Evangelical Khristian timi hi ziang asi?

Evangelicalism ttongfang hi Greek ttong “euangelion” timi le “euangelizamai” timi ihsin lakmi asi ih “good news” “thuthangtha” tinak le “to proclaim as good news” “thuthangtha phuan ding” tinak asi. Cui Thuthangtha cu Khrih ih thuthangtha asi, “Ca Thianghlim sungih nganmi vekin Khrih cu kan sualnak ruangah a thi; ⁴an phum ih, Ca Thianghlim sungih nganmi vekin, ni thumnak ah thawhtersal asi. ⁵Piter hnenah a lang ih a tirhthlah hleihnih hnenah a lang” I Kor 15:3b-5. Curuangah Evangelicalism timi cu Zesu Khrih ah rundamnak thuthangtha phuansuahnak asi ti ah tawite in sim theih asi. Cun, “evangelical” timi cu Zesu Khrih ah rundamnak thuthangtha phuangsuak dingin a pe aw tu tinak asi ih “Evangelical Chrstian” timi cun “Zesu Khrih ah sual ngaidamnak le rundamnak cotu, cui thuthangthantha phuang suak dingin a pe aw tu Khrihfa” tinak asi.

Evangelicalism hi Protestant Reformation a thawk pek, Bible cabu mi senpi hnenah zem suah asi tawk lai ihsin a thawk mi asi. Asinan kum zabi 18 le 19 nak lawngin Europe, le America ram lam ihsin Evangelical cangvaihnak hi nasa ten a thawk. Reformation ihsi thawk in Khrihfa zumnak a thleng aw mi, Evangelical cangvaihnak in a hmuisel bik cu zumtu mimal pakhat in Zeusu Khrih thawn pehtlaih awknak, rundamnak nei in Bible cu milai tin in neihtheih asi ih rundamnak a co lawng si loin Bible in a simmi nitin nuntu khawsak Bible thuken nunpinak le cui rundamnak thuthangtha cu phuang suak vivo dingin pumpek awknak asi. Cui thuken cu tuini tiang Evangelical Khrihfa pawl thuken le ausuahpi mi cu asi.

Evangelical zumnak khaikhawm:

Evangelical zumnak hi Bible thurin ahcun Bible in a sim vekin a ngial a ngan in zumtu; Bible thuken a sual thei lo, Bible sung thu cu Pathian Thlarau thawkkhum mi, Adam tluksiatnak ruangah milai cu sualnak sungah thluse zo, Pathian mithmuh ah (thlarau) mithi, asi, Zesu Khrih lawngah Pathian zangfaknak, zumnak in milai rundamnak cu tuah famkim asi, Zesu Khrih thisen ih tlennak ruangah milai cu Pathian thawn rem awknak tuahsal asi zo ih Pathian insang sungtel asi sal zo. Ziangtin asi tile, Khrih in a tuah ttheh zo mi rundamnak thutthangtha, Pathian thunung cu misual pa hnenah theihter asi rualrual in Thlarau Thianghlim in a thi zomi milai thlarau cu a sersiamthar, hrinthar, a nunter sal tikah milai cun Pathian thawn pehzawm awknak thar a nei ih milai duhthlannak thinlung zapi thawn Zesu Khrih cu irundam tu asi ti ah a thinlung sungah zumnak sersiam asi.

Acui milai le Pathian rem awk salnak, rundamnak thuthangtha cu Khrihfa pawlin leitlun hmuntinah simsuak dingin Khrih in ttuanvo a pek ta vekin zumtu pawl leitlun nunsan bik cu Pathiang tumtah vekin Pathiang hmin sunlawihnak le rundamnak thuthangtha leitlun hmuntin ah phuansuah ding asi. Cuticun Zesu Khrih a rat sal tikah amah zumtu pawl cu kumkhua nunnak sungah a hruai hai ding.

Evangelical zumnak cun leitlun zumtu zapi ten Pathian in a thuthangtha nunpi nak in le fehsuak in phuang dingah a kawh mi kan si (Matthew 28:18-20; Acts 1:8; 1 Corinthians 16:1-4; 1 Peter 3:15).

Wordl Evangelical Alliance ( http://www.worldevangelicals.org/aboutwea/statementoffaith.htm) le World Evangelical Institute Association ( http://www.wetia.org/statement/) pawlin a hnuailam vekin an zumnak thuken an website ah an ngan. (Accessed on December 19, 2008)

A tanglei vekin kan zum:

……..Bible Cathianghlim cu a hramthawk ah Pathian in milai hnenah a pekmi, Pathian thawkkhum mi, sual thei lo, a sungthu zapi ten rinsantlak, zumnak le nuntu ziaza hrangah huham cahnak nei mi asi.

………Pathian pakhat, a kumkhua sankhuk rei ihsin a um, Pa, Fapa, le Thlarau Thianghlim

…..Bawipa Zesu Khrih, Pathian cu taksa in a lang aw mi, fala thianghlim hrin mi, milai taksa in a thuam awk laiah sualnak nei lo, Pathian huham cah-nak thawn thilmak a tuah mi pawl, taksa in thihnak a tuarmi, taksa rori in thihnak ihsin a thawhsalnak, vancung ramah a fehnak, vanramah Pa’I hnenah palai a ttuannak, le leitlunah huham cahnak le ropitnak thawn a ra sal ding

…..Misual le mihlo rundamnak cu Bawipa Zesu Khrih thisen ih thlennak ruangah asi ih cui tlennak co thei nak cu milai tuahnak ruangah si loin Thlarau Thianghlim ih hrintharnak in asi.

….Thlarau Thianghlim in zumtu pawl cu a cencilh tikah nunthianghlim nun in nung thei dingin le Zesu Khrih theihpi tu, thuthangtha karhzai ter tu si in Bawipa Zesu Khrih hrangah hnatuan suak thei dingin zumtu sungah hna a ttuan.

…Zesu Khrih ah zumnak nung a nei tu zapi cu, Kawhhran sungtel, Khrih ih taksa peng si in Thlarau ah pumkhat sinak nei in lungrualnak a um.

….Zumtu le zumlo tu mi zapi ten an tho sal dingih rundamnak a cotu pawl cu kumkhua nunnak ah an thosal ding, mihlo pawl cu kumkhua hremhmun feh dingin an tho sal ding.

Last modified: Friday, June 27, 2001