HRUAITU CUN

1. Mimal nun: Hruaitu sinak cu pianpi le zircawp mi asiih hnatuan kaihmi ruangah si loin lungput le nuntu mizia in a hrin suak mi tuahnak in a langmi asi sawn. Cuvek hruaitu pawl nunah a hnuailam vek pawl hi hmuh theih asi:

1. Mah le mah theih awknak: Hruaitu cun amai cahnak le cah lo nak a thei aw aw ih ziangkim thei ttheh tu asi lo ti khal a thei aw aw. A theih mi sung ihsin a sim ih a tuah, cule a theih lo mi ah a thei tu hnen ihsin zir a hreh dah lo ih a zir ringring sawn.

2. Mah le mah thunun awknak: Hruaitu cun midang a thunun hlanah amah le amah a thunun aw hmaisa.

3. Mah le mah rinsan awknak: Hruaitu cun a tuah mi parah hnget khoh zet zumnak a nei ih ziangkim a tuah mi ah mah le mah rinsan awknak thawn a tuah theu. (Pathian in ifial mi cu keimah cahnak si loin Pathian Thlarau in keimah hmangin a tuah duh mi a tuah sawn asi ti fiang zetin zumnak mit in a hmuh tikah milai cahnak parah si loin a cakter tu le thiltha a tuah ter tu Pathian ruangah rinsan awknak thawn thil a tuah theu).

4. Thinlung tthenhnih aw theinak: Hruaitu cun fianhrial zetin Pathian Thlarau thu a rawn hmaisa ih a sung muril ihsin a suakmi ruahnak thiang le fim thawn khua a ruatih ziangkim a tuah theu tikah a tuah mi le thuthluknak parah thu tthenhnih aw zetin a tuah theu.

5. A thazawng ih hmuhthiamnak: Hruaitu cun Pathian rawn hmaisa in ziangkim a tuah ih Pathian in a pek mi fimnak le khawruah thiamnak hmangin ziangkim a tuah tikah ruah lo pi le milai duh lo zawng in thil a cang mi par hmanah Pathian in tthatnak hrangah a hersak thei asi ti a thei cia ringringih ziangkim a tthatnak zawngin a hmu thiam.

6. Midang tuah mi parah hngat aw lomi hma la tu sinak: Hruaitu cun thil a cang mi parah midang mawhsiat, lole, mai hrang tthatnak ding a hawl lo ih amai liangparah Pathian in ziangvek ttuanvo a pek ih ziangvek canah ziangvek mawhphurnak a nei timi sawn a zoh ringring tikah a mawhphurnak parah a taw a tlai dah lo ih midang mawhsiatnak in a tikcu a cem ter in a canttha a liamter dah fawn lo. Midang in an tuah ruangah, tha an ti ruangah si loin amai sung muril ah mawhphurnak nei in a theih awk vekin tuah ding mi sawn cu ralttha zetih a fehpi sawn theu. A lungawinak le tuahnak cu midang tuah mi parah a hngat aw dah lo.

7. Midang tthatnak hrangah pek awk duhnak: Hruaitu cun ziangkim a tuah nak cu amai hrang hlawknak si loin a tuah mi le tuan mi thawn a pehpar mi midang hrang hlawknak, tthatnak ruatin ziangkim a tuah tikah a ngah mi parah a phunzai dah lo ih a peksuak mi parah a lung a awi sawn.

8. Rin-umnak, raltthatnak, rin tlakmi sinak: Hruaitu cun a nuntuzia le lungput cu a tuah nakin a langter tikah a mah a thei fiangtu pawlin anmai siatnak tuah tu asi lo ti an theih fiang tikah rinsannak le tlaihsannak lungthin a neihter. Cuticun amah khalin midang tthatnak hrangah ziangkim a tuah mi asi ti a theih fiang awk tikah raltha zet in ke a kar ngam theu.

9. Tumtah mi ah pek awknak: Hruaitu cun a tumtah mi, tuanvo a neih mi tuah suak dingin ziangvek man pek a tul khal asile a pek theu, amai lungawinak le nun nuam/nun-awlsam tanta khalin midang hrang tthatnak le thiltha a tumtahmi tuah dingin a pek awk sawn theu. Milai phurnak le nuam ti zawngah a hngat aw lo ih a tumtah mi le ttuanvo tuah suak dingin milai tisa duhlo zawng dinhmun khalah rinum zetin a ttuan suak sawn theu asi.

10. Hmintthatnak: Hruaitu cun a tuah mi le ttuanmi ruangah zo in hminthatnak an ngah ih zo in cawisan an hlawh timi hnakin a tumtah mi ttuansuak ding kha thupi sawn ah a ruat ringring. A tuah mi ruangah mi zo hnen hman in cawimawinak le hmintthatnak a phut dah lo.

11. Phurnak le lungawinak: Hruaitu cu ziangvek can khirhkhan le milai ruahnak in a cang thei nawn lo ding dinhmun khalah a tumtah mi le a tuanvo mawhphurnak a liangparah a tthum aw mi cu phur le hlawptlo zetin lungawi siamso ten (hnihsuak sai phahin) a ttuan theu.

12. Cawlh hahdam thiamnak: Hruaitu cun ziangvek le ziangtluk buainak kar lak khalah cawlh hahdam a thiam ih hmailam saupi a tumtah mi tuahsuak ding tiang ruatin a thazang le tikcu hmanrua pawl hman a thiam theu. Ziangtluk in a ttuan in a tha a bang hmanah midang hnakin ttuan hleice le thiltha tampi tuah cuang vekin a porh aw dah lo ih a ttuannak a hlawkpi tu pawl hmai ah mithmai zoh ngam lo dingin a lang dah fawn lo.

13. Ziangkim hi a hmun lo vekin thleng awknak hrang sangka a ong sawn theu: Hruaitu cun ziangkim hi a hmun ringring lo ti a thei ih thiltha suahpi tu ding, a rianmi mipi hlawknak hrang thleng tul mi thleng dingin a timtuah cia ringring.

14. Mah vek midang pawl thawn pawlkom le pehtlaih awknak : Hruaitu cun amah vek thiltha tuah duhtu pawl thawn kutkai in ke an kar tlang theu ih amah lawngin ziangkim a tuah ttheh thei lo asi ti a thei aw aw.

15. Zohtthimthlak nun: Hruaitu cun midang thunnunnak le kaa in simnak in sisawn loin amai nunah a tumtah mi le nun-thuken lam hawi zawng nuntu ziaza le tuahnak in hmai a hruai sawn theu.

16. Sunmang: Hruaitu cun mi senpi hmuh le theih ban lomi, tumtah-sunmang, zumnak mit in hmuhcianak a nei ih khuitawk lamzin ah afeh ih khuitawk ah a tawp ding ti a thei fiangih cui lamzin ahcun dungsip loin a feh theu.

17. Thinsaunak le pek awknak: Hruaitu cu tikcu le can a zoh thiam ih rei lo te hlawknak, hminthannak, nuamnak hrangah siseh rei lo te harsatnak le sunnak ruangah siseh a tumtah mi lamzin dal dingin zianghman a tuah dah lo.

18. Tuah mi parah thazang le thinlung ruahnak zapi ten phur zetin tuah theinak: Hruaitu cun a tuah mi parah thinlung taksa le ruahnak thawn phur zetin a ttuan ih thinlung hrekhat thawn siseh tthuktthun le phunzai phah in zianghman a tuah dah lo.

19. Bang awk lo nak upat thiam: Hruaitu cun milai mizia, duhdan, hmuhdan, le pianken bang aw lo mi pawl upat hna a thiam ih ziangkim in hmun le can an nei a si ti thei in rualrem ten mi zapi ttangkainak ding lamzin a hawlsak sawn theu.

20. Mawhphurhnak la tu: Midang mawhsiat tu le fial mi lawng tuah tu si loin a famkim lo mi le a tlasam mi a hmuh tikah tttuan vo a la in tthatnak hrangah a ti thei tawk suah in a pum a pe aw sawn theu.

21. Mai hrang hlawknak le ngah nak hnakin midang rian dingin pek awknak: Hruaitu cu midang hnen ihsin ziangvek upatnak, cawimawinak, canpual tha ziangvek ka ngah timi hnakin a neihmi, theihmi, tuah thei mi hi zovek milai in ziangtivek canah an hlawkpi ding timi sawn kha a ruat ringring ih canttha hngakin thiltha tuah dingin a timtuah aw cia ringring.

22. Khawruah thiam nak, lamzinthar hawl thiamnak: Hruaitu cu a tumtah mi tuahsuak dingin lamzin pakhat lawngah a hngat aw lo ih Pathian in lamzin a onsak mi sawn ah hngat aw aw in Pathian pek mi fimnak, khawruah thiamnak le hmanrua tha pawl cu hmangin lamzin a hawl thiam theu.

23. Tuahnak in rinsannak: Midang upatnak le rinsannak cu midang hnen ihsin a phut dah lo ih a dil dah lo, a nun le tuahmi parah midang in an pek mi sawn asi ti thei in midang a vuivai dah lo.

24. Tthatnak hrangah a hlei in kekar zuam tu: Hruaitu cun ttuanvo, sumpai le upat hmintthatnak ngah duh ruangah si loin thilttha tuah thei ding dinhmunah a din tikah mi zohman theihpi lo khalin thiltha a tuah theu. Amah hnakin thasawn le felsawn in tuah thei tu an um tikah tumtah mi thiltha a suah thei nak ding ruat in lamzin daltu ah a ttang dah lo.

25. Ttihnung lakah hmai tuang ngam tu: Hruaitu cun tthatnak tuahsuak dingin amai lungawi zawng le duhnak pawl tlansan in siseh a ttul asi ahcun amai nunnak tiang hman liam ding tiangin thiltha tuahsuak nak ding hrangah a pe aw sawn theu. Thil tuah sual pang mile dunglam thu ah a hngat aw lo ih ziangkim hmuhton mi ihsin zir in hmailam thiltha sawnah a thinlung a hngat aw ringring.

26. Midang lungawinak siahsuah tahhratin mai hlawknak hawl dah lo: Hruaitu cun midang lungawinak le hlawknak siatsuah tahrat in amai hmakhua a sial dah lo.

Hruaitu thuken le sinak

1. Hruaitu cu Pathian thinlung keng, Pathian thawn neihniam zetin nitin a thlang leng mi, Pathian thawn pehzawm awknak nei mi asi.

2. Hruaitu cu Pathian ih kawhmi le thiambik laksawng pek mi asi.

3. Hruaitu cun Pathiang rawngbawlnak hmai a hruai

4. Hruaitu cun amah le amah a thei aw aw ih a cahnak le thiamhleinak pawl hman a thiam

5. Hruaitu cu Khrih nun vekin nung in Khih thawn neihniam zet pehtlaih awknak a nei.

6. Hruaitu cu Thlarau Thianglim thununnak hnuaiah a nung

7. Hruaitu cun thuneihnak, larnak, le nuamnung cennak le thlemnak phunphun a neh

8. Hruaitu cun Pathian thutak thuk zetin a thei ih a nunpi

9. Hruaitu cun mah le mah thunun aw thei nuntu ziaza mawi a nei

10. Hruaitu cu Khrih hmuihmel keng nuntu ziaza a nei

11. Hruaitu cu thinlung a kuai mi le tangdawrnak lungput a nei

12. Hruaitu cu dingfelnak, rinsan tlakmi sinak, rin umnak, le nun thianhlimnakah thangso vivo mi asi.

13. Hruaitu cu mipi siahhlawh thinlungput thawn mipi a rian

14. Hruaitu cun midang parah thuneih duhnak, midang uk duhnak lungput a tlansan

15. Hruaitu cu mahte lawng um asilo ih abur lakah a thang rero pawlkom sihcih awknak a nei

16. Hruaitu thinlung sungah mipi pawlin hmun kaupi khua an luah

17. Hruaitu cu hram thawk tu asi theu

18. Hruaitu cun a sungmang fiangzet le famkim zetin a simsuak theu

19. Hruaitu cu ziangtin midang thazang pek, kaih thawh, le phur ter dan a thiam

20. Hruaitu cu thleng awknak hrangah timtuahcia ringring ina um ih daihnak hrang remruat tu asi theu, cuihlei ah hlawhtlin dan ding lamzin hawlin khawruah thiamnak a nei.