|
RELSIAT THANGSIATNAK AUG, 11, 2010
Relsiat thangsiat awknak hi Khrihfa ti aw pawl lakah Satan hmanrua tthabik pakhat asi. Curuangah kanmah lala khalin kan kaa sung ihsin a suakmi, kan hnasungah a lut mi le kan thluk sungah ruahnak in neihter tu pawl lakah ziangtin kan fimkhur ding ti duhsaknak thawn Saya lal Tin Hrem ih cahram beltbawm in ruahnak malte ka lo hlawm ve hai! Voksa bazar um dingin a zuartu le a lei tu an um a tul vekin simsiat thangsiat relsiat awknak um thei dingin a simtu le ngaitu an thupitdan a bang aw. A leitu umlo sehla voksa zuartu ih zuarmi voksa a thu lak theh dingih a sum a cem lak ding. Cuvek in relsiat thangsiatnak ngaitu um losehla a relsiat thangsiattu a ning a zak sawn ding. Relsiat thangsiat awknak um tikah voi tampi mi pathum an tel theu; i) a forhfialtu-thazangpetu-thawkhrawktu-cokphurtu, cantertu, ii) a reltu (voksa zuartu), le ii) a ngaithlatu (voksa leitu) an um theu. Cumi lakah a lo theihloin a um ringring mi cu a reltu le a ngaitu an si. An pahnih ten an tuldan a bang aw aw. Thangsiat relsiatnak kaa, lei, hna, tongkam, le a hmun-inn pawl cu satan bungrua le hmanrua tha an si. Curuangah, milai sersiam thawk ihsin milai thuanthu ah mi tampi lungawi nak siatsuahtu le Thlarau thianghlim riahsiatter theu tu relsiat thangsiatnak hi ziangvek asi, kaa le hna a hleh-ka rero tu tongkam pawl thleidang thei dingin a hnuailam vekin zoh hnik ushi:
1. Relsiat thangsiat awknak cu ziang asi:
Milai thu rel hmuahhmuah hi relsiat thangsiat asilo. Midang siatnak thu rel hmuahhmuah khal relsiat thangsiat asilo. Milai thu rel lo lawlaw ding cun tonglo in um a tul ding. Milai thu hla sim/rel tikah ziangvek hi a thianghlim mi tongkam asi ih ziangvek hi relsiat thangsiat nak asi ti cu tongkam hnakin duhsan tumtah mi le san a neihter mi in a simfiang. Bible in David siangpahrang ih uiret nak thu a ngan tikah relsiat thangsiat asilo, thilcang mi theihter duhmi ruangah asi. Cuvek thotho in pastor pakhatkhat cu a kutvorhlam zabawngin thuphan a per tikah “pastor pa in thuphan a per” ti ah midang in an sim tikah cucu thungaithu asi. Relsiat thangsiat asilo. Asinan, cui thu thotho cu pastor pa kha midang in hmusual haiseh, hua haiseh, nautat haiseh ti duhsan nak thawn sim tikah relsiat thangsiat ah a cang thei. A tlangpi thu in laitong in relsiat thangsiat ti tikah tongkam ih tumtah mi le rahsuahter mi cu hmuhsual awknak, huat awkak, nautat awknak, nam thlak awknak, thudik hliahkhuh dingin thuhla sia, thuhla kimcang lo, silole thudik khal merhkawi in midang thinlung lawkawiter tu midang thu rel/sim nak asi. Rukruk hmang tlangval pakhat in fala note thianghlim a bum ih nupi ah a thit zik tikah fala nu ih inn hnen pawlin a tlangval pa ih siknak diktak an sim. Cucu relsiat thangsiat asilo. Curuangah tongkam bang aw cekci hmang cingin mi pakhat cu mi relsiat thangsiat asi thei ih a dang pakhat cu thudik rel asi thei. Asile fiang deuh dingin a hnuailam ah tamdeuh zoh uhsi.
Relsiat thangsiat awknak in a relsiatmi hrangah thiltha tumtah mi a nei lo. Voi tampi cu thiltha duhsak zet vekin a tong in a sim theu nan a tumtah ngaingai cu a relsiatmi melmang dum, hminsiatter, thangsiatter asi. A ngaingai ah, mi thangsiat relsiat tu pawlin “cu pa/nu khi a hmai melmang dum ka duh, a hmin siatter ka duh ruangah a thu a siatnak lawnglawng ka sim asi” an ti dah lo. Fimzetin duhsak tuk vekin, a relsiatmi le a thu ngaitu pawlih thatnak duhsak zetvekin, a silole a simsiatmi ih tuahnak nuncan ziaza ruangah thil thupi zet , midang siatnak ( a thu ngaitu pawlih siatnak) a duh lo ruangah siseh a relsiatmi hnakin thiltha sawn thei vekin le thianghlim sawn vekin a sim aw ringring sawn asi. Bum awknak asi. Satan in Evi a bum tikah Satan fimzia cu Pathian hnakin Evi kha duhsak sawn vekin a tong. Relsiat thangsiat nakih tumtah cu a relsiat thangsiat mi ih siatnak asi. Satan hmanrua tha bik pakhat asi. Satan in a hmanrua ttha tha hmang dingah a lo duh. Pathian in A hmanrua thatha “duhdawtnak” hmanrua hmang dingin A lo duh. Khuimi na hmang sawn? Na hman mi talhtum in zo na rian ti a lo theihter!
* Ziangruangah ziang tumtahnak in relsiat thangsiatnak a um ti asile thu phunphun ruangah a cang thei. i) Kaa-za, mi relsiat thangsiat loih um thei nawn lo ruangah; mi hrekkkhat cu an insang nulepa unau rual lakah, rualpi pawlkom, an tthanlennak khua/veng, mibur umkhawmnak poh ah mi siatnak lawnglawng relnak hmun ihsin an tthanlen tikah an rawl thawbik cu mi thangsiat, relsiat asi. Hivek milai pawlin an kaa sung ihsin a suakmi tangkam pawl hi mi thangsiat relsiat asi maw ti khal an thleidang thiam lo. Nuam an ti zawngah acang. Curuangah ‘mi relhmang sungkua” ti tla in an sim theu nak asi. Nule pa in an tesinfa hnenah ro vekin an rohta mi asi. An nulepa, ulenau, rualpi, umnak mibur pawlin an fa-le-nau hna-kua sungah midang siatnak thu, thlaici sia an rak tuh mi cu an tum tikah a rah mi venghnen le mipi in kan ei rero mi asi. Hivek milai pawl hi khuitawk hmun khalah mi siatnak rello in an um thei nawn lo. An relmi ngaitu pawl an um lo tikah an relmi pawl hnen lala ah an thu ngaitu pawl thu an va relse lala. AN relsiat mi an um nawn lo khal asile rei lo te ah relsiat ding an hmu lala ding. Hivek milai pawlin midang thangsiat relsiatnak an rel rero na theih tikah na um lotikah na thuhla a lo relse ve ding ti theihcia mei a tha. Zumnak, thlarau lam tongkam in kan sim asile hivek pawl hi satan ralkap tha, hmanrua tha an si. Ziangah tile Pathian siathlawh pawl raltha zetin thangsiat relsiat ngamtu an si. Buhfang fangkhat hman an cawm dah lomi tla siseh an thu hla an theihfiang lo mi tla raltha zetin an thu hla ngaitu pawl ngainuam dingin an relsiat thiam zet theu. Satan in a bawm duhzet mi le a hman duhzet mi an si. Hivek milai pawl hi Khrihfa lakah, huat awknak, rinhlelh zumhlelh awknak tipungtu dingah satan palai ttha ah an si.
Curuangah mi zokhalin kan kiangkap ih milai pawl tongkam kan ngai tikah thangsiat relsiat awknak thu kan theih tinte a reltu ih duhsan, ziangruangah a rel ti kan theih lohli a tha.
Fimkhur ding: Nulepa, upa, mino, mi zokhalin nauhak theih ah midang relsiat thangsiatnak toangkam thlah lo dingin fimkhur a tha. Huat zet mi le thinheng ter tu, lungawinak siatsuah sak tu pawl thu tla sisehla nauhak theih ah rel lo a tha. Ziangah tile relsiat thangsiat mi cu thangsiat relsiat tlak in sual/diklo hman hai sehla, nauhak te ziang thei lo hna sungah thusia fah rero asile nauhakte lungput thinlung tawdap ah thlaici sia tuh rero asi ih cuvek thusia tampi thawn a tthanglian mi nauhak pawl cu an pitlin tikah midang siatnak thangsiat le relse loin an um thei nawn lo. Thangsiat relsiat awknak thu ngai ding an theih lole an lung a leng. Thangsiat relsiat nak cu relnuam, ngai nuam an ti zawngah a cang. Fimkhur a tha.
ii) Huatnak iksiknak ruangah asi thei;
Mi zokhalin kan kiangkap ih milai pawl tongkam kan ngai tikah thangsiat relsiat awknak thu kan theih tinte a reltu ih duhsan kan theih lohli a tha.
Huatnak ruangah: A tlangpi thu in milai in an huatmi cu midang khalin hua ve hai sheh ti an duh. A biktakin, an duhdawtmi, an lamtang ih an ruahmi pawl hrimrhim in an huatmi hua dingin an duh ruangah thangsiat relsiat awknak a suak tam zet. Huatnak ruangah midang relsiat thangsiattu pawl hi huatnak tipungtu dingah satan palai an si. Curuangah santan ti lungawiter in Thlarau Thianghlim ti riahsiater kan duh lo asile, kanmah lala khalin kan huatmi le in huatu pawl kha midang in hua ve haiseh ti duhnak thinlung ihsin a suakmi tongkam kan kaa kua sung ihsin suak ter lo ding a thupi.
Iksiknak ruangah: Iksiknak cu kanmah in kan duhzetmi midang in an neih tikah thinlung siava ihsin a suak mi asi. A biktakin, mi pakhatkhat in amah hnakih fimsawn, thasawn, hlawhtling sawn, duhnung sawn, thlarau mi sawn, tvp, a tluk lo mi thu asim tikah awlten iksiknak ihsin a suakmi thangsiat relsiat awknak asi maw ti theih a theih. Milai pawl hi a tlangpi thu in anmai sinak ciah hnakih sang si an duh theh. Cui an si duhmi dinhmun ngahtu, lole lawng theitu ding tiah an ruahmi pawl hi milai iksiknak thinglung in a hua ih a thangsiat duh zet theu. Curuangah mi zokhalin kan kaa sung ihsin a suakmi le kan hna sungah a lutmi tongkam pawl hi iksiknak thinlung bawrhhlawh ihsin a suakmi asi maw ti hliakhlai, fiah ringring a tha. Iksiknak ihsin a suak mi tongkam in thiltha a suahpi dah loih thiltha a siatsuah sawn. Iksiknak ihsin a suak mi tongkam thangsiat relsiat nak tong rero tu le cuvek tongkam ngai nuam zetin a ngai rero tu cu satan siahhlawh pawl an si. Satan in a bawm duh zetmi an si. Satan mizia phunsuah awknak asi. Satan ih thlaici tuh rero tu an si.
Relsiat thangsiatmi kha a theitu pawlin hmu niam hai sheh, nau tat hai she, upat hlah haiseh ti duhsannak ruangah a cangmi asi. Rukru pa cun sumpai a ru ih relsiat thangsiat tu cun sumpai thawn lei theih lomi hminthatnak a ru asi.
Cutin asi ruangah, zumtu pawl cun nitin tisa cu a duhnak cawpcilh ih thihter, khros ah khenbet in Khrih duhnak sawn thupibik ah retin Khrih dungthlun ringring ding kan asi. Ziangtluk siatnak tuahtu, thangsiat relsiattu par khalah Pathian duhdawtnak kan sung ihsin luangsuak aw dingin kaa ihsin thangsiat relsiatnak in thungrul ding kan asilo. Satan hmanrua thawn Khrih ih kawhhran dinsuah theih asilo, fialmi kan si lo.
iii) Thu ngaitu pawl kha mai lamtang, mah ttantu ah tuah duhnak ruangah Thuthluknak (decision) pakhatkhat tuah duh tikah siseh, a tlaitlun thuthluknak tuahtu, tuanvo neitu, lal, pawlkom hruaitu hril tikah siseh relsiat thangsiat awknak a suak duh zet. A ruang cu, thuthluknak cu mai duhzawngin fehter duh ruangah asi. Thuthluknak mai duhzawng lunghmuizawng le lungkim zawngin fehter duh tikah mai duhzawng pomdan hmuhdan kalh tu pohpoh, mai lamtangah ruah lomi pohpoh simsiat thangsiat awknak a tam duh zet. Thil pakhatkhat a fehsual tikah mawhphur tu silo dingin midang parah mawhnak tlak ter duh ruangah simsiat thangsiat awknak a tam. Khrihfa ti aw pawl lakah mai duhzawngin thu fehter duh ruangah lamtang tuah awknak, pawlsawm awknak a suak ih mai lamtang lo ah ruahmi pomdan dang nei tu pawl relsiat thangsiat awknak a suak. Na kiangah simsiat relsiat thangsiat awknak tongkam na theih tikah a reltu in alam tangah alo tuahduh ruangah asimaw, ti fiangten na hliakhlai lohli a tha. Theihcia tha mi cu, a lamtangah alo tuah thei lo asile, a relsiat rero mi vekin neta ah nangmah a lo relsiat, thiangsiat lai ding ti theihcia a tha.
v) At ruangah; kaa sung ihsin a suak mi tongkam in a ngaitu pawl hna sungah ziangvek san a nei ding ti thei lo in siseh ziangruangah ka kaa sung ihsin ziangvek tongkam a suak timi ruat hmaisa lo in siseh tong phutpo mi tampi kan um. Curuangah thufim in “na tong hlan ah voihnih ruat hmaisa aw” ti asi. Um-kha a rah ding ti thei cingin ei-um vekin zohman in an hmuan ah an cing lo ding. Cuvekin rahtha lo, siatsuahtu a rah ding ti theih lo ruangah mi tampi tongkam sia thangsiat relsiatnak an sim theu. Cucu at ruangah asi. Curuangah thufim in ‘Pathian tihzah cu fimnak hram asi” ati mi a dikzia a lang. Pathian a tihzahtu mi zokhalin Pathian in Amai hmuihmel kengin A sersiam mi le A duhdawtih A Fapa thisen in a leimi pawl thangsiat relsiat ngam an um lo ding. vi) Porh awknak: Ka rel siatmi hnakin ka ttha deuh: Voi tampi cu tha sawn, fimsawn, thei sawn, “asawn” cuh awknak ruangah relsiat thangsiat awknak a suak theu. Keimah hi ka relsiat mi hnakin tha sawn, fimsawn in “pa sawn” ah in ruat haiseh ti duhnak thinlung thawn midang siatnak le tlamtlin lonak hi rawl thaw bik le rualpi tha tuah nak lamtang tuahnak ah mi tampi in an hmang. Abik takin leitlun politicians pawl ih hmanrua thabik pakhat cu an zuam mi, khatlam tang (opposition) pawlih cahlonak, tlamtlin lo nak asi. Curuangah, na kiangkap ah midang siatnak tlamtlin lonak hla bangin sak nuam ti zettu na hmuh tikah porh awknakin amah le mah cu a relmi hnakin ttha sawn in a ret aw maw ti zoh lohli a tha. Hivek milai pawl hi “Na mit sungih khan daih hman hlawn hmaisa loin na unau mit sungih mithnawm cawih na tum” timi pawl hi ansi. vii) Midang sualnak in hmaiphiah: Midang sualnak le tlamtlin lonak a tam thei bik sim thei asile tong ngaitu pawlin relsiatmi hnakin in upat deuh ding, tha sawn vekin in hmu ding tiah ruat simsiat thangsiat awknak a suak. ‘Kei ka ruk mi cu zawhte asi ih ka hmuntlang pai rukmi cu cawcang asi. Curuangah kei ih sualnak cu a nep cuang” ti ah midang sualnak simthiam nak in mai hmaiphiah fainak hi leitlun milai pawlin an hman ringring mi asi. ‘Zohman mi famkim kan um lo, asinan….” An ti theu. Sihman sehla, Khrih dungthlun, zumtu pawl cun kanmai thatnak sim dingin siseh mah le mah humhim aw ding in siseh tongkam khat hman tong lo dingin sim kan si, “Mi pakhat khat in na biang a lo beng a sile khatlam khal tun hrih aw,..” “Kei ka mawh lo” tiah a hum aw rero tu le mawhnak cu midang parah a burh theh tu cu Zesu lamtang asilo tinak asi. Zesu cu Khros parah an khenbet lai khalah anmai diknak a sim ve lo, “Ka pa, an sual ngaidam aw” tiah thla a cam sawn asi. Midang sualnak le tlamtlin lonak thawn hmai a phiat rerotu ih bawipa cu Zesu asilo.
Nangmai tuahnak, tongkam, pehtlaihnak, cangvai ruangah a duhdaw aw zetmi mi pahnih an hua aw aw asile na nun na zoh that sal ding ka lo forhfial duh. Ziangah tile duhdawtnak le thiltha tuahnak, Pathian cawimawi nak karhzaiter tu si loin huat awknak tipungtu na si ahcun na rianmi zo asi ti na theih awk a tha. Na kaa, na hnaa, na neihmi le pehtlaih mi, na inn sung kha thangsiat relsiat awknak hmunpi, satan bualrawn ah na hmang ding maw, Pathian thangthat cawimawi nak, khat le khat tundin awknak, thiltha hrangah na hmang ding? Voksa bazar um thei dingin a zuartu le a leitu an um a tul vekin na inn le na umnak hmun kha relsiat thangsiatnak satan bazar ah na hmang ding maw? Duhdawtnak remdaihnak suahtertu maw na si, thangsiat relsiat awknak? Na hril mi in zo ih sal na si ti a lo theihter.
Relsiat thangsiatnak in relsiatmi parah rinhlelhnak, huatnak, nautatnak, zohniamnak, tvp, a sezawngin milai thinlung sungah hmun a khuarter ih milai pehtlaih nak, pawlkomnak a ti bawrhhlawh ih a siatsuah. Cutin Khrihfa lakah, zumtu lakah, unau lakah, pawlkom sungah, miphun pakhat lakah, khawpi lakah, mibur lakah, rualpi tha lakah, duhdawtmi le duhdawtu lakah, nupa lakah, insang sungkua sungah, hruaitu le dinpitu lakah, mibur burkhat le burkhat lakah, pawlkom pakhat le pakhat karlakah, hmuhsual awknak, huat awknak, thenthek awknak, dungtun awknak, rinhlelh awknak, tvp, a hringsuak ih pehtlaih awknak a siatsuah tahratin satan lungawizawng hlawhtlinter asi. Milai thinlung sungah a fiang lomi, rinhlelh awknak, thimnak in hmun a luah kau sinsin ih cui thimnak hmun cu satan kethlaknak beunak hmun asi. Mi zovek khalin midang a relsiat thangsiat tikah satan lungawi zawng tuah in satan a rian rero tinak asi. Curuangah, Thuthiang in “nan lakah satan ke thlaknak um ter hlah uh” inti. Kawhhran sungah thusimtu (pastor pa) thusimmi ngainep ding, ringhlel, zum lo dingin relsiat thangsiat awknak hi satan hmanrua ttha bik pakhat asi.
Relsiat thangsiat awknak hmarua tambik cu tongkam hi asi. Culawng siloin santhar san ahcun cangan in siseh hmuhternak pakhatkhat hmanrua thawn siseh mibur umkhawmnak ah taksa cangvai, mitmeng, le au-ai pakhatkhat hmang in siseh thangsiatter theih asi. Curuangah kan nitin nunah kanmah ihsin a suakmi kan cangan, tongkam, neihmi pehtlaih mi le taksa cangvai, mitmeng, au-ai kan neihmi pehtlaih mi pawl ruangah midang pakhat le pakhat lakah siseh mibur le pawlkom lakah siseh relsiat thangsiat awknak ih tumtah mi rahsuah ter lo ding fimkhur a thupi. Kanmah ruangah a cangmi siatnak rahsia hmuahhmuah ih liamkuan cu kanmai parah a thleng leh theh ding asi. Ziangvek hmanrua hmang khalin thangsiat relsiat awknak ih a tumtah mi huat awknak, hmuhthiam awk lonak, nautat zohniam awknak, thleidan awknak, lamtang tuah awknak, zum awk lonak, rinhlelh awknak, hminsiatternak, thusia karhzainak, tvp, suahter tu si lo dingin zumtu pawl cu fial kan asi.
Suikheng mawite sungah zohman in caw-ek an ret dah lo, cuvek thotho in caw-ek ih tuahmi kheng sungah zohman in sui an ret dah lo. Mi zohman in hnawmpung sungah sui an hlon dah lo. Hnawmpung sung isin sui a suak dah fawn lo. Mi pakhat cu a kaa sung ihsin ziangvek tongkam a suak ti mi in a sunglamah luahkhattu ziang asi ti theihtheih asi. Sunglam thu hluahhlo, iksiknak, duh amnak, tisa mizia in a luahkhat mi pawl hmurkaa ihsin tongkam sia, hurkhuannak, mi dang thangsiat nautatnak, tisa nuamnung cennak, mah le mah porh aw tahratin midang namthlaknak satan lungawizawng tongkam pawl a suak theu. Thlarau Thianghlim in a luahkhat mi milai pawl hmurkaa ihsin Pathian thangthatnak, remdaihnak, duhdawtnak, le a theitu pawl tungdingtu tongkam a suak. Na tongkam suak in zo ih lung a awiter, Satan maw Pathian, timi in zo na rian ti a langter vekin na kiangkap um pawl khal an tongkam ihsin zo ih sal an si ti theih thei asi. Satan sal pawlin satan duhzawng tuah dingin an lo sawm dingih Pathian sal pawlin Pathian duhzawng tuah dingin an lo sawm ding.
Thimnak in a khuh mi leitlunah dingfelnak in nungin Khrih dung na thlun asi ahcun relsiat thangsiat mi si dingah timtuah cia aw. “Sal cu a bawipa hnakin a tumsawn dah lo” ti asi. Sualnak nei lo, a famkimmi, Bawi Zesu hman relsiat thangsiat asi chun kannih a famkim lo mi milai pawl tla cu thangsiat relsiat tuar sinsin ding kan asi. “Leitlun in a lo huat nak cu keimah i huat ruangah asi” tiah in cahta. Tang na dor deuhdeuh asile mi porh aw bik vekin, dingelnak in na nung asile mi ti aw ter vekin, midang hrang thatnak na tuah tam poh asile midang siatsuahtu vekin, dingfelnak in na nung asile mi hrawkhrawl vekin simsiat thiangsiat na si khal asile na lungawi sawn aw. Simsiat thangsiat na silo asile na nun cekfel aw sawn ding na si. Mi zapi te dutzetmi na sile na dinhmun cekfel a tha. Asinan ruk na ruk le thuphan na per, nunphung le zumnak thurin, milai nuntu ziaza nunmawi na pahbal ih bawrhhlawh in na nung ruangah mi in an lo simsiat asile na ningzak in sir awk nak thawn buan lukhuh ding na si. Na sir awk lohli lo asile relsiat thangsiatnak hnakih sesawn siatnakin a lo hngak asi. Dingfelnak nun nei in a kaa a cip thei tu, midang thangsiat relsiatnak ah a tel dah lo tu cu mi thlawsuak sawn asi.
RELSIAT THANGSIATNAK LAK IHSIN ZIR DING
Relsiat thangsiatnak ruangah a tuahding mi a tthulh phahtu cun a hram thawk ihsin a tum lo lawlaw a ttha sawn. Pathian in mi pakhatkhat thlawsuah nak a pek tikah leitlun milai zohman a rawn dah lo. Thangsiat relsiat tu pawlihi tongkam ruangah Pathian thinlung a thleng aw dah lo.
Ziangvek dodalnak, relsiat thangsiatnak lak khalah Khrihi dungthluntu pawlih raal hi minung an si dah lo, minung a hmangtu Satan le a ho pawl a si sawn. Satan in ziangvek le zovek khal hmang sehla thinlung sungah hmun pek hlai hlan lo satan in zumtu pawl in neh dah lo. Ziangvek thlemnak khalin milai duhhrilnak in canter hlan lo satan in zumtu pawl a neh dah lo. Midang thangsiat relsiatnak in mi pakhat in hmailam thu lai a rel lo ih midang relsiat simsiatnak ziangtin na let timi sawn in thaisun hrang lai a rel sawn asi.
Zesu Khrih leitlun a um lai ah kumthum sung Judas Ischariot thawn an um tlang, zingzan rawl eitlang khualtlawng tlang in an um. Sihman sehla, Zesu in Judas kha a dungthluntu dang pawl hnenah a thangsiat relsiat dah lo ti ziangtin kan thei ti asile ‘Nan lakah pakhat in in zuar ding” a ti tikah “Bawipa, keimah ka si maw?” ti ah an sut celcel. Phiarsawmtu, relsiat thangsiat tu pawl parah relsiat thangsiatnak hmanrua lala in ziangtik hmanah lehrul dah lo ding asi. Thutak thudik le thatnak duhdawtnak lawng in pehtlaih ding asi. Ziangah tile zumtu pawlih raal cu milai an si loih milai thinlung luahkhat tu, uktu Satan le thlarau sual pawl sawn asi. Zesu in Amah a thattu, zuartu, dodaltu pawl a zoh tikah a zangfah hai sawn asi. Ziangah tile an theih lomi an tuah rero ih satan bumnak thang sungah an tang ti an thei aw lo.
Mi relsiat thangsiattu pawlin Thlarau Thianghlim riahsiat ter in Satan in a hmang rero hai, an rianmi cu satan asi ti thei hai sehla mi relsiat thangsiatnak an tuah hrimhrim lo ding. Curuangah Zesu in Jerusalem a zoh tikah a ttah vekin satan in a ukmi milai, relsiat thangsiattu, unau mawhsiattu ah satan in a hman rero mi pawl cu ziangtin Khrih hmin in kan runsuak ding timi lawng zoh in thutak, thutak, le duhdawtnak in Khrih ah kaihhruai thei dingin thlacamsak sawn ding kan si. “Na raal duhdaw aw” tiah fial kan si tikah kan raalpa “satan” duhdawt ding ah fial kan si loih satan bumnak thang sungah a thangmi kan milaipi, kan lungawinak siatsuahtu dudhawt dingah fial kan si. Pathian in pakhatkhat tuah ding in fial tikah laksawng le ttuanman um loin zianghman in fial dah lo asi. Amah relsiat thangsiat rero tu cu dudhawtnak in Khrih ah a kaihruai thei asi ahcun a theihdah lomilaksawng a pek mi a cozah ding asi.
Relsait thangsiatnak in a siatsuah mi cu relsiat thangsiat mi hrangah thanau nak, dungsip nak, phurnak hloh, le beidawng cauhnak asi. Cun relsiat thangsiatnak tongkam theitu pawl thinlung sungah relsiat thangsiat mi zum lonak, nautatnak, hmuhsualnak, thenthek awknak, dodalnak, hmuhsuamnak, tvp, in pehtlaih awknak siatusah, upat pek dingzat pek thei nawn, le hnatuan tlang thei lo nak pawl tiang a suahter.
Zir ding: Relsiat thangsiatnak hi milai rinsannak hlohtertu asi theu. Cucu zumtu nun pitling nei dingin a tul hrimhrim mi asi. Zumtu leitlun nunah duhmi, nuamti mi, le rinsanmi pawl hi tisa thinlung ihsin a suakmi pawl tlansan tanta a tul. Cutin voi tampi cu mai duhhrilnak liolio in kan tlansan thei lo theu tikah a lotheihlo in thangsiat relsiatnak siseh tlaksiatnak ruangah siseh hlawhtlin lo nak in siseh milai rinsannak a hlo ih Pathian rinsannak a cak sinsin theu. Milai parah a hngat aw theu mi milai ruahsannak le rinsannak thihter tahratin zaahza Pathian rinsannak nunpi thei dingin relsiat thangsiatnak dodalnak pawl hi hmanrua tha zet an asi. Sungkhat, rualpi tha, pawlkom, sumpai thilri, lennak sinak, dinhmun, mit in hmuh thei mi parah ruahsannak, rinsannak, hngat awknak pawl hi hlohter asi hnu ah Pathian lawngah zaahza rinsannak milai thinlung sungah Pathian Thlarau in a nunter theu asi. Milai le mit in hmuh thei mi parah na ruahsannak a cem deuhdeuh asile na lungawi sawn aw. Relsiat thangsiatnak in Pathian thinlung an thlengter thei lo ih relsiat thangsiat nak ruangah Pathian tumtah a thleng aw cuang fawn lo. Relsiat thangsiatnak ziangtin kan lehrul timi sawn in nunkhua a danglam ter sawn asi.
Midang siatnak hmanrua ah hmangin rualpi tha ah a lo tuah tumtu, lamtang ah a lo tuah tumtu, a lo bawm tumtu va rinsan dah hlah. A duhmi a famkim lo nini ah nangmah a lo tangsiat relsiat leh ding. Milai pakhat cu a mah a duhdaw tu le a duhdawt mi parah siloin amah a huatu, le a huatmi parah ziangvek tongkam thawn a lehrul, ziangtin a thungrul timi zoh tikah a sinak taktak, a sunglam mizia a lang asi. Na kiangkap milai pawl lakah zo in tisa mizia sual rawl alo cawm iih zo in thlarau mizia ticak dingin rawltha alo cawm, zo in thusia, huat awknak, rem awk a tipungtu ih zo in duhdawtnak, rem awknak le thiltha tuahnak a tipungti thleidan thiam ringring ding a thupi. Curualrual in mi zokhalin mai kaa sung ihsin a suak mi le hna sungah a lut mi pawlin thatnak maw siatnak a tipung ti fimkhur ringring a tha.
Mirang thufim in,”Hruaitu pawl cu mi in an dennak lungto thawn innpi (building) an sak ttheu” ti asi. Relsiat thangsiat duhlo asile hruaitu ttuan lo lawlaw a ttha sawn. Tlukbah nak a tawng dah lotu hruaitu tling an si dah lo vekin simsiat relsiat a tawng dah lo tu hruaitu tling an si dah lo. Cuvek thotho in simsiat relsiatnak lak ihsin a zir dah lo tu khal hruaitu tling an suak dah lo. Zo in ziangtin an lo relsiat thangsiat timi hnakin relsiat thangsiatnak lak ihsin ziang na zir, ziangtin na lehrul timi kha a thupi sawn mi as. “Ka um lo ah in relsiat thangsiat ih ka um lo ah in kap that leh ding” tiah leitlun hruaitu hmin larzet pakhat in a sim dah vekin le “ka thu hmuahhmuah izawm thehtu hnen ihsin zianghman ka zir suak dah lo” tiah sim asi vekin relsiat thangsiatnak ih tumtah cu siatnak si hman sehla lehrulnak hmanrua cu dudhawtnak, zirnak, le thiltha tuahnak sawn asi tikah satan a duai ringring ih zumtu cu nehtu hnakin sangsawn dinhmun ah a ding ringring asi.
Khrih ih nehnak lamzin cu midang va siatsuah si loin midang ih siatsuahnak hmanrua kha tuar tlangnak in asi sawn. Thihnak kha kham si loin thihnak tuartlang in thawhsalnak in thihnak cu neh asi. Relsait thangsiat nak cu relsiat thangsiatnak hmur le lei kha tansak nak in si loin duhdawtnak le ngaidamnak in thunghulh asi tikah neh asi ih satan cu ti mualpho asi. Biang khatlam beng kan si tikah khatlam tun bet tahratin nehtu nun asi sawn. Ziangtluk ka cak tihnakin ziangtluk ka tuar thei, ziangtluk midang hnakin ka tha tihnakin ziangtluk midang hnuai ah tang ka dawr, ziangtluk midang par ihsin hlawknak ka ngah timihnakin midang ziangtluk ka rian, ziangtluk porh awknak ka nei timi hnakin ziangtluk midang hrangah ka cem, ka liam, ka rian, ziangtluk midang in in upat timi hnakin ziangtluk ka upat ih midang thatnak hrangah ka pek awk, ziangtluk mi dang ka relsiat thangsiat ih zianghman lo vekin ka relsiat timi hnakin ziangtluk an duhnak pitlin thei dingin ka bawm, ka sawmdawl, ziangtluk ka hmin a tuahtha timi hnakin ziangtluk ka ziam ral, cu hmuahhmuah cu Khrih hmin in Khrih hmin sunlawi nak hrangah Thlarau Thianghlim lamhruainak in tuah, nunpi asi tikah ziangvek satan hmanrua relsiat thangsiatnak lak khalah zumtu pawl cu nehtu hnakih dinhmun sangsawn ah nitin nun asi sawn.
Mi zo cio khal, thangsiat relsiatnak le dik lo zetin mualphoh nak a tawng rero tu pawl, Pathian Thlarau Thianghlim ih umpi nak in mangbangza cahnak lo pe hramseh!
Duhdanksak le zawnruahnakin, Khrih ah, HM |
WELCOME TO MY PAGE > Most Recent >