JEZEBEL THLARAU THU=======

http://heavenawaits.wordpress.com/
Bible sungah kan hmuh thei mi, Siangpahrang Ahab ih nupi kha a hmin cu jezebel asi ih Baal pathian lem bia le Pathian kamsang dik rak do le that tu asi.Israel siangpahrang, Ahab a hruai sual hnu ah Israel miphun pawl, Jehovah Pathian tlansan in pathian lem (satan) be dingin rak hruaisual tu asi. Amah cu nunau kamsang (prophetess) vekin a umih pathian lem kamsang 850 lai kha amai kuthnuai ah an um.
Jezebel ih sungah hna a tuantu thlarau sual kha hnam le polsia thlarau, Pathian thutak do tu le Pathian hriakthih mi a fale dodal tu le that tu asi. Cui thlarau cu tuini tiangah kawhhran sungah milai, zumtu ti aw pawl thlarau cu thunun in nasa ten hna a tuan rero lai asi, ti ah mi tampi in an zum.
Cutin Jezebel thlarau a cangvaihnak kawhhran sungah Jehu vek paral tha le Pathian hriakthih mi an um lawngah Jezebel thlarau sual cu neh le dawisuak theih asi ding tiah sim asi.
Thlarau lam theihtheinak (Discerning spirit) thlarau laksawng co ti aw pawlin an sim dan vek asile, Kawhhran sungah jezebel thlarau in mi milai (Zumtu ti aw pawl) a hmang tikah a hnuailam vekhi an umdan, cangdan, mizia theih awlsam bik cu asi, an ti:
1. Jezebel thlarau in a tumtah mi cu mibur umnak, khawsung, kawhhran, le hnatuannak khalah thuneihnak a kutsungah ret, thunei tu pawl a thununnak hnuai ah ret, canpualtha hmuahhmuah a kutsungah ret, larnak le midang ngaihsak mi sinak asi;
2. A tlunih a tumtah mi pawl tuahsuak dingin Jezebel thlarau cun midang siatsuah tahratin hna a tuan theu;
3. A kuthnuai ih a ret thei mi pawl cu a thunun thei zetih a aat in an aa theu;
4. Midang thunun theinak ding hrangah thuphan khal a per ih thu lakkawi a thiam tuk;
5. A langdan ah ral-vek in a cangvai thei, asilole nemzet, dinkzet, thinnem zet, nel-umzet, thianheng thiam lovein sisiin bumhmang, theihtheih har zet, a cancan cu nel umzet, sualnak nei lole thinheng thiam lo vekin tla a lang thiam;
6. Midang sawisel cu a cak ngaingai ih thihhngam in midang siatnak cu a sim thiam tikah a thunun duh mi pawl cun an zum thei zet, asinan Pathian thutak lamzin dik taktak ah zohman a kaihruai dah lo; khatlamah a thunun tummi pawl parah ttih tla a tarh theu;
7. Amah le amah ziangtik hmanah mawh in a thei aw dah lo, thinlung takin a sir aw dah lo;
8. Thinlung sung muril ihsin ngaidamnak le sual sirnak taktak a nei dah lo vekin a thunun thei mi pawl khal an sual sir in Pathian thutak le Thlarau Thianghlim thununnak hnuai ah tuhlut aw lo dingin lamzin a khamsak theu;
9. Hliamhma a put mi pawl siatsuah, thangsiat tu ding ah midang lamtang, thunun thei mi a tuah vivo, a thunun duh mi milai pawl cu helebawi law tiah a zuam ih an duhzawng tuahsak nakin siseh sumpai le thille ri, cantha zoh in a kuthnuai ah a thunun thei hlan lo a zuam;
10. A thunun duh mi, a kut hnuai ah a ret duh mi pawl ih riahsiatnak, lungawilonak, upat le cawimawi an duhnak thinlung le khatlamah an ning hannak pawl cu a lamtang le a kuthnuai ah a ret thei nak ding hmanrua ah a hmang theu;
11. Amai thuhla rel asile a hua hlehle, a thip hliahlia, asinan mdiang in amah ruangah ziangtiang ziangtin an tuar ti mi zawnruahnak sete hman a nei lo (she has no sense to symphathize for others’ feeling);
12. Midang pawl kha amai lamtang ah a tuah thei nak ding hrangah hmanrua a hman theu mi lakah pakhat cu amah kha midang mawhnak ruangah, dik lo zetin hliamhma tuar tu dinhmun vekin a um theu (she tend to play the role of her victims herself, in order to gain sympathy).
13. Cuticun dik lozet in a tuahsiat mi pawl cu midang mithmuh ahcun misual sawn in an langter theu;
14. Thuphan a per ih amai thuphan per mi lala amah in a zum, theu. Thutak a dodal nacing in thutak tantu le dinpi tu, thutak hrangah thihhngam vekin a cangvai theu, alinglet in a lang aw ter theu. A sinak diktak asilomi mipi hmaiah a langter ringring tikah mi a bummi le thunun mi pawlin asinak taktak an thei dah lo (She always has double faces);
15. Voi tampi cu kawhhran upa luleban siseh zung hnatuan kai le khawsung upa pawl thuhnuai ah a tuhlut aw der theu tikah cu pawlih rinsan zetzet mi asi theu;
16. Cutin mi upa le hlawknak pe thei tu dingah a ruat mi pawl hnenah sex (hurkhuannak) tla hmanrua ah a hmang theu;
17. Jezebel thlarau in a cencilh mi pawl cu an thinlung a kharvar zet (intelligent) theu ih mi tampi a bum ngah theinak ding hrangah mithmai phunphun in a lang thiam;
18. A thin a rang zet theu ih timtuah cia loin a cangvai theu tikah a (ttongsual) cangsual theu;
19. Midang thin a tinat tikah zianghman sir awknak le zawnruahnak a nei dah lo, a tuah mi cu ziangtik lai khalah a dik bik in an thei aw ringring;
20. A tuah mi in ziangvek rahsia a rah khal asile mawhphurnak anla duh dah lo (she is irresponsive);
21. A hamtam ih amai hmaikhua sialnak ahcun midang zovek siatsuah khal a pawi ti lo;
22. A cancan cu awl-ai ten a thin a heng theu;
23. Milai nunphung pawlkom awknak dan le dan lengla ah a cangvai theu (Fail to conform to the common social norms, “outlier”), midang in ziangtin in hmu timi ningzah a nei lo;
24. Amah le mah dik bik in a theih awk ringring tikah couseling tivek khalin a bawm thei lo;
25. Piangthar ti aw tla a si thei, asinan a pathian biak dan le nuntu zoh tikah a sakhua nun cu pawnlang te asi;
26. Jezebel thlarau in a celcilh mi le a thunun mi pawl hi a tam sawn cu nunau an si theu, cule an pasal pawl hi nu le pa sinak (sex) hmangin asilole thu pakhatkhat hmanrua ah hmangin an thunun theu;
27. A cancan cu mipa tla Jezebel thlarau sual in a kai theu;
28. Jezebel thlarau in a thunun mi pawl cu polsia thlarau sual nei vekin an lang ciamco lo; cutin sisawn loin sakhua mitha le nunau kamsang (prophetees) Pathian mihman le kawhhran sung ah a tangkai zet tu, midang in an langdan an zoh tikah an upatzet mi le midang thunun thei zet tu tla an si sawn theu;
29. Kawhhran sungah sakhua cangvaihnak lamah a zuam zet theu, cule a thinlung sungmuril ah a tumtah le duh bikmi cu midang thunun theinak (controling) asi ih cuticun kawhhran sungah Thlarau Thianghlim hnatuannak dodal asi;
30. A tamsawn cu nupi pasal nei zo an si deuh theu.
====================

==================
JEZEBEL THLARAU- PART 1

By Francis Frangipane; Lettu: Hre Mang

Khuahlan ral, ral do awknak, Elijah le Jezebel do awknak a rak um. Himi khuahlan ral do awknak ahhin Elijah hin Vanlam au-aw, sual sir aw dingin Pathian in milai a kawhhnak au-aw ai a awh. Cutin Jezebel thlarau cun “Sual sirnak” dingin Pathian kamsang pawl au-aw a do.
HImi khuahlan lai ihsin ral do awknak thu hi theifiang dingin Elijah le Jezebel thlarau thu Bible in a sim mi kan theihfiang hmaisak a tul. An pahnih in khatlam le khatlam ah tanla tahhratin a kumkhua do aw mi an si. Elijah thlarau cu a ral a tha maw; Jezebel thlarau khal raltha le ningzah nei lo asi. Elijah ih thlarau cu Satan le a ho pawl parah a kut a hngam in a rorum maw; Jezebel thlarau cu thutak dodal nak ahcun a sual raptlak asi. Elijah cun Pathian thu le lamzin a sim rero lai ah Jezebel cun hnamsia, pol, le thlarau sual, bum awknak thu pawl hmangin milai a fehsualpi rero. Elijah cu Pathian kamsang pawl lakah hotu a rak si ih amai kut hnuai ah mi tampi, Pathian kamsang, Pathian tongkam milai hnenah rak simsawng tu an rak um. Cutin a rak si laiah Isreal ramah Pathian kamsang hmuahhmuah cu Jezebel in a rak thah ciamco ih a neta bikah Elijah lawng a rak tang ( I. Siangpahrang 18:22). Baal pathian kamsang lem 450 pawl le Asherah pathian lem kamsang lem 400 pawl cu Pathian kamsang neta bik pakhat, Elijah thawn an do aw aw: zo ih pathian cu pathian ngaingai asi, ti ah an rak zuam aw aw: Satan le a ho pawl-pathian lem pawl cun Khawzing Pathian humham cahnak an rak do asi. Himi kamsang lem 850 pawl hi, satan kamsang, kamsang lem, “Jezebel rawl einak cabuai parah” rawl rak ei tu pawl an si ( I Siangpahrang 18:19). Hi pawl hi, thim thuneihnak in a rak suahpi thei mi, Satan le thlarau sual huham cahnak thawn a thuam aw mi, milai pacangtha cu an rak si. Zuam awknak a um tikah, Jezebel ih pasal, Siangpahrang Ahab in Israel ram ah thu a than ih pathian huham cahnak zuam awknak, hliah awknak ahcun mipi pawlin an ra zoh hai: Elijah ih Pathian le Jezebel ih thlarau sual pawl huham cahnak an zuam aw aw. An zuam awkdan cu awlsam te asi: zokhalin cawcang pakhat kha raithawinak maicam parah ret asi. Elijah in hitin a sim hai; “… nannnih nan pathian hmin ko uhla, kei khalin ka Pathian ka ko dingih meisa thawn kan kawhnak in sang tu tu Pathian ngai asi ding” ( I Siangpahrang 18:24). Baal pathian lem be pawlin an pathian an ko hmaisa: Nahzi paruk a rei cuahco, kamsang lem pawl pathian cun meisa a suah ta lo; nahzi 12 a liam cuahco tikah Elijah in a zawkzet thlang, “Nan au ring pi’n au uhla, nan pathian cu pathian asisi; a man lo tla asi thei, hmun dangah tla a rak feh tla asi thei…culole, a itthat thaw tuk ih tthang tla atul asi thei” (c. 27). Zanlam a thleng tlang tikah Elijah in raithawinak maicam tlun ahcun thla a cam, “Pathian in meisa thawn a sang ih hal-ral thawinak cu meisa in a kang ral….cuticun, mipi pawlin an hmuh tikah an hmai leiparah an kun ih hitin an sim, “Bawipa cu Pathian asi; Bawipa cu Pathian asi” ( I Siangpahrang 18: 38-39). Pathian hnen ihsin meisa cu mipi in an hmuh hnu ah Elijah in mipi hnenah kamsang lem pawl cu kai ding thu a pek ih an zate’n an kaih ih an thah theh. Hivek cantha a neih lai fangah, Elijah kha Jezreel ah feh tahratin Pathian huham cahnak thawn Jezebel kha a va that ding ah a ruat tla kan um men thei. Jezebel kha Elijah in a rak that lo. Cutilam si sawn loin Elijah kha nasa ten thlarau raldonak a do sunzwm vivo sawn. Cutin, Jezebel thlarau cun hnamsia pol-sia, thlarau sual pawl kha tilian vekin a thlah ciamco ih Elijah kha an cim ciamco tikah ttih le khur in beidawng cuahco in a um ih a tlan riangri. Ziangtin cutluk mangbangza Pathian in Israel mipi hmai ah huham cahnak thawn a umpi kamsang pakhat cu ttihnak thawn a tlan? A dinhmun cu a awl lo asi, a se sinsin. Elijah cu thingkung hnuai ah a to ih riahsia in thla a cam, amah hringtu pupa pawl hnakin tha cuang loin a thei aw aw ih Pathian hnenah a nunnak laksak dingin a dil ( I Siangpahrang 19:4). Ziangruangah hi tluk Pathian mi hman mi ropi cu beidawng in Pathian hnenah thih hman a dil sawn thlang? Jezebel thlarau sual le a ho pawlin an do, an cimbuai, an nam ciamco ruangah asi.Duhdawtmi, ka unau pawl, ka lo simmi hi I ngai hnik uh; Jezebel thlarau sual nan do neh ih nan dawi suak, thlemnak phunphun a hmanrua pawl khal nan kham thei tikah, nanmah riangri beidawng in le riahsia in tttihnak thawn nan khat pang lo nak dingah fimkhat uh; ziangah tile Jezebel thlarau cun a hnatuan nak dodal nawn lo dingin na thlacamnak, le sual do in rawngbawl sunzawm nawn lo dingin a lo ttihthaih ih a lo do sunzawm ringring asi. Thuanthu a pehzawm vivo lai hrih ….

Elijah le Jezebel ih do awknak cu milai thuanthu ah a pehzawm vivo lai asi. Bible in John tihnimtu thu ziang a sim ti theih hngilh hlah uhsi; “Elijah ih thlarau le huham cahnak thawn Bawipa hmaiah lamzin sial tu ding” (Lk 1:17) asi. Zesu in John tihnimtu thu a rak sim, “a ra ding mi Elijah cu asi” ( Mat. 11:14; 17:11-13). Elijah vekin John Tihnimtu khalin milai sualnak pawl a hmu ih sualsir nak ding hrangah tlang a rak au. A thu simmi thu a rak dawngsawng tu lakah uire insang, siangpahrang Herod le a nupi Herodias kha an rak tel ve. John in a rak hmaiton tikah Herodias in thawng in sungah a thlak ( Mk. 6:17-19). Asile, Herodias lungsungah ziangvek thim thuneihnak thawn ziang thlarau si hnatuan rero tu? John sung ihsin Elijah ih thlarau in sualsir nak rawng a bawl vekin Jezebel thlarau kha Herodias sungah hna a tuan ve asi. Jezebel in nelrawn ram ah Elijah parah a rak tuah vekin, Herodias in John Tihnimtu parah a rak tuah asi; ttihnak le beidawnnak zawngin thinlung buainak thawn Pathian siahhlawh pa cu a rak do asi. Pathian Thlarau cu thuro vekin Zesu parah a tum lai rak hmu tu, Pa Pathian aw rak thei tu rori in a mit in a hmuh mi cu a ringhlel ih thu a sut ter lai asi (Mat. 11:3). Thumkawm Pathian cu milai dinhmun in a rak theifiang tu mi pakhat, Pathian siahhlawh cun a thinlung sungah amai mitin a hmuh mi rori cu rinhlelh nak a pai asi. Cuticun, Jezebel hrangah cantha remcang a ra thleng..suahni lawmnak ni” (Mk.6:21).

“Cantha remcang” a thlen tikah Herodias cun a fanu hmang in John ih lu cu tan dingin a pasal Siangpahrang thuneihnak a hmang ta riai. Cuticun John in Pathian thuthangtha, sual sirnak thu a simnak, Elijah ih thlarau le huham thawn thu a rak simnak a lu cu tansak asi. Cuticun, tikcu rei lo te sung cu Elijah ih thlarau le Jezebel ih thlarau do awknak cu a tawp hrih. Elijah A ra sal ding! Zesu leitlun ah a rat tikah John Tihnimtu in Elijah ih thlarau le huham cahnak thawn bawipa’s lamzin a rak sial vekin Bawipai ni rapthlak a ra thlen sal hlan ah Elijah a ra sal ding (Mal. 4:5).


Pathian in Elijah ih thlarau hmangin John Tihnimtu cu a hmang. Elijah cu a ra sal leh ding, Bawipa’ ni rapthlak a thlen zik tikah. Cuvek thotho in Jezebel thlarau khal leitlun ah milai thinlung sungah nasa ten hna a tuan ve asi.
Na kiangkap na zoh asile, nunau hurkhuannak, mipa thuneihnak dodalnak, kawhhran sungah Pathian thutak dodalnak, le sualnak a pung rero mi lakah Jezebel thlarau cangvaihnak na hmu maw? Pathian siahhlawh hmin putu rori hmanin dik lo zetzet (immoral) hna an tuanih an cangvai mi na hmu maw? (Thup. 2:20). Jezebel ih thlarau cu leitlun milai pawl thinlung sungah nasa ten hna a tuan ih hmun a khuar vekin Elijah ih thlarau khal a ra sal cingding ti theih hngilh hlah!
Thuthlunghlun sungah ziangtin Jezebel cu siatsuah asi ti kan hmu: Israel siangpahrang thar, Jehu in Elijah ih dungthlun Elisa hnen ihsin Pathian tilhfial a dawngih Pathian in Jezebel (milai nu) parah a thutthen nak cu a rak tuah suak. Jehu cu a rangleng thawn a milesa pawl hruai in Jezreel ah Jezebel that dingin a feh; Jezreel a thlen hlanah siangpahrang pahnih in an rak tawngih “Daihank thawn ra nasi maw, Jehu?” tiah an rak sut tikah “Na nu Jezebel ih hurkhuannak le hnamsia pawl tampi lakah ziangvek daihnak si a um thei ding?” ( II Siangpahrang 9:21-22) a ti ih Judah le Israel siangpahrang an pahnih ten Jehu cun a thah hai. Cuticun Jezebel ih umnak Jezreel ah a feh ih Jezebel cu thah in a um. Jehu in “Zo si ka lam tang?” tiah a ausuak tikah jezebel rak kiltu tilper pawlin Jehu thu an ngai ih “Hi nu hi hlawn uh” a ti tikah tilper pawlin an hlawn thlak ih a thisen pawl phar parah a man aw aw ih a ruang cu rangin an pal (II Siangpahrang 9:30-33). “Phum uh, a mah cu siangpahrang fanu asi” a titikah Jezebel cu a luruh le a ban le a ke lawng a tang.

Tui kan san ah Jehu ih thlarau vek hi rawngbawltu pawlin kan tul mi asi; Jezebel thlarau in a luahkhat mi pawl milai cu zangfah ding kan si ko nan thlarau sual parah zianghman zangfahnak nei ding kan si lo. Jehu in Jezebel parah zianghman zangfahnak khal a nei loih thleng awknak le rem awknak ding khal zianghman ruahsan ding a um lo asi ti a hmuh tikah Jezebel thisen cu pharpar ah a man aw zelzel lai ah a ruangpi cu a rang thawn a pal cih men asi kha! Khristian duhdawtnak le ngaidam nak nun kan nunpi lai ah Jezebel thlarau sual par hrimhrim ah zawi awinak, nemder thlaknak le cawhpawlh nun nei ding kan si hrimhrim lo. Jezebel thlarau in hurkhuannak le hnamsiava thlarau sual pawl thawn kan ram milesa a cimneh lai fang ah daiten lenglam daihnak le remnak lem hnuai ah daiten um men ding kan si lo. Thlarau sual pawlin milai thinlung cu sualnak le thutak dodalnak thawn a kaihrem ih, Pathian in thlarau sual ral do dingin in kawh lai fangah ttihnak le lungbuainak ruangah lenglam pawnlang daihnak remnak a lem menah cawhpawlh nun thawn daiten um ding kan si lo.
Jezebel that tu pawl kha tilper, Jezebel rak kiltu pawl an si ti na hmu ding. Mi hrekhat himi casiar tu lakah tilper, Jezebel thlarau sual ih sal nan um asi; Pathian lamah ttang aw la, Jezebel kha sangka te ihsin hlawn thla aw. (Na kiangkap ah hurkhuannak thape tu, thutak dodalnak, kawhhran sungah Pathian thawkkhum mi kaihruai awknak le rawngbawlnak dodal tu, na kiangah na hmu asi lomaw, cupawl sal ah na tang maw, Pathian lamah tang aw la do hai aw!) Hihi thei ringring aw, Jezebel thlarau cun na sungih um mi thlarau huham cahnak kha hmang thei lo dingin lo nambet a duh asi, Khrih hmin in do aw la, a thlemnak hmuahhmuah kha do aw. Na kawhhran, na innsang, na rualpi pawl mi lakah Jezebel thlarau sual in a luahkhat mi, a hman mi le sal ah a tuah mi pawl kha an sungihsin cui thlarau sual pawl suak dingin Khrih hmin in dawisuak sak hai aw! Hitin thlacam aw: Jezebal thlarau, Jesu Khrih in a fale pawl hnenah huham cahnak le thuneihnak in pek mi hmangin na kaihrem mi pawl sung ihsin suak aw! Na sal tang pawl kan thlah asi! Tilper, na sal pawl kha thu kan pek asi, a lo dawi suak tu ah an cang zo as i!

Sualtintian suangtuahnak, na khawruahnak sung ihsin hlawn aw! Na thlarau bal ter tu, thlarau sual pawl, suangtuahnak bawrhhlawh pawl kha Khrih hmin in nehnak thu puang aw la na sunglam cu Khrih Thlarau in lo luahkhat sheh! A thianghlim le a nungmi Khrih hmin in do awknak thianghlim ral cu Jezebel thlarau hnenah kan puang asi! Amen.
===

JEZEBEL THLARAU- PART 2

By Francis Frangipane

Jezebel in Pathian Thlarau Thianghlim thuneihnak a dodalnak
Jezebel thlarau hin pastor le kawhhran sungih rawngbawl tu lakah thleidan awknak suahter a tum theu ding. Hmun tampi ah kawhhran sungah Jezebel thlarau a cangvai tikah kawhhran rawngbawl tu pawlin namen lo buainak an ton mi thu pawl in sim theu asi. Milai buainak dunglam ah a cangvai rero mi cu ziang asi tile, Satan in Thlarau Thianghlim thuneihnak a dodalnak kha asi; culakah Jezebel thlarau sual hnakin nasa deuh in a cangvai tu an um lo men ding.

Jezebel thlarau in kawhhran kaihruai awknak a do ih siatsuah a tum tikah, thlemnak, theihsual awknak, hnamsia le pol, ttihnak le thanaunak, ziangvek hmanrua a hmang khal asile a tumtah mi cu kawhhran kaihhruai awknak ah Thlarau Thianghlim hriak thih mi thlarau thuneihnak dodal asi. Zesu in a rak simmi cu Jezebel neh tu pawl hnenah “ram uknak thuneihnak tiang a pek ding” ( Thup. 2:26-28). Jezebel thlarau cun Pathian Thlarau huham cahnak le thuneihnak kawhhran hruaitu pawl hnenah a pek mi cu tthentthek, siatsuah le dinhmun hman lo ah ret a tum.
Kawhhran hruaitu in Pathian thuneihnak thawn kawhhran a hruai lo ahcun, kawhhran lamzin dik ah a feh thei lo: thinlung buainak, hmuhsual awknak, thleidan awknak, mai hmakhua sialnak, buainak in kawhhran cu a luahkhat theu. Thlarau Thianghlim thuneihnak hnuai ah tulut awknak hi humhim awknak umsun asi: innsang le kawhhran cu Thlarau kaihruainak hnuai ih tuhlut awknak lawng hi humhim awknak umsun asi. Satan in kawhhran sung ih Thlarau thuneihnak siatsuah a tum tikah kawhhran hruaitu, tuu khal pa kha a rek tarh thei hnu ahcun tuu rual pawl cu a duhduh in a tawlrel, a tthentthek ter thei asi. Kawhhran sungah Jezebel thlarau a cangvaih theunak pakhat cu kawhhran hruaitu, pastor le thlacam tu pawl lakin a suak duh theu. Kawhhran sungah ruahdan, hmuhdan, pomdan dangdang a suak tikah siseh kawhhran kaihhruai awknak rorel khawl in thu a khiah mi hnakin thu thansawn thei vekin a um an um tikah siseh mai canpual le tuanvo cu kawhhran pumpi hrangah a tha hleice cuang vekin a thei aw aw an um tikah siseh Jezebel thlarau cu kawhhran sungah alut ih tthenthek awknak suahter dingin a cang vai rero zo asi ti a theih.
Voi tawmpi cu Pathian hnen ihsin a ra mi vekin ruahnak le pomdan mi hrekhat in an ausuahpi theu ih kawhhran rorelnak tluangtlam ten a feh rero lai pahbal in mi hrekhat thinlung sungah thu a suak tikah Jezebel thlarau ke thlaknak ding hrangah sangka a ong aw zo asi ti theih a tha.

Kawhhran dintu le kaihruai tu upa pawl thlarau sunmang hrang thlacam!

Pehtlaih awknak tha bik cu kawhhran thlacam tu pawlin kawhhran hruaitu upa pawl thlarau sunmang hrangah hlawhtlinnak dilin Pathian hnenah thlacam hi asi. Kawhhran hruaitu upa ih tuanvo cu kaihruai ding asi ih thlacam tu pawl tuanvo cu hruaitu pawl hrang le aiawh in thlacam asi. Thlacam tu pawl le rawngbawl tu pawl cu an kawhhhran kha kawhhran dang pawl vek si dingah tuah dingin kawh an si lo; kawhhran dang pawl vek si dingin zuam awknak cun buainak, rem awklonak a suah ter theu men sawn asi.
Pathian in zovek kawhhran khal tumtahnak tuanvo nei cio in a ko hai. Cuticun kawhhran dintu, kaihruai tu pawl thinlung sungah a tumtah mi pawl cu theihter a si theu. Cuticun kawhhran rak din thawk tu an um nawn lo asile tuanvo nei tu hnenah Pathian in kawhhran a dinsan pawl cu a tanta vivo theu asi.
Kawhhran rak kaihruai, dintu, le upa hmaisa cu, ziangvek famkim lo te an si khal le, Pathian in innsang hotu ah a ret mi an si theu ( Mat. 24: 45). Kawhhran rak dintu, kaihruaitu upa pawl cu ziangtluk in famkim lo an rak si men ding nan, Pathian in thlarau sunmang le tuanvo a pek vek in kawhhran rawngbawlnak ah Pathian lamhruainak cu kawhhran member hnenah theihter in kaihruai ding an si. Kawhhran hruaitu, dintu in thlarau sunmang, Pathian in kawhhran a dinter san cu a phunphun in an thei fiang thei; midang thusim ngainak, thlacamnak, cabu siar nak, hruai tu dang thawn pawlkom awknak in siseh, ziangvek lamzin ihsin Pathian lamhmuhnak thlarau sunmang an hmu khal asile cucu kawhhran member le thlacam tu pawlin an kawhhran hruaitu thlarau sunmang hlawhthlinnak ding hrangah an lungkimpi, lungrualpi le thlacam sak a tul asi. Kawhhran thlacam tu lak ihsin mi hrekhat in kawhhran hruaitu upa pawl parah thuneihnak neih an tumih thu hla an tawlrel, Pathian hnen ihsin thu thasawn dawng vekin an um tikah, fimkhur uh, cuvek can cu jezebel thlarau a cangvai rero zo asi ti theihtheinak asi theu. Kawhhran sungah thlarau mi zetzet vekin thlacam taima zetzet tu pawl cu Pathian hnen ihisin thutha dawngsawng vekin an umih kawhhran kaihhruaitu upa pawl thawn an hlat aw vivo ih thangsiat relsiat awknak hmanrua hmangin midang ciahneh an tum vivo tikah, ralring uh, jezebel thlarau cu a cangvai rero zo asi. Zesu in Jezebel thu a sim tikah, “Amah le amah kamsang nu” a ti awk thu kha asim. Pathian hnen ihsin hriakthihnak tel loin mah te thlarau lam thuneihnak nei vekin a cangvai tu pawl, milai phuahcop kawhhran hriakthih awknak le, kawhhran kaihruai awknak tlaitluang dinglai dodal, ngaihthah in caihvaihnak pawl nan hmuh tikah fimkhhur uh, Jezebel thlarau a cangvai rero zo asi.
Kawhhran hruaitu upa pawl kaihhruainak thlun loin dunglamah a thup le a thli in lakhran awknak, simsiat thangsiat awknak pawl kha thlun loin nan kawhhran hruaitu upa-senior pastor, kawhhran dintub pawl thlarau sunmang a famkim theinak ding hrangah thlacam sawn aw. Thlarau sunmang a um lo asile dil aw la ca in ngan tahhratin thlacam sawn aw. Pathian in remzetin kaihruai awknak thlawsuah a pek asi!

Leitlunah sersiam mi pawl remrel dan, mangbangza pawl hi hmuh tikah a mangbang lo tu pakhatkhat an um asi ahcun cuvek milai cun Pathian sinak taktak a theifiang thei dah lo ding. Pathian in zalennak le nunnak cu a duh mi asi; asinan leile van sersiam mi zoh tikah ziangkim remzetin a um ter theh asi. Mit in hmuh theih thil pawl remzet in a rem hnu ah nunnak cu leitlun ah Pathian in umseh a tiih a ummi asi.
Lei le van le a sungih thil-um rem derhdi ten a sersiamtu Pathian cu kawhhran dintu khal asi. Leitlun le a sungum thil, nunnak nei le nei lo khal remzetin a ret hai vekin kawhhran sung khalah rem zet mi zokhal an mah le covo dinhmun cio ah remzetin a ret hai asi. Pathian in rem zetin amah a sersiam mi le a ret mi cu amah lala in a ngai pawimawh asi. Paul kha (Dung 9:6), Pathian thawn an tawn awk tikah Pathian in milai hnenah fehin a tuah dingmi kha sim asi ding thu asi. Ziangruangah Pathian in hmakhat te ah Paul kha a dam ter lohli lo, Pathian in tuanvo a pekmi milai thuhnuai ah Paul kha tuhlut aw aw in damnak a ngah a tul asi ti a zirh asi. Pathian hnen thleng thei dingin Pathian in a remruat cia mi milai hmanrua cu hmangin a tuah dingah fial mi a tlun a tul asi. Paul kha Annanias hnen ihsin thu a theih tul mi a um.

Cornelius hnenah vangvung mi a lang awk tikah hmaikhat te ah rundamnak thu kha sim asilo, Simon Peter hnenah feh ter asi. Vangcung mi in hmakhah te ah Khrih ih rundamnak thu kha an sim thei lo maw? An sim thei ko nan Pathian in a ret cia mi milai hmanrua bungrua pawl kha a ngai pawimawh asi. Ziangruangah Pathian in Gentile pawl kha hmaiton in rundamnak a pek hai lo ih Israel miphun pawl hmangin Gentle pawl rundamnak cu tuansuak kherkher a tul? Pathian in amai remrel cia mi a ngai pawimawh asi.

Pathian in nan kawhhran kaihruai awkdan remreldan ruat mi a nei asi. Kawhhran dindan le rorel dan na duhdan ciah asilo tla le Pathian thawkkhum mi kawhhran remrel dan pawl kha upat aw. Hmun hrekkhat ahcun pastor in an kaihruai ih hmun hrekhat ahcun church coucil, kawhhran upa, tvp in kawhhran thuneihnak le rorelnak tuanvo cu remrel asi theu. Na duh khal le duh lo khal le, nan kawhhran kaihruai awkdan rorel dan cu upat aw, dodal zawngin cangvai hlah aw. Nan kawhhran kaihhruai awk dan le roreel dan hnuai ah na thlarau a thanglian thei lo ding ti na fiang asile na tthanlen theinak ding kawhhran dang hawl mei aw. Kawhhran kaihruai awk dan pawl kha na theihdan thawn a mil aw lo khal asile buainak, dodal awknak suahter hrimhrim hlah.

Kawhhran dindan kha a thupi bikmi asilo, a sungih nunnak thutak sawn kha asi. Paul in apostle, prophet, evangelist, pastor, teacher, tivek hmin pawl hmangin a sim; John in a sim ve mi cu Fathers, young men, children ti tongkam a hmang ve thung. Cun Peter in, elders, tuu khal (shepherds), le Pathian tuu rual, timi pawl tongkam a hamng ve. Ziang kawhhran kaihruai awknak khalah Pathian hnen ihsin thudawn mi a um asi ahcun thleng tul mi hrangah a man khal an pe ko ding; asinan mi pakhatkhat ruahdan le pomdan thawn a mil aw lo ti ruangah thleng rero ding asilo.
Jezebel thlarau hi kawhhran sungah a cangvaih veten, kawhhran sungih rorelnak relrem cia mi sungah a tuan thawk, a dodal thawk theu. Kawhhren hruaitu bik kha sualnak (immorality) ah a tluksiat ter thei lo asile kawhhran rorel tu lakah tthenthek awknak, lamtang tuah awknak a suah ter ding. Jezebel timi kha siangpahrang nupi, siangpahrang pa rak uktu, Siangpahrang thuneihnak hmangin Israel ram pumah thuneihnak rak neitu nu kha asi ti theihhngilh lo a tha; cuvek thotho in “kamsang nu” vekin lole thlarau mi zet vekin kawhhran a thuhnuai ah ret thei dingin a cangvai theu. Cuticun kawhhran rorelnak dinglai cu nambetin a umih hotu lakah tthentthek awknak a suak ih kawhhran thuneihnak cu an-hai in hruai tu pawl a tu-le-tu cemti nei loin meeting an to, tu an rel buai ciamco theu.
Mi zocio hrang khalah kawhhran sungah hmun a um asi. Cutin mi zokhalin Pathian in in pekmi hmun, canpual le dinhmun ah lungawi tawk loin asilo pi hmunah thuneihnak duh ah (Jezebel hmanrua ah cangin) an um tikah thlarau sual mai umnak ding hmun ah tha ten a um duh lo tu, nineta thutthennak ropi ni ah an thu relsak dingin retmi vekah an cang (Jude 1:6). Unau pa, ziang kawhhran sungah na um khal asile nan kawhhran rorelnak remrel mi kha upat aw. Na lungtur thawn a mil aw lo asile na lungtur mil deuh mi kawhhran hawl mei aw. Na lungtur mil zetmi kawhhran na hmu thei lo asile, asi thei mi cu, Bible vekin kaihhruai mi tiah na ruahmi, na thlarau sunmang (spiritual vision) famkim ter tu ding kawhhran thar pakhat din ding in kawh mi tla na si thei men. Ziang na tuah tik khalah, mahte phuahcawp thlarau thuneihnak suangbawl hrimhrim hlah aw; relsiat awknak, lamtang tuah awknak, le dodal awknak thawn na umnak kawhhran kha siatsuah dingin Pathian hriakthih mi kawhhran kaihruai awknak bungrua kha zianghman siar lo in um dah hrimhrim hlah. Cutin siloin na umnak kawhhran dintu le kaihruaitu hnenah Pathian in thlarau sunmang a pekmi pawl hlawhtlin thei nak ding hrangah na theitawk thlacam sawn aw. Cutin na um asile, Pathian in na umnak kawhhran le a sungtel pawl nunah a tumtah mi le remruat mi pawl pitlin nak hrangah Pathian hmanrua ah na cang sawn dingih Pathian tumtah mi cu a famkim sawn ding asi.
Top of Form
===
Jezebel Thlarau Fiah nak
Discerning the Jezebel Spirit
By: Francis Frangipane
Tulai san kawhhran tampi sungah zohman in an zohliah dah lomi, Jezebel thlarau umnak, bi-ruknak hmun le cangvaihdan pawl hliah hnik uhsi. Jezebel thlarau a relhnak, bi-ruknak kan hailing dingih cuticun a thuh awknak bu cu tthiatbal in siatsuah asi ding.
Jezebel thlarau cu ziang asi!
Thupuan, “ 2: 20, .”
“Asinan himi demnak ka lo nei, profet ka si ti aw nunau Jezebel na thlahthlam ih cui nunau zirhnak cun ka siahhlawh hrengsut pawl cu hurkhuannakah a hruai pengih, raithawi saserh pek mi tla a ei ter.”
A thlunih Bible bungcang ka hmanmi hi na duh le rak el aw la kawhhran pawl hnenah na duhduh na sim thei. “Ka theihmi pawl lakah zohman in kawhhran sungah sualnak tipung dingin thu an sim dah lo,” tiah na ttanhmun na khuar thei men. Na dinhmun cu ka thei thiam. Biak inn pulpit par ihsin nupa sualnak tuah le tisa caknak pawl cu ‘sual an si lo’ ti ah zohman in thu an sim ka thei dah lo na ti men thei. Jezebel thu kan sim tikah, kawhhran sungah thlarau sual cangvaihnak, sualnak hrampi, tisa hiarnak, hnam-sia-va cangvaihnak, le mipa thuneihnak dodalnak (mipa thunun duhnak) sualhram pawl thu kan simmi asi.
Jezebel thlarau thu theifiang thei dingin Bible sungah ziangtin asim ti kan theih hmaisak a tul. Jezebel hmin ngan hmaisa bik nak cu, dodalnak thlarau, thusia karhzai ter tu, thusia hmangin mi kuaipeng tu, nupi tha lo, Ahab Siangpahrang pai nupi kha asi. Jezebel thlarua sual kha Queen Jezebel sungah a cangvai ih 7 million Jews pawl, Pathian mi rin-um thawng sarih siarlo, Baal pathian lem hmai ah rak kuun ter tu kha asi. Jezebel thlarau cangvaihnak in Jews mipi pawl kha an Pathian thawn an thukammi a tlansan ter hai ih raithawinak thianghlim cu tlansan in pathian kamsang dik pawl kha an rak that (2 Siangpahrang 19: 14-18). Jews ram le miphun pumpi siatsuahnak, an thinlung le thlarau siatsuah tu kha za ah za Jezebel thlarau sual hnatuannak asi ti theih tluk in a hnatuan a rak cak ih mi a rak siatsuah thei. Cui thlarau cun santhar kawhhran le ramsung mipi pawl thinlung le thlarau a siatsuah rero asi.
Jezebel thlarau sual cu amah te fal zetin hna a tuanih midang parah thuneihnak nei dingin le midang pawl cu a thuhnuai ah ret dingin huham cakzetin hna a tuan theu. “Jezebel” timi hmin ih san hi hminsin a tha, “umpi nei lo” (without cohabitation) tinak asi. A san cu midang thawn umtlang a duh lo ih thlarau sual dang thawn hmunkhat ah khua luah tlang a duh lo tinak asi. Jezebel thlarau sual cu a thu hnuaiah a ret thei mi siar lo, midang zo thaw hman in a um tlang dah lo ding. Midang thu hnuai ah tuhlut aw vekin a um tik khalah amai miatnak ding, midang a kuthnuaiah a ret duhnak san a um lawngah midang thuhnuai ah tuhlut aw aw vekin a lang nan a thinlung sung tawdap ahcun zo thuhnuai hmanah a tuhlut aw dah lo.
Jezebel thlarau hi milai hmin pu in a suak hlanah thlarau in a rak um zo asi ti khal theih a tha. Jezebel thlarau cu a nu (she) timi tongfang hmang in kawh asinan a taktak ahcun nu-maw-pa ti a um lo. Thlarau sual cangvaihnak tampi in mipa thuneihnak hi an dodal theu nan Jezebel thlarau hi fim vervek nak danglam zet nei in, thazang hmang loin, nunau lungput hmangin cakzetin a cangvaihnak hi hminsin tlak asi fawn.
Jezebel thlarau in nunau hrekhat pawl a hmang duh zet; mipa dodalnak thinlung nei tu nunau pawl, mipa parah lungkim lonak thinlung ikfiknak a nei tu pawl, mipa in an ngaihsak lomi asilole mipa parah an duhkim lomi nunau pawl sungah hin Jezebel thlarau hi hna a tuan duh zet, ti khal theihcia a tha. Midang thunun duhnak thinlung cakzet nei nacingin mahte caknak le huham tlasam in a thei aw tu nunau, midang pawl kha kuthnuai ah a ret duhtuk tu nunau, asinan mah te thazang cak tawk loin a thei aw tu nunau pawl thinlung sungah Jezebel thlarau hin hna a tuan duh theu fawn. Cun, nupinu mipi lakah a pasal mualpho ko a kaa in a tongsuak tu (mualphoh tu), asilole a pasal kaihrem nak dingah thu pakhatkhat hman ding a nei ringring tu nui thinlung sungah Jezebel thlarau hi a cangvai duh zet; cuticun a pasal cu ttihnak thinlung thawn a kaihrem ih a duhduh in a mawng theu.
Mipa a kaihhrem nak dingah, nu-le-pa sinak (sex) le tisa hiarhalnak pawl hi a hmang ko na’in, midang parah thuneihnak, thununnak (midang control duhnak) hi a tumtah bik mi asi. Jezebel thlarau in a luahkhat mi nunau pakhat cun mipa a kaihhrem theinak ding hrangah tisa in dai awk tengteng a tul lo, a cancan cu a mitmeng le thu in a neh thei can ahcun a hman thei mimi hmanrua a hmang theu asi.
Thlarau raldo awknak a kau vivo:
A dungthlun tu pawl san ihsin electronic san a suah tiang ahhin Jezebel thlarau sual ral donak hmun a karhzai in a kau sinsin asi. Tuisan ah, Jezebel thlarau hin ziangvek hmun le can tiang khua a luah ih ziangvek tiang thlarau ral do awknak a suah ter asi ti simfiang a harzet. Bawi Zesu san lai ihsin tuisan (21st century) tiangah milai 300 million ihsin 5 billion kan pung zo ih thlarau sual pawl an pung ve cuang fawn lo, thlarau ral do ding kan nei mal deuhdeuh ding asi, tiah a ruat tu tla nan um men thei. Cutin si hman sehla, santhar media le calai phunphun pehtlaih awknak sung ihsin thlarau sual pawlin leitlun milai thlarau a purhban (thamban) mi, pehtlaih nak a kau sinsin asi,. John in hitin a rak ngan, Thupuan 12: 15, “Cui nunau fenhlo dingin, tivapi bangin rulhrengin a ka ihsin tidai sawp luihlo a phut suak.”
Hi tawk ah “tidai” atimi hi ‘tongkam” timi a kawk in a lang. Tulai kan san ah, “tongkam” le “mit hmuh thei zuk” phunphun cu tilian vek asizo ih milai thinlung le ruahnak sual ti pung dingin leitlun killi cu hmakhat te mittthep kar ah a hlehkaa theh zo. Tulai milai san thuanthu ah a rak um dah lo mi dinhmun ah kan tleng zo; Satan lalram ihsin a suakmi a bawrhhlawh mi, Pathian le thutak dodal nakin a khat mi, a cakzetmi thlarau sual thuneihnak le sual ti-pun nak sungah santhar milai tisa thinlung khawruahnak cu nitin te vaktawi rero asi.
Pehtlaih awknak a cak sinsin, media phunphun a suahnak leitlun ah, a cak lo bik thlarau sual hman in cangan tu le mi zuuk tu, movie suah tu mi pakhat thinlung ruahnak cu kaihrem le hmang tahratin leitlun mi tampi a bumneh thei asi. Simcia mi vekin, “Satan cu thlilak lalpa asi ……………(Eph. 2:2). Kan theih dingah “thli lakih thuneihnak” in thli menmen lawng hi si loin thlilakah a zam mi Radio wave, television le cell phone signal phurtu thli pawl parh khal thu a nei thotho asi.
Curuangah, Satan hi hmanrua “thal” pawl cu khui tawk ihsin kan nunnak, kan hnenah, kan thinlung sungah a thlengih kan thlarau nun a siatsuah tum ti kan theih ih cupawl cu kan kham thei theh a ttul. Cawlhni sunah Pathian be ta-hrat in cawlhni zanlamah Jezebel ih hmanrua tisa hiarhal nak cawmtu movie kan zoh asile kan Pathian biak mi cu umze nei lo asi. Hivek dinhmunah milai pawl kan thlen lai ding thu ruang khalah asi, “milai thinlung le ruahnak a hmu tu cun (Thup 2:23)” a rak simcia; Jezebel thlarau a rak mikhual theu tu cu milai sunglam muril, thlarau nunah asi vekin Jezebel thlarau in kan sungah hna tuan thei nawn lo dingin kan sunglam sungmuril thlarau nun ihsin Jezebel thlarau hnatuannak cu sangka kan khar a tul. Sungmuril pindan sungah mikhual asi vekin sungmuril pindan sung ihsin dawisuak in tawpter ding asi.
Saltang suah ding!
Santhar nuamnung zuuknung le thi suahtu(enter-tainment industries) pawl lak ihsin Jezebel thlarau cu dal tu nei loin leitlun a fangsuak ringring asi. Jezebel thlarau cun santhar ceimawi awknak (fashion) lam ah siseh santhar fimnak lamah siseh degree phunphun a ngah ve asi. Leitlun khui tawk hmun khalah va feh aw la, Jezebel thlarau a um lo nak hmun na hmu dah ding maw si! Jezebel thlarau hi politician le Pathian thusim tu pawl tiang siatsuah tu asi. Nunau pum sung ihsin naute that ter tu thlarau khal hi Jezebel thlarau a tel asi. Nupa rem awk lo lak khalah thuneihnak a cuh aw ter theu tu cu Jezebel thlarau asi theu.
Kum thawnghnih rei laiah, Thlarau Thianghlim in Thyatira Kawhhran a laihlang tikah Jezebel thlarau cu kawhhran sungah a rak to riairiai asi kha! (Thup. 2:19-29). Thyatira kawhhran upa, pastor, le member pawl hi Jezebel cu khui tawk ah a um ti an rak thei lo men ding. Tuisun khalah Kawhhran sungah tohkham nuam zetzet ah a to tthialtthial lai thotho asi. Upat tlak zetzet, Pathian a duhdawt zet tu le Pathian rian duh zetzet vek sicingin Jezebel thlarau ih sal nunau le mipa tampi an um asi. A tu rori khalah, an ning azak mi cu, nunau taklawng zuknung zukthi (pornography) pawl zoh loin an um thei lo ih nunau an hiarnak tisa caknak cu an sup thei lo asi; tisa caknak sal ah an taang asi. Thlacam dingin fial hai awla, an sunglam thlarau cu ningzahnak in an khat na’n an thlacam cu Jezebel thlarau ih tilper mi siahhlawh (sal) vek fang an si.
Pathian duh zetzet, nunau zoh mawimawi, biak inn ah Pathian hawl in a ra khawm theu tu an um; asinan an sunglam thlarau cun Biak inn sungih mipa dang pawl kha an zoh hai tikah anmai pasal cu Biak inn sungih midang pasal mipa dang tlukin a thlarau mi lo tiah thinlung riahsiatnak in an khat theu. Cuticun, hivek nunau pawl cun rei lo te ah buainak an suahpi theu ih pastor pawl lawngin rem theihmi buainak asi theu. Pastor le kawhhran upa pawl hlanah kawhhran sungih pathian misa nunau upa deuh pawl kha thurawn hmaisa ding an sinan; pastor le kawhhran upa rawn hlanah (Titus 2:3-5). Cuvek thotho in mipa tampi cu biak inn sungah an lut tikah midang nupi pawl an zoh tikah anmai nupi cu midang nupi tlukin an thlarau mi lo, an fel lo tiah an thinlung sungah an nupi hawmthawhnak an nei theu.
Mi zokhal hivek thlarau in a sunglam nun a luahkhat mi an um asile cuvek mai dinhmun lungkim thei lonak, mai pasal/nupi lungkim tawk lonak ihsin sir aw in cuvek ruahnak cu thluak bu sungih a cam ringring mi cu ral vekin do ding an si! Mawhsiatnak thinlungput thawn ni le can liamter hlah aw! Jezebel thlarau khawruahnak pawl cu do aw la tlansan aw! Thlarau raalnam cu la aw la Jezebel thlarau cu do aw! Nan kawhhran sungah cuvek thlarau hnatuannak a vak rero mi cu do aw! Jezebel thlarau in a lo thlem rero lai ah na do asi ahcun a hrangah tihnung zet na si sawn ding! Cuticun nangmah a lo donak lawng si loin midang khal luahter ding na tum asi ahcun Jezebel thlarau cun a lo hnaihnawk ngam nawn lo ding!
Ziang le zovek pawl a hmang thei!
A hmaisa ah zovek nunau pawl hmangin jezebel thlarau hi a cangvai theu ti kan zohzo vekin zovek mipa pawl hmangin a cangvai theu ti khal zoh hnik uhsi! A taktak in, Jezebel thlarau hin mifel, mithiamthiam, kawhhran sungah sinak, hotu si a duhtu pawl a hmang duh zet theu. Cuvek thotho in pastor tuan rero lai pawl khal a hmang thei, cuticun kawhhran a kaihruainak ah a thuneihnak cu Pathian Thlarau Thianhlim thuhnuai ah tuhlut aw nawn loin mimal thuneihnak in ziangkim thuthluknak a kaihhrem duh tikah. Cuvek pastor cun Pathian mihman pastor dang pawl thawn thuk zetin pehtlaih awknak a tlansan theu ding. Cuvek pastor cun kawhhran sungah mi zo si maw thawn neihniam bik zetin pehtlaih awknak hran neih ding a hawl theu ding, thih le thih nun le nun a sual le a dik ti um loin dinpi tu a hawl theu ding. Voi tampi cu nunau thawn cuvekin pehtlaih awknak thuk zet an neih hnu ah nupa-sualnak tiang an tuah in an tluse theu ding.
Himi Jezebel thlarau hin nunau mizia hi a hman ding ah a hril theu nan, nunau pawl hi thukzetin midang pehtlaihnak an neih theu ruangah thuk zetin a hmang thei theu mi asi. Kawhhran hotu pawlin an ranrin ringring a tul; jezebel thlarau hin kawhhran hruaitu sinak a hawl ringring theu ding. Zesu in Jezebel thlarau thu a simnak hi theihhngilh lo a tha, “prophetess” “nunau kamsang” tiah a ti (Thu. 2:20). Nunau pakhatkhat cu Pathian in laksawng a pek ahcun nunau kamsang (prophetess) khal asi thei ko; asinan mipi nemhngetnak kawhhran ah a cuh, amah le amah “kamsang ka si” , amah le amah pathian hriakthih mi hleice laksawng co vekin a cangvaih tikah le mipa thuneihnak pawl a dodal, mipa a neihniam mi pawl thunun a tum tikah ralring a tha!
Thlacam hotu, kawhhran sungtuan, hla hruaitu, pastor le pastor nupi, le cuvek sinak duhtu pawl, nan zaten himi Jezebel thlarau hin a lo hmuitin ringring asi. Hivek hnatuan kai le tuanvo nei tu zapi ten ziangvek thlarau sual in a lo do ih a lo hmuitin ringring asi ti ralrin pek nan si a tul. Nan zaten kawhhran sungih thlarau ral do ding ralhruai pu (warfare team) ah nan tel a tul ih jezebel thlarau ral do dingin training khal nan kai a tul asi.
Jezebel thlarau in ziang a hua! What Jezebel Hates
Jezebel thlarau sual in a huat bikmi le a ral pakhat cu kamsang pawl an si; ziangah tile milai pawlin an sual an sir dingih thutak an nunpi ding a duh lo. Jezebel in sir awknak a hua. Himi thlarau sual hi fim zetin kawhhran sungah a thup aw theu ih kawhhran thu zirhnak pawl hmangin sirhsan a khuar theu nan sual “sir awknak” taktak suak lo dingin a zuam ih “sual sir awknak” le thutak hnakin Khrihfa ti aw pawl cu kawhhran thurin “doctrine” le sakhua mi sinak hnuai ah a kai hrem theu asi.
Jezebel thlarau in tangdawrnak le phahniam awknak a hua. Zesu in a simmi cu, upattlak mi sinak cu ziangvekin kanmah le kanmah kan thei aw aw ih milai mit hmuh ah ziangtluk kan ropi timi parah si loin ziangtluk kan thinlung tang a dawrih nauhak te pawl vekin kan thinlung a thiang timi sawn kha hmangin cuai thlai asi, ti ah a sim. Rawngbawlnak diktak cun a rianmi parah a pum a pe aw aw ih a tuhlut aw theu, tuanvo a neihmi parah tangdawrnak thinlung thawn mawhphurnak khal a lak sawn theu. Cucu rawngbawlnak diktak thinlungput nei pawlih thinlung mizia asi sawn. Curuangah kan zir ding cu thlarau mi sinak cu thu thuneihnak (power) in cuaithlai asi lo ih tangdawrnak sawn in cuai thlai asi. (Jezebel thlarau cun rawngbawlnak ah Pathian hmin sunlawinak, sualsirnak, thutak nunpinak pawl hnakin milai thlarau porh awknak, sakhua mi sinak, Thlarau Thianghlim lamzin dalnak pawl hi a hmanrua tha zet an si.)
Jezebel thlarau in thlacamnak a hua. Midang hrangah thla kan camsak tikah Jezebel cun thla kan camsak mi pawl thinlung le ruahnak sung ihsin a kutzung pawl kha a lak kiang theu a tul. Thla kan camsak mi pawl cu Jezebel thlarau ttawntemnak ihsin a luat ter. Thlacamnak in Jezebel thlarau cu cangvai thei lo dingin kaihhrem asi. Sualnak dodal in thla kan cam tikah Jezebel thlarau cu kebai ko tuah vek khi asi. Milai thinlung cu Khrih ih thuneihnak hnuai ah le Thlarau Thianghlim hnatuannak hnuai ah tuhlut aw dingin thla kan cam tikah Khrih ih rangcang thawn Jezebel ih zaang parah kan pal rero vek khi asi.
Jezebel thlarau in Pathian kamsang pawl a hua; ziangah tile kamsang pawlin Jezebel thlarau sual cangvaihnak cu an thei ih an do ruangah asi. Kamsang pawl cu Jezebel thlarau ih huat bikmi ral pawl an si. Cuticun Pathian kamsang pawl thusimnak kawhhran cu a do dal; thutak phuansuahnak a dodal tikah milai thinlung sungah thutak dodal dingin a cawk tho theu. Kamsang pawl a dodal tikah milai dodal siloin an simmi thutak kha a dodal mi asi. Jezebel thlarau in a raltaktak ih a do mi cu Pathian tongkam simsuak mi kha asi.
Jezebel in a ral tumbik, a do rero mi cu Pathian asi. Pathian zangfahnak milai parah a thleng mi hi a duh lo; milai pawl sualnak sungah an tluksiat hnu khalah milai nunnak ah Pathian zangfahnak an co ding a duh lo. Pathian in milai mithmuh ah a cak lo le a phahniam aw bik tu pawl hmangin amah a hnuk tla ding ti a theih tikah a hua tuk. Pathian hnen ihsin a ra mi thianhlimnak, thlarau nun thianfainak pawl a hua tuk. Milai pawlin nunthianghlim nun nei in Pathian an rian ding a hua tuk.
Thlacamnak: Pa Pathian, nangmah le na felnak le thianhlimnak hnuai ah kan tuhlut aw aw asi. Thianhlimnak, thianfainak, le tangdawrnak thinlung in pe aw. Kan thlarau sunglam khawruahnak nunramah le nitin ih kan tuahmi ah Jezebel thlarau sual cu kan zawi-awi ringringih hmun kan rak pek ringring mi hi in ngai dam hram aw.
Pa Pathian, na thuhnuai ah kan tuhlut awk vekin Jezebel thlarau cu doneh, dawisuak thei dingin na thuneihnak huham cu kan parah na ret asi. Zesu Khrih hmin in Jezebel thlarau sual hnatuannak le hmanrua hmuahhmuah cu kan dawi suak asi. Jezebel thlarau cun a huham cahnak le thiltitheinak hmanrua thawn kan khawsung le cozah lam khalah a hnatuannak pawl cu kan do asi. Thlarau Thianghlim huham cahnak hmangin Jezebel thlarau in thlarau lalram ah a thununmi le bungrua pawl cu siatsuah tahrantin a kaihrem mi pawl tla thlah dingin thu kan pek asi.
Nupi pasal pawl lak khalah mit le thinlung thianghlimnak um dingin thla kan cam asi. Khrih ih kawhhran member zapi ten, nupi pasal nei le nei lo pawl khal, thinlung thianghlim le zangfah lainatnak in a luahkhat nak ding hrang khalah thla kan cam asi. Zesu Khrih thisen cahnak in na fa le pawl an zate thinlung le khawruahnak cu luahkhat hram she! Cuticun tangdawrnak le nangmah ah tuhlut awknak thlarau nun in a rahsuak mi lungawinak cu mi zapi parah thleng hram sehla porh awknak le hamtamnak thlarau sual in a bummi suangtuahnak luangliam, Jezebel thlarau hnatuannak cu hnuhthlak sisheh! Khrih hmin in thla kan cam! Amen!
http://www.inchristsimage.org
==============================