|
THEIHNAK, ZUMNAK, NUN
Tlamtling thurin zirhnak (sound doctrine) cu theihnak, zumnak, le nun ah a lang. Zumnak thu sim tikah fimkhur a tul zet. Leitlun biak thuanthunung kan zoh asile, Bible vekin cuai thlai tikah, biaknak lam fehsual pawl hmuahhmuah in anmai fehsualnak (zumnak) a thlunlo tu pawl khi fehsual vekin an hmu theh. Mi zokhal anmai zumnak cu dikbik le thianghlim bik vekin an ruat cio fawn. America ramih Reformed Baptish pastor pakhat in hitin a sim dah, “Piangthar kawhhran ti aw pawl khal, kan zaten fehsualnak kan nei theh. Asinan, thihnak tlak khawp fehsual an um. Cu pawl cu unau vekin kan zoh thei lo, leitlun mi vekin kan zoh ding mi an si. Culo hmuahhmuah, thihnak tlaklo fehsual tu pawl, theihnak le nun famkim lo, tlaksam nak ruangah fehsualnak cu kan zate in kan neih theh vekin khat le khat Zesu Khrih ah unau pumkhat vekin kan duhdawt awk thei a tul asi” a ti.
Dungthluntu Paul in “For we know partially and we prophesy partially” (Ziangah tile thiamnak laksawng kan ngahmi le profet thusim thiamnak kan comi pawl hi a ṭhen a hrekte lawng an si) a ti, I Kor. 13:9. Mi zo khalin zianghmuahhmuah thei thluh, palhnak nei lo vekin a sim awk asile, a mah le mah a theih awk nak cu Bible in ziangvek asi ti a simmi thawn a bang aw lo tinak asi.
Theihnak in vanram kaitheih asilo, asinan vanram kainak kailawn zawh thei dingin thutak theih ihsin a ra mi zumnak a tul. Zumnak in thiamcoter kan si ih zumnak cu theihnak in a ra mi asivekin zumnak nung, rundam zumnak rak ratpi tu “theihnak” timi cu ziang vek theih nak asi pei? Rome 10: 17, “Curuangah zumnak cu thuthang theihnak ihsin a ra ih thuthang cu Khrih kan phuannak ihsin a ra” ati. Hitawk ah a fiang zetmi cu zumnak nung rak ratpi tu theihnak cu “Zesu Khrih ih thuthangtha theihnak ihsin a ra mi asi” ti a fiang. Asile, mi pakhat in Bible cu a thawkin a cemtiang asiar theh tikah, cui “theihnak” rundamnak rat pitu theihnak cu a nei maw?. Mahatma Ghandhi khalin Khristian Bible cu voithum a siarsuak asi tiah cangan tu in an ngan. Campaign le crusade ah voi tampi feh ih Zesu Khrih thuthangtha ngai rero na cingin ziangruangah zumnak nung ratpitu theihnak an nei lo?
Mark 4:11, “Zesuh in, “Pathian Uknak thuthup cu nan hnenah pek a si zo. Sikhalsehla lenglamih a ummi pawl cu tahṭhimnak lawng in sim an si; 12 curuangah, ‘An zoh rero ding nain an hmu lo ding; An ngai rero ding nain an thei thei lo ding. Ziangah tile an hmuh thei ih an theih thei ahcun, Pathian hnenah an kir ding ih Ngaithiam an si ding,’ tiah a ti.” Ziangruangah Israel miphun, biaknak lam hruaitu, Farasi, Moses dan thiammle thei nal dekdek, Jerusalem biak inn pi ah thusim ringring tu, thawi nak pe ringring tu, Messiah a ra cingding asi ti ah a rak sim rerotu, a rak hngak ringring tu pawl in Messiah cu leitlun ah a rat taktak tikah an theih lo? Ziangruangah an theihnak in zumnak nung a hring suak lo? Zesu cu an mit in an hmu ih a thusimmi an hna in an thei. Asinan, an sungah zumnak nung a um lo. Ziangruangah? Pathian an zum maw, an zum: an zum ih sabath an ul ringring, thawinak an pe ringring. A ra lai dingmi Messiah cu an rak hngak ringring.
I Kor 2: 8-10, “Hi leilung a uktu pawl zohman in cuih fimnak cu an thei lo. An rak thei sisehla sunloihmi Bawipa cu thinglamtah parah an rak that lo ding. 9Asinain Ca Thianghlim in, “Milai zohman in an hmuh dah lomi, Zohman in an theih dah lomi, A cangthei ding tiah zohman in an ruah dah lomi, Cumi cekci cu Pathian in Amah a duhdawtu hrangah A tumtahmi a si,” a ti.(2:9: Isai 64:4)10Cuih a thuthup cu Pathian in kan hnenah a Thlarau in a phuang. Ziangtin a si tile Thlarau in ziang hmuahhmuah kha a hawlsuak ih Pathian ih tumtahmi thuk bik hman a pur ngah a si.”
Asile tui theihnak timi cu ziangsaw asi? Bible siar tam, theitam, degree ngah tam asi maw? Biak inn tumpipi ah thlacamnak le biaknak raithawinak ihsin ngah mi asi maw? Asilole, mah rori in simthiam, relthiam, ngan thiamnak asi maw? Mi el thiamnak asimaw? Ruatthiamnak theh asi maw? A SI LO.
I Kor 2: 13-14, Curuangah Thlarau a neimi pawl hnenih thlarau lam thudik kan simfiang tikah milai fimnakih zirhmi ṭongkam hmangin kan sim lo. Thlarau ih zirhmi ṭongkam kan hmang a si. 14Thlarau minung a si lomi pawl cun Pathian Thlarau hnen ihsin a rami laksawng cu an co thei lo; a theih khal an thei thei lo. Ziangah tile cuih laksawng pawlih sunlawizia cu thlarau thinlung lawngih theih theimi a si ih cumicu annih hrangah cun aat-hna a si.
Curuangah, zumnak nung rattpitu (“zumnak cu theihnak in a ra”) tu theihnak cu Pathian Thlarau ih theihternak asi ti a fiang. Curualrualin milai sunglam ah tisa thinlungih theihnak si loin Pathian Thlarau in a theihter mi, vanlam thlarau theihfiang theinak a sunglam ah a um ti a fiang fawn.
Cui theihnak cu Semtirnak 4:1 ah a simmi, “Adam in a nupi Evi cu a thei, cutin fa a rai” a tivekin sunglam nun, thlarau pawl-awknak, Pathian Thlarau in a thi mi milai thlarau cu a nunter, thutak theihtheinak a pek rualrual in milai thlarau in rundamnak thutak a hna-kua ihsin a lut mi cu a theihfiang thei nak asi. Cui theihnak cun zumnak nung, rundam-zumnak a ratpi.
Tahtthimnak: #1. Voikaht cu, Mandalay lamzin parah mi pakhat a farual cawmnak ding hrangah kutdawh in kum 30 sung mithmaisia zetin rawlkhawngin a to rero. Leilunpi parah America a um le um lo hman theilo, mirangtong kamkhat hman thei lo, cupa hnenah American tourist pa in US dollar 3 million check in nganmi le kawlram tangka fangkhat a kut in a kengih khuimi na duhsawn tiah a hril ter. Kutdawh pa cun cahnah men hnakin tangka ka duh sawn asi ih kawl tangka fangkhat a hril. US $ 3 million, an insang farual thawn an damsung ei cawk lo laksawng American pa in a pek asi ti thei sehla, ziangti lam hman in a el dah lo ding. Bible siar rero na cingin, Pathian thuthangtha ngai rero na cingin Pathiang zangfah lainatnak ruangah alak in pekmi rundamnak cu ziangruangah an co hlang lo? Rundam, vanram kai ding duh ah an suk a so ah an vak an tawi, sumseng in an hawl, Bible an siar, an zir, ziangruangah rumdamnak an co lo? An thei lo, theihtheinak an nei lo.
Hi tahtthimnak cu Pathian in rundamnak laksawng in pekmi cu leitlun mi in an duh lo ih leitlun nun an hril sawn asi ti mi thawn tahtthim tikah tahtthim tlak asi lo.
#2. Voikhat cu Bawi Zesu kha Galili khua ah a feh. Mithi thlansungah ni 7 sung a thihnak asi zo mi a rak um. A taksa cu a tawih theh ih lungin a ei rero zo. Zesu in hitin thu a pek, “Mithi pa, tho aw, thu ka lo pek” a ti. Cutikah mithi pa cu a tho in thlan sungah a to ringring. Cule, thih ka duhsawn ati ih thlansung ihsin a suak duh lo. Cucu thil um dah lo, le um thei lo mi asi. Milai zokhal, thihnak ihsin nunter sal mi in thih hril sawn an um dah lo. Arsa le ek kha cabuai par ah ret aw la ei dingah na hril ter ahcun vok in ek a hril dingih milai in arsa a hril ding. Sizung um na cingin damtu lo an um lo. Biak inn ah khawm aw ringring cingin vanram hril loin helram hril sawn timi a um thei lo. Pharnat nei na cingin dam duh lo an um lo. Hell ram le vanram lamzin fiangzet in theih ter zomi hellram hril sawn an um dah pei maw? A hmailam ah sankhuk hrem hmun le sankhuk Pathian insang sungtel sinak lamzin hril ding pahnih ka nei asi ti thei nacing in hellram hremhmun hril sawn an um dah kei maw? Asile, ziangruangah milai tampi hellraman an tla ding?
Mi tampi in Bible an siar rero nan ziangruangah an piangthar lo, zumnaknung an nei lo, ziangruangah an nun a thleng aw cuang lo? An mit in an zoh ih Bible an siar, an hna sungah thuthangtha simmi a lut. Zohman el neh thei lo ding khawp in an thei. Asinan zumnak nung ratpitu theihnak an nei lo. Leitlun thuanthu vekin Zesu thu cu an thei. An sunglamah a nungmi a um lo. Pathian in leilung sersiam hlan ihsin Amai lunghmui zawngin a rak tiamtuah cia vekin Zesu Khrih ah a duhdawt zangfah lainak nak a langter mi thutak, Zesu Khrih tel loin milai canpual cu hellram ah sankhuk in hrem hmun tuar ding thutak, khros parah rundamnak tlennak thutak, satan in sersiamtu Pathian nung a dodal nak, helram le van ram thu, hi thutak a thei fiangtu, Thlarau Thianghlim in a fiang ter mi theihnak ihsin zumnak nung, rundam-zumnak a suak sawn mi asi.
Curuangah, zumnak nung, rundam-zumnak nei thei dingin milai sunglam ah a nungmi thlarau a umhmai sak a atul asi.
John 10:27, “Ka tuu pawl cun ka aw an thei; keimah in ka thei hai ih annih in in thlun” ati. John 6:44,” I thlahtupa in ka hnenih a kuat lo ahcun zohman ka hnenah an ra thei lo ding; cutiih ka hnenih a rami cu ni neta bikah nunnak ah ka thoter ding.”
Ziangtin Pa Pathian in Zesu Khih ih tuu rual pawl cu Khrih hnenah a rak hruai? Pa Pathian in Fapa hnenah a pekmi pawl cu ziangtin Pa in Fapa hnenah a rak hruai hai? Cawpi hnarkhih mi vekin asi maw? (By force in asi maw?) SI LO.
John 3: 4a, Nikodemas in, “Ziangtin so patling cia cu hrin sal a si thei ding?
John 3:6, Minung cu taksa lam cun a nu le a pa sung ihsin hrinmi a si; sikhalsehla thlarau lamah cun Thlarau ih hrinmi a si
Phi 2:13, “.Ziangah tile amah ih tumtahmi duh dingah le nan tuahsuak dingah Pathian cu nan sungah hna a ṭuan a si.” Luke 24:45, “Cun an thinlung mit a vaangter ih Ca Thianghlim ih simmi kha an thei thei.”
Pathian Thalrau Thianghlim cun milai sunglam thlarau hnenah theihtheinak le duhnak a neihter asi. Asile, ziagngruangah Pathian Thlarau in leitlun mi zapi hnenah thutak theihtheinak le Pathian duhnak thinlung duh hiar nak a pek lo? Ti ah thusut tu an um.
Mathew 22:14, “Cuih hnuah Jesuh in, “Sawmmi cu an tam nain hriilmi an mal,” tiah a netnak ah a sim.”
Asile, ziangruangah mi malte lawng Pathian in a hril? Ti ah thusuttu an um lala.
Rome 9: 14, Cuti a si ahcun Pathian hi a ding lo a si, kan ti pei maw? Ti hrimhrim hlah! 15Ziangah tile Moses hnenah, “Zaangfah ka duhmi parah ka zaangfah ding; zawnruahnak neih ka duhmi parah an zawn ka ruat ding,” a ti. 16Curuangah ziangtinkim ahhin minung ih duhnak le tuahnak ruangah si loin Pathian ih zaangfahnak a um ruangah a si ṭheh a si. 17Izipt ram Faro siangpahrang thu khalah Ca Thianghlim in, “Nangmah cu siangpahrang ka lo tuah ih leilung hmuahhmuah ah ka cahnak huham na langter ih ka hmin na thanternak dingah ka lo hriil a si,” a ti. 18Curuangah Pathian in a duhmi poh kha a zaangfah ih a duhmi poh kha an lung a ruhter a si.
Cumi rawngbawl nak hrangah kawhbul a neih mi asi ih rundamnak cotu ding ahcun mi zapi hrangah asi, ti tu an um lala.
Mathew 22:14, “Cuih hnuah Jesuh in, “Sawmmi cu an tam nain hriilmi an mal,” tiah a netnak ah a sim.”
Cutin Pathian Thlarau Thianghlim in thutak sungah in hring, Zesu Khrih ah Pathian fate can thei nak in pek, thutak in theihfiang ter ih cui theihnak ihsin zumnak nung a ra. .
John 14: 16, “Pa hnenah ka dil ding ih nan hnenih kumkhua a um dingmi Bawmtu (Bawmtu timi hi ṭanpitu tikhal in leh a theih) dang a lo pe ding. 17Amah cu Pathian thutak a langtertu Thlarau a si. Leilung in Amah cu a hmu thei lo ih a theih thei fawn lo ruangah a pom thei lo. Sikhalsehla nannih cun nan thei, ziangah tile amah cu nan hnenah a um ih nan sungah a caam ding a si”
Cui thlarau cu Pathian fate kan sinak fiangter tu asi: Rome 8:14-16; “Pathian Thlarau ih hruaimi pawl cu Pathian ih fa an si. 15, Ziangah tile Pathian in a lo pekmi Thlarau cu salah a lo tuahtu ding Thlarau a si lo ih ṭihphang in a lo tuahtu khal a si fawn lo. Cuih Thlarau cun Pathian ih fa ah a lo canter ih Pathian hnenah, “Abba, Ka Pa,” tiih kan au theinak thazaang in petu khal cu Thlarau a si. 16 Hitiih kan au ahhin Pathian ih Thlarau in kan thlarau a pehzom ih Pathian ih fa kan sinak kha a fiangter.”
Pathian fate kan sinak cu leitlun mi in an thei lo, theihtheihnak khal an nei lo, an thei lo ti khal an thei aw lo.
I John 3:1-2; 1Pathian kan Pa-ih in duhdawt zia hi ruathnik uh! In duhdawtnak a maksak ruangah Pathian faale tiih kawh kan si hi; cutiih in ti vekin kan si taktak. Curuangah a si hi khawvelih in theih lonak cu! Pathian khal a thei lo. 2Ka duhdawtmi pawl, atu cu Pathian faate kan si zo; a sinain ziang bangtuk kan si lai ding ti cu a fiang hrih lo. Sikhalsehla Khrih a rat tikah cun amah bangtuk kan si ding ti kan thei; ziangah tile amah a si vek cekci in kan hmu ding.
Heb. 11:1, Zumnak neih timi cu kan ruahsanmi kan ngah tengteng ding, ti zum le kan mit ih kan hmuh thei lomi a um rori a si, ti zum khi a si. (1Now faith is the substance of things hoped for, the evidence of things not seen.KJV)
Asile, zumnak nung ratpitu theihnak cu minung fimnak le theihnak in a ban lomi theihnak asi ti cu a fiang. Ziangah tile lei tisa mi in thlarau lam, vanlam thu a thei lo, a thei lo lawng asilo, theihtheinak a nei lo, theihtheihnak a nei l o ti khal a thei aw lo. Bible siar tamnak, zirnak, leitlun fimnakin a theihban lomi vanlam thil, thlarau thu, sankhuk thu, leilung sersiam hlan ihsin a timtuah cia mi le sankhuk thu thawn a peh tlai aw mi, Pathian Fapa, Zesu Khrih ah milai rundamnak thu asi. Cui theihnak cu milai lam ihsin a suak mi asilo lei tisa minung theihnak in a thei ban lo. II Kor 2: 14 Thlarau minung a si lomi pawl cun Pathian Thlarau hnen ihsin a rami laksawng cu an co thei lo; a theih khal an thei thei lo. Ziangah tile cuih laksawng pawlih sunlawizia cu thlarau thinlung lawngih theih theimi a si ih cumicu annih hrangah cun aat-hna a si.
Curuangah asile, Bible siar tam le thei tam pohpoh an piangthar thei lo. An theih tam poh le an porh aw menmen. Degree an ngah tam poh le an au a por menmen, milai thiehnak cu milai porh awknak lawng a hring. Pathian Thlarau in thuthak a theihter mi theihnak lawngin zumnak nung a ratpi (Zumnak cu theihnak in a ra).
I Kor. 8 1b-3; Sikhalsehla cubangtuk theihnak cun mi a puarthauter ih duhdawtnak cun mi a tungding a si. 2Ka thei ve ko, a titu poh in a theih dingmi zat in a thei dah lo. 3Asinain Pathian a duhtu cu Pathian in a thei a si.
Cuhnakin Pathian in thinlungthar a pek mi, an thlarau a sersiamthar mi, a hrinthar mi, Pathian ih ta, Pathian ih fale pawl cun Pathian ih aw, Bible sungah ngan mi siseh Thlarau Thianghlim ih theihternak aw siseh an thei asi. Cu theihnak cun zumnak a ratpi.
Ezekiel 26:36, Thinlung thar le nunnak thar ka lo pe ding. Lungto bangih a hak mi nan thinlung cu ka la ding ih thinlung neemte ka lo pe ding.
Pathian fa le pawl cu thlarau ih hrin mi an si. John 3:6, Minung cu taksa lam cun a nu le a pa sung ihsin hrinmi a si; sikhalsehla thlarau lamah cun Thlarau ih hrinmi a si. John 1:13, Pathian ih faate an cannak cu leilung daan, minung ih thi le sa in hrinmi in a si lo; Pathian amah rori kha an Pa a si. I Pet. 1:23, 23A nungmi le kumkhua in a hmunmi Pathian ih ṭongkam thawngin hrintharmi nan si zo; a thi theimi nu le pa-ih faate nan si nawn lo, a thi thei lomi ih faate nan si zo.
Cun asile, “zumnak cu theihnak in a ra” ati vekin cui “theihnak” cu leitlun milai fimnak zirnak thuthan awknak ihsin theihnak menmen asilo. Mailai lam zirnak le theihnakin zumnak nung, rundam-zumnak a ratpi i lo ti cu a fiang asi. Khatlam zawngin an sim asile, milai in zumnak nung, rundam-zumnak a neih theinak cu Pathian zangfahnak hnatuan asi. Tongdang in sim asile “Pathian laksawng asi” (Eph.2:8). Cui Pathian laksawng cu Pa Pathian in in pek tikah, American tourist pa in kawl kutdawtpa hnenah US $ 3 million check le kawl tangka KS.1 a pek vek si loin,Thlarau Thianghlim in theihfiangternak, hngat aw ngam dingin duhnak khal in neihter fawn. Mi zokhal, kumkhua nunnak le hellram cu a hmaiah an ret sak tikah Thlarau Thianghlim theihfiang ter nak in theih nak a nei mi cun hellram a hril dah lo lawng si loin Pathian ih duhdawt zangfahnak in a lungsungah duhnak khal a neihter asi.
Cutin asile, milai in ziangah thuthangtha kan sim rero, Pathian Thlarau in milai thinlung sungah hna a tuan theh mei lo? Ti ah thu a sut tu an um lala. Pathian Fapa le in rundamtu kan Bawipa Zesu Khrih ih sunlawinak ttawmtu kan si vekin leitlun ah rawngbawlnak ttawmtu ah inruat hi lungawi sawn ding kan si.
II Kor. 5:18, “Hi hmuahhmuah hi Pathian ih tuahmi an si ṭheh; a ral a si mi kannih cu Khrih thawngin Amah thawn in remter zo ih midang khal Amah thawn remter dingah ṭuanvo in pek.”
Curuangah thi thutak a thei fiang zo tu, hellram lamzin zawh in ka feh rero laiah Pathian zangfah lainatnak in Zesu Khrih ah irundam zo asi, Pathian insang sungtel sinak pek ka si zo, pa phu lo mi Pathian zangfak lainatnak laksawng rundam nak cu ka co zo ih Pathian insang sungtel ka si zo tiah a fiang aw zo tu hrang ahcun leitlun nun hi Khrih hrangah nun lawng a tang asi.
Phi. 1:21 Nun timi hi ziangso a si? Kei ka hrangah cun nun cu Khrih a si. Curuangah thih khal le a hlawk sinsin.
Cuticun hellram lamzin zawh rero lai ah Pathian zangfah lainat nak in vanram ticket pek mi pawl cu an lei damsung cu hellram lamzin parah khual tlawng pawl vekin an nung nawn lo. Mi zokhalin, ziangvek zumnak thurin, doctrine, biaknak thupom, kawhhran thurin an sim an au khuang rero khal asile an leitlun nunah hellram lamzin ah khual tlawng pawl vekin annung thotho asi ahcun an simmi cu Pathian Thlarau ih theihter mi si loin milai zirnak theihnak menmen asi thei.
Tahtthimnak: Khuahlan lai ah, khua pakhat ah mi farah pa in fanu mawizet a nei. Nikhat cu siangpahrang insung hnatuantu pawl kha siangpahrang fapa hrangah nupi hawl in cui khawte ah an feh tikah cui fala nu te cu siangpahrang fapa ih nupi si dingin hamnak ah sui fau te an pek ta. An khawpi pawl cu mi farah lawnglawng an si ih sui tla an hmuh dah lo ruangah cui fala nu te ih fau cu an thei thiam lo. Cui hnu lam hrimhrim ah cui fala nu te cun an khawsung ih tlangval dang pawl cu duhnak thinlung thawn a zoh dah lo. Ziangtikah ka pasal ding, siangpahrang fapa a ra ding timi lawng sunzan ti loin a ruat ih an khawhnar a cuan. Farah zawnzaih a tuar tikah siseh an khawpi pawlin an nautat tikah siseh a poisa lo. Zianf tile a pasal dingcu zo asi ti a thei. A lungsungah a pai ih ni nikhatkhat ah ka pasal ding siangpahrang fapa tlangval mawi zet a ra dingih ira nei ding asi tiah a lungsungah a lungawi tuk.
Asile, cawlhni tinte biak inn ka pan ringring, thawhhlawm ka pe ringring ih zumnak ka nei. Ka zumnak hi a nung maw, nung lo ziangtin ka thei thei ding? Ti ah thusut tu an um lala. James 2:20 “tuah nak tel lo zumnak cu zumnak thi asi” ti fawn. Ka zumnak cu a thi maw a nung ti ziangtin ka thei thei ding? Ti ah thusut tu an um lala.
Theih a awlte:
#1. Pathian fate, Rundam zumnak nei tu pawl cu sual an tuah sunzawm nawn lo:
I John 3:9-10 Pathian fa zokhal in sual a tuah rero nawn lo, ziangah tile Pathian nunzia kha thlaici bangin a sungah a um. Cule Pathian cu a Pa a si ruangah sual in a nung nawn lo 10 Pathian faate le Satan faate an dan awknak bik cu hihi a si: a dikmi a tuah lotu le a unau a duhdaw lotu cu Pathian faate an si lo
Thuf. 8:13a. 13 Bawipa ṭihzah cu sualnak huat khi a si.
Mai duhthlannak in sual ti thei nacingin a tuah sunzawm rero tu, siar awknak, ningzahnak zianghman nei loin sualnaka tuah sunzawm rero tu, Pathian in nun a sim dah lo mi pawl cu lenglam ihsin Pathian fate an si ti theihtheihnak ziang hman a um lo.
#2. Pathian fate, Rundam zumnak nei tu pawl cu unau duhdawntnak an nunpi:
John 13: 35, Pakhat le pakhat tlunah duhdawtnak nan neih ahcun zokhal in keimah ih dungthluntu nan si kha an lo thei ding a si,” tiah a I John 3:15, 15A unau a huatu cu mithat a si ih mi thattu sungah cun kumkhua nunnak a um lo ti nan thei.
Pathian ih duhdawtnak cu an sungah a nun vekin Pathian ih duhdawtnak cu zumtu nun, Pathian fale pawl nun ihsin a luang liam ding mi asi. Duhdawt titikah milai duhdawtnak vekin mai hrang thatnak tuahtu, kanmai duhzawngin a nungtu pawl lawng kan duh ih kan mai hlawknak diriamnak, lungawinak tuah tu duhdawtnak kha simmi asilo. Pathian duhdawtnak sawn cu Thlarau Thianghlim cencilhnak le lamhruainak in nunah a luangliam sawn mi asi.
Bible in duhdawtnak thu a simmi cu: I Kor. 13:4 -8a.
A tawizawngin Pathian mizia, duhdawtnak a sungah a lang. Pathian ih duhdawtmi a duhdawt ih Pathian ih huatmi a hua. Pathian ih nuam a timi nuam a ti ih Pathian thinhengnak ah a lung a awi lo.
#3. John 8:31, Curuangah Jesuh in amah a zumtu pawl hnenah, “Ka thu zirhmi nan thlun ahcun keimah ih dungthluntu ngaingai nan si ding; John 14: 15, Jesuh in, “Keimah in duhdawt ahcun ka thukham pawl nan thlun ding. Math 7: 16 Mi ziangvek an si ti cu an tuahmi (rah) in nan thei ding. Hling kung ihsin Sabit a rah dah lo; lenhling khal in theipi a rah dah keel lo.” A tivekin an tuah mi zumnak nung nei le nei lo cu an nunrah zoh tikah theih theih asi. Ziangrah saw Bible in nunrah, tuahnak a timi cu? Ti ah thusut tu an um lala.
Thlarau rah pawl cu: Kal 5: 22, Sikhalsehla Thlarau ih a rahsuahmi cu
Cubangtuk rah umnak ahcun daan cu a ṭul nawn lo. 24Cule Jesuh Khrih ih ta a si mi pawl cun an taksa hurnak le hiarnak pawl cu thinglamtah ah an khenthat zo. 25Thlarau in nunnak in pek zo ruangah kan nunnak khal hi Thlarau amah in a uk ding a si. 26, Puarthau ding kan si lo; pakhat le pakhat thinṭeuter aw ding kan si lo; iksiik aw ding khal kan si lo.
Cutina sile ziangtin cuvek thlarau rah cu ka nunah a lang thei ve ding? V. 25Thlarau in nunnak in pek zo ruangah kan nunnak khal hi Thlarau amah in a uk ding a si.
Khaikhawm:
Cutin asile, zumnak nung, rundam-zumnak timi cu milai theihnak, zirnak, le hawlnak ihsin a rami siloin Pathian zangfah lainatnak in Zesu Khrih ah rundamnak thuthangtha cu Pathian Thalrau in thuthangtha simtu maw, hmanrua hmangin, milai sunglam nunah a theihfiang ter nak ihsin a ra mi asi (Zumnak cu theihnak in a ra). Cutin thlarau lam thu, vanlam thu theihnak nak nei lo, milai thlarau cu Pathian Thlarau in Khrih thutak sungah a hrinthar, sersiamthar rualrual in milai in Pathian zangfahnak rundamnak thutak cu a thei fiangih cui theihnak ihsin zumnak cu a ra. Cutin Pathian Thalrau in milai sunglam nunah hna a tuanih a sersiamthar, hrinthar lawng si loin thutak a theihter ih Pathian duhnak thinlungthar khal a pek asi. Cui thinlungthar cun Pathian a duh ih satan a hua, thutak a duh ih sual a hua, hellram lamzin a dungtun ih Khrih dung a thlun, a sual a sir ih sual a tuah sunzawm nawn lo, thutak a pom ih a zum asi.
Citin asile, kanmah minung lamah tuah dingtuan ding kan nei lo maw si? Nei e! Kan nunnak pumhlum hi amai ta, thisen in leizo mi kan si. Kan lei tisa nun cu khross parah khenbet asi zo ih Khrih ah nunthar in Thlarau Thianghlim lam hruai nak, uknak hnuai ah nung ding kan si.
Cutin zumnak nung neitu pawl, Pathian fate taktak pawl cu ziangtin kan theithei ti asile, Bible in a sim vekin, Pathian ih duhdawtnak an sungih a luangliam mi, Khrih ih thupek an thlunnak, sual an huatnak, le an nunrah pawl in theihtheih asi.
2 Kor 3:18, Kannih tla cu kan zatein kan hmai puanih tuammi kan si nawn lo ruangah Bawipa ih sunlawinak hi thlalang bangin a langtertu kan si. Cuih sunlawinak cu Thlarau a si mi Bawipa hnen ihsin a rat ruangah kan nunnak hi sunglawi sinsin in le Amah bang sinsin in in thleng vivo a si.
Rom 8: 28-30, Ziangtinkim ahhin Pathian cun amah a duhdawtu le amah ih tumtahmi vekih a kawhmi hrangah cun an ṭhatnak ah hna a ṭuan a si, ti kan thei. 29Pathian in a hriil ciami pawl cu a Fapa hmuihmel keng dingah a thiadang cia hai; cuti cun unau tampi lakah a Fapa cu upa bik a sinak dingah a si. 30Curuangah Pathian in a thiatdan ciami pawl cu kawh khal a ko. Cule a kawhmi pawl cu thiam a coter ih a sunlawinak khal a hlawm hai a si.
Cutin Pathian ih ta kan sinak cu seal ih khen mi vekin Thlarau Thianghlim cu kan sungah a ceng ih nitin nun insim, thutak lamzin ah inhruai, inzirh, kan sung ihsin inbawm. Kan leitlun nun tuanvo pawl tuansuak thei dingin in bawm, kan sungah hna a tuana si.
Nitin in leitlun damsung, Pathian Thalrau Thianglim in Pathian fale pawl nunah Khrih hmuihmel kan bang sinsin thei nak ding ah kan leitisa mizia khawruahdan le lungput pawl cu in hlawn sak ringringih in thleng sak rero, Pathian mizia kan sungah a thanlen vivo thei nak ding hrangah catbangloin hna a tuan asi. Cui Thlarau Thianghlim hantuannak cun Thutak sungah in kaihruai ih kan nitin leitlun vanram, nehnak nun sungah lam in hruai. Khrih a ratsal tikah Pathian insungsangah a sunlawinak ttawmpi tu dingah in ruat vekin leitlun damsung Pathian le a sersiam mi rualrem nak rawngbawl dingin tuanvo pek kan si vekin kanmah sungah hna a tuantu, Pathian Thlarau Thianghlim in ziangkim a tuahsuak theh ding asi. Kanmah minung lam ahcun kan taksa, thinlung, thlarau, le kanmah thawn a pehtlai mi hmuahhmuah amai uknak hnuai ah up aw in a duh vekin Amai hmin sunlawinak hrangah inhman ding le A minung pawl hnenah Amah le Amah kanmah sung ihsin a phuansuah awk ding hi kannih A fale leitlun nun sungah kan ruahsan mi asi. Kanmah lam ahcun sankhuk in kan tuah dingmi Amah sunlawih, thangthat le cawimawi hi kan nitin nun asi ih Bawipa ah kan lungawinak cu kan cahnak asi. Pathian hmin thangthat si ko seh!
|
WELCOME TO MY PAGE > Theology >