Joseph thuanthu hin Khrihfa pawl leitlun nun hmuh tawn mi thu tampi a sim. A ralai dingmi Zesu Krih ih tuarnak pawl rak hmuhsak nak asi ti khalin aN sim. Tuisan nang le kei, khrihfa pawl zir ding um lo sehla Bible sungah a tel kher  a zum um lo. Ziangvek nun thuthup in zirh timi malte zoh hnik uhsi.

1)      Thu hmaihruai: Joseph thanlennak innsang:

2)      Iksiknak:

3)      Mah te hum aw thei lo dinhmun ah Joseph

4)      Thlemnak:

5)      Joseph Thawng inn sungah

6)       Hngak

7)      A kekuai mi belkheng

8)      Hniksak nak:

9)      Thuneih nak (Control)

10)    Priminister na tuan lo asile zohman mawhsiat ding na nei lo

11)  Egypt ramah

12)   Joseph a tap; Lungawinak mithli

 

A tlunlam thutlangpi pawl hmangin Joseph thuanthu in izirh mi pawl zumtu unau, leitlun khualtlawnpi bawmtu si dingin ruahsannak thawn a hnuailam vekin tawite ngan asi.

 

1)      Thu hmaihruai: Joseph thanlennak innsang:

Jacob fapa hleihnih pawl cu Reuben, Simeon, Levi, Judah, Dan, Naphtali, Gad, Asher, Issachar, Zebulun, Joseph, le Benjamin tla an si. Jacob ih innsang thuanthu zoh asile sualnak le harsatnak maksak taktak thawn a buahcih aw ringring mi vekin a lang; Jacob in a tlangval lai ah a u Isau a bum ih a u tih ah inn ihsin a tlan, Jacob cu ka thih le thih tiah Pathian thawn an buan aw aw, Jacob cu a pu Laban in a bum ve, Jacob fanu Dilah cu pawngsual a tawng, Jacoh ih nupi duat te  Rachel cu Benjamin a hrinnak ah a thihphah, Rauben in a pai nusun a ihpi, Joseph cu a u le in an zuar, Canaan ramah pam a tlungih Jacon insang Eygpt aramah an tlan. Hivek thuanthu khirhkhan le harsatnak a phunphun lakah Jacob le pawl lakah iksik nak nasetan a rak thanglian. Jacob in Joseph cu a duak hleice ih a u le in an iksik ruangah an zuar. Joseph te unau hleihnih lakah cutluk in iksik awknak, thah awk ngam khawp in huat awknak in hmun a khuar rero zo mi dinhmunah Jacob in a fale pawl nunsimnak thu kan hmuh lo mi siseh, Reuben in a nusun a ihpi tikah zianghman tuah loin a ummi siseh, a fanu miphun dang pawlin an pawngsual tikah zianghman tuah loin a um men mi zoh tikah siseh Jacob hi pacang dai zuahzi (passive father), fale thunun thei lo, thusim thiam lo, asi ding tiah thiamsang filawr hrekkhat in an sim. Jacob in a fale nunsimmnak thu kan hmuh lo lawng si loin cutluk in a u le in an hua, an iksik laiah Jacob in Joseph kha amah te hram lakah a u le pawl hnenah a thlah mi zoh tikah Jacob in a fale thinlung a theihlo zia a lang. Hivek insang cang lo ding in Bible in insang fale kilkhawi dan a zirh mi pawl nunpi le thlun cio ding hi a thupi ngaingai asi ti thuhmaihruai ah ka sim duh. Curuangah kan kiangkap ah kan insang, hnatuannak, kawhhran, vengsung le pawlkom cio ah ziangvek thinlung engtai awknak, huat awknak, iksiknak, kalhki awknak a um timi cu hruaitu zocio khalin fimkhur zetin thling tlak le remthat ringring thei a thupi. Zumtu unau rual lakah iksiknak in hram a thlak tikah satan kethlaknak ah a cangih tihnung ngaingai, sual tumpi tiang a hring suak thei asi. Nangmai thinling, na kiangkap kha cek fel aw.

 

2)      Iksiknak:

Iksiknak hi midang in thiltha an neih mi parah dawtnak, an neih mi vek neih ve duh nak, an neih ding duhsak lonak, thinlung hram sual mizia asi. Bible in a sim vekin Joseph cu a unau pawlin an iksik (Seem 37:11;Tirh 7:9). Joseph in mang a man mi a unau pawl le a pa a sim tikah a unau pawlin an iksik nak a luar sinsin. Iksiknak cun sual a rah ringring. Cain in Abel a iksik, Moses cu a unau in an iksik ih an dodal, David cu Saul in a iksik, cutin iksiknak in a hrinsuak mi cu thah awknak, siatsuah awknak, huat awknak, rem awk lonak asi theu. Bible sung zoh tikah iksiktu pawl hi ramdang mi le hlapi mi an si dah lo, naih bik mi, unau, ruapitha, hnatuanpi, insang khat ih nung mi an rak si theu. Mangbangza milai sual mizia a rak si. Iksinak cun sual a hring suak theu. Iksiknak ruangah iksiktu pawlin an iksikmi parah thilsual an tuah tikah thilsual an tuah asi ti hman thei aw lo dingkhawp in milai sia tha theih nak mit a cawt ter ih milai thisen suah ding tiang khal iksiktu pawl hin an tuah ngam zia Bible sugnah a lang. nangmah in midang na iksik tikah siseh, midang in an lo iksik tikah siseh thil tihnung, sual maksak a thleng thei asi ti ralrin a tha.

 

Curuangah fimkhur tul zetmi cu; Pathian malsawm dawn tikah, midang pi in raal tu pawl hnakin thlawsuah malza dawn tikah kan kiang kap nai bik pawl, a hlan ih rualpi tha, unau sungkhat, hnatuan pi lala hi tihnung bik, dunglam ihsin nam thawn sunthat tum tu, siatnak tuah tu an si thei asi ti Joseph thuanthu le Bible sung thuanthu dang pawlin inzirh asi. Curualrualin kan kiangkap ah unau, rualpi, hnatuanpi pawlin hlawknak, thatnak, thlawsuah an dawn tikah kan sunglam milai tisa mizia ihsin a suak thei mi iksiknak a um maw, kan duhdawt kan timi pawl thatnak an hmuh le an thansoh tikah kan lungawi pi taktak maw, cawimawi le upatnak pek a tlak le a mawi mi kan pe thei taktak maw, an hrang thiltha tuah thei dinhmun ah kan din tikah siseh an thansohnak ding lamzin kan kian a tul tikah siseh kan tuah dingmi kan tuah taktak maw, ti mah le mah cek awk fel a thupi. Ziangah tile iksiknak cu milai sunglam ah hram a thlak ngah hnu ahcun sual rapthlak tiang khal a hring suak thei asi ti Joseph unau pawl thuanthu in in zirh.  Mi pakhatkhat cu a sunglam iksiknak in a luahkhat tuk tikah a iksikmi parah thiltha lo sual rapthlak a tuah tikah a thinlung in a tuah mi ziangtluk a sual asi ti a thlei dang thei nawn lo. Cain in a unau Abel iksiknak in a thah tikah a unau pai thisen suah kha a iksiknak thinlung diriam ter tu sawn asi. Cuvek thotho in Joseph unau pawl thinlung cu iksiknak in a luahkhat tikah Joseph a hlo vuarvi kha an ihhmuh thawt nak, an lungawinak a rak si sawn, harsatnak an parah a tlak hlan sung cu.

 

3)      Mah te hum aw thei lo dinhmun ah Joseph

Josehp cu a u le pawlin tikhur kaw-hawm sungah an thlak tikah siseh an sar sal ih Egypt mi khualtlawng pa hnenah an zuar tikah siseh, Pontifar nupi in thuphan a puh ih thawngn thlak tikah siseh amah le amah zianghman hum awk thei nak a nei lo. Ziangtluk a au in a tap, a tal tla le a u le pawlin an neh neknek. Pathian fate pawl leitlun nunah zo cio khalin an tawn theu mi cu hihi asi: milai ruahsannak a cemcan, milai fimthiamnak in a tlin lo can, unau sungkhat rualpi rinsannmi pawlin zianghman in tuahsak thei lo can, leitlun sumpai neihmi le cozah le pawlkom phunphun in kan harsatnak in haikiang sak thei lo can, cuvek dinhmunah zumtu mi tampi kan thleng theu. Adam tluksiatnak ruangah milai mizia cu a selinglet theh, tisa cu Thlarau duhzawng a kalh ringring tikah milai tisa thinlung a kekkhuai ih a sawm neknek, milai lam ruahsan mi a cem thlepthlep, milai sunglam thinlung bawrhhlawh pawl cu meisa in a kaang alh ziamral hnu ah, thinlung a kekhuai mi raithawinak Pathian lunghmui ter tu a suak theu sawn asi.

 

Moses ih nun kan zoh asile amai duhthlannak vekin a miphun Israel pawl saltannak ihsin runsuak thei dingin zianghman tuah thei mi a neih lo lawng siloin amai nunnak hum in a tlansuak hnu ah Pathian in a ko sal. Paul ih nunnak zoh tikah amai milai biaknak lam zuamnak cun kawhhran siatsuahtu dinhmun ah a thlen ih Pathian in a kawh tikah amah le mah thei aw suak in keimah ahcun zianghman thatnak ka nei lo, ka bawipai kross siar lo zianghman uar ding ka nei lo tiah a au suak. Cuvek in Joseph khalin ka mangman mi pitlin ter thei dingin keimah ah zianghman a um lo asi ti a nun rori in a hmuh suak hnu ah Pathian in a mang man mi cu a pitlin ter sawn asi. Curuangah kum rei lo te leitlunah Pathian fate pawl kan nunnakah Pathian tumtah mi tuansuak hlanah kanmah milai fimnak thiamnak cahnak in siseh kan kiang le kap kan ruahsan rinsan mi ruangah siseh Pathian tumtah tuansuak dingin kanmah lamah zianghman tlinnak a um lo hulhual asi ti ding dinhmunah kan thlen hmaisak hi a rak tul theu asi. Khrih ah unau pawl, cuvek dinhmun ah na rak dingdah, ding rero lai, ding lai ding khal asile Bawipa kutcak cu amai hmin sunlawinak hrang lawngah a lang ding ruang sawn ah asi ti cing ringring uhsi. A lo siatsuah duhtu cu a lo bawmtu hnakin a cak sawn in na hmu men thei, na tumtah mi tuansuak dingin a tul mi zianghman nei lo dinhmunah na ding tla asi men thei, na duhmi le tumtah mi ihsin tipi raalkhat lamah ding vekin na thei aw aw tla asi men thei, ziangkim cu nangmah le na tumtah kalh zawng hlir in an cangvai tla asi men thei, cuvek dinhmun ah na ding tla asile lungawi sawn aw. Nangmah milai lam ihsin a suak mi pawl cu kaang alh theh hram sehla Pathian kutcak mangbangza a lang thei nak ding sawn asi.

 

4)      Thlemnak:

Joseph thuanthu cu casiar tu pawlin theih cia mi ah ruat in zir duh mi sawn ngan asi.

Joseph cu a pa Jacob in a u le va zoh dingin hramlak tuu khalhnak hmunah a thlah:

Leitlun cu thim thu neihnak in a uk lai, milai pawl cu Khrih ah rundamnak kan neih hnu, Pathian fate kan si hnu khalah theihnak ti theinak ah famkim loin nung kan si. Nitin thlemnak lakah kan ceng. Cumi lakah zumtu pawl nunah a thleng mi harsa bik pakhat cu mah siatsuah rero tu, siatsuah dingin bawh ringringtu, kan siatnak le tlaksiatnak ah lungawi sawntu, mah thangsiat rero tu pawl hrangah thiltha tuah dingin Pathian in a fial mi hi asi. Zesu cu leitlunah a rat tikah a minung pawlin an hnawng. An hrangah a nunnak a pek nan, an hnawng. Zesu dungthlun hleihnih lakah pakhat cu amah zuar tu asi. Kumthum sung amah zuar tu ding kha Zesu in thleidan nei loin a zoh men. “Nan lakah pakhat in in zuar ding” a ti tikah zo asi ding ti zohman in an thei aw lo. Ziangah tile Zesu in kumthum sung a zirh, a kaihruai, fimnak a zirh, Pathian thutak a zirh, thilmak a tuah mi a hmuh, tvp, mangbangza fimnak a zirh lai ah Zesu in Judas kha thleidan nak nei loin rualran ten a pehtlai theh hai tinak asi. Culawng hman siloin Judas cu sumkiltu ah an hmang ih sumpai a rak ei thup theu tiah Bible in a sim. Zesu in a thei ringring na in a zoh men, dungthluntu dang vekin fimnak a zirh, a kaihruai, thlawsuah pek mi a rak co ve.

 

Zumtu pawl siatsuah dingin le zumtu pawl thinlung sugnah Pathian Thlarau cangvai thei lo dingin satan hmanrua thlemnak tumbik pakhat cu milai mizia ihsin a suak mi thulun lonak le kan parah sualnak a tuah tu pawl siseh kanmah hnakin a tawntai deuh pawl parah lungput dik lo neih nak hi asi. A unau pawlin aJoseph parah lungput thinlung sia, iksiknak an neih mi cu a thei nacing in anmah veh dingin a pa in hramlak feh a fial tikah a pa thu a el lo. Culawng hman siloin a unau pawl hrang thiltha tuah dingin a feh. Pathian fate pawl leitlun nunah hivek dinhmun ah voi tampi kan din can a um theu. Kanmah parah siatnak tuah ding a bawh ringring tu, thangsiatnak a tuah rero zo tu le siatnak hawl ringring tu pawl parah thiltha tuah ding hi milai mizia in a tlin lo mi asi. Milai mizia in a tlin lomi tuahsuak thei dingin Pathian Thalrau in a fale pawl nunah a zirh, a kai hruai theu sawn asi.

 

A pahnih nakah, Joseph cu Egypt ram uktu a can tikah a unau pawl cu a hnenah an ra. Amah siatsuah ding, thah tumtu pawl parah thiltha tuah dingin Pathian in a fial. Milai in kan thinlung duh lo zawng, kan lungawi zawng siatsuahtu parah thiltha tuah thei ding hi a harsa zet mi asi. Asinan a thupi sawn mi le Joseph hnen ihsin kan zir ding tha cu Pathian hmuihmel kengih sersiammi milai pawl thawn pehtlai tikah Pathian mithmai zoh ringring thiam a thupi. Kan parah midang in an tuah mi ah siseh midang parah kan tuah mi siseh Pathian thawn a pehtlai aw theh mi, Pathian tumtah sungah a cangvai mi, asi ti ruahnak thawn cangvai ding le milai zovek par khalah Pathian hmuihmel hmu thiam in Pathian tihzah nak neih ringring ding hi a thupi mi asi. “Nannih cun siatnak ding nan tumtah nan Pathian in thatnak ah a canter” ti ah a ti. Zumlo tu, lole tisa mizia in a ukmi pawl cu an sunglam a thim theh tikah midang parah dik lo zetin thinnatnak, thiltha lo an tuah mi dik lo zia le sualzia theihtheinak an nei lo. Cumi cu theihsak in ziangkim kan tuah mi hi Pathian fial mi, le Pathian mithmai zoh in tuah ding a thupi.  Joseph in apar ah a unau pawlin an tuah siatmi le Pontifar nupi in thuphan a puh ih thawng inn ah an tlaknak pawl, dik lo zetin a tuar mi pawl hi ruat in riahsia in um ringring sehla Egypt ram prime minister a tuan thei lo ding. Tihnung zet satan thang kam mi pakhat cu lenglam ihsin tuahsiatnak ruangah kanmai thinlung sungah ngaidam thei lonak, thincinnak sual in hmunkhuar ding, satan ke thlaknak um ter ding hi asi. Ngai dam thei lonak, thincinnak in milai thinlung a luahkhat tikah cui hmuncu satan kethlaknak, a ihkhun tha bik ah a cang ih Pathian Thlarau siloin satan sawn kha milai sunglamah a lal, a cangvai theu asi. Lenglam ihsin thlemnak pawl cu hmanrua an si; mipa hrangah fala mawi zet cu tihnung asilo, amai thinlung sung ih a ummi tisa caknak kha tihnung sawn mi asi, midang tuahsiatnak ruangah zumtu pawl siatsuah an si lo, milai thinlungah ngaidam thei lonak, thincinnak, ka tik ka tha ti ah porh awknak pawl hi tihnung sawn mi an si.

 

Joseph cu Pontifar nupi in sualpi dingin a sawm:

 

Nitin nunah thlemnak neh thei dingin thil pathum cinken ringring a tul; 1) Ziangkim hi Pathian thuneihnak hnuai ah an um theh vekin Pathian mithmuh ah Pathian lunghmui zawng tuah ding cu a thupi bik le nitin nun tumtah mi ah ret in cangvai ding, 2) lenglam mi in an tuah thei mi in an tuah mi parah Pathian in thu in then lo ih kanmah in kan tuah mi parah Pathian in thu in then sawn asi ti thei ringring in nun ding, 3) a pathumnak ahcun thlemnak cu tlansan ding.

 

Pontifar nupi in sualpi dingin a thlem tikah Joseph in “Ziangtin Pathian dodal in cuvek sualnak ka tuah thei ding?” a ti ih a tlasnan. Sualnak hi ziangvek khal asile Pathian dodal asi. Nitin nun hi milai mithmuh ah nung si loin, kanmai diriamnak men ah nung si loin, le milai faknak lawmnak le milai lungawi ter tum si loin Pathian tutmah le lunghmui zawng thupi bik ah ret in nitin Pathian mithmuh ah a nung mi vekin nun tikah sualnak ziangkim hrial thei dingin kan sia tha theihnak cu Pathian Thlarau in in kilvensak, in uk sawn asi. Cun, midang tuah mi ruangah Pathian in kan parah thu in then lo, kanmai tuah mi parah thu in then sawn asi ti theih fiang tikah midang in ziang an tuah, tuah lo timi ruangah Pathian ah kan lungawi, riahsiatnak, le nitin nun tumtah le cangvaihdan a thleng aw cuang lo. Satan in a tumtah bik mi cu kan sunglam nun, Pathian thawn kan pehtlaih nak siatsuah ding asi. Cutin a lenglam ahcun siatnak kan tawn cuahco lai khalah kanmah in kan siatter lai hlanah satan in kan sunglam nun cu a tham ban lo.

 

Cun, a tlunah sim zo bangin nitin nunah thlemnak cu tlansan mei aw. Pontifar nupi in Joseph, tlangval note, thisen cak zet cu a kawr a zuut ih a thlem tikah Joseph cu a tlan ih a kawr lawng kha Pontifar nupi kut ah a tang. Voi tampi cu thlemnak tlansan dingin sun mi a um theu ding. Huatnak, hremnak, ti duhdah nak tuar can tampi a suak theu ding. Daniel le a rualpi pawl khalin siangpahrang thinhengnak hman tih loin Pathian thu an nunpi tikah meisa sungah thlak an tawng. Pathian tihzah nak, thulung nun, dingfelnak, diknak  nunpi tikah voi tampi a man pek a tul ringring theu. Tlansan loin Joseph in Pontifar nupi kha topi ciamciam in a taksa zut ter phah in tikcu rei zet room sungah an pahnih rel tlang hai sehla, Joseph ziang a cang ding? Asinan, Joseph cu a tlan suak lohli. Billy Gramham in “Elevator sungah fala pakhat thawn inn tlunlam kai hnakin keimah te kailawn (stair) thawn intlun sangpi par khalah ka kai sawn ding” a ti. Milai cu tisa thawn nung kan si vekin kan tisa duhzawng thang sungah kanmah le kanmah kan ret awk lo a thupi. Zuu palang cu milai kaa sungah amah te a lut thei lo. Kuak cu milai kaa sungah amah te a lut thei lo. Milai thinlung in aduh ih a lak ih a kaa sungah a thun theu sawn asi. Charlse Swindoll in tahtthimnak pakhat America ramih company CEO mi ropi pakhat pai testimony hitin a sim, “A tu ih ka hnatuannak company in hnatuan ding interview in tuah zan cu zanriah thaw zet in ei pi, rawl thaw zet thawn. Cule hotel key in pek ih riahnak hotel tha, nuam le sang zet ah riahnak in pek. Hotel ka thlen tikah fala mawi zet a rak um cia ih ka ihnak ding room sungah manciar hiarhiar in a rak um. Voikhat mit in zoh tikah mit thim curco cu asi. Cuve ten ka bag ka la ih airport ah ka feh in kan khua ah ka tlung cih. A thaisun ah interview in tuah tu company neitu president ka ko ih ‘hiti vek hi nan  tuah dan asile tawkseh, interview in tuah mi kha rak theih hngilh men uh’ ka ti.“  Pathian in zumtu pawl leitlun nunah leitlun nun le thlarau lam thlawsuah in pek hlanah hniksaknak voi tampi kan parah a thlenter theu asi. Dik lo ih ngah thei nak dinhmunah, nupa sualnak tuah thei ding dinhmunah, rukruk in hlawknak dinhmunah, thuphan per in tisa hlawknak dinhmunah, midang relsiat tikah kanmah tha deuh vekin lang ding dinhmunah, tvp, sual lak thlemnak hmun ah voi tampi thlenpi kan si.

 

Na umnak, na rualpi, na kiangkap, na mit in na hmuh mi, na hna in na theih mi, ka taksa in na dai thei mi, na lung sung kahwsuah nak ah sualnak sungah a lo thlemlut ringring tu a um maw? Tlan san mei aw. Sualnak thangsungah na tang hlanah tlansan mei aw.

 

 

5)      Joseph Thawng inn sungah

 

Naute pakhat cu a duhmi a ngah lo tikah siseh a duh lo zawng a tawn tikah siseh a tap theu. Cutin milai pakhat cu a pitlin tikah a duh mi tuah famkim dingin le a duh lo mi hrial dingin a tha neih patawp, fimnak, neihnak suah in a zuam theu. Joseph nun zoh tikah amai duhthlan mi lenglamah a nung ringring ti asile a sual lo ding. A unau pawlin an hua, an iksik, an hnawng, khur sugnah an tla, an zuar, miphun dang lakah sal ah a cang,  Pontifar nupi in thuphan a puh, thawng inn sungah a um, a mang a leh sak mi Egypt siangpahrang insugn hnatuan sang kai tu in a theihhngilh, a pai Pathian be lotu miphun dang rian in a um, a pa le a insang cu Egypt sal ah an cang, a unau pawl hnenah thu a cah ta vekin a unau pawlin Egypt siangpahrang hnenah thu an sim lo, apai miphun cu rawl lo in an thih theh zik tikah Egypt sal ah cang dingin an pe lut aw aw. Pathian in Abraham hnenah a kam cia mi Canan ram cu Pathian zum lo cu Egypt hnenah zuar theh asi. Hi hmuahhmuah hi Joseph ih duhlo zwng hlir in thuanthu a feh.

 

A pakhatnak ah kan zir ding ih ka duh mi cu pawnlang kan dinhmun ruangah Pathian hmaiah kan dinhmun a danglam cuang loih Pathian in kan nunnak a tumtah mi a thleng cuanglo. Pathian in a thutiamkam cia mi a thleng dah cuang lo. Midang in kan parah ziangvek an tuah, ziangvek dinhmunah kan din khalah, khui tawk ram kan thlen khal asile, kan tlaksam ah siseh kan riahsiat, kan ninghan, kan ning a zah can ah siseh Pathian tumtah a thleng cuang lo. Josehp ih thuanthu kan zoh asile, a unau pawlin an hua, an iksik, khursungah an thlak, an zuar, cui tlunah Pontifar nupi in thuphan a puh, thawngah an thlak, cuvek can ah Pathian in Joseph cu a tlansan dah lo ih Pathian thiltum, a thleng aw dah cuang lo. Cu hnakin Bible in a simmi cu Pontifar inn ah saal a can laiah Pathian in Joseph cu thlawsuah a pek ih thawng inn sung a um lai ah Pathian cu Joseph hnenah a um, ti asi. Milai cun leitlun malsawm thawn lennak, hmuingil nak co tikah Pathian kan hnenah a um vekin kan ruat theu ih kan harsat can, dam lo can, tlaksam can, tlaksiat can, mi in inhuat can, kan duhdawt mi pawlin in hnawn can, in thangsiat can, ah Pathian in in tlansan ah kan ruat theu. Asinan Joseph nun ihsin kan zir thei mi hi leitlun zumtu pawl hmuh tawn mi tampi a si. Hihi Pathian fate pawl kan leitlun khualtlawnnak ah kan cin ringring a tha: Kan tumtah le duhthusam thawn a hlatnak bik tipi ralkhat ah um vekin kan theih awk lai canah Pathian cu kan hnenah Thlarau in a um ringring asi. Joseph cu miphun dang, ramdang ah saal a can tikah siseh thuphan puh a tuar ih ramdang thawng inn sungah a um tikah siseh Pathian cu a hnenah a um asi. Tui can ah khui tawk ramah na um, ziang na tuan, ziang na nei, ziangvek tlaksam nak na nei, ziangtluk lungleng riahsia, thinbang in na um lai ah siseh mi in ziangtin na parah an tuah timi pawl ruangah Pathian thinlung le na rang a tumtah a thleng dah cuang lo asi.

 

6) Hngak

 

Milai in tikcu hngak hi harsa kan timi cio mi pakhat asi. Esau cu a ril a rawng tukih rawl ei can hngak thei loin a fatir sinak kha rawl malte ah a zuar tiah Bible in insim. Saul in kamsang Samuel hngak loin amah te Pathian hnenah raithawinak a rak pek tikah Pathian in a co hlang lo. Noah in lawng a tuah theh hnu ni tampi sung ruahsur ding a hngak. Joseph in mang a man hnu ah a mangman mi famkim nak tiang kum reipi a hngak. Moses cun Egypt siangpahrang inn a suahsan hnu ah Pathian in a kawhsal tiang kum 40 sung hramlakah tuu khalin a hngak. Tulai san fala tlangval pawl cu nupi pasal an neih awk ding ni hngak thei loin nupa sualnak an tuah ih puhmawh ding an hawl ciamco theu. Pathian cu a hmanhmawh dah lo ih a tlai dah fawn lo. Zumtu pitling nun nei thei dingin Pathian ih cangvai mi hngak thiamtu si a tul. Duhthusam famkim hrih lo mi, thlacam mi a famkim hrih lo mi pawl khal Pathian kutcak a cangvai mi hngak thiam ringring a thupi.

Hngah can hi tuahthatnak can tha bik asi. Joseph in mang a man hnu ah Egypt ram prime minister a tuan tiang kum reipi a hngak. A nauhak lai ah Egypt ram uktu tuanvo pe sehla a tuan suak thei lo ding. Mi zo cio khal, Pathian in kan leitlun nunah tuanvo in pek mi tuansuak thei dingin thlarau lam pitlinnak ding dinhmun ah Pathian in lam in hruai hmasa theu asi.

 

Nangmai hrangah Pathian hnen ih na dil mi siseh, na kiangkap sungkhat unau, hantuanpi pawl parah thleng dingin na dil mi siseh na ram le miphun, khua le kawhhran mipi hrang ah duhthusam na dil mi siseh a famkim lo mi an um ruangah dungsip in beidong ding asilo. Pathian cu a tlai dah lo ih a hmanhmawh dah fawn lo.

 

“Na duh mi Pathian na dil ih na ngah lo asile Pathian thawn nan duhmi a bang aw lo tinak asi” tiah ka sim theu. Pathian in a duh mi kan nunnak ah a langter hlanah amai mizia thawn a mil aw mi, thinlung thar, ruahnak thar le mizia thar kan sunglam ah hram a toh ter hnu ah amai lungput le duhdan tuahdan vekin cangvai thei dingin, Thlarau hman tlak mi hmanrua tha si thei dingin sersiamthar, tuarthar sal kan tul ringring ruangah tisa duh lo zawng, kalh zawng dinhmun ah kan din tikah Pai sunlawinak langthei nak ding hrangah timtuah kan si sawn theu. Kan duhzawng, thinlungput, khawruah, pomdan, hmundan, le nuamti mi pawl cu Khrih ih lungput le mizia vek si dingin tuarthar rero mi kan si. Tuarthar in na um asile lungawi sawn aw. Pathian thangthat aw!

 

7)      A kekuai mi belkheng

 

Sam cangan tu in, (Sam 51:17) “Maw Pathian, ka lo pekmi thawinak cu, A kekkuaimi thinlung a si. A kekkuaimi le sualsir thinlung cu na hnong lo ding” ati. Leitlun thuanthu kan zoh sal tikah, Pathian in a hman mi hmanrua tha, zumtu tha pawl nunah kan hmuh mi cu milai thinlung kekkuai, sawp neknek in a siat theh ih milai lam porh awknak le milai sinak, fimnak, le dinhmun ah ruahsan ding cem relrel ko in lung kekkuai theh hnu ah Pathian a phuangsuak aw mi asi theu. Joseph unau pawl kha Canaan ram ah pam a tlun tikah Egypt ramah an feh ih Joseph hnenah rawl dil in an feh tikah Joseph cun a rak thei nan, a unau pawlin an thei nawnlo, sal ah an zuar hnu kum 20 lenglo hnu asi tikah an thei nawn lo. Cutikah, Joseph cu Egypt tongin tong letttu hmangin a unau pawl cu a biak hai. A unau pawl cun Joseph cu an thei nawn lo tikah Hebrew tongin anmah le anmah an be aw rero. Joseph in a unau pawl cu a zoh thei nawn lo ih room sungah lut tahratin a tap ciamco.  

 

Pathian mihman zumtu paraltha pawl thuanthu kan zohsal asile, Jacob cu thinlung kuai in ka thih le thih thlawsuah ipek lo ahcun ka thi sawn ding ti in Pathian a buan. Joseph lawng si loin Moses, David, Paul le midang zumtu hmaihruaitu pawl nunah zoh asile an nunnak sungmuril kekhuai sawm theh ko an thuanthu ah hmuh ding an tahnak a um.

 

Moses in (Exo 32: 31-32)…“Maw Pathian, ziangtluk sualnak tum so himi pawl in an tuah zo ti cu na thei ko. Anmah hrangah sui in khawzing an tuah zo. 32, Sikhalsehla an sualnak cu ngaidam hram aw. Na ngaidam lo ding hnak cun na minung pawl an hmin na khumnak na cabu ihsin ka hmin kha phiat sawn hram aw,” tiah a dil. A miphun hrangah a thinlung kekkuai in thla a cam.

 

David in (Saam Hla bu 51:5) “Ka suahthlak in mi ṭha lo ka si, Ka nu ih pum sung ihsin misual ka si zo” tiah amai sualnak ahmuh suak tikah lungkuai in thla a cam.

Paul, in (Rome 9:1-3), “Ka simmi hi thudik a si. Khrih ta ka si ih thuphan ka per lo. A sia le a ṭha thleidan thiamnak, Thlarau Thianghlim ih ukmi ka thinlung hin thuphan ka per lonak cu fiangtein i sim. 2, Ka riahsiatnak cu a nasa ngaingai; ka phunpi ka thi le ka sa a si mi pawl hrangah, 3, ka thinnatnak cu cem ti a nei dah lo. Anmah ih ruangah keimah sawn hi Khrih ihsin ṭhensuakmi le Pathian camriamnak hnuai ih a ummi si sawn ningla ka va duh so!” tiah a miphun hrangah a lung kekkuai nak siseh amai sual mizia a sung ih um ringring mi thu ah (Rome 7: 24) “Mi lungrethei ka va si so! Thihnak lamzin a pantu hih taksa pum ihsi hin zoso i runsuak ding?” ti ausuak in a au. Cuitlun ah a taksa in a tuarnak thu ah, II Kor 12: 7-10), “Sikhalsehla khuaruahharza thil tampi ka hmuh ruangah ka puarthau lonak dingah ka taksa sungah hling i pek. Cuih hling cu Satan palai bangin hna a ṭuan ih ka puarthau lonak dingah i vuaktu le i khawngtu a si. 8, Voithum tiang Bawipa ih hnenah thla ka cam ih hi thil hi hlonhlo dingin ka dil. 9, Asinain i run let ih, “Ka zaangfahnak cu na hrangah a tawk a si; ziangah tile na ṭonṭaih caan hi ka cah bik caan a si,” a ti. Curuangah Khrih cahnak le humhimnak cu ka hnenih a umnak dingah ka ṭonṭaihnak khalah hin hmaihngal zetin ka lung a awi. 10, Cuticun Khrih ruangah ka ṭonṭaih tikah siseh, hmuhsuam nautatnak, mangbang vansaannak, hremnak le harsatnak ah siseh, lungkim zetin ka um thei zo. Ziangah tile ka ṭonṭaih caan hi ka cah laitak a si.”

 

Milai tisa thinlung a kekkuai hnu ah Pathian in amai Thlarau ih ukmi le a duhzawng lungput, thinlung ken, khawruahdan, dudhan le pomdan le nuntu ziaza thar in pek sawn asi. Pathian Thlarau thawn a um tlang thei lomi a sual le bawrhhlawh mi milai thinlung  porh awknak a hlawn theh, a kaang alh theh. Mah le mah duh dawknak ruangah ka dik asi tiah tansan nei tatratin midang tuahsual mi le tlaksamnak ngaidam thei lo ding a um nawn lo. Leitlunah dudhawtmi ulenau rualpi tha, hantuan pi le thiltha tuahsak rero mi hman in in hngawng laiah, milai tuahthatnak zianghman rel ding a um lo laiah, thawng inn sungah Patian in Joseph cu a umpi tikah Joseph in a unau pawl tuah mi hmuahhmuah cu a ngaidam theh asi. Huatnak in a thinlung sugnah hmun a nei lo ih duhdawtnak le thiltha tuahsak duhnak in a khat sawn asi. Cutincun Pathian duhdawt zangfah lainatnak in a tumtah mi tuansuak dingin Joseph ih nun sung ihsin Pathian a cangvai sawn asi.

 

Cutin thinlung a kekkuai mi ihsin a suak mi, sersiamthar mi milai sunglam nunah tangdornak, thunlunnak, ngaidamnak, zawnruah thiamnak, le thlarau rah pawl a rah suak thei sawn mi asi.

 

8)      Hniksak nak:

 

Joseph tuanthu hi zohsal tikah a thuanthu ih a rak tawn dah mi dinhmun vek cekci hi kan mai insang, khawsung, rualpi bur, kawhhran, veng, pawlkom, miphun lak ah thleng sehla ziangtin kan dinpi cio ding ti ruat hnik uhsi. Joseph ih tawn mi ah huatbik mi, hnawn mi, zuar mi, tuahmawh mi, saal, thuphan puh mi, dik lo zetin thangsiat mi, rel siatmi, hrem mi, cun khatlamah, cawisan mi, amai dinhmun si dingah rak ruah dah lomi dinhmun tiang a thleng. Hivek hi kanmai dinhmun sibang sehla, culole kan lakah pakhatkhat an um tikah ziangtin kan tuah ve theu? A hnuailam thusuhnak pawl hi zoh tlang hnik uhsi:

 

i)                    A tap mi tah pi in a hni mi kan hnihpi thei maw?

Laimi pawlin mithi khawhar lusun tohpi, tahpi cu kan pipu san lai ihsin kan rak tuah mi asi ih khrihfa kan can hnu khalah kan tuah ringring. Jacob fapa pawl khalin an farnu kha miphun dangin an rak pawngsual tikah an caiciling ih thih ngam in mi tampi an that. Asinan, anmah lakah an unau pakhat cu an lutlunah mi uk tuan ding hnakin anmai unau thah cu an hril sawn. Zocio khal fimkhur tul zetmi cu tuisun ah a lo duhdawt zettu, na unau, rualpi tha, na bawm mi, a lo bawmtu, a lo duhdawttu zet tu le na duhdawt zetmi kha thaisun ah an tlunah Pathian in a lo khaisang tikah na dunglam ihsin na ke a lo phet tu, a lo siatsuah duhtu, na dunglam ah namte thawn a lo suntu ah an cang thei. Curualrual in cuvek cu zo khalin kan tuah lo dingin kanmai thinlung lala Pathian in inkil khawisak dingin Pathian Thlarau bawmnak dilin nitin kan nun pumhlum kan up awk ringring a tul fawn. Thinlung cu mi bum hmang bik asi vekin thinlung in inbum tikah sual maksak kan tuah lai khalah thiltha tuah vekin in um ter theu asi. Pontifar in a saal pa, a nupi sualpi tu tiah thawng a thlak mi cu a pu, a rianmi siangpahrang sangtu ah a cang tikah ziangtin a ruat ding? Joseph unau pawl vek lungput nei sehla Joseph cu a that duh hial lo ding maw? Na hrangah thusuh nak cu hitin asi, na unau, kiangkap theihthiam, na nautat zetmi tla asi thei, hrangah thatnak ding, nangmah hnakih hlawksawn le tha sawn dinhmun a thlen thei nak ding hrangah thiltha na tuahsuak thei mi lungawi sopar ten na tuah thei maw? na tuah maw? Unau iksiknak cu Joseph innsang siattawnnak sual tumpi asivekin tuisan khalah zumtu, zumlotu lak khalah asi rero lai. Nang na si ve maw? A lungawi mi lungawi pi aw la, an lungawinak tipung dingin na tuah thei mi zianghman sup hlah. Na sungah iksiknak a suak pang asile cucu na hrang tihnung bik nathrik AIDS le cancer nathrik vek asi ti thei aw aw in Pathian hnenah tidamnak dil aw.

 

 

ii)                  Na umnak leitlunah ziangtin nun thianghlim na nunpi ding?

 

Joseph nun kan zoh asile a insangah sualnak, thuphan pernak, thleidan awknak, iksiknak, huatnak, hurkhuannak, milem biaknak, thlarau sual biaknak, tvp, sualnak citintian in a luahkhat nak hmunah a pitlin tiang a thanglian. Cuvek lakah a nun cu thianghlim ten a kilhim ih Pathian in a umpi ringring. Abraham cu milen bia insang ihsin Pathian in a ko. Moses cu saaltang Israel mi pawl runsuak dingin Pathian in a kawh tikah Israel mipi thinlung cu sualnak in a luahkhat zo. Paul cu Jews pawl biaknak diklo, fehsual lak ihsin Pathian in a ko.

 

Laimi pawlin nauhak an sual tikah siseh fanu fapa an sual tikah siseh zumtu pakhat a tluk siat tikah siseh kiangkap midang, rualpi le pawlkom mi kan mawhsiat theu. Thihnak le nunnak kar lakah Joseph in Pathian hmai ah rinum zetin a nung vekin na nung ve maw?

Moses cun zuu le sa, lennak, milai cawimawinak tlansan in Egypt siangpahrang innpi a suahsan. Joseph cun tisa caknak diriam ter in Pathian duh lo mi sual tuah ding hnakin thawng inn sung thlen khal a hril sawn. Na thlennak hmun ah, na hnatuannak, na umnak insang, na tlanlennak hmunah Pathian in a lo zoh ringring. Culai ah dik lo zetin ngah nak siseh tisa diriam ter ding siseh milai cawimawi nak duh ah milai lungawinak tuah in Pathian huat zawng sual na tuah ding maw? Hril ding na nei!

 

 

9) Thuneih nak (Control)

 

Joseph thuanthu kan zohsal asile Joseph in amai thuanthu cu a kutsugnah a kaihhrem thei lo zia kan hmu. Amang pitlin ter dingin amai kutsungah zianghman a um lo zia kan hmu. Amai kutsungah a ummmi cu amah ih ruahmi, tuahmi, tongkham asi. Cucu ziangtik lai khalah, ziangvek dinhmun khalah, ziangvek harsatnak a thleng ding khal asile felten a kilvengih a Pathian a tihzah nak cu a leitlun taksa harsatnak tuar phah ding khalin a nunpi. Joseph unau pawlin dik lo nak ih ngah mi dinhmun le canpual tha cu mai hmailam thuanthu tuahsiat tu asizia an lang ter ih Joseph thuanthu in midang tuahnak ruangah Pathian tumtah an kham thei lo, siatsuah thei lo zia a langter.

 

Leitlun milai pakhat hnak ih tam umnak hmun, insang, nu-pa, fala tlangval, rualpi, kawhhran, khawsung, pawlkom, rampi, ramkulh, tvp, milai um khawmnak poh ah midang parah thuneih (control) duhnak ruangah buainak nitin a suak ih mi tampi mitthli tla in mi tampi in an thih phah. Cutin milai tampi cu  midangin an tuanvo an tuansuak lo, an tuan tha lo ruanah an nitin lungawinak an hloh ih riahsia thinteo in an um theu. Voi tampi cu midang mawhsiat rero tu pawl hi anmai tuanvo tuan famkim lo pawl an si theu. Pathian fate nitin leitlun nunah Pathian in tuanvo le mawhphurhnak in pek mi cio tuan ding kan si ih midang tuanvo cu kan bawm thei mi ah bawm ding lawng kan si. Midang parah thuthen ding kan si lo, control tu khal kan si fawn lo. Curuangah midang pakhatkhat parah siseh ram le miphun, mipi, mibur le pawlkom hrangah thiltha kan tuah tikah kanmai hrangah ngahsal kan duh mi ruangah kan tuah asile thinlung dik lo thawn kan tuah asi. Pathian ih tuanvo pek mi vekin tuan sawn ding kan si. Hotel ah mikhual hmuaktu pakhat cu mikhual pawl hnen ihsin hlawhman a lak tum asile a dik lo, Hotel nei tu pa, a pu pa in hlawhman a pek ding mi a si. Cuvek thotho in kan parah sualnak a tuah tu, thuphan in puhtu, in thangsiattu pawl khal kannih in siatnak in thungrul ding kan si lo, kan dikzia simsal ding khal tuan vo kan nei lo. Kannih cu van ih a ummi, kan Pa riantu kan sivekin Amai lungawinak lawng ruat in Amah in tuanvo in pek vekin Amah rian ding kan si.

 

Cutin vanih a ummi kan Pa kan rian tikah kanmai kutsungah zianghman neih mi, thu neihnak (control) kan nei lo. Amah Pathian kutsung ah a um theh. Cutin azangfahnak in lungawinak inpek asile lungawi te in Amah thangthat ding, rian ding kan si. Kan nun famkim lo rem tul mi rem nak ah siseh a bawrhhlawh mi thianhlim ter nak ah siseh,  hmailam ah a sunglawi nak tawmpi tu si in, tuanvo sunglawi in pek mi tuansuak thei dingin in zirh rero khal asile ziangvek harsa le tuarnak lak khalah lungawi sopar ten kan Pathian cu rian ding kan si. Cutin, ziangvek dinhmunah thleng in, ziangvek milai pawlin ziangvek thilsual khal tuah hai sehla, ziangvek dodal tu in siatnak thang kam khal hai sehla, ziangvek tluk in kan taksa in tuar khal sisehla, kanmah urkang nak ding meisa ziangtluk hlio khal sehla, kanmah keu tu ding kiosa cu ziangtluk a kaa kau kal sehla, kan thuanthu a tuahtha tu, in humhim tu, kan leitlun nun sugnah  kan nunnak hmangin thiltha a tuah tu cu Amah Pathian Thlarau asi. Na kutsungah na kaihrem (control) dingin Pathian in a lo pek mi cu nangmah kha asi. A ngaingai ahcun kan nunnak hman hi kanmai kut sungah a um lo, Khrih sungah thuhruk in a um sawn asi. Curuangah thlarau in na khat asile thlarau rah a lang dingmi cu mah le mah uk awk thei nak (self control) asi. Mah le mah hman uk aw thei lo in midang uktu cun mi tampi a siatsuah ding.

 

Na thluak le thinlung sugnah a ummi, khua a luah tu ruahnak, na lungput le mizia, na tongkam, na tuah mi hmuahhmuah kha thaten na kilkhawi, nangmah le nangmah uk aw dingin Pathian in a lo fial, tuanvo a lo pek. Mah lemah uk aw thei lo tu pawlin midang an uk asile midang parah siatnak tampi an thlenpi theu. Amai ka, amai kut, amai thluak, amai thinlung, amai kee, amai taksa hman a uk thei lo tu in midang parah thuneihnak (uk) a tum rero tu cu satan in midang siatsuah nak hrangah hmanrua ah a hmang ding.

Na kutsugnah a um lo mi thil/thu parah thin bangin va um dah hlah, satan bum nak men asi. Na kutsungah a um lomi hmuahhmuah cu Pathian kutsungah a um theh ti thei aw. Joseph ih nun, thuanthu kan zoh asile midang zohman a kut sugnah a uk (control) lo, amah le amah kha a uk aw aw ih Pathian in tuanvo tumpi a pek, Iseal cithlah thuanthu santiluang in fen hlo lo dingin a cawisang asi sawn. Joseph in a unau, a nulepa, Pontifar te nupa, thawng in sung um siangpahrang pa zuuno kai tu, Egypt ram mipi pawl zo hman a kut sungah a uk lo, a thunun thei mi an um lo. Asinan, amah le amah a kaihrem aw aw, a uk aw aw, sualnak a tlansan ih Pathian tihzah in a nung, a tuan mi ziangkim ah fel zetin a tuan, cutin a tikcu te ah Pathian in a cawisang, a mang a pitlin ter asi sawn. Joseph in Pontifar inn ih a um lai ah Pontifar in tuanvo a pek mi vial a tuan, cu lenglam ziangthil hman a tham lo. Pathian in tuisun, tui dinhmunah tuanvo a lo pek mi zat, neihnak a lo pek mi zat, rualpi, sungkhat, unau, bawmtu, bawmding, a lo pek mi zat kha na nunnah sungah Pathian tumtah tuah famkim dingin a tawk asi. A dang a tul tikah a dang a lo pekbet ding. Asinan tuisun ah pek na si zatin rin um ten na nung lo asile a dang pekbet ding cu dil rero duh hlah aw. Na kutsung um mi lenglam kha hahio in, midang kutsung ummi daw hlah aw, midang control tum hlah aw, nangmai siatnak men asi. Pek na si zat in siang zet in pe aw, pehtlaih mi na neih mi hmuahhmuah duhdawtnak in daihnak in peh tlai aw, tuanvo pek na si mi pohpoh ah fel le taima zetin tuan aw.

 

(Its not by controlling the circumstance, or controlling the poltics, that Joseph won victory in life and accomplished God’s purpose.)

 

10)  Priminister na tuan lo asile zohman mawhsiat ding na nei lo

 

Joseph ih nun kan zoh asile Pathian zumtu, Pathian fate zo khalin, kan leitlun nun sungah kan duhthusam le tumtah a famkim lomi parah midang zo hman mawhsiat ding kan nei lo ih dinhmun pakhatkhat puhmawh ding, mawhtluk ding kan neih lo zia in sim fiang. Kanmah pakhat nitin nun, leitlun le thlarau nunah siseh insang, khawsung, kawhhran, vengsung, khua le ram, miphun thu ah siseh duhthusam le tumtah vekin thil a cang lo tikah  kiangkap um, midang mawhsiatnak kan thei theu. Cucu Satan bumnak asi. Satan timi tongfang hi laitong cun “raal pa”, “mawhsiat tu” ti khal in leh theih asi. Cuntin mi zokhal, a kiangkap um, a nupi pasal, unau sungkhat fate, kawhhran pi, hruaitu, mipi, maw midang pakhatkhat a mawhsiat rero lai ah “Mawhsiattu” ih lamtang ah a cang, satan a rian rero asi ti a thei aw lo theu. Pathian fate pawl cun ziangkim parah Pathian kutcak hmuh thiam ding kan si ih thil ziangkim hi Pathian ih a hmuh vekin hmuh thiam ding hi zir ding kan si sawn.

 

Voi tampi kan theih theu mi cu nauhak te an sual le an rualpi kommi an mawhsiat theu. Pastor le evangelist nunau ah an tluksiat le nunau in a zir lo sisi, an ti theu. Sumpai ah, nunau mipa sinak ah, zuu le saa ah, pakhatkhat ah na tluk siat asile zohman mawhsiat ding an um lo. Ziangvek dinhmun khal mawhsiat ding na nei lo. Ruk na ruk le rukru na si mei, na  uire le uire na si. Thuphan na per le thuphan per na si. Thlarau ah na thangso lo asile mawhsiat ding, puhmawh ding na nei lo. Bible na nei, na siar thei, a nei lo nan um le irak cah uhla ka lo kuat ding.

 

Tuisun ah na duhthusam a famkim lo, na thuanthu, na insang, na khua le ram, miphun, kawhhran thuanthu nung cu na duh lo zawngin, na tumtah kalh zawngin, na theihthiam lo mi lamzin ah a santiluang in a fen rero asile, midang le dinhmun lole pawlkom pakhatkhat na mawhsiat hlanah Pathian hmai ah kun in ziangruangah ziangthil pawl a cang ih thuanthu nung sungah ziang tuanvo na nei, Pathian in ziang tuanvo na liangparah a lo pek timi sawn kha theih tum aw la na thei mi, na ti thei mi parah na ti thei tawk zuam in tuansawn aw. Midang tuah mi parah Pathian in na parah thu a lo then lo. Midang tuanvo parah mawhsiat rero tu pawl hi anmai tuanvo tuan pitlin lotu an si theu. Eypgt ramah Prime minister na tuan lo asile zohman mawhsiat ding na nei lo.

 

11) Egypt ramah:

Joseph cu apai insang ihsin a suah hnu ah Pontifar inn ah siseh Egypt ram thawng inn ah siseh Eypt ram siangpahrang inn ah siseh rin um zetin a zumnak a nunpi. A kiagkap milai pawl cu zum lo tu an si. A tlunlam, a kiangkap, a hnuailam le a rianmi mipi pawl cu zumlo tu an si. Cuvek thotho in thuanthu sungah kan hmuh thei mi cu Daniel le rualpi pawl Babylon ah, ralbawi miphar Naaman ih sal nu Hebrew nute Pathian thei lo tu hennah, le Israel mipi pawl sal an tannak, tvp, Pathian fate pawl hi Pathian thei lo tu leitlun  mi pawl lakah voi tampi kum tampi sung an rak um theu. Leitlun pumpuluk hi rei lo te, Khrih a rat sal hlan, sankhuk lalram dinsuah asi hlan sung cu, Satan kut sungah a ummi asi. Curuangah Joseph cu zumlo tu, Pathian thei lo tu Egpyt ramah a nugncang vekin Pathian fate zumtu pawl khal leitlun zum lo tu pawl lakah nitin kan tlang leng. A tufang leitlun hmuntin ah a tekdarh mi zumtu laimi pawl tla miphun dang, kan pupa in an rak theih dah lomi miphun pawl lakah kan thleng, kan nung, hna kan tuan, ei le in kan hawl. Cuvek lakah rin um zetin kan zummi Pathian, kan miphun Pathian hnenah rin um zetin nung cio ding hi Joseph nun ihsin kan zir a si. A unau pawlin an zuar, thinnatnak an tuah, ninghang riahsia in an then aw aw. Asinan, Joseph cu dinhmuntha ah a dintik ah le a unau pawl an tlak siat tikah a unau pawl humhim tu ah Pathian in a hmang sawn.

Tusun ah Joseph thuanthu vekin nangmai nun kha thu lo sut sehla;

1)      Na umnak hmun le ram, miphun dang lakah ziangkim na tuah, na tong, na nun ah na miphun Pathian, a lo sersiamtu le a lo duhdawt tu na Pathian parah na rin um ding maw? Na Pathian na duhdawt asi ahcun na Pathian parah na rin um nak in lang she! Na miphun na dudhawt maw, na miphun Pathian na duhdawtnak in lang sheh!

2)      Nangmah hnakin cansia, harsatnak hnuai ah a nung rero lai mi na miphun pi, na thisen pi, na miphun unau pawl na dungtun ding maw, na tuah thei mi sung ihsin na bawm hai ding?

Joseph cun Egypt ram ih prime minister, bawi upa a tuan tikah a unau pawl cu a zahpi lo ih rawltam nak lak ihsin a hum sawn asi.

 

 

12) Joseph a tap; Lungawinak mithli

 

Josehp cu a unau pawl in an hngawng, an hua, an iksik, an hlawn, an zuar hnu ah thuphan puh a tawngih thawng ah an thlak. Thawng inn sugnah thiltha a tuah suak mi, siangpahrang inn sung hnatuan tu pawlin a dil mi an theih hngilh. Pontifar inn a um lai ah Pathian in Pontifar insang cu thlawsuah a pek. Joseph in tuah that mi cu zo hman in an sim lo,  Joseph cu thuphan puh asi tikah dinpi tu an um lo. Sihman sehla Pathian in Joseph cu a theih hngilh dah lo ih a umnak hmun kip ah, Pontifar ih inn ah, thawng inn sugnah a umpi vivo sawn asi. Tui sunah na duhdawtmi, an parah thiltha na tuah thei tawk na zuam ih na duhsak zetmi, na nupi pasal, fate, sungkhat, rualpi, kawhhran pi, miphun, khua le ram, midang pawl parah thiltha na tuah mi kha a linglet in siatnak, thangsiatnak sawn tla na parah a thleng riangri maw? Thiltha na tuah mi hmuahhmuah cu san nei lo vekin a cem ral theh maw? Thuphan, na si lo nak pi midang in an lo puh ih na canpual an lo siatsuah sak maw, na lungawi nak siatsuah in a um pang maw? Na duhthusam ih tipi raal khatlam ah ding vekin na thei aw aw maw? Dinhmun le santiluang cu na sunmang do kalh zawngin ni le can in a herliam pi rero in na hmu maw? Na kiangkap na zoh tikah na duhzawng le tumtah pitlin nak ding hrangah bawmtu zohman um lo dinhmun ah thleng in na thei aw aw maw? Na sunmang, duhthusam tuah suak thei dingin nangmah ah zianghman um lo vekin na thei aw pang maw? Tui canah, nangmai kutsungah Pathian in a lo pek mi tuanvo kha na ti thei zat in a tha bik in zuam aw, na neih mi zat sungin siangzet in pe aw, na theih mi le pehtlaih mi milai pawl parah duhdawtnak bak leiba nei hlah, an parah thiltha tuah nak siar lo zianghman na thluak le thinlung in thusia pai hrimhrim hlah sheh! Pathian in a fale pawl parah thiltha a tuah tikah a fale pawlin mai fimnak thiamnak cahnak le leitlun milai siseh thilri siseh rinsan lo dingin amah lawng kan rinsan thei nak dingah le kan nunnak hmangin a tuansuak mi pawl cu kanmah milai hminthatnak ah kan lak sual pang lo nak ding hrangah ziangkim cu Pathian Thlarau huham cahnak in tuahsuak asizia langter dingin milai thuanthu cu a canter sawn mi asi tin a hmuh fiang ni a thleng tikah lungawi mitthli thawn kan khat lai ding asi. Cutikah leitlun taksa parah a thlengmi, nitin kan tawn mi, midang in ziang an sim, ziang an tuah timi parah Pathian a hngat aw dah lo ih in duhdawtnak le kan nunnak ah a tumtah mi a thleng aw dah lo, a danglam dah lo asi ti kan hmuh fiang thei nak ding ah cu pawl cu Pathian in kan parah a thlen a siang sawn mi asi.

 

Joseph vek zumtu tha, thlemnak tlansan ngam tu, mah huatu, zuar tu, thath duhtu  parah ngaidam thei tu le runsuak thei tu, leitlun thlemnak tintian lakah zumnak dinpi ngam tu, si dingin Pathian in na leitlun khual tlawnnak lamtluan lo kai hruai vivo hramseh!