IX. KAWHHRAN NUN SIM AWKNAK

Nunsim awknak le hrem awknak hi voi tampi kan thleidang thiam lo ttheu. Hrem awknak cu pakhatkhat in dan pahbal in thilttha lo a tuah ruangah a tthat theinak dingah le a sualman hremnak a siih daan vekin tuah mi a si.Nunsim awknak cu pakhatkhat kha Pathian dan vekin a nun lo ruangah a tthanak ding ruahsannak thawn nunsimnak asi. Baibal in zumtu pawl nunsim awknak a ttulzia le kan tuah hrimhrim dingmi a sinak thu pawl a sim. Tulai sanah khristian nun a tlahdah aw vivo ih kawhhran in sual duhtawk a centu zumtu kawhhran sungtel kha a zoh men tikah Baibal in a lotheihlo in a fialmi kawhhran mawhphurhnak cu ngaihthah menn asi.

A. Nunsim awknak Baibal sungah kan hmuh thei mi pawl.

1) (Khristian) Unau pai’ sual ( ziang sualnak asi ti fiangten a sim lo) Mth 18:15-18.
Hi tawkah nunsimnak in a tumtah mi cu a sualtu pai’ nun remtthatsal ding asi. Nun sim awkdan ding a zirh mi cu a hmaisa bikah mimal a sual ti theihmi kha a falin sim ding asi. Cumi ah a duh cuanglo ih a nun a thleng lo asile midang pakhatkhat (kawhhran upa maw zumtu ttha) sawmin nunsim ding asi. Cumi ah a duh cuang loih a sual zawm thotho a sile mipi hmaiah kawhhran ah za phuan ding asi. Mipi hmaiah a sualnak cu za phuan in rim dingah nunsim ding asi. Cui hnu khalah a sual thotho ih thusim a lunglo asile kawhhran sungtel (member) sinak ihsin dawi suak ding asi.

2) Nupa sualnak, hamttamnak, milem biaknak, zuritnak, mi thangsiatnak,
I Kor 5.
Nunsimnak in a tumtah mi cu remtthatsal (5:5) le thianternak (5:7) a si. A sual cu riahsiatnak asi zia langterin zumtu pawl kawm awknak lak ihsin dawisuakih pawl khal pawl kawm lo ding asi.

3) Sualnak (Ziang sualnak ti a fiang lo) II Kor 2:5-11
Hi tawkah nunsim awknak ih tumtahmi cu a sual tupa remtthatsalnak (2:7) le kilhim awknak (2:11) asi. Cuticin nunsim hnuah thinlung thiangten a sir aw asi le a sual cu ngaidam in a riahsiatnak lakah hnem in tha pek ih duhdawtnak langer ding asi.

4) Sual Kal 6:1
Nunsimnak in a tumtahmi cu remtthatsalnak (2;11) asi. Cutin nunsim tikah thlarau lamah unau vekin zoh in thin nem zetin le mah fimkhur zet cingin tuah ding asi.

5) Zetnak ( II Tim 3:6-15), thulunglo
Nunsimnakin a tumtahmi cu remtthatsal ding asi. A umtudan zoh ringringin nun simding asi. Asinan ral vek si loin unau vekin nun sim ding asi. Cutikah sual thawn a buahcih awk sung cu pawlkawm ding khal asi lo.

6) Thu felfai thei loin kawhhran upa le hruaitu sawiselnak I Tim 5:19-20
A tumtahmi cu a sualtu thianfai nak le a kiangkap midang pawl khailin a tuah vek an tuah lo nak dingah ralrin pek nak asi. Nunsim tikah pahnih maw pathum maw theihpi tu umin sim ding asi. Asual zawm thotho asi le mipi hmaiah a sual cu phuangin nun sim asi ding.

7) Tthentthek tu Tit 3:9-11.
Nunsimnak in a tumtahmi cu tthekdarh awknak lak ihsin kilven awknak asi. Cutin nun sim tikah voihnih tiang ralrinnak pek asi dingih pawl kawm awknak lak ihsin hnawn ding, pawlkawm lo ding asi.

A tlun lamah kan hmuh thei vekin kawhhran sungah nunsim awknak cu a lotheihlo ih kawhhran rawngbawlnak pakhat a siih a thutlangpi pawl cu a hnuailam vekin a tawizawngin kan sim thei.
Kawhhran sungah nunsim awknak cu
1) Kawhhran sungtel pawl cu unau vekin pakhat le pakhat a pehtlai aw mi Khrih taksa peng an si vekin siatnak tthatnak ah mai duhduh in nun theih asi loih Pathian duhdawtnak daan in a kaihhrem mi an si.
2) Kawhhran sungtel zumtu zo vek khalin Pathian duhdawtnak daan in zumtu pakhat cio parah a phutmi nuntudan cu tuah famkim dingah mawhphurhnak an nei cio asi.
3) Nunsim awknak in a tumtahmi cu kawhhran sungtel pakhatkhat sualnak ah a tlu se tu runsuak in a nun remtthatsal nak ding asi.
4) Cutin tuah tikah nunsimtu lala khal sual lakah tlu se lo dingin fimkhur zetin tuah ding asi.
5) Kawhhran sungtel pawl sual thawn hnawihnih aw lo dingin kilven awknak khal asi. Cun kawhhran zumtu pawl thlarau nun hrisel nei thei dingin kilven awknak le kaihhruai awknak asi.

A tlangpi thu in kawhhran sungah nunsim awknak kan hmuh thei mi pawl cu
1) Nupa sualnak I Kor 5:1-13
2) Mimal thubuai rem lo mi Mth 18:15-20
3) Tthentthek awknak Rom 16:17-18; Tit 3:10
4) Zirhsual nak Kal 1:8-9; I Tim 1:20; 6:3-5; II Jn 9-11; Thup 2:14-16.

B. Kawhhran sungah sual tuah a um na theih asile
a) Na thlahdah ahcun:
i) rundam asi lo ding Jas 5:19-20
ii) sualnak thawn a nung ringring ding I JN 1:6
iii) Pathian in nun a sim men ding I Kor ``:30
iv) Pathian in a nunnak tiang a laksak men ding I Kor 11:30; James 1:14-15; I Jn 5:16.
b) Nun sim aw la:
i) nangmah mimal in sim hmaisa aw Mth 18:15; Lk 17:3. Na nunsimmi a lo ngai a sile na unau na runsuak asi.
ii) a sual zawm thotho asi ahcun mi pahnih maw pathum hmai ah simaw nunsim sal aw Daan 19:15; Mth 18:16. Na thusimmi a ngai asile na runsuak asi.
iii) a sual zawm thotho a sile kawhhran mipi hmaiah sim suak aw Mth 18:17; I Tim 5:20. Na thusim a lo ngai a sile na unau na runsuak asi.
iv) Cutik khalah a sual zawm thotho asile pawlkawm nawn aw hlah Mth 18:17; I Kor 5:5; II The 3:14-15; I Tim 1:20. Na thusim a ngai a sile na unau na runsuak asi.
v) Cuticing cun a sual zawm thotho a sile zianghman theihpi nawn aw hlah Rom 16:17-19; II The 3:6. Cule a sir aw a si ahcun na unau na runsuak asi.

Curuangah zumtu pakhatin a kiangkap ah zumtu unau pakhatkhatin sual a tuah rero hmu na cingin a zohmen asi ahcun a sual tupa vek thotho in a sual lo khal a sile a mawhphurhnak a tuah lo ruangah a sual ve thotho asi. Curuangah nunsim awknak cu kawhhran sungah tuah hrimhrim ding mi asi.