Leitlun khualtlawnnak lamzin tluanah lungawi sopar ten santiluang lawngpi nan hlau cio ding ka zum. Himi casiar tu zapi ten zumtu, khrifa ti aw tu hlir kan si ding khal ka zum. Leitlun khualtlawn ni a tlak tikah leitlun damsung ttuanrah, ttuansuah mi cu ziangvek asi ti Pathian hmaiah fiangzet in kan thei lai cio ding. Mizocio khal, ni a tlak tikah, leitlun khualtlawnnak ihsin tuansuah mi nunrah thu ah Khrih hmaiah mangbang dukdi lo dingin leitlun damsungah tuahnak le ttuanak in zo ih palai kan si ti mah le mah cek awfel thei dingin in bawmtu dingah thu malte zoh hnik uhsi!

 

Casiartu, zumtu zo cio khalin kan theih cio vekin leitlunah thlaraulam lalram pahnih a um: Pathian lalram le Satan lalram, ti in. leitlun pumpi cu satan uknak, thim thuneihnak hnuai ah a um hrih lai asi tiah Zesu in in sim. Cui thim thuneihnak, satan lalram cu tthiatbal in Khrih ih lalram cu din asi ih kawhhran cu Khrih ih lalram cangvaihnak bungrua, Khrih ih taksa peng, Khrih ih lalram milesa pawl sihcih pehtlaih nak mibur asi. Kawhhran, zumtu ti aw pawl lakah Zesu in “buhlem”, zumtulem, satan lalram milesa (satan palai) an um thu khal in sim. Amai dungthluntu hleihnih lak rori hmanah pakhat cu a zuva, dungthluntulem, satan palai a rak si.

 

Biaknak lam cangvaihnak, khawm awknak, thlacamnak, peknak, thiltha tuahnak, tvp, cu khrihfa zapi ten tuah mi asi. A tak le a lem cu “anrah in nan thei ding” ti ah sim kan si. Sihmansehla zo hi zumtu lem asi ih zo hi zumtu dik asi ti cu kannih zumtu pawlih thuthen ding asilo. Ziangah tile zumtu lem le zumtu dik, Pathian lalram milesa le satan lalram milesa pawl hi thleidan har tuk an sih Khrih a dungthluntu pawl hnenah “buhlem nan phawt asile buhtak nan phawt ngah pang ding” tiah buhlem pawl hlawn lo dingin thu a cahta hai. Cuihlei ah,  “midang parah thuthen hlah” tiah sim kan si fawn. Sikhal sehla mah le mah tuahnak, duhhril mi cu fimkhur ding, mah le mah cek aw fel dingin fial kan si ruangah kan nitin  nun in a rahsuak mi parah mah le mah cek awkfelnak hrang in bawmtu si hramseh tiah a tanglam vekin tawiten zoh hnik uhsi.

 

Milai zokhal lalram pakhatkhat ih milai, palai asi. “Mi pakhat in bawi pahnih a rian thei lo” ti asivekin mi pakhat cu lalram pahnih ih palai asi thei fawn lo. Zumtu pawl cu “Khrih ih palai” tiah kawh kan si. Asile, kan nitin nun in a rahsuak mi ihsin “zo ih palai ka si” ti mah le mah cek awkfelnak in bawmtu hrangah a hnuailam vekin “Krih ih palai” le “satan palai”  nunrah phunhnih in zoh hnik uhsi.

 

Mi zokhalin , kan pi Evi ihsi thawk in, “thilttha” tiah an ruah mi an tuah, an sim cio. Asinan, ka tuahmi, kan simmi in ziang a hring suak ding timi mi tampi in kan ruat ban lo. Cutin ruahlo pi a hringsuak theu, a rah ttheu. “Thilttha” ka tuah kan ti lai ah a linglet in a se thei bik a rak hring suak ttheu. Curuangah leitlun milai, a biktakin, Pathian zumtu pawl thuanthu kan zoh asile milai ruahnak in “thilttha” tiah ruahmi hi zumtu pawl siatsuahtu, ttihnung bik a rak si ttheu. Zumtu le hruaitu mi tampi in kan tuah mi ziang a hringsuak, zo ih palai kan tuan rero ti thei aw loin kan cangvai tikah thilttha kan tuah, Khrih kan rian rero si hmang kan ti laiah kan tuah mi kan simmi ih a rahsuak mi cu satan lungawizawng a rak si theu. Khrih ih palai kan ttuan sihmang kan ti lai aih Satan palai hnatuan kan rak ttuan theu. Curuangah hitin kan sim asile a fiang zet ding; Pathian zumtu pawl hrangah theihlonak, tlaksamnak, harsatnak le dodaltu tvp zianghman ttihding le phan ding a um lo, Pathian duhdawtnak ttang sung ihsin inlak suak thei tu, in tthen theitu zianghman a um lo, kan leitlun nunah Pathian tumtah le duhmi ttuansuak thei lo dingin dal/kham thei tu zianghman sersiam mi a um lo. Asinan kanmai ruahnak ih”ttha” kan timi, Pathian Thlarau hnen ihsin a suak mi silo, milai tisa ruahnak le satan ih ruahnak pekmi parah hngat aw awin kan tuah mi pawl hi in siatsuahtu, Pathian tumtah le duhmi ihsin in hruai peng tu asi sawn. Voi tampi cu kan tuahmi pawl hi ruahnak in kan thinlung sungah kan pai lai ahcun Pathian hnen ihsin a ra mi maw, tisa le satan hnen ihsin a suak mi asi ti thleidan a harzet theu. Ziangah tile “thinlung cu zianghmuahhmuah hnakin mi bum hmang bik asi”. Curuangah kan thinlung sungah ruahnak kan pai mi kan tuahsuak tikah a rah mi kan zoh asile cui ruahnak pawl cu khui ihsin a ra ih kan tuahnak pawlin zo ih palai kan si ti in theihther theu.

 

Curuangah tuahnak ih rah ihsin “Satan palai” maw “Khrih ih palai” kan si ti hliakhlai hnik uhsi. Bible sungah satan in a palai pawl hmangin ziangtin Pathian tumtah a rak dodalih ziangtin an cangvai, Bible in ziang a sim timi pawl thawn kan zoh asile kan khawruahnak in bawm zet ding. Zumlo tu leitlun milai hmuahhmuah cu thlarau thi, Pathian thawn pehzawm awknak nei lo, satan lalram milesa an si tiah Bible in insim. Culawng hman siloin zumtu ti aw pawl lak khalah satan palai, zumtu lem an um thu khal Bible in in sim. Asile, mah le mah zo ih palai ka si ti cek awk felnak ding hrangah le kan kiangkap milai pawl zo ih palai an si thei ti ah fimkhurnak hrangah ngunngaih zetin zoh hnik uhsi.

 

Palai, hmanrua, le hnatuan pawl:

1)      Sualnak tipungtu:

Satan in leitlun milai pawl a bumnak cu tisa duhnak, nuamnung cennak, milai porh awknak, tvp, hmanrua hmang in bum asi. Curuangah na taksa ruangpi, tikcu, neihmi sumsaw, pehtlaih mi pawl sualnak tipungtu ah na hmang maw? Na tuah mi le tongkam ruangah midang nunah sualnak a pungter maw? nangmah thawn a pehtlai mi pawl nun ah nangmah thawn nan pehzawm nak ruang ihsin sual an hua sinsin maw, sutin siloin sualnak tuah nuam an ti sinsin? Cutin sualnak tipungtu ah na tel ve asile ‘Satan palai” na si tinak asi. Cuvek thotho in kan kiangkapah a ummi, kan pehtlaih mi, milai pawl khal sualnak tipungtu ‘satan palai” pawl lak ihsin thiarfihlim aw dingin zumtu pawl cu kawhhran, lakhran mi kan si. Sualnak tipungtu satan palai thawn hramhnget zet pehtlaihnak nei lo dingin le sualnak tipungtu cangvaihnak tuahnak thape tu si lo dingin zumtu mi zokhal amah le amah kilveng aw dingin tuanvo a nei asi.  Thakperh, vunthak nat a nei tu thawn a pawm aw rero tu cun a rei hlanah nathrik a kai cing ti a theih awk a tha. Sualnak tipungtu ti tikah langhngan zetin tuahsualnak tipungtu lawng si loin zumnak dungtawlh dingin mi a ciahneh, kaihruaitu khal, satan palai thotho an si. Voksa bazar um thei dingin a leitu le a zuar tu an thupitdan a bang aw aw. Thangsiat relsiat awknak um thei dingin a reltu le a ngaithlatu an tuldan a bang aw. An pahnih in thangsiat relsiat awknak sual tipung dingin an ttuldan a bang aw aw asi. Hurkhuannak um dingin nunau le mipa an lungrual tlang a tul. Cuvek thotho in nawhthuh pe tu le ei tu cu eiruknak um dingin an tul ve ve. Nan na nitin nunah sual tipungtu ah na ttang ve maw? Na taksa ruangpi, na neih sumsaw, na tongkam le tuahnak in siseh na pehtlaihnak le thapekmi in sual a tipung maw? Sual tipungtu pawl thawn hnawihnih aw lo dingin zumtu pawl cu lakhran, kawhhran mi le fial mi kan si.

 

2)      Huatnak tipungtu:

“Pathian ka duhdawt tisi a unau a hua tu cu thuphan per asi” tiah Bible in a sim. “Mi zokhal a unau a hua tu cu thimlakah a vak rero ih khuitawk lamzin ah ka feh ti khal a thei aw lo. Ziangah tile thim in a mit a cawtter” tiah ngan asi. Mi tampi cu Pathian le thudik ttantuk vekin an um aw ter nakah midang an hua theu! Curuangah Pathian na ttan tuk ruangah siseh kawhhran na ttantuk, thudik, miphun, hrin le hram, khua, insang, nupi pasal, sungkhat, mai lamtang, pakhatkhat na ttan tuk ruangah midang na hua asile Pathian na thei lo tinak a si. Tongdang in sim asile, na theih mi Pathian cu Bible in a simmi Pathian asilo tinak asi. “Huatnak le Pathian Thlarau an um tlang thei lo”. “Zumtu in kan huat thei mi cu  sual le satan lawng asi” tiah an sim theu. Cutin huatnak in na lungsung a lo luah asi ahcun satan palai na ttuan rero tinak asi. Na sungah satan palai a cangvai rero tinak asi.

 

Cun na kiangkap pehtlaih mi lakah, nangmah cu a lo duhdawt zet vekin lang si in midang a lo hua tertu kha satan palai asi ti fimkhur aw. Pathian in amai hmuihmel kengin a sersiam mi le a duhdawt ih A Fapa thisen in a lei zo mi a fahniang pawl hua dingin a lo tuahtu kha Pathian Thlarau asilo, satan sawn asi. Huatnak cu satan lalram hmanrua asi.

 

Biaknak lamah phur deuhdeuh, pe aw deuhdeuh vekin lang si in a unau a hua sinsin tu, huatnak le thangsiatnak karhzai tertu pawlih Pathian cu Bible in a simmi pathian asilo. Bible in a simmi Pathian cu duhdawtnak asi.

 

Cun nangmah le nangmah cu huatmi ka nei lo na ti men thei. Na tuahnak, tongkam, cangvaihdan, umdan ruangah midang pakhat le pakhat karlak duhdawtnak a siatsuah ih hmuhthiam awk lonak, huatnak a tipung asile an lakah satan palai na si thotho. Na tuah mi le tongkam in a rahsuak mi in ziang a hringsuak, huatnak maw duhdawtnak, fimkhur a tul. Culole, si na duhmi, nangmah le nangmah na theih awkdan ih lingleh kha na sinak taktak a rak si ziar thei. Jews pawlin Messiah hngak rero in an theih awk laifangah Messiah thattu cu anmah an si vek kha na dinhmun asi thei.

 

Nangmah a lo duhzet na cingin midang hua dingin a lo tuahtu, khat le khat karlakah huat awknak, rem awk lonak, hmuhsual awknak tipungtu cu satan palai a rak siziar theu ti fimkhur aw.

 

Huatnak nunpitu le huatnak tipungtu na si ahcun ziang hna na tuan ih nangmah le nangmah ziangvek in na thei aw aw, na sim aw rero khal asile na pu cu satan asi. Satan palai ttuanlo dingin le satan palai pal lak ihsin mah le mah thiarfihlim aw uhsi.

 

3)      Pathian tumtah dodal:

Mathai 16:23, Jesuh cu a her ih Piter hnenah, “Nang Satan, ka hnen ihsin tlan aw! Ka fehnak lamzin khamtu na si, ziangah tile hi bangtuk na ruahnak hi Pathian hnen ihsin a rami asilo, milai hnenin a rami a si,” tiah a ti.Leitlun milai pawlin thilsual tuah duh ah a sual ti thei na cingin kan tuah hrim mi hnakin thiltha sihmang ti ah kan ruatih kan cangvai tikah Pathian tumtah dodal in kan rak cangvai theu asi ti in theihter. Pathian zumtu pawl hrangah leitlun sersiam mi le thildang hmuahhmuah hnakin milai tisa ruahnak in a cangvai mi hi ttihnung bik le siatsuahtu, Pathian tumtah dodaltu a rak si theu. Curuangah “mi zokhal in anmai nunnak a humtu cun a nunnak a hloh ding” tiah ngan asi. Mi zokhal, Pathian Thlarau theihternak le lamhruainak hawl hmaisa loin, milai thinlung duhnka le ruahnak cu Pathian duhnak le tumtah hnuai ah tuhlut aw, up aw hmaisa loin milai ruahnak in Pathian hrangah thiltha ka tuah asi tiah a cangvai tu pawl cun thei aw loin thilsual tumpi Pathian tumtah dodalin a rak tuah rero thei asi. Cuticun mi tampi cu an huatmi le an duh lomi hnakin milai tisa thinlung duhnak ruahnakih “thilttha” tiah kan ruah mi hi milai siatsuahtu, kan leitlun nunah Pathian tumtah dodaltu, a rak si sawn theu thei asi. Curuangah kawhhran sungah Pathian tumtah dodal ding khalah khawhhran leng ah a umtu, zumlotu pawl hnakin zumtu ti aw si biaknak lamah a zuam zettu pawl hi Pathian tumtah dodal dingin satan in palai tha an rak si sawn theu. Khrih dungthluntu hleihnih lakah satan palai pakhat a rak tel ve.

 

Satan hnatuan cu Pathian tumtah dodal asi. Satan in Evi le Adam a siatsuahnak hmanrua hi tuisan khalah a hmang ringring lai asi ti a fiang. Evi le Adam cu Satan in thlipi le harsatnak in a siatsuah lo, milai ruahnak ih “thilttha” kha Pathian ruatmi hnakin a thasawn vekin an thinlung sungah alangter tikah milai ruahnak in tluksiatnak, Pathian tumtah dodalnak a thlenpi. “Mihrek in lamzin dik tiih an ruahmi a netnakah thihnak ih mi hruaitu lamzin a um” tiah Thufim 14:12 ah ngan vekin milai ruahnak ih thilttha pawl hi voi tampi thihnak thlenpi tu, Pathian tumtah dodaltu an rak si theu. “Thinlung cu ziang hmuahhmuah hnakin bumhmang bik asiih damter theih asi nawn lo. Zoso a thei thei ding?” (Jer. 17:9) ti ah sim asivekin Pathian tumtah dodal dingin milai bumtu cu milai thinlung lala asi theu.Cutin milai tisa thinlung, milai ruahnak ah a hngat aw tu pawl cu thei aw loin Pathian tumtah dodalin satan palai an rak tuan rero theu asi. Aw, ttih a va nung so!

 

4)      Thlarau Thianghlim dodal:

Santhar khrihfa pawl lakah Thlarau thianghlim hnatuannak ngaihthah ruangah kawhhran sungah voi tampi satan in ke a thlak theu nak asi ti a zum um. Zumtu pawl lakah Thlarau Thianghlim dodal dingin Satan hmanrua cu milai tisa thinlung duhnak thotho asi. “Tisa thinlung in a uk mi pawl cu Pathian duhnak theihtheihnak an nei lo” ti asivekin kawhhran sungah tisa duhnak in a ukmi pawl kan cangvai tikah Pathian Thlarau hnatuannak cu dodal, kalhki, thangsiat asi ih Thlarau Thianghlim cu ti riahsiat asi theu. Asinan thlarau lam mitcaw pawl lakah Thlarau Thianghlim thu sim cu umze nei lo asi fawn. A awlsam bik mi cu tisa duhnak in a ukmi, leitlun biaknak in a ukmi, mai hmakhua sialnak, iksiknak, ikfiknak, dodal awknak, huatnak, kalhki awknak, zuar thlai awknak, thangsiat awknak, tvp, tisa mizia ihsin a suak mi nuntu ziaza thawn cangvaihnak ah Thlarau Thianghlim a tel lo, a cangvai dah lo. Cutin tisa thinlung khawruahnak in a ukmi zokhal satan palai ka tuah rero asi ti theih awk a tha. Pathian Thlarau Thianghlim cu ziangtin milai nunah a cangvai thei ti ah Bible sungah dinhmun zapi milai zapi te hrangah ngan theh cawk asi lo. Sihman sehla a fiang zetmi cu Thlarau Thianghlim cu Bible, Pathian thu dokalh in a cangvai dah loih Khrih hmin sunloih in a vangvai sawn asi. Thlarau ah mithi, nunnak nei loih Khrih ah nunnak thar a pek , a hringthar ih thinlungthar ruahnak thar a pek, cuticun zumtu cun Pathian huatmi sual cu a hua ih Pathian duhmi cu duhmi nun thianhlimnak le Khrih ah Pathian fahniang pawl cu a duhdawt asi.

 

 

5)      Thuphan tipungtu:

Sual tipungtu a tlunah ngan zo asi na’n maltakte, thuphan tipungtu umzia sim hrih ushi. “Nannih cu nan pa Satan ih fa nan si; nan pa ih duhnak nan thlun duh ve a si. A hramthok ihsin anih cu mithat a si ih thutak lam ahcun a ṭang dah lo, ziangah tile anih cu a sungah thutak a um lo. Anih in thuphan a per tikah amah ih si daan a thlun vemi a si, ziangah tile anih cu thuphan pertu a si ih thuphan hmuahhmuah ih pa a si” (John 8:44) ti in sim asivekin thuphan tipungtu pawl ih pa cu Satan asi. Cuticun an pa ih lalram leitlunah an pa ih palai an tuan rero mi asisawn. Thuphan na per rero asile puhmawh ding na nei lo, “thuphan hmuahhmuah ih pa cu satan asi” ti ngan asi. Zo na pa asi ti na thei ko ding. Cuvek thotho in na kiangkap ah mi pakhatkhat in thuphan a per rero na hmuh tikah a pa zo asipei tiah ruah har ding a um lo asi.

 

Pathian ih duhdawt zangfah lainatnak cu hmangsual in satan palai tuan hlah uhsi.

 

 

6)      Biaknak lem tipungtu:

Pathian Thlarau tel lo biaknak cu biaknak lem asi. Pathian Thlarau tel loin biaknak lamah phurzet, pe aw zet, thihngam ko ttan a theih ih mi tampi an ttang rero. Nupi pasal nei loin, mah bulpak thilri neihmi nei loin, leitlun langhngan sual, nunphung sual pawl hrial tahratin sakhua mi, biaknak lam pumpe aw  aw tampi an um. Bawi Zesu san lai ih Farasi le danthiam pawl kha cuvek biaknak ngaihsak zet le pumpe aw zet an rak si. Leitlun thuanthu zoh asile Pathian a umlo, titu hnakin Pathian a um ko ti cingin zumnak dik lo, biaknak diklo lamah pum a pe aw tu an tam sawn ringring.

 

Tulai sanah “Na piangthar maw?” tihi thusutnak tulai milai pawl tonghman hmanmi si milai sinak thawn a mil aw nawn lo (It becomes irrelevant question a mong contemporary Christians). Cumi hnakin Pathian thu vekin na nung maw? Zo ih palai na si, zo ih thu in na nung? timi sawn hi milai sinak taktak lailangtu thusuhnak asisawn. Mi tampi in nundan a thupi lo, biakdan, doctrine a thupi an ti. Biaknak thi cun zumnak nung a hringsuak thei loih “tuahnak tel lo zumnak cu zumnak thi asi” tiah Bible in a ngan fawn.

 

Laimi lak khalah Thlarau Thianghlim kaihhruai lomi, biaknak lem, silole tisa mi biaknak lam hruaitu, zumtu ti aw pawl tampi ruangah buainak, tthentheknak tampi a suak ti sehla a dik zet ding. Awlsam zetin Bible vekin ziangvek pawl hi biaknak lem, asilole, tisa mi zumtu pawl an si ti sim thei nak cu hitin asi, biaknak lamah zuam deuhdeuh vekin lang siin sual tipungtu, huatnak tipungtu, thangsiatnak awknak dodal awknak tipungtu, sualnak a karhzai ter tu pawl cu biaknak lem asilole tisa mi zumtu pawl an si. Kawhhran sungah satan palai tuan rero tu pawl an si. Pastor, kawhhran upa, nubu, mino, kawhhran member piangthar aw ter zet tla an si thei. Huat awknak, thenthek awknak, dodal awknak a suahter tu hi Pathian asi dah lo, cuvek thiamthiam in thilsual tuah dingin lungrualnak a suahter tu khal Pathian asi dah lo. Midang dodal, relsiat, thangsiat, dingin a biktakin Pathian fate pawl siatnak tuah dingin Pathian Thlarau a cangvai dah lo. Zumtu pawl kan tluksiat ih zumnak lamzin an pialsan hmanah satan kutthlak ding Pathian in siannak a pektikah kan parah harsatnak a thlennak asi sawn theu.

 

Bible sung vekin kan hmuh thei mi cu Pathian Thlarau in thutak a theihter mi, Pathian thawn a tawng aw tu pawl thinlung sungah midang sualnak le mawhnak hnakin Pathian thianhlimzia an hmuh tikah anmai sunglam ih sual le sualnak tumpi kha an hmu fiang aw sawn asi. Cutin an hmuhsuak awk tikah, thimnakah, Isaiah cun “Aw, hmur thianghlim lo ka si ih hmur thianghlim lo pawl lakah ka um”, Paul in “Misual lakah misual khawnbawl ka si. …Hi a thi mi taksa ihsin zo in irunsuak thei ding”, Peter in “Bawipa, misual ka si itlansan aw,” tvp, in anmai sualnak an hmuh fiang tikah an tap ih Pathian hmaiah tang an dawr sawn. Biaknak ah zuam sinsin na cingin mai sualnak hnakin midang mawhnak simcak zet pawl khi “Mai mitsung ih buhtlei hmu thei loin midang mithnawm cawihisak tumtu” pawl an si theu.

 

Pathian Thlarau cun milai sunglam cu a sun eng tikah milai in amai sualnak a hmuh fiang tikah mahte bawm aw thei lo asi ti a thei fiang aw ih lung kekkhuai in Pathian hnenah tangdor in a kun. Cuticun amah vekin sualnak nei tu pawl cu nautat le hmuhsualnak hnakin a comi Pathian zangfah lainatnak co ve hai dingin lainatnak in a thinlung a luahkhat sawn asi. Cuticun a sung ihsin Pa Pathian ih duhdawtnak cu a luangsuak sawn asi. Sihman sehla sakhua biaknak lem cun thlarau porh awknak a hring suak ih midang nautatnak a suak ter ti Farasi le siahkhawntu biak inn sung thlacamnak in in zirh.

 

7)      Pathian thawn hlat tertu:

Satan hnatuan cu milai pawl hi Pathian thawn tthen aw, hlat awk ter asi. Na nitin nunah na tuah mi le tongkam pawlin na kiangkap milai pawl nunah Pathian thawn a naiter maw, a hlat awkter ti hi fimkhur ten mai nun cek fel ringring a tha. Cuvek thotho in na kiangkap um pawl kha fimkhur ten Pathian thawn a lo naiter tu maw, a lo hlatter tu an si ti na zoh ringring ih na thleidan thiam a tul. Voi tampi mi tampi in midang lungawinak kan tuah tikah kanmah thawn nai aw sinsin, duh aw sinsin ding, kan lamtang, anlam tangin kan tuah lai ah Pathian thawn hlat awk ter sinsin tertu ah kan cang theu. Kanmah thawn kan duhdawt zet lai ah Pathian fate pakhatkhat kan hua ter sinsin asile Pathian thawn kan hlat awkter sinsin tinak asi. Cucu satan palai pawl hnatuan dan asi. Kanmah thawn kan duhdaw aw zet tla le midang kan hua ter asile satan palai thotho kan si. Kanmah hrangah kan duhzawng kan tuahter, an duhzawng kan tuah tla le Pathian in a duhdawtih A Fapa thisen in  a lei mi, khrihfa pawl kan hua ter asile satan palai thotho kan si.

 

Cuvek thotho in kan duhdawt mi pawl hnenah an (tisa) lungawinak kan tuahsak ih kanmah thawn pehtlaih awknak tha te kan tuah, kan duhdaw aw sinsin na cingin khatlamah an thlarau nun cauter tu, Pathian thawn a hlat aw ter tla asi riangri thei. Milian pa in tlangval note pakhat cu a duhdawt ih a tul mi hnakih tam sumpai a pek tikah sualnak ah a hmang rero asile sualnak ah a hruai rero vek asi. Kan duhdawtmi le induhdawttu ih sualnak cu kan lungawipi ih kan hupphensak tikah sual tuah sunzawm dingin kan bawm rero vek khi asi. Cutin kan neih mi, theihmi, simmi, pehtlaih mi, tuahnak le ttuannak pawl hin midang nunah ziangvek a rahsuakter timi zoh tikah a rahsuak mi cu satan duhzawng asile satan palai kan rak tuan rero ih Pathian tumtah famkim tertu asile Pathian palai kan sinak a langter asi. Kanmah thawn a pehtlai mi pawl parah kan tuahnak, ttuannak, pehtlaihnak, tongkam, le neihmi theih mi pawl hmangin Khrih hmuihmel bang sinsin tertu kan sile Pathian palai kan si ih satan hmuihmel bang ter sinsin tu kan sile satan palai kan si ti mahte theih awk a tha.

 

8)      Miphun siatsuahtu

Leitlun milai thuanthu kan zoh tikah Pathian thutak in a nungtu miphun pawl cu Pathian in a cawisang. “Dingnak in miphun a cawisang” ti ah Bible sungah ngan vekin Pathian thutak cun milai lungput, thu pomdan, vengsung pehtlaih awkdan, thuthendan, milai pehtlaih awknak, le nuntu ziaza a tuah tha ih ziangkim thuthluknak, mi pakhat, insang, khawsung, mibur, le kumpi thuthluknak pawl kha dingfelnak Bible thurampi, Pathian thu in milai nuntu khawsakdan nun thuthlung a zirh vekin milai thuanthu a tuahtha asi. Israel pawlin Pathian thu an ngai lo tikah salah an tang, harsatnak a phunphun, mualphonak an tawng theu.

 

Chin miphun thuanthu le kiangkap kan zoh khal asile Pathian thu in ziangtluk kan miphun incawisang ti cu zep rual lo asi. Pathian thu, biaknak nung cun miphun sinak tong, calai, thuanthu, nunphung, nuntu, milai pehtlaih nak, kumpi thuthluknak, tvp, vengsung milai pehtlaihnak, nuntu, khawsak, pehtlaih awknak a tuahtha sawn asi. Cutin siloin, biaknak dik lo, biaknak lem, biaknak lam ih tluksiatnak cun miphun a ti mualpho ih ningzakza thuanthu thim lakah a thlenpi theu. Tthenttheknak, huat awknak, nuntu ziaza niam, bawrhhlawh nun, taksa thianghlim lo, thuphan le rukruk fifir, eiruk, milai canpual nekcepnak, dik lo nak pawl hi satan hmanrua sawn an si. Cuvek tipungtu milai pawl hi satan palai ti theih an si. Pathian fate tampi in theihnak le thu awi nun tlaksam ruangah voi tampi Pathian hmanrua ah cangin kan cangvai rual theu sawn asi. Miphun ka duhdawt ti si amah le amah hman thaten a fingkhawi aw lotu, hnattuan zuam lo nitin zuu thawn a ciah aw tu, Pathian pekmi miphun sinak bungrua pawl a siatsuahtu, kenkawh lo tu cu miphun siatsuahtu asi. Cuvek thotho in Pathian ka duhdawt tisi in a miphun a duhdawt lo ahcun a simmi a thei lo asi. Zumnak nung ka nei ti cingin a miphun a duhdawt lo ahcun thutak a sungah a nung lo tinak asi. Amit in a hmuh thei mi hman a duhdawt lo ahcun a hmuh thei lomi ka duhdawt ati mi cu thuphan asi. 

 

Pathian fate pawlin kan co mi Pathian pekmi thlawsuah, laksawng sunglawi pawl hi kanmah hrang lawngah asilo ih kan kiangkap um, kanmah hnakin a tlasam tu pawl hnenah Pathian zangfahnak kan mah sung ihsin luangsuak sawn ding, Pathian in amah le mah a phuansuah awk nak ding hrangah Pathian hmanrua sawn kan si. Cuvek thotho in santiluang lamhruaitu, leitlun eng vekin milai thuanthu cu Pathian duhzawng le tumtah vekin herliam ter tu, leitlun milai pawl nunah Pathian mizia langter tu, Pathian le milai karlakah rem awknak tuahtu, Pathian palai kan si. Cutin asilai ah satan tumtah cu miphun thenthek nak le rem awk lonak, huatawknak, thleidan awknak le diklo zetin duhbul huatbul thleidan awknak pawl tipung ding asi. Cuvek satan tumtah tuansuak singin satan mizia a phunsuah awknak milai pawl cu satan palai an si ih Pathian tumtah tuansuak dingin Pathian mizia a phunsuah awknak milai pawl cu Pathian palai an si. Nang zo ih palai na si?

 

 

 

9)      Mawhsiattu:

Pathian in kan ngaihdan, pomdan, hmuhdan, ruahdan, duhdan pawl hi a ngai poimawh lozia kan theihfiang hlan cu midang le dinhmun parah kan ruahdan le pomdan, midang tlaksamnak le mawhnak pawl rel kan paih zet theu. Pathian thianhlimzia le Pathian hmaiah kanmai milai pianpi mizia sual bawrhhlawh zia kan hmuh suak awk hlan cu midang mawhsiatnak tlamtlin lonak kan rel le sim tikah anmah hnakin thacuang vekin tla kan rak thei aw theu. Satan ih hmin hi leitong in “mawhsiattu” ti khalin leh theih asi. Leitlun milai zapi ten kan sual theh ruangah Pathian sunlawinak kan co ban lo tiah Bible in in sim. Curuangah mi zokhalin Pathian hmaiah Pathian dan vekin mawhsiatmi kan si. Pathian mizia, lungput le duhdan le milai mizia, lungput le duddan, le nuam timi pawl cu kalh aw asi. Sikhal sehla, kannih zumtu pawl cu midang mawhsiattu kan si lo. Kan lungawiter tu dingah Pathian in milai pakhat hman tuanvo a pek lo asi ti kan fiang hlan cu kan duhnak a kim lo tikah, kan lung a awi lo tikah, dinhmun pakhatkhat, lole mi pakhatkhat kan mawhsiat theu. Cutin Pathian dan in a mawhsiat zomi, sankhuk hellram sungah a tla dingmi, Pathian zangfah lainatnak in Khrih thisen in tlen zo mi le kumkhua nunnak sungah hmin ngan zomi hrangah lungawi lonak ding san ziang hman a um lo ti thei fiang hrih lo pawl cun an duhzawng a famkim lo tikah midang an mawhsiat theu. Pathian fate thlarau nun pitling neitu pawl cun Pathian hman in a duhdawt thei mi cu duhdawt thei theh ding asi.

 

Cutin siloin, thiltha duhsak zet vekin Pathian fate pawl, a bur siseh ama siseh, mawhsiat rero tu pawl hi satan palai an rak si theu. Pathian in a ngaidam zomi dunglam thuanthu zoh mawi lo ruangah siseh nitin nun famkim lonak ruangah siseh Pathian fate pawl thangsiat relsiat, zuar thlai in hmuhsual awknak, rin hlelhnak, zum awk lonak, huat awknak, ral awknak, phunzainak, tthenthek nak, thleidan awknak tipungtu mawhsiat awknak, tlamtlin lonak bawm awk hnakin mualphoh awknak pawl hi satan hmanrua ttha satan palai pawl hman mi asi. Hivek hmanrua pawl thawn “thilttha” tiah milai tisa thinlung in a ruahmi tuah rero tu cu satan palai asi ti a theih awk a ttha.

 

 

Mi zocio khalin mah pakhat nun, insang, kiangkap, pawlkom le vengsungah a ciahneh mi parah le a pehtlaih mi parah ziangveh nunrah a nei ti zoh aw aw in nitin leitlun nun cu zo ih palai ka si ti fimkhur ten cek aw fel ringring sehla leitlun khualtlawnnak ni a tlak tikah ruah lopi in Khrih palai ka si hmang tiah a ruah awk laiah satan palai rak siziar in satan le ho pawl sankhuk hmun lam pan pang lo dingin kumkhua nunnak innpi sung lut cio dingin timtuah cio uhsi!

 

Khrih palai pawl nunrah thu Pathian remti asile kan ngan zunzawm leh ding!