Pathian in ziangtin a siahhlawh pawl tangdawr nun a zirh hai ti Bible thuanthu sungah malte zoh hnik uhsi. Bible thuanthu sungah Pathian hmanrua zumtu nucang/pacang tha pawl cu tangdornak nei dingin Pathian ke hramah phah aw aw in, milai tuahnak, fimnak, cahnak, thiamnak, le theihnak, si loin amah Pathian in a duhdan in a siahhlawh pawl a hman theinak ding hrangah tang a dawr ter hmaisa theu. Cutin, tang a dawr ter hnu hmanah milai cun an rawngbawlnak, Pathian an riannakah Pathian kutcak lang mi cu porh awknak,hngalnak, midang hnakin tha deuh in theih awknak, duh awknak, le amah Pathian hngilhnak ah kan hman theu tikah, Pathian in tang a dawrter sal ringring theu.

Curuangah, zumtu pawl ropitnak cu ziangtluk tang a dawr timi in cuaithlai asi theu. Ziangah tile amai mizia thawn a kalh aw mi, hngalnak, puarthaunak, le midang nautatnak in a luahkhat mi nun ihsin Pathian a lang aw thei lo. Cuticun Pathian in a fale pawl cu Fapa Upa bik Khrih hmuihmel an ken vivo theinak dingah tangdawrnak nun a zirh, a sersiamthar sal asi. Cutin tangdawrnak rualin zumtu pawl nunah a langcih theu mi cu duhdawtnak, ngaidamnak, zumnak (Pathian kutcak parah hngat awknak), tuarfainak, tvp, asi theu. 

 

Pathian in a hman duhmi pawl tangdawr ter dingah  a hmanrua pawl tla cu:

 

# Ngaidamnak nun neihter:

 Tuizing “Family Focus” zingtin podcast ka ngai mi ah hitin nunau nu in a pasal thu a sim: “Ka pasal thawn kan neih awk hnu ah nunau tha lo a rak ko theu, zuk tha lo (blue film) a rak zoh theu ka theih tikah ka thinlung a kuai. Cui hnu reipi insang buainak kan neih hnu ah ka pasal cu a piangthar, “Ka piangthar” tiah in sim tikah ka thin a heng tuk. Ziangah tile ka pasal thawn vanramah um tlang ding ka duh lo. Leitlun ah har ka tuar hman a tawk tuk, vanram ahcun um tlang ding ka duh nawn lo. Pathian in ziangruangah a ngaidam ti ka thei lo. Asinan Pathian in a ngaidam zo mi ka pasal ngaidam dingin nasa ten tikcu ka lak hnu lawngah Pathian bawmnak in ka ngaidam thei.”

Ngaidamnak cu milai tisa in a ngaidam thei lo mi, pomrem thei lomi kha Pathian duhdawt ngaidamnak zumtu nun sungah Thlarau Thianghlim hnatuannak in a luangsuak mi asi. A thianghlim Pathian hman in a ngaidam zomi kan ngaidam thei lo asile Pathian hmanrua tha kan si thei lo ding, vanram khal kan hrangah umze nei lo asi ding. Ngaidam thei lonak cu cancer natnak vekin milai thlarau eisiat tu, Thlarau Thianghlim lamzin daltu, milai thinlung sungah Satan ke-thlaknak asi.

 

* Zir ding: Pathian hman tlak mi si thei dingin ngaidamnak nunpi a tul. Cui ngaidamnak nun cun tangdawrnak nun a suahter. Ziangtin tile, milai remruatnak, thinheng le lungawi lonak hnakin Pathian lungawinak le Khrih ih thisen man cu thupi sawnah ret ringring asi. Milai hmuhdan, pomdan, ruahdan, duh/lo dan hnakin Pathian hmuhdan, pomdan, ruahdan, cu thupi sawn ah ret asi. Pathian in a duhdawt tukih a Fapa thisen in a lei zomi, a ngaidam zomi cu lungawi sopar ten duhdawtnak in pomrem theinak asi. Cutin zumtu nunah ngaidamnak in tangdawrnak a rahsuak theu. Cuvek nunah Joseph in a unau pawl a ngaidamnak ah hmuh theih khal asi.

 

# Tisa in a tuar har tuk mi tuar nak in:

Paul in II Kor. 12: 7, “Sikhalsehla khuaruahharza thil tampi ka hmuh ruangah ka puarthau lonak dingah ka taksa sungah hling i pek. Cuih hling cu Satan palai bangin hna a ṭuan ih ka puarthau lonak dingah i vuaktu le i khawngtu a si. 8Voithum tiang Bawipa ih hnenah thla ka cam ih hi thil hi hlonhlo dingin ka dil.” Pathian thlawsuah kan dawn mi pawl, leitlun mi pawlin an theih lo le neih lomi kan theih mi le neih mi pawl hi zumtu dang pawl le zumlo tu pawl hnenah kan porh awknak ah kan hman pang lo nak dingah, in tangdawr ter tu ding hmanrua hrangah kan parah harsatnak a thleng mi hi Pathian in a siang asi. Paul ih tuarnak vekin taksa naa tuarnak siseh Joseph ih tuarnak vekin unau pawlih hnawn mi sinak in siseh Paul kha a rualpi pawlin an tlansan vekin rualpi tha pawlih hnawn mi sinak in siseh, Paul kha a miphunpi Jews pawlin thi ding ko an vuak vekin mai duhdawtzetmi pawlih huatnak, hnawnnak le zuar thlainak in siseh, Paul kha Rome cozah in dik lo zetin thawng inn sungah an thlak vekin diklozet in sual puhnak, thuphan puh awknak siseh, a phunpun nitin nunah milai tisa in har a timi, tisa in a tuar thei lomi pawl hi Pathian fa le leitlun kan um sungah a ra thleng theu ding. Cuvek can a thlen tikah mi tampi in “Pathian ka hnenah a um lo mawsi” an ti theu. Sihman sehla, Pathian fate pawlin kan ruat sawn ding cu lungawi sawn ding kan si, “Bawipa, ka nun tang idawr ter tu ding tisa duh lo zawng ka nitin nunah a thleng rero, kan duhzawng an hloral, an liam rero ruangah lungawithu ka simih na hmin ka lo thangthat asi” ti ding sawn kan si. Tisa nuamnung, milai porh awknak le uan awknak pawl hi voi tampi cu Pathian thawn inhla aw ter tu sawn an rak si theu. Milai mizia, thinlungput, le dinhmun a bang awk lo vekin ziangvek dinhmun le thil thleng khal, Pathian hmaiah khuk inbil tertu, tang indawr ter tu cu zumtu Pathian fate pawl hrangah thiltha, kan dung in inkhawr tu fungfek vek an si sawn. Ziangah tile “Ziangtinkim ahhin Pathian cun amah a duhdawtu le amah ih tumtahmi vekih a kawhmi hrangah cun an ṭhatnak ah hna a ṭuan a si, ti kan thei.”

 

Zirding: Na tisa duh lo zawng, har timi in Pathian hmaiah khuk a lo bilter ih tang a lo dawrter sawn asi ahcun na lungawi sawn aw.

 

 

# Tluksiat le mualpho nak:

Voikhat cu tlangval note, Pathian tihzah tuk mi pa a rak um. Cupa cu a hung pitling vivo ih milai tampi duh a co zet. Pathian a tihzah tuk ruangah amah thattu ding hman a thah thei laiah that loin a kut a sup thei, “Pathian hriakthih mi parah kut ka thlak thei lo” ati. Asinan politics lamah akai so vivo ih a nuamzet, mipi duh a co ih hnatuansang bik dinhmun a thlen tikah a zumnak a tlansan ih tisa nuamnung cen duh ruangah tual a that, amai tisa nuamnung cennak ding hrang ahcun thuphan per, midang nunnak liam le mitthli tlak khal a poi ti nawn lo. A thinlung cu Pathian tihzahnak si loin amah milai tisa nuamnung cennak le milai cawimawi nak in a luah khat thlang. Curuangah, a tlusia ih a mualpho. A fapa in a lalnak a lawngih a nupi a sualpi. Cutikah lamzin parih milai hmanin an hnihsan, an nautat. Cutikah a sir aw aw ih a tap ciamco, Pathian hnenah “Ka nui pumsung ka um lai ihsin misual ka si” tiah Pathian hmaiah lung kekkhuai in thla a cam. Pathian hnen ihsin zianghman hmu tlak lo, thlawsuah dawng tlak lo asizia a thei fiang aw sal ih tangdawr in Pathian kephah hram ah kun in thla a cam. Amah camsiattu pawl tla a camsiat ngam lo, Pathian in a fial mi an si pang ding a ti. Curuangah Pathian in a siangpahrang sinak lal tohkham cu a peksal.  Cupa cu tuukhal pa David, siangpahrang dinhmun tiang Pathian in a cawisan mi asi.

 

“Laimi pawl in lennak kan tuar thei lo” an rak ti theu vekin, Pathian hnen ihsin thlawsuah malza sawm kan dawn mi pawl hi mi tampi in amah Pathian hngilhnak le kan minungpi, midang nautatnak ah kan hman sual theu tikah tluksiat lungkuai nak in voi tampi cu Pathian fate pawl hi tangdawr ter kan si theu. Curuangah raldo nak hmunih hliamhma tuar kan ralkap pi pawl kan phur, kan tuamhlawm vekin vanram lamzin kan khualthlawnnak hmunah tluksiatnak in thlarau hliamhma a tuar tu kan kiangkapah zumtu unau Pathian fate pawl hi khatlekhat sawmdawl aw tawn, bawm aw tawn sawn ding kan si. Satan fate pawl cu Pathian fate an tluksiat, an bah tikah an lung a awi tukih an rel khawp thei lo ding. Thosal thei nawn loin Pathian in dungtun ta sehla an duh sawn ding. Sihman sehla Pathian fa, zumtu pawl cun kan kiangkap ah a cak lo mi, a thluse mi, a bah mi, hliamhma tuar zumtu unau kan hmuh tikah sawmdawl, bawm aw tawn sawn ding kan si.

 

Zir ding: David siangpahrang hman a tluk siat ahcun nang le kei , zohman, ka thluse dah lo ding tiah mahle mah a rinsan aw ngan kan um asile kan dingdah lo, vanram lamzin khuatlawnnak ah kan feh dah lo lawlaw tla a rak si thei. Pathian fale pawl, phang hrimhrim hlah uh, tluksiatnak tih hrimhrim hlah uh. Voi sawmsarih ih let sarih tlusia khal sehla in kai tho sal tu ding Bawipa kan nei asi, huham cahnak thawn lam in hruaitu Thlarau Thianghlim a um asi. Cutin na tlukbah hnu ah na hmuh dah lomi Pathian ih ngaidamnak sunlawizia na nun in a tep sawn dingih midang na hlawm thei sawn ding asi.

 

# Theihthiam lomi nun:

Mai theihfiang lomi thu ah a buai tuk tu pawl khi an theih mi nunpi lo tu pawl an si theu. Midang fello nak parah abuai tuk tu pawl khal khi anmai tuah lo, fello nak kha midang mawhnak in khuh tumtu pawl an si theu. Cuvek thotho in an tuah thei lomi parah a buai tuktu pawl khi an tuah thei mi parah felzetin tuan lo tu pawl an si theu. Milai theihnak hi rak famkim sehla Evi khal a rak tluse lo ding. Theihnak hi milai thinlung in a hal ih theih a cak tuk mi a cem dah lo. Hmun tampi ah mi tampi in theih nak hi fimnak ah an ruat ruangah theihnak an zuam awk ciamco tikah an theih mi hnakih tam an sim sual theu tikah thuphan an rel tel ringring theu. Milai cu thil ziangkim lakah malte lawng thei dingin sersiam mi asi. Cutin a theih lomi parah Pathian hnenah hngat aw aw in, tangdawrnak in nung dingin sersiam kan si.

 

Voikhat cu tlangval note in company pakhat hnenah hnatuan a va dil. Cule, interview an tuah hnu ah, “Manager hnatuan kan lo pe ding” an rak ti. Cutin Manager hnatuan tuan dingin a feh tikah company cun company dang hnenah an rak zuar. An zuarnak company in thawngah an rak thlak, kum reipi thawng in sungah a um. Cutin company manager tuan ding cu thawng inn sungah a thleng. Thawng inn sung a um lai ah company pathumnak te in a thu hla an rak thei ih an rak lei ih amah cu company manager an tuan ter. Cutin manager a tuan lai ah a rak zuar tu company te kha bankrupcy (tlaksiatnak) an file ih a hnen ah bawmnak an ra dil. Cui thuanthu tawi cu Joseph ih nun sim duhnak hrangah ngan mi asi. Joseph ih nun zoh asile a theih thiam lomi nun kekar hlir in a khat.

 

Zumtu Pathian fa le zo khal, leitlun khualtlawnnak lamzin parah ziangruangah ziangtikah ziangtin ziang a cang ih a cang rero, a cang lai ding, timi Pathian in intheihter theh lo. Theihtheh tum rero le thei theh vekin um cu atnak asi. Kan theih lo mi thu ahcun hnangam ten Pathian hnenah hngat aw men ding kan si. Kanmah mi pakhat cio nun, insang, rualpi, vengsugn, ei in hawlnak, rualpi, kawhhran, le miphun thuanthu nung santiluang in a fen rero mi kar lakah kan theih mi cu maltak te lawng asi ding. Asinan, mi zokhal, Pathian thu vekin Pathian tihzahnak hnuai ah nun thianghlim in nung dingin siatha theihnak Pathian in in pek cio ih “ka theih lo ruangah sual ka tuah asi” tiah puhmawh ding nei kan um lo. Kan theih mi lak ihsin Pathian in thiltha tuah ding in fial mi pawl cu tuah in kan theih lo mi hmuahhmuah cu Pathian kutsungah a um asi ti hnangam ten zumnak in nung ding kan si. Mi zokhal a theih lomi, tuan thei lomi tuanfial asi lo. Ziangruangah kan duhmi a fimkim loih kan duh lo mi thil a cang rero tiah Pathian vuihram rero ding zohman kan um lo. Kan theihlonak hin Pathian kehram ah tang indawr ter sawn ding asi.

 

Mi zokhal, a theihnak a nunpi lo ahcun a theih lo lawlaw hman a tha sawn. Fimnak tello theihnak cun milai a porh awk ter ih Pathian Thlarau hnatuannak a dal sawn asi. Curuangah mi zokhal, mai theih lomi thu ruangah ruahhar in um ding kan si lo. Kan theihmi sungah nunpi in tuan fial mi kan sivek in tuan in kan theih lomi ruangah tangdawr sawn ding kan si. Kan theih lomi in Pathian thawn innai aw ter sinsin in intangdawr ter sinsin ding a si. Theihnak tlaksam ruangah khawruah harnak kan tawn tikah theihnak in a famkim mi nun kan neih lai dingmi kumkhua nun in ngai ter sinsin tu ding asi.

 

Netnakah;

Leitlun khualtlawnnak lamzinah zumnak in a nungih Khrih dung a thluntu pawl cun tisa ih a ngaidam thei lomi ngaidamnak, tisa in a tuar har tuk mi tuarthei nak, tlukbah nak, le theihthiam lomi nun pawl hi karkan tengteng ding nun karbak pawl an si. Cutin milai in kan tuah thei lomi cu Pathian Thlarau bawmnak in kan tuahsuak tikah Pathian in kan tuah thei lomi zianghman infial dah loih, kan pahtlang thei lomi lamzin ah in hruai dah lo asi ti in theihter sawn asi. Cun ziangkim a harsa tuar ding in sian tikah laksawng in kamcia mi a um ringring asi ti in hmuhter fawn. Khatlamralah kan zoh asile tisa in a tuar thei lomi le tuah thei lomi lamzin a zawh dah lo tu cu thlarau lamah a thangso dah lo dingih Pathian laksawng khal a co dah fawn lo ding. “Tisa duhzawngin a nungih tisa in a ukmi cu Pathian fate an si lo” tiah sim kan si fawn.

 

Tangdawrnak cu milai sinak cu khross ah khenbet in Pathian Thlarau kan sungah cangvai dingin milai sunglam cu lawng ternak asi.