|
SELINGLET: THLARAU THI
Milai tluksiatnak, Pathian thawn then awknak, thlarau thihnak, sual ih rah pawlin milai parah ziangtluk a siatsuah, timi zoh hnik uhsi. Zocio khal tangdornak thawn Pathian thu, Bible ih asimmi vek cekci in, Thlarau Thianghlim in ka sungmuril ah a fianter, cianter vek cekci in ka pom thei ding asi, ti thinglung tangdornak thawn, Pathian hmaiah khuk bilin Bible in a simmi zoh cio uhsi.
Sualman cu thihnak: Taksa, thinlung, thlarau thihnak: Genesis 2:15-17, Cun Bawipa Pathian in a seemsuah mi pa cu loram ṭuantu le kilkhawitu dingin Eden hmuan ah cun a umter. 16Pathian in a hnenah, “Hmuan sungih a ummi thingrah hmuahhmuah na ei thei; 17a sinain a ṭha le a sia theihthiamnak thingkung ih rah cu na ei hrimhrim lo pei. Na ei asile na ei ni in na thi ding,” ti ah a sim. Sem 3;23, Curuangah Bawipa Pathian in minung cu a seemnak leilung thlo dingin Eden hmuan ihsin a dawi. Isai 64:6; Kan zate in mi borhhlawh kan si ṭheh; kan hnaṭuan ṭhabik khal cu fihnungzet a si ko. Kan sual ruangah thli ih semhlo mi thinghnah ro bangtuk kan si. Genesis 6:5, Pathian cun leilung par milai hmuahhmuah cu an ṭha lozet ih an thinlung ah ruahnak siava lawnglawng a khat ti kha a hmuh tikah, 6leilung parih milai a tuah cu a sir-aw sal ih a riah a siazet. Psalm 51:5, Ka suahthlak in mi ṭha lo ka si, Ka nu ih pum sung ihsin misual ka si zo. Romans 5:12, Sualnak cu mi pakhat ruangah leilungah a ra ih cuih a sualnak cun thihnak a thlenpi. Curuangah thihnak cu mi hmuahhmuah hnenah a thleng, ziangtin tile zozo khal an sual ṭheh. I Corinthians 2:14, Thlarau minung a si lomi pawl cun Pathian Thlarau hnen ihsin a rami laksawng cu an co thei lo; a theih khal an thei thei lo. Ziangah tile cuih laksawng pawlih sunlawizia cu thlarau thinlung lawngih theih theimi a si ih cumicu annih hrangah cun aat-hna a si. Romans 3:10-18, 10, Ca Thianghlim in: “A dingmi zohman an um lo, 11A fimmi pakhat hman an um lo, Pathian biatu khal an um lo. 12An zatein Pathian hnen ihsin an pial thluh ih, zinpeng an zawh ṭheh zo. Zohman thildik a tuahtu an um lo, pakhatte hman an um lo. 13An ṭongkam cu thihpi tlakmi bumnak hlir a si; An lei ihsin ṭihnungza thuphan pernak a suak; An hmur ihsin thihsii, rul tur bangtuk a suak. 14An ṭong cu mi camsiatnak hlir in a khat. 15Mi tuahmawh ding le mi phil (* 3:15 Phil: timi cu that thup tinak a si.) dingah cun an zamrang zet; 16An fehnak kipah siatsuahnak le cemralnak in a thlun hai. 17, Daihnak lamzin cu an thei dah lo; 18Pathian ṭihzahnak khal an zir dah lo,” a tivek kha a si. Jeremiah 17:9, “Milai ih thinlung cu zoso a theithiam ding? Ziangdang hnakin mibum hmang bik a si; Damter dingah a harzet, a natnak a besia tuk!
Ephesians 2:1-10, 1Hlanah cun nan ṭhatlonak le nan sualnak ruangah thlarau lamin mithi nan si. 2Culai ahcun khawvel daan sia siseh, van tlolak le lei khawvel karlakih thlarau lam huham neitu, Pathian thu ngai duh lomi pawlih lakah hna a ṭuan rerotu thlarau siava ih thu siseh, nan rak thlun. 3Thungai in kan ti le kan zatein anmah vek thotho kan rak si; kan taksa hurnak thlunin kan rak nung, kan tisa le thinlung ih hiarmi poh kan rak tuah. Kanmah si daan te cekci ih kan rel ahcun kannih khal midang vek thotho in Pathian thinhengnak a tuartu ding kan si. 4Sikhalsehla Pathian ih in zaangfahnak cu a tlamtling ngaingai ih in duhdawtnak khal a tumzet ruangah, 5kan sualnak sungah thlarau lamin mithi cia kan si ko nain Khrih thawn nunnak ah in thoter sal zo. Pathian ih zaangfahnak thawngin rundammi nan si. 6Khrih Jesuh thawn kan pehzom awknak thawngin Pathian in Khrih thawn vancung ramih uk tlang dingah amah thawn in thoter sal zo. 7Hi bangtuk ih a tuahnak cu ziangdang ruangah a si lo; Khrih Jesuh sung ihsin kannih in duhdawtnak a tumzia kha kumkhua daih in langter a duh ruangah a si. 8Ziangah tile nannih cu Pathian zaangfahnak zaarah zumnak in rundam nan si. Hi rundamnak cu nan ṭuannak ruangih nan ngahmi a si lo, Pathian ih laksawng a si. 9Cuhrangah zo hman porh awk ding a si lo. 10Pathian in kan ṭuan ding hrangih a rak timtuah ciami hnaṭuan ṭha ṭuantu dingah Khrih Jesuh sungin kannih cu siamtharmi kan si. Matt. 10:28, Taksapum a that thei nain thlarau a that thei lotu pawl cu va ṭih hlah uh. Takpum le thlarau a pahnih in hell sungih a that theitu Pathian kha va ṭih sawn uh. Matthew 7:17-18, 17A harhdammi thingkung ṭha cun rah ṭha a rah ih thingkung ṭha lo cun rah sia a rah. 18A harhdammi thingkung cun rah sia a rah thei lo ih thingkung ṭha lo cun rah ṭha a rah thei ve lo John 6: 43, 44, Jesuh in, “Phunzai ruri nawn hlah uh! 44 I thlahtupa in ka hnenih a kuat lo ahcun zohman ka hnenah an ra thei lo ding; cutiih ka hnenih a rami cu ni neta bikah nunnak ah ka thoter ding. 1 Cor. 12:3, Asinain Pathian Thlarau ih hruaimi pawl cun, “Jesuh cu siatserh si ko seh,” an ti thei lo ding ih Thlarau Thianghlim ih hruaimi pawl lawng in, “Jesuh cu Bawi a si,” an ti thei ding. John 15:4-5, 4Keimah thawn pehzom uhla kei khal nanmah ka lo pehzom ve ding. Sabit hnge cu amahte lawngin rah a rah thei dah lo; Sabit hripi thawn a pehzom awk lawngah a rah thei a si. Cubangtuk in keimah thawn nan pehzom awk lo ahcun nan rah thei hrimhrim lo ding. 5Keimah cu Sabit hri ka si ih nannih cu a hnge nan si. Zokhal ka sungah a um ih kei khal a sungih ka umcilh mi cun rah tampi a rah ding; ziangah tile keimah tel lo cun zianghman nan tuah theimi a um lo. Romans 8:7-8, 7Curuangah mi pakhat minung sinakih a ukmi cu Pathian ih ral a si, ziangah tile Pathian ih daan a thlun lo; a thlun duh lo lawng si loin a thlun thei lo. 8Minung sinakih daan a thluntu pawl cun Pathian lung an awiter thei lo. Acts 16:14, An lakih pakhat, kan thu a ngaitu cu Thiatira khuami Lydia a si ih amah cu puan sendup zuartu a si. Amah cu Pathian a biatu a si ih Paul thusimmi kha ṭhateih ngai dingah Bawipa in Lydia ih thinlung saangka a on. Ephesians 4:17-18, 17Bawipa ih hmin in nan hnenah ralrinnak thu ka sim duh: Khawvel mi bangin nung nawn hlah uh. Annih pawlih ruahnak cu thulolak a si ih, 18an thinlung cu a thim. Pathian ih pekmi nunnak sungah covo zianghman an nei lo, ziangah tile zianghman theihmi an nei lo ih an thinlung a ruh remrem. 2 Cor. 3:12-18, 13Kannih cu Moses vek kan si lo. Moses cun a mithmai tleu a ziam vivo kha Israel mi pawl in hmu thei hlah haiseh tiah a hmai cu puan in a khuh aw. 14Ziangti a si khal le an thinlung saangka cu a pit thotho a si. Tuihsun tiangin thukham hlun cabu an siar tinin an thinlung cu puan in a khuh lai a si. Minung cu Khrih thawn an pehzom awk tik lawngah cuih puan cu a hawk aw a si. 15Tuihsun tiangin Moses Thukham an siar tikah an thinlung cu puan in a khuh thotho lai. 16Sikhalsehla cuih puan cu hlonhlo a theih; Ca Thianghlim khal in, “Moses cu Bawipa lamih a her tikah a puan cu a hawk aw,” tiah a ti. (*3:16 Suah 34:34 17Hitawk ih, “Bawipa,” a timi hi Thlarau a ti duhnak a si.) Cule Bawipa ih Thlarau umnak kipah cun zalennak a um. 18Kannih tla cu kan zatein kan hmai puanih tuammi kan si nawn lo ruangah Bawipa ih sunlawinak hi thlalang bangin a langtertu kan si. Cuih sunlawinak John 1:11, A ram sungah a ra nain a minung pawl in an rak saang lo. John 8:43, Ka simmi hi ziangah so nan theih thei lo? Ka thu simmi hi nan tuar thei lo ruangah a si. Matthew 13:14, Curuangah profet Isaiah ih simmi kha an parah a kim a si. An zoh rero ding nain an hmu thei lo ding. 1 Cor. 1:18, 21, 18Thinglamtah parih Khrih thihnak thu hi a hloral cuahcomi pawl hrangah cun aat-hna meen a si; sikhalsehla rundam lai reromi kannih hrangah cun Pathian ih cahnak hmual a si. 19Ca Thianghlim in, “Mifim pawlih fimnak cu ka siatsuah ding ih, Mithiam pawlih thiamnak cu ka hnong ding,” a ti. *1:19: Isai 29:14 20Curuangah mifim pawl khuiah so an um? Mithiam pawl khuiah so an um? Leilung tlun thu-el thiam pawl khuilamah so an si? Leilung tlunih fimnak hi aat-hna a si, ti kha Pathian in a langter zo a si lo maw? *1:20: Job 1:22; Isai 19:12, 33:18, 44:25 21Minung in anmah ih fimnak in Pathian an theih thei lonak dingah amah Pathian in a fimnak in a rak tuah cia zo a si. Sikhalsehla kan phuan mi “aat-thu,” an timi Thuthang ṭha hi hmang tahratin a zumtu pawl rundam dingah Pathian ih tuahmi a si. 22Judah mi pawl in a dik le dik lo theih theinak dingah hmuhsaknak mak hmuh an duh; Grik mi pawl cun fimnak sawn in an hawl. 1 Cor. 2:14; Thlarau minung a si lomi pawl cun Pathian Thlarau hnen ihsin a rami laksawng cu an co thei lo; a theih khal an thei thei lo. Ziangah tile cuih laksawng pawlih sunlawizia cu thlarau thinlung lawngih theih theimi a si ih cumicu annih hrangah cun aat-hna a si. John 3:3, Jesuh in, “Thungaite in ka lo sim: zokhal hrin sal (* 3:3 Hrin sal: timi hi Grik ṭong ahcun ‘tlun lamih hrinmi,’ ti khal a si thei.) a si lo ahcun Pathian Uknak a hmu thei lo ding,” tiah a ti. John 15:5, Keimah cu Sabit hri ka si ih nannih cu a hnge nan si. Zokhal ka sungah a um ih kei khal a sungih ka umcilh mi cun rah tampi a rah ding; ziangah tile keimah tel lo cun zianghman nan tuah theimi a um lo John 6:63, 64-65, 63Nunnak taktak a petu cu Thlarau a si; milai-ih taksa cu san a tlai lo. Nan hnenih ka simmi ṭongkam hi nunnak le Thlarau petu a si. 64Asinain mi ṭhenkhat cun nan zum lo,” tiah a ti. Jesuh in a hramthokte ihsin zoso i zum lotu ding, tile zoso i zuartu ding ticu a thei ṭheh zo. 65Cule Jesuh in, “Hiti a si ruangah sokhaw Pa in ka hnenih a ratter lo ahcun zohman ka hnenah an ra thei lo ding, tiah ka lo simnak kha a si cu!” tiah a ti. Mat. 16: 17, Cutikah Jesuh in, “Johan fapa Simon, mi vannei na si! Ziangah tile hi thu cu minung hnen ihsin na ngahmi a si lo, vancung i a um ka Pa in na hnenih a phuanmi a si Ezek. 11:19, Thinlung le ruahnak thar ka pe ding. Lungto vekih a hakmi an thinlung cu ka hlon hlo ding ih thinlung neem ka pe ding. John 15:16, Nannih in in hriil lo; keimah in ka lo hriil hai ih kumkhuaih a hmunmi rah nan va rah theinak dingah ka lo fial a si. Ka hmin in Pa hnenih nan dilmi hmuahhmuah cu a lo pe ding. Sualthu siar bet duh hrangah: http://www.hremang.com/Home/sual-thu ah siar bet ding a um. Altunah kan hmuh vek asile, Pathian in milai duhhril theinak cu a laksak lo, a siatsuah lo. Milai cu sual ah a tluksiat tikah Bible in a simvekin thlarau ah mithi asi ih Pathian thawn pehtlaih nak a nei nawn lo. Milai thinlung khawruahnak cu Pathian Thlarau uknak, fimzirh, kaihhruai, lamzin hmuhnak hnuai ah a nung nawn lo. Satan sawn in a uk. Cuticun milai mizia cu selinglet thluh asizo. Cutin milai thinlung, siatha theihnak cun amai mizia sual dokalh in thiltha tuah cu duh zet theu ding maw, milai mizia cu sual mizia, a thluse zo mi asi tikah thiltha thleidan thiamnak le tuah thei nak a nei nawn lo. (Thiltha ti tikah, milai cuaithlainak ih ‘thiltha’ si loin, Pathian in ‘thiltha’ a timi cu milai in a tuah thei nawn lo. Cutin, Bible in a sim vekin milai tuah suak mi, nunrah cu sual lawnglawng, Pathian hmaiah selinglet, bawrhhlawh, puanse hnophnol vek fang asi. Cutin, milai cu Pathian ih dingfelnak thianhlimnak cuaithlai tehfung ah a tling nawn ta lo. Cucu a tlunih Bible bungcang pawl lakkhawm in simmi asi.
Hminsin: “Thiltha” titikah milai in “thiltha” timi le Pathian in Bible sungah a ngan vekin “thiltha” a timi thleidan thiam ding asi. Bible sungah Pathian amah le amah a puansuah awknak le a duhdawt mi milai a sersiamthar nak hrang a hnatuan pawl cu casiar tu zate par ah Thlarau Thianghlim in lo fianter hram sheh!
Hre Mang |