Pawlkom Rualremnak

Pawlpkom Rualrem Ten Feh Thei dingin Fimkhur Tulmi pawl:


  1. Tumtah mi ah lungrualnak:

Pawlkom ti buai theu tu, lungrual lonak a suahter theu tu pakhat cu pawlkom sungah milai diriamnak, mimal duhnak kha pawlkom tumtah hnakin thupi sawnah ret tikah asi. Mi zokhal, a bik takin kawhhran ah ttuanvo nei tu pawl, pawlkom parah kan lungawinak le lungawi lonak thuhram kan cek awk fel sal a ttul; pawlkom tumtah tuah suak asi tikah kan lung a awi maw, mimal diriamnak sawn kha thupi sawnah kan ret maw?

Asile, kawhhran in ziangvek pawl tumtah a nei?

  1. Pathian thangthatnak;

  2. Zumtu pawl thutak ah an nungih zumnak le duhdawtnak ah tthanglian dingin kaihhruai, zirh, lamzin hmuh, bawm awknak;

  3. Rundamnak thuthangtha karhzai nak hrang rawngbawlnak.

Kawhhran pawlkom parah mi tampi an lungawi lo ttheu nak cu a tlunlam thil pathum thawn pehpar lomi ah asi theu nan ti ve maw? Anmah mimal duhthusam a famkim lo tikah, kawhhran hruaitu pakhatkhat parah an lungawi lo tikah, an lungawinak an hloh theu si lo maw?

Kawhhran sungtel pawlin thlarau le thutak in Pathian an bia ih Pathian an cawimawi asi ahcun lungawi ding kan si. Zumtu pawl thutak an nungih Zumnak le duhdawtnak ah an tthangso asi ahcun lungawi ding kan si. Kawhhran in rundamnak thuthangtha simsuak dingin hna a tuan asi ahcun lungawi ding kan si. Ziang kawhhran khalin a tlunih tumtah pathum a tuah nak ah za ah za a famkim ti a um thei dah lo ding. A famkim mi kawhhran na hawl asile na thih hnu vanram lawngah na hmu ding. Hellram feh ding na sile leitlunah a famkimmi kawhhran a um lo zia na thih hnu hmanah na thei dah lo ding. Curuangah kawhhran sungah a famkim lomi hmuh ter na si tikah nangmah kha a famkim lomi famkim ter dingah Pathian in ttuanvo a lo pek mi a um asi thei, culole, thinsaunak, zawi-awi theinak le ngaidamnak nun nei dingin na zir nak ding hmanrua tla asi thei.

Theihtha zetmi pakhat cu milai mimal diriamnak hawlin a phunzai rero tu pawl khi an thih hlan lo phunzai ding an thei ringring ding. Zumtu na sile na umnak kawhhran sungah kawhhran in a tumtahmi tuahsuak asinak parah na lungawi sawn aw. Zoin ziangtin ziang an tuah ih zoin hmintthatnak a ngah timi ah buai loin pawlkom tumtah famkim lo zet cingin tuahsuak asimi parah Pathian thangthat in lungawithu sim ding kan si sawn.


  1. Thlarau laksawng pawl hmun dik, tikcu le can dikah hman ding

Pawlkom sungah buainak tambik a suahter tu thu pakhat cu “zo in ziangtikah ziangvek a tuah ding?” timi asi.

Tikcu/can le hmun dikah laksawng hman thiam a thupi

Zumtu zaten Pathian in ti thei zawng, Thlarau laksawng in pek theh. Cui thlarau laksawng pawl cu zumtu pawl hrang thathnemnak hrangah a si. Thusim thiamnak, hlasak thiamnak, peknak, mibawm theinak, tvp, cu pawl cu a hmundik le a tikcu te ah hman thiam a thupi. Cun, khatlamah, Pathian laksawng pekmi pawl cu milai porh awknak le uan awknak ah hman pang asile tthatnak hnakin siatnak a suahpi sawn theu. Kawhhran rawngbawltu lakah mah le mah thei aw loin, mai laksawng co mi thei aw loin mipi hmaiah lar/lal duh, sinak duh, le lang duh menmen in cangvaih tikah a theitu, hmutu, le ngai tu pawl hrangah zumnak le duhdawtnak, thlarau ah tthangso ter tu si sawn loin dungtawlh ter tu ah an cang theu.

Midang thlarau laksawng comi lungawipi:

Cun, milai in pom harsa kan ti theu mi cu kan kiangkap zumtu unau pawlih thlarau laksawng co mi lungawipi hi asi. Mi hoha thiamnak, zirh thiamnak, thusim thiamnak, fimnak, hlasak thiamnak anei tu pawl thlarau laksawng an co vekin lungawipi, cantha pek thiam, lamzin kian thiam ding hi mi zapi hlawknak hrangah le Thlarau Thianghlim hnattuannak hrangah thupi ngaingai asi fawn. Kawhhran sungah thlarau laksawng comi iksik awknak, a tikcu lo ah hmannak, milai porh awknak ah hman nak, pawl a um tikah Thlarau Thianghlim hnattuan a dal ih zumtu pawl dungtawlhnak a suah phah theu.


Bible in a simmi cu “Nazareth khua ah an zum lo ruangah Bawi Zesu in thilmak tampi a tuah thei lo” ti asi. Na theihmi le laksawng comi cu a tha zet, nangmai theihnak ahcun a sunglawi tuk hmanah na thu, na hla, le na tuahmi a dawngsawng tu pawl hrangah hlawknak a um lo ahcun umze nei lo asi.

Tikcu le can, hmun hman te ah Pathian hmin sunlawinak ah thlarau laksawng hman thiam a thupi.


  1. Siatnak hnakin tthatnak thupi ausuahpi ding:

Tlangval mawi zet tuak zet pakhat cu nupi a neih mi pohpoh in an tlansan cingcing tikah thuhliakhlai tu pawlin ziangruangah asi pei tu an hliak ih ziangruangah asi ti an hmuh suak mi cu: Tlangval pa cun nupi a neih tin ten a thaizing a thawh tikah a nulepa sungkhat unau rualpi pawl hnenah a nupi siatnak thu a sim ciamco ti asi. A hnupi hmaisa bik cu zan a it tikah a ke a kak seisei a ti; a nupi pahnih nak cu zan a it tikah a thaw a awn thluukthlo a ti; a nupi pathumnak cu zan a it tikah a voih phutpho ati; cuvek tthiamtthiam in a nupi neih mi hmuahhmuah ih siatnak kha an neih awk ih thaizing ihsin mi hnenah a sim ciamco tikah a nupi zaten mothar an si lai ih an tlansan thluh ti asi.

Laimi pawlin ziangruangah hotu tha kan nei thei lo ti an theih duh asile a tlun ih tlangval pa thuanthi hi kan sinak tthenkhat cu asi ti theih a tha.

Laimi pawlin an sim theu mi cu “Laimi cu na bawm dingih an duhmi 98 na bawm hmanah pahnih na bawm thei lo asile an lo rel se ciamco dingih an lo hua mei ding” an ti.


Kan zir ttul mi a um :

  1. Mah kawhhran sungah:

Thangsiatu, dunglam ihsin dir thla tu, si loin kiangkap zumtu unau pawl tungding tu, an tlaksam nak bawm tu sawn si ding kan si.

Mi pakhatkhat a tlaksamnak na theih lomi khi a famkim tinak asi lo; a thu na thei kim lo, asilole na ttan ruangah a famkim lonak na thuhsak, lole na duhdawt ruangah na mit a caw ih a mawhnak le tlin lonak na hmuh thei lo menmen asi.

  1. Pawlkhat le pawlkhat lakah:

Huatnak le mi dodalnak in a sihkhawm mi milai umkhawmnak pawlkom cu mi vanduai bik an si. Cuhnak in pawlkom pakhat in pawlkom dang pawl hrangah ziang thiltha, Pathian laksawng pek mi kan nei, ziangvek in thazang kan pe thei hai ding timi sawn ruat in canttha zoh in nung ding le cangvai ding kan si.

iii) Doctrine dangdang lakah

Motor nei hrih lo pa hnenah motor a lei asile a hloh lo dingthu va sim ciamco aw la “mi aa asi hi” a lo ti ding. Cuvek thotho in motor lei pek te insang lungawi zetin an motor an lawm rero laiah an motor a hlohlo ding thu va sim ciamco aw la “mi aa asi hi” an lo ti thotho ding. Cuvek cu mi tampi kan si theu nan ti lo maw?

Fehsualnak: Thihnak thlen thei khawp fehsualnak le theihnak tlaksam ruangih thihnak thlen nak tlak lo fehsual nak tete thlaidan thiam a thupi.

EG; Rundamnak hlo thei maw thei lo; a ruat cia; Khrih rat sal dan ding; Halleluiah (Worship style); lennak le farahnak theology; tvp.



TT: Khua pakhat bawi hmuah ding mi thlencan thei lo vek.

Zesu Khrih a ratsal ding thu ah a ra ding ticu a fiang, asinan ziangtikah ziangtivekin tmi cu Bible in fiangten a sim lo.


  1. Sual do tlang le thutak ttannak ah ttanrualnak

  1. Atthlak thu el awknak hrial ding:

-Theih lomi ah kaa kim men a ttha sawn

-Pia-sen hman man lo mi el awknak ah tel lo ding

-Ka diksawn, ka thei sawn, timi kanmah in kan ausuahpi a tul lo

-Kan tuah mi kanmah in kan thei ih Pathian in intheih sak asile a tawk

-Theisawn, fimsawn “pa-sawn”zuam awknak ah tel lo ding

  1. Sual donak ah ttanrual ding:

-Sual ttan tu cu a sualtu hnakin a sual sawn

-Sualnak ihisin unau runsuak dingin kekar tlang a ttul

-Sualnak le misual thleidan thiam a thupi

-Sual pawmrem le misual ngaidam nak thleidan thiam a thupi

-Sual cu huat ding, misual si loin

  1. Thutak ttannak ah ttanrual ding

-Thutak cu theihnak in si loin nunpi nak in ttan ding

-Thutak cu mai hmakhua sialnak si loin thutak karhzai nak ding hrangah mai duhnak tanta thei ding.

-Kawhhran lungrualnak cu mila ah si loin thutak ah si ringring sawn ding asi

5. Thlarau porh awknak hrial ding:

i) Mah le mah midang hnakin ttha cuang, thianghlim cuang in thei awknak, midang cu sual cuang in hmuhnak a ttihnunzia:

Biaknak lam fehsual tampi pawlin anmah cu fehdik bik, thianghlimbik, Pathian thawn nai aw bik, in an thei aw aw ih midang cu fehsual in an hmu ttheu. Mah le mah thianghlim cuang, midang hnakin ttha cuang in theih awknak hi fehsual tampi in an thuken le lungput le thinlung-mizia a si theu. Hivek thinlung-mizia, lungput a suahter tu hi milai mah le mah cawisan awk duhnak, midang hnakin ttha cuang si duhnak, milai thinlung diriam duhnak ihsin a suak theu mi asi. Khatlam zawngin kan sim asile, midang hnakin ttha cuang le sicuang vekin mahlemah theih awk duhnak milai thinlung-mizia, lungput kha satan in a hman ttheu mi hmanrua ttha zet asi.

Curuangah midang (zumtu dang ) pawl hnakin tthacuang, thianghlim cuang in na theih awk tikah na lamzin kha na zohfel awk a pawimawh zet.

ii) Pathian hmu fiangtu nun:

Pathian hmu fiang tu cun Pathian thianhlimnak eng in a sunglam thlarau nun a tleu tikah midang sualnak le famkim lonak hnakin amai sualnak le thianhlim lonak a hmu tamsawn ih tangdawrnak thinlung thawn midang parah zawnruahnak, duhsaknak, duhdawtnak, zangfahnak in a khat sawn asi.

  1. Zesu zohtthim ding:

Zesu in buhlem pawl kha lo lak ihsin phawt lo dingin a dungthluntu pawl hnenah thu asim. Curuangah kawhhran sungah zumtu dik le dik lo an um ringring ding ti a fiang. Asinan, zo zumtu dik asi ih zo zumtu dik lo asi timi thutthen tu ding cu amah Zesu lawng asi. Nanglekai kan si lo. Amah Zesu rori in Judas Iscariot kha kumthum sung a dungthluntu hleihnih lakah a ret ringring asi kha. Zesu hnakin thianghlim sawn vekin a cangvai tu zumtu ti aw tla kan um pang asile ttih a nungzet ding.

Thlarau porh awknak thang sungah na tang pang asile kawhhran pawlkom cawkbuai tu, rualrem lonak suahter tu na si ding ti cu rel ttul loin na kiangkap um pawlin an thei mei ding.

  1. Zo hmuahhmuah in tlantlin lonak, famkim lonak kan nei theh:

Kan tlamtlin lonak cu huat awknak, mawhsiatnak le nautat awknak ding si loin a bur le hlawm in bawm awktawn kan ttulzia langter tu le Khrih lawngah kan famkimnak asizia langter tu sawn asi. Dungthluntu Paul hman in famkim ka si a ti lo.

Bible in asimmi Genesis 1:1 ihsin Rev. 22:21 tiang ka thei thluh, Bible ngan asi laiah le thuanthu a rak canglai ah Pathian thinlungah ziang a um ih cangan tu pawl ziang a ngan ter, tui kan san ah ziang san neihter dingin a sim timi ka thei tttheh ih famkim le tlamtling thlepthlep in ka thei theh asi ti tu an um asile awlsam ten kan theih dingmi cu THUPHAN asi.




Comments