Zumtu pacangttha le tuarnak:

 

Voikhat cu thusimtu in hitin a sim:

 

Pastor pa pakhat cu a fapa kum note in a thihsan. Cutikah pastor pa cun, “Bawipa, ka damsung nangmah ka lo rian rero ih a har le a sur lakah mithli tla cingin dungsip loten ka lo riannakah, ka thinlung cu hmasi hlir in a khat,  leitlun ah satan ral ka do ih nangmah ka lo rian. Ziangah saw ka fapa cu na thihter, ka fapa a thih lai ah khui ah so na rak um, ziangah saw itlan san,” tiah thla a cam ih a tap ruangro. Cule, Pathian in, ‘Na fapa a thih lai ah khan ka fapa a thih lai ih ‘Ka Pathian ka Pathian, ziangah saw itlan san’ tiah ttap ruangro in a taksa khross parah a thih cuarco lai ih ka umnak hmunah ka um asi,’ ti ah Pathian in a sang ati.

 

Mi zohman a rian mi a bawipa (master) hnakin a tum sawn dah lo. Mirang tongin “no cross no crown” (Kross um loin sunlawihnak lukhum a um dah lo) an ti. Leitlun milai pawl cun zumtu pacangtha tiah kan ruah theu mi cu sumpai lennak, hminthannak, kawhhran member tam pipi, thil mak tampi tuah theinak, tvp, tla asi thei men. Cupawl cu mihrekkhat hrangah rawngbawlnak hmanrua ah pek an si ahcun cucu sunlawih tlak le upat ding asi. Khatlamah leitlun zumtu paraltha, satan in a huat bikmi, a do bikmi pawl hi voi tampi cu tuarnak in cuaithlai an si theu. Curuangah Paul in Khrih ruangah tuar tlak ah ruat kan si ahcun lungawi sawn ding kan si ti ah a simnak asi.

 

Khrih in a rak tawn mi pawl tampi cu Paul in a tuar ve:

Taksa hrem nak, taksa in natnak phunphun, thinlung kekkuai le retheihnak, thuphan puh nak, misual ah puhnak, mi huatnak, zuar thlainak, mai miphun pi pawl ih dodalnak, dan loin cozah le thurel tu pawlih ti duhdahnak, nautat hmuhsuam le cilphuinak, duhdawt zetmi pawlih khak/huat tuarnak, duhsak zetmi pawlih dungtun le huatnak, duhdawt zetmi pawl thawn tthentthek nak, tvp, pawl hi leitlun ah Khrih le a dungthluntu pawl nun thuanthu ahcun hmuh ding a um ringring. Khrih kaithluntu pawl nun hi zoh asile an sunglam hi hmuh theih sisehla an thinlung cu hmasi (scars) thawn a khat theh mi an si theu.

 

Bible hi kan siar tikah tohkham ah nuam le rem zetin kan siar theu nan, thuanthu a rak can taktak lai ahcun Pathian zumtu pawlin an nunnak cawpcilh in an rak tawn le ngan mi an rak si. Thisen, mitthli hacangrialnak, tahnak, ninghannak, awm cum rero in aukio nak, ningzah mualphonak, nautatnak, tvp thuanthu lak ihsin milai nunnak rori in kan Bible hi thisen le mitthli thawn rak ngan suah mi asi.

 

Moses cabu panga (Semtirnak ihsin Danpeksalnak) tianghi Moses le Israel mi tampi nunnak thap in rak ngan mi asi. Moses in Egypt siangpahrang insang ih dinhmun sangpi tlansan in, Israel miphun pawl milion tel nelrawn ah nunnak thap in, Abraham in a fapa thawinak pek ding tiangin, le relcawk lo hacang rialnak milai thuanthu thawn rak ngan mi asi. Job Cabu hi Job insang in siatnak pittawp tawngin hacang rial, awm cum aw rero in mualpho nak sangbik pawl tawngin rak ngan mi asi. Sam cabu siar asile thinlung kekkuai le sungmuril kekzam seksek ko, milai nun rial neknek tu milai nunnak le mithli thawn rak ngan mi asi. Thuthlungthar sungah Paul cakuat pawl hi zoh asile Paul ih nunnakah, amai miphun pawlih hnawnnak, thih nak tlak ih vuak le velhnak, dik lopi in thawng inn tlaknak, ‘a naa tuk’ tiah pacang pi tap ruangro in voi thum tiang Pathian hnenah dam dil in, pacang pi ‘ a thipi taksa ihsin zoha luatnak ipe thei ding, irun thei ding’ tiah hacang rial phah in, a duhdawtmi miphun pawl hrangah thih hman hril nacingin a miphun pawl cu thihnak lamzin an zawh cuah co hmu cingin a rak huat le ten tuk mi Gentel pawl hrangah pumpe nunnak pe in rawnbgawl phah in, tvp, cuvek milai tuarnak pit tawp lak ah rak ngan mi asi. Khrih thuthangtha pawlin Zesu ih tuarnak le thihnak pawl thu insim.

 

Tulai san khalah Pathian fale pawl thihnak lamzin ihsin nunnak lamzin dikah hruaisuak dingin Pathian in a hman mi zumtu pacang/nucang tha pawl cun raal hmai tthi in taksa, mimal nun, insang, le khawtlang lak khalah thinlung le nunnak tiangin tuar in a man an pek a tul ringring lai ih Khrih a rat lai hlan lo, cucu zumtu tha pawl lamzin cu asi ringring ding.  Thlarau raalpi cu leilung sersiam thawk, Adam ih thluksiat thawk ihsin leitlun milai pawl nunah do ringring asi ih kah-cawlh (ceased-fire) ti khal a um lo. Thlarau lam ralkap, rawlbawi pawl hrang ahcun cawlhcan, (vacation, sick leave, family leave) ti khal a um lo, cat bang loin pukpi le hriamhrei thatha thawn do awk ringring asi. Satan khal a it that dah loih Kiosa mi deh ding hawlih a hrum a raak rero mi vekin nitin zantin (24/7) a suk a so ah sunzan ti loin a vak rero asi. Aw, leitlun ah thlarau raal donak lakah raal hmaitthi zumtu pacangttha, thlarau raalbawi pawl hi ka lu kuun in upatnak pek ka va duh ve!

 

Asinan, zumtu pawl raal donak ih a danglamnak, a thatnak cu kan raalbawi bik cu ziangtik hmanah dung a sip dah lo, a sung dah lo, hriamhrei cem dah lo, a kah mi tthelh dah lo, thanau dah lo, ttih dah lo, huphurhmi nei dah lo, rintlak lo mi si dah lo, midang parah hngat aw dah lo, rin um ringring, tha mi pe ringring, thazangthar hriamhrei thar mi pe ringring tu, kan raal pa ih a tha bik hriamhrei khal neh thei tu, kan raal pa in a se thei bik a tuah thei mi khal kan hrangah nehnak tthatnak ah a canter zo tu, asi! Cuvek raalbawipa thawn raal do cu a va nuam ve! Kan sung si-hmang kan ti lai khalah, kan taksa le thinlung in hliamhma kan tuar ih a naa tuk aw tiah kan ttah lai khalah, leitlun mi pawlin in hnihsan ih an zaa an bang, an cil in phui, in hnihsan, in zawkzet, in nautat rero lai khalah, leitlun mi pawl cun kanmah phumnak ding thlankhur an lai ih rero lai khalah, leitlun mi pawl cun kan rothil cuh aw dingin an timtuah rero lai khalah, leitlun mi pawl cun kan ruakhnah sa ei dingin an haa an tat lai khalah, kan mah le kanmah kan zoh aw aw in zianghman porh awk ding a um lai lai khalah, kan thazang kan zoh awk tikah thazang a cem zo mi vek kan bang lai khalah, kan kum kan siar ih thiltha tuah suak thei dingin nilecan nei nawn lo vekin kan ruah awk lai khalah, kan kiangkap kan zoh ih in dinpi tu le thape tu hnakin in huatu, kan siatnak parah lungawitu an tamsawn vekin kan theih awk lai khalah, kan ruahsannak ih khatlam raalah ding thei nawn lo in leisin kan bih lai khalah, kan tumtah mi cu a cem zo ih lamzin dang pit thluh vekin kan theih lai khalah, zianghmuahhmuah kan hrangah tthatnak le hlawknak ah a canter tu, kan raalbawipa cu a kumkhua in thangthat si ko sheh! Cui ralbawipa cun milai tuarnak hmuah hmuah ih natzia, a thipzia, a tuar harzia pawl a theih theh, ziangah tile amah rori in rak tuar theh zo ruangah asi. Cui raalbawipa cu a hmin larzet asi ih mi tampi in an thei nan alam tang ngaingai loin an kirsan theu! Cui ralbawipai hmin cu Zesu Khrih asi! Amah thawn kan tawn awk tikah leitlun thlarau raal donak ih kan hliamhma pawl cu in tuamdam sak dingih kan thabang pawl cu a let thawn tampi in a bang thei lomi, a naa thei lo mi taksa ruangpi thar thawn in thuam leh ding asi! Cui ni cu thleng zang sehla tiah zumtu pacangtha pawl cu an hngak hlap ngaingai asi!

 

Khrih ruangah satan in a raal ah a lo siar tel ih a lo do, hliamhma a lo put asi ahcun na lungawi sawn aw! Satan ih rualpitha sihnakin a raal si ding hi kan zapi ten kan hril sawn ding mi asi.

 

HM