A KEKKUAI MI THINLUNG RAITHAWI NAK

 

April 18, 2010: Falam Christhian Church of Indianapolis (FCCI) ah simmi sermon.

 

Online sermon video: http://vimeo.com/11028877

 

Psalm 51:17: “Maw Pathian, ka lo pekmi thawinak cu, A kekkuaimi thinlung a si.

A kekkuaimi le sualsir thinlung cu na hnong lo ding.”

I John 1:9;  “Sikhalsehla Pathian hnenah kan sualnak kan phuan ahcun zumtlak le a dingmi a si ruangah kan sualnak in ngaidam ding ih kan mawhnak hmuahhmuah a thiangfaiter ding.”

 

Thlarua nun ka pitling vivo vekin Pathian siahhlawh pawlin an rak tawn mi thinlung kekkuainak hi ziangvek asi ti ka tep vivo. Cutikah Pathian thatnak hi ka hrangah a sunglawi sinsin. Milai mithmuh ah sakhua mitha, pianpi thinlung tha, ziaza, biaknak cangvaihnak, raithawinak pawl lawng hi Pathian in a duhtawk mi asilozia ka hmu fiang vivo. David siangpahrang cu a nauhak lai ihsin Pathian hriakthih, pathian tihzahtu, thinsau asinak khal Sual a ngaidam thei zia ah kan hmu thei. Sihman sehla sualnak ah a tluksiat hnu ih a thinlung kuai mi hin a tluksiat hlan ih a rak hmuh suak dah lo mi, amai sual mizia le Pathian ngaidamnak tiang a hmu suak. Cuvekin zumtu, Pathian fate pawl hi Pathian kan nun ihsin a phuansuak awknak ding hrangah siseh Thlarau Thianghlin kan sungah hmun a luah theinak ding hrangah siseh kan tisa thinlung hi kekkuai sawm theh hi a rak tul asi. A tluse zo mi, a bal, bawrhhlawh, ten-um tuk zomi milai thinlung cu Pathian in ziangtin a thianfai ih a cohlan tlak, thinlungthar ziangtin kan sungah a sersiam theu ti tawiten zoh hnik uhsi.

 

Sam 51 nak siar theh hmai sa aw. David siangpahrang a thinlung a kuai tikah a hmuhsuak hmaisami cu na hmu ding.

 

I). Mai sunglam sual mizia hmuh awk suak nak:

David siangpahrang in “Ka nui pumsung ihsin misual ka si” (c.5) ati. Mi nupi (Bethsheba) a sualpi hnu lawng ah misual asilo ih sual mizia a sungah a nung ruangah cui sual mizia ih a rahsuak mi asizia thu a sim. Cutikah naute buciap, a nui pumsung ih a um lai ihsin misual, Pathian tentuk mi sual mizia a sungah a um ti a hmu fiang awk tikah thinlung kekkuai in a tap ih Pathian hnenah thla a cam.

 

David vekin midang Pathian siahhlawh pawlin Pathian an tawn tikah anmai sunglamah sual mizia cu an hmu fiang aw aw ih Pathian hmai ah kuun in thla an cam theu sawn asi.

Isaiah cun “hmur thianghlim lo, a kaa sungihsin tongkam suak hmuahhmuah a thianghlim lomi” a sizia a thei aw aw. Peter khalin “Misual ka si Bawipa, i-tlan san aw” a ti. Mi zokhal, Pathian tawng tu takak pawlin anmai sunglam pianpi mizia cu sual mizia asizia an hmu suak aw aw asi. Paul khalin “A hih a thimi taksa ihsin zo saw irun suak thei ding” ti ah a tap suak ruangro. Pathian thianhlimzia an hmuh tikah anmai sunglam sual mizia cu sual bawrhhlawh, Pathian ten tuk mi a sizia an thei aw. Cun Paulin “Misual khawnbawl ka si” ti khal in amai thu cu a sim. Hi leitlun milai mizia sual hi kan piangthar hnu khalah kan sungah a um ringring lai hrih asi. Cucu nitin khross parah khenbet tahratin Khrih dungthlun tu kan si. Cui sual mizia cun kan umnak hmunkip ah intlun ih ziangkim kan tuahnak, kan khawruah, tongkam le lungput pawl cu sual hring suak dingin kan sungah a cangvai ve ringring asi.

Na sunglam ih sual mizia, Pahtian ten tuk mi, Pathian thawn a um tlang thei lomi kha na hmu aw fiang zo maw? Na hmuhsuak hrih lo asile na thinlung kekkuai hrih lo tinak asi thei. Na hmuhsuak asi ahcun cui sual mizia, Pathian dodal tu in, thihnak lamzin ah a lo hruai rero asi ti na hmuh fiang asi ahcun, na sunglam ih sual mizia sal ah na nung nawn lo ding. Sual sual mizia sal ihsin luatnak umsun cu Khrih lawngah asi. Khai na sung le ka sungih a um mi sual mizia, sual hring suaktu, Adam ihsin kan comi sual ruangah a tlak mi hremnak cu kumkhua hremhmun sung tlaknak, thihnak asi. Cui thihnak ai ah Pathian Fapa, Zesu Khrih in in pek sak ih Khros parah a thihnak asi. Amen. Pathian a tawngih lei tisa thinlung kekkuai zo tu pawl cun sual sual mizia cu fiangtuk in an hmu thiam zo ih sualsal ah nung nawn loin Khrih ah zalennak an co zo asi.

    

  

II) Sual tuah mi cu Pathian dokalh ih tuah asi zia hmuh suak nak

David in “Na parah, na par hrimhrim ah ka sual; na mithmuh ah thiltha lo ka tuah zo” (Sam 51:4) a ti. Pathian Thlarau in an sunglam nun a luahkhat ih Pathian thianhlimnak eng in an sunglam a kap eng mi pawl, thlarau mitvang zo pawlin anmai sunglam ih sual cu an hmuh awk lawng si loin sual tuah cu Pathian dodal asizia khal an hmu. Ziangvek sualnak khal sisehla ziangtik canah ziangvek dinhmun khalah, zovek milai parah tuah mi khal sisehla sualnak pohpoh cu Pathian dodal ih tuahmi asizia thinlung kekkuai in Pathian tawngtu pawl cun an thei suak asi. Anmai sual ruangah Pathian Fapa thihnak a tuar phah mi an hmuh fiang tikah sualnak cu Pathian dodal asizia an thei. Cuticun sualsal sungah an nung nawn lo. Sual le sualnak an hua.

 

Curuangah David in “Na parah, na par hrimhrim ah ka sual; na mithmuh ah thiltha lo ka tuah zo asi” ati. Mi nupi a sualpi mi khal kha Pathian parah sualnak a tuah mi asi ti a thei aw aw. Joseph in himi a rak theihfiang tuk tikah Pontifar nupi in sual dingin a thlem tikah “Pathian dodal in ziangtin cuvek sualnak ka tuah thei ding” a ti. Annanias te nupa in an sumngah mi an thuhruk tikah Pathian siahhlawh hmaiah thuphan an per tikah “Pathian Thlarau bumtum” an si. Sualnak pohpoh cu Pathian dodalnak asi. Tongdang in sim asile ziangvek tuahnak khal Pathian cawimawi lo tu pohpoh cu Pathian dodal tu asi.  

 

Pathian zumtu ulenau pawl, nitin leitlun nunah Pathian um lo vekin kan um theu ih sualnak cu kan tuah tikah Pathian thawn pehpar lo vekin kan um theu. Mi pakhatkhat kan relsiat, thangsiat tikah, midang parah thatlonak kan tuah tikah siseh, kan huat mi le in hua tu parah thiltha lo kan tuah tik khal ah siseh, Pathian hnenah sunlawihnak pek ding zat kan pek lo tikah siseh Pathian dodal rero kan si ti kan thei aw lo theu.

 

Sualnak pohpoh cu Pathian dodal asi. Tih a nung tuk. Thinlung a kekkuai tu pawlin tih le thia phah cingten nitin Pathian hmaiah sualnak tuah pang lo dingin an fimkhur ih Pathian Thlarau uknak hnuai ah tangdor ten an nung sawn asi.

 

           

III. Thinlung kekkuai: hmanrua

 

Suahkeh sual mizia thawn a thangliang mi milai thinlung bawrhhlawh cu thianhlimter dingin le Pathian duhzawng thinlungthar thawn thleng dingin Pathian in milai sunglam a thianter tikah hmanrua phunphun a hmang. Milai pianpi suahkeh thinlugn sukek theh dingin hmanrua phunphun hman asi. Ziangvek hmanrua thawn milai pianpi suahkeh thinlung cu sutkek asi khal le, a zaten a rahsuak mi cu milai thinlung kekkuai, sawp neknek Pathian hmai ah raithawinak asi.

 

David ih thinlung kekkuai nak cu a tluksiatnak in asi. A tluksiat tikah, mi nupi a sualpi, a thinlung sungah porh awknak  asuak ih a ralkap mipum a siar, amai ralbawi rori amah in thah ding thu a peki. Cuvek sualnak rapthlak a tuah tik khalah Pathian in a zoh cuahco. Asinan Pathian in a kamsang hmangin David ih sualnak a theihter tikah David siangpahrang cu thinlung kekkuai in a tap. Asualman cu a fapa in a siangpahrang tohkham a lawng, a nupi a ihpi, a ram a buai theh. Anetnak ah a fapa in a thih phah. A thinlung kekkuai in Pathian hmaiah tangdor in leivut a lu ah phulh in mithli tla in amah ah zianghman thiamthu rel ding nei nawn loin a um. Cui thinlung kekkuai thawn Pathian hnenah thawi nak pek mi cu Pathian in a co hlan mi asi.

 

Peter nun kan zoh tikah paraltha aw ter zet, thinthawk khat zet asi. Zesu thih ai ah thi ngam ding tluk in a ruat aw tu asi. Sihman sehla Zesu Khrih an kaih zanah voithum khengte a phatsan hnu ah a Bawipa a phatsan asi ti a theih awk tikah a tap ruangro, a tap kuarko. Cutikah Zesu thawn an tawn awk sal tikah “Bawipa, misual ka si, itlan san aw” ati. A thinlung cu a kekkuai theh zo. A Pathian in a ngaidam thei ding hman a zum nawn lo tluk in a lungsung cu sualnak ih rah riahsiatnak in a kekkuai.

 

Tuisun ah “Ka Bawipa in ingaidam thei nawn ding ka zum lo” ti ding khawp in zumtu dungtawlh tlusia kan um pang maw? Tuisun ah mai duhthusam ih tipi raalkhat lamah ding rero kan um maw? Duh lo zet, ruahban lomi harsatnak in zan it that thei loin khawpin a hnaihnok rero mi kan um maw? Mahte phursuak thei lo ding khawp in nitin thinlung phurrit phur kan um maw?  Thinlung kekkuai in um ngaihnak thei lo kan um maw? Nunthianhlimnak lam zuam tento nacingin mai duhthusam vekin Pathian lungawi zawng tuah thei loin dunglam ah dir thla tu nei ringring kan um maw? Sualnak in nitin lungawinak a ruksak, a siatsuah sak ringring mikan um maw?  Thinlung kekkuai in a thianghlim mi kan Bawipai hmaiah kun cio uhsi. Bawipa cu a tha ih in ngdam tu asi. “Mi zokhal, sualnak ka nei lo ati asi ahcun thuphan per asi” ti asi fawn tikah Pathian fate zumtu pawl leitlun damsung cu thinlung kekhuai in Bawipai hmaiah tangdornak thawn kuun ringring ding kan rak si sawn asi.

 

Joseph ih nun kan zoh asile a unau pawlin an zuar tikah a thinlung kekkuai mi cu hmuh theih asi. Egypt ramah Prime Minister a tuan tikah a unau pawl an ra a hmuh tikah a tap ruangro. A sup aw thei lo, a thinlung kekkuai mi a damzo sihmang atimi khal a unau pawl a hmuh tikah a thinlung hmahir hawp mi vek asi, a tap ruangro. Cuticun a unau pawlih huatnak le tuahsiatnak cun Joseph ih thinlung a kekkuai ter ko nan Pathian in Joseph thinlung sungah porh awknak le tisa mizia pawl kaangral ter tu, ngaidamnak in a khat mi Khrih ih thinlung vek thinlungthar a pek sawn asi. Tuisun ah duhdawtmi pawlih hnawn mi, thangsiat, relsiat, huat mi, le ti duhdah nak ruangah thinlung kekkuai kan um pang maw? Bawipai hnenah thinlung kekkhuai in na kuun ahcun ngaidamnak thawn a khat mi a thianghlim mi le a nem mi thinlungthar Pathian in amai thinlung vek, amai mizia langter tu thinlungthar a lo pe sawn ding asi.

Moses khal, a miphunpi pawlin an rak hnong ih “Nang, kan hotu ah zo in a lo tuah” an rak ti tikah thinlung kekkkuai in nelrawm ramah kum 40 sung tuu khalin a um. Cuihnu khalah a miphun pawl sualnak ruangah “Aw, Bawipa, keimah sawn hi nunnak cabu sung ihsin lakhlawh sisawn dingna” tiah thinlung kekkhuai in a miphun hrangah thla a cam.

 

 

Paul ih thinlung kekkuai ka hmuh tikah thazang ipek ngaingai. A miphun a duhdawtnak ruangah a lungkekkuai mi, sualnak a rak tuah tamtuk, Pathian dodalnak a rak tuah tamtuk mi pawl cu Pathian thutak a theihfiang tikah a lungkuai tertu ah an cang. Cutin a lung a kekkhuai sawm neknek hnu ah Pathian in thinlung thar, Khrih ih thinlung vek, Pathian mizia langtertu ding thinlungthar a pek. Pathian mizia keng thinlungthar a sunglamah a cangvai thawk asi. Pathian hnatuan dan hi ava mak ve!

 

Tuisan, lei damsung damsan ti ah rak ruah mi hlawhtling lonak in siseh duhthusam ihsin tiva ralkhat lamah dingin a thei aw tu kan um pang maw? Duh lo zetmi dinhmunah a thleng kan um maw? Duhthusam sunmang siatsuah zo mi kan um maw? Nitin te duhlo zet mi dinhmunah, pehtlaih awknak ah siseh insang le rualpi pawlkom ah siseh sumpai le hnatuan ah siseh tuar har fualvo a nei kan um maw? Thinlung kekkuai in Pathian hmaiah Bawipai thatnak tep hnik uhsi. Ziangvek hmanrua thawn na thinlung cu vuakkuai asi khal le a hmanrua pawl parah na thinheng hrimhrim hlah she! Jonah kha lawngpi sung ihsin tipi sungah an nawm thlak tikah lawng parah khualtlawng pawl parah a thin a heng lo, “Keimah ka si, lawng sung ihsin ihlawn uh” ati sawn. Tuisun ah na lei tisa thinlung cu vuak kuai in a um asi ahcun na lungawi sawn aw! Bawipa in amai thinlung vek thinlungthar, thinlung nem, Pathian mizia phunsuah awknak ding hmanrua tha na sungah Pathian in a lo pek ding asi.

 

 

IV. Tandornak nun a hrignsuak: Milai lam zero ah tla

 

Tisa thinlugn a kekkuai zo tu, Pathian in thinlungthar a pek zo mi pawl cun Pathian ih duhdawtnak an thei fiang sinsin. Pathian in Amai hmuihmel kengih a sersiammmi milai pawl an tluksiat tikah A duhdawtnak ruangah a thinlung kuai in Amai Fapa rori thihnak thleng khawp in in duhdawtnak cu thinlung kekkuai zo tu pawlin an thinfiang.

 

Culai lakah Pathian tel loin lei tisa thinlung kekkuai tu pawl cu anmah le anmah an siat suaw aw aw. Judas Ischariot cu a thinlung a kekkuai ih amah le amah a that aw aw. Culole, Pathian tel loin lei tisa thinlung kekkuai pawl cu ahlan hnakin an thinlung a hak deuhdeuh, a hlanah thlarau sual pakhat in a luahkhat mi pawl cu an thinlung a kekkuai hnu ah Pathian Thlarau in a luahkhat lomi pawl cu thlarau sual pasarih lai in an luahkhat sinsin. A hlannak in an sual sinsin ih Pathian fale pawl siatsuahnak dodal nak Satan hmanrua ah an cang sawn asi.

 

Milai tisa thinlung a kekkuai ih Pathian in thinlungthar a pek zo mi pawl nun ahcun Pathian mizia an sungah Thlarau Thianghlim in a thanglian ter ih Khrih ih mizia tangdor nak, duhdawtnak, zangfah lainak, ngaidamnak pawl cu an sung ihsin a luangsuak, Pathian a phuang suak aw sawn asi. David Siangpahrang cu a fapa Absolom in alalnak a lawngih a tlan rero lai ah Shimei in a rak camsiat tikah David dungthluntu pawlin uico pa khi kan that men lo dingmaw si? An ti tikah David in “Pathian in a fial tla asi thei” ati ih amah le mah thiamco awk ternak thu asim lo. A sunglam ah a kekkhuai mi thinlung, amai sual ruangah le a duhdawtmi a fapa in a dodal tikah a thinlung kekkuai mi cun tangdor nak thinlung a neihter. Cun Joseph cu a unau pawlin an hua ih an hnawng, an zuar hnu ah a thinlung a kekkuai ih Pathian in thinlungthar a pek hnu ahcun a unau pawl cu a zoh tikah ngaidam nak thinlung thawn an unauza thuanthu nung parah Pathian kutcak a hmu thiam sawn asi.

 

V. Thinlungthar, Pathian cohlan mi raithawinak a hringsuak

 

Milai thisa thinlung a kekkkuai hnu ah Pathian in amai thinlung vek thinlungthar a pek zo mi pawl cu sual an sir ih sualnak cu an hua, tangdornak, duhdawtnak, ngaidam theinak nun in an sunglam a luahkhat sawn asi. Pathian mizia an sungah a thang lian thawk asi. A se bik dinhmun ih an din lai khalah an lungawi a awi ih Pathian an thangthat, an parah siatnak a tuahtu pawl parah siatnak in an thawng rul nawn lo. Ziangkim thlawsuah an dawn mi cu Pathian duhdawt zangfak nak in laksawng pek mi an sizia an hmuh tikahlungawi nak luangliam an sunglam ihsin a suak sawn asi. Vuihram nak, midang mawhsiatnak, le mah le mah humhim awknak an kaa sung ihsin a suak nawn lo. Bawipa thatnak cu an sung ihsin an nun in a luangsuak sawn asi. Cuticun an lei tisa mizia cu mibum hmang bik asizia an theifiang ih an lei tisa ih bum dingin an nung duh dawn lo, an lei tisa thinlung duh lo zawng, Pathian duhzawng an duh ih Pathian duhmi an duh, Pathian in nuam atimi nuam an ti sawn asi. Pathian hnenah an peksuak mi a kekkuai mi thinlung raithawi nak cu Pathian in a hnong lo asi ti an theih tikah anmai phulo Pathian zangfahnak cu nitin an cen, leitlun vanram an hamng tan asi sawn. Hellram tla dingmi, Pathian duhdawtn zangfah lainatnak ih a runsuak nak thu an sungah a nun tikah lungawinak hlir in an sunglam a luahkhat asi.

 

Paul in Rome cakuat sungah tisa thinlung in a uk mi pawl cu tisa thil lawng an ruat. Pathian ti lungawi thei nak a nei lo, an thei lo. Tisa in a ukmi pawl cu an thi ding ti ah a ti. John cakuat pakhat nak ah “Mi zokhalin sualnak kan nei lo kan ti asi ahcun thuphan kan per ih Pathian cu thuphan kan puh asi” asi vekin thinlung kekkuai thawn Pathian a pan tu pawl cu Pathian in thinlungthar a pek hai asi. Cui thinlungthar cun vanlam thil a zoh ringring in vanlam thil in a luahkhat, Khrih ih mizia cu an thinlung sung ihsin a luangsuak sawn asi. Ziangvek dinhmun khalah siseh ziangvek harsatnak, zovek milai thawn an um tik khalah Pathian thu bahbal in an nung dah loih Khrih ah Pathian thawn an pehzawm awknak ah an lung awi ringring asi.

 

 

Cui lungawinak cu na tep zo maw? Na tep hrih lo asile Coconut (Ungti) rah tuamtu vekin na thinlung cu sualphaw in a tuam lai ih sutkuai hrih lo mi asi thei. Bawipai hmai ah thinlung kekkuai in na lei tisa thinlung mizia sual cu keksawm theh tahrat in na sung ihsin Pathian mizia thar a hringsuak tu ding thinlungthar Bawipa in lo pek a duh asi. Cui thinlungthar cun na leitltun khualtlawnnak lamzin tluan ah Pathian thatzia alo tep ter dingih sunkhuk in na Pathian na cen thawk thei ding asi. Pathian biak inn sungah a tawng khawm aw mi Pathian fate pawl cu lei tisa thinlung sual mizia a kekkhruai ih Pathian in thinlungthat apek mi pawl kan asi. Lungawi thangthatnak in Amai sunlawinak centu kan si.