Khrihfa Zumnak Lamzin Khaihawm

Reformed Baptist pastor, ka saya pa pakhat in arak sim dah mi cu, “Khrihfa kan zaten ziangmawcin dik lonak, theihnak famkim lonak, tlaksamnak kan nei ttheh. Asina’in, kan thleidan thiam dingmi cu ‘thihnak khawp fehsual’, khatlam zawngin sim asile, “Khrihfa ti aw si, an thuhram pi ihsin Khrih ah nunnak a nei lo tu fehsual pawl”, Zesu Khrih cu Pathian Fapa asi ti ah pom lo tu pawl, Khrih ih ta asi lo mi pawl cu leitlun mi vekin zoh ding ansi. Theihnak tlaksam ruangah fehsualnak, thlarau thihnak thlen thei lo cin, vanram lanzinah kanmah vek famkim lo khrihfa pawl cu kan unau vekin kan zoh thei ih kan duhdawt thei ringring a thupi.”

 

Laimi lak khalah kawhhran a tam vivo hmuhdan le pomdan bang aw lo mi a karhzai vivo tikah khrihfa lakah rualremnak le pumkhat sinak kan kenkawh thei vivo nak ding a thupi ngaingai in a ttul sinsin in a lang. Cuvek dinhmun thuanthu santiluang in infen rero lai ah malte a hnuailam thu pawl hi kan kiangkap ah kan zoh hliah thei ringring a thupi zetin ka ruat ruangah ruahnak ka lo hlawm ve hai:

 

1)      (Thlarau)Thihnak thlen thei khawp fehsualnak le thihnak thlen lo fehsualnak

(Kan zaten thihnak thlen lo kekar sualnak kan nei ttheh ti hi kan pom thei a thupi, theihnak le tuahnak famkim loin nitin kan nung sawn asi);

2)      Bible in fiang zetin a simmi le milai lehcawp, phuahcawp (doctrine), le khrsitian nunphung (Christian tradition) pawl thlendan thiam a thupi. (Vanram kainak ding le nitin khristian nunmawi in nungin Khrih dungthlun thei dingin zovek milai hrang khalah awlsam zet in theihthei dingin Pathian thu cu fiang le awlsam zetin ngan asi);

3)      A kumkhua in a thleng aw dah lo dingmi thutak le milai nunphung le thuanthunung parah a hngat aw mi thutak pawl thleidan thiam a thupi;

  4) Pawlkom sungah Zeru Khrih Thlarau hnakin pawlkom hruaitu lalnak, Khrih ah pumkhat sinak hnakin pawlkom sungtel sinak thupi sawn ah ret ringring nak fimkhur a ttul;

5)      Midang siatnak le tlamtlin lonak hnakin ziangtin Khrih ah kan unau kan bawm thei dingih Khrih ah nunnak a nei hrih lo pawl ziangtin kumkhua nunak nei dingin kan kai hruai ding timi thupi sawnah ret in tlang-au pi sawn.

6)      Kawhhran tinah um hrimhrim dingmi thil pathum: i) Pathian thangthatnak, ii) zumtu unau zumnak, duhdawtnak le thutak theihnak ah tthangso dingin kaihhruai le bawmbawi awknak, le Thuthangtha karhzainak hrang rawngbawlnak.

 

 

Curualrual in khrihfa fehsual pawl thu fimkhur ttul zetin a tanglei ah malte ka ngan bet. Khrihfa fehsual pawl hi an pawlkom, hotu, thutak kenkawhdan, nunpi mi, thlarau porhawknak pawl ah langhngan zetin theihtheih an si theu. Khrihfa fehsual pawl langdan tlangpi pawl, a tanglam vek nan hmuh asile fimkhur a ttha. Hi pawl hi Laimi lak ihsin si loin leitlun hmuntin ah khrihfa ti aw si fehsual pawl mizia, thuken, le cangvaihdan pawl ihsin lakkhawm mi asi: Laimi lakah an um tinak asilo ih an um lo tinak khal asilo.

 

1)      Midang hnakin danglam cuang, thutak theih mi nei, thianghlim cuang le ttha cuang vekin theih tawknak an nei.

2)      Hotu parah thusuh ding um lo thlukin tuhlut awknak-upbet awknak: Hotu cu pathian fate tluk an si. Pawlkom sungah thuneihnak (control), uk awknak, kaihhrem awknak an nei. Ziangtin an dungthlun pawl an thunun ttheu ti asile; Ttihnak hmanrua an hmang.       Pathian ttihnak, hotu ttihnak, siat tawnnak pawl thawn mi an kaihrem theu.

3)      Anmah sung vialte naihniam zet, duhdaw aw bik, tlaihsan aw bik, pehtlaih awknak an nei; Khrih ah pumkhat sinak hnakin pawlkom sungtel sinak thupi sawnah an ret.

4)      Anmah sungah rinsan awknak an nei, a cancan cu thih tiang rinsan awknak an nei.  Thuthup le sual thup tiang an phuang aw aw, thinlung thup tiang an thei awter theu.

5)      Cult pawlin Bible lenglam ah Pathian in an hnenah theihter mi nei vekin an thei aw ttheu. Asilole, Bible in a zirhmi hi midang hnakin theihfiang theinak nei cuang vekin an thei aw aw.

6)      Thutak an simmi le an nun a kaih aw lo theu, hmun hrekkhat ah cah zetnak an neih rualrual in khatlamah tlaksamnak tumpi an nei theu.

7)      Lakhran awknak: Fehsual pawl hin midang tampi thawn cawhpawlh awk an duh lo. An hruaitu pawlin an member pawl cu midang thawn cawhpawlh aw lo dingin thu an fah theu. Ziangah tile midang pawl cu an thianghlim lo, satan dungthlun an si ih anmah le anmah cu mithianghlim an si tikah a hran ten um dingin an fial aw theu.

8)      Anmah zumnak vek zumnak nei lo le an zumnak fehpi dan thusut tu cu an ral vek in an zoh: An member pawl thinlung  sungah an ral, khrihfa dang pawl lala khi an ral tumbik vekin an zirh tikah an thinlung sungah ral neihnak, midang eltainak in hmun kaupi khua a luah theu. Midang thawn do aw dingin an man cia ringring. Midang tlaksam nak in anmai sual an hupphen tum theu.

9)      Leitlun thil, tisa hi sual ttheh in an hmuh tikah “anti-social” leitlun milai pawlkom awknak pohpoh sual ttheh vekin an zirh theu

10)  An hotu pawl hi thlarau lam porh awknak in an khat; midang zohman ih zirh theih le thusim theih an si lo, a thei bik umsun vekin an thei aw aw.

11)  Abur porh awknak: Anmai pawlkom cu athianghlim bik le a thianghlim mi pawlkom umsun vekin an thei aw aw, midang pawlin Khrih ah rundamnak an ngah ding hnakin an pawlkom member siter ding thupi sawn ah an ret; Khrih ah zumtu unau sinak hnakin pawlkom member sinak thupi sawnah an ret;

12)  Pawlkom suahsan tu le pawlkom lenglam mi pehtlaih nak: Pawlkom suahsan tu pohpoh cu hell ram tla ding, fehsual vekin an hmu ve thung. Pawlkom sungah hnget zet le ttan hmun ttha ngah dingin pawlkom lenglam sungkhat le rualpi ttha khal an tlansan, an hua, thiarfihlim awk thei ding phut an si theu.

13)  An sung thuruk pawl an thup: an pawlkom sungthu, kaihhruai awkdan le sumpai hmandan siseh thu hla le thuneihnak a luansuak dan pawl thu tampi cu lenglam milesa pawl theih lo dingin an thup theu.

14)  Tisa sualnak, nupa sualnak lamah a tlasia mi, fehsual, pawl cun taksa cu a sual mi asi ih taksa in a tuah mi ruangah thlarau rundamnak a hnaihnok thei lo ti ah an zum.

15)  Bible a zum lo tu fehsual tthen khat lala cun khristian sinak cu vanram kainak ding hrangah lamzin tampi (biaknak sakhua tampi) lakah pakhat asi. Muslim, Budhist, tvp, pawl khal an zapi ten vanram kainak lamzin lawnglawng an si.

John 14:6, ⁶Jesuh in, “Keimah cu lamzin le thutak le nunnak ka si. Keimah hnenin siarlo zohman ka Pa hnenah an thleng thei lo” timi Zesu ttongkam an pom lo.

 

Khristian fehsual tampi pawl in a tlun lam ih ngan mi lakah paziat simaw nuncilh mi an nei theu. Fimkhurnak ah ngan mi asi.