Khrih ah Pathian le milai rem awknak: Zesu in Leitlunah Ziang Ara tuah?

 

Bawi Zesu cu leitlunah sakhua-biaknak pawlkom dinding in a ra lo, a dinlo, Pathian le milai karlak rualremnak, pehzawm awknakthar tuah dingin ara sawn asi.

 

Bawi Zesu cu sankhuk rei, ziangkim sersiam hlan ihsin a kumkhau in a hmunmi Pathian asi. Pathian sinak nei cingin milai thuam in a rung thuam aw aw ih milai ah a rung cang. Leitlun milai taksa in a thuam awk laiah Pathian sinak le milai sinak zaahza a nei. Cutin leitlunah a rat tikah Bawi Zesu, Pathian Fapa, Messiah, in leitlunah ziang a rung tuah ding timi thu ah a phunphun in milai ruatnak a rak um. Herod siangpahrang cun a lalnak cuhtu dingah a rak ruatih a ttih tuk ruangah Zesu thah tumin naute tampi a rak that.  Rome ramkulh uknak hnuaiah a  rak nungmi Israel pawlin Messiah cu Israel ram zalennak (political freedom) pe tu dingah an rak ruat. Biaknak lam hruaitu, Judaism hruaitu pawl, Jerusalem Biak inn sung hnatuan sang kaitu, hruaitu pawl cun an hngak rero mi Messiah arat tikah siangpahrang vekin lal le upatnak thawn a ra dingah an rak ruat. Cutin leitlunah Pathian Fapa cu, siahhlawh vekin, a rat ngaingai tikah Bible thiamsang, danthiam pawl, biaknak lam hruaitu, le ram hruaitu pawl khalin Messiah asi ti an rak thei lo. Pathian Fapa cu milai taksa in a thuam aw aw ih, a thu an ngai ih amah an hmu nan an theithei cuang lo. Tuini tiangin Bawi Zesu in a simta mi, a tuantheh zomi milai le Pathian karlak remdaihnak, remawksalnak, pehzawm awknakthar cu leitlun milai mi tampi pawlin an thei fiang loih an hmang sual rero lai hrih. Bawi Zesu Khrih in a tuansuak mi milai le Pathian karlak remdaihnak thuthangtha cu mi tampi in an zum lo ih mi tampi in leitlun biaknak sakhua bungrua hmanrua ah an hmang.

 

Bawi Zesu Khrih cu leitlun ah biaknak, sakhua thar dinding in a ra lo. A siatzo mi Pathian le milai pehzawm awknak tuahtha sal dingin a ra sawn mi asi. Curuangah milai, bulpak pakhat cio in Khrih Thlarau a nei lo tu pawl cu Pathian fate an si loih Bawi Zesu leitlunah a ratnak cu an hrangah san le man nei lo asi. Bulpak in Zesu Khrih ah Pathian thawn rualremnak, pehzawm awknak thar a nei lo tu cu ziangvek biaknak sakhua sungtel khal sisehla, ziangvek zuamnak felnak le zumnak thurin khal thlun sehla a hrangah san nei lo, mah le mah bum awknak men asi.

 

Khrismass campha a kim cuahco, kan hngak rero vekin, Bawi Zesu leitlun a rat lai, kan dunglam kum 2000 rei, khuahlan thuanthu ah kirsal duak uhsi. Bawi Zes leitlunah a rat tikah Jerusalem biak inn pi cu kum zatel siar in a rak ding ciaiciai. A sungah puithiam sang le danthiam pawl puan ropi sin in an cangvai, biaknak, raithawinak, thilpeknak, hlasaknak, Bible siarnak, a phunphun a um celcel. Biaknak le raithawinak ropi taktak tuah ringring asi. Thuthlunghlun sungah Pathian kamsang pawlin an rak simcia vekin a ra lai dingmi Messiah cu an hngak ih a thuhla cu an sim ringring. Israel Siangpahrang a ra dingmi hngak in sabath ni tinte Biak inn ah biaknak lam thiltha tuahnak phunkim an tuah ringring. Cutin Messiah a rat tikah Jerusalem Biak inn pi sungah a to dingih leitlun siangpahrang, mi uktu, a rung cang dingih Israel pawl khal Rome kuthnuai ihsin luat tahratin leitlun miphun hmuahhmuah lakah miphun-u, Pathian hrilce mi miphun an sinak cu leitlun milai mithmuh ah porh awknak dingin an rak ruat. Sual raithawinak, thenhra thenkhat peknak, Bible siarnak, le biaknak lam danthlunnak, citinkim in an tuah theh.

 

Cutin kumza tampi biaknak an rak neih tikah an thinlung sungah hmun kaupi khua aluahtu cu biaknak pawlkom sungah upa sinak, danthlunnakin thiltha tuahnak, milai felnak, zumnak thurin dik le thianghlim neihnak, puithiam sang hnatuan, danthiam, biaknak sung pawlkom hnatuan sangkai, milai le milai upat awknak, hmintha ngahnak pawl a rak si. Biaknak ih cangvaihnak pawl cu sumdawnnak vekin an rak hmangih biak inn rori ah sum thleng awknak an rak tuah. Biak inn hnatuan pawlin raithawinak rannung an zuar, sumtlengnak amiat an rak la, puithiam le danthiam pawl cu upatnak an rak co, cutin milai pawlkom awknak dinhmun sang cu an rak kilkhawi ih anmai thuhnuai ah a nung lo tu pawl cu lungto in an rak dengthat, an hrem, kross parah an that. Sihmansehla Israel mipun lakah, Mikha 6:8 ah Pathian in amah be tu pawlin an neih hrimhrim dingmi thu a simmi, “A dingmi tuah (rightouesness) le zaangfahnak tlaihsan (love mercy) le tangdorte in Pathian thawn fehtlang (humbly walking with God)” an rak nunpi lo. Tongdangin sim asile, Israel biaknak lam hruaitu le mipi pawlin an Pathian cu an be ringring, Bible in a simmi cu leitlun biaknak bungrua hmanrua vekin an hmangih an kenkawh, an urhsun zet.

 

 

Sihmansehla, Pathian Thlarau an sungah a umlo, Bible (OT) an siar ringring, dan an thlun, raithawinak an pe, thenhra thenkhat an pe, rawl an ul, biaknak in a phutmi hmuahhmuah an tuah theh. An sungah Pathian thutak a nung lo. Pawnlang sakhua biaknak, milai zoh ih upat awknak lawng an neihmi, an sinak, an hawl mi a rak si.

 

Bawi Zesu leitlunah milai thuam in a rak ra. Biaknak a din ta lo. Rome uknak ihsin zalennak a buaipi talo. Kawhhran pawl (denomination) a din ta lo. Zerusalem Biak inn pi sungah hnatuan sang a kai talo. Hnatuan sang kai, mi upat hlawh, danthiam, mifel, puithiam sang pawl kha dungthluntu ah a hril ta lo. An rak ruahsan zetmi Biak inn dinhmun sang a kai ta lo. Pastor a tuan ta lo. Lakkha a ei talo. Cuhnakin misual, mi thalo, mi aa ti ah an ruahmi, senpi vangtlang lakah an nautat zetmi siahkhawngtu (tax collector) tla dungthluntu ah a hril. Lamzin parah zo hman in ziangah an siar lo mi mitcaw, kebai, farah zawnzai, hlawhhlang nu pawlin Zesu cu an tawngih damnak an co riangri. Farasi mi thianghlim pawl danbuar tahratin kutkholh lo in rawl an ei. Farasi pawlin sabath ni ah theipi hnah tluk rit hman an khai lolai ah lolak thlairah an lo ih an ei, mi naa a tidam. Hlawhhlang le misualbik tiah an ruatmi pawlih rualpi tha ah a cang tariai. Zianghmanah an rak siar lomi, thiltha suaknak ding hmunah an rak ruat lomi Bethlehem khawte ah a piang. Zerusalem Biak inn pi sung lawngah Pathian um vekin an ruah laiah Bawi Zesu in lamzin par, khawlak, tiva, lawng par, tlangparah Pathian thutak a sim sawn riangri. Farasi le danthiam pawlin upatnak le cawimawi nak an ngah ding ah an rak ruat mi upatnak cu Bawi Zesu hnen ihsin an ngah ta lo, an thin a tteu, an hngir a tteu, an hua ih a siatnak lawnghawlin an bawh, sual puh ding lawng an hawl. Minaa a tidam ih mithi a kaihthawh tik khalah a thatnak sete hman an hmu thei lo. Farasi le danthiam pawl thinlung sungah iksiknak le siatnak hlir in a khat. Culai ah Zesu in “rawng hnih mi thlanrawp vek nan si, rul cithlah pawl” ati hai tikah an sunglam cu meisa bangin a kang.

 

Farsasi pawl biaknak fehsualnak hrekkhat pawl:

i)                    Pathian thutak cu milai biaknak (sakhua) pawlkom hmanrua ah an rak hmang,

ii)                   Milai le milai upat awknak, pehtlaih awknak, cawimawi awknak, sumpai lennak, society ah upa sinak, dinhmun sang sinakah an rak hmang,

iii)                 An sungah Pathian Thlarau a um loih pawnlang sakhuanak men in Pathian thutak an rak fehpi,

iv)                 Pathian thutak cu anmai pawlkom dinhmun rikhamnak, lamtang tuahnak, hmanruaah an rak hmang,

v)                  Pathian thutak cu an sual khuhnak milai pawnlang ceimawi awknakah an hmang,

vi)                 Pathian thutak cu midang mawhsiatnak, a sual mile santlai lo hmuhsuamnak, thangsiatnak, zohniamnak, midang ziangsiarlonak ah an rakhmang,

vii)               Pathian thutak cu anmah le anmah cu midang hnakin tha cuang, thianghlim cuang vekin anmah cawimawitu ah an rak hmang,

viii)              Pathian thutak cu ei hawlnak pumcawmnakah an rak hmang.

 

 

Bawi Zesu in a dungthluntu pawl nunah a sersiamthar mi Pathian biaknak diktak cu nun sungmuril, thlarau nunthar, thlengawknak asi. Leitlun uknak (Satan lalram) milesa pawl cu Pathian ukmi ah a canter. Satan fa ihsin Pathian fa ah a canter. Khrih in Amai sungah Pathian le milai rualremnak a tuah zo. Khrih ah a nungtu hmuahhmuah cu Pathian thawn rualremnak an nei zo. Bawi Zesu in a dinmi Pathian biaknak cu leitlun sakhua vekin mibur pawlkom awknak (social religious organization) siloin milai thinlung sungah Pathian Thlarau lalnak asi. Pathian Thlarau in a ukmi pawl cu Pathian fate an si.Cutin Pathian Thlarau in a ukmi pawl sunglamah Pathian mizia sersiamthar sal asi ih “tuah aw, tuah aw hlah” timi le biaknak, raithawinak, le sakhua cangvaihnak parah hngat aw nawn loin Pathian Thlarau ukmi nun thawn leitlun nun sung Pathian riantu ah a canter.  Cutin Bawi Zesu in a dinta mi Pathian biaknak cu biak inn sungah biaknak asiloih nun pumhlum Pathian hrangah nun asi. Milai ruangpum sungah Pathian Thlarau a nung sawn. Cutin Pathian Thlarau in a ukmi pawl sungah Pathian lalram cu a din vivo ih satan lalram cu thiatbal vivo asi. “Na uknak thleng hramseh” ti ah thlacam mi cu a takin milai, zumtu thinlung sungah Pathian Thlarau a lal asi. Cutin Khrih ih Thlarau cu milai sungah a nung, Khrih ih thlarau a co lo tu hmuahhmuah cu Pathian fa an silo, Satan fa an si. Cutun Pathian Thalrau Thianghlim cu milai, zumtu sunglam ah hna a tuanih Khrih hmin cawimawi in Pathian tumtah le duhzawng lunghmui zawng hnatuan cu milai, zumtu nun ah tuan suak asi. Cutin milai, zumtu ih duhnak le ruahnak thinlung zapi ten Pathian Thlarau in a uk tikah Pathian duhmi duh in, Pathian huatmi a hua ih Pathian ih tumtah hrangah a leitlun nung cu a hmang. Tisa thinlung duhnak cu tlansan in nitin kross parah khenbet tahratin Pathian ih duhnak rian in leitlun nun cu hman asi. Cutin Pathian duhnak rian nak hrangah hmanrua phunphun a umih milai pawlkom awknak phunphun khal a tel.

 

“Khrih ih Thlarau a nei lotu cu Satan ta an si” tiah Bible in insim. Bawi Zesu, Pathian Fapa cu milai thuam in thuam aw tahratin leitlunah a rat tikah milai sualman cu kross parah apek sak. Cutheh in, Pa Pathian hnenah a feh ih Thalrau Thianghlim cu milai thinlung sungah lal dingin a run thlah asi.  Pathian Thlarau Thianghlim in Khrih ah milai thlarau le Pathian pehzawm awknak thar a sersiam, milai thlarau a hrinthar, sersiamthar. Cutin Pathian Thlarau in a ukmi milai pawl nunah “duhdawtnak, lungawinak, remdaihnak, hnangamnak, tuarfainak, tvp,” thlaraurah a rah. Khrih ih mizia a thanglian. Cutin Pathian Thalrau in a ukmi pawl nun hmangin Pathian le milai rem awknak thuthangtha cu simsuak vivo asi ih Pathian uknak ram karhzai ter vivo asi.

 

 

            Khaikhawm sal asile, mi pakhatkhat in Zesu Khrih ah Pathian thawn remawknak a neih lo ahcun, leitlun biaknak, raithawinak, peknak, rawl ulh thlacamnak, biaknak cangvaihnak, le pawlkom hnatuan tuanvo kaihmi pawl cu milai bum awknak Satan hmanrua men an si. Bawi Zesu in leitlunah sakhua-biaknak pawlkom a ra din lo, Pathian le milai karlak rualremnak, pehzawm awknakthar a tuah sawn asi.

 

Asile, Khrih Thlarau cotu ka si maw ti ziangtin kan thei thei ding? A tlunah simzo vekin Khrih Thlarau tello leitlun biaknak sung cangvaihnak in a thupi bikah a retmi le a rahsuah mi pawl tla cu milai le milai cawimawi awknak, sihcih pehtlaih awknak, biaknak dan thlunnak, thiltha tuahnak in midang hnakin thacuang vekin mah le mah theih awknak porh awknak, milai le milai burkhawm pawlkom awknak milai tuahcawp hmin le mawicawi awknak, milai tuahnak in vanram kai tumnak, tvp asi. Khrih Thlarau in a ukmi, umpimi, le lamhruaimi nun in a rahsuak mi cu Pathian thangthatnak, Khrih hrang nunnak, duhdawtnak, dingfelnak,  remdaihnak, rualremnak, zangfahnak tlaihsan, hnangamnak, tuarfainak, Khrih thupek vekin nunnak, midang zawn ruat thiamnak, tvp, thlarau rah pawl tla an si.

 

(Cutin sim tikah kawhhran pawlkom le zumtu sihcih awknak a tul lo tinak asilo ih, Khrih ah Pathian thawn bulpak pehzawm awknak nei loin pawnlang leitlun milai sakhua cangvaihnak, milai le milai sihcih awknak, pawlkom awknak, hnatuannak, thiltha tuahnak, le raithawinak pawl cu zianghman lo, milai bum awknak men asi thu sim mi asi. Pathian in milai hmangin a lalram cu milai thinlung sungah a din rero vekin zumtu Pathian fate pawl sihcih pawlkom awknak cu Pathian Thlarau kaihhruai mi ukmi pawlin neih hrimhrim dingmi asi.)

 

Zumnak thurin (doctrine) hmanrua ah hmang tahratin lamtang tuah awk nak, pawl sawm awknak, milai pawlkom awknak, thenthek awknak a suahtertu pawl hi Pathian Thlarau asilo ih biaknaklem, milai tuah cawp, Pathian thutak cu hmanrua ah hmangin milai le milai sihcih awknak men an si. ( Zumnak nung nei nacingin thlarau ah a nauhak tuk lai mi le theihnak tlaksam ruangah milai ruahdan le hmuhdan pomdan bang awk lonakruang khalah a cang thei mi asi fawn). Cutikah Farasi pawlin Bawi Zesu leitlun a rat laiah an rak thei thiam lo vekin Pathian thutak cu milai pawlkom awknak hmanrua ah a hmangtu pawl cun Pathian le milai pehzawm awknak hnakin milai le milai pehzawm awknak, cawimawi awknak, dan le dun, biaknak ih raithawinak, thiltha tuahnak, tvp, pawl cu thupisawn ah an ret sawn. An sungah Khrih ih Thlarau aum lo vekin an nun ah Khrih ih mizia a lang dah lo ih midang mizia a lang sawn. Satan mizia cu porh awknak, midang nautatnak, mawhsiatnak, simsiat thangsiatnak, tisa duhnak diriam ternak, milai le milai cawimawi awknak, tvp tla an si. Cun, zumnak thurin a dikzia (doctrinal/theological correctness) cu Pathian zangfah lainatnak hnakin a thupi sawnah a rak ruattu Farasi pawl biaknak vek fangin santhar Khrihfa mi tampi santiluangin a fen rero fawn.

 

Bawi Zesu Khrih leitlun taksa in a suahni campha lawm dingin timtuah rero tu pawl, Zesu Khrih thawn bulpak pehzawm awknak nei loin le Khrih Thlarau nei loin, Khrih Thlarau uknak le kaihhruainak hnuai ah nung loin, leitlun sakhuanak men in tuah mi biaknak, sakhua cangfaihnak, puai tuahnak, peknak hmuahhmuah cu milai bum nak Satan hmanrua men an si. Zesu Khrih ah Pathian thawn pehzawm awknak thar, remdaihnak nunthar na nei zo maw?

 

Khrih Thlarau in a ukmi pawl nun ahcun Khrih ih mizia a lang, Pathian duhdawtnak an sungah a luangliam ih Pathian ih duhmi cu duh in Pathian huatmi cu an hua. Khrih ih Thlarau in a ukmi pawl cu Pathian mizia ttawmpitu kan si. Pathian in a duhdawtih a Fapa neihsun a pekmi leitlun milai, Pathian in amai hmuihmel kengin a sersiammi pawl cu thleidannak um loten an duhdawt ih an hrangah thiltha tuahsak ding lawng an ruatin an tuan. Anmai hrang hmakhua sialin an cangvai lo, sal le siahhlawh lungput nei in mi zapi ten upatnak le zawnruah thiamnak in midang rian dingin an nung sawn asi. Thentheknak le huat awknak, tisa nuamnung cennak tipungtu Satan hmanrua si loin milai le Pathian karlak remdaihnak suahpitu Thuthangtha phurtu an si sawn.

 

Kum 2000 rei laiah leitlun sakhua biaknak ih upat awknak, Pathian thutak cu hmanrua ah hmang tahratin milai le milai pehtlaih awknak, sakhau cangvaihnak le raithawinak pawl hi tuisan mi tampi hellramah a liampi tu satan hmanrua asi rero lai thei. “Keimah cu lamzin, thutak, le nunnak ka si. Keimah in siar lo zohman Pa hnen an feh thei lo” ti ah Zesu in in cahta vekin Zesu leitlunah milai taksa in a thuam awknak campha lawmnak can kan neih vekin bulpak pakhat cio Khrih ah Pathian thawn pehzawm awknak neitu, Pathian Thlarau in a cencilh, uk, lamhruai mi si cio ram uhsi tiah duhsaknak le thlacam phah in, Khrih ah Pathian thawn kan pehzawm awknak cu cen in nawmpi cio uhsi!

 

Eden dum sungah Satan in a rak siatsuah mi, Pathian le milai pehtlaih awknak “Sersiamtu –le-siamsiammi” pehzawm awknak cu Khrih Zesu ah a tha sawn mi pehzawm awknakthar, “Pa-le-fahniang” dinhmun pehzawmnakthar in tuahsak zo. Evi le Adam vekin Eden dum sungah in tanta loih Amai Thlarau Thianghlim cu kan sungah “Amahkhan tawh” “guarantee” vekin in cencilh ih in uk, lam in hruai ruangah Pai duhdawtnak ihsin in thenthei tu ding lei le van karlakah sersiammi zianghman a um lo.

 

Bawi Zesu leitlunah a ratnak san cu leitlun biaknak, sakhua dinding ah a ra lo, a din lo, Amah ah milai le Pathian pehzawm awknak thar “Pa-le-Fahniang” pehzawm awknakthar tuah dingah a ra ih a tuah. Curuangah kan sungih a ummi Thlarau thawngin “Aba, ka Pa” tiah Pathian cu kan kawh thei nak asi.

 

Leitlun (planet) pakua a um tiah scientist pawlin in sim. India Scientist pa  in a sim dan vek asile a tu ih kan neih mi ni (sun) vek tluk in a tummi ni (sun) one million tluk cu an um ding ti a zum. Arsi hi santhar thiamnak sangbik thawn an tuah mi ahlatzohnak (telescope) thawn khal an siar thei lo nan scientist pawlin a neta bik an zumnak (estimate) vek asile arsi setilliion 30000000000000000000000 a um ding ti an zum. Arsi pawlhi kan leitlunpi (earth) hnakin a tum lawnglawng an si ding tiah an zum. Leitlunah a tufang ah milai one billion leng lo kan um. Kan leilungpi sersiam thawk ihsin billion thawngkhat lenglo milai leilungpi parah kan suak zo tiah an tuat. Cuhmuahhmuah sersiamtu Pathian in nangmah le keimah in duhdawtih a Fapa neihsun in pek. Kan sungah a Thlarau in in celcilh in in umpi, mangbangza huham cahnak thawn kan sungah a ceng asi. Cutin in sersiamtu, in duhdawtih in rundamtu in Amai tumtah vekin tuanvo in pekmi tuansuak thei dingin kan tulmi ziangkim cu kan tulnak hmunah, kan tulzat in, kan tulmi pohpoh, kan tuldan canah in pek theh dingin Khrih Zesu sungah ziangkim a famkim cia thehh zo asi.

 

Kol.1:17, Khrih cu ziang hmuahhmuah hlanah a rak um zo ih amah thawn an pehzom awknak thawngin ziangzongza cu umnak hmun an nei cio. (He is before all things, and in him all things hold together)

 

Eph. 1:3, Praise be to the God and Father of our Lord Jesus Christ, who has blessed us in the heavenly realms with every spiritual blessing in Christ.

 

Sankhuk innpi sungah a siat thei lomi a  kumkhua nunnak thawn thuam aw in A sunlawinak ttawmpitu, a ram ukpitu dingah in ruat ruangah leitlunah tikcu reilo te a hnatuan tuanpi tu dingah kan sungin hna a tuan sawn asi. Khrih a ratsal tikah Amah ah Pathian thawn pehzawm awknak tharnei tu hmuahhmua in ko khawm dingih sankhuk nunnak sungah nuam zetin amah thawn kan leng tlang ding. Aw, a va nuam zik em!

 

Zesu Khrih leitlun a ratnak san cu Pathian thawn bulpak pehzawm awknakthar kan neih nak ding hrangah asi. Cui kan pehzawm awknak hnakin a thupisawnmi kan hrangah leitlunah zianghman a um lo. A thupibik, kan duhbik, kan dinhmun, le kan lungawinak bik cu Khrih ah Pa Pathian thawn kan pehzawm awknak ah asi. Pa Pathian thawn kan pehzawm awknak siatsuah thei tu ding lei le van karlakah sersiammi zianghman a um lo. Pai duhdawtnak sung ihsin in thenthei tu ding Pathian in zianghman a sersiam lo. Khrih Thlarau in a humham cahnak, duhdawtnak le Pathian mizia famkim thawn Thlarau in a cencilh, a uk, a pawlkom mi hrangah nitin Khrismass kan hmang ringring, leitlun vanram, Pathian thawn pawlkom awknak cu leitlun nun ah kan cen rero zo asi sawn.

 

Adam a tluksiat hlan ih a dinhmun hnakih thasawn ah Pathian in A Fapa sungah in ruatsak zo.

 

Khrismass lungawinak in casiartu zapi te sunglam nun lo luahkaht hram sheh!