LALRAM PAHNIH: PATHIAN LALRAM LE SATAN LALRAM

Leitlun milai thawn a pehlai mi, milai hnenah theihtermi, milai uktu lalram pahnih a um: Pathian lalram le Satan lalram. Laitlun milai hmuahhmuah kan zaten lalram pahnih sungah pakhat sangsang ih milai kan si: Satan lalram minung, lole Pathian lalram misa kan si. John tihnimtu in “Nan sual sir uh, Pathain lalram a nai zo asi” tiah Israel pawl hnenah thu a rak sim. Zesu khalin leitlun ah thu a rak sim thawk tikah Pathian lalram, Pathian uknak cu milai hnenah a thlen thu a rak simih mina an tidam, mitcaw in khua an hmu, thilmnak phunphun a tuah tikah nan hnenah Pathian lalram a thleng asi tiah a sim. Leitlun nun cu tikcu rei loten sung a kumkhua sankhuk hrangah timtuah nak asi vekin ziang lalram, uknak hnuai ih milai kan si ti mah le mah cekfel awknak ding hrangah siseh kan rianmi lalram, in uktu kan Bawipa ih hna felten kan tuan thei nak ding hrangah a hnuailam vekin tawiten zir hnik uhsi.

Lalram pakhat um dingah thil pali a lotheihlo in a tul mi a um: Uktu, mipi, ukmi ram, le danledun. Lalram pahnih a um kan tivekin alotheihlo in a tulmi pali pawl le lalram pahnih khaikhinnak malte zoh hnik uhsi.

1.       Uktu, Siang pahrang:

A.      Pathian lalram: Pathian Lalram ah kan siangpahrang cu Pathian, Pa, Fapa, le Thlarau Thianghlim asi. Leitlun nunah ziang hna tuan in ziangvek dinhmunah kan um khal asile Pathian fate zumtu pawlin kan rianmi cu Pathian asi.

B.      Satan lalram: Uktu lal cu Satan asi. Zumlotu, Khrih ah Thlarau in a hrinthar lomi pawl cu ziangkim an tuah mi cu milai tisa thinlung diriamnak, Pathian ah sunloihnak pe loin Satan rian rero nak asi. Pathian thu loin nun pohpoh cu Satan rian rero asi.

2.       Ukmi mipi:

A.      Pathian lalram: Pathian lalram misa pawl cu Khrih Zesu ah zumtu hrinthar sal mi pawl, Pathian fate pawl an si.  Krih Zesu ah nunthar neitu pawl cu Pathian Thlarau kan sungah a umih Pathian Thlarau in nitun kan leitlun nun cu in uk, milai tisa duhnak hrangah nung nawn loih Pathian duhnak, tumtah, le lungawinak hrangah kan nung.

B.      Satan Lalram: Satan ukmi pawl cu Thlarau hrintharnak co lo tu pawl, sersiamthar lomi, piangthar lo, zum lo tu, leitlun mi pawl an si. Leitlun milai pawl cu Satan bumnak sungah an nungih Pathian thu lunglo, Pathian hnenah sunloihnak pe loin milai tisa thinlung duhnak diriamter dingin an nung. Satan in a kumkhua lalram a nei loih Pathian lalram sungah Pathian dodal in Adam a rak bumih bum awknak lalram ahrei lo te sung uktu a si. Tikcu rei lote sung Pathian in a zoh hrih men mi asi. Adam cithlah mi zapi ten Khrih ah Thlarau in a hrinthar lo mi pohpoh cu Satan lalram minung an si. Cuticun Satan in a ukmi milai pawl cu Evi a bum vekin Pathian thu in nung lo dingin an lei tisa thinlung duhzawng, milai porh awknak, diriamnak, nuamnung cennak hrangah a nunter ih a uk hai.

3.       Ukmi ram:

A.      Pathian lalram: Pathian in thuneihnak ziangkim cu a Fapa Zesu Khrih hnenah a ret zo nan tikcu rei lo te sung, Khrih a ratsal hlan sung, leitlun cu Satan kut sungah a ret hrih. Cutin, Satan ukmi leitlun ah a um hrih mi, leitlun milai pawl lakah leitlun sersiam hlan ihsin Amai lunghmui zawngin a rak tumtah cia vekin a ruatcia mi pawl cu Thlarau in a hrinthar hai, a sersiamthar hai ih cutin Fapa Zesu Khrih zumtu, Pathian fate can theinak in pek ih kan thinlung sungah Thlarau Thianghlim in in cencilh in in uk. Kan nunramah thu neitu asi. Amai duhmi tuah dingin kan sungah Thlarau in hna a tuan. Thlarau in kan sungah a nungih Pathian mizia kan sungah A nunter ih Khrih ih hmuihmel bang sinsin dingin, a kumkhua Pathian lalram sungah Khrih ih sunloihnak ttawmpitu dingah, Pathian in kan leitlun nun in uk ih in tuaithar in in timtuah rero hai asi.

B.      Satan lalram: HI leitlun thil le nuntu khawsak pawl, milai pawlkom le pehtlaih nak pawl, leitlun biaknak le kumpi cozah pawlkom pawl hi satan kut sungah a um hrih mi asi. Khrih a ratsal hlan lo Satan kutsungah leilungpi hi a um hrih ding. Cutin leitlun mi pawl cu Satan in anmai tisa duhnak thinlung diriamter dingin Pathian umlo vekin nung dingin, zalennak lem thawn a bum hai ih Pathian dodal dingin a uk hai asi.

4.       Dan le dun: rules of law:

A.      Pathian lalram: Pathian lalram misa pawl thinlung sungah Pathian Thlarau in Pai zangfah duhdawtnak in a uk. Zangfahnak dan in uk mi kan asi. Cutin tuah aw, tuah hlah aw, timid an sin awn loin duhdawtnak in Pathian Thlarau in in uk. Cutin Pathian lalram misa pawl leitlun nun cu Pathian thlarau in in uk vekin kan kiangkap milai pawl thawn kan pehtlaih nak ah duhdawtnak dan in pehtlaih asi. Cutin Pathian fate pawlin kanmai ta zianghman neihmi kan nei lo ih ziangkim cu Pathian ih ta an si theh vekin ziangkim cu Pathian Thlarau kaihhruainak hnuai ah nungin Pathian hmin sunlawinak hrangah duhdawtnakin tuah asi. Leitlun milai dan le dun, tuah aw tuah hlah aw, timi le milai ruahnak phurnak parah nung nawn loin Pathian Thlarau uknak hnuaiah zumnak le duhdawtnak dan in nun asi ih ziangkim cu Pathian hmin sunlawinak hrangah tuah asi.

B.      Satan lalram: sual in a ukmi asi. A tluse zo mi milai tisa duhdan in ukmi asi. Sualnak dan ih a uk timi umzia cu Pathian thuhnuai ah ap aw loin Pathian thu loin nungtu pohpoh cu sualnak dan in nung an si. Biaknak lamah siseh leitlun pursum leilawnnak ah siseh thiltha tampi an tuah mi cu milai porh awknak, milai le milai diriam awk ternak in a tawp. Cutin Pathian in Amai hmuihmel kengin a sersiammi milai pawlin Pathian thu hnuai ah an nun lo tikah Satan ih tumtah mi cu a hlawhtling tinak asi. Cutin leitlun mi pawl cu thei lo cingin Satan ih dan, Pathian um lo vekin Pathian thu hnuai ah ap aw loin sualnak dan sungah an nung.

5.       Tumtah tawp:

A.      Pathian lalram: Pathian hmin sunlawih asi. Pathian lalram misa pawl tuahnak cu ziangkim zumnak in Pathian hmin sunlawinak asi. Pathian thangthat le a hmin sunlawih cu zumtu Pathian fate pawl in leitlun damsung ihsin a kumkhua sankhuk innpi sung tiang kan tuah dingmi kan tuah thawk rero zo mi asi. Pathian lalram milai thinlung sungah a ukmi pawl cu sankhuk Pathian lalram sungah a lut ding pawl timtuah reronak asi. Cutin Khrih a ratsal tikah sankhuk Pathian lalram sungah a lut ding pawl cu a siat thei lomi ruangpum thawn a thuam hai dingih a sunlawinak a ttawmpi hai ding.

 

B.      Satan lalram: Pathian dodal asi. Milai tisa diriamternak in Pathian dodal asi. Satan lalram misa pawl tumtah tawp, tumtah sangbik cu leitlun milai diriam awk ternak asi. Milai cawimawi awknak, porh awknak, hminthatnak, nuamnung cennak asi. Satan in milai a bum tikah lei tisa thinlung duhzawng thawn a bum hai. Cutin milai thinlung diriam zetin an um lai ah Pathian hnenah sunlawih nak an pe lo ih Pathian duh lo zawngin an nung. Satan ih tumtah sangbik cu Pathian dodal asi.

 

6.       Rammi sinak:

A.      Pathian lalram: Pathian lalram mi sinak neitu si dingin Zesu Khrih ah Pathian Thlarau hrintharnak, sersiamtharnak, nunthar neitu zumtu sinak a tul.

B.      Satan lalram: Leitlun mi, Khrih ah nunthar nei lo tu, zum lotu mi zapi ten Satan uknak misa an si.

 

7.       Lalram pahnih do awknak:

A.      Pathian lalram: Zesu Khrih thihnak le thawhsalnak in Satan in milai parah a nasa bik a thiltitheihnak tawpkawk, thihnak cu neh in a um zo, rullu rialbek asi zo ih satan ukmi, thim thuneihnak leitlunah Pathian lalram din asi. Curuangah leitlun thimlakah Pathian lalram misa, Pathian fate pawl cu “eng kan sinak” asi. Cutin Krih Zesu rundamnak thuthangtha cu hmanrua ah hmangin Pathian Thlarau in zumtu Pathian fate pawl nunah  hna a tuanih Satan lalram cu thiatbal in Pathian uknak ram cu leitlun milai nun, thinlung sungah din zo asi ih karhzai rero lai asi. Cutin Khrih a ratsal tikah Satan lalram, Satan in leitlun a uknak cu tawpter in a siatsuah dingih sankhuk hremhmun sungah a hrem hai ding.

B.      Satan lalram: Satan in sual cu hmanrua ah hmangin, Pathian thu hnuai ah nung lo dingin, milai tisa duhnak thinlung zalennak lem thawn milai cu a bum ih Pathian dodal in a nunter. Cutin Satan le a ho pawlin Pathian lalram misa zumtu pawl le an hnatuannak cu an dodal ih zum lo tu pawl cu Pathian thutak theithei lo dingin, zum thei lo dingin a phunphun in lamzin an kham, an dodal, an thinlung mit an cawtter. Cuithlunah, Pathian lalram misa, zumtu Khrihfa pawl cu Khrih ah an lungawinak siatsuah dingin a phunphun in hrem, dodal, le hnaihnoknak pek an si. Sualnak sungah tluse dingin tisa duhnak phunphun sual hmanrua thawn thlem an si. Cuitlunah Khrih ih rundamnak Thuthangtha cu karhzai thei lo dingin zumtu pawl hnatuannak cu a phunphun in harsatnak an pek ih an hnaihnok. Culawng hman siloin zumtu lem, thuthangtha simtu lem, zumnak lem, tisa duhzawng, Pathian Thlarau ih hrin mi silo mi tampi an suahter fawn. Cutin Khrih a rat sal hlanah Satan in a tam thei bik in sankhuk hremhmun sungah lutpi dingin milai a bum rero.

 

8.       Netnak/Tawpnak:

A.      Pathian lalram: Khrih a ratsal tikah Pathian lalram cu a kumkhua hrangah din famkim asi ding. Kross parah a tlen mi minung pawl, Thlarau in a hrinthar mi pawl cu sankhuk Pathian insang, vanramah Pathian thangthat in sankhuk Pathian lalram sungah kan nung ding.

B.      Satan lalram: Satan lalram cu siatsuah asi dingih Satan le a ho pawl, a tluse zomi vancung mi, le Khrih ah zumnak nung nei lo tu milai pawl cu sankhuk hremhmunah thlak le hrem an si ding.

 

Pathian lalram Thuthangtha hi Zesu in leitlunah a sim nasat mi asi. Tuahnak, hnatuan, le neihmi, midang in ziang an simih mah le mah ziang kanti aw timi parah a hngat aw lo, mi pakhat sunglam thlarau mi sinak, Pathian fa sinak neih asimaw timi sawn in ziang lalram misa asi timi lai a rel sawn asi.

(Pathian lalram thu pehzawm vivo lai ding).