Church Politics May 15, 2007 (zohsal, April 2012)
Israel pawl cun Jerusalem ah biak inn tumpi nei in Sabbath tinte Messiah hngak in thla anrak cam ringring, thawi awknak an rak pe ringring, Bible an rak siar ringring ih an biaknak in a phutmi hmuahhmuah rinum zetin an rak tuah theu. Asinan Zesu a rat taktak tikah an rak thei nawn lo. An thinlung mit cu sakhua biaknak rikham in a cawtter ih an ruahnak cu sakhuami sinak lawngin khua a luah theh. Biak inn sungah upa sinak, pawlkom luban sinak, upat awknak, Bible siarnak, peknak, thawinak, Sabbath ulhnak, tvp pawl thu in an thinlung cu a luahkhat theh. Bible cu zohlo in an siar, Pathian thu an sim, Messiah thu an sim, an thei zet nan Pathian Thlarau an sungah a um lo. Cutikah Mesiah a rat tikah an thei nawn lo. Zesu a rat sal tikah cuvekin kawhhran, hruaitu, pastors, kawhhran upa, zumtu a um tla kan um pang pei maw?
Kan san thuanthunung kan zoh asile, kan pupa cazir lo, ririai bia pawl hman kan tluk lonak tampi a um zo. Kan pupa pawl cun Pathian nung an rak thei lo nan khawtin ah lungrualten, raan an do tlang, senpi vangtlang thatnak an kilhim, mi harsa farah zawnzai an rak sawmdawl, an bawmbawi. Duhdawtnak in senpi vangtlang an rak kilhim. Tuisan minung pawl lakah duhdawtnak, pumkhat sinak, lungrualnak, dingfelnak, Chinmi khrihfa ti aw pawl lakah a tla niam sinsin. Thenthek awknak, sinak cuh awknak, lal duhnak, thuneih duhnak, lamtang tuahnak, huatnak le thangsiat relsiat awknak, mah hankih upa upat hna thiam lo, dodal awknak, tvp, society eisiattu hrik (social evils) pawlin kan san Chin mi thuanthu, Khrihfa thuanthu a tuahsiatmi cu pheh theih rual asi nawn lo. Kan society zoh tikah Zesu Khrih hmuihmel lang nawn loin Khrih ih raalpa ih hmuihmel a cuang sawn pang maw?
Thuthlunghlun, Israel pawl Canan ram an lut pek te ahcun Theocracy, Biaknak in ziangkim cozah lam kaihruai awknak khal a rak kai theh. Israel pawlin siangpahrang an neih hnu khalah Biaknak lam upa hruaitu pawl cu khawsung (society) le cozah lam khalah thu tampi an rak nei ban. Thurawn petu an rak si. Cutin siangpahrang an nei ih rampi uk awknak cozah lam cu biaknak lam in kai nawn loin a hranten a um hnu khalah biaknak lam hruaitu pawl hi upat zetmi le thurawn mi an rak si ringring. Abik takin milai nuntu lungput mizia (moral issues) thawn pehpar in biaknak thurin, Bible cu society le cozah khalin nunthuken thuhrampi a rak si ringring. Himi cahram sungah sim duhmi cu biaknak le cozah pehtlaih awknak si loin society hrampi asimi, society eisiat theitu le tuahthatu, biaknak sungah thuthluknak tuahdan thu sawn asi. Zesu’I dungthluntu hleihnih pawl khalin an rak buaipi zetmi pakhat cu “Bawipa, na keh le forhlam kapah zosi to ding” “kan lakah zosi a tumbik” timi a rak si. Sim duhmi cu Biaknak thuanthu kan zohsal thei cinah “Zoin ziangtin biaknak thawn a pehpar mi thuthluknak a tuahding ih ziangtin ziangvek thuneihnak a nei ding, zo in ziangvek upatnak hmin a ngah ding, zo duhnak in ziangthu pawl kha thutluknak tuah asi ding” timi thu pawl hi an rak buaipi ringring mi asi.
Tuisan milai zumtu pawlin an buaipi rero khal hi an sual hleice ruangah asilem lo. Abiktakin rampi uknak a zalen lonak ramah Church politics a luar duh sinsin. Ziangah tile khawsung upa le mifim pawlin rampi ukawknak thu rorelnakah zalen zetin an tel, cangvai thei lo tikah mi tampi thuneihnak, upatnak duh ruangah, hminlang duhnak, le midang parah hotu tuan duhnak ruangah biaknak sungah phurzetin an cangvai theu. Bawi Zesu leitlun ah taksa in a um laifangah Israel pawl kha Rome cozah kuthnuai ah an um. Jewish society cu biaknak lam hruaitu pawl kutsungah a um ti theih asi. Cutin Biaknak lamah an telmi cu a tha ko, Pathian in a hmang thei thotho. Asinan fimkhur tulmi pawl, Thlarau Thianghlim uk lomi, milai tisa khawruahnak in a khatmi, sinak le lalnak, thuneihnak duh ruangah kawhhran lairelnak sungah a teltu hruaitu pawlin kawhhran thu, biaknak thu an rel tikah satan hmanrua Thlarau Thianghlim hnattuan daltu ah an cang ringring. Cun khatlamah, pastor le evangelist, hmin nei rawngbawltu lawngin biaknak lam ah hnatuan nei vekin ruahmi khal a dik lo pumhlum, Bible in a zirhmi vek asilo. Bible in a zirhmi cu mi zokhal thlarau laksawng pek an si vekin Pathian hmin sunlawinak, Pathian lalram karhzaiternak, zumtu pawl thlarau lam thansohnak le thuthangtha phuansuahnak hrangah hmang ding an si sawn. Insang ah pa cu upatnak pekmi asi ih nupi le fate pawlin a thu ngai ding asi vekin cozah kumpi le vengsung khalah upa tlangsuak le khawbawi hruaitu thu ngai dingmi an um. Cuvekin kawhhran pawlkom sungah kawhhran hruaitu, upa, Thlarau Thianghlim luahkhat in thlarau rawl cawmtu Pathian hriakthih pawl thu ngai in Pathian in senpi vangtlang hrangah ziangvek thutha theihter duhmi a nei ti tangdornak le upatnak thawn thu cohlang ringring ding kan si.
Vawi tampi cu Pathian in a hman mi milai pawl hi anmai duhruangah, lole, eltheihlo dinhmun an thlen ruangah, lole, Pathian hmin sunlawinak si loin thildang duhmi, thimnakah thuneihnak le tisa hlawknak, an duh ruangah rawngbawlnak sungah a lutmi tla an um thei ti cu thuanthu sungah hmuh ding a um asi. An zaten Pathian in a hmang thotho. Pathian ih milai a hmandan cihnih a um! Pakhatnak cu thutak phursuaktu, Thlarau Thianghlim luahkhat mi, Khrih hmuihmel keng, Pathian phuansuak awknak, Khrih palai, thutak phuangsuaktu, duhdawtnak le thatnak tipungtu, siahhlawh tha pawl an si. A pahnihnak cu Pathian fate zumtu pawl ralrin peknak hrangah hman mi an um: cu pawl lakah, Pathian thu lunglo pawl ralrin peknak hrangah hmanmi Lot nupi, Pathian thulunglo ih lungruh pawl ralrin peknak le unau zuar thlaitu Jacob insang pawl hremtu ah a hman mi Egypt siangpahrang Faro, thuphen per in ngah mi in siatnak a thlenpi zia ralrin peknak Gehezi le Ananias te nupa, Pathian thu ngai lo in thawinak pek ih umzia a neih lo zia le Pathian in a tenzia langternak hrangah Saul siangpahrang, sumpai mitmei in Zesu dung a rak thlun ringringtu Judas, biaknak lam lalnak le sinak thawi awknak in an thinlung mit a cawtter mi Farasi le biakbak lam hruaitu pawl, tvp, pawl tla hi Bible in a simlar zetmi pawl tla an si.
Zianglam khal asile zovek milai khal Pathian in a hman tikah kawhhran pawlkom a bur thuthluknak ah politics a lut tikah rahtha lo a rah theu mi pawl hi fimkhur tul zet an si.
Church politics in kawhhran a siahsuat mi pawl:
1. Kawhhran cu Pathian hmin sunlawihnak si loin milai pawlkom pakhat vekin a fehpi; Kawhhran timi cu Khrih ih Ruangpi (the body of Christ) asi. Asinan kawhhran pawl pakhatkhat cu Church politics in a cimneh tikah Khrih ih ruangpi alang nawn lo ih milai pawlkom awknak men vekin a feh. Khrih hmin in milai pawlkom pakhat dinmi vekah a cang. Khrih ih Thlarau a lal nawn loih milai a lal sawn theu. Kawhhran hruaitu le pastor pawl khalin anmai lamtang lo ah an ruah mi le anmai pawlkom lenglam misa pohpoh cu Khrih ah unau vekin an hmu thei nawn lo. An duhdawt thei nawn lo. Bible cu an hmang ko, Khrih hmin cu an sal ringring nan an nun cipciar zoh tikah Gal 5: 22 ah a simmi thlarau rah pawl hmuh ding a um nawn lo. Khristian sakhua nak cu leitlun sakhua dang pawl vek fangin biaknak lam milai pawlkom pakhat vekah a cang. Asinan cuvek kawhhran sung khalah zumtu diktak an um lo tiah sim theinak zohman in kan nei lo, thuthlangpi thu sawn simmi asi. Cutin kawhhran in a fehpi mi rorelnak le thuthluknak tuah tikah Pathian Thlarau a lal nawn loih kawhhran sungah politics, lamtang tuah awknak in lai a rel theh. Cutin thu a um tikah, mi pakhatkhat cawimawi asi dingih pakhatkhat namthlak asi ringring ding.
Umzia cu thlacamnak thawn Pathian tongkam hngak sawn loin tisa takin kaihruai awknak in kawhhran thuthluknak pawl cu a khuh theh theu. Thuthluknak tuah tikah midang ruahnak le duhnak sawn kha ngaipawimawh sawn loin lamtang cakcak thu in a feh theu. Cutikah kawhhran zumtu pawl lakah pawl an sawm aw ciamco ih anmai lamtang lo pohpoh cu satan lamtang vekah an ruat. Eltai awknak a suak. Kawhhran thansohnak hrangah Pathian Thlarau laksawng phunphun mi pakhat cio hnenah pek mi pawl hmang suak thei dingin sangka on asi nawn loih kawhhran pawlkom sung canpual tha pawl cu lamtang tuah awknak hmanrua ah hman theh asi sawn. Cutikah kawhhran cu a naa, a hngawr zumtu member tampi cu an thlarau a cawr. Rem awk lonak a suak. Mipi cu biaknak lamah an phur zet hmanah an nitin nunah Pathian Thlarau pawlkomnak, thlarau rah rah suak in Pa Pathian hmin sunlawinak a lang nawn lo, thuthangthat karhzainak le Pathian lalram dinsuah dingin ke an kar nawn loih thupibikah an ruahmi cu leitlun mithmuh milai pawlkom, khat le khat cawimawi awknak, thiltha tuahnak, pehtlaih awknak, tvp, ah a hngat aw riangri.
Cuvek kawhhran cu himi casiar tu lakah nan rak tong dah asile mangbang ding a um lo. Hivek kawhhran pawl hi biaknak lam thurin thu ah dikbik in thei aw tu (extreme) bik pawl tla an si thei, pomkau (liberal) tla an si thei. Anmai kawhhran “pawl” lo pohpoh cu hellram ah tla theh dingah a ruat tu tla an si thei. Vaikai zumtu pawl tla an si thei. Leitlun biaknak lamah fehsual pawl in anmai fehdan (doctrine) pompi lotu pohpoh fehsual ah an hmu theh ih hellram tla dingah an ruat theu. Cutin an pawlkom sungtel pawl ttih an tarh ih rikham an tuahsak theh, ti cin ringring a tha. Kawhhran thurin (Church Doctrine) hi, Bible in a sim vekin, thlarau mi diktak sinak cuaithlainak ah hman theih asi lo. Khrih Thlarau a lalnak hmunah “zo kan diksawn” ti zuam awknak a um lo.
Kawhhran dangdangah zumtu, pastor le rawngbawl tu pawl hi Khrih ih ralbawi, hmundangdang ihsin satan ral do tu tangtlang ding an sisawn nan Church politics ruangah satan in a bum hai ih kawhhran pawl rikham in a kham hai tikah anmahle anmah ral vekin tla an hmu aw in an do aw rero theu asi. A pawi zet. Cutikah kawhhran sung lawng siloin society (vengsung) tiagnah huat awknak, rem awk lonak, relsiat awknak, thangsiat awknak, le hnatuan tlang thei lonak a suak theu. Cutin kan zuam mi, kawhhran dang, kan neh, kanmah kan caksawn, kan pawlkom a diksawn in thiltha tampi kan tuah asi ti ah an porh awk rero laiah nehnak co tu cu satan a rak si ziar tihi mi tampi in an hmu ban lo.
Zumtu pakhat le pakhat, kawhhran pakhat le pakhat an do awk tikah siseh, pastor le evangelist siseh rawngbawltu pakhat le pakhat dunglam in an keu aw rero, an thangsiat awk rero tikah siseh keimah ka diksawn ka tha sawn, ka thiam sawn, kan kawhhran a dik sawn tiah lamtang le kawhhran member pawlsawm in zumtu dang an thangsiat rero tikah Thlarau Thianghlim ti riahsia in satan lungawinak kan tuah rero asi ti hi zumtu ti aw pawl mi tampi in an hmu ban lo. A poi zet. Thlarau lam hruaitu pitling pakhat cu zumtu hrekkhatin tisa takin an dodal ih lamtang tuah aw tahratin mualpho ko an tuah tikah anmah hrang ahcun kan neh tiah an ruat rero lai ah nehnak cotu cu satan a rak si ziar tihi zumtu ti aw pawl mi tampi in an thei lo theu. A poi zet.
2. Pathian thlarau hnatuan a dal Cutin kawhhran cun Pathian Thlarau rawngbawlnak hnakin milai canpual, thuneihnak, thinlung diriamnak, sakhua mi sinak le tuahnak sawn cu thupi sawnah ret asi tikah Pathian Thlarau hnatuannak a dal. Biaknak thuthlung, pawl thleidan awknak, lamtang duhsak awknak, mai lamtang lo ih ruahmi pawl huatnak le eltainak, mithmaitha lo ko dungtun awknak pawl a suak tikah Pathian thlarau in kawhhran sungah hna a tuan dingmi adal. Cuvek in lamtang an tuah awk tikah an lamtang misa an duhsak tuk nakah Pathian thu in ziang a sim, Thlarau in ziang a sim duh timi hngak in an ngai thei nawn lo ih milai tisa duhnak cun an thlarau mit a cawter theu. “Mi zokhal amai tisa tuhnak tanta in I tlunlo tu cu ka dungthluntu tlak an si lo” ti ah ngan asi. Pathian duhnak hnakin milai duhnak a lal sawn, thupi sawn ah ret asi. Zumtu lamtang nei pawl cun anmai lamtangtu thu lo pohpoh cu dodal dingah an ruat, satan in an thlarau mit a cawtter, an lamtang pai thu pohpoh cu dinpi ding thutakah an ruat. Cuticun thiltha kan tuah sihmang an ti lai ah mahlemah bum awknak satan thang sungah an tla lut theu. Cuticun an lamtang pai sual cu an thuhsak ih an lamtang lo mi ah an ruah mi cu satan dungthlun vekah an ruat theu. Cutikah Paul in Philippine pawl hnenah zumtu unau dang duhnak kha ngaipawimawh sawn ding thu asimmi cu umzia nei lo ah a cang. Mai hmakhua sial in ningzah khal an nei nawn lo. Cuticun Pathian Thlarau cu tiriahsiat asi theu. Zumtu pawl an naa, an cawr ih kawhhran cu a ngawr.Zumtu pawl lungawinak sangbik, duhbik, thupibik ah ret ding mi cu Khrih ah Pathian thawn pehzawm awknak, Pathian Thlarau pawlkomnak, lamhruainak le umpinak asi. Thildang, kawhhran thurin (doctrine), hlasakdan, laireldan, khuang tum le tum lo, tihnim maw, theh, rundamnak a hlo thei maw, hlo thei lo, tvp, pawl cu Pathian Thlarau pawlkom nak nun zumtu pawlin kan neih theinak ding hrangah hmanrua men an si. Kan duhbik amah Pa Pathian, Fapa Zesu Khrih, Thlarau Thianghlim pawlkomnak daltu pohpoh zianghman kaihhnget tlak, dinpi tlak a um lo. Bum in um hlah uhsi.
3. Thudik, thutak, dingnak le diknak palzuut in sualpawl thuhruk asi theu. Cutin kawhhran sungah lamtang, duhsakbik, huatbik, thleidan awknak a suak ih kawhhran thuneihnak, kawhhran sungah dinhmun umsun pawl cu mai kutsungah, mai lamtang in kaihtheh tum asi tikah mimal ruahnak khalin thudik, dingnak, le thutak ziang asi ti a thei thei nawn lo. Cianghnia rilrawng cun a thihnak ding hman sisehla milai vulh mi cawpi cu a deh rumro theu vek hi tisa thinlung duhnak in a ukmi pawl cangvaihdan asi theu. Siangpahrang Ahab san laiah Pathian kamsang diktak mi tampi thah an rak si vekin tisa duhnak a lal tikah Pathian Thlarau lamzin dalin mi hrekkhat cu cawimawi in midang namtlaknak tuahsiatnak thangsiat relsiatnak a suak theu. Duhnak, phurnak, huatnak, caaknak pawl hin milai mit a cawt ter tikah dingnak, diknak le thutak khal milai thinlung in a theithei nawn lo ih midang hmaiah ningzah khal a thei nawn lo, mit in hmuh thei lomi Pathian tihzahnak cu sim tul nawn loin. Kaa in an simmi cu thutak , Bible thianghlim asi nan an nun cu thutak ralkhat ah, thutak dodaltu an rak si riangri. Milai in amai hmakhua a sial tikah, a mitih a hmuh thei mi milai hmai hman zahnak a thiam nawn lo tikah amit in a hmuh thei lomi Pathian zah ding cu ruat hman a ruat tel nawn lo theu asi. Cuticun Bible in a simmi, “Dingnak tel loin nan sakhua raithawinak pawl cu ka fih/ten tuk“ a ti vek khi kawhhran tampi dinhmun asi theu.
Thlarau mit meng tapoh cu ka simmi hi an thei thiam ding. Cutivek hi mi tampi in nan tong theu ding ruangah cuvek lak ihsin mai thlarau nun cau phah lo dingah siseh mah lala khal cuvek church politics, thuneihnak le dinhmun, le canpual cuh awknak lakah thiarfihlim aw thei dingin duhsaknak thawn himi ca hi ngan asi. Cutin sim tikah Thlarau Thianghlim thu rawn hmaisa loin mai milai tisa thinlung duhzawng in kawhhran lairelnakah thuthluknak feh dingin tisa thinlungput thawn caingvaih nak hmuahhmuah khal a tel asi. Ziangah tile tisa thinlung in Pathian duhnak theihtheinak a nei loih Pathian duhzawng tuah thei nak khal a nei lo asi.
Casiar tu zapi duhsak mi cu ziangtik lai khalah Pathian hmin sunlawinak hrangah kawhhran lairelnakah nan tel tikah duhbik le huat bul neihnak ruangah siseh thu pakhatkhat tanbik neih ruangah siseh huatnak le mi eltai mi neihnak ruangah siseh nan thinlung hi Pathian Thlarau luah khat thei lo ding khawp in tisa khawruahnak in lo luahkhat lo hram seh. Thlarau Thianghlim uknak in duhdawtnak remdaihnak dingfelnak tongkam thawn na sim thei lo poh ahcun kawhhran thu ah na tel lo lawlaw a tha sawn. Cutin nan tel asile Pathian hrangah thiltha ka tuah sihmang kan ti lai ah Saul siangpahrang ih raithawinak pe vek ah kan cang thei. Thlarau in ziang a lo theihter duh timi thei thei nawn lo ding khawp in tisa duhnak, sinak, upat duhnak, duhlonak, huatnak le thu kenkawh mi pawlin nan thinlung sung lo luahkhat hram hlah seh. Cuticun nan tongkam ruahnak, sumpai thawh khawmnak, thuthluknak nan tuah mi poh ah, le tuahnak telnak nan neih mi hmuahhmuah Pathian hmin a sunglawi dingih nineta bikah a ling alet in ningzahnak si loin cawimawinak sawn cu nan co thei ding asi ti duhsaknak in hi thu tawite hi ngan asi. Tangdornak telloin Pathian thawn fehtlang a theih lo.
A tlunlamih kawhhran politics a ummi ruangah zumtu pawl thinnuam lo in um khal hi satan thang pakhat asi.Zesu Khrih a ratsal lai hlanlo kawhhran mibur sungah buhtak le buhlem, meeheh le beram (tuu le me) an um kawm ringring ding asi ti khal cin ringring a tha. Satan thang pakhat cu zumtu pawl thin hnger teu, ikfiknak, thinheng ter tahratin Bawipa ah kan lungawinak siatsuah asi. Ziangthu ruang hmanah Bawipa ah na lungawinak siatsuah si dah hlah seh! Midang tuahmi ruangah Pathian in na parah thu a then dah lo, nangmai tuanvo asi lo mi parah Pathian in thu a then dah lo. Nangmah lo thlawsuah dingin siseh lo hrem dingin siseh Pathian in midang pakhat hman thu rawnmi a nei lo. Nangmah le Pathian karlak thu asi. Midang tuanvo thu ah va buaipi ding kan si fawn lo.
Pathian Thlarau in a luahkhat, a ukmi pawl thinlung sungah tangdornak, duhdawtnak, ngaidamnak, le thlarau hlo rundamnak thutak in an khat sawn asi. Anmah le anmah cu Pathian siahhlawh hminpu ding tlak ah an ruat aw lo. Pathian zangfahnak in tuanvo pek mi pawl tuansuak dingah anmah ah zianghman tling le tlakin an thei aw dah lo. An thinlung sungah anmai sualnak le mawhnak hnakin midang mawhnak le sualnak a tum sawn dah lo. Pathian Thlarau kaihhruainak hnuaiah ap aw aw in, tangdornak in lairelnak siar lo, tisa thinlung duhnak fimnak in fehpi mi kawhhran lairelnak pawl hi Pathian Thalrau hnatuan a dal sawnih kawhhran siatsuahtu sawn asi theu. Ziangtiklai khalah, kawhhran pawlkom thuthluknak tuah tinte thuthluknak tuahmi thawn pehpar in Pathian in kan lakah zo hnenah ziangvek fimnak thiambik le tuanvo a pek ih zo hmangin kan kawhhran pawlkom lakah Pathian in ziang tuah a duh timi sawn thlacamnak thawn thinlung tangdor ten khat le khat thinlung ap aw tawn in Pathian duhnak hawl asi tikah Pathian Thlarau a cangvai tikah kawhhran pawlkom awknak a harhdam dingih mangbangza Pathian kutcak a lang sawn ding asi. Milai fimnak le sumpai lennak asilo, Pathian Thlarau thilti theinak hi kan tul bik mi, Pathian lalram karhzai tertu asi sawn.
Netabikah, milai in thiltha tiah kan ruah mi hi Pathian in “a tha” a timi daltu le siatsuahtu a rak si theu. Evi in amai hrangah “thiltha” tiah a ruahmi cu Pathian in an hrangah “a tha tuk”tiah a ruahsak mi siatsuahtu a rak si ziar asi ti cing ringring uhsi. Curuangah kawhhran pawlkom thuthluknak tuah tinte tangdornak in Pathian duhnak hawl hmaisa in thuthluknak fate ihsin a tumbik khal fimkhur ten kekar pi ringring uhsi. Cutin kawhhran zapi ten kawhhran sung le leng thu thuthluknak kan tuah mi pawl hin Pathian hmin a sunlawih asi ahcun zumtu pawl thlarau khal an dam dingih kan ram le miphun parah Pathian Thlarau alung a hmui tikah kan ram le miphun thuanthu khal damter in amai tikcu te ah amai hmin sunlawinak hrangah in cawimawi ding asi. “Bawipa in, “Hriamnam cahnak le na thazaang cahnak in si loin ka thlarau in na hlawhtling ding” ( Zech 4:6) ati.
Khrihfa zumtu zapi ten leitlun ah satan lalram thiatbal in Pathian lalram dinsuah vivo dingin Khrih ih ralkap burpi kan si. Ralkap sungah batalian dangdang, a bur a bur in an then awk vekin kawhhran khal bur dangdang ah then thek awk hman sehla mahlemah dodal awk ding asi lo ih kan ral cu pakhat asi, a sungdah lo mi kan ralbawipa khal pakhat asi, kan thlennak ding le tumtah khal pakhat lawng asi ti cing ringring in Pathian in in retnak cio ihsin Thlarau ralthuam hruk in raltha zetin satan ram thiatbal in do cio uhsi. Nehnak thartar cu tarcia asi. Nehcia mi ral cu do a nuam, nehnak thu phuang ding lawng kan si. Nehtu nun nunpi tu lawng kan si. A do tu cu Bawipa a mah asi. Kannih cu a phuansuah awknak hmanrua men kan si sawn. Bawipai ram kaihzai sinsin hram seh. Cangantu: Kawlram pumpi phunsang tlawngta buai “8888” lai ihsin phunsang tlawngta a bur in cozah duhlo nak lakah rak teltu, India, le USA ah Chin milesa lakah mibur pawlkom awknak sungah kum reipi tikcu rak hmang, rak pe aw tu asi. Zirnak lamah B.A. Political Science, M.P.A. Master in Public Affairs (Public Administration) le Bible lam zirnak B.Th. le M.Th. zir theh in Ph.D. in Leadership Tennesse Temple University , USA ah zir lai in milai mibur pawlkom awknak, cozah siseh cozah asilomi siseh pawlkom ruangzing, dindan, laireldan, thuthluknak tuahdan, milai bulpak mizia le mibur mizia pawl thu le milai bulpak le mibur pawlkom sungah Pathian Thlarau hnatuandan pawl kum ziangmawzat ngunzaih zetin zir le hliakhlai rero tu asi. |