|
PATHIANF A, THLARAU THIANGHLIM UKMI NUN: PATHIAN FATE THEIHTHEI NAK
Jan 2010
Santhar sanah zumnak thupom, ruahnak le duhdan bang aw lo a suak sinsin. Biaknak pawlkom pakhat le pakhat, mibur khat le burkhat, hmuansak hmuanthlang, rualpi pawlkom lak khalah a dikbik, thlarau mi sibik vekin zuam awknak, kanmah kan diksawn, kan doctrine a dik sawn, thutak, thudik, kawhhran nung, piangthar kawhhran, zumnak nung, tvp, tongkam kan thei lar zet theu. Cuvek lakah thinlung anhai in a ummi tla kan um pang asile a tanglei hi Bible in a simmi Thlarau Thianglim in a ukmi zumtu, Pathian fate pawl kan theihthei nak ding mizia, tuahnak, langdan , thlarau rah pawl an si. Mathai 7:16 “Mi ziangvek an si ti cu an tuahmi in nan thei ding…” a tivekin kan kan kaingkap milai pawl zovek an si ti thleidang thiam dingin inbawmtu dingah malte Bible in a simi zoh hnik uhsi.
Bible in a simmi, thlarau mi sinak pawl thu sim hlanah Thlarau Thianghlim ih kaihruai mi silo, leitlun biaknak sakhua thlarau mi sinak pawl malte zoh hmaisa uhsi. Leitlun biaknak sakhua hmuahhmuah in thlarau mi sinak an nei theh. Cupawl lakah Budhist pawl an sile phungki pawl hrang ahcun leitlun thilri le lennak nei loin lukong in, phungki puansen sin in rawlkhawng in nung, mahte in le lo nei loin sumpai hlawh le ei in hawl loin um, rawl ul thlacam, le biaknak cabu siar le bai-hat, thlarau luahkhat dingin ulhnak (meditation), tvp, tla an tuah. Cupawl a tuah tam theihthei le zuamzuam cu thlarau mi, thlarau laksawng ngah tam ding tiah ruat an si. Cutin an biaknak lamah an pek awk vekin thlarau sual in a pawlkom tikah thilmak tuah thei nak tla an nei theu. Cuvek thotho in muslim pawl khalin thlarau mi sinak tiah biaknak sakhua thuthlung an nei ve. An biaknak lamah hleihluat (extreme) in anmai nunnak ui loih tihcilh nak in siseh peknak in siseh, Koran cabu sung sakhua thuthlung pawl zir, zohloin siar thei, nikhat ah voithum thlacam, voksa ei lo, tvp, in thlarau mi si ding an zuam. America ramih Amish pawl cun santhar si thatha, fimnak, le electric, motor, computer, cell phone, tvp an hmang duh lo, satan hmanrua ah an ruat, cucu an thlarau mi sinak ih nunthuthlung (doctrine) asi.
Cuvekin khrihfa pawl khalin thlarau mi sinak tiah leitlun sakhua nak vekin pawnlang zuam awknak tampi an nei ve; cupawl tla cu Bible siar, rawl ulh, thlacam taima, cawlhni khawm, biaknak lam zuamnak, zuu le rit theih hrial, nupa sualnak hrial, rukruk le fifirnak hrial, midang pawl zumnak dungthlun ve ding in sawm awknak, tvp, in pawnlang thlarau mi sinakah tampi biaknak sakhua thuthlung a um ve. Cupawl cu leitlun sakhua biaknak thlarau mi sinak pawl thawn danglam ciamco nak a um lo. Cupawl cu an tha, asinan cu pawl cu Pathian Thlarau Thianghlim kaihhruai, ukmi nun tel lo cun farasi pawl nun dinhmun, leitluan biaknak fangfang lawng milai a hruai thleng thei asi. Santhar khrihfa pawl bum in umlonak ding hrangah leitlun sakhua biaknak cangvaihnak, thlarau mi sinak le Khrih ih dungthluntu, Thlarau Thianghlim ih ukmi, kaihhruai mi nun thleidan thiamnak ding hrangah Bible in ziang a sim, ziangvek hi Pathian fate pawl nuntu, ziaza, langdan, rah asi timi tawiten zoh hnik uhsi.
Theihsual theu mi cu mailai thinlung phurnak le thlarau rah, thlarau laksawng le thlarau rah, theihnak le thlarau rah, pawl hi mi tampi in an theih polh theu. Zumtu zaten thlarau rah rah tampi rah dingin fial mi le rah hrimrhim ding mi kan si. Mi zokhalin, an zumnak cu ziangvek asi ti an au rero mi hnakin an nunah an rah nan zoh tikah an sunglam ah ziang a umih ziangvek milai an si, Pathian fate maw an si, satan fate an si ti aw-ai ten theihtheih asi.
A hmaisa bikah, a tluse zomi milai cu Pathian fate sitheinak dingin Zesu Khrih ah sersiamthar nak lawng in a si. Cucu Pathian Thalrau hnatuan asi ih piangtharnak, hrintharnak ti khalin kawh asi. Pathian in amai hmuihmel kengin a sersiam mi a tluse zomi milai a duhdawtnak cu a Fapa sungin a langter ih a tluse zomi milai rundamnak cu Khros parah a tuah theh zo. Cutin, a thluse zomi milai, thlarau thi cu a Fapa ah a sersiam thar, nunak thar a pek ih amah thawn pehzaawm awknak thar a tuah. Cuticun milai siatha theihnak cu a nungsal ih Pathian thutak theihnak in kumkhua nunnak sung a lut theinak asi. Cui rundamnak cu Pathian zangfak lainatnak in pekmi zumnak laksawng asi. Cui rundamnak lasawng a cotu hmuahhmuah cu Pathian fate tiah kawh kan si ih vanram kan thlen hlan, kan leitlun nun sungah Pathian tumtah le duhmi vekin kan nun theinak dingah le amah rian dingin tuanvo in pek mi tuansuak thei dingin kan sungah Thlarau Thianghlim pek kan si. Cui Thlarau Thianghlim ih huham cahnak, fim zirhnak, kaihhruainak in ziangkim Pathian tumtah le duhnak cu tuan famkim asi. Cui Thlarau Thianghlim in a kaihhruai, a ukmi pawl nunah a tanglei nuntu, ziaza, cangvaihdan, langdan, nun rah pawl cu a langmi asi. Cui thlarau rah pawl cun Pathian fate kan sinak a langter. Mi zovek, ziangvek khalin a tanglei nun pawl nunpi si loin Pathian Thlarau Thianghlim ka nei ti in thlarau mi zet vekin a cangvai, sakhua mi zet vekin a au kio rero khal asile cunu cupa cu thlarau lamah nauhak te, thlarau mitdei hrih lo asilole a sungah Khrih ih Thlarau a nung loih thlarau thianglo, bumnak thlarau, leitlun sakhua thlarau a cangvai tinak asi.
Pathian fate Thlarau mi sinak cu Zesu Khrih ih leitlun nun ah le Bible in in zirh vekin theihtheih nak le sim theinak kan nei asi. Zesu Khrih cu thlarau mi sinak famkim, kan zohthim ding, thlarau rah in a khatmi kan Bawipa asi.
Pathian Thlarau Thianghlim in a kaihhruai, a ukmi pawl nunah hmuh thei mi pawl cu:
1) Mithmuh theih leitlun thil ah si loin hmuhtheih lo mi kumkhua daih thlarau thil hrangah a nung:
(2 Cor. 4:16-18), Hiti a si ruangah beidong ih kan um dah lonak cu a si. A lenglam kan taksa ruangpi hi ṭumsuk vivo hmansehla kan sunglam nun cu nitinte tharsuah ringringin a um a si. 17, Cule harsatnak caan tawite sung kan tonmi tete hin a let tampi in kumkhua sunlawinak in pe ding. 18, Curuangah hmaitonte ih kan hoihthlat reromi cu kan hmuh theimi thilri pawl hi an si lo; kan hmuh thei lomi thil an si sawn. Hmuh theimi cu caan tawite sung lawng a awh; sikhalsehla hmuh thei lomi cu kumkhua a daih a si.
Pathian fate, Thlarau Thianghlim in a kaihhruai mi pawl cun hi leitlun rei lo te mithmuh theih thilri pawl hrangah nung loin a kumkhua sankhuk daih thlarau hrangah an nung sawn asi. Curuangah leitlun mithmuh theih lennak, sinak, le lungawinak pawl hnakin mithmuh theih lo, sankhuk thlarau rothil sawn cu thupi sawn ah an ret ringring. Cutin sim ruangah leitlun pawlkom le mailai nuntu hrangah a tulmi an tlansan theh tinak asi fawn lo. A thupi sawn, an milai damsan cu thlarau thil asi.
Fimkhur: leitlun biaknak sakhua thlarau mi pawl khalin himi thawn bang aw mi an sim ve, an biaknak le thlarau nunkhua hrangah thihngam in an nung ve theu.
2) Khrih hmuihmel kengin a thangso rero: .2 Cor. 3:17,18, Cule Bawipa ih Thlarau umnak kipah cun zalennak a um. 18Kannih tla cu kan zatein kan hmai puanih tuammi kan si nawn lo ruangah Bawipa ih sunlawinak hi thlalang bangin a langtertu kan si. Cuih sunlawinak cu Thlarau a si mi Bawipa hnen ihsin a rat ruangah kan nunnak hi sunglawi sinsin in le Amah bang sinsin in in thleng vivo a si.
Pathian Thlarau in a ukmi Pathian fate pawl cu Khrih ih hmuihmel keng sinsin in nitin an thang rero asi. Cui thanlennak ih umzia cu an nun ah Khrih ih mizia a lang sinsin: Kal 5:22-23 ah Paul in a sim bangin, duhdawtnak, lungawinak, hnangamnak, lungsaunak, mi zaangfahnak, ṭhatnak, rintlak sinak, nunnem tangdornak le suup theinak tla an si. Cui hleiah, v. 24-25 ah a sim bet mi cu , Cule Jesuh Khrih ih ta a si mi pawl cun an taksa hurnak le hiarnak pawl cu thinglamtah ah an khenthat zo. Thlarau in nunnak in pek zo ruangah kan nunnak khal hi Thlarau amah in a uk ding a si. 26Puarthau ding kan si lo; pakhat le pakhat thinṭeuter aw ding kan si lo; iksiik aw ding khal kan si lo.
A tlunlam ih simmi thlarau rah um silo, an nun in a rah mi cu Kal 5:19 ah a simmi, tisa mizia, thuphan per, huat awknak, rukruknak, nupa sualnak, tvp, in a luahkhat mi pawl cu Thlarau Thianghlim ih ukmi nun si sawn loin an sungah a uktu cu satan thlarau asilole, an lei tisa mi sawn asi tinak asi.
3) Thalrau rilrawng: Pathian thutak haal, ngaina (Matt. 4:4, Asinain Jesuh cun, “Ca Thianghlim in ‘Milai nunnak cu rawl lawngin a si lo. Pathian hmurka in a suakmi ṭongkam in a si sawn,’ a ti.
Naute pakhat cu a ril rawng dah lo, rawl a ei dah lo asile a thi asi thei. Cun, milai pakhat cu ziang nuam ati timi na zoh tikah a sunglam ah ziang a um, ziangvek milai asi ti theihtheih asi. Huatnak, rukruk, thuphanper, le nupa sualnak, leitlun taksa nuamcennak, le milai porh awknak ah a nuam aw zet tu cu a sungah zo le ziang thlarau in a uk, ih ziangvek milai asi ti sim bet tul nawn lo asi. Cuvek thiamthiam in Pathian fate, Thlarau Thianghlim in a ukmi, a kaihhruai mi pawl cun Pathian thutak cu an nitin nun rawl vekin an haal, an ngai ringring ih Pathian hnen ihsin thutak rawl ngaingai an ei ringring asi.
Fimkhur: Leitlun sakhua biaknaklam pumpe aw tu pawl khalin an biaknak cabu, bible cu an duhzet ih zohlo in an baihart, sunzan tiloin an zir, leitlun nun an tlansan, cu pawl hi cawhpolh lo a tha. Leitlun sakhua mi vekin a tlunih no #2 nak ih sim zomi thlarau rah um siloin leitlun sakhua mithavek in khrihfa sinak ah zuam zet, taima zet, pe aw zet , thlarau mi zet an um thei.
4) Pathian duhzawng a duh ih Pathian huat mi a hua, Pathian in nuam a timi nuam a ti
“LALPA (Pathian) tih cu sual huat a si. Hngalnak le puarthaunak, thil dik lo le Tawngkam tha lo ka hua a si.” Thufim 8:13. Mi pakhat cu thlarau mi zet vekin a um na cingin nitin nunah sual thawn buahcih ringring in a um, sual thuhruk mi cu nuam ti zetin a cen rero asi ahcun a simmi le a sinak taktak cu a kalh aw, hlapi asi. Thlarau mi zet vekin biak inn ah tlang au rero nacingin rukru, thuphan per, nupa sualnak, le Pathian huatzawng tuah rero tu cu Pathian fate asi tiah sim thei nak a um lo. Zesu Khrih cu leitlun ah misual pawl rundam dingin a ra. Cutin misual pawl a rundam, an sual a ngaidam tikah misual pawl cun sualnak an tuah sunzawm nawn lo, sual huatnak thlarau Khrih ih Thlarau cu an sungah a ceng ih a uk sawn asi.
Cutin thiltha tuah le Pathian duhzawng tuah ding cu nitin in an lungawi zawng le an ruahsan mi asi. Helram satan kut ihsin anmah a rundamtu Pathian cu an duhdawt ruangah Pathian in a duhdawtmi, a Fapa thisen in a leimi milai pawl cun Pathian an duhdawtnak ruangah Pathian in a duhdawtmi a fale pawl parah thiltha tuahnak in an leitlun nun an hmang.
Leitlun sakhua, thlarau mi sinak nei in, thlacam le rawl ul tam deuhdeuh, tettikhan tam deuhdeuh, thutak theihnak ah thei aw ter deuhdeuh si in khatlam nitin nunah thuphan per tam deuhdeuh, rukruk poi tinak nei lo, ngaidam nak nun nei lo, mi thangsiat le mi relse loin um thei lo pawl cu thlarau lam thihnak khamtlangah dingin satan tlangau an si.
Pathian Thlarau ih a ukmi, Pathian fate pawl cun Pathian ih duhmi an duh ih an nunpi, cule Pai huat mi an hua. Pa in a huat tukmi A Fapa thihnak khawp in a huatmi cu sual asi. Cui sual cun sualnak a hringih sual ih man cu thihnak asi. Pathian in sual a hua ih sualnak a hua lo titu cu zirhnak sual, Bible in a simmi asi lo. Pathian in misual a duhdawtih a rundam vekin Pathian in a rundam mi, Pathian zangfahnak laksawng cotu pawl cun anram rundamtu Pathian ih huat mi cu an hua asi.
5) Pathian duhnak parah ziangkim a hngat aw aw: (Luke 6:12, Culai ah Jesuh cu thlacam dingin tlang parah a kai ih Pathian hnenah zanvar thla a cam. Mark 14:36, 36“Abba, Ka pa! Na hrangah cun ziang hmuahhmuah a cang thei ṭheh. Hi tuarnak khuathai hi ka hnen ihsih la hram aw. Asinain ka duh vekin si hlahseh, na duh vekin si sawnseh,” tiah a ti.
Zesu leitlun a rat tikah Pai duhnak cu thupibik ah a ret. Cuvek in Pathian fate pawl leitlun nun cu Pathian duhnak sawn kha thupi bikah ret ding asi. Nitin nunah zovek thawn nun tik khalah, ziangvek dinhmunah din tik khalah, ziangvek tlaksam nak le diriamnak lak khalah Pathian duhnak sawn kha thupi bik ah ret in Pathian duhnak a famkimnak par sawnah Pathian Thlarau in a ukmi, Pathian fate pawl lungawinak cu a thum aw ringring sawn asi.
6) Thulung, thuawi nun le tangdornak in Pathian rian dingin a nung: (Mark 10:45), Ziangah tile Milai Fapa hman hi rianmi si loin miriantu si dingah le mi tampi tlen dingah a nunnak pe dingin a ra a si,” tiah a ti.
Tangdornak le thu awi nun tel loin thlarau mi si a theih lo hulhual. Milai ruahdan duhdan ah hngat aw tahratin thlarau mi si a theih lo. Pathian thu awi nun cu ziangvek dinhmun din tik khalah, ziangvek hloh le cemnak khalah lungawi siamso phunzai lo ten nun, zovek milai thawn khal sisehla Pathian in duhdawt dingin amai hmuihmel keng zumtu unau inpek mi pawl duhdawtnak in nunpi asi.
Ph. 2:8-Nan thinlung put daan cu Khrih Jesuh ih thinlungput daan vekin siseh. Khrih cu Pathian sinak a nei ringring; Asinain Pathian bang dingah hranhram in a tum dah lo. Cu ai-ah, Amah ih lungtho tein, a sinak hmuahhmuah a taansan ih, hnen-um sinak la tahratin, Minung ah a cang ih minung pianzia in a piang. Tangdornak thinlung a nei ih, Pathian thu thlun in, Thinglamtah thihnak tiangin a tuar.
7) Thlarau hlo ngainatnak, zangfahnak anei:
Matt. 9:36, Miseenpi pawl a hmuh tikah khaaltu nei lo tuu bangtuk in rethei le awloksong ih an um ruangah an parah zaangfahnak tampi a nei. Pathian in a fapa sungah rundamnak in pek ih Pathian fahniang tiah sankhuk Pathian insang sungtel ah inruat hnu ah leitlun ah intanta nak san bik thu pakhat cu a fapa thisen in a tlen mi pawl hnenah rundamnak thuthangtha simsuah asi. Rundamnak thuthangtha simsuak dingin rundamnak a co hrih lotu, thlarau hlo pawl lainatnak, Khrih ih thinlungput le a dungthluntu pawl thinlung sungah a cangvai asi.
II Kor. 5:18, Hi hmuahhmuah hi Pathian ih tuahmi an si ṭheh; a ral a si mi kannih cu Khrih thawngin Amah thawn in remter zo ih midang khal Amah thawn remter dingah ṭuanvo in pek. Cui lungput cu Pathian fate, thlarau pitling pawl lungsungah tuartheih lo thlarau meisa vekin a kang alh ringring asi. Pathian le a sersiammi remdaihnak rawngbawltu, the ministry of reconciliation, cu Khrih ah rundamnak cotu pawl leitlun nunsan asi.
8) Thinnatnak a tuahtu parah ngaidamnak: Luke 23:34, 34Jesuh in, “Ka pa, an sualnak run ngaithiam aw. Ziang kan tuah ti an thei lo,” tiah a ti. Pathian Thlarau cu zumtu nunah a cangvai tikah Khrih ih mizia an sung ah a thanglian ih a lang asi. An kiangkap um milai, zumtu zumlotu pawl parah siseh an tuahsualnak le thinnatnak pawl khal tuar thei nak le ngaidamnak nun an nunpi asi.
Cutin siloin, ziangvek in biak inn ah aukhuang in ziangvek doctrine le zirhnak sungah thanglian khal hai sehla ngaidamnak nun a nei lo tu cu Khrih ih Thlarau a sungah a lal lo ti a fiang. Cuhnak hmanin ngaidam thei lonak nun thawn midang thungrulh duhnak, mi huatnak, ikfik nak thawn a nungtu pawl, Pathian in a duhdawt ih a Fapa thisen in alei zomi, Pathian fahniang thangsiat relsiat, thuphan puh rero tu cu satan fate an si. Piangthar Pathian fate an si hmanah naute buciap, cawhnawi tulh rero tul lai mi an si thei. Culole, a tlu semi Pathian numsim tul khawp in dungtawlh tluse mi Pathian fate an si thei.
Zumtu pitling nun ahcun ngaidamnak nun hi a lotheihlo in a lang hrimhrim dingmi asi. Cutin ngaidamnak nun a lang theinak ding, a takram ah nunpi thei nak ding hrangah kan kiangkap ah ngaidam tul mi milai, zumtu zumlotu, kan parah thinnatnak a tuat tu, thuphan puhtu, phiarsawmtu, zuar thlaitu, le zangna zungna thei lo, mah rawl pe tu law bawmtu kut keu rero tu pawl kha Pathian in kan kiangah a um ding a siangsawn asi. 23:34 Ka pa, an sualnak run ngaithiam aw. Ziang kan tuah ti an thei lo timi hi kutngan cabu ṭhenkhat sungah a um lo.
9) Duhdawt tlak lo pawl a duhdawt: .John 13: 1, Lantak Puai ni a thlennak ding ni khat lawng a duh thlang. Jesuh in hi leilung fehsan in a Pa hnenih a fehnak tikcu a ra thleng zo ti kha a thei. Leilung tlunih a ummi amah ih ta a si mi pawl cu a duhdawt zet ringring ih a netnak tiangin a duhdawt.
Leitlun milai duhdawtnak cun mai hrang diriamnak, porh awknak, le hlawknak hrangah an duhdawt. Pathian duhdawtnak cun duhdawt tlak lo in duhdawt. Cui duhdawtnak cu Pathian fate pawl thinlung sungah Khrih ih Thlarau in a thanglian ter asi. Khrih ih Thlarau nei lo, leitlun biaknak sakhua milesa pawl cun anmai biaknak sungtel, an mai kawhhhran, an mai member le anmai duhnak tuah pitlin theinak ding hrangah pawlkom sungtel pawl lawng an duhdawt asi.
John 13:34–35, Cule nan hnenah thukham thar ka lo pek: Pakhat le pakhat duhdaw aw uh! Keimah ih ka lo duhdawt vekin pakhat le pakhat nan duhdaw aw ve pei. 35Pakhat le pakhat tlunah duhdawtnak nan neih ahcun zokhal in keimah ih dungthluntu nan si kha an lo thei ding a si,” tiah a ti.
I Jn 2:5,6, Sikhalsehla Pathian thu a thluntu cu a sungah Pathian a duhdawtnak famkimin a um tinak a si. Pathian thawn pehzomnak kan nei ti kan theih fiangnak ding cu hiti in a si: Zokhal Pathian thawn pehzomnak ka nei a titu cun Jesuh Khrih bangin a nung ding.
10) A tawptiang a tuar suak: John 17:4, Hnaṭuan i pekmi ka ṭuan ṭheh zo ih na sunlawinak cu leilung ah ka langter zo. Zesu Khrih in a ukmi, a kaihhruai mi thlarau mi pawl cun Pai tuanvo pekmi tuansuaknak in Pathian hmin cawimawi ding lawng hi an leitlun damsan ruatsan mi asi. Milai tumtah, lungawi, nuamti zawng le diriamnak hnakin Pathian duhmi tumtah le lunghmui zawng tuansuak dingin an nitin nun an hmang sawn asi.
11) Zangfaknak le dingfelnak a nunpi: John 14:15Jesuh in, “Keimah in duhdawt ahcun ka thukham pawl nan thlun ding.
Pathian ka duhdawt ti rero cingin Pathian huatzawng, Pathian mizia thawn a kalh aw mi, a um tlang thei lomi nitin nun ah a tuah rero tu pawl cu an tuahnak in Khrih ih thusimmi an dokalh rero tinak asi.
Mikhah 6:8 Asilo, Bawipa amah in a ṭhami le tuahter in duhmi cu in sim zo. Siter in duh mi cu: A dingmi tuah le zaangfahnak tlaihsan le tangdorte in Pathian thawn fehtlang khi a si.
Santhar zumnak kenkawh tu pawlin zirhsualnak nasa ten an fehpi mi, Khrih dungthluntu pawl san lai ihsin fehsual dungtawlh pawl ausuahpi mi cu hitin asi; “Rundamnak cu thlarau thil asi ih leitlun taksa in kan tuah mi thawn a pehpar aw lo, taksa in kan tuah mi ahcun zohman famkim kan um lo, taksa cu a thianghlim loih taksa sualnak cu Zesu Khrih in a tlenfai zo, curuangah taksa in ziangvek sualnak kan tuah tla le a poi lo” ti mi zirhnak hi satan hmanrua zirhsualnak mi tampi a bumnak, kum zabu pakhatnak dungthluntu pawl san lai ihsin a thawk zo mi zirhsualnak, tuisan 21at ah a luar sinsin mi satan bumnak hmanrua tha bik pakhat asi.
Cun, thlarau nunpitling neitu pawl nunah a rahsuak dingmi pawl cu a hnuailam vek asi: ziangvek kawhhran, ziangvek doctrine khalin zumtu nunah a tanglei vek nun rahsuak dingin a kai hruai lo asile cui zirhnak le kawhhran cu fehsual, dungtawlh zirhnak asi:
Kal 5:22 ; Duhdawtnak (agape); Lungawinak (chara) ; Remdaihnak (eirene) ; Lungsaunak (makrothumia); Ngilneihnak (chrestotes); Thatnak (agathosune); Rinumnak ( pistis); Nunnemnak (prautes); Mah le mah uk awk theinak (egkrateia).
I Kor. 13: 4-8: 1 e vein.: Turafainak; Ngilneihnak ; Iksiklo (ou zeloo); Mah le mah porh aw lo (ou perereupmai); Mah le mah hlir so aw lo (ou phusioutai); Zohmawi lo in nung lo (ouk askemonei); Awl ai ten thinheng lo; Sualnak ah a lung a awi lo ih thilsual a ruat lo ; Thutak ah a lung a awi ; Ziangkim a tuar tento ; Ziangkim a zum ; Ziangkimah ruahdannak a nei; Ziangkim a tuar tento. Upattlak, cawimawi tlak (semnos); Dik; Thianghlim; Duhdawt (prosphiles); Midang upattlak mi sinak (euphemos); Thatnak le sunlawitlak mi sinak (arete); Cawimawi tlak (epainos). In Colossians 3:12-16: , the church members are told to put on (wear) these things: Zangfah lainatnak; Ngilneihnak; Tangdornak (tapeinophrasune); Midang zawnruah thiamnak (oiktirmos); Ngilneizaidamnak; Thinsau lungsaunak ; Cuihlei ah zumtu thlarau mi pawl nuntu dan ding cu: khat le khat zawi awi aw ding; khat le khat ngaidam aw tawn ding; duhdawt aw ding; Pathian remdaihnak in thinlung luahkhat, uk ding; Lungawi thiam ding (eucharistoi); Pathian thutak luangliam nunpi ding; Khat le khat le zirh aw, nunsimaw tawn ding; Thinlungah Pathian zangfahnak hnuai ah lungawi hla sak ding. A tlunlam thlarau rah, thlarau pitling nun nei siloin thlarau mi zet vekin thlarau rero tu santhar sanah an tam vivo tikah mi tampi satan bumnak thang sungah an tla rero ti cu leitlun khawmual thlarau mitin cuan tikah zep ding a um lo. Thlarau mi sinak le leitlun sakhua mi sinak cangvaihnak thleidan thiam lo ruangah milai tampi bum in an um fawn. Casiar tu zo khalin mah le kiangkap cio ah thlarau lam zumnak cangvaihnak ah fiangten Thlarau Thianghlim kaihruai mi biaknak cangvaihnak le leitlun sakhua nak, thlarau sual kaihruainak pawl thleidang thiam dingin duhsaknak thawn a tlunlam thu pawl Bible in a simmi Pathian fate pawl thleidan thiamnak ding hrangah “anrah zoh tikah thleidang thiam ding” in zir cio uhsi.
Casiartu zate hnenah Pathian in Khrih ah thanglian in rahtha tampi rah the dingin Pathian in lam lo hruai hram sheh! |