A Tthianghlimmi Political Campaign

July 24, 2010

 

Kawlram pumhuap ram hruaitu hril awknak ni le can a nai cuahco, a um ding taktak in ruat sehla, ruangah zumtu mi tampi in ziangtin ziangvekin ziangtikah ziangvek hmanrua thawn hril awknak ah a zuam aw tu pawlin campaign an tuah ding timi cu kan hngak cio ding ruangah thinlung khawruah bawmtu dingah ziangvek political campaign hi a thianghlim ih Khrihfa pawl pom thei cin, Biblical principles sungih cangvaihnak asi timi tawite zoh hnik usi.

 

Bible in (Rom. 13:11) “Ram uktu bawi pawl kha an thu ngai uh; ziangah tile Pathian ih lungkimnak loin zohman thuneitu an um thei lo; cule atuih thuneitu pawl hi Pathian ih retmi an si” ati. Curuangah zozo an tling khal asile Khrihfa pawlin an thu kan ngai a tul ding ruangah zomi hi Pathian hriakthih, tuanvo pekmi hruaitu asi ti fiangzetin theithei dingin zumtu pawlin thlacamnak thawn thungai thlak zetin ruat, hliakhlai, an thu hla zir, an cangvaihdan zoh, an hmanrua pawl fiah, an tumtah le timlam awknak, nunthuthlung thuken, thurin, pawl hliakhlai in le a tulcan le tulnak hmunah bawm ding khal mipi in tuanvo tumpi kan nei. Curualrual in mipi senpi vangtlang in ram le miphun hrangah a thupi bik rah ret dingmi le mipi lungawi siatsuahtu tipungtu pawl fiang sinsin dingin hril awknak ah a zuam aw tu pawl siseh vote thla tu pawl hnenah siseh tlangaupi le theihter ding tuanvo kan nei asi.

 

Hril awknakah a zuamtu pohpoh in an tumtah cu hrilmi si ding asi vekin an neihmi, theihmi, ti theimi, hmanrua bungrua phunphun hmangin campaign an tuah ding cu anmai tuanvo asi. Campaign tuah tikah khrihfa zumtu kan sivekin a thianghlim lomi, a bawrhhlawh mi ram le mipun thuanthu siatsuahtu hmanrua hmang lo ding hi zovek zumtu pawl khalin ziangvek dinhmun khalah ziangvek sinak le hlawknak thiltha duh ruangah khalah hmang ding asilo zia mipi le campaing tuah tu khalin fimkhur ten thinlungah ret cia a tha. A hnuailamah malte mipi le campaign tuah tu pawlin hrial dingmi le duh ding zuam awk dingmi tiah ka ruah mi pawl ka ngan.

 

Hman dingmi:

 

Santhar pehtlaihnak bungrua:

America ram President hril awknak thuanthu zohsal asile 2008 hril awknak ah a ngahtu, President Obama hi tufangih kan neih mi santhar pehtlaihnak bungrua (modern technology) hmang tangkai hmaisa bik tu asi kan ti theinak a um; thimnakah, mobile phone, (blackberry) text message, email, facebook, tvp, social network phunphun hmangin campaign a rak tuah tikah nitin nahzi kar tin khui tawkah ziang a tuah, ziangtin an cangvai, ziangtuah a ttul, mipi lakah khuitawk in zo pawlin ziangtin an cangvai, tvp, hmakhat te ah amah le lamtang pawl thu a than thei ringring tikah tampi a tthathnmepi. Laitlangah duhvekin santhar bungrua thatha kan nei thei lo nan kan neihzat hi mipi thinlung tidanglam thei ding khawp pehtlaih nakah kan hman mi tete a um. Tlangcabawm (groupmail) tivek pawl hi ramsung khawte pawlin an hmang thei hrih lo nan leitlun ramtinah a hmangtu pawlin anmah le khua le ram naivai cio thu hla an thaan awk ringring thei tikah ziangmawcin cu hmual a nei thei thotho. Hmanthiam a thupi zet ding.

 

Ramsungah vote thlatu pawl lawng si loin leitlun hmuntin kiltinah a thleng mi pawl khalin ramsung dinhmun thu hla tamsinsin nitin thuanthu nung theih asile ram le miphun thu hla in ramtin kiltinih a ummi kan milesa pawl thinlung sungah hmun kau sinsin khua a luah dingih miphun ngainatnak le ram tuahthat duhnak thinlung a neihter, thansohter thei. Curuangah santhar pehtlaihnak bungrua kan neih mi pawl hi thusia karhzai ternak, ramtin kiltinih a ummi kan mipi pawl ram le miphun thu ah an thinlung beidawng tertu si lo dingin a hmangtu zocio khalin tuanvo kan nei asi.

 

Mihrekkhat in leitlun hmuntin kiltinah a thlengmi kan miphun pawl hi an hloral theh ding, lairam hrangah sunnak lellel asi tiah an sim theu na’n tui hlanah a rak um dah lo mi santhar pehtlaihnak bungrua pawlin ramsung khawteberek tiangin kan milesa a pehtlai ter theh ruangah leitlun khawmual tinah a thleng mi kan miphun pawl kan hlo lo ding. Sihmanseh, mipi thinlungah thiltha tuah duhnak karhzai sinsin dingin siseh mipi thinlung beidawngin dung tawlh ter lo dingin santhar pehtlaihnak bungrua pawl hmangin thusia tenau khawte pakhat hmun pakhat thawn lawng a pehtlai mi, mai hmakhua sialnak ruangah midang siatnak le lungrual lonak pawl, thilcang mi a sinak hnakin leh tampi thupitter ciamco nak, thusia le zuar thlai awknak, rem awk lonak, tvp, mipi thinlung dungtawlh tertu, kekkuai tertu pawl hi santhar pehtlaih nak bungrua kan hman tikah kan fimkhur le hrial thiam a thupi ngaingai.

 

Cui hleiah, santhar pehtlaih nak bungrua tha neih ruangah kan ram hruaitu pawl khalin leitlun killi ah a um mi kan miphun duhdawttu pawl thawn khal pehtlai in senpi vangtlang thiltha tuahnak ah zuam tlang vivo thiam dingin hmanthiam khal a thupi ngaingai. Cutin hril awknak canttha sangka ong aw mi cu pehtlaih nak ttha sinsin dingin mipi lamzin hmuhtu ah kan hmang thei asi. Santhar bungrua tthattha pawl cu senpi vangtlang fimvarnak, theih kauhnak le pehtlaih nak ttha sinsin nei thei dingin le tthatnak suahpi tu ah hmang thiam dingin zir awknak hrangah canttha asi.

 

Senpi Vantlang Thu le Mimal thu thliarhran thiamnak (Public vs. Private issues)

Ramsung ukbet awknak ruangah biaknak lam thu siar lo, mipi thawn a pehpar mi thu tampi cu a thup a thli in ziangkim fehpi, rel, sim, than awk asi ringring. Curuangah thu tampi cu thudik le thuphan cawhpolh ruri in a dikmi fiah theih loin mipi hna sungah a lut. Thu ttha lo, siatnak, zuar thlai awknak mipi lungput siatsuahtu thu hla khal mipi hna sungah a lut tikah senpi vangtlang hmaiah ausuahpi um loin mipi lungsung pairal men asi tikah  harhdam lomi mipi lungput a suahphah. Ramsung kaihhruai awknak thu thawn pehpar hrimhrim in a tthatnak lam hnakin a selam hlir mipi hna sungah a lut tamtuk tikah Laimi tampi cu hotu le hruaitu huatnak lungput kan tthanpi phah tikah thleng theih nawn lo khawp in kan umnak kip tlun lam upa le mah hnakin fimsawn le hruaitu tha riangri dodal duhnak (rebelleous spirit) kan neih phah. Curuangah hril awknak sangka a ong aw mi ah zalen zetin senpi vangtlang thawn a pehpar mi thu pawl cu ausuah pi le tlangzarh theih asi ding tiah ruat sehla a ong awk zat in senpi vangtlang in cantha kan hman thiam a thupi zet.

 

Ram le miphun hruaitu ding mi pakhat ih thuanthu thawn pehpar in senpi mipi in ziangtluk tiang kan theih a tul, ziangvek mizia, thiamnak, thuanthu sia thuanthu tha pawl in hmailam thu a simcia thei, ziangvek kan hrial a tul ih ziangvek cin ngaidam theih asi, ziangvek milai pawlin ziangvekin miphun an hruai, mipuhn thuantuh tuahttha dingin santhuanthu in a phutmi hruaitu ttuanvo tuansuak thei dingin ziangvek pek awknak, fimnak thiamnak, tumruhnak pawl a tul, ramsung ramleng, Chin miphun le miphun dang thawn pehpar awknak, ramsung thansohnak, miphun nuntu khawsak, biaknak le milai pawlkom, vengsung le rampum huap in zovek in ziangvek canah ziangtin miphun a hruai tikah a thabik, a thianghlimmi, sersiam tu miphun Pathian lunghmui zawng asi ti timi kal senpi vangtlang le hril awknak ah a tel tu ding pawl zapi ten fimkhur zet in hliakhlai, ausuahpi, tlangzarh thei nak cantha khal asi. Thuanthu santiluang in sangka a onzatin senpi vangtlang le hruaitu pawlin cantha hmanthiam cuh thiam a thupi ngaingai fawn.

 

A tha zawngih campaign (Positive compaign):

Fimthiamnak lamah santhar fimnak thawn tuaithar mi mibur (civilized society) ngaingai kan si hrih lo khal le Pahtian nung betu ram le miphun kan sivekin ziangkim kan tuah mi cu “Pathian hmin sunlawinak asi ding” a thupi. Lal duhnak ruangah a thi-thi-thi-thi a nung-nung-nung-nung tiah thuphan le thungai cawhrawi tahratin, miphun sinak nunthlung le nun awlsam hlawknak zuam nun lenglawng cawhpolh tahratin, campaign tuah nak ih hmanmi hmanrua bungrua, tongkam pawl ruangah mipi thinlung ziangtluk tiang a tuah siat ding timi ruat setset loin kum reipi tiang mipi huat awknak, thenthek awknak, dodal awknak, rem awk lonak, siatsuah awknak, tvp, a tha lo lam rahsia a rah ding hrimhrim cu zo khalin lalnak thuneihnak duh ruangah an hmang lo thei a thupi zet ding. Lai khawte cathiam lo tete hnenah tongkam nal zetzet le thinlung fimvar zetin bum awknak pawlin a rahsuah dingmi cu tihnungza asi thei.

 

Curuangah, Pathian nung betu, zumtu miphun kan sinak cu hril awk canah nasa ten mipi le hril awknak ah a zuamtu pawl hniksak (test) kan si ding.  Pathian a hmin lawng sal ih mai duhmi tuahsuak nak ding hrangah satan hmanrua hmang ringring tu hruaitu hi kan ram le miphun in a tul mi asilo.

 

Asile, a thazawng campaign (positive campaign) cu ziangvek asi ding ti tawiten kan zoh hnik pei. Ram hruaitu hril tikah mipi in an hril dingmi cu ram mipi hrang thiltha tuahtu hruaitu an hril ding mi asi, “thilsual tuah mal bik hril awknak” asi lo ti kan fiang cio vekin campaign tuah tikah midang siatnak, zuar thlainak, huat awknak, thungai le thuphan cawhpolh in dunglam hngawngtan awknak, tvp, siatnak (social evils) karhzai tertu pawl hi ttihnung zet asi. Midang siatnak hmangin mai hmaiphiah a tumtu siseh, midang siatnak rel ciamco tahratin keimah ka tha deuh ti tu, midang siatnak le tlamtlin lonak cu hmanrua ah hmangin milai zah awknak le minung sinak upat awknak um lo khawpin namthlak awknak, mualphoh awknak, ttihtarh awknak, tvp pawl hi a sezawng campaing (negative campaign) asi, lehnu ah mipi nun ah rahsia a hring suak theu. Hivek lak ihsin hril ding a zuamtu le vote thlatu khal fimkhur thiam a thupi.

 

Cuhnakin mipi hril dingmi cu ram le miphun thiltha lamah hruaitu, miphun thuanthu tuahtha tu ding asi vekin hril dingmi cun ziangtluk kan ram le miphun a duhdawt, ziangtluk tiang ram le miphun hrangah a pek awk, ram le miphun thuanthu tuahtha dingin ziangvek fimnak hmuhnak theihnak tuah thei mi tumtah mi, timtuahnak, a nei ih cui a tumtah mi le mipi tul mi tuansuak dingin ziangtluk tiang a pek awk, tvp, mipi mitvang ter tu a dinpi mi thutha pawl thawn mipi thinlung hmai ah hruai ding asi sawn. Cutin amai hmuh mi le theih mi tummi tuansuak asilole ziangtluk tiang kan mipi in kan sun phah ding timi amah in a sim tul lo tlukin mipi thinlungah fiangter sawn ding asi. Mi pakhatkhatin midang siatnak ziangtluk a sim thiam ruangah amah kha kan ram le miphun hrangah rinsantlak mi asi nak a um lo. Cuhnakin Pathian pekmi national vision, ram le miphun thuanthu tuahtha dingin a liangparah a thum aw mi tuanvo ziangvek a thinlungin a phur in ziangtluk a pek awk timi pawl sawn kha senpi vangtlang hnenah ausuahpi asi tikah senpi vangtlang thinlungah fiangzetin an hmuh le theih hnu ah santhar thuanthunung tuahtha dingin Pathian hriakthih ram le miphun hruaitu ding cu an hril in an pom rem an dinpi sawn ding mi asi. Thatnak in nehtu hruaitu kan miphun in kan ttul asi.

 

 

Miphun Sunmang (National) vision tlangzarhnak:

 

Atufang Chin mi thuanthunung kan zoh asile a tlaksam mi thupi tuk (bik asilo hmanah) cu “miphun sunmang” “national vision” asi. Kan pu kan pa sal laiah mipa kum 18 tlun lam hmuahhmuah cu miphun ralkap an rak si. Mirang kut ihsin, 1948 Ramdinkhawm Kawlram uknak hnuai ah kan lut hnu ah Chin ram le miphun kilvennak tuanvo cu kawlpawl kutah up asi. Cutin humhimnak cu Kawl cozah kut sungah an lak tikah Chin mi  pawlin kan ram le miphun hrangah tuanvo ka nei ve asi ti hman thei nawn loin santhar minung pawl thinlungah “national vision” a hlo a ziam vivo. Cutin santhar minung pawl cu ram le miphun thuanthu tuahtha, kilhim dingin tuanvo ka nei asi ti ruahnak khal nei nawn loin santiluang in a fen hai tikah miphun sinak cu a hlo vivo. Ramdang thleng mi pawl sinsin cu Chin miphun sinak thinlung a hlo vivo. Laitlang suahsan zo, kawlram sung um pawl khal kawltongin tongin kawl thuam hruh in kawl hla an sak tikah kawl nunphung, lole miphung dang nunphung in an nungih Chin ram Chin mipun hrangah ziang tuanvo ka nei, ka suahsemnak miphun le ram hrangah isersiamtu Pathian in ziangvek tuanvo ipek timi an ruat thiam nawn lo. Cutin miphun sunmang nei loin a tthanglian mi pawl cu biaknak lamah zirhtu, siseh pursawm leilawnnak ah siseh fimthiamnak zir in siseh an nun khawsak tikah anmah le hnatuan nak kiangkap cio ah ziangvek cin miphun sinak hrangah tuanvo ka nei timi a hlo relrel. Miphun pakhat ih sinak cu taksa ruangpi asilo, sung muril minung sinak sawn asi. Kan thisen (DNA) thleng tahratin kan ruangpi Chin mi sinak cu kan thleng thei lo nan kan sungmuril miphun sinak taktak cu santiluang in a fen vivo ih Chin ram sungah a um lai mi pawl rori hmanin kan ram le miphun hrangah kan ram le miphun sersiamtu Pathian in tuanvo ipek mi a um asi, tuanvo ka nei ve asi timi ruahnak thinlung tumruhnak a hlo sinsin. Cuvek lungput tuanvo laknak a ummi hman senpi vangtlang hmaiah tlangzarh le ausuahpi, midang zirh sawngnak a um nawn lo.  

 

Cuvek dinhmunah kan din laiah a tu ih a thleng dingmi Kawlram ramkulh hril awknak can hi kan miphun in kan hman thiam asile thatnak tampi a rahsuak thei asi. Curualrualin a tlunlamahah sim zo vekin mah pakhat hmakhua sialnakah kan hmangih mai duh mi ngah nak asi ahcun ziangvek siatsuah nak khal poi ti loin cangvaih asile siatnak phurtu asi thei fawn. Curuangah, a tuih campaign tuah thei dingin sangka a ong aw mi hi kan mipi thinlungah miphun duhdawtnak, tuanvo neihmi fiang awknak, Pathian pek mi tuanvo, mai ram mai mipun, mah thawn a nai aw bikmi ram, leilung, tiletlang, minung pawl thawn a thianghlim le a thangso mi nuntu khawsak nei thei dingin le santhuanthu tuahtha dingin mi pakhat cio ih tuanvo an fiang awk ih an liangparah an phurh thiam nak ding hrangah tlangau suahpi nak cantha asi. Sum le pai lennak hnakin thinlung hnget khoh mi, kan pupa in an rak neih mi “dingfelnak”, santhar Khrihfa zumnak in in zirhmi mi pakat, mibur, vengsung, rampum, leitlun milai pehtlaih pawlkom awknak, kaihruai awknak le senpi vangthlang thuthennak ah dingfelnak, diknak, rualrannak, thatnak, Pathian sersiam ram, tiletlang, le miphun thuanthu tuahthatnak, mi pakhat, insang, veng, khua, mibur, rampum, uk awk thuthluknaknak ah rualrannak, kan miphun Pathian in inzirh mi a te bik ihsin a tumbik thuthluknak (decision) tuah tikah Bible zirhmi diknak dingfelnak rualrannak thuhram pawl dinpi asi theinak ding hrangah mi pakhat cio in ram le miphun, senpi vangtlang thuanthunung tuahtha dingin tuanvo kan neih cio mi mi zapi te in kan fiang le tuanvo liangparah kan suannak ding campaign tuahnak hrangah cantha hman thiam hram uhsi. Pathian nung betu miphun pakhat dinhmun in kan kiangkapah zumlotu pawl hnenah Pathian nung betu pawl nuntu, khawsak, thinlungput, thuthluknak, dingfelnak pawl hi tuahnak nunpi nak rori in kan phuansuak theinak ding, leitlun eng kan sinak cu kanmah miphun sung pawlkom nak ah le kan kiangkap miphun pawl hnenah kan en suah theinak ding cantha ah hmang thiam hram uhsi!

 

Cui hleiah kan Chin miphun thuanthu ah a um dah lomi, leitlun killi ah Chin miphun a tekdarh mi tla hmanrua ah hmang thiam in santhar santiluang thlisia doneh thei in miphun thuanthunung tuahtharnak hmanrua tha ah hmang thiam dingin miphun sunmang tlangzarh ausuahpi nak hrang hmang thiam cio hram uhsi. Kan ram le kan miphun cu thuanthunung santiluang in khuilam zinzawh in a feh in senpi vangtlang le mimal pakhat cio in ziangvek tuanvo liangparah kan suang cio ding, ziangvek in thiltha tuah thei kan si, tvp, miphun sunmang tlangau suahpi nak cantha asi.

 

 

Senpi Vangtlang tel venak (Civic engagement):

 

Mirang pawlin Chin ram an rak uk thawk ihsin ramthu senpi vangtlang thu rorelnak cu mirang kutah a um ih mirang pawlin an fial, tuanvo an pek mi mi uk kutah thuneihnak a rak um. Mi uk san lai ah khawtinah tlangsuak upa pawlin ro an rel ih senpi vangtlang, ram le miphun thuanthu zikthluak nei thei dingin khua an rak khang. 1949 ihsin uk awknak thleng tikah circle, uksuh, zatkuat, tvp in ram then sawng vivo asi ih uk awknak cu then vivo asi. Culai san tiang vengsung ramsung upa pawl hmun tamzet rorelnakah an rak tel. Ramkulhpi thu neihnak cu Chin mi pawl theihban lo tel ban lo ah lakhloh asi zo nan vengsung le khawkulh fangfang uk awknak cu mahte rorel a rak si. Cu lai san tiang khawtlang mipi le tlangsuak upa pawlin senpi vangtlang thansohnak an rak zuam in an rak tel ciar. Tlang hnatuan, siatni thatni bawmbawi awknak, ramkang lo dingin humhalhnak, tvp, anmah le khuaram cio an rak humhim. 1988 hnu lamah kawl ralkap uknak a thleng awk hnu ihsin khawte berek tiang Chin mi pawlih thuneih le roral theinak a mal sinsin. Mi pakhat cio senpi vangtlang thu, ram le miphun thu rel le tuan ve dingin sangka khar sinsin asi. Curuangah Chin ram le Chin miphun thuanthu cu Kawl ralkap kut ah a um. Ram le miphun tungding thei dingin cozah lawngin a tuah thei lo, senpi vangtlang mi pakhat cio in thuanthu tuahtha dingin liangparah tuanvo an lak cio lawnglawngah a cang thei mi asi. Cozah in inntin hmunsuak hmuanthlang an thlo fai thei lo, lihawng an hria thei lo, ek inn an kholhsak thei lo, hriselnak le fimthiamnak hrang khalah insang tinah an zirh thei lo. Ram thansoh nak ding hrangah a tamsawn cu senpi vangtlang anmah pakhat cio in ram le miphun thuanthu tuahtha dingin tuanvo an neih mi cio an tuansuah lawnglawngah a cang thei mi asi.

 

Cutin a tuvekin kan ram thuanthu a her aw rero laifangah kan ram hruaitu le upa pawl khalin cantha lak thiamin senpi vangtlang pakhat cio ram thuanthu tuahtha dingin tuanvo an neih mi theihter le tuanter ve dingin sangka on sak hrimhrim ding asi. Mi pakhat hril dingin Party pakhat hnakih tam an zuam aw aw asile pakhat lawngin a ngah ding cu a fiang. Sihman sehla hril awknakah a ngah lo tu pawl khalin thanau loten senpi vangtlang ziangmawzat ram le miphun thuanthu tuahtha dingin cangvaihnakah an telter ve ih senpi vangtlang hrang thiltha an sunmang cu an ausuahpi hrimhrim kha senpi vangtlang mipi thinlung tuaithar sal tu, an thinlung sungah thiltha tuah duhnak khua a luahther tu asi ih man nei zet asi ti ah ruat thiam a thupi zet. Chin miphun thuanthu tuahtha dingin Chin  miphun pawl hi Pathian in tuanvo a pek mi kan si. Miphun dangin an rak tuah hmanah anmai sal ah cang dingin, silole anmai hlawknak le thatnak tel loin an tuah dah lo ih an tuah dah fawn lo ding. Cun politicians, hruaitu mi malte pawl liangpar lawngah tthum asile ram le miphun thuanthu tuahthat ding hnatuan cu an tuansuak thei dah fawn lo ding. Curuangah senpi vangtlang telve nak, mi pakhat cio awmsung thu phawrhsuak nak le thuanthu liangpar suan thar salnak cantha ah hmang thiam cio uhsi. Kan pu kan pa pawlin an nunnak cawpcilh in an rak hum mi, thihngam in an rak humhim mi Chin ram cu santhar minung pawlin thihngam in an tlansan rero asi!

 

Kan Pupa Lungput tha, Khrihfa zumnak thurin thawn mil aw mi tuaithar salnak cantha (Restoring altruistive moral obligation):

 

Rirai a rak be mi kan pupa pawlin an umnak khua cio ah farah nauta an rak zoh, an rak cawm, an rak bawm. Rawl ei ding nei lo kutdawh, rawlkhawng in zohman an vaktawi ter lo. Inn nei lo inn an rak saksak. Lo thlo thei lo lo an thlawh sak. Sakap an um tikah farah nauta nuhmei sakap thei lo tla sa an rak hleh. Sakap lole sa lei nak nei lo in tla sa an ei ngah ringring. Loram an rak then aw aw ih ram kangse lo dingin meilam an sial, tikhur an lai ih tlanghrang lamzin an sial. Cu hmuahhmuah tuansuak dingin miphun thuanthu tuahtha dingin, senpi vangtlang lungawi zawng le thansohnak ding hrangah anmah le can le dinhmun ih tlin tawkin an rak cangvai. Bible in a zirhmi sengpi vangtlang pehtlaih awkdan, kaihhruai awkdan, Israel miphun pawlin vengsung an rak tundin awk dan thawn tampi a mil aw zet. Ral le siatsuah tu cu senpi vangtlang in mai nunnak thap rori khalin an rak do, senpi vangtlang lungawinak le hlawknak thatnak an rak humhim, thuanthu thazet an rak ngan ta.

 

Santhar sanah cuhnakin tha sinsin mi Pathian zangfahnak lainatnak cu Chin miphun hnenah a thleng. Curualrual in san thuanthu in leitlun khawmual tin pehzawmnak sangka in onsak tikah fimnak phunphun, pursum leilawnnak phunphun, sangka a ong awk tikah ramsung mi khal leitlun kiltinah kan vak kan tawi, zirnak fimthiamnak ah tampi kan tthansoh rualrual in a selam tampi a um ve. Santhar sanah milian pawlin khua-hlan pupa sakap le neinung pawlin farah nauta khawpi te an rak zoh le bawmbawi tlukin an bawmbawi nawn lo. Milian le farah thleidan awknak a nasa sinsin. Santhar thlarau lam hruaitu pawlin kan pupa pawlin khawsung nuhmei farah naute an rak zoh bawmbawi tluk in le senpi vangtlang thansohnak, hmasawnnak hrangah an rak tuah mi zoh tikah santhar minung pawl dung kan tawlh sinsin. Kan pu kan pa pawlin rirai biaknak thawn an rak nung nan senpi vangtlang pawl cu ten um za nun mawi lo thlawrthlau le zuva nak pawl cu an rak do. Uire, rukru, thuphan per, langhngan sualnak tuah lo dingin mipi thinlung an rak khawr, kaihrem. A ling alet in Bible Cathianghlim kenkawhtu, santhar zumtu ti aw pawlin kan senpi vangtlang langhngan nun cu Bible thawn a kalh aw mi a tam tuk zo. Cucu Bible in a zirh mi thawn a kalh aw mi thuanthu santiluang in sual timsungah kan miphun thuanthu a fen rero mi asi. Cu pawl cu Kawlram uktu ralkap pawlin an ngai pawimawh mi asilo.

 

 Kan zumnak thurin lamzin hmuhtu Bible in in zirh mi cu kanmah thawn a nai aw bik, kan miphun pi, kan ram tiletlang pawl kilkhawi tha dingin tuanvo kan neihzia khal in simih kan kiangkap ah kan mah hnakin canpual a niam le tlasam tu pawl hrangah Pathian duhdawt zangfahnak a luansuaknak ding Pathian palai kan si dingmi khal in zirh. Lai khawhlum pawlin khuahlan pupa lungput tha mi tampi an kenkawh lai ding a zum um. Santhar munung pawl, zumnak lam kekar tu pawlin kanmah le kiangkap umnak hmun kua le ram cio ah kan biak mi Pathian ih duhdawt zangfahnak le a thatnak a luansuak nak ding hmanrua tha kan si cio ding a thupi. Kan pupa rirai biak lai ih senpi vangtlang an rak zoh awk dan le kilkhawi awknak cu Pathian hnenah sunloih nak pek siloin milai thinlungin mai miphun le ram le tiletlang hrang pek awknak a rak si. Sihman sehla santhar minung, a nung Pathian betu le riantu pawlin kan dinhmun kan umnak khua le ram cio ah kanmah thawn a nai aw bik mi kan insang, unau sungkhat, khawpi, vengpi, ram le miphun laicin senpi pawl hnenah kan Pathian a phuansuah awknak hmanrua tha si dingin Bible in  in zirh mi duhdawtnak, mi zangfah thiam nak le thatnak tvp, a tak in nunrahsuak thei dingin khrihfa kan sinak 100 a kim zovekin kan miphun thuanthu ah a tak cang suak ding hi a cu tuk zo asi.

 

A tu ih hril awknak tikcu can laifangah himi thu ngan duhnak san bik cu kan san thuanthu a thleng aw, santhuanthu herliam lai fangah a thi zo mi, duhnungza kan pupa lungput hnakih tha sawn in santhar minung pawlin Khrihfa zumnak lamhmuhtu Bible in in zirh vekin nunsuah pi cio dingin ausuahpi le tlangzarh nak cantha ah hmang cio uhsi ti duhnak asi.

 

 

HRIAL DINGMI:

Campaign tuah tikah hrial dingmi tawite ka bet duh mi a um; miphun thuanthu siatsuah thei tu, huat awknak tipungtu, thatlonak, thenthek awknak, hnam-nget vekin ttihnung zet thiltha lo (social evils) pawl tipungtu si lo dingin fimkhur a tul. Cupawl lakah hmanrua ah mi tampi in an hman theu mi, anmai hrangah thatnak a suahpi ding hmang tiah an ruat ih a taktak ah a neta ah a rahsuak sal mi cu an duh lo zet mi thuanthu in a hrinsuak theu mi cu pawl cu, hrin-hnam huat awknak-thuanthu tha lo porhsuak tahratin hrin le hnam thlei dan awknak, huat awknak, do awknak pawl, kawhhran zumnak thurin pawl siseh biaknak lam ih thupom bang awk lonak pawl hmang tahratin zuar thlai awknak,thuphan puh awknak, mimal le insang thuanthu duhnung lo, hrial theih lo siatnak tawn mi pawl nautat awknak, milai le milai upat awknak um lo, minung sinak namthlak awknak, nautat awknak, ningzakza mualpho ko tuah awknak, tvp, a tha lo zet, nunniam lungput niam cangvaihdan, kum reipi tiang rahsia hring suaktu, vengsung pawlkomnak siatsuah thei tu, huat awknak thlaici mipi le mibur thinlung sungah a tuhtu, miphun sunmang (national vision) siatsuah tahratin hlawknak duh ruangah miphun dang thlemnak hmanrua bungrua pawl hmangin thlem awknak tvp, ningzah thlak miphun thuanthu tuahsiat tu cangvaihnak pawl hi mi zocio khalin an duhmi an ausuahpi tikah hrial le fimkhur thiam ding a thupi ngaingai asi. Cuvek thotho in senpi vangtlang khalin thilthalo le miphun thuanthu tuahsiat tu ding cu raaltha zetin au le do ngam khal a thupi ve zet asi.

 

Ram le miphun thuanthu tuahtha dingin, Sersiamtu Pathian lunghmui zawngin ram le miphun thuanthu tuahthat, san thuanthu herliam ter thei dingin hruaitu le mi pakhat cio siseh mibur le senpi vangtlang siseh kan thupi theh asi. Mi zocio khalin anmah le tuanvo santhuanthu in an liangparah a tthum mi an ttuansuak cio asi ahcun midang in kan miphun parah an tuahsiat thei mi ttihphan ding a um lo. Kanmah in kan hril mi vekin thaisunah kan thuanthu in a ttha le a sia a hring suak ding asi. Tuisunah kan tuh mi ci vekin thaisunah a rah kan at ding.

 

 

Ziang ka si kan timi hnakin kan nun in midang parah a rahsuah ter mi zoh tikah kan sinak taktak a lang asi. Duhdawtnak, thansoh nak, tthatnak tipungtu si dingin, san thuanthu dungtawlh ter tu si loin hmailam kekar ter tu sawn si dingin, kan dunglam tanta mi san minung hnakin tuisan milai pawlin thiltha sawn le thianghlim sawn, duhnung sawn Pathian cawimawitu, miphun cawisangtu rahtha rahsuak thei dingin san thuanthu in sangka in onsak mi pohpoh ah canttha cuh in santhar minung pawl kut kai in hmai nawr cio uhsi tiah tipi raal ihsin awmsung anka ramtin kiltin ah a tekdarh mi laicin  senpi te nan hnenah vairang catial thawn ka rak ngan asi. Chin miphun thuantu tuahtha dingin Patian in Chin miphun pawl ttuanvo a pek ih Chin miphun lungawinak tipungtu dingah Chin miphun hennah a ttulmi ziangkim a tulzatin a tulnak hmunah sersiamtu Pathian in in pek asi. Leitlun kiltinah ttuanvo phunphun le dinhmun phunphunah kan thlen kan din cio vekin harsatnak phunphun lakah ramsung hlum nulepa ulenau laicin senpi te pawl hmalak nakah thinlung takin thlacamnak thawn kan miphun Pathian hnenah thlaza camin ding tlang uhsi. Kan miphun thuanthu a tuahsiattu hnakin kan miphun a tungding tu kan sungah Thlarau in hna a ttuantu kan Cung Pathian cu a cawk sawn asi.