“Na Pathian hnak in na lungawinak, duhthusam, le tumtah a lo siatsuah saktu, na raal a caksawn asile na raal kha be sawn aw.”

 

“Na duhmi a famkim lo asile Pathian thawn nan duhmi a bang aw lo tinak asi ding.”  

 

“Khawtawhpit lamzin na thleng asile na lungawi sawn aw, nangmah in na tuah thei lomi lamzin ah hruai na si ding.”

 

  

 

 

KAWTHAWHPIT LAMZIN IHSIN KHAM THEIHLO LAMZIN AH

 

 

Kawtawhpit pahbaltu na si maw, na lamzin kawhtawhpit thleng vekin na ding cuahco maw, dungsip dingin na dunglam na zoh rero maw? Pathian in milai a sersiam tikah kawtawhpit lamzin ah a hruai dah lo. Milai in kawtawhpit dinhmun thleng vekin an theih awknak cu mangbangza thiltitheihnak nei tu Pathian an theihtheinak ding sangka pi sawn a si. Na nunnak hrang na sunmang duhthusam pawl pitlin thei lo dingin lamzin pit theh vekin na thei maw? Na miphun, pawlkom, kawhhran, insang, na hardamnak, na sumpai, sungkhat, duhdawtmi, kiangkap milai pawlkom, pursum leilawn, tefa hrangah na ruahsan mi pawl cu kawtawhpit dinhmun ah thleng vekin na theih mi a um maw? Mangbangza thiltitheihnak neitu Pathian Thlarau na sungah a ummi a cangvai nak ding hrangah tikcu cantha na hmaiah a thleng tinak asi. Milai ruahnak, theihnak, titheimi in a tuah thei theh mi nun lamzin zawh dingin Pathian a um a tul lo. Milai nun cu milai ruahnak, tuahnak, tithei mi in a tlin lo mi lamzin ah zumnak in nung, feh, kekar dingin sersiam mi kan si.

 

Kawtawhpit dinhmun na thlen canah mi pathum nan um tlang, ‘Nangmah’, ‘Satan” le ‘Pathian.” Satan cun a lo hnihsan rero, na fehnak lamzin a pitzo ti ah a lo sim leuhleuh ih Pathian fate a mualpho ding bawh in a lungawi tuk. Pathian in na kut in lo kaitho dingin a lo hngak ringring, dingin na tho ding maw.

 

Voitampi cu milai ruahnak in a cang thei mi lawng hi Pathian in a tuah thei ding tiah zumtu ti aw mi tampi cu anmai ruahnak sal sungah an tang. Cutin an ruahnak in a cang thei lomi dinhmun ah an thlen tikah kawtawhpit thleng vekin an thei aw aw ih thinlung beidong in anmah le anmah siseh midang le dinhmun pakhatkhat, lole Pathian mawhsiat in an tikcu an hmang liam ih thanau le thabangin zianghman tuah sunzawm thei nawn loin an um. Kawtawhpit na thleng asile na lamzin thleng aw, a danglam mi lamzin zawh aw.

 

Na zum thei nak dingah malte leitlun thuanthu ah a cang zomi zoh hnik uhsi:

Abrahram: Abrahram in a pupa ro, leiram, pawlkom, sungkhat bawmtu rualpitha pawl suahsan in amah minung lam ruahnak lamzin cu tanta in Pathian kawhnak lamzin ah a feh tikah leitlun cemtiang zumnak ih a tesinfa pawl an rung pung vivo sawn.

 

Job: Job cu a neihmi sumsaw, lennak, lungawinak, fale, ziangkim a hloh theh hnu ah a let in Pathian in a peksal.

 

Paul: Thawng inn sungah dik lo zetin thawng thlak asinan thawng a tla ti theih dah lomi Khrih dungthluntu dang pawl hnakih tam Bible cangan tu asi.

 

Willian Cary: Buut (kedan) thi/tuah in ei in a hawl ih missionary a rak tuan nan India ram ah danglamnak maksak rak thlenpi tu asi.

 

Nelson Mandela: Kum 27 sung thawng inn a tang, a suaksal ih South Africa ram uktu a tuan.

 

Keimai thuanthu tawite ka sim asile, farah zawnzaihnak ah a tui casiar tu lakah ka nauhak lai ih farah zawnzaihnak ka tawn mi, ka rak lan zo mi hankih harsatnak le farah zawnzaihnak a tawngtu nan um ka zum lo. Kumnga sung pengthum hlatnak ah ke in tlawng ka rak kai, hnipuan tha nei loin nisa ruahsur le rawldai ei in tlawng ca ka rak zir. Taksa damlo nak thu ah ka sim asile Job in a rak sim mi “Ka ruh parah ka vur a thlai aw niarni”  a timi vek cekci dinhmun thlengin mithi hnar ban in ka rak naa. Fim zirnak lamah kawlram ramkulh buainak ruangah siseh cozah dodal in vahtawihnak ruangah siseh fimzir sunzawm theinak ding lamzin um nawn lo dinhmun ka rak thleng. Farah zawnzaihnak dinhmun sim asile puan zunkhat thawn Bible tlawng ka rak kai thawk. Insang harsatnak thu sim asile ka no lai duhthusam ih raalkhat ah ka rak ding. Ram le miphun hrang sunmang thu sim asile kawtawhpit dinhmun ah ka rak thleng. Kiangkap rual le pi thu sim asile awkamsia kamkhat hman in ka biak dah lomi duhdawt zetmi pawl ih hnawnnak, Zumank lam thu ah sim asile “Pathian in itlansan zo mawsi?” ti dingin ka rak tlusia, satan raal donak ah santan in i-thawng tluk tikah zial parah cal khit rero in ziang hmuahhmuah cu Pathian kutah ka surrender zo, nunnak, tumtah, duhthusam le sunhmang hmuahhmuah cu Pathian kutah up lo theih lo dinhmun ka thleng. Cuhmuahhmuah ka hmuh tawnmi kawtawhpit dinhmun thlennak pawl, sumpai harsat farah zawnzaihnak, hardamnak tha lo, insang buainak, ram le miphun thu sunmang lamzin pit, pawlkom lamzin pit, thlarau tlukbahnak, cu hmuahhmuah cu dungsip tertu si loin Pathian thawn in nai aw ter sinsin tu,  milai lamzin tlansan in Pathian ih lamzin sawnah, milai duhthusam le lungawi zawng tlansan in Pathian duhzawng le lungawi zawng ah hngat aw nun ah, milai cahnak lenglamah Pathian Thlarau cahnak ka nunah a lang awk sinsin nak asi. A tawizawng in ka sim asile, 1^st century nuntu khawsakdan in ka rak thanglian ih mithi khawhnar tiang thleng in ram le miphun, pawlkom hmakhua kawtawhpit dinhmun ihsin a hahdam le zalen phurzang Pathian lamzin ah mangbangza Pathian Thlarau in lam i-hruai.

 

A tu ah kawtawhpit dinhmun ah na thleng pang maw? Na kiangkap ah kawtawhpit dinhmunah a dingih ninghang riahsia, beidong, kekarnak ding thei loin a ding cuahco mi, vanzoh ah sangsi lei zoh ah pitsi dinhmun thleng na hmuhmi an um maw? Cuvek dinhmunah na thleng asile mangbangza lamzin, na hmuh dah lomi ah a lothlenter thleitu, thlenter duhtu, le tumtu, Pathian Thlarau a um asi.  Cui lamzin cu midang, leitlun sersiam mi pakhatkhat maw, pakhat hnakih tam khalin an kham thei lomi asi.

 

Ziangruangah hivek dinhmunah ka thleng tiah na mangbang rero tla asi thei. Ziangruang khalah va sisehla pakhat a fiangmi cu a danglam mi lamzin na zawh dingmi a um timi asi. Cui lamzin cu a tu ih na dinhmun a lothlenter tu hnakih thasawn lamzin asi, a zalenmi, a hahdam mi, le zohman ih kham, siatsuah theih lo mi lamzin asi. Cui lamzin thleng thei dingin nangmai lamah kekar tul mi cu pakhatnakah, tui na dinhmun a lo thlentu mawhsiatnak na bansan a tul, pahnihnakah tui na dinhmun a lo thlenpi tu lamzin hnakin thasawn na hmailamah a um asi ti na zum ngam ih zumnak in ke na kar ngam a tul, pathumnakah, na sunmang, tumtah le na duhthusam, nuamtizawng cu lamzin neitu Pathian hnenah na up a tul, palinak ah nangmai cahnak theihnak fimnak ti theinak si loin lamzin tuahtu ih cahnak tumtah le fimnak duhthusam vekin ziangkim tuah famkim asi ding timi ah na hngat awk a tul. Hihi thei ringring aw, nangmah lo thlawsuah dingin Pathian in na kiangkap zohman a rawn dah lo. “Mawhsiatu” hi satan ih hmin asi, curuangah satan ih hnatuan tuan rero mi midang mawhsiattu va si hlah! Cuhnak in mawhsiat theih lo lamzin zawh sawn aw.

 

Na duhthusam, na sunmang, na lungawizawng siatsuahtu dingah na ruahmi, na lamzin lo kham tu kha ruattha sal hnik aw? Na ning a zak men thei. Lei le van sersiam tu Pathian ka zum, Pathian cu irundamtu asi, satan kut hellram ihsin irundam tu asi, Pathian in iduhdawt ih a fapa mal neihsun ipek, leile van sersiamtu Pathian ih Thlarau Thianghlim cu ka sungah a ceng ti nacing in, nitin na vuihramnak, nangmah le nangmah na mawhsiat awknak, na kiangkap milai na nupi/pasal, unau, rualpi, kawhhran hruaitu, miphun hruaitu, pawlkom hruaitu, midang na mawhsiatnak, na vuihram nak pawl kha ruat tha sal hnik! Na ning a zak zetmen thei. Na Pathian in nathrik a tidam thei lo, na lungawinak siatsuahtu a lo lakkiang sak thei lo, na lamzin cu kawtawhpit vekin lo khamsak tu a neh thei lo, na miphun na kawhhran na pawlkom, na insang, nangmai siatnak tuahtu a kham thei lo asi ahcun na Pathian cu biaktlak Pathian asilo tinak asi. A tawizawngin na raal hnakin na Pathian a cak lo sawn asi ahcun na raal kha be sawn aw! Ningzakza milai, Khrih hmin a lakin sal rero tu na rak si pang maw? Satan bumnak in a khat zomi na thinlung khawruahdan kha thleng aw la, a nugnmi Pathian remruat le duhnak sawnah na sunmang, duhthusam, le nuam timi pawl kha up aw. Nangmah le nangmah, mai porh awknak nuamnung cennak hrangah na taksa, na neihmi, insang, pehtlaih mi milai le thilri ziangkim na rak hman tum rero nak ihsin her aw aw la ziangkim cu Pathian tumtah, duhzawng le lunghmuizawng hrangah up theh sawn aw! Pathian lungawinak le lunghmui zawng asi ahcun a tu rori ah leitlun nun suahsan khal rem ti mei aw, ziangah tile Pathian telloin leitlun nun cu hellram vek, kawtawhpit nun asi. Cutikah, na sung ihsin nangmai tisa tiriam ter duhnak, sunmang, tumtah le duhthusam pawl kha na hlonhloh theh hnu lawngah Pathian Thlarau in na sungah lo luahkhat in amai tumtah thiltha lamzin thar ah a lo hruai ding. A lamzin cu nangmah milai ruahnak lamzin hnakin a let thawng tampi in a thasawn, a nuamsawn, a himsawn, a thianghlim sawnih nangmai lamzin thawn tahtthim ding a um lo asi.

 

Na nun tumtah lamzin kawtawhpit, feh sunzawm thei nawn lo vekin na thei aw aw asile na theihdan, na hmuhdan, na khawruahdan, na lamzin a dik lo, thleng a tul. Khatlam zawngin sim asile, na duhmi a famkim lo asile Pathian thawn nan duhmi a bang aw lo tinak asi. Pathian duhmi duh daw la nuam atimi nuam ti aw, a lamzin ah feh aw! Pathian duhmi a famkim lo zianghman a um lo. Khawtawhpit lamzin parah anhai in na ding rero maw? Khawtawpit lamzin parah sentlungpawng khit vekin na tal rero pang maw? Zesu Khrih in a kutza a lo san ih khamtheih lo, mawhsiat theih lo lamzinpi parah amah thawn feh dingin a lo hruai duh. Kawhtawhpit timi tongfang thei dah lo dingin na lamzin a tluang in na thei aw aw maw? Thlarau mitcaw in tisa lamzin pi parah na feh rero tla asi thei. Na hmailam lamzin ah kawtawpit, lamzin khamtu zianghman a um lo, na lamzin zawh mi cu a tawp tiang a him asi ti na fiang aw aw maw? Lei le van sersiamtu Pathian ih lamzin cu leitlun harsatnak, farah zawnzaihnak, taksa le thinlung natnak, misual mi tha lo le boruak tha lo pawlih kham theih lo, mawhsiat theih lo lamzin asi. Cui lamzin cu leitlun vanram lamzinpi asi. Mi zapi ten cui lamzin parah kutkai in zalen le nuam zet in feh dingin sawm kan asi.