|
1049168063
MILAI LUNGAWINAK HRAMPI Matthew 5:2–12 The Beatitudes: Thlawruah lungawinak famkim
Satan tumtah pakhat cu zumtu pawl nitin lungawinak siatsuah asi. Pathian hnatuan pakhat cu cui satan hmanrua pawl cu zumtu pawl hlawknak thlawsuah ah canter asi. Pathian fate pawl lungawi thlawsuahnak hrampi ziang asi ti zoh hnik uhsi.
Pathian in a Fapa neihsun a pek mi parah lungawi lotu pa/nu lungawiter dingin Pathian in laksawng dang a neih ding ka ruat ban lo.
Thuhmaihruai: Isreal mi pawlin thlawsuah lungawinak tiah an rak ruah mi le an rak porh awknak pawl: Biaknak: danthlunnak in m I fel sinak, biak nak ah dinhmuntha, tuanvo tumpi neih nak pawl a rak si. Pathian hril mi miphun an sinak, pawnlang sakhua biaknak, asi ih an rak hngak bikmi cu Messiah in Israel miphun cu Rome cozah hnen ihsin luatter tahratin (Political freedom) leitlun ah miphun cungcuang si ding asi. Cutin Samaritan, le Zentel pawl cu vuico thlukah an rak ruat ih anmah le anmah cu miphun thianghlim, Pathian minung ah an rak ruat aw aw.
Santhar minung pawl lungawinak le thlawsuah tiah an ruat mi: Materialism: Lennak, fimthiamnak, hminthatnak, larnak, upat mi sinak, milai lawmnak, cawimawinak, nuamnung cennak, biaknak lamah pawlkomnak, sakhua cangvaihnak, zumnak thurin thatha le hruaitu hmin larlar thluntu sinak, leitlun milai pawlkom nak le hnatuansang kai, tvp, asi.
Satan hmanrua: Satan in leitlun mi pawl thinlung sungah Pathian ah an lungawinak a siatsuah dan cihnih: A pakhatnak ahcun, tuarnak in: Taksa natnak, hrilsel lonak, dunglam hmailam thuanthu, kiangkap milai pawl hnaihnok nak a phunphun, harsatnak a phunphun, lungawinak siatsuahtu, hnaihnoktu hmanrua thawn, milailungawinak cu siatsuah asi theu. A pahnihnak ahcun, mi tampi cu an tisa thinlung duhmi thawn bum an si, tisa thinlung duhmi pek an si tikah Pathian ah an lungawinak hngat aw nawn loin leitlun thilah an lungawi tawk theu, ih a tawpnak an thlen tikah khua a tla tuk theu.
Kan umnak cio ah bulpak, kawhhran le pawlkom lungawinak ziang asi? Mit hmuh theih thil le ri, sinak, dinhmun le milai pawlkom milai porh awknak ah a hngat aw mi asi maw?
Zesu Khrih in lungaiwnak thu a simmi: leitlun mi in thlawsuah le lungawinak an timi thawn a linglet lellel: · Pawnglang, mithmuh theih ah asi lo, · Milai sinak diktak dinhmun theih awk fiangnak in thutak ah hmuh suak awknak in a thawk, · SUnglam nun, lungput, nunhrampi, milai damsan, Khrih ah kan dinhmun, Pathian insangah kan dinhmun, a hnim thei lomi dinhmun sawn ah asi. · Thlarau mi farah, ninghang lungsia, lungnem, dingnak cu tihaal le rilrawng vekin a haal in haal ttiatianak, mi zangfah thiamtu, thinlung thiang, remnak tuahtu, Pathian duhnak ruangah hremnak tuartu, Khrih ruangah tuartu, harsatnak hniksaknak tuartu pawl cu mi thlawsuak le lungawi an si. Ruattha hnik aw: #Pathian in a Fapa neihsun a pek mi parah lungawi lotu pa/nu lungawiter dingin Pathian in laksawng a neih ding ka ruat ban lo. # Na lungawinak ding hrangah nangmah lawngin ttuanvo na nei. # Satan tumtah mi cu Pathian ah na lungawinak siatsuah ding asi. # Bawipa ah kan lungawinak cu kan cahnak asi.
Zesu in lungawi thlawsuah mi sinak zoh hnik uhsi:
I. 3 “Thlarau ah ka farah ti a thei tu cu mi thlawsuak (Blessed) an si, vancung uknak cu an ta asi ding.” THlarau ah farah cu zovek saw a si?
Isaiah in “…..Ka cem a si! Ka ruahsan ding zianghman a um nawn lo. Ka hmur ihsin a suak mi ṭongkam hmuahhmuah cu a sualmi ṭongkam a si ṭheh; misual lakah ka um ih hmurka thianglo lakah ka leeng” (Isa 6:5). Paul in, “Mi lungrethei ka va si so! Thihnak lamzin a pantu hih taksa pum ihsi hin zoso i runsuak ding” “Khrih Jesuh cu misual pawl rundamsuak dingah leilung ah a rung ṭum, timi hi a dikmi ṭong a si ih famkim zetin pom tlak le zum tlak a si. Cuih misual pawl lakah kei hi misual bik ka si.” ( I Tim. 1:15).
Paul hi Zesu in a kawh hlanah, Farasi mi thianghlim a rak si, mai felnak le tuahttatnak ah a porh aw rero ih kawhhran rakhremtu asi. Farai le danthiam pawl cu anmai leiltun biaknak le zirhnak ah an puar thau rero lai fangah Zesu in ‘thlarau ah mi farahpawl cu mi thlawsuak le lungawi an sizia thu a sim tikah an ruahsan mi le porh awknak cu zianghman lo a rak sizia a lang theh. Pathian hmaiah taklawng, milai sualnak in milai dinhmun a siatsuah zo ruangah Pathian hmaiah zianghman sim ding nei nawn lo, kan thatnak bik khal puanse hnophnawl vek kan si zo.Sungmuril ah porh awknak a nei nawn lotu, Pathian hmai ah mai thatnak rel ding thei lo tu, Pathian thianhlimzia hmu zo tu, leitlun ah unau dang hnak in mai thatnak relding nei lotu, Pathian zangfah lainatnak loin vanram kai theinak ding nei nawn lotu, Pathian duhdawt zangfah lainatnak ringring in nitun a nungtu cu mi thlawsuak asi.
“vancung uknak cu an ta asi ding”. Vancung uknak hi leitlun sumpai in lei theih sisehla, leitlun milian pawl hi leitlunah hmuh ding an um nawn loih an neih sumsaw in an lei dingih vanram ah in fehsan theh zo ding. cutluk ih a sunglawi mi vancung uknak cu thinlung sung muril, thlarau ah a farah zet tu pawl hrangah Pathian in a lakin Khrih Zesu ah in pek asi.
II. 4 “Ninghang lungsia pawl cu mi tlawsuak an si, hnem in an um ding.” “Cancer natnak na nei na thi cing ding” tiah an simmi pa pakhat cu a nini in a siat rupro ih thlaruk sung a dam lai ding tiah doctor pawlin an timi asinan rei lo te ah a thi hlohli an ti.
Leitlun minung pawl hi na thlarau cu sankhuk in hellram ah hremhmun ah a thi ding asi tiah sim rero mi an si nan ziangruangah an tiih cuangloih an phang cuang lo? “Mit an nei ih an mitin an zoh nan an hmu cuanglo, hna an thei nan an theithei lo” asi. Sunglam thlarau nunak nei zotu, thutak a thei zo tu, Pathian Thalrau in a hrinthar zomi, sersiamthar zomi pawl sungmuril ah milai dinhmun cu fiangzetin an hmuhsuak awk tikah ninghang lungsia in an khat ih milai dinhmun siatzia, vokrual thah dingin sakhung lam pan in khawr mi vekin, hellram pan in satan in a rual pi in a khawr rero mi an theihfiang tikah ninghang lungsia in an um asi. Cui dinhmun hmu fiang aw tu pawl cu Pathian hmaiah lungsia lung kekkuai in an ra asi. Cutin Pathian ih zangfah lainatnak cun Khrih ah kumkhua nunnak a pek hai asi. Pathian in a hnem kai ih an santlaih lonak, an sualman cu a peksak ih a bawrhlawh mi tisa mizia pawl cu nitin kholhfai sak an si. Cuitikah milai thlarau cu ziangtluk thlawsuah mi le lungawi sopar saw asi? Cui lungawinak in a luahkhat zomi milai thinlung cu leitlun mithmuh theih thil zianghman in a hnin thei nawn lo. A kumkhua daih, zianghman in a hnin thei lomi lungawinakin milai sungmuril, thlarau ah a khatter asi.
Fapa tlanhlo cu a kutsungah zianghman a um nawn lo, vokrawl ei ding hman a neih nawn lo tikah nunghang lungsia in vok inn kiangah a ding cuahco vekin milai dinhmun cu Pathian tel lo cun riahsiatza a rak asi. Cui dinhmun ka thleng zo asi ti a thei aw tu, Pai hnenah a kirsal tu pawl cu Pa in kumkhua nunnak a pek hai ihlungawi puai pi a tuahsak asi. Cui lungawinak cun zumtu sunglam nun a luahkhat tikah leitlun harsatnak le buainak in a hnaihnok thei nawn lo asi.
III. 5 “Lungnem pawl cu mi thlawsuak an si, Pathian in a kamcia mi an co ding.” Fapa tlanhlo cu a dinhmun a hmuh fiang awk tikah ka pai hnenah ka kir sal dingih fapa dinhmun cu ka phu nawn lo ruangah a siahhlawh dinhmun talah in pom hram dingin ka dil ding tiah a ti. A thinlung sungah porh awknak a um nawn lo. Ka pa hnen ihsin zianghman ka phu, le ka tlak mi a um nawn lo asi ti a thei aw aw. Cuvek in Pathian hmaiah mai dinhmun a thei fiang aw tu pawl, Pathian thianhlim zia le ropit maksakzia hmufiang tu pawl tangdor lo an um lo. Tangdor ten nitin Pathian thawn fehtlang ding cu Pathian in alotheihlo in in phutmi asi (Mikha 6:8). Tangdornak um loin Pathian thawn fehtlang theih asilo. Porh awknak le Pathian an um tlang thei lo. Cutin thinlung tangdornak thawn nitin Pathian thawn a fehtlang tu pawl cu Pathian ih a kamcia mi cotu an si. Moses cu mi tangdor bik asi. Cutin, “..Na palnak ram hmuahmuh cu na ta asi ding” (Dan 11:240 tiah kamcia vekin vancungram cu kan ta asi lawng hman siloin leitlun damsung lala khalah siseh zumtu pawl kan palnak ram hmuahhmuah cu Pathian in inpek vivo asi. “3Kan Bawipa Jesuh Khrih ih Pa le a Pathian cu thangṭhat si koseh! Ziangah tile Khrih thawn kan pehzom awknak thawngin kan thlarau hrang van thlawsuahnak a phunphun kan hnenah in pe.
“Kan Bawipa Jesuh Khrih ih Pa le a Pathian cu thangṭhat si koseh! Ziangah tile Khrih thawn kan pehzom awknak thawngin kan thlarau hrang van thlawsuahnak a phunphun (ziangkim) kan hnenah in pe.” (Eph. 1:3). “A sunlawinak le a ṭhatnak co ve dingah in kotu Khrih kan theihnak ruangin Pathian ṭihzahnak thawn kan nun theinak dingah kan ṭulmi hmuahhmuah cu Pathian ih cahnak huham in in pe zo. Cutiin in tiamkam ciami a tum le a sunglawimi laksawng cu in pek ih cuih laksawng ruangah in siatsuah theitu leilung tisa hiarnak ihsin nan luat thei ding ih Pathian a sinakah khan nan ṭawm aw thei ve ding.” ( II Pet. 1:3,4).
Abraham hnenah kamcia mi ziangkim in pek lawng siloin “Pathian mizia ttawmpitu” ah in tuah ih kan sung ah Pathian mizia a nung ih Pai duhdawtnak cu a luangliam sawn asi.
“Sikhalsehla ka pek dingmi tidai a intu cu a ti a haal nawn lo ding. Ka pek dingmi tidai cu amah sungah cirhti ah a cang ding ih cumi cun nunnak tidai le kumkhua nunnak a pe ding,” tiah a ti (Jon 4:13).
“Thungaite in ka lo sim: sal cu a bawipa hnakin a tum sawn lo; tirhthlahmi khal thlahtu hnakin a tum sawn dah lo” (John 13:16).
IV. 6 “Dingnak hrang rilrawng tihaal vekin a haal tu cu mi thlawsuak an si, diriamter an si ding.” Mino te pakhat cu cancer natnak na nei asi, tiah ansim tikah a neih sumsaw hmuahhmuah khal a zuar ih damnak hrangah si a leivekin milai thlarau dinhmun a hmuh fiang aw tu taktak pawl cun sungmuril ah Pathian ih dingnak cu tihal le rilrawng vekin a haal asi.
Jacob cu a nunah thuphan per nak in a sungmuril nunak cu a ei ih amai sualnak in thlarau cu sal vekin a ciahneh tikah cui sualnak ih phurrit ihsin talsuak thei dingin Pathian a buan ih “thlawsuah ipek aw, culole ka thiding ti in Pathian a buan vekin mai dinhmun hmufiang tu pawl cu Pathian ih dingnak cu leitlun thil hmuahhmuah hnak khalin an duh in an haal sawn asi. Cutikah milai tuahfelnak ihsin asillomi Khrih ih dingnak cu kan dingnak ah pomsak kan si tikah milai sungmuril cu a di a riamih ziangtik hmanah a ti a haal nawn lo asi. “Ka pek dingmi tidai a intu cu a ti a haal nawn lo ding” ( Johne 4:13). Na ti a haal lai maw? Na ti a haal dah lo asile na thlarau athi asi ding! Na ti a haal lai asile Khrih Zesu hnenah feh aw! A kumkhua in na ti a haal sal nawn lo ding. “Atu cu Khrih Jesuh thawn a pehzom awmi hrangah cun sual thuṭhennak in an luat zo” (Rome 8:1). Khrih Zesu ah nunnak a nei zo tu pawl parah mawhsiat thei tu, thuthen thei tu, lei le van karlakah sersiam mi zianghman a um lo. Khrih ah Pa Pathian in miding mithianghlim ah in pom zo.
V. 7 “Mi zanfahthiamtu pawl cu mi thlawsuak an si, Pathian in a zangfah ve ding.” Luke 10: 30- 37, “Cutikah Jesuh in, “Voikhat ah mi pakhat cu Jerusalem ihsin Jerikho ah a vung feh. Cutiih a feh laiah suamhmang pawl in an kai ih a hnipuan an hliit hnuah thizikte in an thawi ih an tlansan. 31Culai ah puithiam pakhat cu cuih lamzin ah a vung feh ngelcel; a sinain cupa a hmuh tikah khatlam kam in a hrial ih a fehsan. 32Cuvek ṭhiamṭhiam in Levi mi pakhat khal a va feh ve ih mina pa cu a hei zohhliahta ih khatlam kapin a hrial ih a fehsan ve. 33Asinain Samaria mi pakhat cu cutawk lamzin ah khual a tlawng ve ih cuih mina pa hnen a thleng ih a hmuh tikah a zaangfah ngaingai. 34A hei fuuk ih a hma cu siti le Sabitti a hnih ih ṭhatein a tuam sak. Cule a hruaimi rannung parah toter in khualbuk ah a fehpi ih cunah ṭhatein a tuamhlawm. 35A thaisun ah ngun tangka fanghnih a suah ih riahbuk kiltupa cu a pek ih, ‘Hi pa hi ṭhatein run tuamhlawm awla hi lam ih ka ra kir sal tikah hi pa na zohnak hrangih na cemmi hmuahhmuah cu ka lo ruul sal thluh ding,’ a ti,” tiah a sim. 36Cuih hnuah Jesuh in, “Suamhmang ih an kaih mipa ih innhnen cu himi pathum lakah hin zo hi so a si, tiah na ruat?” tiah a sut. 37Daan zirhtu saya in, “Amah a zaangfahtu pa hi a si,” tiah a let. Jesuh in, “Feh awla cubangtuk in va tuah ve aw,” tiah a ti.”
Luke 25: 34-36; 41-43); 34Cule Siangpahrang cun a vorhlamih a ummi pawl hnenah ‘Ra uh, ka Pa ih a thlawsuahmi pawl! Ra uhla leilung seemtir ihsin nan hrangih rem ciami vancung Uknak hi ra co uh. 35Ziangah tile ka riil a rawn tikah ei ding rawl in pek; ka ti a haal tikah in ding tidai in pek; mikhual ka si laiah nan inn ah in tlunter; 36hnipuan nei lo ka si tikah hnipuan in pek; ka nat laiah in tuamhlawm; thawng ka tlak laiah in veh,’ tiah a ti ding. ………….41“Cule a kehlam ih a ummi pawl hnenah cun ‘Nannih Pathian ih camsiatmi pawl, ka hnen in tlanhlo uh. Satan le a dungthlun pawl hrangih ngaihtuahmi a mit dah lomi meisa sungah vung feh uh. 42Ziangah tile ka riil a rawng nain rawl in pe lo; ka ti a hal nain in ding tidai in pe lo; 43mikhual ka si laiah nan inn ah in tlungter lo; hnipuan nei lo ka si laiah hnipuan in pe lo; ka naa ih thawng ka tlak laiah in tuamhlawm lo,’ tiah a ti ding.
Mi tampi in leitlun biaknak vekin khrihfa sinak a hmangtu pawlin Biak inn sungah ziang kan tuah timi parah hngat aw aw in Pathian in thu in tthen lai ding tiah an ruat. Cutin siloin kan nitin nun, inn, khawsung, hnatuannak, le lamzin parah siseh nitin nun par sawnah zo kan si, Pathian fate maw, satan fate kan si timi a fiangter sawn ih Pathian in cui kan nun parah thu in then sawn dingmi a si. Cui kan nun, kan tuahnak ruangah vanram kai ding si loin vanram kai ding, Pathian fate pawl cu biak inn sungah ziang an tuah timi siloin khawsung, insang, lamzin par, le nitin nunah Pathian fate an sinak cu an sung ihsin Pathian mizia a langmi, Pathian duhmi an tuahnak in a lang asi.
Mi zangfah thiam lotu, midang mawhnak ngaidam thei lo tu thu thawn pehpar in a hnuailam vekin Bawi Zesu in a im fawn, Mathai 18: 28- 34; 28“Cule cupa cu a feh ih amah leiba malte a rak baaktu a hawipi hnen-um pa pakhat a tong. Cupa cu a kai ih a hngawng in a deek ih, ‘I baakmi i pe aw,’ tiah a ti. 29Cuih hnen-um pa cu a bok ih, ‘I zaangfah awla i hngak hrih hram aw. Ka lo kuan ko ding,’ tiah a dil ciamco. 30Asinain a ngaidam duh lo. A leiba a kuan ṭheh hlan lo thawngah a thlak. 31Cumi cu hnen-um dang pawl in an hmuh tikah an thin a nuam lo ngaingai ih siangpahrang hnenah an feh ih cuih thuhla cu an va sim ṭheh. 32Cutikah siangpahrang in cuih hnen-um pa cu a ko ih, ‘Nang sal ṭha lo. I dil ciamco ruangah i baakmi hmuahhmuah ka lo olh a si. 33Na parih zaangfahnak ka neih vekin na hawipi parah zaangfahnak nei ve ding mawi na si,’ tiah a ti. 34Siangpahrang cu a thin a heng ngaingai ih cupa cu a leiba zate ih a sam ṭheh hlan lo thawngah a thlak,” a ti.
“Midang mawhnak kan ngaidam bangin kanmai mawhnak in ngaidam ve aw” ti ah thla kan cam bangin le kan kiangkap ah a tlasam mi pawl parah kanmah sung ihsin Pathian a phuansuah awknak hrangah leitlun ah a nung hrih mi kan asi. Midang mawhnak ngaidamnak in siseh Pathian in a pek mi midang hrangah a hlawkpi tu ding pawl hrangah a hmang suak aw tu siseh mi thlawsuak an si.
VI. I. 8 “Thinlung a thiangmi pawl cu mi tlawsuak an si, Pathian an tawng ding.. Leitlun mi pawlin thlawsuah le lungawinak tiah an ruah mi pawlihi an thinlung a uk lo mi pawl cu mi lungawi le thlawsuak an si: Lennak, fimthiamnak, hminthatnak, larnak, upat mi sinak, milai lawmnak, cawimawinak, nuamnung cennak, biaknak lamah pawlkomnak, sakhua cangvaihnak, zumnak thurin thatha le hruaitu hmin larlar thluntu sinak, leitlun milai pawlkom nak le hnatuansang kai, tvp, asi. Mit in a cak mi, thinlung in a hiar mi pawlin a thinlung a uk lomi, Pathian duhnak le tumtah mi le Pathian thu sawn in a thinlung a luahkhat, a ukmi cu mi thlawsuak le lungawi asi.
“Ka fapa, na thinlung ipe aw le na mitin ka lamzin zawh aw” Thuf. 23:26” (My son, give me your heart and let your eyes keep to my ways).
I John 2:15-17; 15Hi leilung le a sungih thilri hi tlaihsan hlah uh; hi leilung hi nan tlaihsan a sile Pathian duhdawtnak nan nei lo a si. 16Leilung ta a si mi thil hmuahhmuah: sualnak tisa in a hiar mi, milai in an hmuhmi le an duhmi thil, minung in hmaihngal porh awknak ih an ruahmi thil hmuahhmuah hi pakhatte hman Pa hnen ihsin a rami an si lo. A zatein leilung ihsin a rami an si ṭheh. 17Leilung le a sungih a ummi thilri, milai ih an tlaihsanmi pawl hi an hloral vivo zo; a sinain Pathian duhnak a tuahtu cu kumkhua in a nung ding.
Heb.12:14; “Mi hmuahhmuah thawn rualremte in um zuam uhla nunnak thiangin nun tum uh, ziangah tile nunnak thiang neih locun zohman in Pathian an hmu thei lo ding.”
Pathian in a thinlung a thianter mi cu mi thlawsuak le lungawi an si.
VI. 9 “Remnak tuahtu cu mi thlawsuak an si, Pathian fate tiah kawh an si ding..
II Kor 5:18, “Hi hmuahhmuah hi Pathian ih tuahmi an si ṭheh; a ral a si mi kannih cu Khrih thawngin Amah thawn in remter zo ih midang khal Amah thawn remter dingah ṭuanvo in pek.”
Pathian le milai karlakah remnak a suahpi tu ding hrangah Pathian in ttuanvo a pek mi pawl cu mi thlawsuak an va si so! Hna a tuan suak tu cu amah Pathian lala asi fawn.
”Ziangah tile amah ih tumtahmi duh dingah le nan tuahsuak dingah Pathian cu nan sungah hna a ṭuan a si. (Phi. 2:13). “Curuangah nanmah sungih hnaṭuan ṭha a thoktu Pathian in Khrih Jesuh ih Ni a ra thlen tikah cumicu a ṭuansuak ding tiah ka thei fiang (Phi.1:6).
“Bawipa in, “Hriamnam cahnak le na thazaang cahnak in si loin ka thlarau in na hlawhtling ding” ( Zekhariah 4;6).
“Curuangah kannih cu Khrih palai kan si. Pathian amah rori kanmah sungin thu a sim vek khin thu kan sim. Khrih ih hmin in kan lo sawm: Pathian thawn rem-aw uhla a ral sinak in a rualpi ah cang hram uh” 9 II Kor 5:20).
Pathian fate pawl leitlun hnatuan cu Pathian le milai rem awknak tua asi. Cutin Pathian thawn rem awk tikah Pathian Thlarau cu kan sungah a lal ih kan sung ihsin hna a tuan tikah kiangkap zumtu unau pawl thawn khal rem awknak remdaihnak a suak asi. Cutin leitlun in a haal tukmi tinung cu kan sung ihsin a luansuak thei nak asi fawn.
VII. 10 “Pathian duhnak tuah ruangih hremnak a tuartu pawl cu mi thluasuak an si; Ziangah tile vancung Uknak cu anmah ih ta a si. “Keimah ruangah mikip in an lo hua ding” (Mathai 10:22). “Nannih hi leilung in a lo hua a si ahcun keimah i hua hmaisa zo ti kha cing ringring uh. Leilung ih ta si uh cila leilung hin ka ta tiah a lo duhzet hai ding. Sikhalsehla leilung ihsin ka lo hriil zo ih a ta nan si nawn lo; curuangah leilung in a lo huatnak cu a si.” John 15: 18-19). “ U le nau pawl, nan hnenah hniksak harsatnak a phunphun a thlen tikah mi vannei kan si tiah ruat aw uh; 3ziangah tile nan zumnak in cubangtuk hniksak harsatnak nan neh tikah tuar theinak a ra, ti nan thei……..v.12, Hniksak harsatnak a tuar ih hngette ih a ding theitu cu mi thlawsuak a si. Ziangah tile cubangtuk hniksaknak a neh thei ruangah Pathian in amah a duhdawtu pawl hrangih a tiam ciami nunnak sui lukhuh a ngah ding (James 1:2-3,12).” Leitlun ih rualpitha si hnak cun Khrih dungthlun in leitlunih raal si a tha sawn.
“Ziangtinkim ahhin Pathian cun amah a duhdawtu le amah ih tumtahmi vekih a kawhmi hrangah cun an ṭhatnak ah hna a ṭuan a si, ti kan thei. 29Pathian in a hriil ciami pawl cu a Fapa hmuihmel keng dingah a thiadang cia hai; cuti cun unau tampi lakah a Fapa cu upa bik a sinak dgah a si (Rom 8:28-20).” Ziangkim leitlun ah kan hmuh tawn mi pawl cu A Fapa kan bang sinsin nak ding hrangah le Fapa sunlawihnak ttawmpitu kan si theinak ding hrangah leitlunah ttuanvo in pek mi pawl ttuansuak thei dingin Pathian in kan hrangah thatnakah a canter theh asi.
VIII. 11 “11“Keimah ih dungthluntu nan si ruangah mi in an lo hmuhsuam, an lo hrem ih thuphan a phunphun an lo puh tikah mi thluasuak nan si. 12Nan lungawi in nan aipuang uh, ziangah tile nan hrangah tuarman tampi vancung ah ret a si. Nan hlanih profet pawl khal cu bangtuk in hrem an tuar zo. · Khrih dungthluntu pawl tuar ding hrimhrim:
Leitlunah na tisa duhmi na ngah lo asile na lungawi sawn aw. Pathian uknakle felnak sawn cu hawl hmaisa aw la ziangkim a lo pek bet sawn ding asi. Cucu Zesu ih thukam asi. Tuisunah na thlacam ngah lo kan um maw? Pathian hnenah dil mi ngah lo kan um maw? Um asile na dil mi kha “zianghmuahhmuah” sungah a tel lo tinak asi. Na thlacam mi kha na tisa duhnakhrang ah thla na rak cam rero asi thei. Cutin siloin na theih thiam lo mi siseh na theih mi siseh na tisa duhlo zawng na tawng rero asile, leitlun in raal vekin a lo hua, a lo dodal asile na lungawi sawn aw.
“16, Cat loin nan lungawi uh; 17thlacam ringring uh. 18Ziangvek dinhmun khalah lungawi thu sim uh. Cucu Khrih Jesuh ah Pathian ih a lo duhsakmi a si.” (I The. 5:16-18). |