Indy Chin Pawlpi Lungawithu cah:

Pastor Hre Mang: October 30, 2010

Tuisun, 2010 Chin Kumthar Puai, Indy Chin pawlpi laksawng lawmnakah Community/pawlpi thu thawn pehpar in lungawi thucah tawi sim dingin canttha in petu tuanvo neitu le mipi nan zate hnenah lungawithu ka sim duh. Hivekin canhmang thei dingin in kilveng ih inhumhimtu Cung Pathian a hmin thangthat si koseh! Tuisunah nan hnenah thucah tawi ka sim dingmi lakah a tlangpi panga sim duhmi ka nei. Hnatuantu pawl tla ka lo lawm zet, taima zetin rawlsuang siseh pawlpi tuanvo neitu le thazang le sumpai thawn siseh thlacamsaknak thawn nulepa fala tlangval pawl nan zate parah ka lung a awi zet timi thu ka sim hmaisa duh. A hnuailam vekin  tawite lo cah duhmi pawl ka sim ding.

 

1.       Kan thuahthu kan ngai rero:  

Tuisunah kan thuanthu kan ngan rero ih ziangvek thuanthu kan ngan rero timi tawiten kan ruat tlang ding ka duh. A bur in, pawlkom, insang, bulpakin kan tuah mi hi kan thuanthu kan ngan rero mi asi. Indiana, USA ah a ummi Chin mi pawl hi ziangvek milai kan si timi cu kanmah ih tuah mi in kan thuanthu kan ngan rero mi asi. Chin mi pawl cu zuuri, mi aa, mi tha lo, mi hlothlo, umnak kipah cozah le senpi vangtlang phurrit tertu, an si titu an um khal asile midang kan mawhsiat thei lo. CUn khatlamah, cutin siloin Chin mi pawl cu rinsantlak, Pathian tihzat, umnak hmun kip ah ram le miphun, veng, kumpi cozah, senpi vangtlang hrang thiltha tuahtu, thangso tertu, upat tlak miphun an si timi hmin nei thei dingin le kan miphun Pathian in cawimawinak a co theinak ding cu kan zapi ten bulpak, insang, abur, le pawlkom in kan tuah mi parah a hngaw asi.

Cun a tu kan san minung (generation) pawlin kan tuah mi hi a thangso rero lai mi (next generation) pawl hrangah lamzin kan sial rero kan zirh rero asi ti khal ka sim bet duh.  Kan kaa in kan simmi asilo, kan nitin nun, kan insang, bulpak, pawlkom sungah ziang kan tuah timi hi kan zirh rero mi asi. Curuangah mi zokhalin thil pakhat kan tuah mi hi kan kiangkap um pawl kan zirh rero, next generation pawl ziangvek rung si hai sheh tiah kan zirh rero mi asi. ZU in pa in a kiangkap um pawl kha zuu in ve dingin, mi relsiat hmangtu in a kiangkap um pawl kha anmah duhlotu le an duh lomi, an mah thawn ruahdan bang aw lo tu midang relse ve dingin, siatnak a tuahtu in a kiangkap um pawl hnenah siatnak tuah ve dingin a zirh rero, cuvek thotho in thiltha tuah le midang bawm le sawmdawltu khalin a kiangkap pawl hnenah a tuah vek tuah ve dingin  a zirh rero tinak asi. Ziang kan zirh? A ngaingai ah kan sim asile tuisan kan Laimi pawlin kan lungput, mizia tha lo siseh a tha siseh kan neih mi pawl hi kan u le kan pa le kan pipu  san ihsin in zirhta mi, ro kan co mi an si. Kanmah le kiangkap cio ah siatnak tipungtu siloin thatnak karhzai tertu s ihram uhsi tiah ka lo cah duh. Kanmah mi pakhat  hlawknak ding asi hmanah kan kiangkap kan milesa (kan society) siatsuah theh hnakin tangdornak thawn thiltha sawn rahsuak tertu karhzai tertu si ihram uhsi tiah ka lo forhfial in ka lo sawm duh asi.

Kan pipu, kan pa le san ah Chin miphun cu rirai bia ihsin khrihfa ah kan thuanthu an rak fehpi. Tuisan milai pawlin kan thuanthu nung parah zIang kan tipung, thangso ter, ziang  thiltha, ziangvek dinhmun tha ah kan  thlenpi ve ding! Hril ding kan nei! Ramdang, ram thangso ah kan um vekin canpualtha kan nei ih tuihlan kan u le pa le pawl san hnakin thil tampi a thar, thansohnak le hmasawnnak thawn kan thuanthu hmailam panpi thei tu dinhmun ah Pathian in in ret asi. Tuihlan hnakin kekar hlapi kar ding kan si. Cumi lakah tanta dingmi, siatnak (social spiritual evils) pawl kan tan ta thei a tul. Sim tul loin ziangvek thu pawlin kan mipi thuanthu a tuahsiatih a ei siat ti kan thei. Cu pawl lakah malte ka sim bet asile huat awknak, hrin le hnam thleidan awknak, sual tuahnak, dik lo nak, lal duh ruangah mai miphun le hrinhnam hruaitu dodal awknak, siatnak satan mizia phunsuah awknak pohpoh kha tlansan in santhar mifim hmanrua le bungrua hmangin Pathian Thlarau lamhruainak hnuai ah nunthar, thuanthuthar nunpi uhsi tiah ka lo sawm duh. Cumi cu pawlkom pakhat, Indy Chin pawlpi lawngin a tuah thei mi asilo. Kan zaten, bulpak pakhat ciar, insang ciar, a bur ciar, hrinciar, kawhhran pawlkom tinah biak inn ah, inn ah, tlawngah, hnatuannak le lamzin parah siseh, sunzan, inkhun par le ruawi cabuai par tiangah kan umnak pohpoh ah kan nunpi kan tuah taktak lawngah a cang thei mi asi.

 

 

2.       Zoha  kan Bawi:

Ziangkim kan tuahnak ah Bawi pakhat lawng kan nei thei; Satan maw Zesu Kkrih. Ziangkim kan tuahnak ah zo ih hmin a sunglawi, Satan maw, Zesu Khrih? Bawlkom kan tuah tikah khat le khat dodal awknak, huat awknak, lamtang tuah awknak, sinak cuh awknak, zuar thlai awknak, zuu rit nak, hurkhuannak , tvp, sualnak tipungtu kan sile Satan a hmin a sunglawi. Cun voitampi Chin mi pawl in kan fehsual pi theu mi lakah pawlkom din le a bur in cangvaih tinte dodal awknak, hruaitu thu ah kan buai theu. A ngaingai ahcun Pathian in ramsa umkhawm hman an lakah hruaitu a pek asi. Khuitawk kan um tik khalah Pathian in hruaitu hriakthih mi a nei. Cucu duh loin minung tisa duhnak thinlung in satan bumnak thang sungah kan tlak asile Pathian hriakthih hruaitu cu dodal, simsia, mualpho ko kan tuah ih lamtang tuah aw tahratin hruaitu le hotu sinak cu kan lak tikah kanmai duhmi cu kan ngah hmanah satan a hmin a sunglawi ih satan in nehnak a co sawn asi tihi theih hngilh hlah uhsi. Cuvek thuanthu cun rei a daih dah lo. Siatnak a hring suak theu sawn asi. Curuangah pawlkom in a bur in kan um, kan cangvai tikah thuthluknak (decision) a fate bik ihsin a tumbik tiang kan tuah nakah, canpual le tuanvo kan zem awk tikah thiltha kan hawl tlangnak ah tangdornak thawn Pathian Thlarau kan lakah a lal ringring ding hi a thupi. Hmin neitu sile upa dodal thei tu si hi cu hawk ding asilo ih Pathian in kan lakah kanmah hmangin ziang a tuah duh zo hnenah senpi vangtlang hlawkpi dingah ziangvek thiambik (talent) a pek timi tangdornak thawn zoh tlang ding kan si. Curualrualin kanmah Chin pupa nunphung  in kan neih mi nunphung mawi, upa upat nak, nulepa upatnak siseh santhar fimthiamnak zir in fimnak le thiamnak a phunphun Pathian in a pek mi, duhnak pek awknak le phurnak a nei mi, senpi vangtlang hrang thatnak sunmang a neitu pawl khal kan upat thiamih kan thlun thiam, an thu kan ngai ih senpi vangtlangin kan theih ban lo le hmuhban lomi ziangvek thiltha Pathian in theihter mi le tuahter duh mi a nei timi hlawm aw tawn in dungthlun kan thiam a tul. CUtikah a thabik a sunglawi bik le hmundik le candik milaidik ten Pathian duhdan cu kan hmusuak in kan parah a famkim thei ding asi. Curuangah ziangkim kan tuahnak ah Satan nehtu pek loin Zesu Krih sawn lal ringring hramseh, thuthluknak fate bik ihsin a tumbik tiangah Pathian Thalrau lal ringring hramseh. ZIangah tile sum le pai, milai fimnak cahnak asilo, Pathian Thlarau in kan miphun, kan khua, kan ram le kan pawlkom hi a cawisan lawngah a hardammi pawlkom awknak pehtlaih awknak thawn thuanthu ziktluak kan nei thei ding asi.

 

3.       Tuisun ah kan hmaiton mi thleng awknak tul mi a um. (Today’s challenge: Social spiritual reformation)

Kan ram Khrihfa kan sinak kum 100 a kim zo. Pathian duhdawt zangfah lainatnak kan parah a thleng mi zoh tikah mangbangza asi. Kawlram ihsin cathiam ramdangah tlawngkai ter ding hi  mi naran hrangah a cang thei lo tluk asi. Sihmansehla, kan umnak district Perry township lawngah laimi tlawngta, college tlunlam tel loin, phunhrek ihsin phun 12 tiang, 800 lenglo an um. Mangbangza asi. Asinan lungawi tawk in kan to men thei lo. San a tlan cak vekin kanmah khal kan tlan cak ve a tul. Culo asile leitlun santiluang in kan miphun thuanthu cu infen hlo dingih in dawlh theh thlang ding.

ZUmnak lamah kan sim asile kum 100 kan khrihfa sinak a kim zo na in Bible in a simmi nunpi nak a mal tuk. Kan pupa rirai, khawsia le ramhuai betu pawl hman nuncan ziaza ah kan tluk lo nak tampi a um. Bible in “a unau a duhdaw lotu cu Pathian a thei lo” ati lai fangah duhdawtnak ziangtluk kan ramah a mal. “Mi pakhat in na biang khatlam a lo beng asile khatlam tun aw” tiah Zesu in in zirh. Kannih cu mi piang beng hmaisatu kan tum tuk theu asilo maw? “Ka thu nan thlun asile ka dungtlun ngaingai nan si ding” ti ah in sim. “Nan parah sualnak a tuah tu pawl nan ngaidam lo asile van ih a ummi ka pa in a lo ngaidam ve lo ding” tiah Zesu in in sim. Tuni kawhhran hruaitu, pastor, evangelist, le zumtu piangthar ti aw pawl kan zoh asile Pathian duhthu kan sam lo zet ding. Leitlun sakhau biaknak pakhat vekin kan san khrihfa pawl zumnak hi a lem tuk zo. Thangphawknak, thleng awknak kantul, nang le kei kan kar ding maw? Pathian Thlarau lamhruainak hnuai ah tangdornak in Zesu thusim thlun in a dung kan thlun ding maw? Leitlun biaknak sakhua pakhat vekin kan khrihfa sinak cu kan hmang ding maw? Leitlun sakhua mi sinak menmen in vanram in thlen pi thei lo dingih kan sunglam nun taktak a thleng lo, kan thuanthu a tuahtha lo ding, pawnlang milai lawm awknak le pawlkom men fangfang in thlenpi ding asi. Kan thuanthu tuah tha dingin khukbil in Pathian hmaiah tangdor in tangrual uhsi tiah ka lo sawm duh asi.

 

Chin mi pawl hi pawlkom din cu kan cak zet. Pawlkom thu khalah thleng tul mi a um. Khua hlan ruahnak lungput le cangvaihdan pawl kan thleng a tul mi tampi a um.

Hruaitu le hotu ruahnak kan neih mi khal thleng tul mi a um. Kawl ralkap pawl uknak ah a thanglian mi kan si ruangah asi pei maw, kan khawruah dan hi hotu sinak kan hmuhdan thleng tul mi a um. Chin mi lala khal hruaitu le hotu cu tohkham tha, upatnak hmin neitu ah kan ruat. Santhar minung pawlin hruaitu cu tuahnak in lamzin hmuhtu, mipi siahhlawh asi ti kan hmuh thiam a thupi zet. Hruaitu tuantu khalin siahhlawh lungput thawn mipi hmaiah tangdornak thawn kan tuan thiam ding le mipi khalin hruaitu dungthlun in senpi vangtlang lakah ruahdan hmuhdan bang aw lo a um tik khalah senpi vangtlang thatnak lungrualnak le cahnak ruat in kanmai ruahnak cu kan tanta thei a thupi. Cun, Chin mi pawlin hruaitu tuanvo hi hmin thatnak tokham in kan ruat tikah thleidan nei in lamtang tuah aw aw in zuam awknak cikhat ah kan hman theu tikah tampi kan sun phah theu. Cuhnakin khawsung pawlkom pakhat sungah zo in ziangvek thiambik a nei ih senpi vangtlang hrangah ziangvek sunmang a nei, ziangvek pek awknak le phurnak a nei timi pawl zoh in senpi vangtlang hlawkpi dingmi sawn kha thupi sawnah ret in cantha sangka kan on thiam khal a thupi. Saluro tar vekin hruaitu hmintar le upatnak phun in kanruah mi pawl kan tlansan a cu thlang. Ramthar, santhar, hmanrua le bungrua thar le canpual tha thar thawn tuisun minung pawl kan hmaiah Pathian in in retsak mi kan thuanthunung cu kan miphun le kan Pathian cawimawi tu ding lamzin dik le dingah kan fehpi thei nak dingah kutkai ten ke kan kar a thupi ngaingai asi.

Santhar canpualtha kan neih mi pawl hi in siatsuahtu le in thattu khal an si thei ih kan thatnak khal an si thei. Hmanrua thatha pawl hi nuamnung cennak, midang pawi lo tullo vekin mahte um duhnak, senpi vangtlang nunphung le milai thuthlung pawl poisa loin mahte um duhnak, zalennak hmansualnak lamah a sezawngin hman a theih. Cutin sisawn loin kanmah le pakhat cio hmaika ah canpual tha kan neih mi cu kanmah le bulpak le insang hrang lawng si loin senpi vangtlang hrangah ziangvek in kan neih mi canpual tha le hmanrua tha kan hmang tangkai thei ding timi kan ruat ih cantha kan hman thiam ringring ding a thupi. Kan zalennak le canpual tha kan neih mi pawl hi a nei lo tu pawl hnenah a hlawkpi tu ding pawl hrangah midang tungding nak hrangah kan hman thiam cio a thu pi ngaingai asi.

 

4.       Chin pawlpi pawlkom mibur thanzang: (Community: Social force)

Mi hrekhat in Chin pawlpi tivek social pawlkom awknak hi zumnak thawn a kalh aw vekin a ruat tu tla kan um thei. Mi hrekkha tin leitlun hmun tiantianah kan miphun pawl kan tek darh mi hi kan miphun hlohnak asi tiah a ruat le sim tu tla an um. Kan hlo lo ding. Hlo lo dingin kan umnak thlennak hmun kipah pawlpi pawlkom (community organization) kan din vivo a tul. Cutin tuisanah cun vengsung kan umnak cio ah siseh leitlun khawmual ah pehtlaih nak nimthlakau cakuat (email) le internet social networking pehtlaih nak phunphun thawn pehtlaih nak a that tikah kan hman thiam asile kan miphun cu leitlun pumhuap khawte (global village) ah umkhawm vekin leitlun khawmual tin ih hmanrua bungrua le canpual thatha hmang tlang in thhansohnak hrangah kan hmang thei sawn asi. Cutikah kan umnak cio ah thiltha kan theih le neihmi canpualtha pawl cu a thupten mahte hlawkpi men siloin a hlawkpi tu ding hnenah a hlawkpitu ding pawl umnak ah an hlawkpi nak ding canah kan thlenpi thei ringring ding tinak sawn asi. Cun kan umnak hmunkip ah pawlkom hnget khoh zet kan neih fingfing asile kan umnak ram kumpi le mibur pawl thawn khal pehtlaihnak tha, pursum leilawnnak lamah canpual tha sangka ong aw mi pawl hmang thiam in theihmi neih mi le ti thei mi hlawm aw tawn in kan umnak thlennak ram mi pawl thawn tlan kan zuam awknak ah sawm dawl aw tawn in lamzin kan khihhmuh aw dingih kan kaihruai aw thei ding asi. Cutin kan milesa pawl duhdawtnak in miphunah le Pathian ah pumkhat sinak lungput thawn sihcih awknak kan neih asile kan tesinfa san tiang, Zesu a ra lohli lo asile, miphun pitling, rinsan tlak, duhdawtnak in a sihcih aw tu miphun, thiltha citintian a hlawm aw mi miphun le tlaksamnak le canpual tha hmasawnnak hrang khalah a sawmdawl aw mi miphun, umnak kip ah cozah le senpi vangtlang hrang thahnak suahpi tu cawisan tlak miphun kan si ding. Cutin Pathian dudhawtnak le thlawsuah a luan suaknak sawnah kan pawlpi pawlkom cu hmanrua tha ah a cang ding. Cutin cawimawi tlak cawimawi in, upat thlak upat in kan miphun zo kan si ih zo kan bia, zo kan rian ih kan biak mi Pahtian in ziangtluk thlawhsuah in pek in in umpi ti kan kiangkap um pawlin an hmuh tikah kan miphun Pathian an cawimawi ding asi. Cutin kan tesinfa pawl khalain kan biak mi kan miphun Pathian cu biak tlak Pathian asizia an hmuh tikah kan dung thlun in  zumnak  lamzin dik an run zawh thei ding asi. Cutin kan umnak ramthar ah tumtahthar, hmuisel thar, lungput thar thawn tuandan le pehzawm awkdanthar, kaihhruai awkdanthar thawn thazang thar ruahsannak thar thawn kan san thuanthu nung cu kan pupa pawlin an rak ruahban lo dinhmun tiang thlenpi thei dingin kan miphun Pathian in mangbangza in in umpi nak le Khrih ah ziangkim pektheh cia zomi kan sinak cu kan nunpi thei ding asi.

 

5.       Bawipai Thlarau asi (By the Spirit of the Lord).

A neta bikah ka lo cah duh mi cu ziangkim hlawhtlinnak lungawinak inpe tu cu Bawipai Thlarau asi. Kanmai cahnak fimnak thiamnak, pawlkomnak le zuamnak asilo, Bawipai Thlarau asi. Curuangah zianghmuahhmuah kanmah minung lam ah kan tuah thei mi kan tuah kan zuam kan taima tento cing khalin a thupi bik cu tangdor nak le dingfelnak thawn nitin Pathian thawn fehtlang asi. Ziangkim kan tuahnak ah lamzin in hruaitu le hlawhtlinnak in petu cu Amah Pathian asi ti theih hngilh hlah uhsi. Dinfelnak le tangdornak tel loin Pathian thawn fehtlang a theih loih dingfelnak le tangdornak telloin raithawinak cu Pathian cohlan tlak lo, Pathian in a ten tuk mi asi. Cun, ziangvek harsatnak kan tawng, tlaksamnak, lamzin khamtu, siatnak ninghan thlatem kan tawn mi pawl hi in siatsuahtu an silo, Pathian huham cahnak in teptertu le Pathian duhdawtnak thupi zia le thlumzia in theihter tu sawn an si. Cutin Bawipai kutcak ah kan hngat awk thiam sinsin nak ding hrangah hmanrua men an si. Kan parah siatnak le kan duhlo zawng thlentertu cu Pathian asi tinak silloin satan in Bawipa ah kan lungawinak siatsuah dingin hmanrua ziangvek hmang khal sehla Pathian in kan hrang thatnak, amah thawn kan nai awk sinsin nak ding hrangah hmanrua ah a hmanmi an si sawn asi.

Bonus point ka bet duhmi pakhat a um: Tuisun ah siatnak tiah kan ruah theu mi, tlaksamnak, theih lomi, harsatnak, duhmi kan ngah lomi, le duhlo mi kan tawn rero mi pawl hi in siatsuahtu an si lo. Cuhnakin kanmai tha kan timi, kan tisa duhzawng hi in siatsuahtu sawn asi. Zumnak lamah Pathian Thlarau theihtermi siloin kanmah tisa thinlung in kan khawruahnak in kan fehpi mi, kanmai tisa duhnak cu lalter in ke karn kar mi hi in siatsuahtu sawn asi theu. Pathian thu ten kan nung asile kan parah kan duhkim lomi, duhlomi, le tlaksamnak kan tawn mi zapi ten kan hrangah thatnak sawn an si. Phurnak ah siloin zumnak ah nungin unau tlaihsannak le pumkhat nak tlaihsan in kekar cio uhsi tiah ka lo sawm bet duh.

Zumnak le miphun ah pumkhat asimi, Indy Chin pawlpi laicin senpi ten an zaten Pathian in a lo umpi zia lo theihter aw sehla Khrih ah mangbangza thlawhsuah a lo pekcia mi cen thei dingin lam lo hmuh vivo hramseh! Mi zocio khal, kan miphun le kan miphun Pathian cawimawitu si in kan umnak kawhhran, pawlkom, le innsang cio ah mah le tuanvo neih tuan famkim in Pathian in thlawsuah malza lo sawm cio hram sheh!

LAKSAWNG KAN NGAH MI CU KAN LUNG A AWI NGAINGAI! ASINAN KAN LUNGAWINAK CU LAKSAWNG INPE TU PA PATHIAN HNENAH ASI SAWN.

KA LUNG A AWI NGAINGAI!