Milai dinhmun a thleng aw zo:
Zumtu pawl cu “Pathian fate” (Rom.8:16, 17), a sunlawinak ttawmpi tu le roco tu ding kan si. Pathian in mithi kan si lai ah le amai ral lam tang kan si laiah a fapa neihsun nunnak pek in in rundam, in lei zo ruangah a fa, amai insang sungtel ah incanter zo. Cuticun kan thlarau nitin nun cu in cawm, fimnak in zirh, lam in hruai ih a tulnakah nun in sim asi (Heb. 12:5-8). Pathian in kan dinhmun (fa sinak) cu ziang tik hmanah hlo thei lo sal nawn lo dingin kan sungah seal a khen zo; kanmah bawm dingin kan sungah Pathian in Thlarau Thianghlim in hna a tuan. 2 Cor. 1:22, 2 Cor. 5:5, ah a sim vekin, Pathian in amaita kan sinak cu hitin asi, Thlarau Thianghlim cencilhnak in kan sungah seal vekin a khen zo; zianghmuahhmuah a ra thleng lai dingmi karlakah amahkhan nak a tuah zo. Thlarau Thianghlim cun kan sunglamah in cencilh ruangah ziang hmuahhmuah lak ihsin humhim kan si, Pathian fa kan sinak cu zianghman in a siat suah thei nawn lo, cuticun amah thawn hmaiton in kan tawn awk hlan tiang kan nitin khristian nunah in kaihruai asi Eph. 1:13-14. Kan leitlun nun a cem tikah amah Pathian thawn a kumkhua in kan leng tlang tengteng ding asi ti thutiamkam a tuahnakah kan sungah Pathian in Thlarau Thianghlim in in cenclih ringring asi. Cui hleiah, ziangkim kan tonmi hmuahhmuah cu kan hrang thatnak ah a canter fawn Rom. 8:28, 29.
Minung lamah:
Milai damsan (purpose of life) a thleng aw zo. Pathian ral ihsin Pathian fa dinhmun kan si zo vekin a hlan ah milai tisa sual sal ihsin Pathian riantu, Pathian lunghmuizawng tuahtu dingah sersiamthar, "Pathian in ka fa, tiah a kawh mi" kan si zo. Pathian in milai a sersiamnak san cu amai hmin sunlawinak hrangah asi Isa. 43:7, Ps. 86:9. Milai tluksiat hnu ah Pathian in man pek in in lei sal zo 1. Cor. 6:20. Kan man cu Khrih ih thisen asi. Man in in leitu ih duhnak, tumtah mi, a hmin sunlawinak hrangah a nung ding kan si (1 Cor. 1:23). Ziangkim kan tuahnak cu Pathian hmin sunlawinak hrangah asi 1 Cor. 10:30. Zumtu pawlin ziangkim kan tuahnak hmuahhmuah cu Pathian hmin sunlawinak, Pathian lungawi zawng hrangah asi. Zumtu pawl tuahnak, nitun nun cu a hlawhtling maw ti ah cuai kan thlai tikah zumtu pawl tuahnak le nitin nun cun Pathian hmin a sunlawih maw, Pathian lung a ti awi maw, Pathian lunghmui zawng le tumtah mi asi maw, Pathian fa le pawl hrangah thatnak a rahsuakter maw ti hi zoh asi sawn.
Mizia Pahnih:
Milai pakhat cu Thlarau in a hrinthar, a sersiamthar ve ten a sunglam thlarau cu a nungih Pathian thawn pehzawm awknak thar a nei. Curualrual in, hi lei taksa in kan um sung cu tisa mizia khal a hlo dah lo ih milai pakhat sungah Thlarau mizia le tisa mizia cu an sual aw, an do dal aw ringring asi. Tisa mizia cun sualnak, Pathian dodal zawngin a hiar, a duh ih a caak theu. Curuangah mi zo khal tisa mizia in a ukmi, tisa mizia sal ah a tang laimi, tisa mizia ihsin a suak mi duhnak, tumtahnak, hiarnak pawl a riantu cu thihnak lamzin a zawh rero tinak asi. Asinan, mi zokhal, Khrih ah nung in, Thlarau Thianghlim thununnak hnuaiah a nungtu cu Pathian thawn nitin ke a kar tlang ringring tu asi. Thlarau Thianghlim cun zumtu pakhat cu nitin nunah Pathian thawn nai aw sinsin ding in a kai hruai, fimnak a pek, siatnak lak ihsin a hum, Khrih ah lungawinak famkim a neihter ih ziangkim nitin nunah hmuh ton mi hmuahhmuah cu thatnak, Pathian thawn nai aw ter tu sawn ah a canter.
Thansohnak:
Zumtu pawl cu thlarau lamah tthang ringring ding kan si. Zumtu tlarau nun hi thantawp ti a um lo. Kumkhua nunnak vanram ah Pathian thawn hmaiton in kan ton awk tik lawngah milai cu a siat thei lo, le sual thei lo mi ruangpi thawn kan thuam aw dingih theihnak famkim, hmuhnak dik, le a tlamtling mi lungawinak famkim thawn kan thuam aw ding asi. Curuangah, zumtu pawl cu leitlun ah kan um sung hmuahhmuah cu nitin te thlarau lamah thangso vivo ding kan si. Tthannak hrangah hmanrua pathum a lotheihlo in hman tul mi a um: Thlarau rawlngai (bible siarnak le zirnak), thlacamnak, le zumtu dang pawl thawn pawlkom awknak tla ansi. Milai taksa cun thli, rawl, le tidai a tul vekin zumtu pawl thlarau nun thangso dingin Bible siarnak, thlacamnak le Pathian milesa pawl zumtu dang pawl thawn pawlkom awknak a tul hrimhrim asi.
Ziangkim kan nitin nunah kan thlarau nun lam in siatsuah tu, Pathian thawn in hla aw ter tu, kan tisa mizia ticak tertu, midang in hua ter tu, midang inhmu sual ter tu, midang duhdawtnak a siatsuahtu tongkam, tuahnak, ruahnak, hmuhnak, theihnak, pawlkom awknak, hnatuannak, le ziangkhal kan thinlung Pathian thawn in hlat sinsint ter tu cu kanmah in siatsuah tu asi.
Cun khatlamah, ziangkhal, Pathian thawn in nai aw sinsin ter tu, kan thinlung tangdawr ter tu, zumnak dik le thlarau lam thiltha tuahnak ah in hruai tu, Pathian thawn in nai aw sinsin ter tu, kan thlarau nun a thanglian ter tu cu, voi tampi tisa duh lo zawng asi theu hmanah, kan thlarau hrangah thiltha an si sawn.
Zumnak ah tthang sinsin in nitin nunah Pathian thawn nai aw sisin in Thlarau in Pathian thawn kutkai in a feh rero tu cu leitlun ah mi lungawi bik, mi cakbik, le mi thlawsuak bik khal asi.