Kalvary Lamzin ihsin zir suak mi hrekkhat pawl:

Lesson #1. Self control test
Bawi Zesu in “Nan lak ihsin pakhat in in zuar ding” a ti tikah, a dungthlun tu pawl cu mangbang in zo asi pei tiah an sut awk zawk rero. (Jn.13:21)

Q. Na kiangkap um mi pakhatkhat kha nangmah that tu ding, a lo zuar tu ding, a lo thangsiat rero tu ding ti thei aw la ziang na tuah ding?

Zir ding: Bawi Zesu in amah zuar tu ding Judas kha a dungthlun tu dang pawl theihtheih dingin ziangtik hmanah (thinheng langter in) a mitsen thawn mithmaisia in a zoh dah loih a thlei dang dah lo, huatnak a ti lang dah lo tinak asi. Mah that/zuartu ding le a duhdawt zetmi a dung thluntu pawl khal rualran ten pehtlai thei, kaihruai le thlawsuak pe rero thei tu Zesu nun/mizia zoh tikah mangbangza pitling nun zir ding a um asi: 1) Mah le mah thunun, neh, sup awk thei nak maksak (total self control) a neih mi a ti lang, 2) Thinlung phur hlawptlo nak (emotional feeling) parah hngat aw aw in a cangvai mi asi lo zia a langter, 3) amah a duhdaw tu le amai siatnak hawl tu pawl parah thleidannak a neih lozia a langter.

Nangteh: Na kiangkapah nangmah a lo hua tu le duhtu, na duhmi le huat mi pawl karlakah thleidannak nei lo ten rualran zetin na pawlkom, pehtlaih thei hai maw? Na kiangkap um pawlin na tongkam na tuahnak le mithmai ihsin zo na duh ih zo na hua ti awlai ten an lo thei mei maw? Na dunglam ah, na mit hmuh lo ah, a lo zuar thlai rero tu, na siatnak hawl rero tu ti thei nacingin na kiangkap um mi pakhatkhat cu hnisiamso le lungawi ten na pawlkom thei ding maw? Cutin, hmailam ah a lo zuar thlai tu ding ti thei nacing in thiltha tuah dingin na hmaiah Pathian in tuanvo a lo pek lai ah lungawi siamso ten thiltha na tuah thei ding maw? (Hni suamso in mi siatnak tuah si loin thiltha tuah lam sawn).

Zumtu pitling sinak hi kan duhdawtmi le in duhdaw tu pawl parah kan tuah mi hnakin in hua tu (kan mah in kan huat lo hmanah) parah kan tuahnak (in hua tu pawl in an tuah vekin tuah ve lo) nakin a lang theu. Kan parah zianghman thiltha an tuah sal ding beiseinak nei lo lawng si loin kan siatnak tuah tu ding an si ti thei nacing thiltha tuahsak ding cu Khrih ih mizia lungput lawngin a tlin mi asi. (A tawngdah “experience” dah tu pawl cun sim ding an thei ding). Ziangtluk a har kha a sile Khrih dungthluntu, Khrih hmeuihmel keng dingin nunthianhlimnak lamzin a zawh tu pawl cu ni nikhatkhat ah an tawn le tuah ding mi asi).

Will you pass the (leadership) test? Cuai thlainak ah na tling ding maw?


Lesson #2. i) Love test

Q. Thiltha na tuah tikah ziangvek ruahsannak thawn na tuah theu?
Mi tampi in mitha si duhnak, mai miphun pi, kawhhran pi, pawlpi, rualpi, sungkhat laina, mai lamtang, misa pawl hrangah thiltha awlten an tuah theu. Thiltha na tuah mi ihsin ziang na beisei theu?

“Thutak ka lo sim, tui ni ah paradise ah ka hnenah na um ding” Lk 23:43.

Milai tisa mizia sinak thawn cu kan lung a awi le kan aipuang tik can ah midang (kanmai hrangah thathnemnak a nei leh ding tiah kan ruah mi parah) hrang thiltha tuah a awl te. Asinan, a thizik cuahco, a naa tuk tiah a hrum rero, leitlun mualzapho nak sangbik dinhmunah a ding tu, leitlun milai zohman in an dinpi ngam lo mi dinhmun ah din lai ah leitlun milai pawlin misual bik thitlak an timi mi pakhat pai parah duhdawt lainatnak langter cu thil harsa, milai tisa mizia in a tlin lomi asi ti a fiang.
Zesu cu a taksa vuaknak vualah a thi zik cuahco, a hrum rero, a hnuk a cat zik cuahco. Asinan, misual pai parah a duhdawt lainat nak cu a hmun ringring ih rundamnak a pek.

Na nitin nun ah, “midang duhdawt thei khal ka si lo” tiding can, puhmawh ding na nei dah maw? Khros parah Zesu kha zoh hnik! Leitlun milai pawlin mualphonak sangbik dinhmun le hrem awknak sangbik, misual bik dinhmunah an dinter lai khalah a duhdawt zangfah lainatnak cu a hmun ringring-misual a rundam.

Mi zovek hnen khalah ziangvek dinhmun isi khalin, “Zesu in a lo duhdawt ahcun ka lo duhdawt ve asi” ti thei tu zumtu cu mi pitling asi.

ii) Power test
Bawi Zesu cu leitlun mualphonak sangbi, khross parah a um laiah, a huham cahnak, a Pathian sinak sete hman a hlo lo, misual a rundam thei thotho. A taksa parah zianghman upat tlak le sunlawih tlak khal a um nawn lo. Asinan, milai nunnak a runsuak, a rundam thei lai thotho.
Zirding: Leitlun in a lo hua, a lo thangsiat, a lo hrem, a lo do, a lo ticau khal asile Khrih ah na dinhmun le huham cahnak a hlo dah lo, a kel a awh ringring asi. Tisa in na cah lo laifangah, Pathian huham cahnak cu na parah a hmun sawn asi. Na kiangkap milai pawl tongkam parah hngat aw tahratin Pathian in na parah thu a then dah lo. Tuisun ah nangmah in na tuah mi in na thaisun cu a tuahtha in a tuahse ding asi. Midang in na parah a dik lo pi’n an lo tuahsiat tam poh le ziangvek huham cahnak thawn Pathian cu na sunglam ah a cangvai timi a lang sinsin ding. So (thir) an ser tikah a sutnak sobul a rih poh le ziangtluk a thir a hak ti sodeng pa in a thei sinsin ding. Asinan (dik lo zetin) leitlun hmanrua hmangin hminthatna, sinak, thil le ri, dinhmun na ngah mi pawl hmuahhmuah cu fanghi vekin ni khatkhat ah an zam hlo theh fawn ding.
Satan in Pathian sersiam mi milai parah a tuah thei patawp, thihnak a thlen ih Zesu Khrih a thawhsal tikah Satan thiltitheinak sangbik cu neh in a um zo nak thu a tilang asi.

iii) Zesu in amah le amah a hum awk a tul lo.
Leitlun in a lo hua, a lo thangsiat, a lo dodal, a sethei bikin a lo tuah, zianghman ah a lo siar lo, a lo hrem, dik lo zetin sual a lo puh khal asile Khrih ah na dinhmun na fiang, a fel asi ahcun nangmah le nangmah na hum awk a tul lo, na dingfelnak le thatnak na aupi rero a tul lo. Leitlun milai pawl cun midang siatnak thawn anmai sual khuh an tum rero theu. Khrih cun miding mifel a sinak cu leitlun ah a ausuahpi rero a tul lo.

iv) Satan in na parah a sebik a tuah thei mi cu tisa thihnak asi ih cu khal cu Khrihfa pawl hrangah sunlawihnak sangka ong aw sawn mi asi. Nangmah na dingfel asi ahcun mi in na parah dik lo zetin an tuah mi hmuahhmuah cu na hmailam ah a lo cawisang tu sawn an si na hmu ding.

v) Thihtiang thulunnak: Khrih in a thu awih nak a langter, thihtiang Pai thu a lunnak nun hi zumtu, Khrih dungthlun tu pawl thlun ding mi asi. (A harsa ti uhlaw!).

Lesson # 3. Khrih a thosal

Nehnak cihnih: leitlun mi pawl nehnak le Krih ih nehnak

i) Leitlun mi pawl nehnak: leitlun sakhuanak (Judaism) hotu pawl cun Khrih cu an zuar ih Rome cozah ralkap pawl hmangin thing khross parah an khenbet: Judas Ishariot le Judaism hotu pawl nehnak cu leitlun cozah pawl hmangin le mipi bum tahratin “Zesu cu thithlak asi” tiah dik lo zetin zuar thlai awknak in asi; Judas ih mi nehnak cu amai hlawknak hrangah sumpai ngah, mi zuar thlai in asi. Cuhmuah hmuah cu Satan hmanrua an si: Leitlun biaknak, sumpai ngaina tu, le leitlun kumpi lal pawl, dik lo zetin midang siatnak tuah le thuphan pernak pawl hi leitlun mi pawl in nehnak an co thei nak ding hrangah hmanrua tha asi theu.
ii) Khrih ih nehnak cu “tuarnak” in asi: leitlun mi in sual an puh tikah a kaang ang lo ten a cip men, a tuar cuahco ih leitlun (satan) in a tuah thei patawp (final weapon) thawn a se thei bik a tuah hnu ah Khrih cu a thosal-nehtu sawn asi.
Nangteh zumtu na sile, leitlun hmanrua hmangin leitlun nehnak na hawl ding maw, Khrih ih lamzin na zawh ve ding?