitin Amai hmaika ah lungawi sopar ten, tisa lamah kan tlaksam zet lai can khalah leitlun in inpek thei lomi lungawi hnangam daihnak thawn Pathian cu cen ding kan si, cuticun Bawipa ah kan lungawinak cu kan cahnak asi ih cuticun Bawipa ah kan lungawinak ah ti-cak kan sivekin rinsan tlak Pathian fahniang kan sinak cu leitlun ah langter ding kan si. Cuticun leitlun thil le ri ah siloin Amah Pathian ah kan thinlung cu a hngat aw hnu ah, Amah lawngah kan lung a awi ih leitlun thil le ri pawl cu hmanrua men an si zia thei in a thupi sawn Amah thawn kan pehzawm awknak ah lungawi ringring thei tu kan si hmai sa ding mi asi. Zumtu Pathian fate pawl cu Khrih ah mangbangza thlarau thlawsuah famkim pek zo mi kan si, cucu cen ding lawng kan si, dil bet hman atul nawn lo, kan thlarau mit cu vang sinsin ih Khrih ah kan dinhmun le thlawsuah cen thiam dingin Bawipa hnenah kan tisa thinlung cu kaang ral theh dingin hlan aw sawn ding kan si. Na lungawinak cu Bawipa ah si loin a thlawsuah ngai in na tap lai asi ahcun Bawipa in nun a lo sim ding, Amah ah na lungawi nak hngat aw aw la, cutin Amah thawn pawlkomnak hnget khoh na neih hnu ahcun ziangkim na tul mi pawl cu na lei damsungah Bawipa in nangmah hmang in tuansuak a duh mi tuansuak thei dingin hmanrua sumpai dinhmun le lei thlawsuah a tul zat cu a tul can ah a tulnak hmunah Khrih ah pekcia na sizia a lang in na cen thiam vivo sawn ding mi asi. Mi zokhalin Pathian hnenah pakhatkhat a dil ih a ngah lo asi ahcun Pathian thawn an duhdan a bang aw lo asi ti thei aw mei sehla a duhdan kha Pathian dudhan thawn bang aw dingin thleng sawn sheh. Leitlun thilri le sinak ngai in na thinlung a tap lai maw, na thin a bang lai maw, na thazang a cau maw? na lungput kha thleng aw la Bawipa ah na duhnak, hiarnak,lungawinak, caknak pawl kha hngat theh aw. Na tisa lungput kha nangmah le nangmah thleng awk thei nak na nei lo, na nunnak, taktak thinlung thlarau, pehtlaih mi le neih mi hmuahhmuah a zaten Amah Pathian Thalrau kaihhruai nak hnuai ah up aw aw la, cuticun na thinlung lungto vekin a hak mi, Pathian tenzet mi leitlun hmuh dan le duhdan vekin khua a ruat le a duh ringring tu thinlung kha, amai duhzawng duh dingin, le nuama tizawng nuam ti dingin thinlungthar a lo pek ding asi. Bawipai Thalrau Thianghlim umpi nak ah lungawi hna thiam loin Pathian ah lungawi hna thiam loin leitlun thalwsuah Pathian hnenah a dil rero tu cu zo hnenah ziang ka dil rero ti a thei aw lo tu asi. Na lungput kha thleng hmaisa aw! Cuticun Pathian duhmi na duh dingih Pathian in tha a timi tha ti in nuam a timi nuam na ti ding. Cuticun ziangkim na dil mi cu na ngah ding. Pathian Amah rori kha cen hmaisa aw.
3) Sualnak Pathian fate, piangthar kan si ve ten Bible in a ngan mi thalrau mi sinak famkim kan nei theh lohli lo. Theihnak khalah a famkim loin kan theih vekin nun khalah famkim loin kan nung. Theihnak famkim lo ruangah siseh theih mi nunpi thei lo ruangah siseh zumtu Pathian fate pawlin Khrih ah kan dinhmun sunglawi tuk Pathian fate sinak taktak kan cen thei lo asi. Pathian fate kan si hnu khalah lei tisa ih kan um hrih ruangah kan thinlung le khawruah ah Khrih ih duhzawng duh in nuam ati zawng nuam ti in a huat zawng hua ding kan si. Asinan Pathian huatzawng, duh lozawng, a ten tukmi sualnak pawl kha kan lei tisa thinlung le taksa khawruahnak cun a duh ih a hiar ringring lai. Cuticun nitin nunah Pathian mizia thawn a kalh aw mi mizia, lungput, nuntu khawsak thawn kan tlangleng ringring lai ruangah Khrih ah a sunglawi hleice Pathian fate kan sinak kan cen thiam lo asi.
Thuthimnakah: Dik loin ngahmi: Dik lo nak, sual thuhruk, le Pathian Thlarau an um tlang thei lo. Sualnak a umnak hmunah Pathian Thalrau cangvaihnak a dal. Mai duhhrilnak in thuphan thawn dik lo zetin ngah mi in lungawinak a thlenter mi hnakin Pathian fate pawlin Khrih ah an lungawinak an ngah dingmi cen thei loin an sun mi a tamsawn deldel asi. Dik loin ngah mi sumpai, tisa nuamnung, lalnak, canpualtha, sinak pawl hi Pathian fate pawl lungawinak siatsuah tu an si. Dik lo zetin midang parah siatnak tuah tahratin, huatnak le thuphan zuar thlai awknak thawn ngah mi lalnak, dinhmuntha, canpual tha pawlin Pathian fate a tuahtha lo, a siatsuah sawn asi. Dik loin ngah mi thil le ri rukcawp ei le in sum le pai thawn leitlunah nun hnakin Pathian hnenah cawlh huahhi Pathian fate hrangah a tha sawn. Pathian fate pawlin hi leitlun nun hnakin a thansawn, a famkim mi le kumkhua daih inn nuam kan nei asi. Leitlun nun cu rei lote Bawipai tuanvo pekmi tuan dingin nung kan si. Bawipa in hnatuan in fial mi tuansuak dingin satan hnen ihsin dik loin ngah mi sumpai, lennak, tisa lungawinak, nawmnak pawl cu Bawipa in a fih tuk mi asi. Cutin dik loin ngah mi pohpoh in Pathian fate pawl lungawinak a siatsuah ih thlarau hardamnak a siatsuah sawn asi. Mi pakhatin leitlun pumpi nei hman sehla a Lalpa ah a lungawinak a hloh ahcun ziangsaw a thathnemnak? Cuticun tiklo in ngah mi sumpai lennak, dinhmun, lalnak, thuneihnak, fimthiamnak, le canpualtha pawl cun rei lo te tisalungawinak a suahpi nan a tha sawn mi le a kumkhua a hmunmi Khrih ah lungawinak cu zumtu leitlun nunaha siatsuah sawn asi.
Ngaidam thei lo, thincin
America ramih nunau thusim hminthang pakhat cu a nauhak lai te ihsin kum 18 a kim tiang apa in a pawngsual, a ihpi ringring. A thinna tuk tikah an in ihsin a tlan suak. Neta ah Pathian in a ko ih Pathian thu sim ah a cang. Apa cu a ngaidam ih amah rori in tihnimnak a pek, a thih tikah a phum. Zumtu Pathian fate ti aw pawl tampi cu ngaidam thei lonak lungput an neih ruangah anmah le anmah thei aw loin an thlarau cu canser nathrik in a ei siat mi vekin an cawr, an ngawr, an thang thei lo ih Pathian ah lungawi diriamnak nun nei loin an leitlun nun ah ikfik fialfialin zoh harsa za in an nung. Bawi Zesu Khrih ih thupek mi ah midang ngaidam ding a tel, ziangtluk an sual, voi ziangzat an sual khal asile kan ngaidam lo asile a ngaidam lotu ih mawh asi. Pathian thulung lo kan si. Pathian in thil pakhatkhat tuah in fial tikah laksawng kamcia mi a um. Cutin na parah mawhnak nei tu, thinna ko a lo tuahtu, na lungawinak siatsuahtu na ngaidam tikah a lo siatsuah mi lungawinak hnakih tam, thasawn lungawinak Bawipa in a lo pe ding asi. Curualrual in Bawipa in thil pakhatkhat tuahding in fial tikah a thu lunglo asile hremnak a tel ve. Curuangah “pakhat le pakhat ngaidam aw tawn uh” a ti tikah a ngaidam lotu pawl cu hrem an si ve ih cui hremnak cu lungawinak hloh asi theu. Nang le kai, satan fate, hellram tla ding, Pathian mizia thawn raal aw mi, sual bawrhhlawh hman Pathian in Khrih ah in ngaidam zo asi ahcun kan parah mawhnak nei tu cu ngaidam hrimhrim ding kan si. Pathian cu duhdawtnak asi vekin Khrih Thalrau a cotu hmuahhmuah Pathian ih duhdawtnak mizia cu an sungah a nung asi. Cutin ziangtluk na duhdawt timi cu ziangtluk na ngaidam thei timi in tah (cuaithlai) asi theu. Pathian kan duhdawtnak cu a thupek kan thlunnak in langter ding kan si. Cutin a thupek kan thlunnak in kan sungah A Thlarau Thianghlim khal a cangvai ih kan tisa mizia cu thihter in Pathian mizia cu kan sungah a nung theu sawn asi. Cuticun leitlun vanram, Pathian thawn pawlkom awkknak cu kan cen thei sawn asi.
Ka dik asi; thlarau porh awknak
Mi pakhatkhat, zirhtu, pastor, kawhhran upa, maw kawhhran sungtel, pakhatkhat in ‘kei cu mawh ka nei lo, ka famkim asi” ati asile amah le amah a thei aw lo ih thuphan a per asi. Mi tampi tluksiatnak tihnung zet, satan bumnak pakhat cu Farasi pawl thilnu (cawlh) asi. Cucu thlarau lam porh awknak, kei cu ka dik, midang hnakin ka tha cuang, kan kawhhran cu kan dik, kan kawhhran zirhnak cu a thianghlim cuang, tvp, thlarau lam porh awknak asi. Bible sung kan zoh asile Pathian thawn tawng aw tu taktak pawl nun ah kan hmuh thei mi cu Pathian thawn an tawn awk tikah, Pathian thianhlimnak an hmuh fiang tikah an sim theu mi cu, “Aw, kei cu hmur thianghlim lo ka si” Isaiah, “Aw, ka nui pumsung ihsin misual ka si” David, “Aw, misual khawnbawl, mi sual lakah a sual bik ka si” Paul, “Aw, Bawipa, misual ka si itlansan aw”, Peter.” Curuangah mi zokhal a kiangkap unau pawl hnakin thasawn, thianghlim sawn vekin a thei aw aw ih a porh aw rero asi ahcun a hmuh mi a zoh mi cu Khrih Zesu Pathian siloin amai biaknak, Farsasi pawl biaknak vek asi tinak asi. Cucu tihnung ngaingai asi. Farsasi pawl cun anmah ah nunnak ngaingai an nei lo, hnagam daihnak ngaindai an nei lo, Pathian Thlarau Thianghlim an co ve lo, cutin anmah in an neih lomi cu midang an pe thei lo, pek ding an nei lo. Tuisun ah thlarau lam porh awknak in na sungah midang mawhnak, tlamtlin lonak a lang sawn maw, nangmai mawhnak na hmuh suak tikah Bawipa Pathian ih zangfah lainat duddawtnak a maksakzia na hmu suak dingih lungawithu sim loin na um thei lo ding. Na kaingkap ah tlaksamnak a neitu pawl khal Pathian ah lungawinak sangbik an co ve thei nak dingah na thinlung sung cu Pa Pathian ih duhdawtnak in a luahkhat dingih Pathian duhdawt zangfah lainatnak cu na sung ihsin a tulsam tu pawl hnenah a luangliam sawn ding asi. Cutin midang mawhsiatnak le midang hnakin ka tha deuh tinak, thlarau porh awknak sual, farasi nathrik a hlo sawn ding asi. Hihi cin ringring a tha, “Satan” ticu “Mawhsiatu” tinak asi, ih midang mawhsiat rero tu pawl cu satan rian rero an si.
Tui na dinhmun cekci ihsin Pathian in lei le van sersiamtu Pathian insang sungtel, Fapa ih sunlawinak ro ttawnpi tu dingah a lo tuah, a lo co hlang zo nak thutak cun na nun sunglam a lo luahkhat, a lo fangsuak zo asi ahcun cui lungawiank cu ziangtluk maksak asizia na hmu fiang ding. Hi leitlun milai porh awknak, pawlkom nak, sihcih awknak pawl ihsin asuak mi porh awknak pawl a hlo sawn ding. Milai in biaknak lam hnatuan ruangah porh awknak a hlo theh sawn ding. Khrih ih kross siar lo porh awknak ding zianghman na thinlugn sugnah a lang lo ding. Cui lungawinak cu sankhuk in kan cen dingmi asi ih leitlun harsatnak le tlaksamnak, leitlun nawmnak le sinak porh awknak, relsiat thangsiat nak dodalnak pawl cu zianghmanah na rel lo ding, ek thluk hmanah na neih lo ding. Mi in an lo relsiat thangsiat asile na lungawi sawn aw, na sinak vek ciah in an lo relsiat asile rem awk ding na nei ti a fiangih rem aw lohli aw. Na sinak lo pi in mi in an lo thangsiat asile na lungawi sawn aw, midang tampi cu an sinak vek ciah in relsiat an si lai ah nang cu na sinak lo pi thuphan an lo puh ahcun lungawi sawn ding na si, na siatnak rel ding an thei lo ih a lo huatu pawlin thuphan phuahcawp le anmai ruahnak men in an lo purring ih an lo huat ruangah an lo relsiat rero ruangah zianghman na sun ding a um lo, a dik loin an lo relsiat asile anmah te an tawka an hlip aw rero men asi sawn. Pathian in a hrem hai leh ding. Tuah danglam theih nawn lo mi dunglam thuanthu cu hmanrua ah hmangin a lo relsia thangsiat rero tu pawl kha mitsir hmanin zoh duh hlah, na thinlung sugnah hmun fate hman pe hrimhrim hlah. Kha pawl cu dunglam thuanthu ah an porh aw rero ih dunglam thuanthu ah an tang lai, hmailam ah ruahsan ding an neih lo ruangah asi sawn, zangfakza te an si. Cuhnakin Khrih ah na co mi mangbangza lungawinak cu ziangtin na hlawm ve hai ding ti cantha zoh sawn aw. Cui lungawinak cun a lo ticak dingih tisa ah na tlaksam lai, dodal relsiat thangsiat tu lakah siseh, leitlun mi pawlin zianghman ah an lo rel lo, an lo thangsiat, zuar thlai le dung an lo tun lai ah siseh na lungsung lungawinak in na nun a luahkhat sawn ding asi. Cui lungawinak cu leitlun ihsin sankhuk tiang Pathian fate pawl in kan cen dingmi, van mi hman in an cen ve thei lomi mangbangza lungawinak asi.
4) Na lungawi tertu tuanvo neitu cu nangmah na si Na lungawinak ding hrang a tulmi ziangkim cu Zesu Khrih ah famkim zetin pek na si zo ruangah na lungawi tertu ding tuanvo nei tu cu nangmah lawng na si. Na lung a awi lo asile nangmai mawh, na nupi, na pasal, na kawhhran upa, pastor, midang mawhsiat hlah! Nangmai mawh liolio asi! Leitlun milai pawl lakah nangmah lungawiter dingin Pathian in zohman tuanvo a pe lo. Ziangah tile Amah ah na lugnawinak si ding sawn asi. Lamzin kap ah to in pakan sia te thawn kutdawh rero tu hnenah American dollar milion khat (1 million) pe aw la a lungawi lo asile zo ih mawh asi ding? Lamzin kap ih to kutdawh pa in American dollar million khat laksawng a co mi hnakin nang le kei in Khrih Zesu ah kan co mi rundamnak cu a sunglawi sawn deldel asi. Tili kiangah kum 38 sungah damnak hngak in a it rero tu, kum 12 sung tiput nu in damnak duh ah Zesu a pan tikah, mitcaw pa in “David fapa, in bawm aw” tiah damnak duh ah damnak an hmu. Cu pawlin an hmuh mi damnak laksawng hnakin nang le kei hellram tla dingmi in Zesu Khrih ah vanram ah Pathian fahniang sinak kan co mi cu a let thawngza siar dingin a sunglawi sawn deldel asi. Na lung a awi lo asile, nangmai mawh asi. Zohman mawhsiat ding na nei lo. Na laksawng comi kha laksak tlak na sinan, Pathian zangfah lainatnak in a lo ngaidam fangfang asi thei men.
Milai pakhat cio cu Khrih ah Pathian thawn kan pehzawm awknak ah, Thlarau Thianghlim pawlkomnak ah lungawi diriam ringring ding, Pathian hnenah lungawithu sim, lungawi aipuang ringring dingmi kan si. Mi pakhat lungawiter dingin midang zohman in tuanvo an nei lo, Pathian in tuanvo zohman a pe lo. Mi pakhat cu a lung a awi lo asile amai mawh liolio Pathian ka zum, Khrih ah kumkhua nunnak ka nei, ka piangthar ti nacing in lungawi lo na hmuh asile, “Ning hman zak lo, na co mi laksawng kha zoh sal aw” ti tlak asi. Midang sualnak ruangah siseh amai tlamtlin lo nak ruangah siseh harsatnak, duhthusam famkim lo, tlaksiatnak, ziang ruang khalah milai pakhat cu a lung a awi lo asile amai mawh liolio asi. Ziangah tile milai lungawinak cu Khrih ah Pathian thawn pehzawm awknak, lei le van sersiamtu ih “Fahniang” sinak ah lungawi diriam ding mi kan si. Ziangah tile, milai tlaksamnak ih siatsuah thei lomi, soisel tu, relse tu, zuarthlaitu pawl, satan le a ho pawl ih siatsuah theih lo, ruk sak theih lo lungawinak cu Khrih ah pek kan si zo. Leitlun in a pek thei lo mi le ruksak thei lo mi lungawinak cu Khrih ah pek kan si zo. Thildang ziangkim cu hmanrua men an si. Cutin, Pathian in mi zapi hnenah Khrih ah rumdannak a lak in in pek ih Pathian insang sungtel sinak in pek cio vekin cui kan mai phulo sinak mangbangza Pathian thlawsuah parah lungawi ringring ding kan si ih leitlun ih thilcang mi, midang tuah nak khalin cui lungawinak cu a siatsuah thei lo mi asi. Khrih ah kan comi rundamnak sungah leitlun in a ruksak thei lomi a pek thei lomi lungawinak sangbik a um asi. Cucu na cen thiam lole na sung lak. Pathian fate pawl lungawi hnangam daihnak cu leitlun in a pek thei lomi le a laksak thei lo mi asi, cucu Zesu in “Kei in daihnak ka lo pek mi cu leitlun in a lo pek mi vek asi lo” atimi cu asi. Curuangah na lungawi lo asile midang mawhsiat ding na nei lo, nangmai mawh liolio asi. Na awm cum aw la vantau in thlacam aw. Ziangah tile leitlun lennak in a lei thei lomi Pathian insang sungtel sinak, rundamnak cu Khrih ah a lak in pek na si ih Khrih ah thlarau lam thlawsuah famkim cu pekcih na si. Cui manngbangza Pathian zangfah lainat duhdawtnak cu hi lei damsung ihsin sankhuk tiang cen ding, nawmpi ding kan si. Na Pathian cu sankhuk in cen aw.
Ka tawn mi a har tuk na ti men thei. Pathian zumtu taktak pawl cu meipi sungah, kiosa kaa ang hemhem hmaiah, rul tur nei in a cuk tikah, lungto in den an si tikah vanlam an zoh ih Pathian an thangthat ih Khrih ruangah tuar tlak an si cu lungawi thu an sim sawn asi. Leitlun ih dodal mi si cu pakhat asi ih dodalnak ruangah lungawinak hloh cu thildang asi. Leitlun in a lo ti rethei in a lo tuahsiat thei, asinan na lungawinak a lo ruksak thei lo, nangmah in na hlohter hlan lo. Sankhuk in na Pathian cen aw, na lungawi aw la, Bawipa ah na cahnak cu hmun camcin hram sheh! Cui lungawinak cun na hmel ah na nun ah eng a langter asi. Thinheng hmel cu a thim ih ikfiknak le sualnak in a luahkhatmi mithmai cu thimnak in a khat asi. Thimlak ahcun satan a relh ringring fawn.
Netnak:
Pathian fate pakhat in “hnatuan ka nei lo” ti ih tomen timi hi thilcang thei asilo, Bible a neih cun Bible siar ding hnatuan duh um bik a nei ih a mit a meng thei ih a sia tha theihnak a fimvar can poh ahcun Pathian thawn biak awknak, pawlkom awknak hi hnatuan duh um, can hmannak sunglawi bik asi. Curuangah Pathian fate, Thalrau Thianghlim ih kaihhruai mi mize, lungleng riahsia le um ngaihnak thei lo, hawr-heng, zuva-nun tivek in a nungmi an um thei lo.
Voi tampi cu mi tampi in Khrih hnakin leitlun biaknak pawlkom hmin, zirhnak (doctrine) an ngai pawimawh sawn ih an porh awknak le pek awknak cu biaknak pawlkom thurin le hmin pawl hrangah a rak si sawn theu. Cutikah, an nitin nun ahun Khrih ih zirhmi thu thlun loin zumlo tu pawl nun hnakih a sualsawn mi an nunpi theu. Cutin Pathian ah lungawi diriamnak siseh Pathian hmuihmel keng Pathian fate zumtu dang pawl duhdawtnak ah siseh an tlasam ringring ih leitlunah an duhzawng, an thlarau diriamnak biaknak cangvaihnak, hla le thu, zirhnak cu an nun in a hal ringring. Pathian fate, zumtu taktak pawlin khui tawk kawhhran, ziangvek dinhmun, zovek milai thawn um tlang tik khalah kan lungawinak bik cu Amah Pathian ah asi. Bawipai Thalrau cu thawng inn sungah siseh sal tannnak in ahsiseh raal pawl in in hual ih kan relh nak lungpuk sungah siseh hnatuan bang in anhai can ah siseh a um ringring asi. Bawipa thatzia le thawtzia tep ngahtu pawl hrang ahcun leitlun milai pawl in Pathian tel loin an ngaisan mi le sunlawih mi pawl cu zianghman ah an siar lo, ek tluk hmanah an ruat nawn lo asi.
Pathian fate pawl leitlun nunah Thlarau Thianghlim ih kaihhruai le ukmi nun in nun tikah ziangvek dinhmun le dodal nak, riahsiat tlak zet lak khalah lungawi sopar ten Pathian thangthat ih “halleluiah” tiah lungawithu sim in Pathian ih hmaika cen ding kan si. Daniel le rualpi pawl cu anmah ur nak ding meisa a hliau deuhdeuh asile an za an bawng sang deuhdeuh ih an kut an thlir sang deuhdeuh, Paul cu thawng inn sungah taang in a leitlun nun cu a tawpnak a nai cuahco thlang ti a theih tikah Philipian khua zumtu unau pawl hnenah “Nan lungawi uh, ka nolh sal ding, nan lungawi uh” tiah lungawi dingin midang thape tu asi. Khrih ah Pathian thawn pehzawm awknak a neitu, Pathian fate pawl hrangah leitlun nun hi rei lote khualtlawnnak hmun asi. Fapa sunlawinak tawmpi tu ding kan si vekin leitlun ah rei lo te Khrih ih hnatuan tuan sunzawm in harsatnak le tlaksamnak tuar dingin ruat kan si tikah, tisa thinlung ih duhthusam le nuam timi a famkim lo tikah Bawipa ah lungawi sinsin ding kan si, Pathian fate kan sinak, ziangtik lai khalah Thlarau Thianghlim ih pawlkom nak, Pathian hmaika cu cen ding kan si. Pathian cu khui hmun khalah a um asi. Cutin Pathian cen thiam tu pawl leitlun nunah kan tawn mi ziangkim, kan pehtlai mi ziangkim hi nuamcung cen in a thianghlim mi lungawinak in cen tahratin Pa hnenah sunlawihnak pe ding kan si. Leitlunah kan tuah mi thildang hmuahmuah a cem ding, rawngbawlnak, thawinak, thlacamnak, tvp, asinan Pathian cen in Amah thangthat le sunlawih ding cu sankhuk in kan tuah ding mi asi. Pathian cen thiamtu pawl cun vanram cu hi lei damsung ihsin an hmang thok zo asi. Cuticun Pathian ih mangbangza zangfah lainat duhdawtnak cen tu pawlin Pathian ih sersiam mi ziangkim cu Pathian ih sersiam san vekin an hamngin an cen thiam asi, anmah thawn a pehtlaih mi milai, thilleri, sumpai, canpual, neih thinglung pawl khal Pathian thu vekin Pathian tumtah vekin Pathian in a sersiam san vekin an cen in an nunpi sawn asi. Cuticun leitlun vanram cu hi lei damsung ihsin an cen thawk sawn asi.
Hminsin: Hi thu hi America ram ihsin ngan mi asi kherkher hi a poi ka ti zet. Paul bangin hnawn mi le thawng inn sung ihsin leitlun nun suahsan zawngah ngan mi sisehla hmual a nei sawn ding nan tiah ka milai thinlung cun a ruat. Asinan, Pathian Thlarau in hmanrua ah a hmang asi ahcun a ngantu sawn ruat loin a sungih “Bawipa ah lungawinak thutak” sawn in casiartu thinlung sungah a takin hmual nei hramseh tiah thlazam cam phah in. Ka theihhnilh lo ih copy ka nei lai asile leitlun ka suahsan zawngah keimah thawn a pehtlai mi pawl hnenah ka kuat sal leh ding. Ca na rak siar ruangah ka lungawi, Khrih ah thlarau lam thlawsuah famkim cu nunpi cen aw. Cucu sankhuk in kan nunpi dingmi a tu leitlun nun ihsin zumtu pawlin kan nun thawk zo mi asi.
|