MITHMUH LO ZUUN

Khuahlan lai khawte pakhat ah fala mawizet, farah fa a rak um. Tlangval a nei dah lomi, fala thianghlim asi. Voikhat cu ramkulh siangpahrang inn ih hnatuantu pawl siangpahrang fapa hrang nupi hawlin cui khawte ah an thleng. Cui khawte sungih farahfa fala mawi zet cu an hmuh tikah siangpahrang fapa nupi dingah an ham ih sui zunghruk an pek. Cutin fala nute cu an ko ih thu an sim, “Siangpahrang fapa in nangmah hi nupi dingah a lo duh, curuangah suizunghruk hi hruk ringring aw la, cule tlangval dang pawlin nupi dingah ham zo mi nasi ti an lo thei dingih an lo hnai hnok lo ding. Cutin, siangpahrang fapa cu nangmah tthih ding a timtuah rero lai, mopuai tuahnak ding, nan nupa in nan um nak ding innpi le innsung ziangkim a timtuah theh ve ten nan khua ah a ra dingih nupi ah a lo thit ding” tiah thu an cah ta ih siangpahrang innsang hnatuantu pawl cu an tlung sal.

Cui hnu lamah fala nu te cun a suizunghruk cu a hruk ih nitin te lo ah hna a ttuan theu. A thinlung sungah ziangtik hmanah tlangval dang nei thei asi nawn lo ti a thei aw aw. A thinlung sungah a mit in a hmuh hrih lo mi siangpahrang fapa cu a khat theh, hmuh a cak tuk ih ziangtik lai khalah cui siangpahrang fapa lawnglawng a ruat. Hna a tuan tla le a tha a tho tuk, a lung a awi ringring. A kiangkap um pawlin an thei thiam lo, mi aa maw si an ti. Siangpahrang fapa thu mi in an sim asile a lung a awi tuk, a ngai khawp thei lo. An ram siangpahrang pa thu, an insang thu, an thuanthu, an ram uk dan thu, ral an do thu, ti pawl hi nitin in a sim ih a rel, cuvek reltu pawl pohpoh rualpi tha ah a tuah. Siangpahrang insang relse tu, dodal tu pawl cu a hua ih siangpahrang insang ttantu pawl cu unau vekin a zoh. Cutin an khawsung milian bik pa ih fanu fapa pawl hnak hmanin a lung a awi sawn. Khawsung mi pawlin ziangah an siar lo tla le poi a tilo. Ziangruangah hi farah nu te hi hi tluk a lung awi si pei tiah an khawsung mi pawl an mang a bang theh.
Fala nute cun hitin cakuat a ngan,
“Dear Mithmuhlo Duhbik,
Ka cakuat hi ngainak mithli thawn ngan theih sisehla, ka va duh em! Na ratnak ni cuan in ka nung, nitin ka lungsungah nangmah lawng in hmun na luah, ka lungawinak cu nangmah lawng na si, kan khua ih tlangval pawl tla in inleng theu nan, ka mithmai an hmu nawn lo, ka thinlung sungah hmun an neinawn lo. Na zunghruk kuatmi in nitin thu isim, ka thinlung ikaihhrem, i-uk. Ka tisa mit in ka lo hmu lo nan, ka thlarau mit in ka lo hmu ringring. Nunnem, hmeltha, duhnung, zaidam, zawnruat thei, fim, huham nei, thatnak tinkim thwn thuam mi, ramkulhpi siangpahrang fapa in kei farah nu te, khawsung mi pawlin zianghman ah siar lo mi, nautat rero mi, nupi dingah in duh ih I ham, zunghruk I pek mi cu ka theih thiam lo duhdawtnak asi. Asinan, zungruk cu ka kutzungah ka bun fawn, zum lo theih asilo. Ka lungawi dan hi ka suah ihsin ka neih dah lo mi, leitlun in i-pek thei lo mi lungawinak asi.

Aw, Mithmuhlo Duhbik,
Nangmah ka lo ngai nakah kan khuasung mi pawl lennak, thatnak, nuamnung cennak cu zianghman ah ka rel lo. Nangmah tel lonak ah zianghman nuam ka ti lo, ka lungsungah na thlarau in hmun a luah theh. Mithmuhlo Duhbik in ziang a duh ih ziang ahua ding ti lawng ka ruat. Na duhmi ka duh, na huatmi ka hua, a lo duhtu ka duh ih a lo hua tu ka hua, ka nun pumhlum hi na lungthlitum famkim tertu, na lung diriamtertu si hram dingna ti ah thlaza ka cam. Leitlunah milian mitha, hmel thatha, an tampi lai ah, leitlun ah bawi upa, siangpahrang fanu mawimawi, an um lai ah, ziangruangah kei hi iduh ih ihril asi pei ti hi ka thinlung in a thei thiam lo. Ka fiangmi cu keimah thatnak le zuamnak ruangah asilo, nangmai duhhrilnak liolio in iduhdawt ih nupi dingah iham, sui kutzungbun ipek.

Aw, Mithmuhlo Duhbik, na duhdawtnak hi ka lei damsung lungawiter tu asi. Na duhdawtnak zungbun cun ka leitlun khualtlawnnak ruahsannak i-neihter, ziangvek in harsatnak ka tawn canah siseh, ka rualpi thatha pawlin a nih cu farahfa asi tiah indungtun tikah siseh, pasal tawng lo tiah hnihsan le zuar thlai ka tawn can ah siseh, tlasam zetin ka um lai khalah, ka mitthlam ihsin na hlo dah lo, ka lo ngai ih ka lo hmu cak tuk. Na thu hla an ngannak cabu cu ka siar ih ka zungbun cu ka zoh ringring. Cuticun ka umnak khua ah ziang a cang timi le zo in ziangtin in zoh, ka thu hla ziangtin an sim timi pawl khal ka ruat nawn lo. Kan khawsung tlangval thatha, nupi pasal neih awknak puai maksak tatak, nawm awknak pawl cu zianghman ah ka ruat nawn lo. Ka lo duhdawt zia langternak ah zianghman tuah thei mi neihmi le sumsaw ka neih lo vekin nahrangah ziangha ka sung ding timi lawng ka ruat. Ka lo duhdawtzia langter dingin tuarmi ziangtal nei sehla ka duh. Cuticun sunmi ka neih asile ka lo duhzia hi itheihsak dah pangah ka ti. Cutincun nangmah ka lo hngak ruangah kan khawsung mi pawlin in hnihsan, nautat asile ka lung a awi sinsin. Na ratnak ding lamzin, kan khaw-hnar ka cuan ih sunzan ti loin zan ka it tik khalah nangmah ka lo ruat, ziangtikah ka tlangval pa a ra ding ti lawng ka ruat, ziangtikah ka duhbik mi, Mithmuhlo ka tlangval pa in ira hruai ding, ziangtikah siangpahrang inn sungah siangpahrang fapa nupi lukhum i-khum ter ding, ziangtikah ka pasal siangpahrang fapa in keimah i-tthitnak mopuai ruai a theh dingih mithmuh theih in mipi hmaiah ‘hi nu hi, ka nupi duhbikmi asi’ tiah a phuang suak ding, aw, cu pawl ka ruat nakah na ratnak ni cu a tu rori ah ra thleng cing ding vekin ka ruat. Ka lungsung cu lungawinak sim cawk loin a luahkhat tikah ka kiang um pawlin mi aa ah in ruat theu. Fala aa ah in ruat theu.

Aw, Mithmuhlo Duhbik, duhdawtnak hi meisa sisehla ka taksa pumpi hi a kang ral theh zo ding. Nangcun iduh ruangah suizungbun ikuat, keicun na hnenah zianghman man neimi lo kuat ve ding ka nei lo. Ka neihmi umsun cu ka nunnak, le ka taksa hi asi. Ka nunnak cu nangmai ta asi zo, i-ham zo vekin na hrang lawngah ka nung asi. Na rat lai hlan lo rin um zetin ka rak nung asi. Ka thinlung sung hmun luahtu cu nangmah lawng na si. Na duh lo zawng ka tuah pang ding ti ka phang, na huat zawng thawn kan kawm aw pang ding ti ka phang. Sihman sehla cui phannak le tihnak pawl cu iduhdawtnak thawn tahthim tikah zianghman rel tlak an si lozia ka thei.

Aw, Mithmuhlo Duhbik, Siangpahrang Fapa, kan khua cu khawte asivekin zohman in siangpahrang fapa a ra ngaingai ding an zum lo. Keimah nupi ah nei dingin na ra ding tla zohman in an lo zum lo. Siangpahrangpa tla mit in an hmu dah lo ruangah siangpahrang fapa tla a um ding tla an zum lo. An kaa in cu an sim theu nan an nitin nun cu siangpahrang uk ram tla a bang lo. Sihman sehla, kei cu, na hrangah kumkhau rinumten ka um ding asi ti i-theihsak aw.” 

Na duhdawtmi, le a loduhbiktu,

Dated:
======================================
Cui Siangpahrang Fapa cu zo asi? Pathian Fapa Bawi Zisu Khrih thu sim duhnak asi. 
Cui khawte fala, ham cia mi mo zo asi? Zumtu unau, nang le kei kan si. 
Suizunghruk an pek mi cu ziang asi? Thlarau Thianghlim hmuhsaknak asi. 
Cui hamcia mi mo ih lungawinak na nei ve maw?