RAMLENG UM LAIMI SENPI ZOHTTHIMTLAK KA TI MI PAWL:

 

I.                   KHRIH HRANGAH A NUNGTU:

II.                ZOTHIMTLAK MIMAL NUN:

III.             MIPHUN THUANTHU LIANGSUAN:  

IV.             BAWMNAK DIL THIAM:

 

Mi pakhat cio in upat mi le cawimawi sunloih tlak timi a bang cio lo hmanah a tlangpi thu in a tlunlam thutlangpi parah hngat aw aw in kei in zohtthimtlak, cawimawitlak ka timi cu tawiten simfiang theih asi. Mi pakhat in a zaten a neih thluh lo khal asile pakhatkhat ah a neihmi parah cawimawi le sunloih tlak thotho asi.

 

I.                   KHRIH HRANGAH A NUNGTU:

A nunpumhlum khrih hrangah a hmang aw tu.

 

II.                MIMAL NUN:

1. Nun thianghlim:  Chin miphun Pathian betu, amai nun midang a pehtlaihnak ah le leitlun thil a pehtlaih nak ah Bible in milai nuntu mizia, nunthuthlung asimmi vekin a nungtu, leitlun santhar nuamnung cennak le nun bawrhhlawhnak eiruk nak, dik lo nak, nuamnung sernak lak ihsin a thiar fihlim aw tu;

2. Insang nun: Khristian insang a nunpitu, mai miphun nupi pasal a nei tu; insangah lai nunphung, laitong le lai miphun pawl thawn a thanglian tlangtu;

3. Nunphung: A miphun nunphung, tong, calai, nunphung dang pawl dungtun tu siloin cawimawi, kenkawh, le ceimawi tu; a tha mi la in leitlun miphun dang hnen ihsin zirtha le cawn tlak pawl khal lak thiamtu; a kiangkap um Chin miphun pawl nuntu ziaza mawi zirh, nunpi dingin ciahneh tu; 

4. Mipi hrang nung: Sersiamtu Pahtian rian in miphun dang lakah nuamnungser le pilral men si loin nitin mai miphun pi pawl thawn nungtlang, thangtlang, zirtlang, harsa lungawi ttawm aw tlang, hmasawn tlangin theih mi neih mi le ti thei mi ah cantha a um tikah le a um nak hmun kipah miphunpi bawmbawitu, sawmdawltu, cawimawitu;

5. Thiltha tipungtu: Huat awknak, tthentthek awknak le thusia thilsia tipungtu si loin duhdawtnak, Khrih ah le miphun ah pumkhat sinak, neihniam awknak, pawlkomnak ticak tipungtu.

6. Miphun dang lak nunmawi: Miphun dang lak nun tikah ziangtik, ziangvek, khuitawk hmun khalah nunmawi, cawimawi tlak, zohtthim thlak nun a nunpi tu.

7. Fimthiamnak: Leitlun santhar fimthiamnak ah zuam ttento in theihmi neihmi miphun hrangah a hmangtu;

8. Nunthup nei lo: Senpi vangtlang le mimal, insang nunah siseh a nun cipciar pholang tikah zahpi (ningzah) ding a um lomi nun nei tu.

 

III.             MIPHUN THUANTHU LIANGSUAN:

1. Khua le ram hrang pe aw tu: Mai khua le ram, miphun theih hngilh loin tuah thei mi le ti thei tawk in a khua le ram, miphun cawisannak hrang a zuamtu;
2. Umnak hmun kipah mai miphun zahpi loin a sawmdawl, tungding, cawisang, lamzin hmuh, hmuhmi theihmi ti theimi kipah mai miphun sawmdawl, cawimawi, cawisang, zirh le kaihruaitu;
3. Leitlun khaw mualtinah ram le miphun thuanthu tlangau pi tu; leitlun ram pawl hnenah siseh mimal le ramtinkan pawlkom hnenah siseh ram le miphun thuanthu danglamter dingin tlangau pi tu;
4. Miphun mipi tuarnak cu liangparah suangin thlacamnak in siseh tuah thei mi ti thei mi parah raltha le taimazetin a zuamtu;
5. Biak nak le hrin le hnam ah siseh political party ah siseh thleidan nei loin senpi vangtlang thatnak, rualremnak, duhdawtnak, pumkhat sinak, pehtlaih pawlkom awknak tipungtu;
6. Senpi vangtlang, miphun zapi huap thiltha ruat in mai mimal ruahnak ih thiltha tlansan thei tu; zumnak le nunphung in cawimawi tlak atimi cawimawi le upat pek thiamtu.

 

IV.             BAWMNAK DIL THIAM

1. Umnak hmun kipah cozah, biaknak, pawlkom le mimal dangdang hnen ihsin bawmnak dilin mi farah harsa bawmbawitu.
2. Leitlun ram kiltin ah mi farah le ram tthangso lo pawl bawm duhtu pawl thawn ramsung ramleng mi farah bawm thiamtu.