May 17^th 2009

Thucah tawi:

 

1)      Ziang hmuahhmuah Pathian hmin sunlawinak si sheh:

 

i)                    Kan nun tehfung cu “Pathian hmin a sunglawi maw?” ti siseh

leitlun milai pawl hrang ahcun nun cu milai thinlung diriamter nak asi ih biaknak le sakhua cangvaihnak pawl khal anmai thinlung diriam ter tu menah an tuah mi asi. Cuntin siloin zumtu pawl hrang ahcun nun ziangkim cu Pathian hmin sunlawinak hrangah asi.

ii)                   Kan lungawinak tehfung cu “Pathian a sunglawi maw?” ti siseh

*leitlun mi pawl cu Pathian hmin a sunglawi khalle anmai hmin a sunglawi lo ahcun an lung a awi thei lo.

iii)                 Kan pehtlaih awknak, pawlkomnak tehfung cu “Pathian hmin a sunglawi maw?” ti siseh

* A bur le pawlkom in ziangkim kan tuah tikah kanmah milai porh awknak le nuam awk ternak men si hlah sheh, Pathian hmin sunlawihnak sawn si ringring sheh.

iv)                 Kan tongkam, tuahnak, ruahnak tehfung cu Pathian a sunglawi maw?” ti siseh

* Kan nitin nun thuhrampi khaikhawm tu, dung in khawr tu cu Pathian hmin sunlawinak si ringring sheh.

v)                  Cuticin, Amai hmin sunlawinak hrangah nan sungah Pathian THlarau hna a tuan dingih mangbangza nan ruahban lo, tisa khawruahnak mit in nan hmuh le  ruahban lo Pathian in a lo hmu ter ding asi.

 

2)      Nan hmaiah thihnak le nunnak Pathian in a lo retsak:

i)                    Nitin na hril mi, decision, fate in na hmailam saupi hrang thuanthu a tuah rero asi. Tlakrawh fate pakhat tampi kawmkhawm mi in inn pi tumpi a sak vekin nitin thuthluknak (decision) fate na tuah mi pawl kawmkhawm mi kha na thuanthu cu asi.

ii)                   Na duhthlannak, na duhnak kha Pathian hnenah hlan/up tahratin ziangtkim thuhluknak (decision) tuah zuam aw. Cutin tuah thei dingin cu ziangmi ruahnak pawl hi tisa thinlung in a suak ih, ziangmi ruahnak pawl hi Pathian Thlarau hnen ihsin a ra, ziangmi ruahnak pawl hi kiangkap le dunglam thuanthu ihsin a ra ti thleidan thiamnak fimnak na neih a tul. Cui fimnak cu Pathian Thlarau in nangmah lo pe dingin na sungah a lo cencilhnak khal asi. Dil aw. Hawl aw.

iii)                 Nan thinlung kha mibum hmang asi ti thei ringring aw; na nulepa, saya te, kawhhran upa, pastor, le Pathian thu lunglo dingin a lo bum tum theu mi kha theithiam aw.

iv)                 Pathian in a lo ruatsak mi lamzin dik na hril theinak dingah nan duhnak (desire) kha Pathian Thlarau uknak hnuaiah na up awk a tul.

v)                  Pathian in a lo duhsak mi, a lo remruat sak mi thutak lamzin parah feh dingin na hril tikah Pathian THlarau in huham cahnak thawn lam a lo hruai asi ti theih hngilh dah hlah aw. Nunak hril aw la thihnak lamzin cu hrial aw.

 

3)      Na sungah a cengtu Pathian Thlarau in lo uk sheh:

i)                    Milai nun hi pakhatkhat in a thunun, a uk ringring: tisa milai thinlung, Pathian Thlarau, lole Satan in a uk ringring.  

ii)                   Satan in a lo uk tikah Pathian dodal tu ah a lo hmang ding, cutin thiltha ka tuah sihmang na ti laiah thihnak lamzin ah a lo hruai ding. Pathian fa le pawl dodal le thangsiat tu ah na thluak, na thinlung, le na hmur kaa kha a lo hmang ding. Na theih awk tikah a tlai tuk ding. Na siattha theihnak mit a lo cawtter tikah zianghman thutak le thudik le a lo bumnak khal na thleidang thiam lo ding.

iii)                 Na tisa thinlung in a lo uk tikah Pathian ih ralin a lo uk tinak asi. Tisa thinlung in a ukmi pawlin Pathian duhnak le thutak khal an theithei lo. Biaknak lamah zuam zet na si khalle Pathian fihnungza, a raal na si.

iv)                 Tisa duhnak in a lo uk asile (thlarau nun) na hlawhtling dah lo ding:

-Na phurnak, duhnak, huatnak, zeetnak, paih lonak, hurkhuannak, tvp, tisa thinlung ihsin a suak mi in a lo uk asile na tawpnak cu thihnak asi ding.

            v) Curuangah, na nitin nunah, thuthluknak fate bik tiangin Pathian Thlarau in lo uk she. Na duhnak, suangtuahnak, khawruahnak, hiarmi, caak mi, duhzawng, tongkam, le duhthusam pawl kha Pathian Thlarau in lo uk seh. CU lawnglawngah Pathian duhnak khal na theithei dingih Pathian in a lo ruahsak mi lamzin dik khal na hril thei ding.

 

4)      Midang siatnak tuahtu hnakin bawmtu va sisawn uh:

i) Laimi lawng si lo, milai zapi ten dokhalh duhnak thinlungput/mizia (rebellious sprit) kan sungah a um, cumi cun hotu le kan tlunlamah Pathian in a ret mi upa/nu-le-pa, saya te thu dodal duhnak kan nei. Curualrual in mah thawn a rualran mi iksik le zuam duhnak siseh mah hnakin a tawntai deuh tu pawl nautat duhnak thinlung cu milai zapi te suahpi mi asi.

ii) Huatnak, iksiknak, mi thangsiat tu, le satan hmanrua milai thinlung siatvaihnak in lo uk dah hlah sheh; cu pawl ruangah zianghman tuah dah hlah aw la, cupawl sal ah na can second pakhat hman hmang dah hlah aw. Huatnak, iksiknak, mi thangsiatnak, tvp tisa thinlungput in a rahsuak mi cu thihnak, siatnak asi.

iii) CU hnakin na kiangkap ah mi tawitai, a fel lo mi na hmuh asile thiltha tuah ding, midang bawmtu dinhmunah ding dingin Pathian in na hrangah canttha a lo pek asi ti ruat sawn aw la na neihmi, theihmi le ti theitawk suah in bawm sawn aw.

iv) Zo in ziangvek hmin tthatnak a ngah ih na duhmi na hlawhtlin lo ruangah midang dodal le thangsiat in um hlah, “Pathian hmin a sunglawi maw?” timi sawn kha na lungawinak tehfung si ringring sheh.

vi)                 Noah le a fapa pathum kha thei ringring uh: A pafa upa cun apai mualphonak kha a hnihsan tikah camsiat a tuar ih a nau le pahnih cun apai mualphonak kha an huhsak tikah thlawsuah an co asi. Midang mualpho ningzahnak va hnihsan tu le thangsiat rero tu pawl cu camsiat mi fate an si ih midang tlaksamnak le mualhponak huhphen sak tu sawn kha mi thlawsuak an si ti theihhngilh hlah uh.

 

5)      Van sangka cu a ong aw asi:

i)                    Na Pathian cu na theihnak box fate sungah khum hlah aw. Na Pathian in ziangtluk na damsung nangmah hmangin a tuah thei timi cu na theihnak parah hngat aw hlah aw.

ii)                   Na tuah mi ziangkim ah na Pathian, nangmah, le na thinlung zapi ten lungrual ringring dingin zuam aw. Cule ziangkim na tuah mi cu zumnak thawn tuah aw. Nangmah le nangmah na theih awknak hnakin tamsawn na Pathian in nangmah hmangin a tuah thei asi ti zum ngam aw.

iii)                 Na mit in na hmuh thei mi le na tham thei mi thil, tuisun ih na dinhmun parah hngat aw dah hlah aw, nangmah a lo sersiam tu, na Pathian ih tumtahnak le duhnak sawnah hngat aw aw in na sungah thiltha a tuah thawk tu le a tuah pitlin tu khal a lo sersiamtu, a fapa thisen in a lo leitu, na Pathian  asi ti theihhngilh dah hlah aw.

iv)                 Van sangka cu a ong aw aw ih ziangtluk tiang na thinlung sangka ong in na nunah na Pathian na cangvai ter ding timi parah ziangtluk tiang na nun ihsin mi tampi hrangah thlawsuah a luangsuak ding ti a tthum aw aw asi. Thil tha lo, siatnak, huatnak, mi thangsiatnak, tvp, satan hmanrua na sung ihsin a luangsuak asile Satan palai na si ih thatnak le thutak, unau duhdaawtnak na sung ihsin a luangsuak asile Pathian palai, a malsawm le thlawhsuah luansuaknak Pathian fate na si ti theihhngilh hlah.

 

6)      Khat le khat dudhawt aw uh:

i)                    “Mi zokhal a unau a huatu cu Pathian fate asi lo”ti-nan thei. Khatlam zwngin ka sim asile, a unau hrangah thiltha tuah thei na cingin a sup aw tu, a unau hrangah thil tha lo ti thei na cingin tuah thotho tu, cu duhdawtnak in a nung lo tinak asi. Khatlam zawng in ka simbet asile unau duhdawtnak tipungtu cu Pathian fate an si ih huatnak tipungtu cu Satan fate an si. ZUmtu pawlin dan vekin kan huat thei mi cu Satan le sualnak lawng asi.

ii)                   Ziangtluk ka unau ka duhdawt thei ti na thei duh asile ziangtluk ka ngaidam thei ti nangmah le nangmah sut aw sal aw. Duhdawtnak thianghlim, Pathian hnen ihsin a ra mi cu mai ttanghai nak, mai thuhnuai ah midang ret duhnak asilo, midang tthatnak hrangah riantu dinhmunah, tangdornak in duhdawtmi lunghmuai zawng, duhdawtmi pawl hrang thatnak tuah dingin pek awknak asisawn.

iii)                  Na thinlung sugnah huatmi, ngaidam thei lo mi na neih asile cucu cancer nathrik vekin na thlarau eisiat tu, na sunglam ah nget vekin a lo ei rero tu asi lawng si loin Satan ketlaknak na sungah a umih satan in cui na mi huatnak le ngaidam thei lomi cu hmanrua ah hmangin kehle vorh ah tilh a lo fial rero dingih huatnak ih rah, unau thangsiat tu, dodal tu ah satan palai na tuan rero ding. CUhnakin unau duhdawtnak in na sunglam nun cu lo luahkhat sheh, cutik lawnglawngah Pathian ih daihnak cun na nun sunglam a lo luahkhat thei ding.

 

7)      Dan pahbal hlah aw: Don’t cross the line 

Tatthimnak: Voikhat cu cawlhni zingah lamzin palik pa in Rev. Solomon kha a rak cawlhter tikah Rev. Solomon in hitin a sim, ‘ Keimah cu Rev. Solomon  ka si ih ka kaingih to ka rualpa hi Rev. Jeremiah asi. Cule tuizing hi Rev. Haggai te biak inn ah thusim ding ka si. Tu hi malte kan tlai deuh ruangah cak dueh in kan feh a tul’ a ti. Cutikah palik pa in, ‘nang Rev. Solomon, na rualpa Rev. Jeremiah, cule Rev. Haggai te biak inn ah thu na sim zik ih nan tlai deuh. Cule, kei hi zo ka si in thei maw?  Moses ka si, ka dan nan pahbal asi’ ati. Speed limit lan in motor na mawng, nahzi pakhat ah peng 65 hnakih tamin mawng thei lonak lamzin parah, nahzi pakhat ah peng 75 in motor nan mawng asi’ a ti ih cawhkuannak ticket a pek ih a fehter.  

Pathian fate pawl hrang khalah meisa cu a saa ih tida cu a dai thotho. Na tuh mi ci vekin na at ding. Saul bangin nangmai thinlung sungah “thiltha” tiah na ruah mi tuah tahratin danbuar hlah aw. Kumpi cozah dan dinglai le senpi vangtlang nunphung dan pawl, leitlun mitha pawl hmain an pahbal lo dingin nuntu ziaza dan pawl pahbal hlah aw. Meisa cu piangthar pawl hrang khalah a saa thotho ti theihhngilh hlah.

 

8)      Buainak cu thiltha tuahnak cantha ah lak thiam dingin zir uh:

Lamzin parah mi pakhatkhat a tlu nan hmuh tikah mi hrek cun “a ninghman zak loin sunlai fangah lamzin kiangah a it” nan ti men thei ih nan hmuh mi pohpoh hnenah thangsiat in nan rel thei. Midang in an tuah thei lomi siseh, an tlamtlin lonak ruangah famkim lo zet dinhmun ah dingin an tuah pitlin thei lomi nan hmuh tikah cuhnakih tha in tuah thei tu si va zuam sawn uh. Cun, na bawm thei asile na tuah thei mi sung in bawm dingin zuamsawn uh. Midang tlamtlin lonak le famkim lonak siseh tuah sual mi parah thangsiat tu, anmah te an tlamtlin lo nak ruangah an mualpho nak pawl zual ter tu, an thinlung hliamhma par ah tisa le cite va burh tu va si dah hlah uh. Moses, David, Samson, Ahrahram, pawl hman in an zumnak nitin nunah tlaksamnak, tluksiat can an nei asi. Nan unau an tlaksamnak, tluksiat can ah an keh le fawrhlam kapah dinpi le bawmtu, tungding tu va si sawn uh. Cuticun Pathian Thlarau nan sungin a cangvai dingih mi tampi hrang thlawsuah luansuaknak nan si sawn ding.  

            Mi tampi bum in an um vekin buainak fate kha thupi zet vekah va cang ter hlah uh. Piasen hman man nei lo, aa lu a tung in maw a pheizawng in kan at ding timi thu-el aw aw in nu-pa mi-aa an to aw ciamco theu vek va si hlah uh. At thlak thu el awknak va hrial uhla, rah a nei mi, man a nei mi, thutak dinpi a tul can lawngah nunnak thap khalin va ding uh. “Thu el awknak ah na neh ringring asile a netnak ah rualpi tha na nei dah lo ding” an ti mi kha thei ringring uh.

 

9. Mi zokhal in mai tuanvo le covo, Pathian vozem thei in Amai hmin sunlawinak ah hmang uh Mi zokhal Pathian hmuihmel keng kan si vekin Pathian lunghmui zawng tuah dingin thiambik suahkeh covo kan nei asi. Na covo, Pathian vozem na theih lo asile midang hnaihnok tu, le midang covo iksik in na nun di a riam thei dah lo ding. CUruangah, Pathian in ziang covo pianpi thiambik na nei timi thei aw aw la Pathian hmin sunlawinak ah hmang aw aw . Pathian in tuanvo a lo pek vekin a tulmi thiamnak le thiltitheinak khal a lo pek. Nangmai tuanvo kha Pathian pekmi thiambik na neih mi thawn lungtho ten tuan aw, cucu Pathian lunghmui mi le lungawi mi asi. Patian in thuanvo a lo pek tikah a tul mi thiamnak le titheinak khal lo pe lo in a um dah lo. Khatlam zawngin ka sim asile Patian in na tuah thei mi hnakih tam a lo fial dah lo ih a lo phut dah fawn lo. Nangmai tuanvo le covo parah lunghmui zetin tuan aw la, midang tuanvo le covo ah buai hlah aw. Midang fel lo ruangah Pathian in a lo mawhsiat lo ding.

 

10. Na lungawinak cu nangmai ttuanvo asi.

Ziangvek dinhmunah na ding, ziangvek tlaksamnak na nei, na duhthusam ziangtluk a famkim lo khal asile, Pathian ah na lungawi ringring ding cu na ttuanvo canvo asi. Na lungawi lo asile zohman mawhsiat ding na nei lo. Na kiangkap dinhmun, na insang, nupi pasal, rualpi, kawhhran, pawlkom, ram le miphun, hnatuannak, neihmi, neih lomi, duh mi, huatmi, duhthusam, tvp, ruangah na lungawi lo asile nangmai mawh asi. Pathian le midang na mawhsiat thei lo. Na lungawi ding cu nangmai tuanvo asi. CUvek thotho in midang lungawi ter ding kha nangmai tuanvo asilo. Patian in a tu ih na dinhmin cekci ah khan lungawi twk dingin a lo ret mi asi. Na lungawi lo asile na sunglamah a dik lo mi a um asi; cupawl lakah a cang thei mi cu, nangmah le na Pathian pehtlaih awknak a tha lo, na thlarau a naa, na sungah thutak a um lo, thutak na thei lo (ziangah tile thutak cun luatnak mi a pe ih cui luatnak cu thinheng le lungawi thei lonak lak ihsin luatnak khal a tel). Bawmtu na tul asile hawl aw.

 

Ziangtik ziangvek dinhmun khalah “Pathian cu a tha, kumkhua in” ti thei ringring ding na si. 

 Anetnak ah, tthang rero ding kan si tithu ka bet duh. A tui na dinhmun fangah na duh aw tawk, zir bet le theihbet, thansoh ka tul nawn lo na ti asile na cem cuahco tinak asi. Tuisun ih na theih mi na duhtawk ih zirbet na duh nawn lo asile thaisun ahcun tuisun ih na theih mi hman na theihhnhilh vivo ding ruangah na thei mal sinsin ding. Cutikah midang theihnak dik le thianghlim an nunpi lai ah nang cu na suangtuahnak, ruahnak menah na tal buai rero ding. Zirnak, theihnak, le nuncan ziaza, thlarau nun, lungput le mizia khalah thangso vivo ding, Khrih hmuihmel tam sinsin kan nunah lang thei dingin hmasawn sinsin ding kan si.

Pathian in hlawsuah malsawm lo pe hram sheh!