Tulai santhar ruahnak, modernism, post midernism ruahnak pawl cun “Thutak a um lo” , thutak timi cu dinhmun zir in a thleng aw vivo mi asi an ti. Zesu Khrih cu lamzin umsun asi tiah zumnak, tlangau pi nak cu lamzin bi tuk, hmuhnak bi, midang zawi awi thei lo (intolerance) asi an ti. Leitlun pumhuap biaknak zapi lungrualnak, pawlkom awknak cangvaihnak a cak sinsin. Evangelical zumtu ti aw pawl lak hmanah same sex couple (nu/nu, pa/pa) sualnak pawl an pom vivo ih USA ih Episcopal pawl cun Gay Bishop tiang an bishop (pastor) ah zapi theih ah an pom zo. Leitlun miphun dang pawl lawng an silo, Laimi kawhhran lak khalah Bible Pathian thawkkhum, sual thei lo asinak, Bible sungah Pathian thilmak tuah mi pawl pom lo tu an tampi zo, piantharnak a lar tlukin pianthar hnu ah sualtuah a poi lo ti tu, rundamnak cu milai tuahnak tel lo Pathian laksawng asi ruangah sualnak tuah mi in rundamnak a hnaihnok lo (dualism ihsin a suakmi ruahnak), lei tisa in tuah mi in thlarau hrang a hnaihnok lo, tvp, zirh sualnak leitlun pumah a karhzai sinsin. Laimi Khrihfa ti aw pawl lakah kan pipu rirai biak lai hnak hman in diknak le dingfelnak in hmun a nei lo sinsin. Khrih Dungthluntu pawl rak dinpi mi le phuansuah mi zumnak cu kumzabi 21^st zumtu ti aw pawlin hla pi ah an tlansan zo. Cuvek santiluang in kan leitlun milai thuanthu cu a fen rero laiah nang khui ah na umih khui lamzin na zawh? Na zumnak in harsatnak na tawn tikah, na lungawi riahsiat tikah a hnin thei lomi hnangam daihnak a lo pe maw? Midang na pehtlaihnak, thil le ri na sumsaw dinhmun le canpual tha pawl na hman nakah Zesu Khrih in hmun a nei maw? Na umnak kawhhran in Pathian Fapa Zesu Khrih a cawimawi maw, Bible cu hmanrua ah hmang tahratin milai cawimawi awknak, pehtlaih polkom fangfang asi maw? Na nitin nunah Pathian Thlarau in na sunglam nun lo kaihruai in siatha theihnak sung muril ah thu a lo sim maw, thuthluknak (decision) na tuah tinten na Pathian na rawn maw, na Pathian aw na thei maw?

 

A tawizawngin Bible thurin, thuhram tobul ah a hngat aw mi, kawhhran ziangtin kan theithei ding zohhnik uhsi:

 

1)    Phuan awknak: Zesu Khrih cu rundamnak lamzin umsun, Pathian Fapa asi, Pathian le milai karlakah remnak tuahtu, a thluse zo mi milai cu Pathian thawn rem awknak tuah in kumkhua nunnak sungah um ding, thutak phuansuah nak;

2)    Thlarau Thianghlim kaihhruai mi kawhhran: Thlarau Thianghlim cu zumtu pawl zirhtu, kaihruaitu, cawmtu, humhimtu, … asivek, Thlarau Thianghlim kaihhruai, uknak hnuai ah a nung, a cangvai, Pathian bia le rian zumtu Pathian fale cawmdawltu kawhhran;

3)    Bible thurin, thutak zirhnak: Bible cu Pathian thawkkhum, a sual thei lo, Adam cithlah milai pawl cu mai tuahnak in Pathian tilungawi ter thei nawn lo, Pathian zangfahnak ih rundamnak laksawng, rundammi pawl nunthianhlim zirhnak, Khrih thihnak le thawhsalnak, Khrih ratsalnak,  Bible thurin zirhnak;

4)    Thuthangtha karhzainak: Zesu Khrih ih thupek vekin zumtu pawl, kawhhran cun zum lotu pawl hnenah thuthangtha karhzai ternak ding hrangah rawngbawlnak;

5)    Sacrement: Baptisma, Bawipa zanriah, tvp hmannakl

6)    Satan ral donak: Zesu Khrih taksa peng asimi kawhhran cu satan in a do ih leitlun ah kawhhran a um sungah Satan ral do asi;

7)    Nunsim awknak: Bible thurin vekin zumtu unau pawl, Pathian tihzahnak in nun sim awknak, cuticun zumtu zocio khal Krih ih taksa peng ti buangbar tu, Satan hmanrua, Pathian Thlarau hnatuannak daltu si lo dingin nun mawi lole sual tuahnak pawl, satan kethlaknak pawl kham le nunsim, kawk, thianhlimter awknak, pawl um hrimhrim ding asi.

 

 

Na umnak ah a tlunlam ih simmi pawl hi a um maw, na nunah na nunpi maw, santhar milai pawl kan san hi san khirhkhan, san neta ah a nung mi kan si. Nitin te sualnak in leitlun milai santiluang cu thimlakah a fen rero asi. Nang, khui lamzin ah fen na si ve?

 

Khrih tel lo in leitlun milai nun hi nun tlak asilo, milai sersiam tu in a sersiam san, duhsan, tumtah siar lo, leitlun ah milai tumtah damsan tlak zianghman a um lo. Ziangah tile milai tumtah, damsan, pawl cu a tawpah zianghman lo asi. Na nunnak cu na kutsungah a um lo, na kaitang thei lo vekin na kutsungah a um lomi kha tlansan in na hloh thei nawn lomi kumkhua nunnak sungah tuhlut aw aw, up aw sawn aw. Cutin ziangkim a sersiamtu, a nunnak a lo siatsuah sak tu par khalah thuneitu Pathian in a kumkhua in na nunnak a lo humhim sak ding asi.

 

Cutin thutak sungah nung aw la, thutak sungah duhdaw aw, thutak sungah pehtlai aw la, thutak sungah tuan aw. Ziangah tile zianghmuahhmuah cu an hloral cing dingih Khrih ih Thutak lawng a kumkhua in a hmun ding. Cutin Thutak sungah a nungtu pawl lawng a kumkhua in an hmun ding. Thildang hmuahhmuah cu meiro vek, rei lo te mithmuh theih in an um hnu ah a kumkhua hloral ta ding an si.

 

Na to mi lawngpi a him maw? Laimi pawl kan farah, kan zawzai, zawmtaihmi kan si, neih mi kan nei lo, kan canpual mi in in lonsak, kan tlasam tiah kan ruat aw pang maw? Zesu Khrih na nei asi ahcun ziangkim neitu na sungah a um ih a tulmi ziangkim cu a tul can tikah a tulnak hmunah a lo pe thei asi! Ziangkim neitu si hnak in ziangkim neitu (Zesu) nei tu si a thatsawn zia na tep hrih maw? Ziangkim neitu, sersiamtu, uktu, cawmtu Zesu Khrih na nei ih amai tumtahnak duhnak le khawkhan mi sungah na nung, a lamzin parah na feh ih na dinhmun na thei fiang taktak ahcun laimi hi leitlun ah miliam bik kan si lo, leitlun milian bik neitu Pathian ih hnatuanpi kan sizia na hmu fiang ding. Cutin, leitlun santiluang in leitlun milai thuanthu su sual thim sungah a fen rero lai ah Lai miphun pawl leitlun ENG si in kan umnak hmun kip ah Eng ding kan si sawn. Tisa ah farah zet vekin kan lang lai ah leitlun lennak in a lei thei lomi sankhuk daih hlawnthil mankhung cu a lak in pek mi kan si ih cui rothil mankung neitu kan sinak cu nunpi cio uhsi.