July 3^rd 2009

 

A tuvekin Indianapolis, Indiana, USA ah Chin mino puai nasa zetin tuah thei dingin thlawsuah in petu kan Chin Miphun Pathian hmin ka thangthat asi!

 

CYO tuanvo neitu, Chin Mino pawl, nulepa, fala tlangval, khua hlapi ihsin a ra mi Chin miphun ulenau pawl, nan zate parah a tuvek in thucah tawite sim theinak can ka nei ruangah lungawithu ka sim hmaisa duh.

 

Tuhlan kumzakhat kan zohsal asile America ramah kan Chin mi zohman tla an rak um hrih lo.Asinan, America ram ihsin ramthim asimi Chin ramah missionary an rak thlah.Cutin kan Chin miphun in ri-rai baiknak ihsin a nungmi Pathian biaknak hna tla kan thiam. Chin miphun Khrihfa kan si hram thawknak kum zakhat sungah a tuvekin America ramah mino zatel in Chin mino puai tuah thei in kan dinhmun a thleng aw mi hi kan pupa thlarau pawlin hmu ve hai sehla anlungawi dan ding cu sim thiam asi lo ding. Leitlun nisuahnak ram kil ihsin ra in  America ramah Chin mino puai tuah thei in a tuvek dinhmun kan thleng mi ka mit rori in ka hmuh tikah lungawithu sim cawk lo ka nei asi. Atu ah kan sim thei mi cu,

 

Chin Youth Rocks! Chin Youth Rocks! Chin Youth Rocks! Tiah kan au thei thlang asi!

     

Leitlun miphun pawl thuanthu kan zoh asile santiluang milai thuanthu in hliamhma a put ter lomi miphun zohman an um lo. A tu ah a thangso zetmi America rampi a dinsuak theinak dingah American pacangtha tampi thisen a rak luang asi. Chin miphun khalin kan pipu leidoral an tan hnu khalah ka pu kan pa, kan u le pawl siseh kanmah san Chin miphun minung tampi tla kan san thuanthu in hliamhma a put ruangah nunnak a liam mi siseh thinlung a siat mi le lungawinak a hloh mi tampi an um. Kan miphun thuanthu cu santiluang in tilian sungah riahsiatza in a fen rero laifang asi.

 

CUvek dinhmun laiah, atuvek in Chin mino pawlin mino puai ropi zetin nan tuah thei ruangah kan zapi ten CHIn Youth ROCK tah kan au thei tlang asi.

 

CUlawng hman si loin,  kan miphun thuanthu tuahtha dingin siseh, hliamhma a tuar mi kan ulenau pawl damter dingin siseh santhuanthu in kan miphun, kan san minung pawl liangparah a tthummi miphun tuanvo phursuak thei dingin le a ra laimi santhar nonawn pawl hrang lamzin sial dingin siseh a tusan mino pawl liangparah a thum aw asi ti ka sim duh fawn. Leitlun hmuntin ah a thleng mi, Chin mino pawl kutkai in miphun thuanthu cu liangparah suangin duhdawtnak le lungkhat ten hmainor lawngah santiluang cu kan miphun lungawi zawngin kan fehpi thei ding asi.

 

Kan ram le kan miphun thuanthu tuahtha dingin, le kan miphun Pathian cawimawi dingin leitlun khawmual tinah a thleng mi Chin mipi zapi ten tuanvo kan nei ih a tuvek in Chin mino pawlin kanmah le kan kiangkap cio ah a ummi kan miphun hawikom pawl thawn kutkai in lungkhat ten cangvai mi hi zohtthimtlak miphun cawisang tu asi. Leitlun hmuntinah a thleng mi kan Chin mipi pawl cu hnamhlo, mihlo an si lonak dingah siseh kanmah le umnak khua le ram cio ah kan Chin miphun Pathian bia in, kan Chin miphun nunphung thawn nungin, kan Chin miphun thuanthu cu liangparah suangin mi zapi tuan tlang ding cu thuanthu in mi pakhat cio liangparah a tthum mi tuanvo asi.

 

Kan zapi ten kan tuah thei mi a bang aw lo ding, kan phurzawng, duhzawng le neih mi le theih mi tla a bang lo ding. Bang awk lonak ummi cu siatnak asi lo ih kan cahnak sawn asi. Cuhnak in mi zokhalin kutken hriamhrei vekin duhdawtnak cu nunpi in huatnak cu kan ral hmanrua tha bik asi ti thei in a cak lomi, a famkim lomi, le a tlasam mi bawm aw tawn in a tha mi le lungawinak hlawm aw tawn in a tuvekin hmuntin ramtin ah a ummi, Chinram pengtin ihsin a ra mi Chin mino pawl kutkai in tuanvo lak cio asile Chin miphun hmailam thuanthu cu a eng sinsin ding asi.

 

Lehnak cu hmanrua asi ih zo in a neh timi hnakin duhdawtnak in pawlkom awknak thianghlim nei in pumkhat sinak le lungkhat sinak cak ter tu sawn si dingin lek uhsi. Atu hlan kum rei lo te ah Rangoon ah Chin mi Bible tlawngta le pastor, sayate pawl bawhlung an leknak ah an sual aw ciamco mi ka rualpa in video clip in rak kuat dah! Milai cu thintawi thei mi kan si vekin hliam aw thei mi tla kan si. ZOcio khalin lehnak cu tumtah mi ngah dingin pawlkom awknak hmanrua asi t icing ringring nuam aw zetin lek uhsi.

 

Santhar san, leitlun khawmual tinah santhar hmanrua le bungrua tthatha pawl cu Santhar Chin mino pawl hrangah asi ve, canpualtha van sangka cu Chin mino pawl hrangah on asi zo, leitlun khawmual tinah Chin mino zatel an tlar aw theh tlang. Kan miphun thuanthu cu ziangtluk sang, ziangthluk hla kan fehpi ding timi cu nang le kei in tuisunah kan hril mi, kan tuah mi parah a hngat aw aw asi. Chin Miphun Pathian in Chin mino hrang canpualtha van sangka a ong zo! A tuvekin lungrualnakin lungkhat ten kekar vivo uhsi!

 

Pathian in thlawsuah lo pe hram sheh!

 

A tuah kan zapi ten,

 

CHIN YOUTH ROCKS! CHIN YOUTH ROCKS! CHIN YOUTH ROCKS!

 KAN CHIN MIPHUN PATHIAN NAN ZATE'N THLAWSUAH LO PE HRAM SEH!