Ziangruangah duhmi ngah lo ih, duh lo mi kan ngah?

 

1)    Pathian thawn nan duh mi a bang aw lo;

2)    Pathian in a kumkhua, sankhuk hrang a lo duhsak lai ah nang cun reilote (temporary) hrang na duh;

3)    Pathian cun nun thianhlimnak nei ding a lo duhsak laiah nangmah cun lungawi diriamnak na duh!

4)    A ram le felnak hawl hmaisa loin thildang na hawl hmaisa!

 

Atlunih thu pali hi a dik hrih lo asile “a ruang” dang a um lai. A tlunta pawl malte sim bet sehla;

 

1)    Pathian thawn nan duh mi a bang aw lo;

Ziangruangah na lung a awi lo ti asile, Pathian thawn nan lungawi zawng, duhzawng, nuamti zawng a bang aw lo asi. Pathian duh mi na duh ih, nuam a ti zawng nuam na ti, a tumtah mi cu na tumtah ih na thinlung na hngat asi ahcun, Pathian in tuah thei lomi a nei loih lei le van sersiam mi le a sungih thilcang hmuahhmuah cu sankhuk rei ihsin Pathian in sankhuk daih vanram inn pi, a lalram uknak hrangah a timtuah tumtah cia vekin a fale zapi ten nitin nun khalah ziangkim a famkim cutco, cetco, rero mi asi ti na hmu fiang ding.

Cun, voi tampi mi tampi an lungawi lonak cu anmai tuanvo an tuan lo ruangah asi. Cui tuanvo cu ziang asi tile anmah le anmah lungawi awk ter ding kha asi. Nangmah lungawi ter dingin leitlung tlunah zohman in tuanvo an nei lo, nangmah lawngin tuanvo na nei. Na lungawi lo ruangah midang le dinhmun pakhatkhat na mawhsiat, mawhthluk, mi kha Satan in a lo bum mi asi. Na lungawinak ding hrang tuanvo nei tu kha nangmah na si! Aha! Mai lungawi lo ruangah midang le dinhmun mawhsiat rero tu cu ziangtluk mi aa so kan rak si! Thlarau mitdei hrih lo, naute kan rak si lai tinak asi!

 

2)    Pathian in a kumkhua, sankhuk (eternity) hrang a lo duhsak lai ah nang cun reilote (temporary) hrang na duh;

Hi leitlun mithmuh theih thilleri dawi in tlan rero nak hi Solomon siangpahrang in thlidawi vek asi a ti. Solomon in laitong rak hmang ve sehla cu, “thli lak ih voih thawh vek asi” a ti ko ding. Pathian cun a fapa neihsun thisen in a lo tlen (lei zo), hellram thlankhur sung ihsin a lo runsuak ih kumkhua nunnak a lo pek. Cui kumkhua nunnak sung ah tlangleng dingin timtuahnak ah na leitlun nunsung can tawite cu Pathian in a hmang rero, a bawrhhlawh mi na nun, thlarau, thinlung kha a lo thianfai rero laiah nang cun rei lote tisa nawmnak, mit in hmuh thei mi duh ruangah na vak na tawi, na hrang na kio, thuphen le thungai cawh polh celcel in na nung. Pathian in na nunnak ihsin a hrikthlak, hlawn rero mi kha na kuthnih pharh in na dawi rero. Cutin na sunglam, na thluak le thinlung bawmsungah rei lo te thil le ri, lei tisa thil lawnglawng in a khat tiah ttuktak piasen hman man lo, thli lak ih voihthawh vek fang in na nunram a lo cau ter. Cutikah, a rei lo te sung thil na duhthusam pawl kha a famkim lo tikah na phun na zai ih Pathtian hmaiah na kun, cu lawnglawngah Pathian thawn na thinlung kha an nai aw ih Pathian in a duh mi a lo sim theu theu.  

 

 

3)    Pathian cun nun thianhlimnak nei ding a lo duhsak laiah nangmah cun lungawi diriamnak na duh!

Zumtu pawl hi ekkhur, ek lipi, sungah a tla mi nauhak tualeng thur suak mi vek kan si. Rundamnak thu ahcun a kumkhua daih, Khross parih Khrih thisen in tlen zo mi kan si nan nitin nun, lei taksa thawn kan thuam awk sung poh cu, Pathian ten-um-za nun, khuaruahdan, duhthusam, hiarnak, caknak, porh, tvp, thlarau bawrhsawmnak thawn nung mi kan si. Cuticing cu midang in malte in sawisel, relsiat, thangsiat tikah mithianghlim famkim vekin kan hua, kan aukio lai. Dikbik, thabik vekin kan um kungko. Hnihsuakza kan si. Nauhak tualleng ekkhur ihsin laksuah mi cu tidai ah kholh ding a duh lo vek kan si theu. Curuangah, mithianghlim pawl umnak hmunah um thei dingin, nuam tive thei dingin, Pathian in kan nunkholhfai a duh ih in kholh fai rero. A cancan cu meisa thawn, a cancan cu tisa thawn, a cancan cu sahriak (sahbuan) thawn, a cancan cu tidai thawn. Cucu duh loin kan tal, kan au kan kio theu. Pathian in leitlun sualnak sungah nuam zetin lungawi suamso in na um hnakin na thianhlim ding kha a duh mi asi. Ziangruangah tile amah cu a thianghlim mi Pathian asi ruangah asi. Curuangah mi zokal, a tisa duh lozawng a tawng rero asile lungawi sawn ding asi. Na duhlo zawng na tawn laiah Pathian hnenah, “Bawipa ziangha izirh duh?” tiah thlacam aw. Cutin na tuah asile ziangvek tisa harsatnak lak khalah harsatnak tlun ah muvanlai bangin hni siamso ten na zam men ding. Culole, khai harsatnak cu na thihtiang a hlo lo ding. Cutin zir hna na thiam lo asile, harsatnak,na thinlung duh lo zawng pakhat a hlo le a dang cuhnakih har a suak deuhdueh ding. Zesu in a duhdawt tukih a mai thisen in a lei zo mi zumtu unau pakhatkhat na hua, na duhdawt thei lo asile Zesu Khrih thawn nan duhmi a bang aw lo tinak asi ih na hrangah vanramah nawmnak ding zianghman a um lo. Mi zohman, an huat tuk mi pawl lakah um nuam an ti dah lo.

 

 

4)    A ram le felnak hawl hmaisa loin thildang na hawl hmaisa!

 

Mi tampi in Pathian cu an siahhlawh tuan dingah an duh: an thinlung duhzawng pe tu dingah an duh. Cutikah satan in an thinlung duhzawng a pek tikah voi tampi cu Pathian in ipek tiah an ti theu. Cuvek milai pawl cu Pathian uknak le felnak hawl hmaisa loin “thildang hmuahhmuah” hawl hmaisa tu an si. Zesu cu thuphan a per lo ti kan zum. Curuangah “thildang ziang kim ka lo pek belhsah ding” ti tu in ziangkim in pek lo asile a pek dingmi pawl duhmi duh in tuah hmaisak dingmi kan tuah hrih lo tinak asi.

Pathian uknak ram hawl timi cu na nun kha amai uk mi si ding tinak asi. Na nun, na duhzawng, na hiar zawng cakzawng, na sumsaw, neihmi ziangkim, theih mile ti thei mi ziangkim kha amaita, amai ukmi, thunun mi, a thuvek in nung ding sawn kha asi. A felnak hawl timi cu Pathian ih mizia, dingfel Pathian a sinak, mizia kha Thlarau Thianghlim hnatuannak in na sungah luangliam ter, cangvai ter ding asi. Milai dingfelnak, tuahnak ruangah siloin Khrih ih dingfelnak ruangah Pathian fate kan sinak co in cui Pathian ih dingfelnak mizia cu a fale pawl nitin nunah leitlun ah lang suak, luangsuak dingmi asi. Cutin, na nun cu Pathian in a lo uk ih amai dingfelnak ah a hngat aw, tthum aw mi Pathian fate sinak dinhmun ah dinghnget in na leitlun nitin nun ah Pathian ih dingfelnak mizia cu na sung ihsin luangsuak in, na milai sinak mizia cu a ziamral, asi ahcun thildang ziangkim cu na leitlun nunsung lala ah Amah in a tuah famkim ding. A famkim lo asile Bawipa Zesu in thuphan a per asi ding. Zesu cu thuphan per thei asifawn lo, nangmah sawn kha na si tinak asi. A ram le afelnak hawl hmaisa aw.

 

==========

 

 

Na duhdawt thei lomi zumtu unau na kiangkap ah na nei asile, khakah nangmai kilkhawi, bawm, tundin dingah Pathian in tuanvo a lo pek asi kha! Ziangah tile nangmah in na duh thei lo vekin middang in an duh thei ve lo dingih cumi lakah nangmah kha na unau kilkhawi, bawmtu dingah mifel bik, mitha bik, Pathian in a lo hril mi asi ti thei mei aw la, phunzai loten na unau kha bawm aw!

 

Mi zokhal in mai inn hmuan sungah Zukneng tumpi kap an duh cio ding! Culole, savawm tumpi, hnit man khung zet, mai inn hmuan sungah kap an duh cio ding! Ahnit an zuar dingih sum tampi an ngah ding si lo maw!

 

Ramthim, hmun hla pi, miphun dang lak  zumlotu pawl lak feh tul loin na insang, khawsung, vengsung, pawlkom, nitin hnatuannak hmunah na tisa thinlung duhlo zawng, na huat zawng, na thin lo hengtertu, na riah lo se ter tu, na ning lo hang ter tu, na hngir lo tteu ter tu, tvp, na tawng asile na lungawi sinsin aw!

 

Tuisun ah na duhdawt thei lomi, na huat tuk mi, na thinheng ter ringring tu, na kiangah zumtu pakhatkkhat a um asile, mahte theih mei ding cu, “leilung pumpi ah nangmah kha khai na unau pa/nu kilkhawi tu, tungding, zirh, le kaihhruai, ngaidam tu dingah, Pathian mithmuhah, nangmah kha a tlak bik na si” tinak asi. Na tuanvo cu a tum tuk, a har tuk maw? Ziangruangah kei ngelcel na ti men ding. Ziangruangah tile, Pathian in a fapa Zesu Khrih thisen in a lei mi, a duhdawt tuk mi na duhdawt thei lai hlanah Zesu Khrih ih Thlarau in nangmah kha a lo uk hrih lo, nangmai duhnak duh lonak, na tisa mizia in na nun kha alo uk lai ruangah asi. Cutin na duhdawt thei lomi na unau na duhdawt, na ngaidam, pomrem thei dingin Thlarau Thianghlim in a lo bawm duh ruangah asi. Cutin na sunglamah rem tul mi na rem lai hlanlo, na sunglamah mi huatnak nei tu tisia mizia kha hlawnhloh, khenbet, thihter asi lai hlanlo, tuisun ah na huat zetmi, Pathian in a duhdawt tukih a fapa thisen in a lei, rundam zomi, kha tuisun ah na kiangah um nawn loin hmundang ah thawn khal sehla a rei hlanah Satan in tuisun ih na unau pa/nu hnakih sual deuh na kiangah a lo ret sak dingih tuisun ih na thinhengnak hnakih tam le naa in na thin a lo natter deuhdeuh ding. Curuangah, na huat mi, na duhdawt thei lomi tuisun ah na kiangah a um asile Pathian hnenah cui na huat mi, le duhdawt thei lomi kha na kiangah um ringring dingin dil sawn aw! Halleluiah!

Na sungih huatnak mizia kha satan hmanrua tha bik pakhat asi. Huatnak, thinghen thincinnak, ngaidam thei lonak cu thlarau nathrik, cancer vekin milai thlarau ei siat tu, zumtu nun ah Thlarau Thianghlim cangvai thei lo dingin zumtu nun tawmtem tu asi ih hmailam ke karkhat na kar hlanah le Pathian in cak sinsin in a lo hman thei nak ding hrangah lamzin dal tu asi.

 

Ziangtin na thinlung cu na neh thei dingih Pathian in a duhdawt ih a thisen in a leimi, a rundam mi cu na duhdawt thei ve ding ti zir, bawm na tul asile a lo bawm thei tu Pathian dil aw la, Pathian palai, a siahhlawh pawl hnenah bawmnak dil aw! Cutin bawmnak na dil ih na zuam nan na duhdawt thei thotho lo asile nan zumnak cu a nung lo ih na biak mi Pathian a thi asi ding! Nangmah le nangmah na cek awk fel a tul, zumnak nung nei dingin le a nung Pathian Thlarau in na thinlung lo sersiam thar sal dingin na biaknak khal a tak ram na thlen a tul tinak asi.

 

 

Cuntin na tuah hnu ah na Pathian cu a tha bik lo, a cak tuk lo, a lo bawm thei lo asile Pathian dang be mei aw! Na kawhhran umnak cu a tha bik, a lo bawm thei tu asi tiah na ruat lo asile kawhran dang ah thawn mei aw! Cutin Pathian dang biak ding le nei lo, kawhhran dang thasawn le hmu lo na si ahcun na sunglam nun cu hell ram vek asi. Na zumnak, na Pathian biaknak a dik tawk lo tinak asi. Khristian pawl Pathian cu Kiosa kaa ang hemhem hmaiah siseh, Meisa pi hlio durdo lakah siseh, thlipi le ruahpi lakah siseh, thlarau sual le satan huup dupdo hmai ah siseh ding tohtoh in a feh tu le mi a hruai tu asi.