Na Nitin Nunah Pathian a tel maw

 

Na nitin nunah na Pathian a tel maw?

 

Leitlun sakhua biaknak tampi cun pathian a um ti an zumih a um asi tiah an zummi Pathian cu an be theu. Asinan, cui pathian cun an nitin nunah a umpi, telpi dah lo ih lam hla pi (vanram) ah a um asi tin an ruat. Cutikah ziangkim an tuah, an ruat, an tong tikah pathian um lo vekin an cangvai. Asile, nang le kei teh kan nitin nunah Pathian ziangtluk a tel ti a hnuai lam vekin zoh hnik uhsi!

 

1)      Na khawruah nak: KLICK 

2)      Na hna in na theihmi: KLICK

3)      Na mit in na hmuh mi: KLICK

4)      Na taksa in a dai mi:

5)      Na tongkam:

6)      Na tuah mi:

7)      Nangmah thawn a pehtlai mi pohpoh ah

 

1)      Na khawruahnak:

 

Voikhat cu Satan hin milai khawruahnak sungah ziangtluk tiang a tel thei timi hliakhlai dingin ka timtuah rero laiah ka blakberry cellphone sungih Bible ah (search) “satan” timi tongfang hmanin hawl-awl nak in tongfang ka hawl tikah I Sansiarnak 21:1, a ra suak hmaisabik ka siar ngah, “Satan in Israel parah harsatnak thlenter a duh ruangah David cu thusia a forh ih Israel mipum siar duhnak thinlung a neihter”.

Hitawkah a fiangzetmi cu, Pathian in a rinsan zetmi, David Siangpahrang, thinlung sungah Satan in ziangtin hna a tuan, David thinlung kha thunun (uk) tahratin a khawruahdan kha Pathian dodal le Satan duhzawng in a ruatter ih a ramsung mipum a siar ter thu kan hmu. Bible in ziang a sim ti zoh hrih uhsi, a hnuailam thu pawl hin a sim fiang zet.

 

Duntluntu 5:3, Cutikah Piter in, “Ananias, ziangah so Satan in a lo neh ih na thil zuarnak ih na ngahmi tangka a hrek cu suup tahrat in Thlarau Thianghlim na bum? Mirang in, (New American Standard Bible (©1995)) “But Peter said, "Ananias, why has Satan filled your heart to lie to the Holy Spirit and to keep back some of the price of the land?”

 

Hitawkah a fiangzet mi cu Ananias ih thinlung khawruahnak sungah Satan in hmun a luah, a khawruahnak sungah Satan in Pathian hmaiah thuphan per dingin a fial ti a fiang. Ananias ih thinlung kha Satan in a uk (thunun) ti a fiang. Asinan a tuar tu cu zo asi? Cun Judas sungah Satan a lut thu zoh hrih hnik uhsi:

 

 

Luke 22:3, “Cule dungthluntu hleihnih sungih a telmi Iskariot an timi Judas sungah Satan a lut.” Mirang in, “And Satan entered into Judas who was called Iscariot, belonging to the number of the twelve”.

 

Jer 17:9 “Milai ih thinlung cu zoso a theithiam ding? Ziangdang hnakin mibum hmang

bik a si; Damter dingah a harzet, a natnak a besia tuk! Mirang in, (New American Standard Bible (©1995)  "The heart is more deceitful than all else And is desperately sick; Who can understand it?”

 

Ecclesiastes 9:3

3Cumi cu khuaza vanrang hnuai ih thil ṭha lobik a si. Mi hmuahhmuah hrangah khawlairel bangrep a thleng. Minung thinlung cu an nun sungah aatnak le ṭhatlonak in a khat. Cui hnuah mithi pawl hnenah an feh a si. Mirang tongin, “This is an evil in all that is done under the sun, that there is one fate for all men. Furthermore, the hearts of the sons of men are full of evil and insanity is in their hearts throughout their lives. Afterwards they go to the dead.”

 

Mark 7:20-23: Cule Jesuh in, “Mi a baaltertu ngaingai cu a sunglam ihsin a suakmi an si. 21Ziangah tile ṭhatlonak a tuahtertu ruahnak ṭha lo pawl cu minung sunglam ihsin a suakmi an si: nupa sualnak, rukruk, mithah, 22ṭaangṭawm sualnak, duhham, thil siava dangdang tuah, mibum, a mawi lo zetmi thilsual tuah, iksiik, misimsiat, puarthau le aat-thlakza thil tuahnak, 23hi thil siava pawl hi minung thinlung sung ihsin a suakmi an si ih hi pawl hin mi an baalter a si,” tiah a ti.

 

Zumtu, Khrih dungthlun tu pawl mah le mah ralrin tul mi cu:

·        Milai thluak, thinlung sungah ruahnak (pomdan, hmuhdan, ngaidan, tvp) a suak tertu hi khui tawk ihsin asi, ruahnak a suak ter tu pathum: Satan, milai thinlung, le Pathian Thlarau hnen ihsin an si.

·        Milai thinlung cu Pathian Thlarau in a uk lo asi ahcun mah le mah humhim awknak nei lo, Satan in a duh tiktikah a duhduh tuahter ruatter dingin a ukmi ( a thunun mi) asi.

·        Satan tel lo hman in milai thinlung cu sualnak ih hrampi asizia thu Bawi Zesu in a sim.

·        Curuangah, mi zokhal, pastor le kawhhran hruaitu pawl telin (David Siangpahrang telin), Pathian Thlarau in a uk lomi thinlung cu Satan hmanrua men ansi ringring ti fimkhur a va tul ve.

Asile, kan thinlung sungah ruahnak kan neih mi cu khui tawk ihsin a ra ti ziangtin kan theithei ding? A tawinak in, Pathian Thlarau in a uk lomi milai (thinlung) pawlin theihtheinak an nei lo. Pathian Thlarau in a uk lo mi thinlung ihisin a suak mi ruahnak pawl cu thiltha, Pathian duhzawng kan tuah si hmang an ti lai ah Pathian Thlarau an dodal rero asi. David Siangpahrang in a uk mi miphun pawl mipum siar cu a sual maw si? Evi in a thinlung sungah satan in ruahnak a pek vekin siatha theihnak thingrah a ei ih fim deuh ding cu a sual maw si? Saul siangpahrang in a ral neh mi pawl hnen ihsin rannung a lakmi thawn Pathian hnenah thawinak a pek cu a sual maw si? Pathian in a sual a ti, a pom lo. Leitlun milai pawl ruahnak cu Pathian Thlarau in a uk lo, a thunun lo tikah satan in a uk, a thunnun hai theu asi.

 

Curuangah ziangvek zumtu, piangthar ti aw tu, pastor le biaknak lam zuam zet pawl khal an thinlung khawruahnak cu Pathian Thlarau in a uk lo can poh cu satan in a duhduh in a uk ih a hmang thei asi ti a fiang.  

 

Na thinlung Pathian Thlarau in a lo uk, thunnun ringring maw?

 

Pathian Thlarau in i-uk maw ti ziangtin ka theithei ding? Tiah na sut lala men thei. Na thinlung Pathian Thlarau in a lo uk maw, uk lo ti na theihtheih nak ding awlsam bik cu, na thinlung suangah khua a luah tam bik tu, na thinlung in na ruahmi, na duh mi, huat mi, nuam ti zawng, har ti zawng kha zoh aw aw la na thei thiam mei ding. Pathian Thlarau in na thinlung a uk asi ahcun Pathian in a duh mi pawl na duh dingih a huat mi pawl na hua ding. Pathian in a duhdawt mi na duhdawt dingih a huat tuk mi na hua tuk ve ding. Pathian in a duhdawt tukih a fapa thisen in a leimi, khrihfa, pawl na huat asi ahcun na thinlung sungah ziang in a lo uk ti cu sut aw rero nawn hlah. Pathian hmuihmel keng pawl na hua asile zo na hua ti khal midang sim tul loin na thei ko. Pathian in a huat tuk mi,  a Fapa kha Khross parah a thihtertu, sualnak kha nuam na ti tukih na nunpi rero asi ahcun na thinlung kha zo in a lo uk ti kha sut rero nawn hlah aw. Biak in ah ziang na tuah, ziang dinhmun na nei, timi asilo, na sungah ziang a um, na sunglam nun kha zo in a lo uk, timi kha na sinak taktak, na thlarau mi sinak taktak sawn asi. Na thih tikah, na sunglam lo uk tu in amai umnak ah a lo hruai ding, a lo thlenpi ding.

 

Na khawruahnak, na hmuhdan, pomdan, duhmi, huatmi, hiar mi, nuam timi, cak mi, ziangkim na lungsuak ihsin a puak suak mi ah na Pathian a tel maw? A tel lo asi ahcun satan ih uk mi le mibum hmang bik na thinlung cun na nitin nunah a lo bum zawk rero dingih a lobum asi ti hman na thei aw lo ding. Na theih awk tikah David, Evi, Ananias te nupa, pawl vekin khua a rak tlai tuk zo ding.

 

“Zukneng in sihti a ngai bangin Bawipa, ka nun in nangmah a ngai” ti ah laimi zumtu pawlin hla an rak theu nan an thinlung in a ngai mi taktak cu leitlun tisa duhzawng, Bawipa ih huat zawng, a rak si theu tihi mi tampi in an ruat dah lo tla asi thei.

 

Na khawruahnak, thinlung sungah Bawipa in a lo uk maw? Pathian Thlarau in a kaihhruai mi le a ukmi Khrih dungthluntu pawl nun ahcun ziangkim khawruahnak, thinlung sung hmunluah tu suangtuahnak le thuthluknak (decision) fate bik tiangin Pathian Thlarau in Khrih hmin sunlawinak ding hrangah a kaihruai, a uk, a thunun ringring asi.
 

2. Na hna in na theihmi:

 

Voikhat cu pastor pa in hitin a sim, “Na hna kha hnawmpung asilole thusia lut ter hlah aw, ziangah tile zohman duh lomi hnambal pawl cu hnawmpung sungah an hlawn theu” ati. Laimi lakah mi relsiat  thangsiat hmang ziangah an tam tuk ti asile a ngai paih tu an tam tuk ruangah asi. A ngai paih tu um lo sehla zohman in mi relsiat thangsiat paih an um lo dingih satan khalin amai hlawknak um loin mi relsiat thangsiat tu pawl kha hlawhman pek in a sawr rero paih nawn lo ding. Curuangah midang, Pathian fale pawl relsiat thangsiatnak thu nuam le phur zetin a ngai rero tu cu a reltu tha pe rero tu, bawmtu asi ih a reltu vek thotho in thusia karhzai ter tu dingah an thupit dan a bang aw aw. Bazar ah salei tu le zuar tu cu sa bazar a um ringring thei nak dingah an thupit dan a bang awk vek khi asi. Thusia, satan duhzawng na ngai rero asile satan bazar um ringring dingin thazang na pek rero asi.

 

Hna sung ihsin a lut mi in lungput a danglam ter ih lungput mizia in nuncan ziaza, mithmai langdan le tongkam a suahter. Na hna sungah ziang a lut ti na fimkhur lo asile na lungput thinlung mizia na duh vekin na kaihrem in na mawng thei lo ding. Mi tampi in an duhzet mi mizia, nunzan ziaza mawi an neih thei lo nak cu an duhzetmi mizia mawi nei dingin theih tul mi an hna sungah an thunlut lo ih an duh zetmi nuncan ziazia lungput mizia pawl siatsuah tu thusia tamtuk an hna sungah an lutter ruangah asi theu. Cun, na hna in ziangvek ngai nuam na ti, timi in ziangvek milai na si, na sunglam ah ziangvek in a lo uk ti khal theih theih na si. Cinghnia rual umnak ah beram rual an um thei lo vekin na sunglam ah thusia, satan hmanrua na umter asile a thianghlim mi Pathian Thlarau na sunglam ah a um lo tinak asi. Na inn hnen pa kha zovek asi ti na thei duh asile leng ihsin a inn sungah zovek milai an lut rero ti zoh aw la na theithei mei ding. Cuvek in na sunglam ah na lut ter mi, na hna kua sung ih nitin a lut ringring mi tongfang pawl kha na sunglam in ziang a hiar, nuam ati, na sinak tataktak langter tu an si.

 

Zumtu Khrih dungthlun pakhatkhat cu Satan fa le pawlin an pupa an porh rero nak lakah reipi a umih a hna sungah satan an porh rero nak tongkam a ngai rero asi ahcun amah le amah tihnung dinhmun ah a ret aw rero tinak asi. A tisa in ngai nuam ati zet mi, thulolak hnihsuak, phur um, thinlung hloptlo ter tu, cawk phur tu, hiar hal nak, hurkhuannak, puarthau nak, midang ziangsiar lo tongkam, midang namthlaknak tongkam, pathian fale pawl thangsiat nautatnak, tvp, thu pawl a hna sungah a thunlut tam poh asile a thinlung mizia cu a hna sung ihsin a theih mi vekin satan duhzawng le a hmanrua ttha si dingin  in tuah rero asi vekin Pathian thutak, nunsimnak, le a thlarau hrang thuthangtha, zirhnak pawl cu a thinlung in a kha fualvo vekin, asilole ngai nuam tinak a nei nawn lo ding. Curuangah voi tampi cu biaknak lam thu ahcun sakhaw mi zet vek si si in biak inn sung ah Pathian thuthangtha ngai ve ten a it tthat ringring tu pawl, Pathian thusim a sau tuk tiah phunzai ringring tu pawl khi an nun tikcu can an hman dan zoh asile leitlun thu lawnglawng an hna sungah an rak lut ter tikah an thinlung sung cu leitlun thu pawl in khua a luahkhat theh mi an rak si theu nan hmu ding.

 

Satan fa le pawlin an pupa an porh rero nak tongkam cu ziangvek saw asi, tiah a suttu tla nan um men thei. Malten sim sehla; mi pakhatkhat in pastor le Pathian fa, zumtu pawl an tluksiatnak, tlaksamnak thu, thangsiat le nautat, se-tet zawngin nuam ti zetin a rel mi siseh, leitlun tisa nuamnung cemnak milai thinlung lapeng tu thu pawl thaw zetin sim rero nak cu, khatlam zawngin kan sim asile, an pupa satan an porh rero nak asi. Satan hnatuan a tlawhtlinnakah a lungawipinak thu asi, ih satan hlawhtlinnak a lungawipi tu cu Pathian lamtang asi thei lo. Curuangah mi zokhalin Pathian mithmuh le Bible in a thianghlim lo atimi thu pawl a hna sungah a lut ter rero asile satan duhzawng lungput le thinlung mizia nei dingin a tuah aw rero tinak asi. Osama bin Ladin ih zirhnak hnuai ah a thanglian mi pakhat cu America ralkaptha a cang thei ding maw si?

 

Curuangah, Pathian Thlarau tel lo, thu relkhawmnak le a bawrhhlawh mi hnihsuah sainak hmunah, tisa thinlung cawm thau dingin le nuam ti zetin a to rero tu cu satan ralkap tha si thei dingin a tisa mizia a cawm thau rero tinak asi. Pathian le a fale pawl dodal dingin a thinlung a timtuah rero tinak asi.

 

Cun, Pathian fa le zumtu pawl cun thinlung sungah hmun luah tu thu pawl hi fimkhur a tul. Milai zokhal tikcu can khiahcia sungah kan nungih nitin can bitiam sungah a nungmi kan si vekin nitin can hmandan, hna sungah lut termi thu pawl buuk aw tawn ding a thupi tuk. Mi zokhalin a nitin nunah a hna sungah a lut ter mi thu hla pawl lakah a thlarau nun cawmtu ding a tel lo asile a thlarau nun cu a cak thei dah lo ding. A bal mi le a thianghlim lomi lawng hman si loin leitlun thu hla le thutha tampi pawlin a thinlung khua a luah ttheh ih a hna sungah thlarau nun cakter tu tha tha, thuthianghlim, Pathian thu pawl nitin a hnaa sung ihsin a thunlut lo asi ahcun a sunglam nun luahkhat tu cu a leitlun nun thu lawnglawng asi dingih a khawruahdan cu a thinlung in leitlun mi vekin a ruat ding.

 

Thuthangtha simtu in hitin a sim dah, “Zumtu pawlin kan nitin nunah leitlun thu tamtuk kan hna sungah kan lutter ruangah Pathian aw khal kan thleidang thei nawn lo.Mi tampi in Pathian hnenah kan mai duhmi lawng kan sim theu nan Pathian in insimmi kan ngai duh nawn lo”. Nikhat ah nahzi 24 a umih cumi can sungah Pathian awkam thei dingin tikcu ziangzat na pek? Na nitin nunah na hna sungah a lut mi pawl lakah Pathian aw a tel maw? Na hna sungah a lut tam bikmi thu in na nitin nun a lo khawr rero asi. Ziangvek  milai na si duh? Na hna sungah a lut mi kha fimkhur aw la, Khrih le a lalram dokalhnak thu pawl kha na hna sungah lut ter hlah aw. Na lo sungah cawrual an lut asi ahcun na lorawl ei loin kham a harzet ding. Na lo sungah zawngrual an lut asi ahcun na lorawl ei lo dingin kham a harzet ding. Cuvekin na hna sungah thusia na lut ter rero asile na thinlung lo siatsuah lo dingin na kilhim harzet ding. A thianghlim mi le porh tlak asi mi Pathian duhzawng le thiltha a suahpi tu ding, na thinlung mizia lo tuah tha tu ding lawng kha na hna sungah lut ter aw.

 

Thuf: 8: 34; Ka thu a ngai ih nitinte ka saangka kiangah um in,

Ka innsung luh a hngaktu cu an lung a awi ding. (19:27) Ka fapa, zirnak na bansan ahcun

na theih ciami kha na hngilh sal ding. (22:17) Na hna i tun aw, mifim pawl ih thusimmi ka lo zirh ding; Cun ka fimthiamnak na thinlung sungah ciing aw. (23:19) Ka fapa, ngai aw, fim awla, Lamzin dik kha thlun ringring aw. Thusimtu: 7:5, Mi aa ih na thangṭhatnak hla a sak mi ngai hnakin mifim ih kawknak ngai a ṭha sawn. Kol 3:1-2..Nannih cu nunnak ah Khrih thawn thawhter nan si zo ruangah Pathian vorhlam kap Khrih tonak vancung khuaih thil ah khin nan thinlung bun uh. 2Leilung tlun thil pawl ruat loin vancung thil pawl khi ruat sawn uh. 3Ziangah tile nan thi zo ih nan nunnak taktak cu Khrih thawn Pathian sungah thuh-in a um a si. 4Cuih nan nunnak taktak cu Khrih kha a si ih amah a lang tikah nannih tla amah thawn nan langtlang ding ih a sunlawinak nan ṭawm ve ding a si.